സ്‌നേ​ഹ​ത്തിൽ ഒരുമി​ച്ചു വസിക്കു​ന്നു

പ്രിയ വല്ല്യമ്മ​ച്ചി​ക്കും വല്ല്യപ്പ​ച്ച​നും,

നിങ്ങൾക്കു സുഖമാ​ണോ? എനിക്കു ജലദോ​ഷം പിടി​ക്കു​ക​യാ​ണെന്നു തോന്നു​ന്നു.

അന്ന്‌ എന്റെ കൂടെ കളിച്ച​തി​നു നന്ദിയുണ്ട്‌. നിങ്ങൾ എന്നെ പാർക്കി​ലും പൊതു കുളി​സ്ഥ​ല​ത്തും കൊണ്ടു​പോ​യി. ഞാൻ അത്‌ വളരെ​യ​ധി​കം ആസ്വദി​ച്ചു.

അടുത്ത വർഷം ഫെബ്രു​വരി 11-ന്‌ ഞങ്ങളുടെ സ്‌കൂ​ളിൽ സംഗീ​ത​ക്ക​ച്ചേ​രി​യാണ്‌. നിങ്ങൾക്കു വീണ്ടും വരാൻ കഴിയു​മെ​ങ്കിൽ ദയവായി വരണം.

വല്ല്യമ്മച്ചീ വല്ല്യപ്പച്ചാ, നിങ്ങൾ വരു​മ്പോൾ ഞങ്ങൾക്കു വളരെ സന്തോ​ഷ​മാണ്‌.

ദയവായി ആരോ​ഗ്യം സൂക്ഷി​ക്കുക. എപ്പോ​ഴും സുഖമാ​യി​രി​ക്കുക. തണുപ്പു തുടങ്ങാൻ പോകു​ക​യാണ്‌, അതു​കൊണ്ട്‌ ജലദോ​ഷം പിടി​ക്കാ​തെ സൂക്ഷി​ക്കണം.

നിങ്ങൾ അടുത്ത​തവണ വന്ന്‌ എന്റെ കൂടെ കളിക്കു​ന്ന​തും കാത്ത്‌ ഇരിപ്പാ​ണു ഞാൻ. യുമി​യെ​യും മസാക്കി​യെ​യും ദയവായി എന്റെ അമ്പേഷണം അറിയി​ക്കുക.

മികാ (ജപ്പാൻകാ​രി)

നിങ്ങളു​ടെ പേരക്കു​ട്ടി ഇതു​പോ​ലൊ​രു കത്ത്‌ എന്നെങ്കി​ലും നിങ്ങൾക്ക്‌ എഴുതി​യി​ട്ടു​ണ്ടോ? ഉണ്ടെങ്കിൽ, അതു ലഭിച്ച​പ്പോൾ നിങ്ങൾക്കു വളരെ​യ​ധി​കം സന്തോഷം തോന്നി​യെ​ന്ന​തി​നു സംശയ​മില്ല. വല്ല്യമ്മ​വ​ല്ല്യ​പ്പൻമാ​രും പേരക്കു​ട്ടി​ക​ളും തമ്മിലുള്ള സുന്ദര​വും സ്‌നേ​ഹ​പൂർവ​ക​വു​മായ ബന്ധത്തിന്റെ തെളി​വാണ്‌ ഇത്തരം കത്തുകൾ. എന്നാൽ ഇത്തരത്തി​ലുള്ള ബന്ധം സ്ഥാപി​ക്കു​ന്ന​തി​നും നിലനിർത്തു​ന്ന​തി​നും ഊട്ടി​യു​റ​പ്പി​ക്കു​ന്ന​തി​നും എന്താണ്‌ ആവശ്യം? മൂന്നു തലമു​റ​കൾക്കും ഇതു പ്രയോ​ജ​ന​പ്ര​ദ​മാ​ണെന്ന്‌ എങ്ങനെ തെളി​ഞ്ഞേ​ക്കാം?

സ്‌നേഹം—“ഐക്യ​ത്തി​ന്റെ ഒരു സമ്പൂർണ ബന്ധം”

ബ്രിട്ടീ​ഷു​കാ​രായ രണ്ടു വല്ല്യമ്മ​വ​ല്ല്യ​പ്പൻമാ​രാ​ണു റോയി​യും ജീനും. അവർ ഇപ്രകാ​രം പറയുന്നു: “ശിരഃ​സ്ഥാ​നത്തെ അംഗീ​ക​രി​ക്കു​ന്ന​തും പരസ്‌പരം സ്‌നേ​ഹ​ത്തിൽ ഒത്തു​പോ​കു​ന്ന​തു​മാണ്‌ മുഖ്യ തത്ത്വങ്ങ​ളെ​ന്നാണ്‌ ഞങ്ങൾക്കു തോന്നു​ന്നത്‌.” ഈ രണ്ട്‌ യഹോ​വ​യു​ടെ സാക്ഷികൾ പ്രത്യേ​കാൽ കൊ​ലോ​സ്യർ 3:14-ലെ (NW) തിരു​വെ​ഴുത്ത്‌ ഉദ്ധരിച്ചു. അത്‌ ക്രിസ്‌തീയ സ്‌നേ​ഹത്തെ “ഐക്യ​ത്തി​ന്റെ ഒരു സമ്പൂർണ ബന്ധം” എന്നു വർണി​ക്കു​ന്നു. സ്‌നേഹം ആദരവും ചിന്താ​പൂർവ​ക​മായ ശ്രദ്ധയും വാത്സല്യ​വും കുടും​ബൈ​ക്യ​വും ഉളവാ​ക്കു​ന്നു. ഡാഡി ജോലി​ക​ഴി​ഞ്ഞു വീട്ടിൽ വരു​മ്പോൾ അദ്ദേഹത്തെ ഊഷ്‌മ​ള​മാ​യി സ്വാഗതം ചെയ്യാ​നാ​യി മുഴു കുടും​ബ​വും ഓടി​ച്ചെ​ല്ലു​ന്നു. കുടും​ബ​ത്തിൽ സ്‌നേ​ഹ​മു​ണ്ടെ​ങ്കിൽ വല്ല്യമ്മ​വ​ല്ല്യ​പ്പൻമാർ വന്നെത്തു​മ്പോ​ഴും ഇതേ സംഗതി​തന്നെ സംഭവി​ക്കു​ന്നു. “വല്ല്യമ്മ​ച്ചി​യും വല്ല്യപ്പ​ച്ച​നും വന്നു!” ആവേശ​ഭ​രി​ത​നായ ഒരു കുട്ടി വിളി​ച്ചു​കൂ​വു​ന്നു. അന്നു വൈകു​ന്നേരം ആ കൂട്ടു കുടും​ബം അത്താഴ​ത്തി​നി​രി​ക്കു​ന്നു. ആ പ്രദേ​ശത്തെ രീതി​യ​നു​സ​രി​ച്ചു വല്ല്യപ്പച്ചൻ മേശയു​ടെ തലയ്‌ക്കൽ അദ്ദേഹ​ത്തി​നാ​യി വേർതി​രി​ച്ചു​വെ​ച്ചി​രി​ക്കുന്ന സ്ഥാനത്ത്‌ ഇരിക്കു​ന്നു. നിങ്ങളും കുടും​ബ​വും ഈ സ്‌നേ​ഹ​പു​ര​സ്സ​ര​മായ രംഗത്താ​യി​രി​ക്കു​ന്ന​താ​യി നിങ്ങൾക്ക്‌ ഭാവന ചെയ്യാൻ കഴിയു​മോ? നിങ്ങൾ ഈ അനു​ഗ്രഹം ആസ്വദി​ക്കു​ന്നു​വോ?

“നരച്ച തല ശോഭ​യുള്ള കിരീ​ട​മാ​കു​ന്നു”

വല്ല്യമ്മ​വ​ല്ല്യ​പ്പൻമാ​രോ​ടുള്ള സ്‌നേ​ഹ​വും ആദരവും ചില പ്രത്യേക സന്ദർഭ​ങ്ങ​ളിൽ മാത്രം പ്രകടി​പ്പി​ച്ചാൽ പോരാ തുടർച്ച​യാ​യി പ്രകടി​പ്പി​ക്കേ​ണ്ട​തുണ്ട്‌ എന്നതു സ്‌പഷ്ട​മാണ്‌. ഇക്കാര​ണ​ത്താൽ, കുട്ടി​കളെ എപ്പോ​ഴും പഠിപ്പി​ക്കേ​ണ്ടത്‌ ആവശ്യ​മാണ്‌. മാതാ​പി​താ​ക്കൾ വെക്കുന്ന മാതൃക പിൻപ​റ്റി​ക്കൊണ്ട്‌ കുട്ടികൾ ബന്ധുക്ക​ളെ​യും മറ്റുള്ള​വ​രെ​യും സ്‌നേ​ഹി​ക്കാൻ പഠിക്കു​ന്നതു കുടും​ബ​ത്തി​നു​ള്ളി​ലാണ്‌. ഈ വിഷയം സംബന്ധിച്ച്‌ അഭിമു​ഖം ചെയ്യ​പ്പെ​ട്ട​വ​രിൽ പലരും ചൂണ്ടി​ക്കാ​ട്ടി​യ​തു​പോ​ലെ അവരുടെ മാതൃ​ക​യാണ്‌ അടിസ്ഥാ​നം. നൈജീ​രി​യാ​യി​ലെ ബെനിൻ നഗരത്തി​ലുള്ള ഒരു പിതാ​വായ മകയ്യാ ഇപ്രകാ​രം പറയുന്നു: “എന്റെ അമ്മായി​യ​പ്പ​നെ​യും അമ്മായി​യ​മ്മ​യെ​യും ബഹുമാ​നി​ച്ചു​കൊ​ണ്ടു ഞാൻ വച്ച മാതൃ​ക​യും, താഴ്‌മ​യും ബഹുമാ​ന​വും ഉള്ളവരാ​യി​രി​ക്കാൻ എന്റെ കുട്ടി​കളെ സഹായി​ച്ചു എന്നു ഞാൻ കരുതു​ന്നു. ഞാൻ എന്റെ അമ്മായി​യ​പ്പ​നെ​യും അമ്മായി​യ​മ്മ​യെ​യും സംബോ​ധന ചെയ്യു​ന്നത്‌ ‘ഡാഡി,’ ‘മമ്മി’ എന്നാണ്‌. ഞാൻ അവരെ എന്റെ സ്വന്തം മാതാ​പി​താ​ക്ക​ളെ​പ്പോ​ലെ​തന്നെ ബഹുമാ​നി​ക്കു​ന്നത്‌ എന്റെ കുട്ടികൾ കേൾക്കു​ക​യും കാണു​ക​യും ചെയ്യുന്നു.”

പേരക്കു​ട്ടി​കൾ വല്ല്യമ്മ​വ​ല്ല്യ​പ്പൻമാ​രെ ബഹുമാ​നി​ക്കു​ന്നി​ല്ലെ​ങ്കിൽ അവർക്കു വിഷമം തോന്നു​ന്നു. കുട്ടികൾ തെറ്റു കാണി​ക്കു​ന്നു എന്നതി​നെ​ക്കാൾ മാതാ​പി​താ​ക്കൾ കുട്ടി​കളെ തിരു​ത്തു​ന്നില്ല എന്ന വസ്‌തു​ത​യാണ്‌ അവരെ കൂടുതൽ വിഷമി​പ്പി​ക്കു​ന്നത്‌. ഇറ്റലി​യി​ലെ റോമി​ലുള്ള ഒരു വല്ല്യപ്പൻ ഡെമെ​ട്രി​യോ പറയുന്നു: “ഞങ്ങളെ ആദരി​ക്കാ​നും ബഹുമാ​നി​ക്കാ​നും പേരക്കു​ട്ടി​കളെ പഠിപ്പി​ക്കുന്ന രീതി​യി​ലൂ​ടെ എന്റെ മകൾക്കും മരുമ​ക​നും ഞങ്ങളോ​ടുള്ള സ്‌നേഹം എനിക്കു കാണാൻ കഴിയു​ന്നു.” ഒരേ പ്രായ​ത്തി​ലുള്ള കളിക്കൂ​ട്ടു​കാ​രോ​ടെ​ന്ന​പോ​ലെ അല്ലെങ്കിൽ അൽപ്പം വലിയ​ഭാ​വ​ത്തോ​ടെ ഇടപെ​ട്ടു​കൊ​ണ്ടു ചില​പ്പോൾ പേരക്കു​ട്ടി​കൾ വല്ല്യമ്മ​വ​ല്ല്യ​പ്പൻമാ​രു​ടെ അടുത്ത്‌ അമിത സ്വാത​ന്ത്ര്യ​ത്തോ​ടെ ഇടപെ​ടു​ന്നു. അത്തരം ഏതു പ്രവണ​ത​യെ​യും തിരു​ത്തേ​ണ്ടതു മാതാ​പി​താ​ക്ക​ളു​ടെ ഉത്തരവാ​ദി​ത്വ​മാണ്‌. നൈജീ​രി​യ​ക്കാ​ര​നായ ഒരു സാക്ഷി പോൾ ഇപ്രകാ​രം പറയുന്നു: “ഏതാണ്ട്‌ ഒരു വർഷം മുമ്പ്‌, കുട്ടികൾ എന്റെ അമ്മയോ​ടു നിന്ദ​യോ​ടെ പെരു​മാ​റാൻ തുടങ്ങി. അതു മനസ്സി​ലാ​ക്കി​യ​പ്പോൾ ഞാൻ അവരെ സദൃശ​വാ​ക്യ​ങ്ങൾ 16:31 വായി​ച്ചു​കേൾപ്പി​ച്ചു: “നരച്ച തല ശോഭ​യുള്ള കിരീ​ട​മാ​കു​ന്നു.” കൂടാതെ വല്ല്യമ്മച്ചി എന്റെ അമ്മയാ​ണെ​ന്നും എന്നെ ബഹുമാ​നി​ക്കുന്ന അതേ വിധത്തിൽത്തന്നെ അവർ അവരെ​യും ബഹുമാ​നി​ക്ക​ണ​മെ​ന്നും ഞാൻ അവരെ ഓർമി​പ്പി​ച്ചു. നിങ്ങളു​ടെ യൗവനം—അതു പരമാ​വധി ആസ്വദിക്കുകa എന്ന പുസ്‌ത​ക​ത്തി​ലെ ‘നിങ്ങളു​ടെ മാതാ​പി​താ​ക്കളെ നിങ്ങൾ എങ്ങനെ വീക്ഷി​ക്കു​ന്നു?’ എന്ന തലക്കെ​ട്ടോ​ടു​കൂ​ടിയ 10-ാമത്തെ അധ്യാ​യ​വും ഞാൻ അവരെ പഠിപ്പി​ച്ചു. ഇപ്പോൾ വല്ല്യമ്മയെ ബഹുമാ​നി​ക്കുന്ന കാര്യ​ത്തിൽ അവർക്ക്‌ യാതൊ​രു പ്രശ്‌ന​വു​മില്ല.”

കുടുംബ ബന്ധങ്ങൾ നട്ടുവ​ളർത്തു​ന്ന​തി​ന്റെ പ്രയോ​ജ​ന​ങ്ങൾ

കുടും​ബാം​ഗങ്ങൾ അകലെ​യാ​യി​രി​ക്കു​മ്പോൾപ്പോ​ലും പരസ്‌പര സ്‌നേഹം നട്ടുവ​ളർത്താൻ കഴിയും. നൈജീ​രി​യ​യി​ലുള്ള ഒരു വല്ല്യപ്പ​നായ സ്റ്റീവൻ ഇപ്രകാ​രം പറയുന്നു: “ഞങ്ങൾ പേരക്കു​ട്ടി​ക​ളിൽ ഓരോ​രു​ത്തർക്കും പ്രത്യേ​കം പ്രത്യേ​കം എഴുതാ​റുണ്ട്‌. ഈ ജോലി ശ്രമക​ര​മാണ്‌. എന്നാൽ പേരക്കു​ട്ടി​ക​ളു​മാ​യി അടുത്ത ബന്ധം വളർത്തി​യെ​ടു​ക്കു​ന്ന​തി​ന്റെ​യും നിലനിർത്തു​ന്ന​തി​ന്റെ​യും പ്രതി​ഫലം വളരെ വലുതാ​യി​രു​ന്നി​ട്ടുണ്ട്‌.” ഇക്കാര്യ​ത്തിൽ മാതാ​പി​താ​ക്ക​ളു​ടെ ശ്രമങ്ങൾ അനിവാ​ര്യ​മാണ്‌. മറ്റുചി​ലർ സാഹച​ര്യ​ങ്ങൾ അനുവ​ദി​ക്കു​ന്ന​ത​നു​സ​രി​ച്ചു ഫോൺ വഴി ബന്ധം പുലർത്തു​ന്നു.

തന്റെ ഏറ്റവും അടുത്ത കുടും​ബാം​ഗ​ങ്ങ​ളു​മാ​യി ഒരു ഊഷ്‌മള സൗഹൃദം നട്ടുവ​ളർത്തു​ന്ന​തെ​ങ്ങ​നെ​യെന്ന്‌ 11 പേരക്കി​ടാ​ങ്ങ​ളു​ടെ വല്ല്യപ്പ​നായ ഇറ്റലി​യി​ലെ ബാരി​യി​ലുള്ള ജ്യൂ​സെപ്പ്‌ പറയുന്നു: “ഇപ്പോൾ എന്റെ ‘ഗോത്ര’ത്തിലെ ആറു കുടും​ബ​ങ്ങ​ളിൽ മൂന്നെണ്ണം ദൂരെ​യാ​ണു താമസി​ക്കു​ന്നത്‌. എന്നാൽ ഞങ്ങളുടെ ഇടയിലെ സന്തോ​ഷ​ക​ര​മായ ഇടപെ​ട​ലു​കൾക്കും കൂടി​വ​ര​വു​കൾക്കും അതൊരു തടസ്സമല്ല. ഞങ്ങൾ 24 പേരും കുറഞ്ഞത്‌ വർഷത്തി​ലൊ​രി​ക്ക​ലെ​ങ്കി​ലും കൂടി​വ​രുന്ന രീതി​യുണ്ട്‌.”

വല്ല്യമ്മ​വ​ല്ല്യ​പ്പൻമാർ ഒറ്റയ്‌ക്കു താമസി​ക്കു​മ്പോൾ പരസ്‌പ​ര​മുള്ള സന്ദർശ​ന​ങ്ങ​ളും ഫോൺ വിളി​ക​ളും കുടും​ബാം​ഗ​ങ്ങ​ളു​മാ​യുള്ള കത്തിട​പാ​ടു​ക​ളും ക്രമമാ​യി നടത്തു​ന്നി​ല്ലെ​ങ്കിൽ ബന്ധങ്ങൾക്ക്‌ അകൽച്ച സംഭവി​ച്ചേ​ക്കാം. സ്‌നേഹം എപ്പോ​ഴും പ്രകടി​പ്പി​ക്ക​പ്പെ​ടേ​ണ്ട​തുണ്ട്‌. തങ്ങൾ ഇപ്പോ​ഴും ഊർജ​സ്വ​ല​രും സ്വയം​പ​ര്യാ​പ്‌ത​രു​മാ​യ​തു​കൊണ്ട്‌ മധ്യവ​യ​സ്‌ക​രോ നല്ല ആരോ​ഗ്യ​മു​ള്ള​വ​രോ ആയ ചില വല്ല്യമ്മ​വ​ല്ല്യ​പ്പൻമാർ തനിയെ താമസി​ക്കാൻ ആഗ്രഹി​ക്കു​ന്നു. എന്നാൽ മറ്റു കുടും​ബാം​ഗ​ങ്ങ​ളിൽനിന്ന്‌ അവർ തങ്ങളെ​ത്തന്നെ തീർത്തും ഒറ്റപ്പെ​ടു​ത്തു​ന്നെ​ങ്കിൽ സ്‌നേ​ഹ​ത്തി​നുള്ള ആവശ്യം വലുതാ​കു​മ്പോൾ അത്‌ ഉടനടി ലഭിക്കാ​ത്ത​താ​യി അവർ കണ്ടെത്തി​യേ​ക്കാം.

നൈജീ​രി​യ​യി​ലെ ഒരു വല്ല്യപ്പ​നായ മൈക്കിൾ പ്രയോ​ജ​ന​ക​ര​മായ മറ്റൊരു നിർദേശം നൽകുന്നു: “മറ്റുള്ളവർ നിങ്ങൾക്കു ചെയ്യണ​മെന്ന്‌ നിങ്ങൾ ഇച്ഛിക്കു​ന്നത്‌ അവർക്കു ചെയ്യുക എന്ന യേശു​വി​ന്റെ സുവർണ നിയമം ഞാൻ ബാധക​മാ​ക്കു​ന്നു. അക്കാര​ണ​ത്താൽ എന്റെ കുട്ടികൾ എന്നെ വളരെ​യ​ധി​കം സ്‌നേ​ഹി​ക്കു​ന്നു. ഞങ്ങൾ നല്ല ആശയവി​നി​യമം ആസ്വദി​ക്കു​ന്നു.” അദ്ദേഹം ഇങ്ങനെ കൂട്ടി​ച്ചേർക്കു​ന്നു: “എന്നെ വിഷമി​പ്പി​ക്കു​ന്ന​തെ​ന്തെ​ങ്കി​ലും എന്റെ പേരക്കു​ട്ടി​ക​ളി​ലാ​രെ​ങ്കി​ലും ചെയ്യു​ന്ന​പക്ഷം ആവശ്യ​മെ​ങ്കിൽ ഞാൻ അവരോട്‌ സംസാ​രി​ക്കു​ന്നു. എന്നാൽ അത്‌ അവഗണി​ക്കാ​വുന്ന എന്തെങ്കി​ലു​മാ​ണെ​ങ്കിൽ ഞാൻ അതു മറന്നു​ക​ള​യു​ന്നു.”

വല്ല്യമ്മ​വ​ല്ല്യ​പ്പൻമാ​രു​ടെ ചെറിയ സമ്മാന​ങ്ങ​ളും കുട്ടി​ക്ക​ളി​ക​ളു​മൊ​ക്കെ ക്രിയാ​ത്മ​ക​മായ ഒരു പ്രതി​ക​രണം ഉളവാ​ക്കു​ന്നു. എപ്പോ​ഴും പരാതി​പ​റ​യു​ന്ന​തി​നു പകരം ദയാപൂർവ​ക​വും പ്രോ​ത്സാ​ഹ​ജ​ന​ക​വു​മായ വാക്കുകൾ കുടുംബ ജീവി​തത്തെ ആനന്ദപൂർണ​മാ​ക്കി​ത്തീർക്കു​ന്നു. പേരക്കി​ടാ​ങ്ങൾക്കാ​യി സമയം മാറ്റി​വ​യ്‌ക്കു​ന്ന​തും രസകര​മായ കളിക​ളും പ്രയോ​ജ​ന​പ്ര​ദ​മായ ചെറിയ ജോലി​ക​ളും അവരെ പഠിപ്പി​ക്കു​ന്ന​തും ബൈബിൾ കഥകളും കുടും​ബ​ത്തി​ലെ സംഭവ​ക​ഥ​ക​ളും അവരെ പറഞ്ഞു​കേൾപ്പി​ക്കു​ന്ന​തും ഊഷ്‌മ​ള​വും നിലനിൽക്കു​ന്ന​തു​മായ ഓർമകൾ സൃഷ്ടി​ക്കു​ന്നു. ചെറു​തെ​ങ്കി​ലും പ്രധാ​ന​മായ അത്തരം കാര്യങ്ങൾ ജീവി​തത്തെ കൂടുതൽ ആസ്വാ​ദ്യ​മാ​ക്കി​ത്തീർക്കു​ന്നു.

പരസ്‌പര ആദരവി​ന്റെ പ്രയോ​ജ​ന​ങ്ങൾ

“കുട്ടി​കളെ വളർത്തു​ന്ന​തി​നുള്ള മാതാ​പി​താ​ക്ക​ളു​ടെ അധികാ​രത്തെ എതിർക്കാ​തെ​യോ അതി​നോ​ടു മത്സരി​ക്കാ​തെ​യോ ഇരിക്കാൻ വല്ല്യമ്മ​വ​ല്ല്യ​പ്പൻമാർ ശ്രദ്ധി​ക്കേ​ണ്ട​തുണ്ട്‌” എന്ന്‌ ഡോക്ടർ ജാസ്‌പാ​രെ പറയുന്നു. അദ്ദേഹം ഇങ്ങനെ കൂട്ടി​ച്ചേർക്കു​ന്നു: “അല്ലാത്ത​പക്ഷം അവർ വല്ല്യമ്മ​വ​ല്ല്യ​പ്പൻമാർ എന്നനി​ല​യി​ലുള്ള അവരുടെ പ്രവർത്തന മേഖല കടക്കു​ക​യും മാതാ​പി​താ​ക്ക​ളു​ടെ സ്ഥാനം അപഹരി​ച്ചെ​ടു​ക്കു​ക​യും ചെയ്യുന്നു.” കുട്ടി​കളെ പരിശീ​ലി​പ്പി​ക്കു​ന്ന​തി​നുള്ള പ്രാഥ​മിക ഉത്തരവാ​ദി​ത്വം മാതാ​പി​താ​ക്കൾക്കാ​ണെന്നു തിരു​വെ​ഴു​ത്തു​കൾ പറയു​ന്ന​തി​നോ​ടു ചേർച്ച​യി​ലാണ്‌ ഈ നിർദേശം.—സദൃശ​വാ​ക്യ​ങ്ങൾ 6:20; കൊ​ലൊ​സ്സ്യർ 3:20.

ജീവി​ത​ത്തി​ലെ അനുഭ​വ​പ​രി​ചയം നിമിത്തം ഉപദേശം കൊടു​ക്കു​ന്നതു വല്ല്യമ്മ​വ​ല്ല്യ​പ്പൻമാർക്ക്‌ എളുപ്പ​മാണ്‌. എന്നിരു​ന്നാ​ലും, അനാവ​ശ്യ​വും ചില​പ്പോൾ അസ്വീ​കാ​ര്യ​വു​മായ ഉപദേശം കൊടു​ക്കാ​തി​രി​ക്കാൻ അവർ ജാഗ്രത പാലി​ക്കണം. റോയി​യും ജീനും ഇപ്രകാ​രം പറയുന്നു: “കുട്ടി​കളെ പരിശീ​ലി​പ്പി​ക്കു​ക​യും അവർക്കു ശിക്ഷണം കൊടു​ക്കു​ക​യും ചെയ്യേ​ണ്ട​തി​ന്റെ പ്രാഥ​മിക ഉത്തരവാ​ദി​ത്വം മാതാ​പി​താ​ക്കൾക്കാ​ണെന്നു മനസ്സി​ലാ​ക്കു​ന്നതു പ്രധാ​ന​മാണ്‌. ചില​പ്പോൾ അവർ അൽപ്പം കൂടുതൽ കർക്കശ​രാ​ണെ​ന്നോ മറ്റുചില സന്ദർഭ​ങ്ങ​ളിൽ വേണ്ട​പോ​ലെ കർക്കശ​ര​ല്ലെ​ന്നോ ഒരാൾക്കു തോന്നി​യേ​ക്കാം. അതു​കൊണ്ട്‌ ഇടയ്‌ക്കു കയറു​ന്ന​തി​നുള്ള യഥാർഥ പ്രലോ​ഭ​ന​ത്തോ​ടു പോരാ​ടേ​ണ്ട​തി​ന്റെ ആവശ്യ​മുണ്ട്‌.” ബ്രിട്ടീ​ഷു​കാ​രായ മറ്റു രണ്ടു വല്ല്യമ്മ​വ​ല്ല്യ​പ്പൻമാ​രാണ്‌ മൈക്കി​ളും ഷീനയും. അവർ ഇതേ ആശയം സ്ഥിരീ​ക​രി​ക്കു​ന്നു: “കുട്ടികൾ ഞങ്ങളോട്‌ ഉപദേശം ചോദി​ക്കു​ക​യാ​ണെ​ങ്കിൽ ഞങ്ങൾ അതു കൊടു​ക്കും. എന്നാൽ അവർ അത്‌ തീർച്ച​യാ​യും അനുസ​രി​ക്കാൻ ഞങ്ങൾ പ്രതീ​ക്ഷി​ക്കു​ന്നില്ല, അനുസ​രി​ക്കാ​ത്ത​പക്ഷം വിഷമി​ക്കു​ന്നു​മില്ല.” പ്രായം​ചെന്ന മാതാ​പി​താ​ക്കൾക്കു തങ്ങളുടെ വിവാ​ഹി​ത​രായ ആൺമക്ക​ളി​ലും പെൺമ​ക്ക​ളി​ലും ശുഭാ​പ്‌തി​വി​ശ്വാ​സ​മു​ണ്ടാ​യി​രി​ക്കു​ന്നതു നല്ലതാണ്‌. അത്തരം ആത്മവി​ശ്വാ​സം മൂന്നു തലമു​റ​ക​ളു​ടെ​യും ഇടയി​ലുള്ള ബന്ധങ്ങളെ മെച്ച​പ്പെ​ടു​ത്തു​ന്നു.

ഇംഗ്ലണ്ടി​ന്റെ തെക്കു ഭാഗത്തു താമസി​ക്കുന്ന വിവ്യ​നും ജെയ്‌നും തങ്ങളുടെ മകനും മരുമ​ക​ളും കൊച്ചു​മ​ക്കൾക്കു കൊടു​ക്കുന്ന ശിക്ഷണത്തെ എല്ലായ്‌പോ​ഴും പിന്തു​ണ​യ്‌ക്കാൻ ശ്രമി​ക്കു​ന്നു. അവർ അവരോ​ടൊ​പ്പ​മാ​ണു താമസി​ക്കു​ന്നത്‌. “ചില​പ്പോൾ ഭിന്നത തോന്നു​മ്പോൾപോ​ലും ഞങ്ങളുടെ സ്വന്തം ആശയങ്ങൾ അടി​ച്ചേൽപ്പി​ക്കാൻ ഞങ്ങൾ ശ്രമി​ക്കു​ന്നില്ല. അവരുടെ ഡാഡി​യെ​യും മമ്മി​യെ​യും ഞങ്ങൾ പിന്തു​ണ​യ്‌ക്കു​ന്നു എന്നു മനസ്സി​ലാ​ക്കു​മ്പോൾ ‘ഒരു കൂട്ടരെ മറ്റൊരു കൂട്ടർക്കെ​തി​രാ​യി തിരി​ക്കാൻ’ കുട്ടികൾ ഒരിക്ക​ലും ശ്രമി​ക്കില്ല.” മാതാ​പി​താ​ക്കൾ അടുത്തി​ല്ലാ​ത്ത​പ്പോൾപോ​ലും പേരക്കു​ട്ടി​കൾക്കു ശിക്ഷണം കൊടു​ക്കു​ന്നതു സംബന്ധി​ച്ചു വല്ല്യമ്മ​വ​ല്ല്യ​പ്പൻമാർ ജാഗ്ര​ത​യു​ള്ള​വ​രാ​യി​രി​ക്കണം. ബ്രിട്ട​നിൽനി​ന്നുള്ള ഹാരോൾഡ്‌ ഇങ്ങനെ പറയുന്നു: “മാതാ​പി​താ​ക്ക​ളു​ടെ അഭാവ​ത്തിൽ ആവശ്യം​വ​ന്നേ​ക്കാ​വു​ന്ന​താ​യി വല്ല്യമ്മ​വ​ല്ല്യ​പ്പൻമാർക്കു തോന്നുന്ന ഏതൊരു ശിക്ഷണ​വും മാതാ​പി​താ​ക്ക​ളു​മാ​യി മുൻകൂ​ട്ടി ചർച്ച​ചെ​യ്‌തി​രി​ക്കണം.” പേരക്കു​ട്ടി​കൾക്കു കൊടു​ക്കുന്ന ദയാപൂർവ​മെ​ങ്കി​ലും ഉറച്ചരീ​തി​യി​ലുള്ള ഒരു വാക്കോ കേവലം “മാതാ​വോ പിതാ​വോ ആവശ്യ​പ്പെ​ടു​ന്ന​തി​ന്റെ” ഒരു ഓർമി​പ്പി​ക്ക​ലോ പലപ്പോ​ഴും മതിയാ​കും എന്ന്‌ ഹാരോൾഡ്‌ കൂട്ടി​ച്ചേർക്കു​ന്നു.

നൈജീ​രി​യാ​യി​ലെ ഒരു വല്ല്യപ്പ​നായ ക്രിസ്റ്റഫർ തന്റെ സ്വന്തം മക്കളുടെ ഭാഗത്ത്‌ എന്തെങ്കി​ലും കുറവു കാണു​മ്പോൾ പേരക്കു​ട്ടി​ക​ളു​ടെ മുമ്പിൽവെച്ച്‌ അതി​നെ​ക്കു​റി​ച്ചു സംസാ​രി​ക്കു​ന്നത്‌ ഒഴിവാ​ക്കു​ന്നു: “മാതാ​പി​താ​ക്കൾ തന്നെയാ​യി​രി​ക്കു​മ്പോൾ ഞാൻ ആവശ്യ​മാ​യി​രി​ക്കുന്ന ഏത്‌ ഉപദേ​ശ​വും കൊടു​ക്കു​ന്നു.” വല്ല്യമ്മ​വ​ല്ല്യ​പ്പൻമാ​രു​ടെ ഭാഗ​ധേ​യത്തെ ആദരി​ക്കു​ന്നു എന്ന്‌ ഉറപ്പു​വ​രു​ത്തു​ന്ന​തി​നാ​യി തിരി​ച്ചും മാതാ​പി​താ​ക്കൾ തങ്ങളുടെ പങ്കു ചെയ്യേ​ണ്ട​തുണ്ട്‌. “കുട്ടി​ക​ളു​ടെ മുമ്പിൽവെച്ചു വല്ല്യമ്മ​വ​ല്ല്യ​പ്പൻമാ​രു​ടെ​യോ മറ്റു കുടും​ബാം​ഗ​ങ്ങ​ളു​ടെ​യോ കുറവു​ക​ളെ​ക്കു​റിച്ച്‌ ഒരിക്ക​ലും പരാതി പറയരു​തെ​ന്നു​ള്ളത്‌ അടിസ്ഥാ​ന​കാ​ര്യ​മാണ്‌,” ഇറ്റലി​യി​ലെ റോമിൽ താമസി​ക്കുന്ന ഒരു പിതാ​വായ കാർലോ പറയുന്നു. ഒരു ജാപ്പനീസ്‌ മാതാ​വായ ഹിറോ​ക്കോ പറയുന്നു: “എന്റെ ഭർത്തൃ​ബ​ന്ധു​ക്ക​ളു​മാ​യി ഒരു പ്രശ്‌നം ഉണ്ടാകു​മ്പോൾ ഞാനത്‌ ആദ്യം എന്റെ ഭർത്താ​വു​മാ​യി ചർച്ച​ചെ​യ്യു​ന്നു.”

വല്ല്യമ്മ​വ​ല്ല്യ​പ്പൻമാ​രു​ടെ വിദ്യാ​ഭ്യാ​സ​പ​ര​മായ പങ്ക്‌

ഓരോ കുടും​ബ​ത്തി​നും മറ്റു കുടും​ബ​ങ്ങ​ളിൽനിന്ന്‌ അതിനെ വ്യത്യ​സ്‌ത​മാ​ക്കുന്ന തനതായ ചരി​ത്ര​വും പതിവു​ക​ളും അനുഭ​വ​ങ്ങ​ളും ഉണ്ട്‌. സാധാ​ര​ണ​മാ​യി, വല്ല്യമ്മ​വ​ല്ല്യ​പ്പൻമാർ കുടും​ബ​ച​രി​ത്ര​ത്തി​ന്റെ ഓർമ​ക്ക​ണ്ണി​യാണ്‌. ഒരു ആഫ്രിക്കൻ ചൊല്ല്‌ അനുസ​രിച്ച്‌, “മരിച്ചു​പോ​കുന്ന ഓരോ വൃദ്ധനും ചാമ്പലാ​യി​പ്പോ​കുന്ന ഒരു ലൈ​ബ്ര​റി​യാണ്‌.” ബന്ധുക്ക​ളെ​ക്കു​റി​ച്ചുള്ള ഓർമ​ക​ളും പ്രധാന കുടുംബ സംഭവ​ങ്ങ​ളും കുടും​ബത്തെ മിക്ക​പ്പോ​ഴും അതിന്റെ വേരു​ക​ളിൽ ഒന്നിപ്പി​ക്കുന്ന കുടുംബ മൂല്യ​ങ്ങ​ളും വല്ല്യമ്മ​വ​ല്ല്യ​പ്പൻമാ​രാ​ണു കൈമാ​റു​ന്നത്‌. ബൈബിൾ പ്രദാനം ചെയ്യുന്ന ധാർമിക മാർഗ​നിർദേ​ശ​ത്തി​ന്റെ കാര്യം കണക്കി​ലെ​ടു​ക്കാ​തെ ഒരു വിദഗ്‌ധൻ ഇങ്ങനെ പറഞ്ഞു: “ചെറു​പ്പ​ക്കാർക്കു ചരി​ത്ര​പ​ര​മായ ഓർമ​യി​ല്ലെ”ങ്കിൽ “തങ്ങൾക്കു മുമ്പു​ണ്ടാ​യി​രുന്ന അനുഭ​വ​ങ്ങ​ളു​ടെ അടിസ്ഥാ​ന​മി​ല്ലാ​തെ, മൂല്യ​ങ്ങ​ളി​ല്ലാ​തെ, ആത്മവി​ശ്വാ​സ​മി​ല്ലാ​തെ അഭദ്ര​മാ​യി അവർ വളരുന്നു.”—ഗെയ്‌റ്റ​നൊ ബാർലെറ്റ, നൊന്നി ഏ നിപൊ​റ്റി (വല്ല്യമ്മ​വ​ല്ല്യ​പ്പൻമാ​രും പേരക്കു​ട്ടി​ക​ളും).

മമ്മിയും ഡാഡി​യും മറ്റു ബന്ധുക്ക​ളും കൊച്ചാ​യി​രു​ന്ന​പ്പോ​ഴത്തെ കഥ കേൾക്കാൻ പേരക്കു​ട്ടി​കൾക്ക്‌ ഇഷ്ടമാണ്‌. ഒരു ഫോട്ടോ ആൽബം കാണു​ന്നതു വളരെ പ്രബോ​ധ​നാ​ത്മ​ക​വും വിനോ​ദാ​ത്മ​ക​വു​മാ​യി​രി​ക്കാൻ കഴിയും. ഫോ​ട്ടോ​ക​ളിൽ ചിത്രീ​ക​രി​ച്ചി​രി​ക്കു​ന്ന​പ്ര​കാ​രം വല്ല്യമ്മ​വ​ല്ല്യ​പ്പൻമാർ കഴിഞ്ഞ​കാല സംഭവ​ങ്ങ​ളു​ടെ കഥ പറയു​മ്പോൾ എന്തോരു ആർദ്ര​ത​യും ഊഷ്‌മ​ള​ത​യും ആണ്‌ ഉളവാ​കു​ന്നത്‌!

ബ്രിട്ട​നി​ലു​ള്ള യഹോ​വ​യു​ടെ സാക്ഷി​ക​ളായ രണ്ടു വല്ല്യമ്മ​വ​ല്ല്യ​പ്പൻമാർ, റെജും മോളി​യും പറയുന്നു: “പേരക്കു​ട്ടി​ക​ളു​ടെ അനേകം ചോദ്യ​ങ്ങൾക്ക്‌ ഉത്തരം കൊടു​ത്തു​കൊ​ണ്ടും അവരോ​ടൊ​ന്നി​ച്ചു കളിച്ചു​കൊ​ണ്ടും വായി​ച്ചു​കൊ​ണ്ടും അവരെ എഴുതാൻ പഠിപ്പി​ച്ചു​കൊ​ണ്ടും അവർ വായി​ക്കു​ന്നതു കേട്ടു​കൊ​ണ്ടും സ്‌നേ​ഹ​പൂർവ​ക​മായ താത്‌പ​ര്യ​ത്തോ​ടെ അവരുടെ സ്‌കൂൾ പഠനത്തിന്‌ അടുത്ത ശ്രദ്ധ​കൊ​ടു​ത്തു​കൊ​ണ്ടും മമ്മിയും ഡാഡി​യു​മാ​യുള്ള അവരുടെ അടുത്ത ബന്ധത്തിൽ തലകട​ത്താ​തെ അവരൊ​ന്നി​ച്ചു കഴിയാ​നും അവരോ​ടൊ​ത്തു കാര്യങ്ങൾ ചെയ്യാ​നും കഴിയു​ന്ന​തി​നാൽ ഞങ്ങൾക്കു സന്തോഷം കൈവ​ന്നി​രി​ക്കു​ന്നു.”

മിക്ക വല്ല്യമ്മ​വ​ല്ല്യ​പ്പൻമാ​രും മാതാ​പി​താ​ക്ക​ളും ചെയ്യുന്ന ഒരു വലിയ തെറ്റ്‌ കുട്ടി​ക​ളു​ടെ​യും പേരക്കു​ട്ടി​ക​ളു​ടെ​യും ശാരീ​രി​ക​ക്ഷേ​മ​ത്തെ​ക്കു​റി​ച്ചു മാത്രം ഉത്‌ക​ണ്‌ഠ​പ്പെ​ടു​ന്നു എന്നതാണ്‌. മുകളിൽ പരാമർശിച്ച റെജും മോളി​യും പറയുന്നു: “ദൈവ​വ​ച​ന​ത്തി​ന്റെ യഥാർഥ ജ്ഞാനത്തിൽ അവർ വളരു​ന്നു​ണ്ടെന്ന്‌ ഉറപ്പു​വ​രു​ത്തു​ന്ന​താ​ണു നമുക്ക്‌ കുട്ടി​കൾക്കും പേരക്കു​ട്ടി​കൾക്കും നൽകാൻ കഴിയുന്ന ഏറ്റവും മഹത്തായ പൂർവി​ക​സ്വത്ത്‌.”—ആവർത്ത​ന​പു​സ്‌തകം 4:9; 32:7; സങ്കീർത്തനം 48:13; 78:3, 4, 6.

ദിവ്യ​ബോ​ധ​ന​ത്തി​നു ചേർച്ച​യിൽ പ്രവർത്തി​ക്കൽ

ദൈവ​വ​ച​ന​മായ വിശുദ്ധ ബൈബിൾ ആളുക​ളിൽ “ശക്തി ചെലു​ത്തു​ന്നു.” അതിന്‌ സ്വാർഥ​ത​യും അഹന്തയും പോലുള്ള വിഭജ​നാ​ത്മ​ക​മായ സ്വഭാ​വ​ങ്ങളെ നിയ​ന്ത്രി​ക്കാ​നും നീക്കം​ചെ​യ്യാ​നും അവരെ സഹായി​ക്കാ​നുള്ള പ്രാപ്‌തി​യുണ്ട്‌. (എബ്രായർ 4:12, NW) അതു​കൊണ്ട്‌ അതിന്റെ പഠിപ്പി​ക്ക​ലു​കൾ പ്രാവർത്തി​ക​മാ​ക്കു​ന്നവർ കുടും​ബ​ത്തിൽ സമാധാ​ന​വും ഐക്യ​വും ആസ്വദി​ക്കു​ന്നു. മൂന്നു തലമു​റകൾ തമ്മിലു​ണ്ടാ​യേ​ക്കാ​വുന്ന ഏതു വിടവി​നെ​യും നീക്കം​ചെ​യ്യാൻ സഹായി​ക്കുന്ന അസംഖ്യം തിരു​വെ​ഴു​ത്തു​ക​ളി​ലൊന്ന്‌ ഫിലി​പ്പി​യർ 2:2-4 ആണ്‌. ‘തങ്ങളുടെ സ്വന്തഗു​ണമല്ല മറ്റുള്ള​വന്റെ ഗുണവും കൂടെ നോക്കി​ക്കൊണ്ട്‌’ ഐക്യം നിലനിർത്തു​ന്ന​തി​നാ​യി സ്‌നേ​ഹ​വും മനസ്സിന്റെ താഴ്‌മ​യും പ്രകടി​പ്പി​ക്കാൻ അത്‌ എല്ലാവ​രെ​യും പ്രോ​ത്സാ​ഹി​പ്പി​ക്കു​ന്നു.

ദിവ്യ​ബോ​ധ​ന​ത്തി​നു ചേർച്ച​യിൽ പ്രവർത്തി​ച്ചു​കൊണ്ട്‌ മാതാ​പി​താ​ക്ക​ളും പേരക്കു​ട്ടി​ക​ളും ഒരു​പോ​ലെ ഭൗതി​ക​മാ​യും വൈകാ​രി​ക​മാ​യും ആത്മീയ​മാ​യും “മാതാ​പി​താ​ക്കൾക്കും വല്യമ്മ​വ​ല്യ​പ്പൻമാർക്കും ഉചിത​മായ പ്രതി​ഫലം കൊടു​ത്തു​കൊ​ണ്ടി​രി”പ്പാനുള്ള ഉദ്‌ബോ​ധനം വളരെ ഗൗരവ​മാ​യി എടുക്കു​ന്നു. (1 തിമോ​ത്തി 5:4, NW) യഹോ​വ​യോ​ടുള്ള ഒരു ആരോ​ഗ്യാ​വ​ഹ​മായ ഭയം നിമിത്തം അവന്റെ പിൻവ​രുന്ന വാക്കുകൾ മനസ്സിൽ പിടി​ച്ചു​കൊണ്ട്‌ അവർ വല്യമ്മ​വ​ല്യ​പ്പൻമാ​രോട്‌ ആഴമായ ബഹുമാ​നം പ്രകട​മാ​ക്കു​ന്നു: “നരച്ചവന്റെ മുമ്പാകെ എഴു​ന്നേ​ല്‌ക്ക​യും വൃദ്ധന്റെ മുഖം ബഹുമാ​നി​ക്ക​യും നിന്റെ ദൈവത്തെ ഭയപ്പെ​ടു​ക​യും വേണം.” (ലേവ്യ​പു​സ്‌തകം 19:32) തങ്ങളുടെ പിൻഗാ​മി​ക​ളു​ടെ ക്ഷേമത്തി​നു​വേണ്ടി പ്രവർത്തി​ച്ചു​കൊ​ണ്ടു വല്ല്യമ്മ​വ​ല്ല്യ​പ്പൻമാർ നന്മ പ്രകട​മാ​ക്കണം: “ഗുണവാൻ മക്കളുടെ മക്കൾക്കു അവകാശം വെച്ചേ​ക്കു​ന്നു.”—സദൃശ​വാ​ക്യ​ങ്ങൾ 13:22.

ഒന്നിച്ചാ​ണു ജീവി​ക്കു​ന്ന​തെ​ങ്കി​ലും അല്ലെങ്കി​ലും വല്ല്യമ്മ​വ​ല്ല്യ​പ്പൻമാർക്കും മാതാ​പി​താ​ക്കൾക്കും പേരക്കി​ടാ​ങ്ങൾക്കും സ്‌നേ​ഹ​ത്തി​ലും ആദരവി​ലും അധിഷ്‌ഠി​ത​മായ സ്‌നേ​ഹ​പൂർവ​ക​മായ ബന്ധങ്ങളിൽനി​ന്നു പരസ്‌പര പ്രയോ​ജ​ന​മ​നു​ഭ​വി​ക്കാൻ കഴിയും. സദൃശ​വാ​ക്യ​ങ്ങൾ 17:6 ഇപ്രകാ​രം പറയുന്നു: “മക്കളുടെ മക്കൾ വൃദ്ധന്മാർക്കു കിരീ​ട​മാ​കു​ന്നു; മക്കളുടെ മഹത്വം അവരുടെ അപ്പന്മാർ തന്നേ.”

[അടിക്കു​റി​പ്പു​കൾ]

[8-ാം പേജിലെ ചിത്രം]

കുടുംബത്തിന്റെ വീണ്ടു​മുള്ള കൂടി​വ​ര​വിന്‌ കുടുംബ ഐക്യം സംഭാവന ചെയ്യാൻ കഴിയും

[9-ാം പേജിലെ ചിത്രം]

വല്ല്യമ്മവല്ല്യപ്പൻമാർക്കു നിങ്ങൾ കത്തുകൾ എഴുതു​മ്പോൾ അവർ പ്രോ​ത്സാ​ഹി​പ്പി​ക്ക​പ്പെ​ടു​ന്നു

[10-ാം പേജിലെ ചിത്രം]

നിങ്ങളുടെ പേരക്കു​ട്ടി​ക​ളോ​ടൊ​പ്പ​മി​രു​ന്നു കുടുംബ ആൽബം കാണു​ന്നത്‌ ഒരു ധന്യമായ അനുഭ​വ​മാ​യി​രി​ക്കാൻ കഴിയും