Како ќе ти помогне молитвата

Памела се разболела од рак и побарала лекарска помош. Меѓутоа, го молела и Бог да ѝ даде сила да издржи во таа тешка ситуација. Дали молитвата ѝ помогнала?

Таа вели: „Додека примав терапија, честопати ме обземаше голем страв. Но, кога ќе му се помолев на Јехова Бог, ќе почувствував спокој и паниката ќе исчезнеше. Сѐ уште имам хронична болка, но молитвата ми помага да останам позитивна. Кога некој ќе ме праша како сум, обично велам: ’Не сум баш најдобро, ама сум со ведар дух!‘“.

Се разбира, не треба да чекаме да нѐ снајде нешто сериозно за да почнеме да се молиме. Сите ние се бориме со некакви проблеми, било големи било мали, и потребна ни е помош за да излеземе на крај со нив. Може ли молитвата да ни помогне?

Во Библијата пишува: „Фрли го своето бреме на Јехова, и тој ќе те поткрепи. Никогаш нема да дозволи праведникот да се сопне“ (Псалм 55:22). Колку утешни зборови! Како може да ти помогне молитвата? Кога му се молиш на Бог на исправен начин, тој ќе ти даде сѐ што ти е потребно за да се справиш со проблемите. (Види ја рамката „Што можеш да добиеш преку молитвата“.)

Што можеш да добиеш преку молитвата

Внатрешен мир

„Изнесете му ги своите барања на Бог. И мирот Божји, кој ја надминува секоја мисла, ќе ги чува вашите срца и вашиот ум преку Христос Исус“ (Филипјаните 4:6, 7). Ако му кажеш на Бог што те загрижува, тој ќе ти помогне да останеш смирен и да постапиш мудро кога си под стрес.

Мудрост од Бог

„Ако некому од вас му недостига мудрост, нека бара од Бог, зашто тој им дава на сите великодушно и без прекорување, и ќе му ја даде“ (Јаков 1:5). Кога сме под притисок, понекогаш се случува да донесеме лоша одлука. Ако го молиш Бог за мудрост, тој може да те потсети на многуте корисни начела што се запишани во неговата Реч, Библијата.

Сила и утеха

„Сѐ можам со помош на оној што ми дава сила“ (Филипјаните 4:13). Бидејќи е семоќен Бог, Јехова може да ти даде сила да се справиш со проблемите или да истраеш во тешки ситуации (Исаија 40:29). Во Библијата, Јехова уште е наречен и „Богот на секоја утеха“. Тој може да нѐ утеши „во секоја наша неволја“ (2. Коринќаните 1:3, 4).

КАКО И ТЕБЕ ДА ТИ ПОМОГНЕ МОЛИТВАТА?

Јехова не те присилува, туку те повикува да му се молиш затоа што те сака (Еремија 29:11, 12). Но, што ако мислиш дека Бог досега не ти одговорил на молитвите? Не се разочарувај и не се откажувај. Родителите што си ги сакаат децата можеби нема да им помогнат на децата онака како што тие очекуваат или тогаш кога тие очекуваат. Родителите веројатно имаат подобро решение. Но, едно е сигурно: добрите родители им помагаат на своите деца.

Јехова Бог — најдобриот родител — сака да ти помогне и тебе. Ако добро размислиш за библиските начела што ги разгледавме и ако правиш сѐ што е во твоја моќ за да ги примениш, Бог ќе одговори на твоите молитви на најдобриот можен начин! (Псалм 34:15; Матеј 7:7-11).