Младите прашуваат

Погрешно ли е да си популарен?

Пополни го празното место.

․․․․․ е добро да си популарен.

А) Секогаш
Б) Понекогаш
В) Никогаш не

ТОЧНИОТ одговор е под „Б“. Зошто? Бидејќи да се биде популарен значи да се биде сакан од многу луѓе — а тоа не е секогаш погрешно! Библијата претскажала дека христијаните ќе бидат „светлина на народите“ и дека луѓето ќе бидат привлечени кон нив (Исаија 42:6; Дела 13:47). Во таа смисла може да се каже дека христијаните се популарни.

Си знаел ли дека...

Исус бил популарен. Дури и како млад имал „наклоност кај Бог и кај луѓето“ (Лука 2:52). А Библијата вели дека, како возрасен човек, Исус ‚го следел многу народ од Галилеја и од Декаполис и од Ерусалим и од Јудеја и од другата страна на Јордан‘ (Матеј 4:25).

Зошто тоа било во ред?

Затоа што Исус не барал слава и не гледал по секоја цена да биде омилен кај луѓето ниту, пак, очајно се трудел да ја стекне нивната почит. Тој едноставно го правел она што е исправно и токму затоа некои луѓе го прифатиле (Јован 8:29, 30). Но, бил свесен и дека луѓето се превртливи и дека нивната наклоност е само привремена. Знаел дека на крајот ќе го убијат! (Лука 9:22).

Заклучок

Популарноста е како богатство. Не е погрешно да ја имаш. Проблемот е во тоа на што сѐ се спремни некои за да ја добијат — или за да ја задржат.

Пази!

Многу млади би направиле сѐ само за да бидат популарни. Некои им се умилкуваат на другите и се поведуваат по мноштвото. Други се грубијани и сакаат насила да изнудат восхит — макар и со заплашување.a

Како што гледаш, има повеќе патишта што водат до популарност. На следните страници ќе разгледаме три од нив — два по кои е опасно да се оди и еден што е многу подобар.

Статии од рубриката „Младите прашуваат“ има и во други броеви од списанието Разбудете се! кое можеш да го симнеш од веб-страницата www.jw.org

a Во Библијата се спомнуваат грубијани наречени „нефили“ за кои се вели и дека биле „прочуени луѓе“. Ним им било најважно да си стекнат слава за себе (1. Мојсеева 6:4).

ПАТ ДО ПОПУЛАРНОСТ

ТИП БЕЗ СВОЕ ЈАС

Сакам да бидам прифатен од другите.
За да ме прифатат, морам да бидам како нив.

„Пробав да се сменам само за да се претопам со другите. На почетокот, имаше некаков ефект. Но, подоцна сфатив дека никогаш не треба да се правиш нешто што не си само за другите да те прифатат“ (Никол).

Библиско начело: „Не поведувај се по мнозинството за да правиш зло“ (2. Мојсеева 23:2).

ГРУБИЈАН

Веќе сум популарен и сакам така и да остане.
Спремен сум на сѐ само за да останам популарен — па ако треба и да газам преку други.

„Децата знаат да бидат многу лоши, а бидејќи грубијаните се попопуларни, некој што е срамежлив ќе им поверува што и да кажат“ (Ракел).

Библиско начело: „Како што сакате луѓето да ви прават вам, така правете им и вие ним“ (Лука 6:31).

ПОДОБАР НАЧИН

Знај што сакаш. Библијата вели дека на зрелите ‚моќта на согледување преку искуство им е извежбана да разликува добро и зло‘ (Евреите 5:14).

Ако се држиш за трите предлози одлево, можеби нема да бидеш толку популарен, но ќе те сакаат оние што го сакаат Бог!
Не отстапувај од твоите верувања. Биди како Исус Навин, кој со увереност рекол: „Изберете си денес кому ќе му служите... А јас и мојот дом ќе му служиме на Јехова!“ (Исус Навин 24:15).
Биди уверен дека си го избрал вистинскиот пат. Апостол Павле го потсетил Тимотеј: „Бог не ни даде дух кој нѐ прави плашливи, туку дух кој ни дава сила“ (2. Тимотеј 1:7).

ШТО ВЕЛАТ ДРУГИ МЛАДИ

Мелиса — Нормално, и ти можеш да бидеш како и сите други во школото. Ама, тоа е многу досадно! Како христијанин се издвојуваш од другите во позитивна смисла. Тоа не те прави чуден, туку попријатен.

Ешли — На училиште, не бев меѓу популарните и не ми беше сеедно. Но, тогаш ќе отидев на состанок и ќе се најдев меѓу пријатели кои ме сакаат таква каква што сум. Во тој момент, ја снемуваше секоја желба да им се допаднам на другите на училиште.

Филип — Ако им покажеш на другите дека ти значат, полесно ќе те прифатат. Во последно време, гледам да правам по нешто за моите пријатели, макар и само ситница, а тоа ми помага да бидам поблизок со нив.