വികലാം​ഗൻ—എങ്കിലും വാഹനം ഓടി​ക്കാൻ പ്രാപ്‌തൻ

“എനിക്കു കാർ ഓടി​ക്കാൻ കഴിയും!” ഈ വാക്കുകൾ അപ്രധാ​ന​മാ​യി നിങ്ങൾക്കു തോന്നി​യേ​ക്കാം, എന്നാൽ അവയ്‌ക്ക്‌ എന്റെമേൽ ഒരു ആഴമായ ഫലമു​ണ്ടാ​യി​രു​ന്നു. അതു പറഞ്ഞ 50 വയസ്സു​കാ​രൻ എന്റെ മുമ്പാകെ നിലത്താ​യി​രു​ന്നു. ശൈശ​വ​ത്തിൽതന്നെ അദ്ദേഹ​ത്തി​നു പോളി​യോ പിടി​പെ​ട്ടി​രു​ന്ന​തി​നാൽ കാലുകൾ വളരു​ക​യേ​ചെ​യ്‌തില്ല. ചെറു​തും ഉപയോ​ഗ​ശൂ​ന്യ​വു​മായ അവ ശരീര​ത്തി​നു കീഴെ കുറുകെ വെച്ചി​രു​ന്നു. എന്നാൽ വർഷങ്ങ​ളാ​യി കൈക​ളി​ലൂ​ന്നി നീങ്ങി​യ​തി​നാൽ അദ്ദേഹ​ത്തി​നു ശക്തമായ കൈക​ളും തോളു​ക​ളും ഉണ്ടായി​രു​ന്നു. അദ്ദേഹ​ത്തി​നു തന്നോ​ടു​തന്നെ അൽപം​പോ​ലും പരിതാ​പം​തോ​ന്നി​യി​രു​ന്നി​ല്ലെ​ന്നത്‌, പ്രത്യേ​കി​ച്ചും വാഹന​മോ​ടി​ക്കാൻ പ്രാപ്‌ത​നാ​ണെന്നു പറഞ്ഞ​പ്പോ​ഴുള്ള ശബ്ദത്തിലെ സന്തുഷ്ട അഭിമാ​നം, എന്നെ ലജ്ജിപ്പി​ച്ചു.

നിങ്ങൾക്ക​റി​യാ​മോ, 28-ാം വയസ്സിൽ എനിക്കും പോളി​യോ പിടി​പെട്ടു. ഊന്നു​വടി കൂടാതെ എനിക്കു മേലാൽ നടക്കാൻ കഴിയി​ല്ലെ​ന്നുള്ള വാർത്ത എന്നെയാ​കെ തകത്തു​ക​ളഞ്ഞു. ഈ മമനു​ഷ്യ​ന്റെ ലളിത​മായ വാക്കുകൾ എന്റെ വിഷാ​ദത്തെ തരണം​ചെ​യ്യാൻ എന്നെ സഹായി​ച്ചു. എന്നെക്കാൾ ഗുരു​ത​ര​മായ വൈക​ല്യ​മുള്ള അദ്ദേഹ​ത്തി​നു തന്റെ ദുരവ​സ്ഥയെ അതിജീ​വി​ക്കാൻ കഴി​ഞ്ഞെ​ങ്കിൽ എനി​ക്കെ​ന്തു​കൊണ്ട്‌ അപ്രകാ​രം ചെയ്യാൻ കഴിയി​ല്ലെന്നു ഞാൻ സ്വയം ന്യായ​വാ​ദം ചെയ്‌തു. ഞാനും വീണ്ടും കാർ ഓടി​ക്കു​മെന്ന്‌ അവി​ടെ​വെ​ച്ചു​തന്നെ തീരു​മാ​നി​ച്ചു!

അത്ര എളുപ്പമല്ല

അത്‌ ഏകദേശം 40 വർഷം മുമ്പാ​യി​രു​ന്നു. അക്കാലത്ത്‌, കാറോ​ടി​ക്കു​ന്ന​തിന്‌ ഒരു വികലാം​ഗനു ധൈര്യം ആവശ്യ​മാ​യി​രു​ന്നു. എന്റെ പരിഷ്‌ക്ക​രിച്ച കാർ വളരെ വിദഗ്‌ധ​മായ ഒരു യന്ത്രമാ​യി​രു​ന്നു! എന്റെ ഇടതു കക്ഷത്തിനു കീഴെ, ക്ലച്ച്‌ പെഡൽ വരെ​യെ​ത്തുന്ന ഒരു ഊന്നു​വടി ഉണ്ടായി​രു​ന്നു. ഇടതു തോൾ മുമ്പോ​ട്ടു ചലിപ്പി​ച്ചു​കൊ​ണ്ടു ഞാൻ ക്ലച്ച്‌ ഘടിപ്പി​ച്ചു. ആദിമ മോഡൽ ടി ഫോർഡി​ലെ, കൈ​കൊ​ണ്ടു പ്രവർത്തി​പ്പി​ക്കുന്ന ഒരു ലിവറാ​യി​രു​ന്നു ആക്‌സ​ല​റേറ്റർ. ബ്രേക്കി​ട്ടി​രു​ന്ന​തും കൈ​കൊ​ണ്ടു പ്രവർത്തി​പ്പി​ക്കുന്ന ഒരു ലിവർ ഉപയോ​ഗി​ച്ചാ​യി​രു​ന്നു. ഞാൻ വാഹന​മോ​ടി​ക്കു​ന്നതു നിങ്ങൾക്കു വിഭാവന ചെയ്യാൻ കഴിയു​മോ? എന്റെ തോൾ മുന്നോ​ട്ടും പിന്നോ​ട്ടും ചലിക്കു​ക​യാ​യി​രു​ന്നു, ഇടതു കൈ​കൊ​ണ്ടു സ്റ്റിയറിങ്‌ പിടി​ക്കു​ക​യും ബ്രേക്കു​ചെ​യ്യു​ക​യും ചെയ്‌തി​രു​ന്നു, വലതു​കൈ സ്റ്റിയറി​ങ്‌പി​ടി​ക്കൽ, വേഗത​കൂ​ട്ടൽ, കൈ​കൊ​ണ്ടുള്ള സിഗ്നൽ നൽകൽ എന്നിവ​യിൽ വ്യാപൃ​ത​മാ​യി​രു​ന്നു! (ഓസ്‌​ട്രേ​ലി​യ​യിൽ വഴിയു​ടെ ഇടതു വശത്തു​കൂ​ടി​യാ​ണു വാഹന​മോ​ടി​ക്കു​ന്നത്‌.) അന്നു കാറു​കൾക്കു മിന്നി​ക​ത്തുന്ന ട്രാഫിക്ക്‌ ഇൻഡി​ക്കേ​റ്റ​റു​കൾ ഉണ്ടായി​രു​ന്നില്ല.

ക്ലേശക​ര​മാ​യ സംവി​ധാ​ന​ങ്ങ​ളോ​ടു​കൂ​ടിയ ഡ്രൈ​വി​ങി​ന്റെ ആ കാലം പൊയ്‌പ്പോ​യി​രി​ക്കു​ന്നു എന്നതിൽ ഞാൻ നന്ദിയു​ള്ള​വ​നാണ്‌. ഓട്ടോ​മാ​റ്റിക്ക്‌ സംവി​ധാ​ന​ങ്ങ​ളും വിരൽത്തു​മ്പ​ത്തുള്ള വളവു തിരിയൽ ഇൻഡി​ക്കേ​റ്റ​റു​ക​ളും ഉള്ളതു​കൊണ്ട്‌ ഇന്നു ഡ്രൈ​വിങ്‌ വളരെ​യ​ധി​കം ലളിത​മാ​യി​രി​ക്കു​ന്നു. സാങ്കേ​തിക പുരോ​ഗതി അനേകം വികലാം​ഗ​കരെ വാഹനം ഓടി​ക്കാൻ പ്രാപ്‌ത​രാ​ക്കി​യി​രി​ക്കു​ന്നു. സാധാ​ര​ണ​മാ​യി ഉപയോ​ഗി​ക്കുന്ന ചില ഉപാധി​കൾ 14-ാം പേജിലെ ചതുര​ത്തിൽ വിവരി​ച്ചി​രി​ക്കു​ന്നു.

എന്റെ വ്യക്തിഗത ശുപാർശ​കൾ

ഡ്രൈവ്‌ ചെയ്യാൻ കഴി​യേ​ണ്ട​തിന്‌ ഒരു വാഹനം പരിഷ്‌ക്ക​രി​ക്കു​ന്ന​തി​നെ​ക്കു​റി​ച്ചു ചിന്തി​ക്കുന്ന വികലാം​ഗ​നാ​ണു നിങ്ങ​ളെ​ങ്കിൽ, ഈ രംഗത്തുള്ള ഒരു വിദഗ്‌ധനെ സമീപി​ക്കാൻ ഞാൻ ശക്തമായി ശുപാർശ ചെയ്യുന്നു. ഡ്രൈ​വ​റെന്ന നിലയിൽ നിങ്ങ​ളെ​യും നിങ്ങളു​ടെ യാത്ര​ക്കാ​രെ​യും സംരക്ഷി​ക്കു​ന്ന​തിന്‌ എല്ലാ യന്ത്രസം​വി​ധാ​ന​വും പരി​ശോ​ധി​ക്കു​ന്ന​തി​നു ക്രമീ​ക​രണം ചെയ്യാൻ അദ്ദേഹ​ത്തി​നു കഴിയും. അപകട സാധ്യത നിമിത്തം, ഒരു അംഗീ​കൃത ഇൻഷ്വ​റൻസ്‌ കമ്പനി​യിൽനിന്ന്‌ ഒരു സർവ​തോൻമുഖ ഇൻഷ്വ​റൻസ്‌ എടുക്കു​ന്നതു പ്രധാ​ന​മാണ്‌.

വാഹന​മോ​ടി​ക്കു​മ്പോൾ ഒരു സുഹൃ​ത്തി​നെ ഒപ്പം കൊണ്ടു​പോ​കു​ന്നതു പൊതു​വേ ഒരു ജ്ഞാനപൂർവ​ക​മായ മുൻക​രു​ത​ലാ​യി​രി​ക്കാം. ഒരു പുരാതന പഴമൊ​ഴി വിവേ​ക​ത്തോ​ടെ ഇപ്രകാ​രം ഉപദേ​ശി​ക്കു​ന്നു: “ഒരുവ​നെ​ക്കാൾ ഇരുവർ ഏറെ നല്ലതു; അവർക്കു തങ്ങളുടെ പ്രയത്‌ന​ത്താൽ നല്ല പ്രതി​ഫലം കിട്ടുന്നു. വീണാൽ ഒരുവൻ മറ്റേവനെ എഴു​ന്നേ​ല്‌പി​ക്കും; ഏകാകി വീണാ​ലോ അവനെ എഴു​ന്നേ​ല്‌പി​പ്പാൻ ആരുമി​ല്ലാ​യ്‌ക​കൊ​ണ്ടു അവനു അയ്യോ കഷ്ടം!” (സഭാ​പ്ര​സം​ഗി 4:9, 10) ഒരു അപകട​മോ യന്ത്രത്ത​ക​രാ​റോ നേരി​ടു​ക​യോ ടയർ പഞ്ചറാ​കു​ക​യോ ചെയ്‌താൽ സുഹൃ​ത്തിന്‌ ഒരു വലിയ സഹായ​മാ​യി​രി​ക്കാൻ കഴിയും. ചില വികലാം​ഗ ഡ്രൈ​വർമാർ കാറിൽ സെല്ലു​ലാർ ഫോൺ സൂക്ഷി​ക്കു​ന്നു. അത്യാ​വ​ശ്യ​മെ​ങ്കിൽ, അവർക്ക്‌ അങ്ങനെ ഒറ്റക്കു വർധിച്ച ആത്മവി​ശ്വാ​സ​ത്തോ​ടെ വാഹന​മോ​ടി​ക്കാൻ കഴിയും.

സഹായ​ത്തി​നാ​യി വിളി​ച്ചാൽ പകലോ രാത്രി​യി​ലോ പെട്ടെന്നു പ്രതി​ക​രണം ലഭി​ക്കേ​ണ്ട​തി​നു വികലാം​ഗ ഡ്രൈവർ മോ​ട്ടോർ വാഹന​ക്കാ​രു​ടെ വഴി​യോര സഹായ സംഘട​ന​യിൽ ചേരു​ന്ന​തും ബുദ്ധി​പൂർവ​ക​മാണ്‌. സാധാ​ര​ണ​മാ​യി വാർഷിക ഫീസ്‌ മിതമാണ്‌—അതു നൽകുന്ന മനഃസ​മാ​ധാ​ന​ത്തി​നുള്ള ഒരു ചെറിയ വില.

വികലാം​ഗ ഡ്രൈ​വർമാ​രായ നാം നമ്മുടെ പരിമി​തി​കൾ അംഗീ​ക​രി​ച്ചു തദനു​സ​രണം വാഹനം ഓടി​ക്കണം എന്നതു പറയേ​ണ്ട​തി​ല്ല​ല്ലോ. മറ്റുള്ള​വ​രെ​പ്പോ​ലെ​തന്നെ നന്നായി നമുക്കും വാഹന​മോ​ടി​ക്കാൻ കഴിയു​മെന്നു തെളി​യി​ക്കാൻ നാം മത്സരോ​ത്മു​ഖ​മാ​യി വാഹനം ഓടി​ക്കേ​ണ്ട​തില്ല. മറിച്ച്‌, അനേകം വികലാം​ഗ ഡ്രൈ​വർമാർക്കു തങ്ങളുടെ വാഹന​ങ്ങ​ളിൽ, “വികലാം​ഗ ഡ്രൈവർ—ജാഗ്രത”എന്നോ സമാന​മായ വാക്കു​ക​ളോ​ടു​കൂ​ടി​യ​തോ ആയ നോട്ടീ​സു​കൾ ഉണ്ട്‌. വികലാം​ഗ ഡ്രൈവർ ജാഗ്ര​ത​പാ​ലി​ക്കേ​ണ്ട​തി​നും മറ്റുള്ള​വ​രെ​ക്കാൾ അൽപം വേഗത​കു​റച്ച്‌ ഓടി​ക്കേ​ണ്ട​തി​നു​മുള്ള വെറു​മൊ​രു നോട്ടീ​സാണ്‌ ഇത്‌. മറ്റുള്ളവർ സാധാ​ര​ണ​യിൽ കവിഞ്ഞ അകലത്തിൽ വാഹനം ഓടി​ക്കേ​ണ്ട​തു​ണ്ടെന്ന്‌ ഇതർഥ​മാ​ക്കു​ന്നില്ല. എന്റെ അനുഭ​വ​ത്തിൽ, ഒരു വികലാം​ഗൻ ബ്രേക്കു​ചെ​യ്യു​ന്ന​തി​നു വൈക​ല്യ​ര​ഹി​ത​നായ ഡ്രൈ​വ​റെ​ക്കാൾ കൂടുതൽ സമയം എടുക്കാ​റില്ല, പ്രത്യേ​കി​ച്ചും ആധുനിക ബന്ധിപ്പി​ക്ക​ലു​ക​ളു​ടെ ആഗമനം മുതൽ.

വാഹന​മോ​ടി​ക്ക​ണ​മോ വേണ്ടയോ—ഉത്തരവാ​ദി​ത്വ​മുള്ള ഒരു തീരു​മാ​നം

നിങ്ങൾ കാർ ഓടി​ക്കാൻ ആഗ്രഹി​ക്കുന്ന ഒരു വികലാം​ഗ​നാ​ണെ​ങ്കിൽ, പ്രസ്‌തുത സംഗതി​യെ അങ്ങേയറ്റം ഗൗരവ​ത്തോ​ടെ ആയിരി​ക്കണം സമീപി​ക്കേ​ണ്ടത്‌. ഒന്നാമത്‌, നിങ്ങളു​ടെ ഡോക്ട​റു​ടെ​യും കുടും​ബാം​ഗ​ങ്ങ​ളു​ടെ​യും ഉപദേശം തേടുക. നിങ്ങൾ ഇതു​പോ​ലുള്ള ചോദ്യ​ങ്ങ​ളും പരിഗ​ണി​ച്ചേ​ക്കാം: ഞാൻ വാഹനം ഓടി​ക്കേ​ണ്ടത്‌ അത്യാ​വ​ശ്യ​മാ​ണോ? എനിക്ക്‌ ഒരു അപകട സാധ്യ​തയെ കൈകാ​ര്യം ചെയ്യാ​നാ​വു​മോ? എനിക്ക്‌ ഉണ്ടാ​യേ​ക്കാ​വുന്ന ഭയത്തെ തരണം ചെയ്യാ​നാ​വു​മോ? പ്രയോ​ജ​നങ്ങൾ എന്തെല്ലാ​മാണ്‌? വാഹനം ഓടി​ക്കാ​നുള്ള കഴിവു തൊഴി​ലാ​ളി ഗണത്തി​ലേക്കു തിരി​കെ​വ​രാൻ എന്നെ പ്രാപ്‌ത​നാ​ക്കു​മോ? മറ്റുള്ള​വ​രു​മാ​യി കൂടുതൽ ഇഴുകി​ച്ചേ​രാൻ അതെന്നെ സഹായി​ച്ചേ​ക്കു​മോ?

എപ്പോൾ ഡ്രൈ​വിങ്‌ അവസാ​നി​പ്പി​ക്ക​ണ​മെന്ന്‌ അറിയു​ന്ന​തും മർമ​പ്ര​ധാ​ന​മാണ്‌. വികലാം​ഗ​നാ​ണെ​ങ്കി​ലും അല്ലെങ്കി​ലും ഏതു ഡ്രൈ​വർക്കും, കുറഞ്ഞു​വ​രുന്ന നിർണ​യ​പ്രാ​പ്‌തി​യും മന്ദഗതി​യി​ലാ​കുന്ന പ്രതി​ക​ര​ണ​പ്രാ​പ്‌തി​യും നിമിത്തം അത്തരത്തി​ലുള്ള ഒരു തീരു​മാ​നം ചെയ്യേ​ണ്ടത്‌ അത്യാ​വ​ശ്യ​മാ​യി​ത്തീ​രുന്ന ദിനം ആഗതമാ​യേ​ക്കാം. നിങ്ങൾക്ക്‌ ആ സമയമാ​യെ​ങ്കിൽ, നിങ്ങൾ പരിഗ​ണി​ക്കേ​ണ്ടതു നിങ്ങളെ മാത്ര​മ​ല്ലെന്ന്‌ ഓർമി​ക്കുക. നിങ്ങൾ സ്‌നേ​ഹി​ക്കു​ന്ന​വരെ—നിങ്ങളു​ടെ കുടും​ബം, അയൽക്കാ​രൻ, വഴിയി​ലുള്ള നിങ്ങളു​ടെ സഹമനു​ഷ്യൻ—സംബന്ധി​ച്ചെന്ത്‌? നിങ്ങളു​ടെ വികല​മായ ഡ്രൈ​വിങ്‌ അയാൾക്ക്‌ ഒരു യഥാർഥ അപകടം വരുത്തി​ക്കൂ​ട്ടു​മോ?

എന്റെ മാതൃ​ദേ​ശ​മായ ഓസ്‌​ട്രേ​ലിയ പോലുള്ള ചില രാജ്യ​ങ്ങ​ളിൽ 65 വയസി​നു​മേ​ലുള്ള ഓരോ വികലാം​ഗ ഡ്രൈ​വർക്കും തന്റെ ഡ്രൈ​വിങ്‌ ലൈസൻസ്‌ ഒരു തവണ ഒരു വർഷ​ത്തേക്കു മാത്രമേ പുതു​ക്കാൻ കഴിയൂ. അതും ഡ്രൈ​വിംങ്‌ പ്രാപ്‌തി​യെ കൂടുതൽ ക്ഷയിപ്പി​ക്കുന്ന വൈദ്യ​ശാ​സ്‌ത്ര പ്രശ്‌നങ്ങൾ അയാൾക്കി​ല്ലെന്നു പ്രസ്‌താ​വി​ക്കുന്ന ഡോക്ട​റു​ടെ ഒരു സർട്ടി​ഫി​ക്കറ്റ്‌ ലഭിച്ച​തി​നു ശേഷം.

എന്റെ കാറും ശുശ്രൂ​ഷ​യും

ത്വരി​ത​ഗ​മനം ചെയ്യുന്ന ഈ യുഗത്തിൽ, ക്രിസ്‌ത്യാ​നി​കളെ സംബന്ധി​ച്ചി​ട​ത്തോ​ളം മോ​ട്ടോർവാ​ഹനം ചില പ്രദേ​ശ​ങ്ങ​ളിൽ ഫലത്തിൽ ഒരു അവശ്യ​സം​ഗ​തി​യാ​യി തീർന്നി​രി​ക്കു​ന്നു. ആയിര​ക്ക​ണ​ക്കിന്‌, ഒരു പക്ഷേ ലക്ഷക്കണ​ക്കിന്‌, ആളുക​ളു​ടെ പക്കൽ ദൈവ​രാ​ജ്യ​ത്തി​ന്റെ സുവാർത്ത എത്തിക്കാൻ കാറുകൾ അവരെ സഹായി​ച്ചി​രി​ക്കു​ന്നു. (മത്തായി 24:14) എന്നെ​പ്പോ​ലെ​യുള്ള വികലാം​ഗർക്ക്‌ ഇതു പ്രത്യേ​കി​ച്ചും അങ്ങനെ തന്നെയാണ്‌. അപകട​ങ്ങ​ളിൽനി​ന്നും രോഗ​ങ്ങ​ളിൽനി​ന്നും എല്ലാ വൈക​ല്യ​ങ്ങ​ളിൽനി​ന്നും വിമു​ക്ത​മായ ഒരു പുതിയ ലോകം വരാൻ പോകു​ന്നു​വെ​ന്നുള്ള എന്റെ ബോധ്യ​ത്തെ​ക്കു​റി​ച്ചു മറ്റുള്ള​വ​രോ​ടു പറയാൻ, എന്റെ വ്യക്തിഗത ആവശ്യ​ങ്ങൾക്ക്‌ അനുസ​രി​ച്ചു പരിഷ്‌ക്ക​രിച്ച വാഹനം എന്നെ പ്രാപ്‌ത​നാ​ക്കു​ന്നു. (യെശയ്യാ​വു 35:5, 6) ചില വികലാം​ഗർ മുഴു​സമയ സുവി​ശേ​ഷ​ക​രാ​യി സേവി​ക്കാൻ പോലും പ്രാപ്‌ത​രാ​യി​ട്ടുണ്ട്‌.

യു.എസ്‌.എ-യിലെ അയേവാ​യി​ലുള്ള വീൽചെയർ ഉപയോ​ഗി​ക്കേ​ണ്ടി​വ​രുന്ന യഹോ​വ​യു​ടെ സാക്ഷി​ക​ളിൽ ഒരാൾക്ക്‌ അനേക വർഷമാ​യി ഇതു ചെയ്യാൻ കഴിഞ്ഞി​രി​ക്കു​ന്നു. അവളുടെ വാൻ അവളെ വളരെ​യ​ധി​കം സഹായി​ച്ചി​രി​ക്കു​ന്നു​വെന്ന്‌ അവൾ പറയുന്നു. അവളെ വാനി​ലേക്കു എടുത്തു​ക​യ​റ്റുന്ന ഒരു ലിഫ്‌റ്റ്‌ പോലുള്ള അതിന്റെ സവിശേഷ നിയ​ന്ത്ര​കങ്ങൾ ഒരു സഹസാക്ഷി രൂപക​ല്‌പന ചെയ്‌തു. അകത്തെ​ത്തി​യാൽപ്പി​ന്നെ അവൾ വീൽചെ​യ​റിൽനി​ന്നു ഡ്രൈ​വ​റു​ടെ ഇരിപ്പി​ട​ത്തി​ലേക്കു നീങ്ങുന്നു. “ഈ വിധത്തിൽ പുറത്തു​പോ​യി ആളുകളെ അവരുടെ ഭവനങ്ങ​ളിൽ പതിവാ​യി സന്ദർശി​ക്കാൻ എനിക്കു കഴിയു​ന്നുണ്ട്‌, സാധാ​ര​ണ​മാ​യി പല ബൈബി​ള​ധ്യ​യ​നങ്ങൾ നടത്താൻ എനിക്കു കഴിയു​ന്നു” എന്ന്‌ അവൾ പറയുന്നു.

എന്റെ കാര്യ​ത്തിൽ, ശുശ്രൂ​ഷ​യിൽ മുഴു​സ​മയം പ്രവർത്തി​ക്കാൻ എനിക്കു കഴിയി​ല്ലെ​ങ്കി​ലും, എന്റെ പരിഷ്‌ക്ക​രിച്ച വാഹനം പ്രസം​ഗ​വേ​ല​യിൽ ഒരു അമൂല്യ മുതൽക്കൂ​ട്ടാ​യി​രു​ന്നി​ട്ടുണ്ട്‌. അനേക വർഷങ്ങ​ളാ​യി ഞാൻ ഊന്നു​വ​ടി​യു​ടെ സഹായ​ത്തോ​ടെ​യാ​ണു വാതിൽതോ​റും പോയി​രു​ന്നത്‌. എന്നാൽ കാലം കടന്നു​പോ​യ​തോ​ടെ അതെന്റെ കൈക​ളേ​യും തോളു​ക​ളേ​യും മോശ​മാ​യി ബാധി​ക്കാൻ തുടങ്ങി. അതു​കൊണ്ട്‌ ആയാസം കുറഞ്ഞ ഒരു മാർഗം ഞാൻ കണ്ടെ​ത്തേ​ണ്ടി​യി​രു​ന്നു. ഞാൻ പ്രവർത്തി​ക്കു​ന്നതു പട്ടണത്തി​ലാ​യി​രു​ന്നാ​ലും നാട്ടിൻപു​റ​ത്താ​യി​രു​ന്നാ​ലും വാതി​ലിന്‌ അടു​ത്തേക്കു വാഹന​മോ​ടി​ച്ചു​പോ​വാൻ എന്നെ അനുവ​ദി​ക്കുന്ന വഴിക​ളുള്ള വീടുകൾ തിര​ഞ്ഞെ​ടു​ക്കു​ന്നു.

എന്റെ ആദ്യ സന്ദർശ​ന​ത്തിൽ, ഞാൻ കാറിൽനി​ന്നി​റങ്ങി ഊന്നു​വടി കുത്തി മുൻവാ​തിൽക്ക​ലേക്കു ചെന്ന്‌, സന്ദർശന ഉദ്ദേശ്യം ചുരു​ക്ക​മാ​യി വിവരി​ക്കു​ന്നു. വീട്ടു​കാ​രൻ സന്ദേശ​ത്തിൽ കുറച്ചു താത്‌പ​ര്യം കാണി​ക്കു​ന്നെ​ങ്കിൽ, പിൻവ​രുന്ന സന്ദർശ​ന​ങ്ങ​ളിൽ എന്റെ സാന്നി​ധ്യം അറിയി​ക്കു​ന്ന​തി​നു കാറിന്റെ ഹോൺ മുഴക്കു​ന്ന​തി​നും—അപ്പോൾ അത്‌ എന്റെ അടു​ത്തേക്കു ഇറങ്ങി വരാനുള്ള അവരുടെ ഊഴമാണ്‌—സ്വാത​ന്ത്ര്യം കാട്ടാൻ അവരു​മാ​യി സൗഹൃ​ദ​ത്തി​ലാ​കു​ന്ന​തി​നും ഞാൻ ശ്രമി​ക്കു​ന്നു.

ഈ സമീപനം നന്നായി ഫലിക്കു​ന്നു. കാലാ​വ​സ്ഥ​യിൽനി​ന്നു സംരക്ഷി​ത​രാ​യി, സുഖ​പ്ര​ദ​മാ​യി ഞങ്ങൾക്കു സംസാ​രി​ക്കാൻ കഴി​യേ​ണ്ട​തിന്‌, എന്നോ​ടൊ​പ്പം അൽപ്പസ​മയം കാറിൽ ഇരിക്കാൻ അസൗക​ര്യ​മെന്നു വിചാ​രി​ക്കാ​തെ അനേകം വീട്ടു​കാ​രും സമ്മതി​ക്കു​ന്നു. മിക്ക​പ്പോ​ഴും പല വീട്ടു​കാ​രും എന്റെ സന്ദർശ​നത്തെ സ്വാഗതം ചെയ്യു​ക​യും പ്രോ​ത്‌സാ​ഹ​ജ​ന​ക​മായ ഒരു ബൈബിൾ സന്ദേശം ചർച്ച​ചെ​യ്യാൻ കാത്തി​രി​ക്കു​ക​യും ചെയ്യുന്നു. ഒപ്പം അവർ ഏറ്റവും പുതിയ വീക്ഷാ​ഗോ​പുര, ഉണരുക! മാസി​കകൾ സ്വീക​രി​ക്കു​ക​യും ചെയ്യുന്നു.

തീർച്ച​യാ​യും ഓരോ വികലാം​ഗ​ന്റെ​യും സാഹച​ര്യം വിഭി​ന്ന​മാണ്‌. എന്നാൽ പുത്തൻ ആത്മവി​ശ്വാ​സം, സ്വാത​ന്ത്ര്യം, മറ്റുള്ള​വരെ സഹായി​ക്കാ​നുള്ള അവസരം, “ഞാൻ വാഹന​മോ​ടി​ക്കാൻ പോവു​ക​യാണ്‌” എന്നു പറയാൻ കഴിയു​ന്ന​തി​ലെ വലിയ ആഹ്ലാദം എന്നിങ്ങനെ ഡ്രൈ​വിങ്‌ എനിക്കു കൈവ​രു​ത്തിയ അതേ പ്രയോ​ജ​നങ്ങൾ ഒരുപക്ഷേ നിങ്ങൾക്കും കൈവ​രു​ത്തി​യേ​ക്കാം!—സെസിൽ ഡബ്ലിയൂ. ബ്രൂൺ പറഞ്ഞ പ്രകാരം.

[14-ാം പേജിലെ ചതുരം]

വികലാംഗർക്കു വേണ്ടി കാറുകൾ പരിഷ്‌ക്ക​രി​ക്കു​ന്ന​വി​ധം

ഭൂരി​ഭാ​ഗം വികലാം​ഗ ഡ്രൈ​വർമാ​രും അവരുടെ കാലു​കൾക്കു കഴിയാ​ത്തതു ചെയ്യാൻ അവരുടെ കൈകൾ ഉപയോ​ഗി​ക്കു​ന്നു. ഒരു മാതൃ​ക​യി​ലുള്ള ഹസ്‌ത​നി​യ​ന്ത്രി​ത​സം​വി​ധാ​നം വിശേ​ഷാൽ സൗകര്യ​പ്ര​ദ​മാണ്‌. സ്റ്റിയറിങ്‌ വളയത്തി​ന്റെ അടിയിൽ ഭംഗി​യാ​യി ചേരുന്ന, സ്റ്റിയറിങ്‌ തണ്ടിൽനി​ന്നു തള്ളിനിൽക്കുന്ന ഒരു ലിവറാണ്‌ ഇത്‌. ഈ ലിവറിൽനിന്ന്‌ ഒരു ഉരുക്കു ദണ്ഡു താഴെ ബ്രേക്ക്‌ പെഡലി​ലേക്കു പോകു​ന്നു. ലിവർ മുന്നോ​ട്ടു തള്ളു​മ്പോൾ ബ്രേക്കു വീഴുന്നു.

ഇതേ യൂണി​റ്റിൽനി​ന്നു​തന്നെ ആക്‌സ​ല​റേ​റ്റ​റി​ലേക്ക്‌ ഒരു കേബിൾ ബന്ധിച്ചി​രി​ക്കു​ന്നു. ഈ ലിവർ രണ്ടു വശങ്ങളി​ലേക്കു നീക്കാ​വു​ന്ന​താണ്‌. ബ്രേക്ക്‌ ചെയ്യു​ന്ന​തി​നു മുന്നോ​ട്ടും വേഗത കൂട്ടു​ന്ന​തി​നു മുകളി​ലേ​ക്കും. ഇതിനു കുറെ ബലം ആവശ്യ​മാണ്‌. പ്രസ്‌തുത വാഹനം സാധാരണ രീതി​യിൽ ഓടി​ക്കു​ന്ന​തിൽനിന്ന്‌ ഇത്‌ ഒരു പ്രകാ​ര​ത്തി​ലും മറ്റുള്ള​വരെ തടസ്സ​പ്പെ​ടു​ത്തു​ന്നി​ല്ലെ​ന്നു​ള്ള​താണ്‌ ഇത്തരം ഹസ്‌ത​നി​യ​ന്ത്രി​ത​സം​വി​ധാ​ന​ത്തി​ന്റെ ഒരു കാര്യ​മായ നേട്ടം. കൂടു​ത​ലാ​യി, ഈ യൂണിറ്റ്‌ മറ്റു കാറു​ക​ളി​ലേക്ക്‌ എളുപ്പം മാറ്റു​ക​യും ചെയ്യാം.

കൈകൾക്കു ബലം കുറഞ്ഞ​വർക്കാ​യി വ്യത്യ​സ്‌ത​ത​ര​ത്തി​ലുള്ള ഇത്തരം ഹസ്‌ത​നി​യ​ന്ത്രി​ത​സം​വി​ധാ​നം ലഭ്യമാണ്‌. ബ്രേക്ക്‌ ചെയ്യു​ന്ന​തി​നു മുന്നോ​ട്ടു ചലിപ്പി​ക്കു​ന്ന​തി​നാൽ ഇതു സമാന​മാ​യി പ്രവർത്തി​ക്കു​ന്നു. എന്നാൽ വേഗത കൂട്ടു​ന്ന​തി​നു താഴേക്ക്‌ അമർത്തണം, കേവലം കൈയു​ടെ ഭാരം മതി ആക്‌സ​ല​റേ​റ്റ​റി​നെ പ്രവർത്തി​പ്പി​ക്കാൻ.

വീൽചെയറുകളുടെ കാര്യ​മോ?

ഒരു വികലാം​ഗ ഡ്രൈവർ നേരി​ടുന്ന കൂടു​ത​ലാ​യൊ​രു പ്രശ്‌നം: വീൽചെയർ അയാൾ എന്തു ചെയ്യണം? പ്രായ​ക്കു​റ​വുള്ള അനവധി ഡ്രൈ​വർമാർ ഡ്രൈ​വർമാ​രു​ടെ സീറ്റിനു പിന്നി​ലുള്ള സ്ഥലത്തേക്കു വീൽചെയർ ഉയർത്താൻ അവരെ അനുവ​ദി​ക്കുന്ന രണ്ടുവാ​തി​ലുള്ള കൂപ്പേകൾ വാങ്ങി​ക്കു​ന്നു. ഇതു ചെയ്യു​ന്ന​തി​നു തീർച്ച​യാ​യും കൈകൾക്കും തോളു​കൾക്കും നല്ല ബലം ആവശ്യ​മാണ്‌. വേണ്ടത്ര ശക്തി ഇല്ലാത്തവർ അവരുടെ ചെയർ വണ്ടിയി​ലേക്കു കയറ്റി​വെ​ക്കാൻ സൗഹൃ​ദ​മുള്ള ഒരു വഴി​പോ​ക്കനു വേണ്ടി കാത്തി​രി​ക്കണം.

വീൽചെയർ ലോഡർ ആണ്‌ ഒരു പകര​ക്ര​മീ​ക​രണം. കാറിന്റെ മുകളിൽ കയറ്റി​വ​ച്ചി​രി​ക്കുന്ന ഒരു വലിയ ഫൈബർ ഗ്ലാസ്‌ പെട്ടി​യാണ്‌ ഇത്‌. ഒരു ബട്ടൺ അമർത്തു​മ്പോൾ പ്രസ്‌തുത പെട്ടി​യി​ലേക്കു കപ്പികൾകൊ​ണ്ടു വീൽചെയർ കയറ്റു​ന്ന​തി​നാ​യി ഒരു ചെറിയ മോ​ട്ടോർ സാവധാ​നം പെട്ടിയെ ഉയർത്തു​ന്നു. ഒരിക്കൽ കയറ്റി​ക്ക​ഴി​ഞ്ഞാൽ പെട്ടി വീണ്ടും ഉറച്ചി​രി​ക്കു​ന്നു. ഓസ്‌​ട്രേ​ലി​യ​യിൽ ലഭ്യമായ ഇത്തരം ഒരു ലോഡർ കാറിന്റെ സിഗരറ്റ്‌ ലൈറ്റ​റി​നോ​ടു സൗകര്യ​പ്ര​ദ​മാ​യി ബന്ധിപ്പി​ക്കാൻ കഴിയും.

വീൽചെയർ ലോഡ​റി​ന്റെ ഒരു ദോഷ​ഫലം കാറിനു കാറ്റു​പി​ടി​ക്കും എന്നതാണ്‌. ഇത്‌ ഇന്ധന ഉപഭോ​ഗം 15 മുതൽ 20 വരെ ശതമാനം വർധി​പ്പി​ക്കു​ന്നു. കൂടാതെ ഈ യന്ത്രത്തി​ന്റെ വിലതന്നെ ഭയങ്കര​മാ​യി​രി​ക്കാം. എങ്കിലും, അതു വാഗ്‌ദാ​നം ചെയ്യുന്ന സ്വാത​ന്ത്ര്യം നിമിത്തം ലോഡിങ്‌ യന്ത്രങ്ങൾ മൂല്യ​വ​ത്താ​ണെന്ന്‌ ഒട്ടേ​റെ​പ്പേർ കരുതു​ന്നു. ഒരു വികലാം​ഗ ഇപ്രകാ​രം അഭി​പ്രാ​യ​പ്പെട്ടു: “എന്നോ​ടൊ​പ്പം ആരുമി​ല്ലെ​ങ്കി​ലും അഥവാ വീൽചെയർ ഇറക്കാൻ എന്റെ ലക്ഷ്യസ്ഥാ​നത്ത്‌ ആരുമി​ല്ലെ​ങ്കി​ലും ഇപ്പോൾ എനിക്ക്‌ എവി​ടെ​യും തന്നെത്താൻ പോകാ​നാ​വും.”

[13-ാം പേജിലെ ചിത്രം]

എന്റെ കാറിൽനിന്ന്‌ എനിക്കു സാക്ഷീ​ക​രി​ക്കാൻ കഴിയു​ന്നു