Чекор 5

Направи распоред и држи се за него

Зошто е важен овој чекор? Распоредите се важен дел од животот на еден возрасен човек. Работата, религијата, па дури и разонодата обично се одвиваат по некој распоред. Родителите ќе им направат штета на своите деца ако не ги научат да си го планираат времето и да се држат за распоред. Од друга страна, д-р Лоренс Стајнберг, професор по психологија, вели: „Истражувањата покажуваат дека децата, кога имаат правила и распоред, се чувствуваат безбедни и сигурни, се учат на самоконтрола и стекнуваат самодоверба“.

Зошто е тешко: Денес се живее забрзано. Многу родители мораат да работат до доцна, па им останува малку време за децата. За да се направи и да се следи распоред, потребна е самодисциплина и решеност, зашто децата во почетокот сигурно ќе се бунат за распоредот.

Решение: Држи се за библиското начело: „Сѐ нека биде пристојно и така како што е редот“ (1. Коринќаните 14:40). На пример, кога децата се мали, многу родители им одредуваат точно време за легнување. Но, тоа време треба да биде пријатно. Татјана од Грција има две ќеркички. Таа вели: „Кога ги легнувам девојчињата, ги гушкам и им раскажувам што сѐ правела мамичка додека тие биле на училиште. Потоа ги прашувам дали сакаат и тие да ми раскажат што им се случило дента. Така ги опуштам, и честопати отворено ми кажуваат како си поминале“.

Костас, мажот на Татјана, им чита приказни на девојчињата. Тој вели: „Разговараме за приказната, но честопати разговорот се свртува на она што нив ги интересира или ги мачи. Тоа никогаш не успева ако само им речам да ми кажат што ги мачи“. Се разбира, како што растат децата, би било добро да го поместуваш времето за легнување. Но, ако ја задржиш навиката, веројатно децата и понатаму ќе го користат тоа време за да разговараат со тебе.

Исто така, би било мудро семејствата да имаат навика да јадат заедно барем еднаш дневно. За да се стекне оваа навика, можеби семејствата ќе треба да го усогласат времето. Чарлс, кој има две ќерки, вели: „Понекогаш си доаѓам доцна од работа. Жена ми може да им даде на девојчињата да поткаснат нешто за да издржат додека да се вратам, но секогаш чека сите да бидеме дома за да седнеме заедно како семејство. Додека јадеме, разговараме за тоа што ни се случило дента, разгледуваме некој библиски стих, разговараме за проблемите и се смееме заедно. Немате претстава колку придонесува оваа навика за среќата на нашето семејство“.

За успешно да го направиш овој чекор, не дозволувај материјалните работи да ви ги нарушат семејниот распоред и навиките. Држи се за библискиот совет ,да процениш што е најважно‘ (Филипјаните 1:10).

Што уште можат да направат родителите за да имаат подобра комуникација со своите деца?

[Истакната мисла на страница 7]

„Сѐ нека биде пристојно и така како што е редот“ (1. Коринќаните 14:40).