Гледиште на Библијата

Дали бракот треба да биде доживотна заедница?

ЗОШТО дури и да се постави ова прашање? Зарем бракот не е, да ги цитираме брачните завети кои се даваат на Западот, „во добро и во лошо“ и „додека смртта не нѐ раздели“? Да, во брачните завети честопати се наведува дека невестата и младоженецот преземаат доживотна обврска. Но, многумина повеќе не се сметаат себеси обврзани да ги одржат ваквите свечени ветувања. Брачните двојки се разведуваат во алармантни размери — некои по неколку месеци, а други по неколку децении. Зошто опаѓа почитта кон бракот? Библијата ни дава одговор.

Ве молиме, разгледајте ги стиховите од 2. Тимотеј 3:1—3 и споредете ги со она што го гледате во светот денес. Делумно, овие стихови гласат: „Во последните денови ќе настанат критични времиња со кои тешко ќе се излегува на крај. Зашто луѓето ќе бидат себељубиви, љубители на пари . . . неблагодарни, нелојални, без природна наклоност, непристапни за каков и да е договор . . . без самосовладување“. Ова пророштво зрачи со впечатлива точност. Ваквите ставови оштетиле и ослабнале многу брачни врски во светот, а доказ за тоа се високите стапки на развод.

Очигледно, многу луѓе изгубиле почит кон бракот. Со оглед на ова, можеби ќе се запрашаме: Дали бракот треба да се сфати толку сериозно? Постои ли такво нешто како што е светост на бракот? Како треба христијаните да гледаат на бракот? Каква помош им нуди Библијата на брачните двојки денес?

Дали Божјето гледиште се променило?

Во почетокот, Бог не зборувал за брачната врска како за привремена. Во Битие 2:21—24 се раскажува како ги сврзал првите маж и жена, и таму не се спомнува никаква алтернатива за развод или одвојување. Напротив, 24. стих гласи: „Човекот ќе ги остави татка си и мајка си, и ќе се прилепи кон својата жена; и тие ќе станат едно тело“. Што значи овој стих?

Размислете за човечкото тело, како неговите различни ткива се испреплетени без да има никаков шев и како коските се составуваат во цврсти зглобови без да има никакво триење. Какво единство! Каква издржливост! Но, колкава само е агонијата кога овој ненадминлив организам ќе биде сериозно повреден! Значи, изразот „едно тело“, кој се спомнува во Битие 2:24, ја нагласува интимноста и постојаноста на брачната заедница. Исто така, тој дава индиректно предупредување за големата болка која настанува ако се прекине таа врска.

Иако ветровите на промена изминатите милениуми ги обликуваа и ги преобликуваа човечките гледишта, Бог сѐ уште гледа на бракот како на доживотна обврска. Пред околу 2.400 години, некои Евреи почнале да ги напуштаат своите први сопруги и да се женат со помлади жени. Бог ја осудил оваа практика и преку пророкот Малахија изјавил: „,Морате да се чувате во поглед на вашиот дух и никој да не постапува неверно со сопругата на својата младост. Зашто тој мрази развод‘, рекол Јехова Богот Израелов“ (Малахија 2:15, 16, NW).

Повеќе од четири века подоцна, Исус го потврдил Божјето првобитно гледиште за бракот кога го цитирал стихот од Битие 2:24 а потоа заповедал: „Бог што впрегнал во јарем, ниеден човек да не разделува“ (Матеј 19:5, 6). По неколку години, апостол Павле дал упатство „жената да не си заминува од мажот“ и „мажот да не ја остава својата жена“ (1. Коринќаните 7:10, 11). Овие стихови точно го наведуваат Божјето гледиште за бракот.

Дали Библијата дозволува бракот некогаш да се прекине? Да, бракот завршува кога ќе умре еден од брачните партнери (1. Коринќаните 7:39). И прељубата го поништува бракот ако недолжниот партнер донесе таква одлука (Матеј 19:9). Во спротивно, Библијата ги охрабрува двојките да останат заедно.

Како да се направи бракот долготраен

Бог сака бракот да трае, но не како борба за опстанок туку како едно среќно патување. Тој сака сопругот и сопругата да ги решат своите проблеми и длабоко да уживаат во меѓусебното дружење. Неговата Реч дава водство за среќен, долготраен брак. Ве молиме, забележете ги следниве библиски стихови.

Ефешаните 4:26: „Сонцето да не зајде над вашата раздразнетост“.a Еден среќно оженет човек смета дека овој стих му помага нему и на неговата сопруга брзо да ги решаваат расправиите. „Ако не можете да спиете по некоја расправија, нешто не е во ред. Не можете да дозволите проблемот да трае“, вели тој. Понекогаш, тој и неговата сопруга отворено разговараат за проблемите до доцна во ноќта. Но, тоа е делотворно. Тој додава: „Применувањето на библиските начела носи прекрасни резултати“. Правејќи го тоа, овој човек и неговата сопруга се во среќен брак 42 години.

Колошаните 3:13: „Поднесувајте се еден со друг и простувајте си спремно еден на друг“. Еден сопруг објаснува како тој и неговата сопруга го примениле ова: „Брачните партнери можат да се изнервираат меѓусебно без да си сторат ништо лошо, бидејќи секој има слабости и навики кои им сметаат на другите луѓе. Се поднесуваме еден со друг не дозволувајќи овие работи да застанат меѓу нас“. Несомнено, ваквиот став ѝ помогнал на оваа двојка во текот на 54-те години колку што трае нивниот брак!

Примената на ваквите библиски начела ја зајакнува врската која ги сврзува сопругот и сопругата. На тој начин нивниот брак може да биде радосен, задоволувачки и да трае цел живот.

[Фуснота]