ബൈബി​ളി​ന്റെ വീക്ഷണം

“ബലഹീ​ന​പാ​ത്രം”—അത്‌ സ്‌ത്രീ​കൾക്ക്‌ ഒരു അപമാ​ന​മോ?

“അനുഭ​വ​പ​രി​ചയം, കഴിവ്‌, ബുദ്ധി എന്നിവ​യു​ടെ അടിസ്ഥാ​ന​ത്തിൽ വിധി​ക്കു​ന്ന​തി​നു പകരം സ്‌ത്രീ​കളെ ലൈം​ഗി​കാ​ടി​സ്ഥാ​ന​ത്തിൽ വിധി​ക്കു​ന്ന​തെ​ന്തി​നാണ്‌?”—ബെററി എ.

“തങ്ങൾ താണ സൃഷ്ടി​ക​ളാ​ണെന്നു വിചാ​രി​ക്കാൻ സ്‌ത്രീ​കൾ വ്യവസ്ഥ ചെയ്യ​പ്പെ​ട്ടി​രി​ക്കു​ന്നു.”—ലിൻ എച്ച്‌.

“ബലഹീ​ന​പാ​ത്രം” എന്ന ബൈബിൾ പദപ്ര​യോ​ഗം സ്‌ത്രീ​കളെ തരംതാ​ഴ്‌ത്തി​കാ​ണി​ക്കു​ന്നു​വോ? ചോദ്യം ചെയ്യ​പ്പെ​ടുന്ന ഈ ബൈബിൾ വാക്യം 1 പത്രൊസ്‌ 3:7 ആണ്‌. അത്‌ ഇപ്രകാ​രം പറയുന്നു: “അങ്ങനെ തന്നേ ഭർത്താ​ക്കൻമാ​രേ, നിങ്ങളു​ടെ പ്രാർഥ​നെക്കു മുടക്കം വരാതി​രി​ക്കേ​ണ്ട​തി​ന്നു വിവേ​ക​ത്തോ​ടെ ഭാര്യ​മാ​രോ​ടു​കൂ​ടെ വസിച്ചു, സ്‌ത്രീ​ജനം ബലഹീ​ന​പാ​ത്രം എന്നും അവർ ജീവന്റെ കൃപെക്കു കൂട്ടവ​കാ​ശി​കൾ എന്നും ഓർത്തു അവർക്കു ബഹുമാ​നം കൊടു​പ്പിൻ.”

പത്രോസ്‌ സഹക്രി​സ്‌ത്യാ​നി​കൾക്ക്‌ ഈ വാക്കുകൾ എഴുതി​യ​പ്പോൾ സ്‌ത്രീ​കൾക്ക്‌ പുരാതന പുറജാ​തി ലോക​ത്തിൽ മാത്രമല്ല, വിശ്വാ​സ​ത്യാ​ഗം ഭവിച്ച യഹൂദ സമുദാ​യ​ത്തി​ലും വളരെ കുറച്ച്‌ അവകാ​ശ​ങ്ങളേ ഉണ്ടായി​രു​ന്നു​ള്ളൂ. പത്രോ​സും ആദിമ​ക്രി​സ്‌ത്യാ​നി​ക​ളും അന്നു സ്‌ത്രീ​ക​ളെ​ക്കു​റി​ച്ചു​ണ്ടാ​യി​രുന്ന ഈ പ്രബല​മായ വീക്ഷണ​ഗ​തി​ക്കു വേണ്ടി വാദി​ക്കു​ക​യാ​യി​രു​ന്നോ?

താണതരം പാത്ര​ങ്ങ​ളോ?

പത്രോ​സി​ന്റെ വാക്കു​ക​ളു​ടെ ഒന്നാം നൂററാ​ണ്ടി​ലെ വായന​ക്കാർ “ബലഹീ​ന​പാ​ത്രം” എന്ന പദപ്ര​യോ​ഗ​ത്തി​ന്റെ അർഥം എങ്ങനെ വ്യാഖ്യാ​നി​ച്ചി​രി​ക്കണം? പാത്രം എന്നതിന്റെ ഗ്രീക്കു​പദം (സ്‌ക്യൂ​വൊസ്‌) അനേകം പ്രാവ​ശ്യം ഗ്രീക്കു തിരു​വെ​ഴു​ത്തു​ക​ളിൽ ഉപയോ​ഗി​ച്ചി​ട്ടുണ്ട്‌. അത്‌ വിവി​ധ​തരം പാത്രങ്ങൾ, പണിയാ​യു​ധങ്ങൾ, വീട്ടു​പാ​ത്രങ്ങൾ, ഉപകര​ണങ്ങൾ എന്നിവയെ പരാമർശി​ക്കു​ന്നു. സ്‌ത്രീ​കളെ “ബലഹീ​ന​പാ​ത്രം” എന്നു വിളി​ച്ച​പ്പോൾ പത്രോസ്‌ സ്‌ത്രീ​കളെ തരംതാ​ഴ്‌ത്തി​കാ​ണി​ക്കു​ക​യ​ല്ലാ​യി​രു​ന്നു. എന്തു​കൊ​ണ്ടെ​ന്നാൽ ആ വാക്കിന്റെ [ഇംഗ്ലീഷ്‌] പദം ഭർത്താ​വും ദുർബലൻ അഥവാ ബലഹീനൻ ആണെന്നു ധ്വനി​പ്പി​ക്കു​ന്നു. സ്‌ത്രീ​പു​രു​ഷൻമാ​രെ പരാമർശി​ക്കു​മ്പോൾ മററു ബൈബിൾ പാഠങ്ങ​ളും “മൺപാ​ത്രങ്ങ”ൾ (2 കൊരി​ന്ത്യർ 4:7) “കരുണാ​പാ​ത്രങ്ങ”ൾ (റോമർ 9:23) എന്നിങ്ങനെ സമാന​മായ ആലങ്കാ​രിക പദങ്ങൾ ഉപയോ​ഗി​ക്കു​ന്നു. സ്‌ത്രീ​പു​രു​ഷൻമാ​രിൽ “ബലഹീന”തയേറി​യ​വ​രാ​യി പത്രോസ്‌ സ്‌ത്രീ​കളെ ചിത്രീ​ക​രി​ക്കു​ന്നു​വെ​ന്നതു സത്യം തന്നെ. എന്നാൽ റോമർ 5:6-ലെ “ബലഹീനർ” എന്ന പദം എല്ലാ മനുഷ്യർക്കും—സ്‌ത്രീ​ക്കും പുരു​ഷ​നും ബാധക​മാ​കു​ന്നു. അതു​കൊണ്ട്‌ “ബലഹീ​ന​പാ​ത്രം” എന്ന പദം ആദിമ​ക്രി​സ്‌ത്യാ​നി​കൾ സ്‌ത്രീ​കൾക്ക്‌ അനാദ​ര​സൂ​ച​ക​മാ​യി കണക്കാ​ക്കി​യി​രി​ക്കാ​നി​ട​യില്ല.

പകരം, പത്രോ​സി​ന്റെ വാക്കുകൾ സ്‌ത്രീ​ക​ളു​ടെ സ്ഥാനം ഉയർത്തു​ന്ന​വ​യാ​യി വീക്ഷി​ക്ക​പ്പെ​ടു​മാ​യി​രു​ന്നു. പത്രോ​സി​ന്റെ നാളിൽ സ്‌ത്രീ​കളെ ആദരി​ക്കുന്ന ഒരു രീതിയേ ഇല്ലായി​രു​ന്നു. ദൈവം ദീർഘ​നാൾ മുമ്പു മുൻകൂ​ട്ടി​ക്ക​ണ്ട​തു​പോ​ലെ ഭർത്താ​ക്കൻമാർ പലപ്പോ​ഴും തങ്ങളുടെ ഭാര്യ​മാ​രു​ടെ​മേൽ ഭരണം​ന​ട​ത്തു​ക​യും ശാരീ​രി​ക​മാ​യും ലൈം​ഗി​ക​മാ​യും വൈകാ​രി​ക​മാ​യും അവരെ ദുരു​പ​യോ​ഗം ചെയ്യു​ക​യും ചെയ്‌തു. (ഉല്‌പത്തി 3:16) അങ്ങനെ ക്രിസ്‌തീയ ഭർത്താ​ക്കൻമാർക്കുള്ള പത്രോ​സി​ന്റെ ബുദ്ധ്യു​പ​ദേ​ശ​ത്തി​ന്റെ യഥാർഥ പൊരുൾ ഇതായി​രു​ന്നു: ലോക സമൂഹം പുരു​ഷൻമാർക്കു കൊടു​ത്തി​രി​ക്കുന്ന അധികാ​രത്തെ ചൂഷണം ചെയ്യരുത്‌.

നമുക്ക്‌ “ബലഹീന” എന്ന പദം കുറെ​ക്കൂ​ടെ അടു​ത്തൊ​ന്നു പരി​ശോ​ധി​ക്കാം. പത്രോസ്‌ ഈ വാക്യ​ത്തിൽ വൈകാ​രിക ഗുണങ്ങ​ളെയല്ല, ശാരീ​രിക ഗുണങ്ങ​ളെ​യാ​യി​രു​ന്നു പരാമർശി​ച്ചത്‌. പുരു​ഷൻമാർ ബലഹീന പാത്ര​ങ്ങ​ളാണ്‌; ഒരു താരതമ്യ അർഥത്തിൽ, അപ്പോൾ സ്‌ത്രീ​കൾ ബലഹീ​ന​മേ​റിയ പാത്ര​ങ്ങ​ളാണ്‌. അതെങ്ങനെ? സാധാ​ര​ണ​മാ​യി കൂടുതൽ ശാരീ​രിക ബലം ഉണ്ടായി​രി​ക്ക​ത്ത​ക്ക​വ​ണ്ണ​മുള്ള അസ്ഥിക​ളും പേശീ ഘടനയു​മാണ്‌ പുരു​ഷൻമാർക്കു​ള്ളത്‌. എന്നിരു​ന്നാ​ലും, പത്രോസ്‌ ധാർമി​ക​വും ആത്മീയ​വും മാനസി​ക​വു​മായ ബലത്തെ​പ്പ​ററി ഒരു താരത​മ്യം നടത്തു​ക​യാ​യി​രു​ന്നു എന്നുള്ള​തി​ന്റെ ഒരു സൂചന​യു​മില്ല. എന്നാൽ സംഭവ​ങ്ങ​ളോ​ടുള്ള വൈകാ​രിക പ്രതി​ക​ര​ണങ്ങൾ പരിഗ​ണി​ക്കു​മ്പോൾ സ്‌ത്രീ​കൾ പുരു​ഷൻമാ​രിൽനി​ന്നു വ്യത്യ​സ്‌ത​രാ​യി​രി​ക്കു​ന്ന​താ​യി നന്നായി വർണി​ക്ക​പ്പെ​ട്ടി​രി​ക്കു​ന്നു, അവശ്യം ബലം കുറഞ്ഞ​വ​രോ ഏറിയ​വ​രോ ആയിരി​ക്ക​ണ​മെ​ന്നില്ല. ദൈവ​വഴി പിന്തു​ടർന്നി​ട്ടുള്ള സ്‌ത്രീ​ക​ളു​ടെ ശക്തമായ ധാർമി​ക​ഗു​ണ​ത്തെ​യും സഹനശ​ക്തി​യെ​യും വകതി​രി​വി​നെ​യും പററി ബൈബിൾ വർണി​ക്കു​ന്നു. സാറാ, ദെബോ​രാ, രൂത്ത്‌, എസ്ഥേർ എന്നിവർ അവരിൽ ചിലർ മാത്ര​മാണ്‌. തങ്ങളെ​ക്കാൾ സ്‌ത്രീ​കൾക്കു ബുദ്ധി​ശ​ക്തി​യു​ണ്ടാ​യി​രി​ക്കാ​മെന്നു സമ്മതി​ക്കാൻ താഴ്‌മ​യുള്ള പുരു​ഷൻമാർക്ക്‌ ഒരു പ്രയാ​സ​വു​മില്ല.

എന്നിരു​ന്നാ​ലും, “ബലഹീന”ർ എന്നു സ്‌ത്രീ​കളെ പരാമർശി​ക്കു​ന്നത്‌ അവർ താണ വ്യക്തി​ക​ളാ​ണെ​ന്നുള്ള സൂചന നൽകു​ന്നു​വെന്ന്‌ ചിലർ വിശ്വ​സി​ക്കു​ന്നു. എന്നാൽ ഈ ദൃഷ്ടാന്തം പരിചി​ന്തി​ക്കുക. ഒരു വ്യക്തിക്ക്‌ ഉപയോ​ഗ​യോ​ഗ്യ​മായ രണ്ടു പാത്ര​ങ്ങ​ളുണ്ട്‌. ഒന്ന്‌ നല്ല ബലമു​ള്ള​താണ്‌, മറേറ​തിന്‌ അത്രയും ബലമില്ല. രണ്ടാമത്തെ പാത്ര​ത്തിന്‌ ബലം കുറവാ​യ​തു​കൊണ്ട്‌ അതിനെ താണതാ​യി കണക്കാ​ക്കു​മോ? വാസ്‌ത​വ​ത്തിൽ, ബലമുള്ള പാത്രം കൈകാ​ര്യം ചെയ്യു​ന്ന​തി​ല​ധി​കം ശ്രദ്ധ​യോ​ടെ നാം ബലംകു​റഞ്ഞ പാത്രം കൈകാ​ര്യം ചെയ്യും. അതു​കൊണ്ട്‌ സ്‌ത്രീക്ക്‌ പുരു​ഷ​നെ​ക്കാൾ ശാരീ​രി​ക​ബലം കുറവാ​യ​തു​കൊണ്ട്‌ അവൾ താണതാ​ണോ? തീർച്ച​യാ​യും അല്ല! “ബലഹീ​ന​പാ​ത്രം” എന്ന പദം പത്രോസ്‌ ഉപയോ​ഗി​ക്കു​ന്നത്‌ സ്‌ത്രീ​കളെ കരി​തേ​ച്ചു​കാ​ണി​ക്കാ​നല്ല, പിന്നെ​യോ അവരോ​ടുള്ള ബഹുമാ​നം പരിപു​ഷ്ടി​പ്പെ​ടു​ത്താ​നാണ്‌.

“അങ്ങനെ തന്നേ . . . വിവേ​ക​ത്തോ​ടെ”

“അങ്ങനെ തന്നേ . . . വിവേ​ക​ത്തോ​ടെ ഭാര്യ​മാ​രോ​ടു​കൂ​ടെ വസി”ക്കാൻ പത്രോസ്‌ ഭർത്താ​ക്കൻമാ​രെ ഉദ്‌ബോ​ധി​പ്പി​ച്ചു. “അങ്ങനെ തന്നേ,” ആരേ​പ്പോ​ലെ? മുമ്പി​ലത്തെ വാക്യ​ങ്ങ​ളിൽ പത്രോസ്‌ തന്റെ അനുഗാ​മി​കൾക്കു​വേ​ണ്ടി​യുള്ള ക്രിസ്‌തു​വി​ന്റെ സ്‌നേ​ഹ​പൂർവ​ക​മായ കരുത​ലി​നെ​ക്കു​റി​ച്ചു ചർച്ച​ചെ​യ്യു​ക​യാ​യി​രു​ന്നു. ഭർത്താ​ക്കൻമാർ തങ്ങളുടെ ഭാര്യ​മാർക്കു​വേണ്ടി “അങ്ങനെ തന്നേ” കരുത​ണ​മെ​ന്നാണ്‌ അദ്ദേഹം പ്രബോ​ധി​പ്പി​ച്ചത്‌. (1 പത്രൊസ്‌ 2:21-25; 3:7) ക്രിസ്‌തു എല്ലായ്‌പോ​ഴും തന്റെ ശിഷ്യൻമാ​രു​ടെ ക്ഷേമ​ത്തെ​യും താത്‌പ​ര്യ​ങ്ങ​ളെ​യും തന്റെ വ്യക്തി​പ​ര​മായ ആഗ്രഹ​ങ്ങൾക്കും അഭീഷ്ട​ങ്ങൾക്കും അതീത​മാ​യി വെച്ചു. അവൻ അവരുടെ ആത്മീയ​വും ശാരീ​രി​ക​വു​മായ ക്ഷേമത്തിൽ തത്‌പ​ര​നാ​യി​രു​ന്നു. അവൻ അവരുടെ പരിമി​തി​കളെ കണക്കി​ലെ​ടു​ത്തു. “അങ്ങനെ തന്നേ” തങ്ങളുടെ ഭാര്യ​മാ​രോ​ടു പെരു​മാ​റി​ക്കൊണ്ട്‌ ഭർത്താ​ക്കൻമാർ ക്രിസ്‌തു​വി​ന്റെ സ്‌നേ​ഹ​പൂർവ​ക​മായ മാതൃക അനുക​രി​ക്കേ​ണ്ടി​യി​രി​ക്കു​ന്നു.

സുഗമ​മാ​യ വിവാ​ഹ​ജീ​വി​തം യാദൃ​ച്ഛി​ക​മാ​യി സംഭവി​ക്കു​ന്നില്ല. വിവാ​ഹ​ത്തി​ന്റെ വിജയ​ത്തിന്‌ സംഭാവന ചെയ്യേ​ണ്ട​തെ​ങ്ങ​നെ​യെന്ന്‌ ഭർത്താ​വും ഭാര്യ​യും അറിഞ്ഞി​രി​ക്കണം. ഇക്കാര​ണ​ത്താൽ “വിവേ​ക​ത്തോ​ടെ” തങ്ങളുടെ ഭാര്യ​മാ​രോ​ടു​കൂ​ടെ വസിക്കാ​നാണ്‌ പത്രോസ്‌ ഭർത്താ​ക്കൻമാ​രേ ഉപദേ​ശി​ക്കു​ന്നത്‌. യഹോ​വ​യും അവന്റെ പുത്ര​നായ യേശു​ക്രി​സ്‌തു​വും സ്‌ത്രീ​ക​ളോട്‌ ഇടപെ​ട്ട​തെ​ങ്ങ​നെ​യെന്ന്‌ ഭർത്താ​ക്കൻമാർ പഠിക്കണം. തങ്ങൾ ഭാര്യ​മാ​രോട്‌ എങ്ങനെ പെരു​മാ​റാ​നാണ്‌ ദൈവം ആഗ്രഹി​ക്കു​ന്ന​തെന്ന്‌ അവർ മനസ്സി​ലാ​ക്കണം.

കൂടാതെ, ഭർത്താ​ക്കൻമാർ തങ്ങളുടെ ഭാര്യ​മാ​രെ നന്നായി മനസ്സി​ലാ​ക്കേ​ണ്ട​തുണ്ട്‌—അവരുടെ വികാ​ര​ങ്ങ​ളും ശക്തിക​ളും പരിമി​തി​ക​ളും ഇഷ്ടാനി​ഷ്ട​ങ്ങ​ളു​മെ​ല്ലാം. തങ്ങളുടെ ഭാര്യ​മാ​രു​ടെ ബുദ്ധി​ശ​ക്തി​യെ​യും അനുഭ​വ​പ​രി​ച​യ​ത്തെ​യും മാന്യ പ്രകൃ​തി​യെ​യും ആദരി​ക്കേ​ണ്ട​തെ​ങ്ങ​നെ​യെന്ന്‌ അവർ അറിയണം. ബൈബിൾ ഇപ്രകാ​രം പറയുന്നു: “ഭർത്താ​ക്കൻമാ​രേ, ക്രിസ്‌തു​വും സഭയെ സ്‌നേ​ഹി​ച്ച​തു​പോ​ലെ നിങ്ങളു​ടെ ഭാര്യ​മാ​രെ സ്‌നേ​ഹി​പ്പിൻ. അവ്വണ്ണം ഭർത്താ​ക്കൻമാ​രും തങ്ങളുടെ ഭാര്യ​മാ​രെ സ്വന്ത ശരീര​ങ്ങ​ളെ​പ്പോ​ലെ സ്‌നേ​ഹി​ക്കേ​ണ്ട​താ​കു​ന്നു. ഭാര്യയെ സ്‌നേ​ഹി​ക്കു​ന്നവൻ തന്നെത്താൻ സ്‌നേ​ഹി​ക്കു​ന്നു. ആരും തന്റെ ജഡത്തെ ഒരുനാ​ളും പകെച്ചി​ട്ടി​ല്ല​ല്ലോ; ക്രിസ്‌തു​വും സഭയെ ചെയ്യു​ന്ന​തു​പോ​ലെ അതിനെ പോററി പുലർത്തു​ക​യ​ത്രേ ചെയ്യു​ന്നതു.”—എഫെസ്യർ 5:25, 28, 29.

അവർക്കു ബഹുമാ​നം കൊടു​ക്കു​ക

“ബലഹീ​ന​പാ​ത്രം” എന്ന്‌ പത്രോസ്‌ സ്‌ത്രീ​ക​ളെ​ക്കു​റി​ച്ചു പറഞ്ഞ​പ്പോൾ ഭർത്താ​ക്കൻമാർ “അവർക്കു ബഹുമാ​നം കൊടു”ക്കണമെന്നു കൂടെ അദ്ദേഹം പ്രസ്‌താ​വി​ച്ചു. ഗ്രീക്കിൽ റൈറം എന്ന നാമരൂ​പം ബഹുമാ​നം, വിലമ​തിപ്പ്‌, വില, മൂല്യം എന്നീ അർഥങ്ങൾ വഹിക്കു​ന്നു. മററു വാക്കു​ക​ളിൽ പറഞ്ഞാൽ ബഹുമാ​നം കൊടു​ക്കൽ പ്രീതി​യു​ടെ ഒരു പ്രകടനം മാത്രമല്ല, പിന്നെ​യോ അവർക്ക്‌ അർഹമായ കാര്യ​ങ്ങളെ അംഗീ​ക​രി​ക്ക​ലാണ്‌. പൗലോസ്‌ എല്ലാ ക്രിസ്‌ത്യാ​നി​ക​ളെ​യും, സ്‌ത്രീ​യെ​യും പുരു​ഷ​നെ​യും ഒരു​പോ​ലെ ഇപ്രകാ​രം പ്രബോ​ധി​പ്പി​ച്ചു: “സഹോ​ദ​ര​പ്രീ​തി​യിൽ തമ്മിൽ സ്ഥായി​പൂ​ണ്ടു ബഹുമാ​നി​ക്കു​ന്ന​തിൽ അന്യോ​ന്യം മുന്നി​ട്ടു​കൊൾവിൻ.”—റോമർ 12:10.

യഹോ​വ​യാം ദൈവം തീർച്ച​യാ​യും സ്‌ത്രീ​കളെ വെറും കാഴ്‌ച​വ​സ്‌തു​ക്ക​ളാ​യി കണക്കാ​ക്കു​ന്നില്ല. ഇസ്രാ​യേ​ലിൽ, വ്യഭി​ചാ​രം, അഗമ്യ​ഗ​മനം, മൃഗീയത, മററു കുററ​കൃ​ത്യ​ങ്ങൾ എന്നിവ​യ്‌ക്ക്‌ കുററ​ക്കാ​രാ​യി​രുന്ന പുരു​ഷ​നും സ്‌ത്രീ​ക്കും ദൈവ​നി​യ​മങ്ങൾ ഒരു​പോ​ലെ ബാധക​മാ​യി​രു​ന്നു. (ലേവ്യ​പു​സ്‌തകം 18:6-17, 23, 29; 20:10-12) ശബത്ത്‌, നാസീർവ്ര​ത​ക്കാ​രെ ഭരിക്കുന്ന നിയമങ്ങൾ, ഉത്സവങ്ങൾ എന്നിവ​യു​ടെ പ്രയോ​ജ​ന​ങ്ങ​ളും നിയമ​പ​ര​മായ മററു പല ഏർപ്പാ​ടു​ക​ളും സ്‌ത്രീ​കൾക്ക്‌ അനുഭ​വി​ക്കാൻ കഴിഞ്ഞു. (പുറപ്പാ​ടു 20:10; സംഖ്യാ​പു​സ്‌തകം 6:2; ആവർത്ത​ന​പു​സ്‌തകം 12:18; 16:11, 14) പിതാ​വി​നെ​യെ​ന്ന​പോ​ലെ മാതാ​വി​നെ​യും ബഹുമാ​നി​ക്കു​ക​യും അനുസ​രി​ക്കു​ക​യും ചെയ്യണ​മാ​യി​രു​ന്നു.—ലേവ്യ​പു​സ്‌തകം 19:3; 20:9; ആവർത്ത​ന​പു​സ്‌തകം 5:16; 27:16; സദൃശ​വാ​ക്യ​ങ്ങൾ 1:8.

അനവധി വരുന്ന തന്റെ ഉത്തരവാ​ദി​ത്വ​ങ്ങൾക്കു വേണ്ടി കരുതു​ന്ന​തി​ലെ അവളുടെ വിശ്വ​സ്‌ത​ത​യും പ്രയത്‌ന​ശീ​ല​വും ജ്ഞാനവും നിമിത്തം സദൃശ​വാ​ക്യ​ങ്ങൾ 31-ാം അധ്യായം 10 മുതൽ 31 വരെയുള്ള വാക്യങ്ങൾ “സാമർത്ഥ്യ​മുള്ള” ഒരു “ഭാര്യയെ”ക്കുറിച്ച്‌ ആദര​വോ​ടെ സംസാ​രി​ക്കു​ന്നു. കുടും​ബ​ത്തി​ലെ വ്യാപാര ഇടപാ​ടു​ക​ളും മററു സാമ്പത്തിക കാര്യ​ങ്ങ​ളും കൈകാ​ര്യം ചെയ്യു​ന്ന​തി​ലെ അവളുടെ പങ്കുനി​മി​ത്തം അവൾ ഉചിത​മാം വിധം അംഗീ​കാ​രം നേടി​യി​രി​ക്കു​ന്നു. സ്‌ത്രീ​കൾ വെറും അലങ്കാ​ര​വ​സ്‌തു​ക്ക​ളാ​ണെന്നു വിചാ​രി​ക്കുന്ന ചില പുരു​ഷൻമാ​രു​ടെ മനോ​ഭാ​വ​ത്തിൽനിന്ന്‌ എത്രയോ വ്യത്യ​സ്‌തം! പിൽക്കാ​ലത്ത്‌, ആദിമ ക്രിസ്‌തീയ സഭയിൽ ക്രിസ്‌തു​വി​ന്റെ സാക്ഷി​ക​ളെന്ന നിലയിൽ സ്‌ത്രീ​കൾ പരിശു​ദ്ധാ​ത്മാ​വി​നാൽ ബലിഷ്‌ഠ​രാ​ക്ക​പ്പെട്ടു. (പ്രവൃ​ത്തി​കൾ 1:14, 15; 2:3, 4; താരത​മ്യം ചെയ്യുക: യോവേൽ 2:28, 29.) അങ്ങനെ ചില സ്‌ത്രീ​കൾ പുരു​ഷൻമാ​രു​ടെ​യും സ്‌ത്രീ​ക​ളു​ടെ​യും ദൂതൻമാ​രു​ടെ​പോ​ലും സ്വർഗീയ വിധി​കർത്താ​ക്ക​ളാ​യി​ത്തീ​രാൻ നിയമി​ത​രാ​യി. (1 കൊരി​ന്ത്യർ 6:2, 3) സ്‌ത്രീ​കൾ സഭാ​യോ​ഗ​ത്തിൽ പഠിപ്പി​ക്കാൻ പാടി​ല്ലാ​യി​രു​ന്നു എന്നുള്ളതു സത്യം​തന്നെ; എന്നാൽ ക്രിസ്‌തീയ സ്‌ത്രീ​കൾക്ക്‌ പ്രാർഥി​ക്കാ​നും പ്രവചി​ക്കാ​നും കഴിയുന്ന സാഹച​ര്യ​ങ്ങ​ളു​ണ്ടാ​യി​രു​ന്നു. ചെറു​പ്പ​ക്കാ​രായ സ്‌ത്രീ​ക​ളെ​യും കുട്ടി​ക​ളെ​യും സഭയ്‌ക്കു പുറത്തു​ള്ള​വ​രെ​യും പഠിപ്പി​ക്കാൻ അവർ നിയമി​ക്ക​പ്പെ​ട്ടി​രു​ന്നു.—മത്തായി 24:14; 1 കൊരി​ന്ത്യർ 11:3-6; തീത്തൊസ്‌ 2:3-5; താരത​മ്യം ചെയ്യുക: സങ്കീർത്തനം 68:11.

അവർക്കു ബഹുമാ​നം കൊടു​ക്കുക എന്നു പറഞ്ഞ​പ്പോൾ പത്രോ​സി​ന്റെ മനസ്സിൽ ഉണ്ടായി​രു​ന്നത്‌ എന്താ​ണെ​ന്നു​ള്ള​തി​ന്റെ സൂചന നൽകുന്ന മറെറാ​രു നല്ല വാക്യ​മാണ്‌ 2 പത്രൊസ്‌ 1:17. അവിടെ യഹോവ മററു​ള്ള​വ​രു​ടെ മുമ്പാകെ യേശു​വി​നെ​ക്കു​റി​ച്ചുള്ള തന്റെ അംഗീ​കാ​രം ഇപ്രകാ​രം വിശദ​മാ​ക്കി​ക്കൊണ്ട്‌ അവനോ​ടുള്ള ബഹുമാ​നം പ്രകട​മാ​ക്കു​ന്ന​താ​യി നാം വായി​ക്കു​ന്നു: “ഇവൻ എന്റെ പ്രിയ​പു​ത്രൻ; ഇവങ്കൽ ഞാൻ പ്രസാ​ദി​ച്ചി​രി​ക്കു​ന്നു.” സമാന​മാ​യി തന്റെ ഭാര്യക്കു ബഹുമാ​നം കൊടു​ക്കു​ന്നു​വെന്ന്‌ പരസ്യ​ജീ​വി​ത​ത്തി​ലും രഹസ്യ​ജീ​വി​ത​ത്തി​ലും ഒരു ഭർത്താവ്‌ പ്രവൃ​ത്തി​ക​ളാൽ കാണി​ക്കേ​ണ്ട​തുണ്ട്‌.

ജീവന്റെ അവകാ​ശി​കൾ

ചരി​ത്ര​ത്തി​ലു​ട​നീ​ളം പുരു​ഷൻമാർ സ്‌ത്രീ​കളെ ആദരവി​നും ബഹുമാ​ന​ത്തി​നും യോഗ്യ​ര​ല്ലാ​ത്ത​വ​രാ​യി—അടിമ​ക​ളാ​യി അഥവാ പുരു​ഷൻമാ​രെ രസിപ്പി​ക്കാ​നുള്ള വെറും ഉപകര​ണ​ങ്ങ​ളാ​യി പലപ്പോ​ഴും വീക്ഷി​ച്ചി​ട്ടുണ്ട്‌. സ്‌ത്രീ​കൾക്ക്‌ ബഹുമാ​നം കൊടു​ക്കുക എന്ന ക്രിസ്‌തീയ ആശയം അവരെ ആദരവി​ന്റെ ഒരു ഉയർന്ന പടിയി​ലേക്ക്‌ ഉയർത്തുക തന്നെ ചെയ്യുന്നു. പത്രോ​സി​ന്റെ ഉദ്‌ബോ​ധനം “സ്‌ത്രീ​കളെ സംബന്ധിച്ച്‌ വളരെ പ്രധാ​ന​പ്പെട്ട ഒരു സത്യം ഉൾക്കൊ​ള്ളു​ന്നു. ക്രിസ്‌തീയ മതവ്യ​വ​സ്ഥ​യൊ​ഴിച്ച്‌ മറെറല്ലാ മതവ്യ​വ​സ്ഥ​ക​ളി​ലും സ്‌ത്രീ​കൾ പുരു​ഷൻമാ​രെ​ക്കാൾ എല്ലാ തരത്തി​ലും തരംതാ​ഴ്‌ന്ന​വ​രാ​യി കണക്കാ​ക്ക​പ്പെ​ടു​ന്നു. മതം പഠിപ്പി​ക്കുന്ന എല്ലാ പ്രത്യാ​ശ​കൾക്കും വാഗ്‌ദാ​ന​ങ്ങൾക്കും അവൾ അവകാ​ശി​യാ​ണെന്ന്‌ . . . ക്രിസ്‌ത്യാ​നി​ത്വം പഠിപ്പി​ക്കു​ന്നു. . . . എല്ലായി​ട​ത്തു​മുള്ള സ്‌ത്രീ​കളെ അഭിമാ​ന​ക്ഷ​യ​ത്തിൽനി​ന്നു കരകയ​റ​റാൻ, മനുഷ്യ​വർഗ​ത്തി​നി​ട​യി​ലെ സാമൂ​ഹിക തിൻമ​ക​ളിൽ പകുതി​ക്കും ആസന്നമായ അറുതി വരുത്താൻ ഈ ഒരൊററ സത്യം മതി,” പുതിയ നിയമ​ത്തെ​ക്കു​റി​ച്ചുള്ള ബാൺസി​ന്റെ കുറി​പ്പു​കൾ (ഇംഗ്ലീഷ്‌) നിരീ​ക്ഷി​ക്കു​ന്നു.

ക്രിസ്‌തു​വിന്‌ പുരു​ഷൻമാ​രു​ടെ​യും സ്‌ത്രീ​ക​ളു​ടെ​യും ഉടമസ്ഥാ​വ​കാ​ശം ഉള്ളതു​കൊണ്ട്‌ തങ്ങളുടെ ഭാര്യ​മാ​രെ ക്രിസ്‌തു​വി​ന്റെ സ്വത്ത്‌ എന്നപോ​ലെ പരി​പോ​ഷി​പ്പി​ക്കു​ന്ന​തിന്‌ ഭർത്താ​ക്കൻമാർക്ക്‌ ഗൗരവ​മേ​റിയ കാരണ​മുണ്ട്‌. “ബലഹീ​ന​പാ​ത്ര”മെന്ന്‌ സ്‌ത്രീ​കളെ പരാമർശി​ച്ച​ശേഷം ഉടൻതന്നെ പത്രോ​സി​ന്റെ വാക്കുകൾ തുടരു​ന്നു: “നിങ്ങളു​ടെ പ്രാർത്ഥ​നെക്കു മുടക്കം വരാതി​രി​ക്കേ​ണ്ട​തി​ന്നു . . . അവർ ജീവന്റെ കൃപെക്കു കൂട്ടവ​കാ​ശി​കൾ” ആകുന്നു. (1 പത്രൊസ്‌ 3:7) ഒരു ഭർത്താവു തന്റെ ഭാര്യ​യോ​ടു മോശ​മായ രീതി​യിൽ ഇടപെ​ടു​മ്പോൾ അതു പ്രാർഥ​ന​കൾക്കു മുടക്കം​വ​രു​ത്തി​ക്കൊണ്ട്‌ ദൈവ​വു​മാ​യുള്ള അദ്ദേഹ​ത്തി​ന്റെ ബന്ധത്തെ ഹനിക്കു​മെന്ന്‌ പത്രോസ്‌ സൂചി​പ്പി​ച്ചു.

“ബലഹീ​ന​പാ​ത്രം” എന്ന പദപ്ര​യോ​ഗം ഒരുത​ര​ത്തി​ലും സ്‌ത്രീ​ക​ളോ​ടുള്ള അവജ്ഞയെ അർഥമാ​ക്കു​ന്നില്ല. യഹോവ ഭർത്താ​വി​നെ കുടും​ബ​ത്തി​ന്റെ ശിരഃ​സ്ഥാ​ന​മാ​ക്കി​വെ​ച്ചെ​ങ്കി​ലും സ്‌ത്രീ​ക​ളോട്‌ ദുഷിച്ച രീതി​യിൽ ഇടപെ​ട്ടു​കൊ​ള്ളാൻ അവൻ അവരോ​ടു പറഞ്ഞില്ല. പകരം, സ്‌ത്രീ​യെ മനസ്സി​ലാ​ക്കി അവൾക്ക്‌ ശ്രദ്ധയും ബഹുമാ​ന​വും കൊടു​ക്കാ​നാണ്‌ അവൻ അവരോ​ടു നിർദേ​ശി​ക്കു​ന്നത്‌.

താണ വ്യക്തി​ക​ളാ​യി കണക്കാക്കി ഇടപെ​ടാ​തെ സ്‌ത്രീ​കൾക്ക്‌ ബഹുമാ​നം കൊടു​ക്കാൻ ബൈബിൾ വിവാ​ഹി​ത​രും അവിവാ​ഹി​ത​രു​മായ പുരു​ഷൻമാ​രോ​ടു നിർദേ​ശി​ക്കു​ന്നു. ദൈവത്തെ ആത്മാർഥ​മാ​യി ആരാധി​ക്കു​ക​യും പരസ്‌പരം മാന്യത പ്രകട​മാ​ക്കു​ക​യും ചെയ്യുന്ന സ്‌ത്രീ പുരു​ഷൻമാർ ദൈവ​ത്തി​ന്റെ കരങ്ങളിൽനിന്ന്‌ സമ്പന്നമായ അനു​ഗ്ര​ഹങ്ങൾ സ്വന്തമാ​ക്കും.—താരത​മ്യം ചെയ്യുക: 1 കൊരി​ന്ത്യർ 7:16.

[19-ാം പേജിലെ ചിത്ര​ത്തിന്‌ കടപ്പാട്‌]

Miss G. E. K. / Artist: Alice D. Kellogg 1862-1900

Courtesy of Joanne W. Bowie