പുല്ലിന്റെ പച്ചനി​റ​ത്തി​നു കാരണം—പ്രകാ​ശ​സം​ശ്ലേ​ഷ​ണ​ത്തി​ന്റെ ഒരു അടുത്ത വീക്ഷണം

“പുല്ലിനു പച്ചനിറം എന്തു​കൊണ്ട്‌?” കുട്ടി​യാ​യി​രു​ന്ന​പ്പോൾ നിങ്ങൾ ഒരുപക്ഷേ ആ ചോദ്യം ചോദി​ച്ചി​രി​ക്കാം. ലഭിച്ച ഉത്തരത്തിൽ നിങ്ങൾ തൃപ്‌ത​നാ​യി​രു​ന്നോ? കുട്ടി​ക​ളു​ടെ ഇതു​പോ​ലുള്ള ചില ചോദ്യ​ങ്ങൾ വളരെ ഗഹനമാ​യി​രി​ക്കാൻ കഴിയും. അത്തരം ചോദ്യ​ങ്ങൾ, നാം അത്ര പ്രാധാ​ന്യം കൊടു​ക്കാത്ത ദൈനം​ദിന കാര്യ​ങ്ങളെ കൂടുതൽ ആഴത്തിൽ പരി​ശോ​ധി​ക്കാൻ നമ്മെ പ്രേരി​പ്പി​ക്കു​ക​യും, തീരെ പ്രതീ​ക്ഷി​ക്കാത്ത മറഞ്ഞി​രി​ക്കുന്ന വിസ്‌മ​യ​ങ്ങളെ വെളി​ച്ചത്തു കൊണ്ടു​വ​രു​ക​യും ചെയ്‌തേ​ക്കാം.

പുല്ലിന്റെ പച്ചനി​റ​ത്തി​നു കാരണ​മെ​ന്തെന്നു മനസ്സി​ലാ​ക്കാൻ, പുല്ലു​മാ​യി യാതൊ​രു ബന്ധവു​മി​ല്ലാ​ത്ത​താ​യി തോന്നുന്ന ഒന്നി​നെ​ക്കു​റി​ച്ചു സങ്കൽപ്പി​ക്കുക. ഒരു സമ്പൂർണ ഫാക്ടറി ഭാവന​യിൽ കാണാൻ ശ്രമി​ക്കുക. ഒരു സമ്പൂർണ ഫാക്ടറി ശബ്ദരഹി​ത​മാ​യി പ്രവർത്തി​ക്കു​ന്ന​തും കാഴ്‌ച​യിൽ വളരെ ആകർഷ​ക​വു​മാ​യി​രി​ക്കും, അല്ലേ? മലിനീ​ക​രി​ക്കു​ന്ന​തി​നു​പ​കരം ഒരു സമ്പൂർണ ഫാക്ടറി വാസ്‌ത​വ​മാ​യും അതിന്റെ പ്രവർത്തനം കൊണ്ടു​തന്നെ പരിസ്ഥി​തി​യെ മെച്ച​പ്പെ​ടു​ത്തു​ക​യാ​യി​രി​ക്കും ചെയ്യു​ന്നത്‌. തീർച്ച​യാ​യും, അത്‌ എല്ലാവർക്കും ഉപകാ​ര​പ്ര​ദ​മായ എന്തെങ്കി​ലും—വാസ്‌ത​വ​ത്തിൽ അത്യന്താ​പേ​ക്ഷി​ത​മായ ഒന്ന്‌—ഉത്‌പാ​ദി​പ്പി​ക്കും. അത്തര​മൊ​രു ഫാക്ടറി സൗരോർജം​കൊ​ണ്ടു പ്രവർത്തി​ക്കുന്ന ഒന്നായി​രി​ക്കണം, അല്ലേ? അങ്ങനെ​യാ​കു​മ്പോൾ, അതിനു പ്രവർത്തി​ക്കാൻ വൈദ്യു​ത കണക്ഷ​ന്റെ​യോ കൽക്കരി, എണ്ണ തുടങ്ങി​യ​വ​യു​ടെ വിതര​ണ​ത്തി​ന്റെ​യോ ആവശ്യം നേരി​ടു​ന്നില്ല.

ഒരു സമ്പൂർണ സൗരോർജിത ഫാക്ടറി, മമനു​ഷ്യ​ന്റെ നിലവി​ലുള്ള ഏതു സാങ്കേ​തി​ക​വി​ദ്യ​യെ​ക്കാ​ളും ഏറെ മികച്ച തരത്തി​ലുള്ള സൗരോർജ ബാറ്ററി​ക​ളാ​യി​രി​ക്കും ഉപയോ​ഗി​ക്കുക എന്നതിനു സംശയ​മില്ല. അവ ഉത്‌പാ​ദ​ന​ത്തി​ലും ഉപയോ​ഗ​ത്തി​ലും ഉയർന്ന കാര്യ​ക്ഷ​മ​ത​യു​ള്ള​തും ചെലവു കുറഞ്ഞ​തും മലിനീ​ക​രി​ക്കാ​ത്ത​തും ആയിരി​ക്കും. വിഭാവന ചെയ്യാ​വു​ന്ന​തി​ലേ​ക്കും അതിനൂ​തന സാങ്കേ​തി​ക​വി​ദ്യ​യാണ്‌ ഉപയോ​ഗി​ക്കു​ന്ന​തെ​ങ്കി​ലും, പ്രത്യ​ക്ഷ​ത്തിൽ അതിന്റെ ലക്ഷണം ഇല്ലാതെ, അപ്രതീ​ക്ഷിത തകരാ​റു​ക​ളോ കേടാ​ക​ലു​ക​ളോ നിലവി​ലുള്ള ഏറ്റവും പുതിയ സാങ്കേ​തി​ക​വി​ദ്യ​യ്‌ക്ക്‌ ആവശ്യ​മാ​യി വരുന്ന അവസാ​നി​ക്കാത്ത കേടു​പോ​ക്ക​ലു​ക​ളോ കൂടാതെ, ആണ്‌ സമ്പൂർണ ഫാക്ടറി അതു ചെയ്യു​ന്നത്‌. സമ്പൂർണ ഫാക്ടറി മനുഷ്യ ശ്രദ്ധ ആവശ്യ​മി​ല്ലാ​ത്ത​വണ്ണം പൂർണ​മാ​യും യന്ത്രവ​ത്‌കൃ​ത​മാ​യി​രി​ക്കാൻ നമ്മൾ പ്രതീ​ക്ഷി​ക്കും. തീർച്ച​യാ​യും, അതു സ്വയം കേടു​പോ​ക്കു​ന്ന​തും, പരസഹാ​യം ആവശ്യ​മി​ല്ലാ​ത്ത​തും, പകർപ്പു​കൾ സ്വയം ഉണ്ടാക്കു​ന്ന​തു​മാ​യി​രി​ക്കും.

സമ്പൂർണ ഫാക്ടറി ഒരു ശാസ്‌ത്ര​കൽപ്പിത കഥ മാത്ര​മാ​ണോ? അസാധ്യ​മായ ഒരു വെറും മനക്കോ​ട്ട​യാ​ണോ അത്‌? തീർച്ച​യാ​യു​മല്ല, കാരണം സമ്പൂർണ ഫാക്ടറി നിങ്ങളു​ടെ കാൽക്കീ​ഴി​ലുള്ള പുല്ലു​പോ​ലെ​തന്നെ വാസ്‌ത​വ​മാണ്‌. സത്യത്തിൽ, നിങ്ങളു​ടെ കാൽക്കീ​ഴി​ലുള്ള പുല്ലും ഓഫീ​സി​ലുള്ള പന്നൽച്ചെ​ടി​യും ജാലക​ത്തി​നു പുറത്തുള്ള മരവു​മൊ​ക്കെ​ത്തന്നെ ആണ്‌ അത്‌. യഥാർഥ​ത്തിൽ ഏതൊരു പച്ചസസ്യ​വും സമ്പൂർണ ഫാക്ടറി​യാണ്‌! സൂര്യ​പ്ര​കാ​ശ​മാ​കുന്ന ഇന്ധനം, കാർബൺ ഡൈ ഓക്‌​സൈഡ്‌, ജലം, ലവണങ്ങൾ തുടങ്ങി​യവ ഉപയോ​ഗി​ച്ചു പച്ച സസ്യങ്ങൾ ഭൂമി​യി​ലുള്ള സകല ജീവരൂ​പ​ങ്ങൾക്കു​മാ​യി പ്രത്യ​ക്ഷ​മാ​യോ പരോ​ക്ഷ​മാ​യോ ഭക്ഷണം ഉത്‌പാ​ദി​പ്പി​ക്കു​ന്നു. ഈ പ്രക്രി​യ​യ്‌ക്കി​ട​യിൽ, കാർബൺ ഡൈ ഓക്‌​സൈഡ്‌ നീക്കം ചെയ്‌തു ശുദ്ധമായ ഓക്‌സി​ജൻ പുറത്തു​വി​ട്ടു​കൊണ്ട്‌ അവ അന്തരീ​ക്ഷ​ത്തി​ലെ കുറവു നികത്തി​ക്കൊ​ണ്ടി​രി​ക്കു​ന്നു.

ഭൂമി​യി​ലെ പച്ചസസ്യ​ങ്ങൾ മൊത്തം 15,000 കോടി​മു​തൽ 40,000 കോടി​വരെ ടൺ പഞ്ചസാര ഓരോ വർഷവും ഉത്‌പാ​ദി​പ്പി​ക്കു​ന്നു​ണ്ടെന്നു കണക്കാ​ക്ക​പ്പെ​ടു​ന്നു—മുഴു​മ​നു​ഷ്യ​വർഗ​ത്തി​ന്റെ​യും ഇരുമ്പ്‌, സ്റ്റീൽ, മോ​ട്ടോർ വാഹനം, വ്യോമ-ബഹിരാ​കാശ വാഹനം തുടങ്ങി​യ​വ​യു​ണ്ടാ​ക്കുന്ന എല്ലാ ഫാക്ടറി​ക​ളു​ടെ​യും മുഴു ഉത്‌പാ​ദ​ന​ത്തെ​ക്കാ​ളും വളരെ​ക്കൂ​ടു​തൽ. സൂര്യ​നിൽ നിന്നു ലഭിക്കുന്ന ഊർജം, ജല തന്മാ​ത്ര​ക​ളി​ലെ ഹൈ​ഡ്രജൻ ആറ്റങ്ങളെ വിഘടി​പ്പിച്ച്‌ പിന്നീട്‌ അവയെ വായു​വി​ലുള്ള കാർബൺ ഡൈ ഓക്‌​സൈഡ്‌ തന്മാ​ത്ര​ക​ളു​മാ​യി സംയോ​ജി​പ്പി​ക്കാൻ ഉപയോ​ഗി​ച്ചു​കൊ​ണ്ടാണ്‌ അവ ഇതു ചെയ്യു​ന്നത്‌. അങ്ങനെ കാർബൺ ഡൈ ഓക്‌​സൈ​ഡി​നെ പഞ്ചസാര എന്നറി​യ​പ്പെ​ടുന്ന ഒരു കാർബോ​ഹൈ​ഡ്രേ​റ്റാ​ക്കി മാറ്റുന്നു. ഈ അനന്യ​സാ​ധാ​ര​ണ​മായ പ്രക്രി​യ​യെ​യാ​ണു പ്രകാ​ശ​സം​ശ്ലേ​ഷണം എന്നു വിളി​ക്കു​ന്നത്‌. സസ്യങ്ങൾക്കു തങ്ങളുടെ ഈ പുതിയ പഞ്ചസാര തന്മാ​ത്രകൾ ഊർജ​ത്തി​നു​വേണ്ടി ഉപയോ​ഗി​ക്കു​ക​യോ അല്ലെങ്കിൽ അവയെ സംയോ​ജി​പ്പി​ച്ചു ഭക്ഷ്യ സംഭര​ണ​ത്തി​നാ​യി അന്നജമാ​ക്കി മാറ്റു​ക​യോ സസ്യ നാരു​ക​ളാ​യി രൂപാ​ന്ത​ര​പ്പെ​ടു​ത്ത​പ്പെ​ടുന്ന കടുപ്പ​മേ​റിയ, നാരു​പോ​ലുള്ള വസ്‌തു​വായ സെല്ലു​ലോസ്‌ ആക്കി മാറ്റു​ക​യോ ചെയ്യാൻ കഴിയും. ചിന്തിച്ചു നോക്കൂ! വളർന്നു​കൊ​ണ്ടി​രി​ക്കവെ, 90 മീറ്റർ ഉയരത്തിൽ നിങ്ങളു​ടെ തലയ്‌ക്കു മീതെ ഉയർന്നു നിൽക്കുന്ന പടുകൂ​റ്റൻ സിക്കോയ വൃക്ഷം മിക്കവാ​റും നിർമി​ക്ക​പ്പെ​ട്ടി​രി​ക്കു​ന്നതു നേർത്ത വായു​വിൽ നിന്നാണ്‌, അതായത്‌, ഓരോ കാർബൺ ഡൈ ഓക്‌​സൈഡ്‌ തന്മാ​ത്ര​യും ജല തന്മാ​ത്ര​യും വീതം ഒന്നിനു പുറകേ ഒന്നായി, ഹരിത​ക​ണങ്ങൾ എന്നു വിളി​ക്ക​പ്പെ​ടുന്ന എണ്ണമറ്റ കോടി​ക്ക​ണ​ക്കിന്‌ അതിസൂക്ഷ്‌മ ‘കൂട്ടി​യി​ണക്കൽ നിരക​ളിൽ ചേർന്നാണ്‌’. പക്ഷേ എങ്ങനെ?

“എഞ്ചിനി”ലേക്ക്‌ ഒരു എത്തി​നോ​ട്ടം

നേർത്ത വായു​വിൽനിന്ന്‌ (ഒപ്പം ജലവും ഏതാനും ധാതു​ക്ക​ളും ചേർത്ത്‌) സിക്കോയ മരം നിർമി​ക്ക​പ്പെ​ടു​ന്നതു തീർച്ച​യാ​യും വിസ്‌മ​യാ​വ​ഹ​മാണ്‌, പക്ഷേ അതൊരു മായാ​ജാ​ലമല്ല. ജ്ഞാനപൂർവ​ക​മായ രൂപകൽപ്പ​ന​യു​ടെ​യും മനുഷ്യൻ ആർജി​ച്ചി​രി​ക്കു​ന്ന​തി​നെ​ക്കാൾ വളരെ​യേറെ ഉത്‌കൃ​ഷ്ട​മായ സാങ്കേ​തി​ക​വി​ദ്യ​യു​ടെ​യും ഫലമാണ്‌ അത്‌. ശാസ്‌ത്ര​ജ്ഞ​ന്മാർ അൽപ്പാൽപ്പ​മാ​യി പ്രകാ​ശ​സം​ശ്ലേ​ഷ​ണ​മാ​കുന്ന ഈ പേടക​ത്തി​ന്റെ മൂടി നീക്കി അതിലെ അതിസ​ങ്കീർണ​മായ ജൈവ​ര​സ​ത​ന്ത്രത്തെ വിസ്‌മ​യ​ത്തോ​ടെ ഉറ്റു​നോ​ക്കു​ക​യാണ്‌. ഭൂമി​യി​ലെ മിക്കവാ​റും മുഴു ജീവനും​തന്നെ ഉത്തരവാ​ദി​യായ ഈ പ്രക്രി​യ​യു​ടെ “എഞ്ചിനി”ലേക്കു നമുക്കും അവരോ​ടൊ​പ്പം ഒരെത്തി​നോ​ട്ടം നടത്താം. “പുല്ലിനു പച്ചനിറം എന്തു​കൊണ്ട്‌?” എന്ന ചോദ്യ​ത്തിന്‌ ഒരുപക്ഷേ നമു​ക്കൊ​രു ഉത്തരം ലഭിച്ചു​തു​ട​ങ്ങി​യേ​ക്കാം.

നമ്മുടെ ആശ്രയ​യോ​ഗ്യ​മായ സൂക്ഷ്‌മ​ദർശി​നി പുറ​ത്തെ​ടുത്ത്‌ നമുക്ക്‌ ഒരു സാധാരണ ഇല പരി​ശോ​ധി​ക്കാം. നഗ്നനേ​ത്ര​ങ്ങൾകൊ​ണ്ടു നോക്കു​മ്പോൾ ഇല മൊത്തം പച്ചയായി കാണ​പ്പെ​ടു​ന്നെ​ങ്കി​ലും, അതു വെറു​മൊ​രു തോന്നൽ മാത്ര​മാണ്‌. ഒരു സൂക്ഷ്‌മ​ദർശി​നി​യി​ലൂ​ടെ നാം കാണുന്ന ഓരോ സസ്യ​കോ​ശ​വും വാസ്‌ത​വ​ത്തിൽ അത്ര പച്ചയല്ല. പകരം, അതു മിക്കവാ​റും സുതാ​ര്യ​മാണ്‌. എന്നാൽ ഓരോ​ന്നി​ലും ഏകദേശം 50 മുതൽ 100 വരെ ചെറിയ പച്ചപ്പൊ​ട്ടു​ക​ളുണ്ട്‌. ഈ പൊട്ടു​ക​ളാ​ണു ഹരിത​ക​ണങ്ങൾ. പ്രകാശ സംവേ​ദ​ക​ത്വ​മുള്ള പച്ച ഹരിതകം സ്ഥിതി​ചെ​യ്യു​ന്ന​തും പ്രകാ​ശ​സം​ശ്ലേ​ഷണം നടക്കു​ന്ന​തു​മായ സ്ഥലം ഇതാണ്‌. ഹരിത​ക​ണ​ങ്ങൾക്കു​ള്ളിൽ എന്താണു സംഭവി​ക്കു​ന്നത്‌?

ഹരിത​ക​ണം ചെറിയ ഒരു സഞ്ചി പോ​ലെ​യാണ്‌. തീരെ വലുപ്പം കുറഞ്ഞ പരന്ന ആകൃതി​യി​ലുള്ള സഞ്ചികൾ അതിനു​ള്ളി​ലുണ്ട്‌. അവയെ തൈല​ക്കോ​യി​ഡു​കൾ എന്നു വിളി​ക്കു​ന്നു. ഒടുവി​ലി​താ, നാം പുല്ലി​ലുള്ള പച്ച നിറത്തി​ന്റെ ഉറവിടം കണ്ടെത്തി​യി​രി​ക്കു​ന്നു. പച്ച ഹരിതക തന്മാ​ത്രകൾ തൈല​ക്കോ​യി​ഡു​ക​ളു​ടെ ഉപരി​ത​ല​ത്തിൽ പറ്റിയി​രി​ക്കു​ന്നു, അലക്ഷ്യ​മാ​യല്ല, പകരം സൂക്ഷ്‌മ​ത​യോ​ടെ, ഫോ​ട്ടോ​സി​സ്റ്റം എന്നറി​യ​പ്പെ​ടുന്ന ക്രമീ​കൃ​ത​മായ നിരക​ളാ​യാണ്‌. മിക്ക പച്ച സസ്യങ്ങ​ളി​ലും പിഎസ്‌I (ഫോട്ടോസിസ്റ്റം I) എന്നും പിഎസ്‌II (ഫോട്ടോസിസ്റ്റം II) എന്നും അറിയ​പ്പെ​ടുന്ന രണ്ടുതരം ഫോ​ട്ടോ​സി​സ്റ്റം ഉണ്ട്‌. ഈ ഫോ​ട്ടോ​സി​സ്റ്റം ഒരു ഫാക്ടറി​യി​ലെ ഓരോ പ്രവർത്ത​ന​ത്തി​ലും പ്രത്യേക വൈദ​ഗ്‌ധ്യ​മുള്ള ഉത്‌പാ​ദക സംഘ​ത്തെ​പ്പോ​ലെ പ്രവർത്തി​ക്കു​ന്നു. അവ ഓരോ​ന്നും പ്രകാ​ശ​സം​ശ്ലേ​ഷ​ണ​ത്തി​ന്റെ ഓരോ നിർദിഷ്ട പ്രവർത്തന പരമ്പര​യു​ടെ ചുമതല വഹിക്കു​ന്നു.

പാഴാ​കാത്ത “പാഴ്‌വ​സ്‌തു”

തൈല​ക്കോ​യി​ഡി​ന്റെ ഉപരി​ത​ല​ത്തിൽ സൂര്യ​പ്ര​കാ​ശം പതിക്കു​ന്ന​യു​ട​നെ​തന്നെ, പ്രകാശം-കൊയ്യുന്ന സംയു​ക്തങ്ങൾ എന്നു വിളി​ക്ക​പ്പെ​ടുന്ന ഹരിതക തന്മാ​ത്ര​ക​ളു​ടെ പിഎസ്‌II നിരകൾ അതു പിടി​ച്ചെ​ടു​ക്കു​ന്നു. ഈ തന്മാ​ത്രകൾ ഒരു പ്രത്യേക തരംഗ​ദൈർഘ്യ​മുള്ള ചെമന്ന വെളിച്ചം ആഗിരണം ചെയ്യാൻ വിശി​ഷ്യാ താത്‌പ​ര്യ​മു​ള്ള​വ​യാണ്‌. തൈല​ക്കോ​യി​ഡി​ന്റെ വ്യത്യസ്‌ത സ്ഥാനങ്ങ​ളിൽ പിഎസ്‌I നിരകൾ അതിലും തരംഗ​ദൈർഘ്യം കൂടിയ പ്രകാ​ശ​ത്തി​നു​വേ​ണ്ടി​യുള്ള അന്വേ​ഷ​ണ​ത്തി​ലാണ്‌. അതേസ​മയം, ഹരിത​ക​ണ​വും കരോ​ട്ടി​നോ​യി​ഡു​കൾ പോലുള്ള മറ്റുചില തന്മാ​ത്ര​ക​ളും നീലയും വയലറ്റും വെളി​ച്ച​മാണ്‌ ആഗിരണം ചെയ്യു​ന്നത്‌.

അപ്പോൾ, പുല്ലിനു പച്ചനി​റ​മു​ള്ളത്‌ എന്തു​കൊ​ണ്ടാണ്‌? സസ്യങ്ങ​ളിൽ പതിക്കുന്ന ഏതു തരംഗ​ദൈർഘ്യ​ത്തി​ലുള്ള പ്രകാ​ശ​ത്തി​ലും പച്ച വെളിച്ചം മാത്ര​മാണ്‌ ഉപയോ​ഗ​ശൂ​ന്യ​മാ​യി​ട്ടു​ള്ളത്‌. അതു​കൊണ്ട്‌ അത്‌ നിരീ​ക്ഷി​ച്ചു​കൊ​ണ്ടി​രി​ക്കുന്ന നമ്മുടെ കണ്ണുകൾക്കും കാമറ​കൾക്കും വിരു​ന്നേ​കാ​നാ​യി പ്രതി​ഫ​ലി​പ്പി​ക്ക​പ്പെ​ടു​ന്നു. അതേപ്പറ്റി ചിന്തിച്ചു നോക്കൂ! വസന്തത്തി​ലെ ഇളംപ​ച്ച​യും അതു​പോ​ലെ ഗ്രീഷ്‌മ​ത്തി​ലെ മരതക​പ്പ​ച്ച​യും വാസ്‌ത​വ​ത്തിൽ സസ്യങ്ങൾക്കാ​വ​ശ്യ​മി​ല്ലാത്ത തരംഗ​ദൈർഘ്യ​ങ്ങ​ളിൽ നിന്നാണ്‌ ഉത്ഭൂത​മാ​കു​ന്നത്‌. എന്നാൽ അതു മനുഷ്യ​രായ നമുക്ക്‌ എത്ര അമൂല്യ​മാണ്‌! മനുഷ്യ​നിർമിത ഫാക്ടറി​ക​ളിൽ നിന്നുള്ള മലിനീ​ക​ര​ണ​ത്തിൽനി​ന്നും പാഴ്‌വ​സ്‌തു​ക്ക​ളിൽനി​ന്നും വ്യത്യ​സ്‌ത​മാ​യി, ഈ “പാഴ്‌വ​സ്‌തു”വായ വെളിച്ചം, നാം വിസ്‌മ​യ​പൂർവം നിരീ​ക്ഷി​ക്കുന്ന മനോ​ഹ​ര​മായ ഒരു പുൽത്ത​കി​ടി​യോ വനമോ ജീവന്റെ മനോ​ജ്ഞ​മായ ആ നിറം​കൊ​ണ്ടു നമ്മുടെ ചേതന​യ്‌ക്കു നവോ​ന്മേഷം പകരു​മ്പോൾ നിശ്ചയ​മാ​യും പാഴാ​ക്ക​പ്പെ​ടു​ന്നില്ല.

ഹരിത​ക​ണ​ത്തി​ലേക്കു മടങ്ങവെ, പിഎസ്‌II നിരയിൽ, സൂര്യ​പ്ര​കാ​ശ​ത്തി​ന്റെ ചെമന്ന അംശത്തിൽ നിന്നുള്ള ഊർജം ഹരിതക തന്മാ​ത്ര​കൾക്കു​ള്ളി​ലെ ഇലക്‌​ട്രോ​ണു​ക​ളി​ലേക്കു പകര​പ്പെ​ടു​ന്നു. ഒടുവിൽ ഒരു ഇലക്‌​ട്രോൺ, മുഴു വ്യൂഹ​ത്തിൽ നിന്നും പുറ​ത്തേക്കു തെന്നി​ത്തെ​റി​ച്ചു തൊട്ട​ടു​ത്തു കാത്തി​രി​ക്കുന്ന തൈല​ക്കോ​യിഡ്‌ സ്‌തര​ത്തി​ലെ ഒരു വാഹക തന്മാ​ത്ര​യി​ലേക്കു ചാടു​ന്ന​തു​വരെ ഊർജ​സ്വ​ല​മാ​ക്ക​പ്പെ​ടു​ന്നു, അല്ലെങ്കിൽ “ഉത്തേജി​പ്പി​ക്ക​പ്പെ​ടു​ന്നു.” ഒരു നർത്തകി പങ്കാളി​യിൽനി​ന്നു പങ്കാളി​യി​ലേക്കു കൈമാ​റ​പ്പെ​ടു​ന്ന​തു​പോ​ലെ, ഇലക്‌​ട്രോൺ അതിന്റെ ഊർജം ചോർന്നു​പോ​കവെ ഒരു വാഹക തന്മാ​ത്ര​യിൽ നിന്നു മറ്റൊ​ന്നി​ലേക്കു കൈമാ​റ്റം ചെയ്യ​പ്പെ​ടു​ന്നു. ഊർജം വേണ്ടത്ര കുറഞ്ഞ​തി​നു​ശേഷം, അതിനെ സുരക്ഷി​ത​മാ​യി മറ്റേ ഫോ​ട്ടോ​സി​സ്റ്റ​ത്തി​ലെ, അതായത്‌ പിഎസ്‌I-ലെ ഒരു ഇലക്‌​ട്രോ​ണി​നെ പ്രതി​സ്ഥാ​പി​ക്കാ​നാ​യി ഉപയോ​ഗി​ക്കാം.—ഡയഗ്രം 1 കാണുക.

അതേസ​മ​യം, ഒരു ഇലക്‌​ട്രോൺ നഷ്ടം ഹേതു​വാ​യി പോസി​റ്റീവ്‌ ചാർജു​ള്ള​താ​യി​ത്തീ​രുന്ന പിഎസ്‌II നിര ആ നഷ്ടം നികത്തു​ന്ന​തിന്‌ ഒരു ഇലക്‌​ട്രോ​ണി​നെ സ്വീക​രി​ക്കാൻ ത്വരയു​ള്ള​താ​യി​ത്തീ​രു​ന്നു. പോക്ക​റ്റ​ടി​ക്ക​പ്പെട്ടു എന്നു മനസ്സി​ലാ​ക്കിയ ഒരു മനുഷ്യ​നെ​പ്പോ​ലെ, ഓക്‌സി​ജൻ ഉത്‌പാ​ദക ശൃംഖല എന്നറി​യ​പ്പെ​ടുന്ന പിഎസ്‌II-ന്റെ ഭാഗം പരി​ഭ്രാ​ന്തി​യി​ലാ​കു​ന്നു. എവിടു​ന്നാണ്‌ ഒരു ഇലക്‌​ട്രോൺ സംഘടി​പ്പി​ക്കുക? ആഹാ! നിർഭാ​ഗ്യ​വാ​നായ ഒരു ജല തന്മാ​ത്ര​യല്ലേ സമീപത്ത്‌ അലഞ്ഞു​തി​രി​യു​ന്നത്‌. അതിന്‌ അപ്രതീ​ക്ഷി​ത​മാ​യി, മോശ​മായ ഒരു അനുഭവം ഉണ്ടാകാൻ പോകു​ക​യാണ്‌.

ജല തന്മാ​ത്ര​കളെ ശിഥി​ലീ​ക​രി​ക്കൽ

ഒരു ജലതന്മാ​ത്ര​യിൽ താരത​മ്യേന വലിയ ഒരു ഓക്‌സി​ജൻ ആറ്റവും രണ്ടു ചെറിയ ഹൈ​ഡ്രജൻ ആറ്റവു​മാണ്‌ അടങ്ങി​യി​രി​ക്കു​ന്നത്‌. പിഎസ്‌II-ലെ ഓക്‌സി​ജൻ ഉത്‌പാ​ദക ശൃംഖ​ല​യിൽ മാംഗ​നീസ്‌ ലോഹ​ത്തി​ന്റെ നാല്‌ അയോ​ണു​കൾ അടങ്ങി​യി​രി​ക്കു​ന്നു. അതു ജല തന്മാ​ത്ര​യി​ലെ ഹൈ​ഡ്രജൻ ആറ്റങ്ങളിൽനി​ന്നും ഇലക്‌​ട്രോ​ണു​കളെ മാറ്റുന്നു. ഇതിന്റെ ഫലമായി ജല തന്മാത്ര രണ്ടു വൈദ്യു​ത ചാർജിത ഹൈ​ഡ്രജൻ അയോ​ണു​കൾ (പ്രോ​ട്ടോ​ണു​കൾ), ഒരു ഓക്‌സി​ജൻ ആറ്റം, രണ്ട്‌ ഇലക്‌​ട്രോ​ണു​കൾ എന്നിങ്ങ​നെ​യാ​യി വിഘടി​ക്ക​പ്പെ​ടു​ന്നു. കൂടുതൽ ജല തന്മാ​ത്രകൾ വിശ്ലേ​ഷണം ചെയ്യ​പ്പെ​ടു​മ്പോൾ, ഓക്‌സി​ജൻ ആറ്റങ്ങൾ ഈര​ണ്ടെണ്ണം വീതം സംയോ​ജിച്ച്‌ ഓക്‌സി​ജൻ വാതക തന്മാ​ത്ര​ക​ളാ​യി രൂപ​പ്പെ​ടു​ന്നു. ഇതിനെ സസ്യം നമ്മുടെ ഉപയോ​ഗ​ത്തി​നാ​യി തിരികെ വായു​വി​ലേക്കു വിടുന്നു. ഹൈ​ഡ്രജൻ അയോ​ണു​കൾ സസ്യങ്ങൾക്ക്‌ ഉപയോ​ഗി​ക്കാൻ സാധി​ക്ക​ത്ത​ക്ക​വി​ധ​ത്തിൽ തൈല​ക്കോ​യിഡ്‌ “സഞ്ചി”ക്കുള്ളിൽ ശേഖരി​ക്ക​പ്പെ​ടാൻ തുടങ്ങു​ക​യും, ഇലക്‌​ട്രോ​ണു​കൾ, സെക്കൻറിൽ അനേകം തവണ പരിവൃ​ത്തി പുനരാ​വർത്തി​ക്കാൻ ഇപ്പോൾ തയ്യാറാ​യി​രി​ക്കുന്ന പിഎസ്‌II സംയു​ക്ത​ത്തി​നു വീണ്ടും വിതരണം ചെയ്യാൻ ഉപയോ​ഗി​ക്ക​പ്പെ​ടു​ക​യും ചെയ്യുന്നു.—ഡയഗ്രം 2 കാണുക.

തൈല​ക്കോ​യിഡ്‌ സഞ്ചിക്കു​ള്ളിൽ തിങ്ങി​ക്കൂ​ടിയ ഹൈ​ഡ്രജൻ അയോ​ണു​കൾ പുറത്തു​ക​ട​ക്കാ​നുള്ള വഴി​തേ​ടാൻ തുടങ്ങു​ന്നു. ജല തന്മാത്ര വിഘടി​ക്കു​മ്പോൾ ഓരോ തവണയും ഈരണ്ടു വീതം കിട്ടുന്ന ഹൈ​ഡ്രജൻ അയോ​ണു​കൾ മാത്രമല്ല, പിഎസ്‌II ഇലക്‌​ട്രോ​ണു​കളെ പിഎസ്‌I സംയു​ക്ത​ത്തി​ലേക്കു കടത്തി​ക്കൊ​ണ്ടു​പോ​കു​മ്പോൾ അത്‌ ആകർഷി​ച്ചെ​ടു​ക്കുന്ന മറ്റു ഹൈ​ഡ്രജൻ അയോ​ണു​ക​ളും തൈല​ക്കോ​യിഡ്‌ സഞ്ചിയി​ലേക്കു കൂട്ടി​ച്ചേർക്ക​പ്പെ​ടു​ന്നു. വളരെ​പ്പെ​ട്ടെ​ന്നു​തന്നെ, ഹൈ​ഡ്രജൻ അയോ​ണു​കൾ, തിങ്ങി​നി​റഞ്ഞ ഒരു തേനീ​ച്ച​ക്കൂ​ട്ടി​ലെ ഇളകിയ തേനീ​ച്ച​ക​ളെ​പ്പോ​ലെ ഇരമ്പാൻ തുടങ്ങു​ന്നു. അവയ്‌ക്കെ​ങ്ങനെ പുറത്തു കടക്കാൻ കഴിയും?

പ്രകാ​ശ​സം​ശ്ലേ​ഷ​ണ​ത്തി​ന്റെ വിദഗ്‌ധ​നായ രൂപസം​വി​ധാ​യകൻ പുറ​ത്തേക്ക്‌ ഒരേ​യൊ​രു വഴിമാ​ത്ര​മുള്ള ഒരു കറങ്ങുന്ന വാതി​ലാണ്‌ സജ്ജീക​രി​ച്ചി​രി​ക്കു​ന്നത്‌ എന്നു നാം കണ്ടെത്തു​ന്നു, എറ്റിപി (അഡി​നോ​സിൻ ട്രൈ​ഫോ​സ്‌ഫേറ്റ്‌) എന്നു വിളി​ക്ക​പ്പെ​ടുന്ന വളരെ പ്രാധാ​ന്യ​മേ​റിയ ഒരു കോശ-ഇന്ധനമു​ണ്ടാ​ക്കാൻ ഉപയോ​ഗി​ക്കുന്ന ഒരു പ്രത്യേക എൻ​സൈ​മി​ന്റെ രൂപത്തി​ലാ​ണത്‌. കറങ്ങുന്ന വാതി​ലി​ലൂ​ടെ ഹൈ​ഡ്രജൻ അയോ​ണു​കൾ ബലം​പ്ര​യോ​ഗി​ച്ചു പുറത്തു​ക​ട​ക്കാൻ ശ്രമി​ക്കു​മ്പോൾ, അവ ഉപയോ​ഗം കഴിഞ്ഞ എറ്റിപി തന്മാ​ത്ര​കൾക്കു വീണ്ടും ചാർജി​ത​മാ​കാ​നുള്ള ഊർജം പ്രദാനം ചെയ്യുന്നു. (ഡയഗ്രം 3 കാണുക.) എറ്റിപി തന്മാ​ത്രകൾ കോശ​ങ്ങൾക്കു​ള്ളി​ലെ കൊച്ചു ബാറ്ററി​കൾ പോ​ലെ​യാണ്‌. അവ കോശ​ത്തി​നു​ള്ളി​ലെ എല്ലാത്തരം പ്രതി​പ്ര​വർത്ത​ന​ങ്ങൾക്കും ആവശ്യ​മായ കുറഞ്ഞ അളവി​ലുള്ള ഊർജം അതിനു​ള്ളിൽത്തന്നെ പ്രദാനം ചെയ്യുന്നു. ഈ എറ്റിപി തന്മാ​ത്രകൾ പ്രകാ​ശ​സം​ശ്ലേ​ഷ​ണ​ത്തി​ലെ പഞ്ചസാ​ര​യു​ടെ കാര്യ​ക്ഷ​മ​മായ നിർമാണ പ്രക്രി​യ​യിൽ പിന്നീട്‌ ആവശ്യ​മാ​യി​വ​രും.

എറ്റിപി-ക്കു പുറമേ, പഞ്ചസാര നിർമാണ പ്രക്രി​യ​യിൽ മറ്റൊരു കൊച്ചു തന്മാ​ത്ര​യും അത്യാ​വ​ശ്യ​മാണ്‌. എൻഎഡി​പി​എച്ച്‌ (നിക്കോ​ട്ടി​നാ​മൈഡ്‌ അഡിനിൻ ഡൈ ന്യൂക്ലി​യോ​റ്റൈ​ഡി​ന്റെ ഹ്രസ്വ രൂപം) എന്നാണ്‌ അതിന്റെ പേര്‌. എൻഎഡി​പി​എച്ച്‌ തന്മാ​ത്രകൾ സാധനങ്ങൾ എത്തിച്ചു​കൊ​ടു​ക്കാ​നുള്ള കൊച്ചു ട്രക്കു​ക​ളെ​പ്പോ​ലെ​യാണ്‌. ഓരോ​ന്നും ഓരോ ഹൈ​ഡ്രജൻ ആറ്റത്തെ വഹിച്ച്‌, പഞ്ചസാര തന്മാ​ത്ര​യു​ടെ നിർമാ​ണ​ത്തി​നു​വേണ്ടി ഹൈ​ഡ്രജൻ ആറ്റം ആവശ്യ​മുള്ള എൻ​സൈ​മിന്‌ അത്‌ എത്തിച്ചു​കൊ​ടു​ക്കു​ന്നു. എൻഎഡി​പി​എച്ച്‌ ഉത്‌പാ​ദി​പ്പി​ക്കുക എന്നത്‌ പിഎസ്‌I സംയു​ക്ത​ത്തി​ന്റെ ഉത്തരവാ​ദി​ത്വ​മാണ്‌. ഒരു ഫോ​ട്ടോ​സി​സ്റ്റം (പിഎസ്‌II) ജല തന്മാ​ത്ര​കളെ വിഘടി​പ്പിച്ച്‌ അവയെ​ക്കൊണ്ട്‌ എറ്റിപി ഉത്‌പാ​ദി​പ്പി​ക്കാ​നുള്ള തിരക്കി​ലാ​യി​രി​ക്കവെ, മറ്റേ ഫോ​ട്ടോ​സി​സ്റ്റം (പിഎസ്‌I) പ്രകാ​ശത്തെ ആഗിരണം ചെയ്യു​ക​യും അതുവഴി ഒടുവിൽ എൻഎഡി​പി​എച്ച്‌ ഉത്‌പാ​ദി​പ്പി​ക്കാൻ ഉപയോ​ഗി​ക്കുന്ന ഇലക്‌​ട്രോ​ണു​കളെ പുറ​പ്പെ​ടു​വി​ക്കു​ക​യും ചെയ്യുന്നു. എറ്റിപി തന്മാ​ത്ര​ക​ളും എൻഎഡി​പി​എച്ച്‌ തന്മാ​ത്ര​ക​ളും തൈല​ക്കോ​യി​ഡി​നു പുറത്തുള്ള സ്ഥലത്തു പഞ്ചസാ​ര​യു​ടെ കാര്യ​ക്ഷ​മ​മായ നിർമാണ പ്രക്രി​യ​യി​ലെ ഭാവി ഉപയോ​ഗ​ത്തി​നാ​യി സൂക്ഷി​ക്ക​പ്പെ​ടു​ന്നു.

രാത്രി ഷിഫ്‌റ്റ്‌

പ്രകാ​ശ​സം​ശ്ലേ​ഷണം മുഖേന ഓരോ വർഷവും ശതകോ​ടി​ക്ക​ണ​ക്കി​നു ടൺ പഞ്ചസാ​ര​യാണ്‌ ഉത്‌പാ​ദി​പ്പി​ക്ക​പ്പെ​ടു​ന്നത്‌. എന്നാൽ പ്രകാ​ശ​സം​ശ്ലേ​ഷ​ണ​ത്തി​ലെ പ്രകാ​ശോർജിത പ്രതി​പ്ര​വർത്ത​നങ്ങൾ വാസ്‌ത​വ​ത്തിൽ പഞ്ചസാര ഉത്‌പാ​ദി​പ്പി​ക്കു​ന്നില്ല. അവ ആകെപ്പാ​ടെ ഉത്‌പാ​ദി​പ്പി​ക്കു​ന്നത്‌ എറ്റിപി-യും (“ബാറ്ററി​കൾ”) എൻഎഡി​പി​എച്ച്‌-ഉം (“സാധനങ്ങൾ എത്തിക്കാ​നുള്ള ട്രക്കുകൾ”) ആണ്‌. ഈ ഘട്ടം മുതൽ, സ്‌​ട്രോ​മ​യ്‌ക്കു​ള്ളി​ലോ തൈല​ക്കോ​യി​ഡി​നു വെളി​യി​ലെ സ്ഥലത്തോ ഉള്ള എൻ​സൈ​മു​കൾ പഞ്ചസാ​ര​യു​ടെ നിർമാ​ണ​ത്തി​നാ​യി എറ്റിപി-യും എൻഎഡി​പി​എച്ച്‌-ഉം ഉപയോ​ഗി​ക്കു​ന്നു. സത്യത്തിൽ, സസ്യത്തി​നു പൂർണ അന്ധകാ​ര​ത്തിൽ പഞ്ചസാര ഉത്‌പാ​ദി​പ്പി​ക്കാൻ സാധി​ക്കും. തൈല​ക്കോ​യി​ഡു​കൾക്കു​ള്ളി​ലെ രണ്ടു സംഘം ജോലി​ക്കാർ (പിഎസ്‌I-ഉം പിഎസ്‌II-ഉം) ബാറ്ററി​ക​ളും സാധനങ്ങൾ എത്തിച്ചു​കൊ​ടു​ക്കുന്ന ട്രക്കു​ക​ളും (എറ്റിപി-യും എൻഎഡി​പി​എച്ച്‌-ഉം) ഉണ്ടാക്കു​ക​യും, ഇവ സ്‌​ട്രോ​മ​യി​ലെ മൂന്നാ​മ​തൊ​രു സംഘം ജോലി​ക്കാർ (പ്രത്യേ​ക​തരം രാസാ​ഗ്നി​കൾ) ഉപയോ​ഗി​ക്കു​ക​യും ചെയ്യുന്ന ഒരു ഫാക്ടറി​യോ​ടു നിങ്ങൾക്കു ഹരിത​ക​ണത്തെ ഉപമി​ക്കാൻ കഴിയും. (ഡയഗ്രം 4 കാണുക.) ഈ മൂന്നാ​മത്തെ സംഘം, സ്‌​ട്രോ​മ​യി​ലെ എൻ​സൈ​മു​കൾ ഉപയോ​ഗിച്ച്‌, കൃത്യ​ത​യുള്ള അനു​ക്ര​മ​മായ രാസ​പ്ര​വർത്ത​ന​ങ്ങ​ളി​ലൂ​ടെ ഹൈ​ഡ്രജൻ ആറ്റങ്ങളും കാർബൺ ഡൈ ഓക്‌​സൈഡ്‌ തന്മാ​ത്ര​ക​ളും സംയോ​ജി​പ്പി​ച്ചു പഞ്ചസാര ഉത്‌പാ​ദി​പ്പി​ക്കു​ന്നു. മൂന്നു സംഘങ്ങൾക്കും പകൽസ​മ​യത്തു ജോലി ചെയ്യാ​നാ​കു​മെ​ന്നി​രി​ക്കെ പഞ്ചസാര ഉത്‌പാ​ദക സംഘത്തി​നു രാത്രി​യി​ലും ജോലി ചെയ്യാ​നാ​കും. ഏറ്റവും ചുരു​ങ്ങി​യത്‌ പകലത്തെ ഷിഫ്‌റ്റിൽ ഉത്‌പാ​ദി​പ്പി​ക്ക​പ്പെട്ട എറ്റിപി-യും എൻഎഡി​പി​എച്ച്‌-ഉം തീർന്നു​പോ​കു​ന്ന​തു​വ​രെ​യെ​ങ്കി​ലും.

പരസ്‌പ​രം “വിവാഹം” ചെയ്യേ​ണ്ട​തും എന്നാൽ ഒരിക്ക​ലും സ്വയമേ കൂടി​ച്ചേ​രാൻ ധൈര്യം​കാ​ട്ടാ​ത്ത​തു​മായ ആറ്റങ്ങളും തന്മാ​ത്ര​ക​ളും നിറഞ്ഞ സ്‌​ട്രോ​മയെ നിങ്ങൾക്കു കോശ​ത്തി​ന്റെ ദല്ലാളാ​യി സങ്കൽപ്പി​ക്കാ​വു​ന്ന​താണ്‌. ചില എൻ​സൈ​മു​കൾ നിർബ​ന്ധ​ബു​ദ്ധി​ക്കാ​രായ കൊച്ചു ദല്ലാളു​ക​ളെ​പ്പോ​ലെ​യാണ്‌.a ഒരു പ്രത്യേക പ്രതി​പ്ര​വർത്ത​ന​ത്തിന്‌ ആവശ്യ​മുള്ള ആറ്റങ്ങ​ളെ​യോ തന്മാ​ത്ര​ക​ളെ​യോ മാത്രം പിടി​ച്ചെ​ടു​ക്കാൻ കഴിയ​ത്ത​ക്ക​വി​ധ​ത്തിൽ പ്രത്യേക ആകൃതി​യുള്ള മാംസ്യ തന്മാ​ത്ര​ക​ളാണ്‌ അവ. എന്നാൽ, അവ ഭാവി​യി​ലെ തന്മാത്ര വിവാഹ ഇണകളെ പരസ്‌പരം പരിച​യ​പ്പെ​ടു​ത്തു​ന്ന​തു​കൊ​ണ്ടു​മാ​ത്രം തൃപ്‌തി​പ്പെ​ടു​ന്നില്ല. വിവാഹം നടന്നു​കാ​ണു​ന്ന​തു​വരെ എൻ​സൈ​മു​കൾക്കു തൃപ്‌തി​യാ​കു​ന്നില്ല. അതു​കൊണ്ട്‌ അവ മടിച്ചു​നിൽക്കുന്ന ഭാവി ഇണകളെ ബലമായി പിടി​ച്ചു​കൊ​ണ്ടു​വന്ന്‌ അന്യോ​ന്യം നേരിട്ടു ബന്ധത്തിൽവ​രു​ത്തു​ക​കൂ​ടി ചെയ്യുന്നു. അങ്ങനെ ജൈവ​രാ​സ​പ്ര​വർത്ത​ന​മാ​കുന്ന തോക്കി​ന്റെ ഭീഷണി​യി​ലെ​ന്ന​പോ​ലെ ബലമായി വിവാഹം ചെയ്യി​ക്കു​ന്നു. ആ ചടങ്ങിനു ശേഷം, എൻ​സൈ​മു​കൾ പുതിയ തന്മാ​ത്രയെ സ്വത​ന്ത്ര​മാ​ക്കി​യിട്ട്‌, ഇതേ പ്രക്രിയ വീണ്ടും വീണ്ടും ആവർത്തി​ക്കു​ന്നു. സ്‌​ട്രോ​മ​യ്‌ക്കു​ള്ളിൽ എൻ​സൈ​മു​കൾ ഭാഗി​ക​മാ​യി പൂർത്തി​യായ പഞ്ചസാര തന്മാ​ത്ര​കളെ അവിശ്വ​സ​നീ​യ​മായ വേഗത​യിൽ കൈമാ​റി​ക്കൊ​ണ്ടി​രി​ക്കു​ന്നു. അങ്ങനെ അവയിൽ പുനഃ​ക്ര​മീ​ക​ര​ണങ്ങൾ വരുത്തി, എറ്റിപി കൊണ്ട്‌ ഊർജം പകർന്ന്‌, കാർബൺ ഡൈ ഓക്‌​സൈഡ്‌ സംശ്ലേ​ഷി​പ്പിച്ച്‌, ഹൈ​ഡ്രജൻ സംയോ​ജി​പ്പിച്ച്‌, ഒടുവിൽ മൂന്നു കാർബ​ണാ​റ്റ​മുള്ള ഒരു പഞ്ചസാര തന്മാ​ത്രയെ കോശ​ത്തി​ലെ മറ്റേ​തെ​ങ്കി​ലും സ്ഥലത്തു​വെച്ചു കൂടുതൽ ഭേദഗ​തി​കൾ വരുത്തി ഗ്ലൂക്കോ​സാ​ക്കി മാറ്റു​ന്ന​തി​നും മറ്റനേകം പരിവൃ​ത്തി​കൾക്കു​മാ​യി അയയ്‌ക്കു​ന്നു.—ഡയഗ്രം 5 കാണുക.

പുല്ലിനു പച്ചനിറം എന്തു​കൊണ്ട്‌?

വെറും അടിസ്ഥാന രാസ പ്രവർത്ത​ന​ത്തെ​ക്കാൾ വളരെ കവിഞ്ഞ​താ​ണു പ്രകാ​ശ​സം​ശ്ലേ​ഷണം. അതു വിസ്‌മ​യാ​വ​ഹ​മായ സങ്കീർണ​ത​യു​ടെ​യും വൈദ​ഗ്‌ധ്യ​ത്തി​ന്റെ​യും ഒരു ജൈവ​രാ​സ​പ​ര​മായ താളല​യ​മാണ്‌. സസ്യങ്ങ​ളു​ടെ ജീവത്‌പ്ര​ക്രി​യകൾ (ഇംഗ്ലീഷ്‌) എന്ന പുസ്‌തകം അതി​നെ​ക്കു​റിച്ച്‌ ഇങ്ങനെ പറയുന്നു: “പ്രകാ​ശ​സം​ശ്ലേ​ഷണം, സൂര്യന്റെ ഫോ​ട്ടോ​ണു​ക​ളു​ടെ ഊർജം ഉപയോ​ഗ​പ്പെ​ടു​ത്തു​ന്ന​തി​നുള്ള വിശി​ഷ്ട​മായ, അങ്ങേയറ്റം നിയ​ന്ത്രി​ത​മായ ഒരു പ്രക്രി​യ​യാണ്‌. സസ്യത്തി​ന്റെ സങ്കീർണ നിർമി​തി​യെ​യും പ്രകാ​ശ​സം​ശ്ലേഷണ പ്രവർത്ത​നത്തെ നിയ​ന്ത്രി​ക്കുന്ന അവിശ്വ​സ​നീ​യ​മാം​വി​ധം ഗഹനമായ ജൈവ​രാസ, ജനിതക നിയമ​ങ്ങ​ളെ​യും ഫോ​ട്ടോൺ പിടി​ച്ചെ​ടുത്ത്‌, അതിന്റെ ഊർജത്തെ രാസോർജ​മാ​ക്കി മാറ്റുന്ന അടിസ്ഥാന പ്രക്രി​യ​ക​ളു​ടെ ശുദ്ധീ​ക​ര​ണ​ങ്ങ​ളാ​യി വീക്ഷി​ക്കാ​വു​ന്ന​താണ്‌.”

മറ്റു വാക്കു​ക​ളിൽപ്പ​റ​ഞ്ഞാൽ, പുല്ലിനു പച്ചനി​റ​മു​ള്ളത്‌ എന്തു​കൊ​ണ്ടെന്നു കണ്ടുപി​ടി​ക്കു​ന്നത്‌ മമനു​ഷ്യ​ന്റെ ഏതൊരു കണ്ടുപി​ടി​ത്ത​ത്തെ​ക്കാ​ളും വളരെ ഉത്‌കൃ​ഷ്ട​മായ രൂപകൽപ്പ​ന​യെ​യും സാങ്കേ​തി​ക​വി​ദ്യ​യെ​യും വിസ്‌മ​യ​ത്തോ​ടെ ഉറ്റു​നോ​ക്കുക എന്നാണ്‌—സ്വയം നിയ​ന്ത്രി​ക്കുന്ന, സ്വയം കേടു​പോ​ക്കുന്ന, ഓരോ സെക്കൻറി​ലും ആയിര​ക്ക​ണ​ക്കി​നോ ലക്ഷക്കണ​ക്കി​നോ​പോ​ലും പരിവൃ​ത്തി​കൾ (ശബ്ദമോ, മലിനീ​ക​ര​ണ​മോ, വൃത്തി​കേ​ടോ കൂടാതെ) പൂർത്തി​യാ​ക്കുന്ന അതിസൂക്ഷ്‌മ “യന്ത്രങ്ങൾ” സൂര്യ​പ്ര​കാ​ശത്തെ പഞ്ചസാ​ര​യാ​ക്കി മാറ്റുന്ന പ്രവർത്ത​ന​മാ​ണത്‌. നമുക്കാ​ണെ​ങ്കിൽ അത്‌ ഒരു അതുല്യ​നായ രൂപസം​വി​ധാ​യ​ക​നും എഞ്ചിനീ​യ​റു​മാ​യ​വന്റെ—നമ്മുടെ സ്രഷ്ടാ​വായ യഹോ​വ​യാം ദൈവ​ത്തി​ന്റെ—മനസ്സിന്റെ ഒരു ക്ഷണിക​ദർശനം നൽകുന്നു. അടുത്ത തവണ നിങ്ങൾ യഹോ​വ​യു​ടെ മനോ​ഹ​ര​മായ, ജീവസ​ന്ധാ​ര​ണ​ത്തി​നു​ത​കുന്ന ഒരു “സമ്പൂർണ ഫാക്ടറി” കണ്ടു വിസ്‌മ​യി​ക്കു​മ്പോൾ അല്ലെങ്കിൽ മനോ​ജ്ഞ​മായ ആ പച്ചപ്പു​ല്ലി​ലൂ​ടെ നടക്കു​മ്പോൾ അതേക്കു​റി​ച്ചു ചിന്തി​ക്കുക.

[അടിക്കു​റിപ്പ്‌]

[18-ാം പേജിലെ ചിത്ര​ത്തിന്‌ കടപ്പാട്‌]

ഉൾച്ചിത്ര ഫോട്ടോ: Colorpix, Godo-Foto

[19-ാം പേജിലെ ചിത്രം]

പ്രകാശസംശ്ലേഷണം ഈ വൃക്ഷത്തെ വളർത്തി​യ​തെ​ങ്ങനെ?

[20-ാം പേജിലെ രേഖാ​ചി​ത്രം]

ഡയഗ്രം 1

[20-ാം പേജിലെ രേഖാ​ചി​ത്രം]

ഡയഗ്രം 2

[21-ാം പേജിലെ രേഖാ​ചി​ത്രം]

ഡയഗ്രം 3

[21-ാം പേജിലെ രേഖാ​ചി​ത്രം]

ഡയഗ്രം 4

[22-ാം പേജിലെ രേഖാ​ചി​ത്രം]

ഡയഗ്രം 5