മുള​കൊ​ണ്ടുള്ള ഓർഗൻ—ഫിലി​പ്പീൻ സംഗീത പുതുമ

ഫിലിപ്പീൻസിലെ ഉണരുക! ലേഖകൻ

ഓർഗ​നു​കൾ 2,000-ത്തിൽ പരം വർഷമാ​യി ഒന്നല്ലെ​ങ്കിൽ മറെറാ​രു രൂപത്തിൽ സ്ഥിതി​ചെ​യ്‌തി​ട്ടുണ്ട്‌. അവ നിർമി​ക്കു​ന്ന​തി​നുള്ള വിദ്യകൾ വിവി​ധ​ങ്ങ​ളാണ്‌, എന്നാൽ എല്ലാറ​റി​നും പൊതു​വി​ലു​ള്ള​താ​ണു ശബ്ദം ഉത്‌പാ​ദി​പ്പി​ക്കുന്ന സംവി​ധാ​ന​ത്തി​ന്റെ ഭാഗമായ കുഴലു​ക​ളു​ടെ നിരകൾ. ഇവ സാധാ​ര​ണ​യാ​യി മരം​കൊ​ണ്ടോ ലോഹം​കൊ​ണ്ടോ നിർമി​ക്കു​ന്നു. എന്നിരു​ന്നാ​ലും, ഞങ്ങൾ നിങ്ങ​ളോ​ടു പറയാ​നാ​ഗ്ര​ഹി​ക്കു​ന്നതു മുഖ്യ​മാ​യി മുള​കൊ​ണ്ടുള്ള കുഴലു​ക​ളോ​ടു​കൂ​ടിയ ഓർഗ​നെ​ക്കു​റി​ച്ചാണ്‌. ശബ്ദം ഉളവാ​ക്കുന്ന 953 കുഴലു​ക​ളിൽ മൊത്തം 832 എണ്ണം മുള​കൊ​ണ്ടു​ള്ള​താണ്‌. മററുള്ളവ ലോഹ​മാണ്‌. ഇതിനു​പു​റമേ അലങ്കാ​ര​ത്തി​നു​വേ​ണ്ടി​മാ​ത്ര​മുള്ള ചില കുഴലു​ക​ളു​മുണ്ട്‌.

മുള ഓർഗൻ പ്രവർത്തി​ക്കു​ന്നത്‌ എങ്ങനെ​യാണ്‌? തത്ത്വം മററു കുഴൽ ഓർഗ​നു​ക​ളു​ടേ​തു​ത​ന്നെ​യാണ്‌. രണ്ടുതരം കുഴലു​കൾ ഉപയോ​ഗി​ക്കു​ന്നു. സംഗീ​ത​ശ​ബ്ദങ്ങൾ ഉളവാ​ക്കു​ന്ന​തിന്‌ അവയി​ലേക്കു കാററ്‌ അടിച്ചു​ക​യ​റ​റു​ന്നു. തട്ടുമാ​യി ബന്ധിക്കുന്ന സ്ഥാനങ്ങ​ളോ​ട​ടുത്ത്‌ അർദ്ധവൃ​ത്താ​കാര സുഷി​ര​ങ്ങ​ളോ​ടു​കൂ​ടിയ ഫ്‌ളൂ​പൈ​പ്പു​കൾ ഏറെയും ഒരു ഫ്‌ളൂ​ട്ടി​ന്റെ അതേ രീതി​യിൽ ശബ്ദം ഉത്‌പാ​ദി​പ്പി​ക്കു​ന്നു. അകമേ കമ്പനം​ചെ​യ്യുന്ന ഒരു ഘടക​ത്തോ​ടു​കൂ​ടിയ റീഡ്‌ പൈപ്പു​കൾ ഒരു ക്ലാരന​റ​റി​നോ സാക്‌സോ​ഫോ​ണി​നോ സമാന​മായ രീതി​യിൽ ശബ്ദം ഉത്‌പാ​ദി​പ്പി​ക്കു​ന്നു. മിക്ക കുഴലു​ക​ളും മുള​കൊണ്ട്‌ ഉണ്ടാക്കി​യ​താ​ണെ​ന്നുള്ള വസ്‌തുത ഈ ഓർഗനു പ്രത്യേക ധ്വനിക സ്വഭാ​വങ്ങൾ കൊടു​ക്കു​ന്നു.

ഓർഗൻ നിർമി​ക്കൽ

ഒരു സ്‌പാ​നീഷ്‌ മിഷന​റി​യായ ഡിയാ​ഗോ സേരാ​യാണ്‌ 1816-ൽ മുള​കൊ​ണ്ടുള്ള ഈ ഓർഗന്റെ നിർമാ​ണം തുടങ്ങി​യത്‌. മുള ഉപയോ​ഗി​ച്ചത്‌ എന്തു​കൊ​ണ്ടാ​യി​രു​ന്നു? ആ പ്രദേ​ശത്തെ ആപേക്ഷി​ക​മായ ദാരി​ദ്ര്യം പരിഗ​ണിച്ച്‌ ഒരുപക്ഷേ ചെലവു​കു​റഞ്ഞ വസ്‌തു​ക്കൾ ഉപയോ​ഗി​ക്കേ​ണ്ട​തി​ന്റെ ആവശ്യ​ക​ത​യാ​യി​രി​ക്കാം ഒരു ഘടകം. മാത്ര​വു​മല്ല, ഓർഗൻനിർമാ​താവ്‌ ഉചിത​മായ പ്രാ​ദേ​ശിക വസ്‌തു​ക്കൾ ഉപയോ​ഗി​ക്കാൻ ആഗ്രഹി​ച്ചു​വെ​ന്ന​തി​നു സംശയ​മില്ല.

1816-ൽ, മുളകൾ വെട്ടി ഒരു വർഷ​ത്തോ​ളം കടൽത്തീ​രത്തെ മണലി​ന​ടി​യിൽ കുഴി​ച്ചി​ട്ടു. കീടങ്ങ​ളോ​ടും കാലാ​വ​സ്ഥ​യോ​ടു​മുള്ള ഈ സമ്പർക്കത്തെ അതിജീ​വി​ച്ചവ ഈടു​നിൽക്കു​ന്ന​വ​യാ​ണെന്നു പരിഗ​ണി​ക്കു​ക​യും ഓർഗൻനിർമാ​ണ​ത്തിന്‌ ഉപയോ​ഗി​ക്കു​ക​യും ചെയ്‌തു. അടുത്ത പല വർഷങ്ങ​ളിൽ ഓർഗന്റെ പല ഭാഗങ്ങൾ കൂട്ടി​യി​ണക്കി. 1821-ൽ അതിന്റെ അധിക​ഭാ​ഗ​വും പൂർത്തി​യാ​യ​പ്പോൾ അത്‌, “ദേശത്തെ ഏററവും നല്ലതും ഇത്തരത്തിൽ ആദ്യ​ത്തേ​തും” എന്നു പ്രഖ്യാ​പി​ക്ക​പ്പെട്ടു.

വിപത്തി​നെ അതിജീ​വി​ക്കൽ

മുള ഓർഗനു നിലനി​ല്‌പ്‌ അനായാ​സ​മാ​യി​രു​ന്നില്ല. ഓർഗൻ വെച്ചി​രുന്ന ലാസ്‌ പീനി​യാസ്‌ പട്ടണത്തിൽ 1829-ൽ ഭൂകമ്പ​ങ്ങ​ളു​ണ്ടാ​യി. അതിരുന്ന കെട്ടി​ട​ത്തി​ന്റെ മേൽക്കൂര നശിച്ചു. കുറേ​ക്കാ​ല​ത്തേക്കു ഓർഗൻ ചൂടും തണുപ്പു​മൊ​ക്കെ ഏററു​കി​ട​ന്നി​രി​ക്കാ​നി​ട​യുണ്ട്‌. 1863-ൽ അസാധാ​രണ ശക്തിയുള്ള ഒരു ഭൂകമ്പം ഓർഗന്‌ ഏറെ കേടു​വ​രു​ത്തി. കുറേ കുഴലു​കൾ മാറി​വെച്ചു. എന്നാൽ കുറെ കാലം​കൊ​ണ്ടു കീടങ്ങൾ ഇവക്കു കേടു വരുത്തി. 1880-ൽ വിപത്‌ക്ക​ര​മായ മറെറാ​രു ഭൂകമ്പം ഓർഗ​നി​രുന്ന കെട്ടി​ട​ത്തി​നു വലിയ കേടു​വ​രു​ത്തി. കെട്ടിടം പൂർണ​മാ​യി കേടു​പോ​ക്കു​ന്ന​തി​നു​മുമ്പ്‌ ഒരു ചുഴലി​ക്കൊ​ടു​ങ്കാ​ററ്‌ അടിച്ചു. അതോടെ ഓർഗന്റെ വിവിധ ഭാഗങ്ങൾ ചിതറി​പ്പോ​യി.

പല വർഷങ്ങ​ളിൽ കേടു​പോ​ക്ക​ലി​നു കുറെ ശ്രമം നടത്തി. എന്നാൽ അങ്ങനെ​യുള്ള ഒരു ശ്രമം സ്ഥിരമായ കേടിൽ കലാശി​ച്ചു. കുറേ ട്യൂണിംഗ്‌ വാൽവു​കൾ വെക്കു​ന്ന​തിന്‌ കേടു​പോ​ക്കുന്ന ഒരാൾ മുളങ്കു​ഴ​ലു​ക​ളു​ടെ ഭാഗങ്ങൾ അറുത്തു​ക​ളഞ്ഞു. ഇത്‌ ഉപകര​ണ​ത്തി​ന്റെ സ്ഥായിക്കു മാററം വരുത്തി. കേടു​പോ​ക്കാ​നുള്ള ശ്രമങ്ങൾ നടന്നി​ട്ടും ഓർഗൻ തുടർന്നു മോശ​മാ​യി​ക്കൊ​ണ്ടി​രു​ന്നു.

ഓർഗൻ യുദ്ധവും സഹിച്ചു. 1890-കളുടെ ഒടുവിൽ ഫിലി​പ്പീ​നോ​ക​ളും സ്‌പെ​യിൻകാ​രും തമ്മിലും ഫിലി​പ്പീൻ-അമേരി​ക്കൻ യുദ്ധത്തിൽ ഫിലി​പ്പീ​നോ​ക​ളും അമേരി​ക്ക​ക്കാ​രും തമ്മിലും നടന്ന പോരാ​ട്ട​ങ്ങ​ളു​ടെ രംഗമാ​യി​രു​ന്നു ലാസ്‌ പീനി​യാസ്‌. എന്നിരു​ന്നാ​ലും, ജീർണി​ച്ചി​ട്ടും ഓർഗൻ കാണാൻ സന്ദർശകർ വന്നതായി 1911 മുതൽ 1913 വരെയുള്ള രേഖകൾ സൂചി​പ്പി​ക്കു​ന്നു.

1941 മുതൽ 1945 വരെയുള്ള വർഷങ്ങ​ളിൽ രണ്ടാം ലോക​മ​ഹാ​യു​ദ്ധം ഫിലി​പ്പീൻസിൽ എത്തി. ജാപ്പനീസ്‌ അധിനി​വേ​ശ​കാ​ലത്തു ഹിരോ​ഹി​തോ ചക്രവർത്തി​യു​ടെ ഒരു ബന്ധുവായ വൈ. റേറാ​ക്കു​ഗാ​വാ മാർക്വ​സി​ന്റെ ശ്രദ്ധ ഓർഗ​നിൽ പതിഞ്ഞു. അദ്ദേഹം ഭാഗി​ക​മായ കേടു​പോ​ക്ക​ലി​നു ക്രമീ​ക​രണം ചെയ്‌തു. എന്നാൽ അതിനു​ശേഷം അനേകം വർഷക്കാ​ലം ഉപകര​ണ​ത്തി​നു​വേണ്ടി അധിക​മൊ​ന്നും ചെയ്‌തില്ല.

പിന്നീട്‌ 1970-കളിൽ, അതിന്റെ ഉദ്ധാര​ണ​ത്തിന്‌ ഒരു മുറവി​ളി ഉയർന്നു​വന്നു. നൂറു​ക​ണ​ക്കി​നുള്ള മുളങ്കു​ഴ​ലു​ക​ളിൽ 45 എണ്ണം നഷ്ടപ്പെ​ട്ടി​രു​ന്നു. 304 എണ്ണം പ്രവർത്തി​ക്കു​ന്നി​ല്ലാ​യി​രു​ന്നു. ഒന്നിന​കത്ത്‌ ഒരു പക്ഷിക്കൂ​ടു കണ്ടു. ഓർഗനെ ഉപയോ​ഗി​ക്കാ​വുന്ന നിലവാ​ര​ത്തി​ലേക്കു തിരികെ കൊണ്ടു​വ​രാൻ എന്തെങ്കി​ലും ചെയ്യാൻ കഴിയു​മാ​യി​രു​ന്നോ?

ഉദ്ധാരണം

1973 മാർച്ചിൽ ഉദ്ധാര​ണ​പ​ദ്ധ​തി​ക്കു തുടക്ക​മി​ട്ടു. ഒരു പ്രശസ്‌ത വിദേശ സ്ഥാപനത്തെ വേല ഭരമേ​ല്‌പി​ച്ചു. കുഴലു​കൾ ജപ്പാനി​ലേക്കു കയററി​യ​യച്ചു. ഓർഗന്റെ ബാക്കി​ഭാ​ഗം ജർമനി​യി​ലേക്കു കയററി​യ​യച്ചു. അവിടെ ഫിലി​പ്പീൻസി​ലെ കാലാ​വ​സ്ഥയെ അനുക​രി​ക്കു​ന്ന​തിന്‌ ഒരു പ്രത്യേക മുറി പണിയ​പ്പെട്ടു. ഈ മുറി​യിൽ ഉദ്ധാര​ണ​വേല തുടങ്ങി.

സാധ്യ​മാ​കു​ന്ന​ട​ത്തോ​ളം ആദ്യ രൂപക​ല്‌പ​ന​യോട്‌ അടു​ത്തെ​ത്താ​നാ​ണു ലക്ഷ്യമി​ട്ടത്‌. ഒടുവിൽ കേടു​പോ​ക്കൽ പൂർത്തി​യാ​യി. ജപ്പാനിൽ കേടു​പോ​ക്കിയ കുഴലു​കൾ ജർമനി​യി​ലേക്കു വിമാ​ന​ത്തിൽ എത്തിച്ചു. മുഴു ഓർഗ​നും വീണ്ടും സംയോ​ജി​പ്പി​ച്ചു പരി​ശോ​ധന നടത്തി. പിന്നീട്‌ 1975 ഫെബ്രു​വരി 18-ന്‌ ഒരു മണിക്കൂർ നേരത്തെ സംഗീ​ത​ക്ക​ച്ചേരി ഒരു ജർമൻസ​ദ​സ്സി​ന്റെ കാതു​കൾക്ക്‌ ഉല്ലാസം പകർന്നു.

പിന്നീടു താമസി​യാ​തെ ഒരു ഡസൻ വള്ളിക്കൂ​ടു​ക​ളിൽ പായ്‌ക്കു​ചെ​യ്‌ത്‌, ഒരു ബെൽജി​യൻ വിമാ​ന​ത്തി​ന്റെ ഔദാ​ര്യ​ത്താൽ 5626 കിലോ​ഗ്രാം വരുന്ന ഓർഗൻ ഫിലി​പ്പീൻസി​ലേക്കു തിരി​ച്ച​യച്ചു. അതു സൂക്ഷി​ച്ചു​വെ​ക്കുന്ന പട്ടണമായ ലാസ്‌ പീനി​യാ​സിൽ അതിനു കെങ്കേ​മ​മായ ഒരു സ്വാഗ​ത​മാ​ണു ലഭിച്ചത്‌. ഈ ഉപകര​ണ​ത്തി​ന്റെ ചരി​ത്ര​ക​ഥകൾ ചിത്രീ​ക​രി​ക്കുന്ന ഫ്‌ളോ​ട്ടു​കൾ സഹിത​മുള്ള ഒരു പരേഡ്‌ മുപ്പതി​നാ​യി​രം പേരാണു വീക്ഷി​ച്ചത്‌.

1975 മെയ്‌ 9-ന്‌ മുള ഓർഗൻ അതിന്റെ ഉദ്‌ഘാ​ടന സംഗീ​ത​ക്ക​ച്ചേ​രി​ക്കു തയ്യാറാ​യി​രു​ന്നു. മുള ഓർഗൻ ഫിലി​പ്പീൻകാർക്കാ​യി വീണ്ടും അവതരി​പ്പി​ച്ച​പ്പോൾ ഒരു ജർമൻ ഓർഗൻവി​ദ​ഗ്‌ധ​നും ഒപ്പം ഫിലി​പ്പീ​നോ സംഗീ​ത​ജ്ഞ​രും സവി​ശേ​ഷ​പ​രി​പാ​ടി അവതരി​പ്പി​ച്ചു.

നമ്മുടെ സ്രഷ്ടാവു നമുക്കു നൽകിയ സംഗീ​ത​വരം നിങ്ങൾ വിലമ​തി​ക്കു​ന്നു​വോ? അല്‌പം വ്യത്യ​സ്‌ത​മായ ഒന്നു കേൾക്കാൻ നിങ്ങൾ ഇഷ്ടപ്പെ​ടു​ന്നു​വോ? ലാസ്‌ പീനി​യാ​സി​ലെ മുള ഓർഗൻ കേൾക്കാൻ നിങ്ങൾക്ക്‌ എന്നെങ്കി​ലും അവസരം ലഭിക്കു​ന്നു​വെ​ങ്കിൽ നിങ്ങൾ ഈ പ്രത്യേക ഫിലി​പ്പീൻ സംഗീത പുതുമ ആസ്വദി​ക്കു​മെ​ന്നു​ള്ള​തി​നു സംശയ​മില്ല.