തീരദേശ ഭീമൻമാ​രെ പ്രജനനം ചെയ്യൽ

കാനഡയിലെ ഉണരുക! ലേഖകൻ

ഉത്തും​ഗ​ങ്ങ​ളായ വൃക്ഷനി​ര​ക​ളു​ടെ ഇടയി​ലൂ​ടെ നടക്കു​ന്നതു തീർച്ച​യാ​യും ഒരുവന്‌ ഉണ്ടാകാ​വുന്ന ഏററവും അത്ഭുതാ​വഹം, അസാധാ​രണം പോലും ആയ അനുഭ​വ​ങ്ങ​ളിൽ ഒന്നാണ്‌. പ്രകാ​ശ​കി​ര​ണ​ങ്ങ​ളും വർണ്ണങ്ങ​ളും കാണു​ന്ന​തും സുഖശീ​ത​ള​മായ വായു ശ്വസി​ക്കു​ന്ന​തും പ്രശാ​ന്ത​ത​യും സമാധാ​ന​വും അനുഭ​വി​ച്ച​റി​യു​ന്ന​തും പ്രചോ​ദ​നാ​ത്മകം തന്നെയാണ്‌.

വടക്കേ അമേരി​ക്ക​യി​ലെ വടക്കു​പ​ടി​ഞ്ഞാ​റൻ പസഫിക്‌ അതിന്റെ വിശാ​ല​മായ വനപ്ര​ദേ​ശ​ങ്ങൾക്കു പേരു​കേ​ട്ട​താണ്‌. പർവ്വത​ങ്ങ​ളി​ലും താഴ്‌വ​ര​ക​ളി​ലും സമു​ദ്ര​വ​ങ്ക​ങ്ങ​ളി​ലും പ്രസി​ദ്ധ​മായ തീര​ദേ​ശ​ഭീ​മൻമാർ—സ്‌തൂ​പി​കാ​കാര പുഷ്‌പ​മ​ഞ്‌ജരി വഹിക്കുന്ന പാഴ്‌ത്ത​ടി​കൾ—സമൃദ്ധ​മാ​യി വളരുന്നു. ഹെം​ലോക്‌, ബാൾസം, കാററാ​ടി​മരം, ദേവദാ​രു, സ്‌പ്രൂസ്‌, നീർമ​രുത്‌ എന്നീ മരങ്ങൾ ഇവിടെ ഉയരത്തിൽവ​ള​രു​ന്നു. പേരു​കേട്ട ഡഗ്ലസ്സ്‌ ഫർ മരത്തിനു 90 മീററ​റോ​ളം ഉയരത്തിൽ വളരാൻ കഴിയും!

എന്നിരു​ന്നാ​ലും ഈ മരങ്ങൾക്ക്‌ അവയുടെ പ്രൗഢി​യേ​ക്കാൾ വളരെ​യ​ധി​കം കാര്യങ്ങൾ ഉണ്ട്‌. മരം​വെ​ട്ടു​കാർക്കും അവ കയററി​ക്കൊ​ണ്ടു​പോ​കു​ന്ന​വർക്കും നിരത്തു​നിർമ്മാ​താ​ക്കൾക്കും തടിമി​ല്ലിൽ ജോലി ചെയ്യു​ന്ന​വർക്കും കെട്ടി​വ​ലി​ക്കുന്ന ബോട്ടു​കൾ പ്രവർത്തി​പ്പി​ക്കു​ന്ന​വർക്കും മററു​ള്ള​വർക്കും അവ പ്രാധാ​ന്യ​മു​ള്ള​വ​യാണ്‌. ഉപഭോ​ക്താ​ക്കളെ തൃപ്‌തി​പ്പെ​ടു​ത്തു​ന്ന​തി​നു നിർമ്മി​ക്ക​പ്പെ​ട്ടി​ട്ടുള്ള ആയിര​ക്ക​ണ​ക്കി​നു സാധന​ങ്ങൾക്കു​വേ​ണ്ടി​യുള്ള അസംസ്‌കൃ​ത​വ​സ്‌തു​ക്കൾ ഉത്‌പാ​ദി​പ്പി​ക്കു​ന്നത്‌ ഈ മരങ്ങളിൽ നിന്നാണ്‌. ശാസ്‌ത്ര​ജ്ഞൻമാ​രും വന നടത്തി​പ്പു​കാ​രും അവയുടെ വളർച്ച ത്വരി​ത​പ്പെ​ടു​ത്തു​ന്ന​തി​നും വനത്തിന്റെ ആദായം വർദ്ധി​പ്പി​ക്കു​ന്ന​തി​നും വഴികൾ കണ്ടെത്താൻ പ്രയത്‌നി​ക്ക​ത്ത​ക്ക​വണ്ണം മരങ്ങൾ അത്ര പ്രധാ​ന​മാണ്‌. ഇതു ചെയ്യു​ന്ന​തിന്‌ അവർ ശാസ്‌ത്ര​ത്തി​ലേ​ക്കും വൃക്ഷ​പ്ര​ജ​ന​ന​ക​ല​യി​ലേ​ക്കും തിരി​ഞ്ഞി​രി​ക്കു​ന്നു.

വൃക്ഷ​പ്ര​ജ​നനം എന്തിന്‌?

വനത്തിലെ വൃക്ഷങ്ങൾ ഒരു ജനക്കൂ​ട്ട​ത്തി​ലെ മുഖങ്ങൾപോ​ലെ വ്യതി​രി​ക്ത​മാണ്‌. ഓരോ​ന്നും മറെറാ​ന്നിൽനിന്ന്‌ ഉയരത്തി​ലും പടർപ്പി​ലും പത്രപാ​ളി​യി​ലും അല്‌പം വ്യത്യ​സ്‌ത​മാണ്‌. നിങ്ങൾക്കു കാണാൻ കഴിയാത്ത വിധങ്ങ​ളി​ലും അതു വ്യത്യാ​സ​പ്പെ​ട്ടേ​ക്കാം.

ചില മരങ്ങൾ മററു​ള്ള​വ​യേ​ക്കാൾ വേഗം വളരുന്നു. ചിലവ മററു​ള്ള​വ​യേ​ക്കാൾ കൂടുതൽ ബലവും കടുപ്പ​വും ശുദ്ധത​യും (മുഴക​ളി​ല്ലാത്ത) ഉള്ള തടികൾ പ്രദാനം ചെയ്യുന്നു. മററു ചിലതി​നു കീടങ്ങൾക്കും രോഗ​ങ്ങൾക്കും എതിരെ കൂടുതൽ പ്രതി​രോ​ധ​ശ​ക്തി​യുണ്ട്‌. ഈ കാര്യ​ങ്ങ​ളെ​ല്ലാം തടിവ്യ​വ​സാ​യ​ത്തി​നു വളരെ മൂല്യ​വ​ത്താണ്‌.

വനനട​ത്തി​പ്പു​കാർക്കു സ്വാഭാ​വി​ക​മാ​യി വേണ്ടതു പെട്ടെന്നു വളരു​ക​യും രോഗത്തെ ചെറു​ത്തു​നിൽക്കു​ക​യും ഉയർന്ന ഗുണമുള്ള തടി നൽകു​ക​യും ചെയ്യുന്ന മരങ്ങളാണ്‌. മുറി​ക്കു​ന്ന​തി​നും കൊണ്ടു​പോ​കു​ന്ന​തി​നും അറുക്കു​ന്ന​തി​നും ഏറെയും ഒരേ വലിപ്പ​ത്തി​ലുള്ള മരങ്ങളാണ്‌ അത്യന്തം അഭില​ഷ​ണീ​യം. എന്നാൽ അനു​യോ​ജ്യ​മായ മരങ്ങൾ—19-ാം നൂററാ​ണ്ടി​ന്റെ മദ്ധ്യത്തിൽ മരം​വെ​ട്ടു​കാർ ആദ്യം എത്തിയ​പ്പോൾ ഇവി​ടെ​യു​ണ്ടാ​യി​രുന്ന പഴയ മരങ്ങൾ—മുറിച്ചു കഴിഞ്ഞി​രി​ക്കു​ന്നു. ഇന്നു മുറി​ക്കുന്ന മരങ്ങൾ, രണ്ടാമതു വളർന്ന മരങ്ങൾ, ചെറു​താണ്‌, അവ വളരെ സാവധാ​നം വളരുന്നു, അവയ്‌ക്കു കുറച്ചു തടി​യേ​യു​ള്ളു, കൂടാതെ ഒരേ വലിപ്പ​ത്തി​ലു​ള്ള​വ​യു​മല്ല. അഭില​ഷ​ണീയ ഗുണങ്ങ​ളുള്ള മരങ്ങൾ ഉത്‌പാ​ദി​പ്പി​ക്കു​ക​യെ​ന്നത്‌ ഉത്‌പാ​ദ​കന്റെ ജോലി​യാണ്‌. ഇത്‌ ഇപ്പോൾ വടക്കു​കി​ഴക്കൻ പസഫിക്‌ മേഖല​യിൽ പ്രവർത്തി​ക്കുന്ന വൃക്ഷസം​വർദ്ധന പരിപാ​ടി​ക​ളി​ലേക്ക്‌ നയിച്ചി​രി​ക്കു​ന്നു.

ഇതു ചെയ്യുന്ന വിധം

വൃക്ഷ​പ്ര​ജ​നനം നല്ല ഇനങ്ങളു​ടെ തിര​ഞ്ഞെ​ടു​പ്പോ​ടെ തുടങ്ങു​ന്നു. പുനഃ​വ​ന​വ​ത്‌ക്ക​രണം നടത്താൻ ഉദ്ദേശി​ക്കു​ന്നി​ടത്തു മരക്കൂ​ട്ട​ങ്ങ​ളു​ടെ ഇടയിൽ അധിക​ഗു​ണ​മുള്ള വൃക്ഷങ്ങൾ—പ്രജന​ന​ത്തിന്‌ ഏററവും അധികം ജനിതക സാധ്യത ഉള്ള മരങ്ങൾ—അന്വേ​ഷിച്ച്‌ ഒരു വിദഗ്‌ദ്ധ​സം​ഘം പര്യ​വേ​ക്ഷണം നടത്തുന്നു.

മരക്കൂ​ട്ട​ങ്ങ​ളു​ടെ ഇടയി​ലൂ​ടെ​യുള്ള പര്യ​വേ​ക്ഷ​ണ​യാ​ത്ര വനത്തി​ലൂ​ടെ​യുള്ള ഒരു ഉല്ലാസ​യാ​ത്ര പോലെ തോന്നു​ന്നു​വെ​ങ്കിൽ അതു പൂർണ്ണ​മാ​യും സത്യമല്ല. അതു വളരെ കഷ്ടപ്പാടു നിറഞ്ഞ ഒരു അന്വേ​ഷ​ണ​മാണ്‌. ഭാവി​യി​ലെ ഓരോ അധിക​ഗു​ണ​വൃ​ക്ഷ​വും സ്വഭാ​വ​വി​ശേ​ഷ​ത​ക​ളു​ടെ ഒരു പട്ടിക​യോ​ടു യോജി​ക്കണം—നല്ല ശിഖ​രോ​ത്‌പാ​ദനം, ത്വരി​ത​വ​ളർച്ച, വളവി​ല്ലാത്ത കാണ്ഡം, രോഗ​ത്തി​ന്റെ അഭാവം അങ്ങനെ പലതും. എന്നാൽ ഈ ജോലി​യിൽ ബാഹ്യാ​കാ​രം വഴി​തെ​റ​റി​ക്കു​ന്ന​താ​യി​രി​ക്കാൻ കഴിയും. ബലവത്തായ, ഗംഭീ​ര​മായ, 40 മീററ​റുള്ള ആ ദേവതാ​ര​മരം നല്ല പൊക്ക​മു​ള്ള​താ​യി​രി​ക്കാം, എന്നാൽ അതു പെട്ടെന്നു വളർന്ന​താ​ണോ അതോ കേവലം പഴക്കമു​ള്ള​താ​ണോ? അതിനു നല്ല നിലയോ നീർവാർച്ച​യോ ഉണ്ടായി​രി​ക്കു​ന്നു​വോ, അല്ലെങ്കിൽ അതിന്റെ വലിപ്പം മികച്ച പാരമ്പ​ര്യ​സ്വ​ഭാ​വം നിമി​ത്ത​മാ​ണോ?

ഒരിക്കൽ തൃപ്‌തി​ക​ര​മായ ഒരു മാതൃ​കാ​വൃ​ക്ഷം കണ്ടെത്തി​ക്ക​ഴി​ഞ്ഞാൽ നാട​കെട്ടി അതിനു നമ്പരി​ടു​ന്നു. എന്നാൽ മികച്ച ഗുണനി​ല​വാ​ര​മുള്ള മററു മരങ്ങൾ ഉത്‌പാ​ദി​പ്പി​ക്കാൻ അവ ഇപ്പോൾ എങ്ങനെ ഉപയോ​ഗി​ക്കാൻ കഴിയും? അതു പിഴു​തെ​ടു​ത്തു വീണ്ടും മറെറ​വി​ടെ​യെ​ങ്കി​ലും നടുന്ന​തു​കൊണ്ട്‌ ഒരു നേട്ടവു​മില്ല. അതിന്റെ വിത്തുകൾ എടുത്തു നട്ടാലും പ്രയോ​ജ​ന​മില്ല. ഇതിനു കാരണം അവയെ ജനിത​ക​മാ​യി മലിന​മാ​ക്കി​ക്കൊ​ണ്ടു ചുററു​മുള്ള വൃക്ഷങ്ങ​ളിൽ ഏതാണ്‌ അവയുടെ വിത്തു​ക​ളിൽ പരാഗണം നടത്തി​യത്‌ എന്നറി​യാൻ യാതൊ​രു മാർഗ്ഗ​വു​മി​ല്ലാ​ത്ത​താണ്‌. ഈ മരത്തിൽനി​ന്നുള്ള ഒരു കമ്പാണ്‌ ആവശ്യ​മാ​യി​രി​ക്കു​ന്നത്‌. എന്നാൽ അതെങ്ങനെ ലഭിക്കും?

ഏററവും താഴത്തെ ശിഖരം നിലത്തു​നി​ന്നു വളരെ ഉയരത്തി​ലാണ്‌. അതു​കൊണ്ട്‌ ഉന്നം തെററാ​തെ വെടി​വെ​ക്കുന്ന ഒരുവൻ തന്റെ തോക്ക്‌ ഉയർത്തി വെടി​വെ​ക്കു​ന്നു. ബലവത്തായ ഒരു ശിഖര​ത്തി​ന്റെ അഗ്രം താഴേക്കു വീഴുന്നു. മുള എന്നു വിളി​ക്ക​പ്പെ​ടുന്ന ഈ കമ്പ്‌ എടുത്തു വിത്തി​നു​വേണ്ടി വളർത്തുന്ന ഒരു വൃക്ഷക്കൂ​ട്ട​ത്തി​ലെ പ്രായം കുറഞ്ഞ ഒരു മരത്തിന്റെ മൂലകാ​ണ്ഡ​ത്തിൽ ഒട്ടിക്കു​ന്നു. അവിടെ ഒട്ടിച്ച മുള മാതൃ​വൃ​ക്ഷ​ത്തി​ന്റെ ഒരു ജനിതക പകർപ്പാ​യി—ഒരു ക്ലോൺ ആയി—വളരുന്നു.

ഒട്ടിക്കുന്ന ക്ലോണു​കൾ വനത്തിലെ വൃക്ഷങ്ങ​ളാൽ പരാഗണം ചെയ്യ​പ്പെ​ടാ​തി​രി​ക്കാൻ വിത്തി​നു​വേണ്ടി വളർത്തുന്ന വൃക്ഷക്കൂ​ട്ട​ത്തി​ന്റെ പരിസരം ശ്രദ്ധാ​പൂർവം തിര​ഞ്ഞെ​ടു​ക്കു​ന്നു. ഈ ക്ലോണു​കൾ പൂർണ്ണ​വ​ളർച്ച പ്രാപി​ക്കു​മ്പോൾ വായു​വി​ലൂ​ടെ​യുള്ള പരാഗ​ണ​ത്തിൽനി​ന്നു കടലാ​സു​കൂ​ടു​കൊ​ണ്ടു പൊതി​ഞ്ഞു സംരക്ഷി​ക്കുന്ന പുനരു​ത്‌പാ​ദക പുഷ്‌പ​ങ്ങളെ ഹൈ​പ്പോ​ടെർമിക്‌ സൂചി കൊണ്ടു കൃത്രി​മ​മാ​യി പരാഗണം നടത്തുന്നു. തത്‌ഫ​ല​മാ​യി ലഭിക്കുന്ന വിത്തു​ക​ളിൽനി​ന്നു ബീജാ​ങ്കു​ര​ങ്ങ​ളു​ടെ അല്ലെങ്കിൽ ഇളം ചെടി​ക​ളു​ടെ ഒരു പുതിയ തലമുറ വളരുന്നു. അധിക​ഗു​ണ​മുള്ള വൃക്ഷത്തി​ന്റെ ഉത്ഭവവും പരാഗ​രേ​ണു​വി​ന്റെ ഉത്ഭവസ്ഥാ​ന​വും മററു ധാരാളം വിവര​ങ്ങ​ളും ചുവടു​പി​ടി​ച്ചു ചെല്ലാൻ കഴിയ​ത്ത​ക്ക​വണ്ണം ഈ പ്രക്രി​യ​യി​ലെ എല്ലാഘ​ട്ട​ങ്ങ​ളി​ലും ഓരോ തൈയ്‌ക്കും വിശദ​വി​വ​രങ്ങൾ സൂക്ഷി​ക്കണം.

തൈക​ളു​ടെ വളർച്ച എങ്ങനെ​യു​ണ്ടെന്നു കാണാൻ അവ അധിക​ഗു​ണ​മുള്ള വൃക്ഷത്തി​ന്റെ സമീപ​ത്തുള്ള ഒരു സ്ഥലത്തേക്കു മാററി​ന​ടു​ന്നു. മനുഷ്യ​സ​ന്ത​തി​ക​ളെ​പ്പോ​ലെ മരങ്ങളും അവയുടെ മാതൃ​വൃ​ക്ഷ​ങ്ങളെ അനുകൂ​ല​മാ​യോ പ്രതി​കൂ​ല​മാ​യോ പ്രതി​ഫ​ലി​പ്പി​ച്ചേ​ക്കാം അവ നന്നായി വളരു​ന്നു​വെ​ങ്കിൽ അവയുടെ മുളകൾ രണ്ടാം തലമു​റ​യിൽപെട്ട വിത്തിൻതോ​പ്പി​ന്റെ അടിസ്ഥാ​ന​മാ​യി​ത്തീർന്നേ​ക്കാം. ഈ മുളക​ളിൽനി​ന്നുള്ള വിത്തുകൾ വാണി​ജ്യാ​ടി​സ്ഥാ​ന​ത്തിൽ ഒരു ഗ്രാമി​നു 18 രൂപവരെ വിലയ്‌ക്കു വിറേ​റ​ക്കാം. എന്നാൽ അവ മോശ​മായ ഫലമാണു കാണി​ക്കു​ന്ന​തെ​ങ്കിൽ അവയുടെ മാതൃ​വൃ​ക്ഷങ്ങൾ, ക്ലോണു​കൾ, ഉപവൃ​ക്ഷ​ത്തോ​ട്ട​ത്തിൽ നിന്നു പിഴു​തു​മാ​റ​റ​പ്പെ​ട്ടേ​ക്കാം, ഗുണ​മേൻമ​യുള്ള അവയുടെ മൂലവൃ​ക്ഷ​ങ്ങളെ പരിപാ​ടി​യിൽനി​ന്നു നീക്കം ചെയ്‌തേ​ക്കാം. അധിക​ഗു​ണ​മുള്ള പുതിയ വൃക്ഷങ്ങൾ കണ്ടെ​ത്തേ​ണ്ട​തുണ്ട്‌, ഈ വിഷമ​ക​ര​മായ പ്രക്രിയ വീണ്ടും ആരംഭി​ക്കു​ന്നു.

ഇതി​നെ​ല്ലാം വളരെ​യ​ധി​കം സമയം ആവശ്യ​മാണ്‌. വൃക്ഷോ​ത്‌പാ​ദകൻ തന്റെ വേലയു​ടെ ഫലമായി പൂർണ്ണ​വ​ളർച്ച​യെ​ത്തിയ ഒരു തലമു​റ​യെ​പ്പോ​ലും കാണാൻ പ്രതീ​ക്ഷി​ക്കാ​തി​രു​ന്നേ​ക്കാം. വിത്തി​നു​വേണ്ടി വളർത്തുന്ന ഒരു വൃക്ഷ​ത്തോപ്പ്‌ ഉപയോ​ഗ​യോ​ഗ്യ​മായ അളവിൽ വിത്തുകൾ ഉത്‌പാ​ദി​പ്പി​ക്കു​ന്ന​തി​നു പത്തുവർഷ​ത്തോ​ളം എടു​ത്തേ​ക്കാം. ഈ വൃക്ഷ​ത്തോ​പ്പി​ലെ മരങ്ങളു​ടെ തൈകളെ പരീക്ഷി​ച്ച​റി​യു​ന്ന​തി​നു മറെറാ​രു പത്തു വർഷം ആവശ്യ​മാണ്‌. ഒടുവിൽ, മുറി​ക്കാൻ മതിയായ വലിപ്പ​ത്തിൽ ഈ മരങ്ങൾ എത്തുന്ന​തി​നു മറെറാ​രു 50 മുതൽ 60 വരെ വർഷം ആവശ്യ​മാണ്‌.

അപകട​ങ്ങ​ളുണ്ട്‌

നേരത്തെ കുറി​ക്കൊ​ണ്ട​തു​പോ​ലെ ഒട്ടിച്ച മുളകൾ മോശ​മാ​യി വളരു​ക​യാ​ണെ​ങ്കിൽ അനേക​വർഷ​ങ്ങ​ളി​ലെ അദ്ധ്വാനം പാഴാ​യി​പ്പോ​യേ​ക്കാം. അതു​കൊണ്ട്‌, ഏററവും വിശി​ഷ്ട​വും അധിക​ഗു​ണ​മു​ള്ള​തു​മെന്നു തെളിഞ്ഞ ഒരു ചുരു​ങ്ങിയ എണ്ണം വൃക്ഷങ്ങ​ളോ​ടു പററി​നിൽക്കാൻ പ്രലോ​ഭനം കൂടു​ത​ലാണ്‌. എന്നാൽ ഇതു ചെയ്യു​ന്ന​തിൽ അപകട​ങ്ങ​ളുണ്ട്‌. അവ എന്താണ്‌?

ഓരോ വൃക്ഷവും ഓരോ വ്യക്തി​യേ​യും പോലെ (ഒരു​പോ​ലുള്ള ഇരട്ടക​ളോ ത്രിക​ങ്ങ​ളോ ഒഴിച്ച്‌) ജനിത​ക​മാ​യി അതുല്യ​മാണ്‌—ഒരു ജീൻപ്ര​രൂ​പം​തന്നെ. വൃക്ഷോ​ത്‌പാ​ദ​കന്റെ ജീൻ ശേഖര​ത്തി​ലെ ജീൻപ്ര​രൂ​പങ്ങൾ എത്ര കുറവും ആ ശേഖര​ത്തി​ലെ വ്യത്യസ്‌ത ജീനുകൾ എത്ര വ്യത്യ​സ്‌ത​വു​മാ​യി​രി​ക്കു​മോ അത്ര വലുതാ​യി​രി​ക്കും ഏതെങ്കി​ലും രോഗ​ത്താ​ലോ കീടത്താ​ലോ വൃക്ഷങ്ങ​ളു​ടെ ഒരു മുഴു​ത​ല​മു​റ​യെ​യും, ഒരു മുഴു​വ​ന​ത്തെ​ത​ന്നെ​യും തുടച്ചു​നീ​ക്കു​ന്ന​തി​ന്റെ അപകടം.

അതു​കൊണ്ട്‌ ഉപയോ​ഗി​ക്ക​പ്പെ​ടുന്ന ചില അധിക​ഗു​ണ​മുള്ള വൃക്ഷങ്ങൾ അത്ര​വേഗം വളരു​ന്ന​തോ വേണ്ടത്ര വളവി​ല്ലാ​ത്ത​തോ അല്ലെങ്കിൽപോ​ലും വലിപ്പ​മേ​റിയ ഒരു ജീൻശേ​ഖരം ഉണ്ടായി​രി​ക്കു​ന്ന​താ​ണു ജ്ഞാനപൂർവകം. അനേകം അധിക​ഗു​ണ​മുള്ള വൃക്ഷങ്ങൾ ഉപയോ​ഗി​ക്കു​ന്നതു മൊത്ത​ത്തി​ലുള്ള വിനാ​ശ​ത്തി​ന്റെ അപകടത്തെ കുറയ്‌ക്കു​ന്നു.

വൃക്ഷ​പ്ര​ജ​ന​ന​ത്തി​ന്റെ ഭാവി

ഇന്നു നടത്ത​പ്പെ​ടുന്ന വൃക്ഷ​പ്ര​ജ​ന​ന​ത്തി​ന്റെ ഫലങ്ങൾ 50 വർഷം കഴിഞ്ഞേ ലഭിക്കു​ക​യു​ള്ളു​വെ​ങ്കി​ലും മെച്ചപ്പെട്ട വിത്തു​കൾകൊ​ണ്ടു നട്ട വനങ്ങൾ സാധാരണ വിത്തു​കൾകൊ​ണ്ടു നട്ടവ​യേ​ക്കാൾ 10 മുതൽ 20 വരെ ശതമാനം കുറഞ്ഞ സമയം​കൊ​ണ്ടു വില്‌പ​ന​യോ​ഗ്യ​മാ​യി​ത്തീ​രും എന്നുള്ള​താ​ണു ലാഭം. വൃക്ഷ​പ്ര​ജ​ന​ന​ത്തിന്‌ ഏതെങ്കി​ലും പ്രത്യേക പ്രദേ​ശ​ത്തു​നി​ന്നു ലഭിക്കുന്ന തടിയു​ടെ അളവ്‌ 25 ശതമാനം കണ്ട്‌ വർദ്ധി​പ്പി​ക്കാൻ കഴിയു​മെന്നു ചില വിദഗ്‌ദ്ധർ പ്രവചി​ക്കു​ന്നു. രോഗ​ത്തോ​ടും കീടങ്ങ​ളോ​ടു​മുള്ള മെച്ചമായ ചെറു​ത്തു​നി​ല്‌പ്‌, ബലമേ​റി​യ​തും ശുദ്ധവു​മായ തടി, മെച്ചപ്പെട്ട വിത്തു​ത്‌പാ​ദനം എന്നിവ​യോ​ടൊ​പ്പ​മുള്ള ഈ പ്രയോ​ജനം വൃക്ഷ​പ്ര​ജ​ന​നത്തെ വടക്കു​പ​ടി​ഞ്ഞാ​റൻ പസഫിക്‌ മേഖല​യി​ലുള്ള വനമേൽനോ​ട്ട​ത്തി​ന്റെ ഒരു മർമ്മ​പ്ര​ധാ​ന​ഭാ​ഗം ആക്കിത്തീർക്കു​ന്നു.

സമയം വൃക്ഷോ​ത്‌പാ​ദ​കന്റെ ശത്രു​വാ​യി നില​കൊ​ള്ളു​ന്നു. ഫലങ്ങൾ കാണു​ന്ന​തി​നും തീരു​മാ​നങ്ങൾ ചെയ്യു​ന്ന​തി​നും അടുത്ത​പ​ടി​യു​മാ​യി മുന്നോ​ട്ടു​പോ​കു​ന്ന​തി​നും ഏറെ സമയം എടുക്കു​ന്നു. മരങ്ങൾ, വിശേ​ഷി​ച്ചും സ്‌തൂ​പി​കാ​ഗ്ര​വൃ​ക്ഷങ്ങൾ, എല്ലായ്‌പ്പോ​ഴും നമ്മേക്കാ​ളേ​റെ​ക്കാ​ലം ജീവി​ച്ചി​രു​ന്നി​ട്ടുണ്ട്‌. എന്നാൽ മേലാൽ അത്‌ അങ്ങനെ​യാ​യി​രി​ക്ക​യി​ല്ലാത്ത ഒരു കാല​ത്തേക്കു ബൈബിൾ വിരൽ ചൂണ്ടുന്നു. “എന്റെ ജനത്തിന്റെ ആയുസ്സു വൃക്ഷത്തിൻറ ആയുസ്സു​പോ​ലെ ആകും” എന്ന്‌ അതു വാഗ്‌ദാ​നം ചെയ്യുന്നു. യഥാർത്ഥ​ത്തിൽ തന്റെ ജനം എന്നേക്കും ജീവി​ക്കു​മെന്നു ദൈവം വാഗ്‌ദത്തം ചെയ്യുന്നു. (യെശയ്യാ​വു 65:22; വെളി​പ്പാ​ടു 21:3, 4) മൃഗങ്ങ​ളി​ലും സസ്യങ്ങ​ളി​ലും ഇപ്പോ​ഴും ഒളിഞ്ഞു​കി​ട​ക്കുന്ന വിസ്‌മ​യ​ക​ര​മായ ജനിതക സാധ്യ​ത​യെ​ക്കു​റി​ച്ചു പര്യ​വേ​ക്ഷണം നടത്തു​ന്ന​തിന്‌ അന്നു മനുഷ്യർക്കു സമയമു​ണ്ടാ​യി​രി​ക്കും. (g92 10/22)

[16-ാം പേജിലെ ചിത്രം]

ഒരു വൃക്ഷത്തിൽനിന്ന്‌ ഒരു കമ്പു വെടി​വെ​ച്ചി​ടു​ന്നു