ഇന്ത്യയി​ലെ സ്‌ത്രീ​കൾ—21-ാം നൂറ്റാ​ണ്ടി​ലേക്കു നീങ്ങുന്നു

ഇന്ത്യയിലെ ഉണരുക! ലേഖകൻ

അവരുടെയിടയിൽ പൊക്ക​മു​ള്ള​വ​രും പൊക്കം കുറഞ്ഞ​വ​രു​മുണ്ട്‌. മെലി​ഞ്ഞ​വ​രും തടിച്ച​വ​രു​മുണ്ട്‌. തമാശ​ക്കാ​രും മൂശ്ശേ​ട്ട​സ്വ​ഭാ​വ​ക്കാ​രു​മുണ്ട്‌. ധനാഢ്യ​രും തീരെ പാവ​പ്പെ​ട്ട​വ​രു​മുണ്ട്‌. വിദ്യാ​സ​മ്പ​ന്ന​രും തീർത്തും നിരക്ഷ​ര​രു​മുണ്ട്‌. ആരാണ്‌ അവർ? ഇന്ത്യയി​ലെ സ്‌ത്രീ​കൾ. അവരെ​ങ്ങോ​ട്ടാ​ണു പോകു​ന്നത്‌? 21-ാം നൂറ്റാ​ണ്ടി​ലേ​ക്കാണ്‌ അവരുടെ നീക്കം.

ഇന്ത്യക്കു പുറത്തുള്ള മിക്ക ആളുകൾക്കും ഇന്ത്യയി​ലെ സ്‌ത്രീ​യെന്നു പറയു​മ്പോൾ മനസ്സിൽ വരുന്നത്‌ ആകർഷ​ക​മായ സ്വഭാ​വ​വും സൗന്ദര്യ​വും ഒളിഞ്ഞു​കി​ട​ക്കുന്ന ഗുണങ്ങ​ളും വശ്യത​യും ഒത്തിണ​ങ്ങിയ ഒരു മങ്കയെ​യാണ്‌. പല പുരു​ഷ​ന്മാ​രും ഭാര്യ​മാർക്കു​വേണ്ടി തിരച്ചിൽ നടത്തു​ന്നത്‌ ഇന്ത്യയി​ലാണ്‌. ഇന്ത്യൻ സ്‌ത്രീ​കൾ, കീഴ്‌പെ​ട്ടി​രി​ക്കുന്ന കാര്യ​ത്തി​ലും ഭർത്താ​ക്കൻമാ​രെ സന്തോ​ഷി​പ്പി​ക്കുന്ന കാര്യ​ത്തി​ലും വീടു നന്നായി സൂക്ഷി​ക്കുന്ന കാര്യ​ത്തി​ലും പാശ്ചാത്യ നാടു​ക​ളി​ലെ തങ്ങളുടെ ഏറെ സ്വത​ന്ത്ര​രായ സഹോ​ദ​രി​മാ​രെ​ക്കാൾ മെച്ചമാ​യി പ്രവർത്തി​ക്കു​ന്നു എന്ന അഭി​പ്രാ​യ​മാണ്‌ ഇതിനു ഭാഗി​ക​മായ കാരണം. എന്നിരു​ന്നാ​ലും, വ്യത്യസ്‌ത ധാർമിക-മത-സാമൂ​ഹിക ചുറ്റു​പാ​ടു​ക​ളു​ടെ വിശാ​ല​മായ ഈ ഉരുക്കു​ക​ല​ത്തിൽ കിടക്കുന്ന ഒരു സാധാരണ ഇന്ത്യാ​ക്കാ​രി​യെ​ക്കു​റി​ച്ചു വർണി​ക്കു​ന്നതു വഴി​തെ​റ്റി​ക്കു​ന്ന​താണ്‌. ഈ വശ്യമ​നോ​ഹ​ര​മായ ദേശത്ത്‌ എല്ലാ തരക്കാ​രായ സ്‌ത്രീ​ക​ളു​മുണ്ട്‌.

സമാധാ​ന​പ​ര​മാ​യോ ബലം​പ്ര​യോ​ഗി​ച്ചോ സംയോ​ജി​പ്പിച്ച അനേക സംസ്‌കാ​ര​ങ്ങ​ളു​ടെ ഒരു ചരി​ത്ര​മാണ്‌ ഇന്ത്യയു​ടേത്‌. ഇവിടത്തെ ആദിമ നിവാ​സി​ക​ളായ ദ്രാവി​ഡർ എവി​ടെ​നി​ന്നാ​ണു വന്നത്‌ എന്നതു സംബന്ധിച്ച്‌ ഊഹാ​പോ​ഹ​ങ്ങ​ളുണ്ട്‌. അവരുടെ ഉത്ഭവം ഓസ്‌​ട്രേ​ലി​യ​ക്കാ​രു​ടെ​യും മെഡി​റ്റ​റേ​നി​യന്റെ തെക്കു ഭാഗത്തു പാർക്കുന്ന ആളുക​ളു​ടെ​യും, പ്രത്യേ​കി​ച്ചു ക്രേത്ത​രു​ടെ​യും, ഒരു സങ്കരത്തിൽനി​ന്നാ​ണെന്നു തോന്നു​ന്നു. ആര്യൻമാ​രും പേർഷ്യ​ക്കാ​രും വടക്കു​പ​ടി​ഞ്ഞാ​റു​നി​ന്നും മംഗോ​ളി​യർ വടക്കു​കി​ഴ​ക്കു​നി​ന്നും ഇന്ത്യയി​ലേക്കു നീങ്ങി​യ​പ്പോൾ ദ്രാവി​ഡർ തെക്കു​ഭാ​ഗ​ത്തേക്കു പിൻവാ​ങ്ങി. അങ്ങനെ, ദക്ഷി​ണേ​ന്ത്യ​യി​ലെ സ്‌ത്രീ​കൾക്കു പൊതു​വേ, പൊക്കം​കു​റഞ്ഞ ശരീര​ഘ​ട​ന​യും ഇരുണ്ട ചർമവു​മാ​ണു​ള്ളത്‌. എന്നാൽ ഉത്തരേ​ന്ത്യ​ക്കാർക്കു നല്ല പൊക്ക​വും വെളുത്ത ചർമവു​മാ​ണു​ള്ളത്‌, എങ്കിലും അവരു​ടെ​യും കണ്ണും തലമു​ടി​യും കറുത്തതു തന്നെ. വടക്കു​കി​ഴ​ക്കുള്ള മിക്കവർക്കും പൗരസ്‌ത്യ സ്വഭാ​വ​വി​ശേ​ഷ​ത​ക​ളാ​ണു​ള്ളത്‌.

ഇന്ത്യയി​ലെ സ്‌ത്രീ​ക​ളു​ടെ നിലവാ​രം സ്ഥാപി​ക്കു​ന്ന​തിൽ മതം ഒരു മുഖ്യ പങ്കുവ​ഹി​ച്ചി​രി​ക്കു​ന്നു. ആധുനിക ഇന്ത്യ ഒരു മതേതര രാഷ്ട്ര​മാ​യ​തു​കൊണ്ട്‌ പുരോ​ഗ​തി​പ്രാ​പി​ക്കു​ന്ന​തിൽനി​ന്നു സ്‌ത്രീ​കളെ തടഞ്ഞു​വെ​ച്ചി​രുന്ന പരമ്പരാ​ഗത വീക്ഷണ​ങ്ങൾക്കു മാറ്റം​വ​രു​ത്താ​നുള്ള എല്ലാ ശ്രമങ്ങ​ളും നടത്തി​വ​രു​ക​യാണ്‌. ധനിക​രും സ്വാധീ​ന​ശ​ക്തി​യു​ള്ള​വ​രു​മായ സ്‌ത്രീ​കൾക്കു മാത്രമല്ല സകല സ്‌ത്രീ​കൾക്കും വിദ്യാ​ഭ്യാ​സ​ത്തി​നുള്ള അവസരങ്ങൾ വർധി​പ്പി​ക്കാൻ തക്കവണ്ണം വലിയ പടികൾ സ്വീക​രി​ച്ചു വരുന്നു. പെൺകു​ട്ടി​കൾക്കുള്ള സാക്ഷരതാ ക്ലാസ്സു​ക​ളും ഗ്രാമ​ങ്ങ​ളി​ലെ തൊഴി​ല​ധി​ഷ്‌ഠിത പരിശീ​ല​ന​വും സൗജന്യ വിദ്യാ​ഭ്യാ​സ​വും ഇന്ത്യൻ സ്‌ത്രീ​ത്വ​ത്തി​ന്റെ മുഖച്ഛായ മാറ്റു​ക​യാണ്‌.

1994, ജൂൺ 22-ന്‌ മഹാരാ​ഷ്ട്ര സംസ്ഥാനം സ്‌ത്രീ​കൾക്കുള്ള ഒരു ഗവൺമെൻറ്‌ നയം പുറത്തു​വി​ട്ടു​കൊണ്ട്‌ ഒരു വലിയ പടി മുമ്പോ​ട്ടു വച്ചു. “ചരി​ത്ര​പ്ര​ധാന”വൂം “വിപ്ലവാ​ത്മക”വുമെന്ന്‌ ഇന്ത്യൻ വൈസ്‌ പ്രസി​ഡ​ന്റായ കെ. ആർ. നാരാ​യണൻ വർണിച്ച അത്‌ കൂട്ടു​ട​മ​സ്ഥതാ അവകാ​ശങ്ങൾ, രക്ഷാകർത്തൃ​ത്വം, വീടു​വ​യ്‌ക്കു​ന്ന​തി​നുള്ള സഹായങ്ങൾ, തുല്യ തൊഴി​ല​വ​സ​രങ്ങൾ എന്നിങ്ങനെ സ്‌ത്രീ​ക​ളു​ടെ അടിസ്ഥാ​ന​പ്ര​ശ്‌ന​ങ്ങ​ളി​ലേക്കു ശ്രദ്ധതി​രി​ച്ചു.

മേലാൽ വീട്ടിൽ ഒതുങ്ങി​ക്കൂ​ടി കഴിയു​ന്ന​തി​നു പകരം കൂടുതൽ സ്‌ത്രീ​കൾ കോ​ളെ​ജിൽ പോകു​ക​യും തൊഴിൽ വിപണി​യിൽ ഇറങ്ങു​ക​യും ചെയ്യു​ന്ന​തോ​ടെ ധാർമിക രംഗത്തെ മാറ്റങ്ങൾ സംബന്ധി​ച്ചു ചോദ്യ​ങ്ങ​ളു​യർന്നി​രി​ക്ക​യാണ്‌. കോ​ളെ​ജു​ക​ളി​ലെ മയക്കു​മ​രു​ന്നു ദുരു​പ​യോ​ഗ​ത്തെ​ക്കു​റി​ച്ചും ധാർമിക മൂല്യ​ങ്ങ​ളു​ടെ അധഃപ​ത​ന​ത്തെ​ക്കു​റി​ച്ചു​മുള്ള റിപ്പോർട്ടു​കൾ പ്രത്യ​ക്ഷ​മാ​കു​ന്നു. ചെറു​പ്പ​ക്കാ​രായ ചില ഇന്ത്യൻ സ്‌ത്രീ​ക​ളു​ടെ രൂപാ​ന്ത​ര​ണ​ത്തിൽ മാധ്യ​മങ്ങൾ ഒരു മുഖ്യ പങ്കുവ​ഹി​ക്കു​ന്നു. 30 വർഷം മുമ്പത്തെ ഇന്ത്യൻ ചലച്ചി​ത്ര​ങ്ങളെ ഇന്നത്തവ​യു​മാ​യി താരത​മ്യ​പ്പെ​ടു​ത്തു​മ്പോൾ സ്‌ത്രീ​ക​ളെ​ക്കു​റി​ച്ചുള്ള ചിത്രീ​ക​ര​ണ​ത്തി​നു ബൃഹത്തായ മാറ്റം സംഭവി​ച്ചി​രി​ക്കു​ന്ന​താ​യി അനേകർ കണ്ടെത്തു​ന്നു. ഒരു ഇന്ത്യാ​ക്കാ​രി സ്‌ത്രീ ഇങ്ങനെ അഭി​പ്രാ​യ​പ്പെട്ടു: “ഞാൻ സ്‌കൂ​ളിൽ പഠിച്ചു​കൊ​ണ്ടി​രുന്ന സമയത്തെ ശാലീ​ന​രും സൗമ്യ​രും ആത്മത്യാ​ഗി​ക​ളു​മായ മുൻ ചലച്ചിത്ര നായി​ക​മാർ ഇപ്പോൾ, ഇഷ്ടപ്പെ​ടാ​തെ വരു​മ്പോൾ ഭർത്താ​വി​നെ​യും ഭർത്തൃ​ബ​ന്ധു​ക്ക​ളെ​യും ഇട്ടേച്ചു​പോ​കു​ക​യും തന്റെ അവകാ​ശ​ങ്ങൾക്കു​വേ​ണ്ടി​യും സ്വാത​ന്ത്ര്യ​ത്തി​നു​വേ​ണ്ടി​യും മല്ലടി​ക്കു​ക​യും ചെയ്യുന്ന ആധുനിക പെൺകു​ട്ടി​ക്കു വഴിമാ​റി​ക്കൊ​ടു​ത്തി​രി​ക്കു​ന്നു.”

എന്നിരു​ന്നാ​ലും, മൊത്ത​ത്തിൽ നോക്കു​മ്പോൾ ഇന്ത്യാ​ക്കാ​രു​ടെ വസ്‌ത്ര​ധാ​ര​ണ​വും സ്വഭാ​വ​വും പല രാജ്യ​ങ്ങ​ളെ​യും അപേക്ഷി​ച്ചു മിതത്വ​മു​ള്ള​താ​ണെന്നു കാണാം. സ്‌ത്രീ​കൾ ഏറ്റവും സാധാ​ര​ണ​മാ​യി ധരിക്കുന്ന ഭംഗി​യുള്ള സാരി ശരീര​ത്തി​ന്റെ മിക്ക ഭാഗങ്ങ​ളെ​യും​തന്നെ മാന്യ​മാ​യി മറയ്‌ക്കു​ന്നു. ചെറു​പ്പ​ക്കാ​രി​ക​ളു​ടെ​യി​ട​യിൽ, പ്രത്യേ​കി​ച്ചു വടക്കേ ഇന്ത്യയിൽ, പ്രചാ​ര​മാർജിച്ച വസ്‌ത്രം ഷൽവാർ-കമീസ്‌ ആണ്‌. പൈജാ​മാ പോ​ലെ​യുള്ള പാൻറ്‌സും അതിനു മേലേ ധരിക്കുന്ന ഒരു അയഞ്ഞ വസ്‌ത്ര​വു​മുൾപ്പെ​ട്ട​താണ്‌ അത്‌. ഇവിടത്തെ പാശ്ചാത്യ ഫാഷനു​കൾ സാധാ​ര​ണ​മാ​യി മാന്യ​മായ സ്റ്റൈലി​ലും അളവി​ലും ഉള്ളതാണ്‌. ബോം​ബെ​യി​ലും ഗോവ​യി​ലും കൽക്കട്ട​യി​ലു​മാണ്‌ അതു മുഖ്യ​മാ​യും കാണു​ന്നത്‌.

പുതിയ തൊഴി​ല​വ​സ​ര​ങ്ങൾ

21-ാം നൂറ്റാ​ണ്ടി​ലേക്കു നീങ്ങവേ ഇന്ത്യൻ സ്‌ത്രീ​കൾക്ക്‌ ഏതുതരം തൊഴി​ലാ​ണു ലഭ്യമാ​യി​രി​ക്കു​ന്നത്‌? ഇന്ത്യയി​ലെ ജനസം​ഖ്യ​യു​ടെ ഒരു വലിയ അനുപാ​തം ഗ്രാമ​ങ്ങ​ളി​ലാ​ണു താമസി​ക്കു​ന്നത്‌. അവരുടെ തൊഴിൽ കൃഷി​യാണ്‌. കോടി​ക്ക​ണ​ക്കി​നാ​ളു​കൾ പാടങ്ങ​ളിൽ പണി​യെ​ടു​ക്കു​ന്നു. എല്ലാത്ത​ര​ത്തി​ലു​മുള്ള കൃഷി​പ്പ​ണി​കൾ ചെയ്‌തു​കൊണ്ട്‌ സ്‌ത്രീ​കൾ പുരു​ഷൻമാർക്കൊ​പ്പം വേല​ചെ​യ്യു​ന്നു. അങ്ങുദൂ​രെ​യുള്ള നദിക​ളിൽനി​ന്നും കിണറു​ക​ളിൽനി​ന്നും അവർ വെള്ളം ചുമന്നു​കൊ​ണ്ടു​വ​രി​ക​യും ഇന്ധനത്തി​നുള്ള വിറക്‌ ബുദ്ധി​മു​ട്ടി ശേഖരി​ക്കു​ക​യും ചെയ്യുന്നു. ജോലി​ചെ​യ്യുന്ന സമയത്ത്‌ കുഞ്ഞു​ങ്ങളെ എളിയിൽ ഇരുത്തു​ക​യോ വൃക്ഷങ്ങ​ളിൽ കെട്ടി​യിട്ട തുണി​ത്തൊ​ട്ടി​ലിൽ കിടത്തു​ക​യോ ചെയ്യുന്നു.

20-ാം നൂറ്റാ​ണ്ടി​ന്റെ ആരംഭം മുതൽ ഇന്ത്യയി​ലെ ഗ്രാമീണ കുടും​ബങ്ങൾ നഗര പ്രാന്ത​ങ്ങ​ളി​ലേക്കു തൊഴിൽ തേടി ഒഴുകി​യി​രി​ക്കു​ന്നു. സ്‌ത്രീ​കൾ തുണി​മി​ല്ലു​ക​ളി​ലും ഫാക്ടറി​ക​ളി​ലും വേല ചെയ്‌തി​രി​ക്കു​ന്നു. എന്നിരു​ന്നാ​ലും, വ്യവസായ ആധുനി​ക​വ​ത്‌ക​രണം പുരു​ഷൻമാ​രെ​ക്കാ​ള​ധി​കം സ്‌ത്രീ​ജോ​ലി​ക്കാ​രെ​യാ​ണു ബാധി​ച്ചി​രി​ക്കു​ന്നത്‌. പുരു​ഷൻമാർക്കു യന്ത്രങ്ങൾ പ്രവർത്തി​പ്പി​ക്കാൻ പരിശീ​ലനം ലഭിച്ചു, എന്നാൽ സ്‌ത്രീ​കൾക്കു ലഭിച്ചില്ല. ഇത്‌ സ്‌ത്രീ​കൾക്കു വളരെ​യ​ധി​കം കഷ്ടപ്പാടു വരുത്തി​വച്ചു. പണിസ്ഥ​ല​ങ്ങ​ളി​ലേക്കു സാധനങ്ങൾ ചുമക്കൽ, ഭാരിച്ച ചാക്കുകൾ നിറച്ച പിടി​വ​ണ്ടി​കൾ വലിക്കൽ, പഴയവ​സ്‌ത്രങ്ങൾ വിൽക്കൽ എന്നിവ​യി​ലും താഴ്‌ന്ന​കൂ​ലി ലഭിക്കുന്ന മറ്റു ജോലി​ക​ളി​ലു​മാ​യി അവരുടെ പ്രവർത്തനം പരിമി​ത​പ്പെട്ടു.

സ്‌ത്രീ​ക​ളു​ടെ ഭാഗ​ധേയം മെച്ച​പ്പെ​ടു​ത്തു​ന്ന​തി​നു സാമൂ​ഹിക പരിഷ്‌കർത്താ​ക്കൾ ശ്രമങ്ങൾ നടത്തി. എസ്‌ഇ​ഡ​ബ്ലി​യുഎ (സ്വയം തൊഴി​ലു​കാ​രായ സ്‌ത്രീ​ക​ളു​ടെ സംഘടന) പോ​ലെ​യുള്ള പ്രസ്ഥാ​നങ്ങൾ മുളച്ചു​വന്നു. ജോലി​ചെ​യ്യാൻ കഴിയ​ത്ത​ക്ക​വണ്ണം ആരോ​ഗ്യം സംരക്ഷി​ക്കു​ന്ന​തി​നും അഴിമതി നടപടി​ക​ളിൽ കുടു​ങ്ങി​പ്പോ​കാ​തി​രി​ക്കാ​നാ​വശ്യ​മായ സാക്ഷരത ലഭിക്കു​ന്ന​തി​നും തങ്ങളുടെ ജോലി വൈദ​ഗ്‌ധ്യ​ങ്ങൾ മെച്ച​പ്പെ​ടു​ത്തു​ന്ന​തി​നും സ്വന്തമാ​യി മുതലു​ണ്ടാ​ക്കാൻ തക്കവണ്ണം പണം സ്വരൂ​പി​ക്കാൻ പഠിക്കു​ന്ന​തി​നും അസാൻമാർഗി​ക​ളായ പണം പലിശ​ക്കാർ ചുമത്തുന്ന ഉയർന്ന പലിശ നിരക്കു​ക​ളിൽ പെട്ടു​പോ​കാ​തി​രി​ക്കാ​നും വിദ്യാ​ഭ്യാ​സ​മി​ല്ലാത്ത സ്‌ത്രീ ജോലി​ക്കാ​രെ സഹായി​ക്കു​ക​യെ​ന്ന​താ​യി​രു​ന്നു അവയുടെ ലക്ഷ്യം. ഒരു സാമൂ​ഹിക പണിയാ​യു​ധ​മാ​യി സ്‌ത്രീ​വി​മോ​ചന പ്രസ്ഥാ​നത്തെ ഉപയോ​ഗി​ക്കു​ന്നതു സംബന്ധി​ച്ചു ചോദി​ച്ച​പ്പോൾ പ്രമുഖ സാമൂ​ഹി​ക​ശാ​സ്‌ത്ര​ജ്ഞ​നായ സരിന ഭട്ടി പറഞ്ഞത്‌ “ഇന്ത്യയി​ലെ സ്‌ത്രീ​വി​മോ​ചന പ്രസ്ഥാ​ന​മെന്നു പറയു​ന്നതു സ്‌ത്രീ​ക​ളു​ടെ പ്രശ്‌നങ്ങൾ ശ്രദ്ധി​ക്കുക, അവരെ സംഘടി​പ്പി​ക്കുക, ആരോ​ഗ്യ​വും പോഷ​ണ​വും നൽകു​ന്ന​തോ​ടൊ​പ്പം അവർക്ക്‌ സാങ്കേ​തിക വിദ്യാ​ഭ്യാ​സ​വും നൽകാൻ ശ്രമി​ക്കുക എന്നിവ​യൊ​ക്കെ” ആണെന്നാണ്‌.

അതേസ​മ​യം തന്നേ, ഉയർന്ന സാമൂ​ഹിക നിലവാ​ര​മു​ള്ള​വ​രാ​യി കണക്കാ​ക്ക​പ്പെട്ട സമ്പന്ന കുടും​ബ​ങ്ങ​ളി​ലെ വിദ്യാ​സ​മ്പ​ന്ന​രായ സ്‌ത്രീ​ക​ളു​ടെ​യും ഇടത്തരം കുടും​ബ​ങ്ങ​ളി​ലെ സ്‌ത്രീ​ക​ളു​ടെ​യും സാഹച​ര്യം സംബന്ധിച്ച വീക്ഷണ​ങ്ങൾക്കു മാറ്റം വന്നു​കൊ​ണ്ടി​രു​ന്നു. ഇരു പശ്ചാത്ത​ല​ങ്ങ​ളിൽനി​ന്നു​മുള്ള സ്‌ത്രീ​കളെ ഇപ്പോൾ പഠിപ്പി​ക്ക​ലി​ലും ചികി​ത്സ​യി​ലും മാത്രമല്ല എല്ലാത്തരം ജോലി​ക​ളി​ലും കാണാം. അവർക്കി​ട​യിൽ വിമാ​ന​മോ​ടി​ക്കു​ന്ന​വ​രുണ്ട്‌, മോഡ​ലു​ക​ളുണ്ട്‌, എയർ ഹോസ്റ്റ​സ്സു​മാ​രുണ്ട്‌, പൊലീ​സു​കാ​രുണ്ട്‌, ഉന്നത കാര്യ​നിർവഹണ തസ്‌തി​ക​ക​ളിൽ ജോലി​നോ​ക്കു​ന്ന​വ​രു​മുണ്ട്‌. പല വർഷങ്ങ​ളോ​ളം, ഇന്ത്യയു​ടെ പ്രധാ​ന​മ​ന്ത്രി​യാ​യി​രു​ന്നത്‌ ഒരു സ്‌ത്രീ​യാ​യി​രു​ന്നു, അവർ ലോക​ത്തി​ലെ ഏറ്റവും വലിയ ജനാധി​പ​ത്യ​ത്തിൽ തിര​ഞ്ഞെ​ടു​ക്ക​പ്പെട്ടു. ഇന്ത്യൻ സ്‌ത്രീ​കൾ സായുധ സൈന്യ​ങ്ങ​ളിൽ ചുമത​ലകൾ വഹിക്കു​ന്നു. അഭിഭാ​ഷ​ക​രാ​യും ചീഫ്‌ ജസ്റ്റിസു​മാ​രാ​യും അവർ സേവി​ക്കു​ന്നു. ആയിരങ്ങൾ വ്യവസായ സംഘാ​ട​ക​രാ​യി ബിസി​ന​സ്സി​ലേ​ക്കി​റ​ങ്ങി​യി​രി​ക്കു​ന്നു.

വിവാ​ഹ​രം​ഗത്തെ മാറ്റങ്ങൾ

സ്വത​ന്ത്ര​മായ തൊഴി​ലി​നുള്ള ഈ പ്രവണത നിമിത്തം ആധുനിക ഇന്ത്യൻ സ്‌ത്രീ​കൾക്കു വിവാ​ഹ​ത്തെ​ക്കു​റിച്ച്‌ എന്താണു തോന്നു​ന്നത്‌? 19-ഉം 20-ഉം നൂറ്റാ​ണ്ടു​കൾ, വിവാ​ഹി​ത​രായ ഇന്ത്യൻ സ്‌ത്രീ​ക​ളിൽ വലിയ മാറ്റങ്ങൾ വരുത്തി. ഒരു വിധവ സ്വമന​സ്സാ​ലേ തന്റെ ഭർത്താ​വി​ന്റെ ചിതയിൽ ചാടി വെന്തു​മ​രി​ക്കുന്ന സതി എന്നറി​യ​പ്പെ​ടുന്ന പുരാതന ആചാരം ബ്രിട്ടീഷ്‌ ഭരണത്തിൻ കീഴിൽ നിർത്ത​ലാ​ക്ക​പ്പെട്ടു. ശൈശവ വിവാഹം നിയമ​പ​ര​മാ​യി നിരോ​ധി​ക്ക​പ്പെട്ടു. അങ്ങനെ 18 വയസ്സിനു താഴെ പ്രായ​മുള്ള ഒരു പെൺകു​ട്ടിക്ക്‌ ഇപ്പോൾ നിയമ​പ​ര​മാ​യി വിവാ​ഹി​ത​യാ​കാൻ കഴിയില്ല. ഒരു പെൺകു​ട്ടി​യു​ടെ കുടും​ബ​ത്തിൽനി​ന്നു സ്‌ത്രീ​ധനം ആവശ്യ​പ്പെ​ടു​ന്ന​തും നിയമ​പ​ര​മാ​യി നിരോ​ധി​ക്ക​പ്പെ​ട്ടി​രി​ക്കു​ന്നു. എന്നാൽ ഈ തിൻമ ഇന്നും നിലനിൽക്കു​ന്നു. അനേകാ​യി​രം യുവ മണവാ​ട്ടി​മാർ ഒരു തരത്തിൽ അല്ലെങ്കിൽ മറ്റൊരു തരത്തിൽ കൊല​ചെ​യ്യ​പ്പെ​ട്ടി​രി​ക്കു​ന്നു. വേണ്ടത്ര സ്‌ത്രീ​ധനം കൊടു​ക്കാൻ അവരുടെ കുടും​ബ​ങ്ങൾക്കു കഴിയാ​ഞ്ഞ​തു​കൊ​ണ്ടോ രണ്ടാമ​തൊ​രു വിവാ​ഹ​ത്തിൽനി​ന്നു കൂടുതൽ പണം ലഭിക്കു​മാ​യി​രു​ന്ന​തു​കൊ​ണ്ടോ ആയിരു​ന്നു അത്‌.

ക്രമേണ, സ്‌ത്രീ​ധന മരണങ്ങ​ളു​ടെ അടിസ്ഥാന കാരണ​ങ്ങ​ളി​ലേക്കു ശ്രദ്ധ തിരി​ഞ്ഞി​രി​ക്കു​ന്നു. കല്യാണം കഴിയു​മ്പോൾ ഇന്ത്യാ​ക്കാ​രി​യായ ഒരു പെൺകു​ട്ടി അവളുടെ ഭർത്താ​വി​ന്റെ മാതാ​പി​താ​ക്ക​ളു​ടെ ഭവനത്തി​ലേക്കു പോയി മരണം വരെ അവിടെ കഴിയു​ന്ന​താ​ണു പരമ്പരാ​ഗ​ത​മായ രീതി. അവളുടെ മാതാ​പി​താ​ക്കൾ ഒരു കാരണ​വ​ശാ​ലും അവളെ തങ്ങളുടെ ഭവനത്തി​ലേക്കു തിരി​ച്ചെ​ടു​ക്കുന്ന പ്രശ്‌ന​മില്ല. ഔദ്യോ​ഗിക വിദ്യാ​ഭ്യാ​സ​മി​ല്ലാ​ഞ്ഞ​തു​നി​മി​ത്തം മിക്ക സ്‌ത്രീ​കൾക്കും തങ്ങളുടെ ഭർത്താ​വി​ന്റെ വീടു വിട്ടു​പോ​കാ​നും ജോലി​ചെ​യ്‌തു സ്വയം പുലർത്താ​നും കഴിയു​ക​യി​ല്ലാ​യി​രു​ന്നു. അങ്ങനെ ചെറു​പ്പ​ക്കാ​രി​ക​ളായ സ്‌ത്രീ​കൾ മിക്ക​പ്പോ​ഴും പീഡി​പ്പി​ക്ക​പ്പെ​ട്ടി​രു​ന്നു. മരണ ഭീഷണി അവരുടെ തലയ്‌ക്കു മീതെ തൂങ്ങി​നി​ന്നി​രു​ന്നു. അവരുടെ മാതാ​പി​താ​ക്കൾക്ക്‌ അത്യാർത്തി​പൂണ്ട ഭർത്തൃ​ബ​ന്ധു​ക്കളെ തൃപ്‌തി​പ്പെ​ടു​ത്തു​ന്ന​തി​നാ​വ​ശ്യ​മായ കൂടുതൽ പണവും സാമാ​ന​ങ്ങ​ളും കൊടു​ക്കാൻ കഴിയാ​ഞ്ഞ​പക്ഷം മണവാ​ട്ടി​മാർ തങ്ങളുടെ അന്തിമ​വി​ധി​ക്കാ​യി നിശബ്ദം യാതന​യിൽ കാത്തി​രി​ക്കു​മാ​യി​രു​ന്നു. ഒരു പാചകസ്റ്റൗ പൊട്ടി​ത്തെ​റി​ച്ചോ ലോല​മായ ഒരു സാരിക്കു തീ പിടി​ച്ചോ ഉള്ള, ആസൂ​ത്രണം ചെയ്‌ത ഒരു മാരക അത്യാ​ഹി​ത​മാ​യി​രു​ന്നു സാധാ​ര​ണ​മാ​യി ഈ അന്തിമ​വി​ധി.

വിവാ​ഹി​ത​യാ​യ ഒരു സ്‌ത്രീക്ക്‌ തന്റെ ജീവൻ അപകട​ത്തി​ലാ​ണെന്നു തോന്നു​ന്ന​പക്ഷം തുണയ്‌ക്കാ​യി ഇപ്പോൾ നിയമ​നിർമാ​ണ​വും സ്‌ത്രീ​ക​ളു​ടെ പൊലീസ്‌ യൂണി​റ്റു​ക​ളും സ്‌ത്രീ​ക​ളു​ടെ കോട​തി​ക​ളും പിന്തുണാ സംഘങ്ങ​ളും ഉണ്ട്‌. കൂടുതൽ വിദ്യാ​ഭ്യാ​സം ലഭ്യമാ​യി​രി​ക്കു​ന്ന​തി​നാ​ലും തൊഴി​ല​വ​സ​രങ്ങൾ തുറന്നു കിട്ടി​യി​രി​ക്കു​ന്ന​തി​നാ​ലും ചിലർ വിവാഹം വേണ്ടന്നു വയ്‌ക്കു​ന്നു. അല്ലെങ്കിൽ സ്വന്തമാ​യി ഒരു ജീവി​ത​വൃ​ത്തി കണ്ടെത്തി​യി​ട്ടു വളരെ​നാൾ കഴിഞ്ഞു വിവാഹം കഴിക്കാ​മെന്നു വയ്‌ക്കു​ന്നു. അങ്ങനെ, ആണുങ്ങ​ളി​ലുള്ള ആശ്രയ​മോ പലപ്പോ​ഴും അവരുടെ ക്രൂര​മായ ആധിപ​ത്യ​മോ അത്ര വലുതല്ല.

പെൺകു​ഞ്ഞു​ങ്ങൾക്കു കൂടുതൽ ശ്രദ്ധ ലഭിക്കു​ന്നു

സ്‌ത്രീ​കളെ ബാധി​ക്കു​ന്ന​തും 21-ാം നൂറ്റാണ്ട്‌ അടുത്തു​വ​രു​ന്ന​തോ​ടെ മാറ്റം സംഭവി​ച്ചു​കൊ​ണ്ടി​രി​ക്കു​ന്ന​തു​മായ മറ്റൊരു പ്രശ്‌നം ആൺകു​ഞ്ഞു​ങ്ങൾക്കു വേണ്ടി​യുള്ള അടങ്ങാത്ത ആഗ്രഹ​മാണ്‌. പുരാതന മത പഠിപ്പി​ക്ക​ലു​ക​ളു​ടെ​യും സാമ്പത്തിക പരിഗ​ണ​ന​ക​ളു​ടെ​യും അടിസ്ഥാ​ന​ത്തി​ലുള്ള ഈ ധാരണ മിക്ക​പ്പോ​ഴും പെൺകു​ഞ്ഞു​ങ്ങളെ കൊല​ചെ​യ്യു​ന്ന​തി​ലേ​ക്കും ആൺകു​ഞ്ഞു​ങ്ങൾക്കു കൊടു​ക്കു​ന്ന​തി​നെ​ക്കാൾ കുറച്ചു മാത്രം ആഹാര​വും വിദ്യാ​ഭ്യാ​സ​വും ആരോ​ഗ്യ​ശ്ര​ദ്ധ​യും കൊടു​ത്തു​കൊ​ണ്ടു പെൺകു​ട്ടി​ക​ളോ​ടു ദുഷി​ച്ച​രീ​തി​യിൽ പെരു​മാ​റു​ന്ന​തി​ലേ​ക്കും നയിച്ചി​രി​ക്കു​ന്നു.

ഗർഭസ്ഥ​ശി​ശു​വി​ന്റെ ഭ്രൂണം നിർണ​യി​ക്കു​ന്ന​തി​നു​വേണ്ടി ജരായൂ​ദ്ര​വ​ശേ​ഖ​രണം (amniocentesis) ഉപയോ​ഗ​പ്പെ​ടു​ത്തുന്ന രീതി വ്യാപ​ക​മാ​യി​ത്തീർന്നി​രി​ക്കു​ന്നു. നിയമ​പ​ര​മാ​യി നിയ​ന്ത്രി​ക്ക​പ്പെ​ട്ടി​രി​ക്കു​ന്ന​തെ​ങ്കി​ലും ഈ നടപടി ഇപ്പോ​ഴും തീർത്തും സാധാ​ര​ണ​മായ ഒന്നുത​ന്നെ​യാണ്‌. ആൺകു​ട്ടി​യാ​ണു കൂടുതൽ നല്ലതെ​ന്നുള്ള വീക്ഷണ​ത്തി​നു മാറ്റം വരുത്താൻ ആത്മാർഥ​മായ ശ്രമങ്ങൾ നടത്തി​വ​രു​ന്നു.

മനുഷ്യ​നിർമി​ത തത്ത്വചി​ന്തകൾ പല വിധങ്ങ​ളി​ലും സ്‌ത്രീ​കളെ താഴ്‌ത്തി​മ​തി​ച്ചി​രി​ക്കു​ന്നു. വിധവ​മാ​രോ​ടുള്ള ഇടപെടൽ ഇതി​നൊ​രു ഉദാഹ​ര​ണ​മാണ്‌. പുരാതന ഇന്ത്യയിൽ വിധവ​മാർക്കു പുനർവി​വാ​ഹം അനുവ​ദി​ച്ചി​രു​ന്നു. എന്നാൽ പൊതു​യു​ഗം ഏതാണ്ട്‌ ആറാം നൂറ്റാണ്ടു തുടങ്ങി നിയമ​ദാ​താ​ക്കൾ ഇതിനെ എതിർത്തു. അതോടെ വിധവ​മാ​രു​ടെ വിധി ദയനീ​യ​മാ​യി​ത്തീർന്നു. പുനർവി​വാ​ഹം നിഷേ​ധി​ക്ക​പ്പെട്ട ഇവരുടെ മരിച്ചു​പോയ ഭർത്താ​ക്കൻമാ​രു​ടെ വസ്‌തു​വ​കകൾ പലപ്പോ​ഴും ബന്ധുക്കൾ കൊള്ള​യ​ടി​ച്ചു, കുടും​ബ​ത്തി​നൊ​രു ശാപ​മെ​ന്ന​പോ​ലെ അവരോട്‌ ഇടപെട്ടു. ദ്രോ​ഹ​ത്തി​ന്റെ​യും അവജ്ഞയു​ടെ​യും ഈ ജീവി​ത​ത്തെ​ക്കാൾ ഭേദമാ​യി അനേക വിധവ​മാ​രും തങ്ങളുടെ ഭർത്താ​ക്കൻമാ​രു​ടെ ചിതയി​ലെ ബലിമ​രണം തിര​ഞ്ഞെ​ടു​ത്തു.

19-ാം നൂറ്റാ​ണ്ടി​ന്റെ അവസാനം മുതൽ പരിഷ്‌കർത്താ​ക്കൾ ഈ സ്‌ത്രീ​ക​ളു​ടെ ഭാരം ലഘൂക​രി​ക്കാൻ ശ്രമം​തു​ടങ്ങി. എന്നാൽ ആഴത്തിൽ പതിഞ്ഞി​രുന്ന വികാ​രങ്ങൾ കത്തിയ​മ​രാൻ സമയ​മെ​ടു​ക്കു​മാ​യി​രു​ന്നു. പല സമുദാ​യ​ങ്ങ​ളി​ലും വിധവ​യു​ടെ വിധി, ചില​പ്പോൾ പ്രായം​ചെന്ന ഭർത്താവു മരിച്ചു​പോയ തീരെ ചെറു​പ്പ​ക്കാ​രി​യായ ഒരു സ്‌ത്രീ​യു​ടെ വിധി, വാസ്‌ത​വ​ത്തിൽ കഷ്ടകര​മായ ഒന്നാണ്‌. വികസന പഠനങ്ങൾക്കുള്ള സ്ഥാപന​ത്തി​ലെ ഡോ. സഹരദ ജെയ്‌ൻ ഇപ്രകാ​രം പറയുന്നു: “സ്‌ത്രീ​ക​ളു​ടെ മുഴു മനസ്സും ഭർത്താ​വി​ന്റെ വ്യക്തി​ത്വ​ത്തിൽ പണിയ​പ്പെ​ട്ട​താ​യി​രി​ക്കാൻ സ്‌ത്രീ​കൾ വ്യവസ്ഥ ചെയ്യ​പ്പെ​ട്ടി​രി​ക്കു​ന്നു എന്ന വസ്‌തു​ത​യിൽനി​ന്നാ​ണു വൈധ​വ്യ​ത്തി​ന്റെ കഷ്ടത രൂപ​മെ​ടു​ക്കു​ന്നത്‌.” 21-ാം നൂറ്റാ​ണ്ടി​ലേക്ക്‌ അന്തസ്സോ​ടെ നീങ്ങാൻ വിധവ​മാ​രെ സഹായി​ക്കാ​നുള്ള ശ്രമങ്ങൾ നടന്നു​വ​രി​ക​യാണ്‌.

ഗ്രാമീണ-നാഗരിക വ്യത്യാ​സ​ങ്ങൾ

നഗരത്തി​ലെ സ്‌ത്രീ​കൾക്കും ഗ്രാമീണ സ്‌ത്രീ​കൾക്കു​മി​ട​യിൽ ഒരു വലിയ അന്തരം നിലവി​ലുണ്ട്‌. ഗ്രാമീണ സ്‌ത്രീ​ക​ളു​ടെ 25 ശതമാനം നിരക്ഷ​ര​രാ​യി​രി​ക്കു​ന്ന​താ​യി കണക്കാ​ക്ക​പ്പെ​ട്ടി​രി​ക്കു​ന്നു; നഗരങ്ങ​ളിൽ വളരെ വലിയ ശതമാനം സ്‌കൂ​ളു​ക​ളിൽനി​ന്നും കോ​ളെ​ജു​ക​ളിൽനി​ന്നും പ്രയോ​ജ​ന​മ​നു​ഭ​വി​ക്കു​ന്നു. ഗ്രാമീണ സ്‌ത്രീ​കളെ സഹായി​ക്കു​ന്ന​തി​നാ​യി സാമൂ​ഹിക പ്രവർത്തകർ സാക്ഷരതാ ക്ലാസ്സു​ക​ളും ആരോ​ഗ്യ​പ​രി​പാ​ലന പരിശീ​ല​ന​വും തൊഴിൽ പദ്ധതി​ക​ളും ക്രമീ​ക​രി​ക്കു​ന്നു. ചില സംസ്ഥാന ഗവൺമെ​ന്റു​കൾ പൊതു മേഖല​യി​ലെ​യും സഹകരണ സ്ഥാപന​ങ്ങ​ളി​ലെ​യും സ്‌ത്രീ​കൾക്കു​വേ​ണ്ടി​യുള്ള പ്രാ​ദേ​ശിക സ്വയം ഭരണകൂ​ട​ത്തി​ലെ​യും തൊഴി​ല​വ​സ​ര​ങ്ങ​ളു​ടെ 30 ശതമാനം സ്‌ത്രീ​കൾക്കാ​യി സംവരണം ചെയ്‌തി​രി​ക്കു​ന്നു. ഇന്ത്യയി​ലെ കോടി​ക​ളു​ടെ വിധി​യാ​യി​രി​ക്കുന്ന വേദന​യും ദുരി​ത​വും നിർമാർജനം ചെയ്യാൻ വനിതാ പ്രസ്ഥാ​നങ്ങൾ ശ്രമി​ക്കു​ന്നു. ഇവയ്‌ക്ക്‌ ഒരളവു​വരെ വിജയം ലഭിച്ചി​ട്ടുണ്ട്‌. അതു​കൊണ്ട്‌, ഇന്ത്യയി​ലെ സ്‌ത്രീ​ക​ളു​ടെ ഭാവി​യെ​ക്കു​റിച്ച്‌ നമു​ക്കെന്തു പറയാൻ കഴിയും?

21-ാം നൂറ്റാ​ണ്ടി​ലേ​ക്കുള്ള നീക്കം!

21-ാം നൂറ്റാ​ണ്ടി​ലേക്കു നീങ്ങവേ ഇന്ത്യൻ സ്‌ത്രീ​ക​ളു​ടെ സ്ഥാനത്തിന്‌ മാറ്റം സംഭവി​ക്കു​ന്നു​ണ്ടോ? ഉണ്ട്‌, അതി​വേ​ഗ​ത്തിൽ. എന്നാൽ ഇന്ത്യൻ സ്‌ത്രീ​കൾ ലോക​മെ​മ്പാ​ടു​മുള്ള അവരുടെ സഹോ​ദ​രി​മാ​രു​ടേ​തി​നോ​ടു സമാന​മായ ഒരു സാഹച​ര്യ​ത്തെ അഭിമു​ഖീ​ക​രി​ക്കു​ന്നു. പുരോ​ഗ​തി​യുണ്ട്‌, എന്നാൽ അതോ​ടൊ​പ്പം തിരി​ച്ച​ടി​ക​ളു​മുണ്ട്‌. പ്രത്യാ​ശ​യുണ്ട്‌, എന്നാൽ നിരാ​ശ​യു​മുണ്ട്‌. സുന്ദര​മായ ഭവനങ്ങ​ളും ആഡംബ​ര​പൂർവ​മായ ജീവി​ത​ശൈ​ലി​ക​ളു​മുണ്ട്‌, എന്നാൽ അതോ​ടൊ​പ്പം ചേരി​പ്ര​ദേ​ശ​ങ്ങ​ളും ഞെരു​ക്കുന്ന ദാരി​ദ്ര്യ​വും കൊല്ലുന്ന വിശപ്പു​മുണ്ട്‌. കോടി​ക്ക​ണ​ക്കി​നാ​ളു​കൾക്കു വയറ്റി​പ്പി​ഴ​പ്പി​ന​പ്പു​റം അചിന്ത​നീ​യ​മാണ്‌. എന്നാൽ മറ്റു ചിലർ ലോക​ത്തി​നു വാഗ്‌ദാ​നം ചെയ്യാ​നു​ള്ള​തെ​ല്ലാം സ്വന്തമാ​ക്കു​ന്ന​തു​പോ​ലെ തോന്നു​ന്നു. മിക്കവർക്കും ഭാവി അനിശ്ചി​ത​മാണ്‌; അവർക്കു സ്വപ്‌ന​ങ്ങ​ളുണ്ട്‌, എന്നാൽ ഒപ്പം സംശയ​ങ്ങ​ളും.

എന്നാൽ, ചിലർക്ക്‌ ഭാവി, വാഗ്‌ദാ​ന​ത്താൽ പ്രശോ​ഭി​ത​മാണ്‌, പ്രത്യേ​കി​ച്ചു ക്രിസ്‌തു​യേ​ശു​വി​നാ​ലുള്ള യഹോ​വ​യു​ടെ രാജ്യ​ഭ​ര​ണ​ത്തിൻകീ​ഴിൽ വരുന്ന പറുദീ​സാ ഭൂമി​യിൽ പ്രത്യാശ വെക്കു​ന്ന​വർക്ക്‌. (വെളി​പ്പാ​ടു 21:1, 4, 5) സ്‌ത്രീ​കൾ ജീവിതം പൂർണ​മാ​യി ആസ്വദി​ക്കുന്ന ഒരു 21-ാം നൂറ്റാ​ണ്ടി​ലേക്ക്‌ ഇവർ തികഞ്ഞ ആത്മവി​ശ്വാ​സ​ത്തോ​ടെ നോക്കി​പ്പാർത്തി​രി​ക്കു​ന്നു.

[16-ാം പേജിലെ ചിത്രം]

പണിസ്ഥലത്തേക്ക്‌ ഇഷ്ടിക ചുമന്നു​കൊ​ണ്ടു​പോ​കു​ന്നു

[17-ാം പേജിലെ ചിത്രം]

വീട്ടാവശ്യത്തിനുള്ള വെള്ളം കോരു​ന്നു

[18-ാം പേജിലെ ചിത്രം]

കൂടിയാലോചനായോഗത്തിൽ പുരു​ഷൻമാർക്കൊ​പ്പം

[18-ാം പേജിലെ ചിത്രം]

കമ്പ്യൂട്ടർ പ്രവർത്തി​പ്പി​ക്കു​ന്നു