ഭക്ഷ്യജന്യ രോഗ​ത്തിൽനി​ന്നു സ്വയം സംരക്ഷി​ക്കു​ക

ബെക്കി പറയുന്നു: “12 മണിക്കൂർ നേര​ത്തേക്ക്‌ എനിക്കു ബാത്ത്‌റൂ​മിൽനിന്ന്‌ ഇറങ്ങാനേ കഴിഞ്ഞില്ല. വയറ്റിലെ വേദന അസഹനീ​യ​മാ​യി​രു​ന്നു. എന്റെ ശരീര​ത്തി​ലെ ജലാംശം വളരെ​യ​ധി​കം നഷ്ടപ്പെട്ടു. അത്യാ​ഹി​ത​വി​ഭാ​ഗ​ത്തിൽ കിടത്തി എന്റെ ശരീര​ത്തി​ലേക്കു ദ്രാവ​കങ്ങൾ കുത്തി​വ​യ്‌ക്കേ​ണ്ട​താ​യി വന്നു. ഞാൻ സാധാ​ര​ണ​നി​ല​യി​ലേക്കു മടങ്ങി​വ​രാൻ രണ്ടുമൂ​ന്നാഴ്‌ച എടുത്തു.”

ബെക്കി കഷ്ടപ്പെ​ട്ടത്‌ ഒരു ഭക്ഷ്യജ​ന്യ​രോ​ഗ​മായ ഭക്ഷ്യവി​ഷ​ബാധ മൂലമാ​യി​രു​ന്നു. രോഗ​ത്തി​നി​ര​യാ​കുന്ന മിക്കവ​രെ​യും പോലെ അവളും മരണത്തിൽനി​ന്നു രക്ഷപ്പെട്ടു. പക്ഷേ താൻ നേരിട്ട അഗ്നിപ​രീ​ക്ഷ​യു​ടെ ഓർമകൾ അവളെ വിട്ടു​മാ​റു​ന്നില്ല. “ഭക്ഷ്യവി​ഷ​ബാ​ധക്കു നമ്മെ ഇത്രയ​ധി​കം രോഗ​ഗ്ര​സ്‌ത​രാ​ക്കാൻ കഴിയു​മെന്നു ഞാനൊ​രി​ക്ക​ലും മനസ്സി​ലാ​ക്കി​യി​രു​ന്നില്ല,” അവൾ പറയുന്നു.

ഇതു​പോ​ലെ​യു​ള്ള​തോ ഇതിലും മോശ​മാ​യ​തോ ആയ അനുഭ​വങ്ങൾ ഉത്‌ക​ണ്‌ഠാ​ജ​ന​ക​മാം​വി​ധം സാധാ​ര​ണ​മാണ്‌. ഡസൻക​ണ​ക്കി​നു ബാക്ടീ​രി​യ​ക​ളും വൈറ​സു​ക​ളും പരാദ​ങ്ങ​ളും പ്രോ​ട്ടോ​സോ​വ​ക​ളും നമ്മുടെ ആഹാരത്തെ ദുഷി​പ്പി​ക്കു​മെന്ന ഭീഷണി ഉയർത്തു​ന്നു. അടുത്ത​കാ​ലത്തു വ്യവസാ​യ​വൽകൃത രാജ്യ​ങ്ങ​ളിൽ, ചിലതരം ഭക്ഷ്യജ​ന്യ​രോ​ഗ​ങ്ങ​ളിൽ ഒരു കുറവു കാണു​ന്നു​ണ്ടെ​ങ്കി​ലും, “സാൽമ​ണ​ല്ലോ​സി​സും മറ്റുചില രോഗ​ങ്ങ​ളും അവയെ നിയ​ന്ത്രി​ക്കാൻ നടത്തിയ എല്ലാ ശ്രമങ്ങ​ളെ​യും ചെറു​ത്തു​നി​ന്നി​ട്ടുണ്ട്‌” എന്നു ലോകാ​രോ​ഗ്യ മാസിക റിപ്പോർട്ടു ചെയ്യുന്നു.

മിക്ക കേസു​ക​ളും റിപ്പോർട്ടു ചെയ്യ​പ്പെ​ടാ​തെ പോകു​ന്ന​തു​കൊണ്ട്‌ ഭക്ഷ്യവി​ഷ​ബാധ കണ്ടുപി​ടി​ക്കുക എളുപ്പമല്ല. “പ്രശ്‌ന​ത്തി​ന്റെ കേവല​മൊ​രു തുമ്പു​മാ​ത്രമേ നമുക്ക​റി​യാ​വൂ,” എന്ന്‌ യു.എസ്‌. രോഗ​നി​യ​ന്ത്ര​ണ​കേ​ന്ദ്രങ്ങൾ എന്ന സംഘട​ന​യി​ലെ ഡോ. ജെയിൻ കോയ്‌ളെർ പറയുന്നു.

ഭക്ഷ്യജ​ന്യ​രോ​ഗ​ങ്ങ​ളു​ണ്ടാ​കാ​നുള്ള കാരണ​മെ​ന്താണ്‌? മിക്ക​പ്പോ​ഴും ഭക്ഷ്യവ​സ്‌തു​ക്കൾ വിപണി​യി​ലെത്തു ന്നതിനു വളരെ മുമ്പു​തന്നെ പ്രശ്‌നം ഉടലെ​ടു​ക്കു​ന്നു​വെ​ന്ന​റി​യു​മ്പോൾ നിങ്ങൾ അതിശ​യി​ച്ചു​പോ​യേ​ക്കാം.

ഒരു സാം​ക്ര​മി​ക​രോ​ഗത്തെ നട്ടുവ​ളർത്തു​ന്നു

ആധുനിക കാർഷിക സാങ്കേ​തി​ക​വി​ദ്യ​കൾ ഉറപ്പു​ത​രു​ന്നത്‌ വളർത്തു​മൃ​ഗ​ങ്ങ​ളു​ടെ ഇടയിൽ രോഗ​കാ​രി​ക​ളു​ടെ ശീഘ്ര​ഗ​തി​യി​ലുള്ള സംക്ര​മണം മാത്ര​മാണ്‌. ഉദാഹ​ര​ണ​ത്തിന്‌, ഐക്യ​നാ​ടു​ക​ളി​ലെ മാട്ടി​റച്ചി വ്യവസാ​യ​മെ​ടു​ക്കുക. ഏതാണ്ട്‌, 9,00,000 ഫാമു​ക​ളിൽ നിന്നുള്ള കന്നുകു​ട്ടി​ക​ളെ​യെ​ല്ലാം​കൂ​ടി ഒരുമിച്ച്‌ എണ്ണത്തിൽ നൂറിൽ താഴെ​മാ​ത്രം വരുന്ന അറവു​ശാ​ല​ക​ളി​ലേക്ക്‌ കൊണ്ടു​വ​രു​ന്നു. ഇങ്ങനെ ഇടകലർത്തു​ന്ന​തു​മൂ​ലം ഏതെങ്കി​ലും ഒരു ഫാമിലെ മാലി​ന്യ​ത്തിന്‌ ഒരു സാം​ക്ര​മി​ക​രോ​ഗ​ത്തി​നു തുടക്ക​മി​ടാൻ സാധി​ക്കും.

അതുമാ​ത്ര​മല്ല, ഐക്യ​നാ​ടു​ക​ളിൽ “മൃഗങ്ങൾക്കുള്ള ആഹാര​ത്തി​ന്റെ മുപ്പതു ശതമാ​ന​മോ അതില​ധി​ക​മോ രോഗ​കാ​രി​ക​ളാൽ മാലി​ന്യ​പ്പെ​ട്ട​താണ്‌” എന്ന്‌ സംയുക്ത മൃഗചി​കി​ത്സക ദേശീ​യ​സം​ഘ​ത്തി​ന്റെ ഡയറക്ട​റായ ഡോ. എഡ്വേർഡ്‌ എൽ. മെനിങ്‌ തീർത്തു​പ​റ​യു​ന്നു. ചില​പ്പോ​ഴൊ​ക്കെ കൂടുതൽ പ്രോ​ട്ടീൻ നൽകാൻ വേണ്ടി മൃഗങ്ങ​ളു​ടെ തീറ്റയിൽ അറവു​ശാ​ല​യി​ലെ അവശി​ഷ്ടങ്ങൾ ചേർക്കാ​റുണ്ട്‌—സാൽമൊ​ണെ​ല്ല​യു​ടെ​യും മറ്റു രോഗാ​ണു​ക്ക​ളു​ടെ​യും വ്യാപ​ന​ത്തി​നി​ട​യാ​ക്കുന്ന ഒരു രീതി​യാ​ണിത്‌. വളർച്ച കൂട്ടാൻവേണ്ടി മൃഗങ്ങൾക്ക്‌ ആൻറി​ബ​യോ​ട്ടി​ക്കു​ക​ളു​ടെ ശക്തികു​റഞ്ഞ ഡോസു​കൾ കൊടു​ക്കു​മ്പോൾ രോഗാ​ണു​ക്കൾ അതിൽനി​ന്നു മരുന്നു​കൾക്കെ​തി​രെ പ്രതി​രോ​ധം നേടി​യെ​ടു​ത്തേ​ക്കാം. “ആൻറി​ബ​യോ​ട്ടി​ക്കു​കൾക്കെ​തി​രെ കൂടുതൽ പ്രതി​രോ​ധ​ശ​ക്തി​യു​ള്ള​താ​യി​ത്തീ​രുന്ന സാൽമൊ​ണെല്ല ഇതി​നൊ​രു നല്ല ഉദാഹ​ര​ണ​മാണ്‌,” എന്നു രോഗ​നി​യ​ന്ത്രണ കേന്ദ്ര​ത്തി​ലെ ഡോ. റോബർട്ട്‌ വി. ടോക്‌സ്‌ പറയുന്നു. “ഭക്ഷ്യ ആവശ്യ​ങ്ങൾക്കു​വേണ്ടി വളർത്തുന്ന മൃഗങ്ങൾക്ക്‌ ആൻറി​ബ​യോ​ട്ടി​ക്കു​കൾ കൊടു​ക്കു​ന്ന​താ​ണി​തി​നു കാരണ​മെന്നു ഞങ്ങൾ വിചാ​രി​ക്കു​ന്നു. മറ്റു ബാക്ടീ​രി​യ​ക​ളു​ടെ കാര്യ​ത്തി​ലും വസ്‌തുത ഇങ്ങനെ​ത​ന്നെ​യാ​വാം,” അദ്ദേഹം പറഞ്ഞു.

ഐക്യ​നാ​ടു​ക​ളിൽ, ഫാമിൽനിന്ന്‌ അറവു​ശാ​ല​യി​ലേക്കു പോകുന്ന സമയത്തു കോഴി​ക​ളിൽ വളരെ ചുരു​ങ്ങിയ ശതമാ​ന​ത്തി​നു മാത്രമേ അവയുടെ ഉള്ളിൽ സാൽമൊ​ണെല്ല ഉള്ളു. എന്നാൽ സൂക്ഷ്‌മാ​ണു​ജീ​വി ശാസ്‌ത്ര​ജ്ഞ​നായ നെൽസൺ കോക്‌സ്‌ അവകാ​ശ​പ്പെ​ടു​ന്ന​ത​നു​സ​രിച്ച്‌ കൊണ്ടു​പോ​കുന്ന വഴിക്ക്‌ ഇത്‌ അതിശീ​ഘ്രം ഇരുപ​തു​മു​തൽ ഇരുപ​ത്തഞ്ചു ശതമാ​നം​വ​രെ​യാ​കു​ന്നു.” ചെറിയ കൂടു​കൾക്കു​ള്ളിൽ തിങ്ങി​ഞെ​രു​ങ്ങി​യി​രി​ക്കുന്ന കോഴി​കൾക്ക്‌ അനായാ​സേന രോഗം പിടി​പെ​ടാം. അതി​വേ​ഗ​ത്തി​ലുള്ള കശാപ്പും സംസ്‌ക​ര​ണ​വും അപകട​സാ​ധ്യത വർധി​പ്പി​ക്കു​ന്നു. “അവസാ​ന​ഘ​ട്ട​ത്തിൽ ഈ പക്ഷികൾ അവയെ ഒരു വൃത്തി​കെട്ട കക്കൂസിൽ മുക്കി​യെ​ടു​ത്താ​ലു​ള്ള​തി​നെ​ക്കാൾ ഒട്ടും കൂടുതൽ വൃത്തി​യു​ള്ള​താ​യി​രി​ക്കു​ക​യില്ല,” ജെറാൾഡ്‌ കെസ്റ്റർ എന്ന സൂക്ഷ്‌മാ​ണു​ജീ​വി ശാസ്‌ത്രജ്ഞൻ തീർത്തു​പ​റ​യു​ന്നു. “അവയെ കഴുകി​യ​താ​യി​രി​ക്കാം, പക്ഷേ അണുക്ക​ളെ​ല്ലാം അവി​ടെ​ത്ത​ന്നെ​യുണ്ട്‌.”

അതു​പോ​ലെ​ത​ന്നെ വൻതോ​തി​ലുള്ള മാംസ​സം​സ്‌ക​ര​ണ​വും അപകട​ക​ര​മാ​കാം. “ആധുനിക സംസ്‌ക​ര​ണ​ശാ​ല​ക​ളിൽ ഓരോ തവണയും സംസ്‌ക​രി​ക്കുന്ന ഭക്ഷ്യവ​സ്‌തു​ക്ക​ളു​ടെ അളവു വളരെ വലുതാണ്‌. അതു​കൊണ്ട്‌ ഉള്ളി​ലേക്കു പോകുന്ന ഭക്ഷ്യവ​സ്‌തു​ക്ക​ളിൽ അണുബാ​ധ​യുള്ള വെറും ഒന്നോ രണ്ടോ തുണ്ടു​കൾക്കു​പോ​ലും ടൺകണ​ക്കി​നു സംസ്‌ക​രിച്ച ഉത്‌പ​ന്നത്തെ മലിന​മാ​ക്കാൻ കഴിയും,” എന്ന്‌ സാധാ​ര​ണ​രോ​ഗ​ങ്ങ​ളു​ടെ വിജ്ഞാ​ന​കോ​ശം പറയുന്നു. ഉദാഹ​ര​ണ​ത്തിന്‌ മലിന​മായ വെറും ഒരുതു​ണ്ടു മാട്ടി​റ​ച്ചിക്ക്‌ ആ ഗ്രൈൻഡ​റിൽനി​ന്നു പുറ​ത്തേ​ക്കു​വ​രുന്ന ഓരോ ഇറച്ചി​ക്കേ​ക്കി​നേ​യും (ഹാംബർഗർ) മലിന​പ്പെ​ടു​ത്താൻ കഴിയും. ഇതിനും​പു​റമേ ഒരു കേന്ദ്ര​സ്ഥാ​നത്തു തയ്യാറാ​ക്കി​യ​ശേഷം കടകളി​ലേ​ക്കും റെസ്റ്ററ​ന്റു​ക​ളി​ലേ​ക്കും കൊണ്ടു​പോ​കുന്ന ആഹാര​സാ​ധ​നങ്ങൾ അവ കൊണ്ടു​പോ​കുന്ന സമയത്ത്‌ അനു​യോ​ജ്യ​മായ ഊഷ്‌മാ​വു നിലനിർത്തി​യി​ല്ലെ​ങ്കിൽ എപ്പോൾ വേണ​മെ​ങ്കി​ലും മലിന​പ്പെ​ടാം.

വിപണി​യി​ലെ​ത്തുന്ന എത്രമാ​ത്രം ആഹാര​സാ​ധ​നങ്ങൾ സ്ഥിരമാ​യി ഭീഷണി ഉയർത്തു​ന്ന​വ​യാണ്‌? “ചില്ലറ​വി​ല്‌പന നടത്തുന്ന എല്ലാത്തി​ന്റെ​യും കുറഞ്ഞത്‌ 60 ശതമാ​ന​മെ​ങ്കി​ലും,” ഐക്യ​നാ​ടു​ക​ളെ​പ്പറ്റി സംസാ​രി​ക്കവേ ഡോ. മെനിങ്‌ ഉറപ്പി​ച്ചു​പ​റ​യു​ന്നു. എഫ്‌ഡിഎ ഉപഭോ​ക്തൃ (FDA Consumer) മാസിക ഇങ്ങനെ അഭി​പ്രാ​യ​പ്പെ​ടു​ന്നു: “അത്തരം രോഗ​ങ്ങ​ളിൽ 30 ശതമാ​ന​വും ഉണ്ടാകു​ന്നതു വീടു​ക​ളിൽ ആഹാര​സാ​ധ​നങ്ങൾ സൂക്ഷിച്ചു കൈകാ​ര്യം ചെയ്യാ​ത്ത​തു​കൊ​ണ്ടാണ്‌.” അതു​കൊ​ണ്ടു നിങ്ങൾക്കു ഭക്ഷ്യജ​ന്യ​രോ​ഗ​ങ്ങ​ളിൽനി​ന്നു സ്വയം സംരക്ഷി​ക്കാൻ കഴിയും. നിങ്ങൾക്ക്‌ എന്തൊക്കെ മുൻക​രു​ത​ലു​ക​ളെ​ടു​ക്കാൻ സാധി​ക്കും?

വാങ്ങു​ന്ന​തി​നു മുമ്പ്‌ . . .

ലേബൽ വായി​ച്ചു​നോ​ക്കുക. അതിലെ ചേരു​വകൾ എന്തൊ​ക്കെ​യാണ്‌? സാലഡി​ന്റെ കൂട്ടുകൾ, മുട്ടയു​ടെ മഞ്ഞക്കരു ചേർത്തു​ണ്ടാ​ക്കുന്ന മേയ​നെ​യ്‌സ്‌ തുടങ്ങി​യ​വ​യി​ലു​ള്ള​തു​പോ​ലെ പച്ചമുട്ട ഉപയോ​ഗി​ച്ചി​ട്ടു​ണ്ടെ​ങ്കിൽ സൂക്ഷി​ക്കുക. പാലും പാൽക്ക​ട്ടി​യും “പാസ്‌ച​റൈസ്‌ ചെയ്‌തത്‌” എന്ന ലേബലു​ള്ള​വ​യാ​യി​രി​ക്കണം. “വില്‌പ​ന​യു​ടെ കാലാ​വധി” അല്ലെങ്കിൽ “ഉപയോ​ഗ​ത്തി​നുള്ള കാലാ​വധി” എന്നിങ്ങ​നെ​യുള്ള മുന്നറി​യി​പ്പു​കൾ ശ്രദ്ധി​ക്കുക. പൂർണ​മാ​യും രാസവ​സ്‌തു​വി​മു​ക്ത​മെ​ന്ന​വ​കാ​ശ​പ്പെ​ടുന്ന ഉത്‌പ​ന്നങ്ങൾ തീർത്തും സുരക്ഷി​ത​മാ​യി​രി​ക്കു​മെന്നു കരുത​രുത്‌; അവ നിങ്ങളെ സംവർധി​നി​കൾ ഉപയോ​ഗി​ച്ചു തടയേണ്ട അപകട​ങ്ങൾക്കി​ര​യാ​ക്കി​യേ​ക്കാം.

ഭക്ഷണപ​ദാർഥ​വും അതിന്റെ പൊതി​ച്ചി​ലും നന്നായി പരി​ശോ​ധി​ക്കുക. ഭക്ഷണപ​ദാർഥം പുതി​യ​ത​ല്ലെന്നു തോന്നു​ന്നെ​ങ്കിൽ അതു വാങ്ങരുത്‌. മത്സ്യത്തി​ന്റെ കാര്യ​ത്തി​ലാ​ണെ​ങ്കിൽ, മുഴു​വ​നാ​യി​ട്ടുള്ള മത്സ്യത്തി​നു തെളി​ച്ച​മുള്ള കണ്ണുക​ളും ചുവന്ന ചെകി​ള​പ്പൂ​ക്ക​ളും കേടു​പ​റ്റാത്ത ഉറച്ച ദശയും ഉണ്ടായി​രി​ക്കണം. തുണ്ടങ്ങ​ളോ ചെറിയ കഷണങ്ങ​ളോ ആണെങ്കിൽ കടുത്ത അസുഖ​ക​ര​മായ മണമി​ല്ലാ​ത്ത​തും ശുചി​യാ​യ​തും നിറം​മ​ങ്ങാ​ത്ത​തും ആയിരി​ക്കണം. മത്സ്യം ഐസ്‌ നിരത്തി അതിനു മുകളി​ലോ ശീതീ​ക​രിച്ച ഒരു പെട്ടി​ക്കു​ള്ളി​ലോ ആയിരി​ക്കണം. പച്ചമത്സ്യ​വും പാകം​ചെയ്‌ത മത്സ്യവും​കൂ​ടി ഒരുമി​ച്ചു വെച്ചി​രി​ക്കു​മ്പോൾ അവയ്‌ക്കു പരസ്‌പരം ദുഷി​പ്പി​ക്കാൻ കഴിയും. ഇതി​നെ​ല്ലാം​പു​റമേ, ചോരു​ന്ന​തോ പുറ​ത്തേക്കു തള്ളിനിൽക്കു​ന്ന​തോ മറ്റേ​തെ​ങ്കി​ലും തരത്തിൽ കേടു​പ​റ്റി​യ​തോ ആയ ടിന്നു​കൾക്കും ഭരണി​കൾക്കും കേന്ദ്ര​നാ​ഡീ​വ്യ​വ​സ്ഥയെ ബാധി​ക്കുന്ന വിരള​മെ​ങ്കി​ലും ചില​പ്പോ​ഴൊ​ക്കെ മാരക​മായ ബോട്ടു​ലി​സം എന്ന വിഷബാ​ധ​ക്കുള്ള കാരണ​മാ​യി​ത്തീ​രാൻ കഴിയും.

കഴിക്കു​ന്ന​തി​നു മുമ്പ്‌ . . .

നന്നായി വേവി​ക്കുക. ഇത്‌ അണുബാ​ധ​ക്കെ​തി​രെ നിങ്ങൾക്കുള്ള ഏറ്റവും മികച്ച പ്രതി​രോ​ധ​മാർഗ​ങ്ങ​ളി​ലൊ​ന്നാണ്‌. “മാംസം അടങ്ങി​യി​ട്ടുള്ള ഏതുല്‌പ​ന്ന​വും മലിന​മാ​ണെന്നു വിചാ​രിച്ച്‌ അത്‌ ആവിധ​ത്തിൽ കൈകാ​ര്യം ചെയ്യുക” എന്നു ഡോ. കോഹെൻ ഉപദേ​ശി​ക്കു​ന്നു. മുട്ടകൾ മഞ്ഞക്കരു​വും വെള്ളക്ക​രു​വും അയഞ്ഞപ​രു​വ​ത്തി​ലാ​യി​രി​ക്കാ​തെ നന്നായി ഉറയ്‌ക്കു​ന്നതു വരെ വേവി​ക്കണം. 4 ഡിഗ്രി സെൽഷ്യ​സി​നും 60 ഡിഗ്രി സെൽഷ്യ​സി​നും ഇടയ്‌ക്കുള്ള ഊഷ്‌മാ​വിൽ ബാക്ടീ​രി​യ​കൾക്കു വളരാൻ സാധി​ക്കു​ന്ന​തു​കൊണ്ട്‌ സാധാ​ര​ണ​മാം​സം ഉൾഭാഗം 71 ഡിഗ്രി സെൽഷ്യസ്‌ എത്തുന്ന​തു​വ​രെ​യും പക്ഷിക​ളു​ടെ മാംസം 82 ഡിഗ്രി സെൽഷ്യസ്‌ എത്തുന്ന​തു​വ​രെ​യും വേവി​ക്കണം.

വൃത്തി​യു​ള്ള പാചകം ശീലി​ക്കുക. ഉപയോ​ഗ​ത്തി​നു​ശേഷം എല്ലാ പാച​കോ​പ​ക​ര​ണ​ങ്ങ​ളും നന്നായി വൃത്തി​യാ​ക്കണം. മുറി​ക്കാ​നുള്ള ബോർഡു​കൾ തടി​കൊ​ണ്ടു​ള്ള​വ​യാ​ണെ​ങ്കിൽ അതു ബാക്ടീ​രി​യ​ക​ളു​ടെ താവള​മാ​യി​രി​ക്കു​മെന്നു ചിലർ വാദി​ക്കു​ന്നു. എങ്കിലും അവ പ്ലാസ്റ്റിക്‌ ബോർഡു​ക​ളെ​ക്കാൾ മെച്ചമാ​ണെ​ന്നാണ്‌ ഒരു പഠനം വെളി​പ്പെ​ടു​ത്തു​ന്നത്‌.a നിങ്ങൾ ഏതുതരം ബോർഡു​പ​യോ​ഗി​ച്ചാ​ലും അതു ചൂടു​വെ​ള്ള​വും സോപ്പു​മു​പ​യോ​ഗി​ച്ചു നന്നായി കഴുകി​വ​യ്‌ക്കണം. ബ്ലീച്ചു​പ​യോ​ഗി​ക്കാ​നും ചിലർ നിർദേ​ശി​ക്കു​ന്നു. സാധാ​ര​ണ​മാം​സ​മോ പക്ഷിമാം​സ​മോ കൈകാ​ര്യം​ചെ​യ്‌തു കഴിഞ്ഞാൽ നിങ്ങൾ തൊടുന്ന എന്തും മലിന​മാ​കാ​നുള്ള സാധ്യ​ത​യു​ള്ള​തു​കൊണ്ട്‌ ഉടനെ കൈകൾ കഴുകുക.

ഒന്നിനും വൈകാ​തി​രി​ക്കുക. പലവ്യ​ഞ്‌ജ​നങ്ങൾ എത്രയും​വേഗം വീട്ടി​ലെ​ത്തി​ക്കുക. “പാകം​ചെ​യ്‌ത​തോ ചെയ്യാ​ത്ത​തോ ആയ ഒരു സാധന​വും രണ്ടുമ​ണി​ക്കൂ​റിൽ കൂടു​തൽനേരം റെഫ്രി​ജ​റേ​റ്റ​റി​നു വെളി​യിൽ ഇരിക്ക​രുത്‌,” പോഷ​കാ​ഹാ​ര​വി​ദ​ഗ്‌ധ​യായ ഗയിൽ എ. ലിവി പറയുന്നു. “പുറത്തെ ഊഷ്‌മാവ്‌ 32 ഡിഗ്രി സെൽഷ്യ​സി​ലും കൂടു​ത​ലാ​ണെ​ങ്കിൽ ആ സമയം ഒരു മണിക്കൂ​റാ​ക്കി കുറക്കുക,” എന്നവർ കൂട്ടി​ച്ചേർക്കു​ന്നു.

സംഭരി​ച്ചു സൂക്ഷി​ക്കു​ന്ന​തി​നു​മുമ്പ്‌ . . .

ആവശ്യ​ത്തി​നു പാത്രങ്ങൾ ഉപയോ​ഗി​ക്കുക. ചൂടുള്ള ഭക്ഷണപ​ദാർഥങ്ങൾ റഫ്രി​ജ​റേ​റ്റ​റി​ലി​രു​ന്നു വേഗത്തിൽ തണുക്ക​ത്ത​ക്ക​വി​ധം ഭാഗിച്ചു ചെറിയ പാത്ര​ങ്ങ​ളി​ലാ​ക്കുക. നിങ്ങളു​ടെ റഫ്രി​ജ​റേ​റ്റ​റി​ലെ​യോ ഫ്രീസ​റി​ലെ​യോ ഊഷ്‌മാവ്‌ ഉയരാ​തി​രി​ക്കു​ന്ന​തിന്‌ പാത്ര​ങ്ങൾക്കു ചുറ്റും വായു​പ്ര​വാ​ഹ​മു​ണ്ടാ​യി​രി​ക്കാൻ അവസരം കൊടു​ക്കുക. മാലി​ന്യ​ങ്ങൾ ഒന്നിൽനി​ന്നു മറ്റൊ​ന്നി​ലേക്കു പകരു​ന്നതു തടയാൻവേണ്ടി എല്ലാ പാത്ര​ങ്ങ​ളും അടച്ചു​സൂ​ക്ഷി​ക്കണം.

നിങ്ങളു​ടെ റഫ്രി​ജ​റേറ്റർ പരി​ശോ​ധി​ക്കുക. ഫ്രീസ​റി​ന്റെ ഊഷ്‌മാവ്‌ മൈനസ്‌ 18 ഡിഗ്രി സെൽഷ്യ​സിൽ ഒട്ടും ഉയർന്ന​താ​ക​രുത്‌, റഫ്രി​ജ​റേ​റ്റ​റി​ന്റേത്‌ നാലു ഡിഗ്രി സെൽഷ്യ​സിൽ താഴെ​യാ​യി​രി​ക്കു​ക​യും വേണം. സാധാ​ര​ണ​മാം​സ​വും പക്ഷിമാം​സ​വും ഫ്രീസ​റിൽ മാസങ്ങ​ളോ​ളം സൂക്ഷി​ച്ചു​വെ​ക്കാം. അതേസ​മയം റഫ്രി​ജ​റേ​റ്റ​റി​ലാ​ണെ​ങ്കിൽ ഏതാനും ദിവസ​ങ്ങൾക്കു​ള്ളിൽ അവ കേടാ​കാൻ തുടങ്ങി​യേ​ക്കാം. മുട്ടകൾ മൂന്നാ​ഴ്‌ച​കൾക്കു​ള്ളിൽ ഉപയോ​ഗി​ക്കണം. പൊട്ടാ​തി​രി​ക്കു​ന്ന​തി​നും ആവശ്യ​ത്തി​നു തണുപ്പി​ച്ചു സൂക്ഷി​ക്കു​ന്ന​തി​നും വേണ്ടി അവ റഫ്രി​ജ​റേ​റ്റ​റി​ലെ ചൂടു​കൂ​ടിയ ഭാഗങ്ങ​ളി​ലൊ​ന്നായ, ഡോറി​ന്റെ ഉൾവശത്തെ മുട്ട വയ്‌ക്കാ​നുള്ള ട്രേയിൽ വയ്‌ക്കു​ന്ന​തി​നു​പ​കരം കൊണ്ടു​വന്ന കാർട്ട​നിൽതന്നെ വച്ച്‌ റഫ്രി​ജ​റേ​റ്റ​റി​ന്റെ പ്രധാ​ന​ഭാ​ഗ​ത്തെ​വി​ടെ​യെ​ങ്കി​ലും സൂക്ഷി​ക്കു​ന്ന​താണ്‌ ഏറ്റവും നല്ലത്‌.

ഈ മുൻക​രു​ത​ലെ​ല്ലാ​മു​ണ്ടെ​ങ്കി​ലും, ഭക്ഷണപ​ദാർഥം കാഴ്‌ച​യി​ലോ മണത്തി​ലോ സംശയ​ക​ര​മാ​യി തോന്നി​യാൽ അതു കളയുക! മിക്ക​പ്പോ​ഴും ഭക്ഷ്യജ​ന്യ​രോ​ഗങ്ങൾ കടുത്ത പ്രത്യാ​ഘാ​ത​ങ്ങ​ളൊ​ന്നു​മു​ണ്ടാ​ക്കാ​തെ വന്നു​പോ​യേ​ക്കാ​മെ​ങ്കി​ലും, ചില​പ്പോൾ—പ്രത്യേ​കി​ച്ചും കുട്ടി​ക​ളി​ലും വൃദ്ധരി​ലും പ്രതി​രോ​ധ​ശക്തി കുറവു​ള്ള​വ​രി​ലും—അതു മാരക​മാ​കാ​നുള്ള സാധ്യ​ത​യുണ്ട്‌.b

ദൈവം നോഹ​യോട്‌ “എല്ലാ മൃഗങ്ങ​ളും പക്ഷിക​ളും മത്സ്യങ്ങ​ളും. . . അവയെ​ല്ലാം ഞാൻ നിങ്ങൾക്ക്‌ ആഹാര​മാ​യി തരുന്നു” എന്നു പറഞ്ഞതു സഹസ്രാ​ബ്ദ​ങ്ങൾക്കു മുമ്പാ​യി​രു​ന്നു. (ഉല്‌പത്തി 9:3, റ്റുഡേ​യ്‌സ്‌ ഇംഗ്ലീഷ്‌ വേർഷൻ) വൻതോ​തി​ലുള്ള വിതര​ണ​ത്തോ​ടൊ​പ്പം വിവി​ധ​ഘ​ട്ടങ്ങൾ ശ്രേണി​യാ​യി നിർവ​ഹി​ക്കുന്ന കശാപ്പ്‌, കേന്ദ്രീ​കൃ​ത​സം​സ്‌ക​രണം ഇവയെ​ല്ലാം ഒത്തു​ചേർന്ന്‌ ആ വാക്കു​കൾക്ക്‌ അശുഭ​ക​ര​മായ ഒരു വ്യാഖ്യാ​നം കൊടു​ക്കു​ന്നു. അതു​കൊണ്ട്‌ ഒരു ഉപഭോ​ക്താ​വെ​ന്ന​നി​ല​യിൽ നിങ്ങളു​ടെ പങ്കു നിർവ​ഹി​ക്കുക. നിങ്ങൾ ആഹാര​സാ​ധ​നങ്ങൾ വാങ്ങു​മ്പോ​ഴും പാകം​ചെ​യ്യു​മ്പോ​ഴും സൂക്ഷി​ച്ചു​വെ​ക്കു​മ്പോ​ഴും ശ്രദ്ധയു​ള്ള​വ​രാ​യി​രി​ക്കുക.

[അടിക്കു​റി​പ്പു​കൾ]

[23-ാം പേജിലെ ചതുരം]

വീടിനുവെളിയിൽവച്ചു ഭക്ഷണം കഴിക്കു​മ്പോൾ

പിക്‌നി​ക്കു​കൾ. ഐസു​കൊ​ണ്ടു പൊതിഞ്ഞ നന്നായി താപനി​ബ​ദ്ധ​മാ​ക്കിയ ഒരു കൂളർ ഉപയോ​ഗി​ക്കുക. അതു കാറിന്റെ ഡിക്കി​യിൽ വെക്കു​ന്ന​തി​നു​പ​കരം നിങ്ങളി​രി​ക്കു​ന്നി​ട​ത്തു​തന്നെ സൂക്ഷി​ക്കു​ക​യാ​യി​രി​ക്കും ഉത്തമം. നിങ്ങൾ പിക്‌നി​ക്കു നടത്തു​മ്പോൾ കൂളർ അടച്ചു തണലു​ള്ളി​ടത്തു സൂക്ഷി​ക്കണം. വേവി​ക്കാത്ത ഏതു ഭക്ഷണപ​ദാർഥ​വും മറ്റുള്ള​വ​യിൽനി​ന്നു മാറ്റി​സൂ​ക്ഷി​ക്കുക. പൂർണ​മാ​യി വേകാത്ത ഭക്ഷണത്തിൽ ബാക്ടീ​രിയ വളരാൻ സാധ്യ​ത​യു​ള്ള​തു​കൊണ്ട്‌ വീട്ടിൽ വച്ച്‌ ഭാഗി​ക​മാ​യും പിന്നീട്‌ ഒരു ഗ്രില്ലിൽ വച്ചു പൂർണ​മാ​യും വേവി​ച്ചെ​ടു​ക്കുന്ന രീതി നന്നല്ല.

റെസ്റ്ററ​ന്റു​കൾ. “വൃത്തി​ഹീ​ന​മെന്നു തോന്നുന്ന റെസ്റ്ററ​ന്റു​കൾ ഒഴിവാ​ക്കുക. ഭക്ഷണം കഴിക്കുന്ന സ്ഥലം വൃത്തി​ഹീ​ന​മാ​ണെ​ങ്കിൽ, അടുക്ക​ള​യും മിക്കവാ​റും അങ്ങനെ​ത​ന്നെ​യാ​യി​രി​ക്കും,” ഡോ. ജോനാ​ഥാൻ എഡ്‌ലോ മുന്നറി​യി​പ്പു നൽകുന്നു. “ചൂടു​ള്ളത്‌” എന്ന പേരിൽ തരുന്ന ചൂടി​ല്ലാത്ത ഏതാഹാ​ര​വും നന്നായി വേവി​ക്കാ​ത്ത​തും തിരികെ കൊടു​ത്ത​യ​യ്‌ക്കുക. അല്‌പ​മെ​ങ്കി​ലും ഇളംചു​വപ്പു കലർന്ന പക്ഷിമാം​സം കഴിക്ക​രുത്‌. പൊരിച്ച മുട്ടകൾ ഇരുവ​ശ​വും നന്നായി വെന്തതാ​യി​രി​ക്കണം. “മഞ്ഞക്കരു എത്ര അയഞ്ഞതാ​ണോ അപകട​സാ​ധ്യത അത്രതന്നെ കൂടു​ത​ലാണ്‌,” എഫ്‌ഡഎ ഉപഭോ​ക്തൃ മാസിക ഓർമ​പ്പെ​ടു​ത്തു​ന്നു.

സാലഡ്‌ ബാറുകൾ. ഇവിടെ പലപാ​ക​ത്തിൽ വേവി​ച്ച​തും ശീതീ​ക​രി​ച്ച​തു​മായ ഭക്ഷണപ​ദാർഥങ്ങൾ ഒരുമി​ച്ചു വെക്കു​ന്ന​തു​കൊണ്ട്‌ ന്യൂസ്‌വീക്ക മാസിക പറയു​ന്ന​തു​പോ​ലെ സാലഡ്‌ ബാറുകൾ “സൂക്ഷ്‌മാ​ണു​ക്കൾക്ക്‌ ഒരുത്തമ കളിക്കളം” ഒരുക്കു​ന്നു. സാലഡ്‌ ബാറുകൾ വൃത്തി​യു​ള്ള​താ​ണോ എന്നു പരി​ശോ​ധി​ക്കുക. തണുത്തു ദൃഢത​യു​ള്ള​താ​യി​രി​ക്കേണ്ട ഭക്ഷണപ​ദാർഥങ്ങൾ ഐസു നിരത്തി അതിനു മുകളി​ലാ​ണു സൂക്ഷി​ച്ചി​രി​ക്കു​ന്ന​തെ​ന്നു​റപ്പു വരുത്തുക. സാലഡ്‌ ബാറുകൾ വൃത്തി​യാ​യി സൂക്ഷി​ച്ചി​ട്ടു​ള്ള​വ​യാ​ണെ​ങ്കി​ലും രോഗാ​ണു​ക്കൾക്ക്‌ ഉപയോ​ക്താ​ക്ക​ളിൽ ഒരാളിൽനിന്ന്‌ അടുത്ത​യാ​ളി​ലേക്കു പകരാൻ കഴിയും. സൂക്ഷ്‌മാ​ണു​ജീ​വി​ശാ​സ്‌ത്ര​ജ്ഞ​നായ മൈക്കേൽ പോരി​റ്റ്‌സാ പറഞ്ഞതു​പോ​ലെ “സാലഡ്‌ കൂട്ടിന്റെ ഉള്ളിൽകി​ട​ക്കുന്ന കോരിക നിങ്ങൾക്കു​മുമ്പ്‌ ഉപയോ​ഗി​ച്ച​താ​രാ​ണെന്നു നിങ്ങൾക്ക​റി​യി​ല്ല​ല്ലോ.”

സാമൂ​ഹിക കൂട്ടങ്ങൾ. ബഫേ രീതി​യിൽ ഭക്ഷണം വിളമ്പു​മ്പോൾ ആതി​ഥേയൻ “തീൻമേ​ശ​യിൽ ആദ്യം കുറച്ചു ഭക്ഷണം മാത്രമേ വെക്കാവൂ. ഭക്ഷണം അന്തരീക്ഷ ഊഷ്‌മാ​വിൽ അധിക​സ​മയം തുറന്നി​രി​ക്കാ​ന​നു​വ​ദി​ക്കു​ന്ന​തി​നു പകരം കൂടു​ത​ലാ​യി വേണ്ടി​വ​രുന്ന ഭക്ഷണം ശീതീ​ക​രി​ച്ച​തോ ചൂടാ​ക്കി​യ​തോ ആയ ഒരു സ്ഥലത്തു സൂക്ഷിച്ച്‌ അവി​ടെ​നി​ന്നു വിളമ്പുക.” തണുപ്പി​ച്ചു കഴിക്കുന്ന ആഹാര​പ​ദാർഥങ്ങൾ നാലു ഡിഗ്രി സെൽഷ്യ​സി​നു താഴെ​യും ചൂടോ​ടെ കഴിക്കു​ന്നവ 60 ഡിഗ്രി സെൽഷ്യ​സി​നു മുകളി​ലും സൂക്ഷി​ക്കുക. പിന്നീ​ടു​പ​യോ​ഗി​ക്കു​ന്ന​തി​നു വേണ്ടി പാകം​ചെയ്‌ത മാംസം ഉടൻതന്നെ റഫ്രി​ജ​റേ​റ്റ​റിൽ വയ്‌ക്ക​ണ​മെന്നു മാത്രമല്ല, അവി​ടെ​നിന്ന്‌ എടുക്കാ​റാ​കു​ന്ന​തു​വരെ അങ്ങനെ​ത​ന്നെ​യി​രി​ക്കു​ക​യും വേണം. കഴിക്കു​ന്ന​തി​നു മുമ്പ്‌ അതു വീണ്ടും നന്നായി ചൂടാ​ക്കാം.

[20-ാം പേജിലെ ചിത്രം]

പുതിയതല്ലെന്നു തോന്നി​യാൽ വാങ്ങരുത്‌

[22-ാം പേജിലെ ചിത്രം]

നിങ്ങൾ ഭക്ഷണം കഴിക്കുന്ന റസ്റ്ററൻറി​ലെ അടുക്കള വൃത്തി​യു​ള്ള​താ​ണോ?