കുട്ടി​കളെ ലൈം​ഗി​ക​മാ​യി ചൂഷണം ചെയ്യൽ—ഒരു ലോക​വ്യാ​പക പ്രശ്‌നം

സ്വീഡ​നി​ലെ ഉണരുക! ലേഖകൻ

സമീപ വർഷങ്ങൾവരെ സുവി​ദി​ത​മാ​യി​രു​ന്നി​ട്ടി​ല്ലാത്ത വ്യാപ്‌തി​യും സ്വഭാ​വ​വു​മുള്ള ബാലദു​രു​പ​യോ​ഗ​ത്തി​ന്റെ ഞെട്ടി​ക്കുന്ന ഒരു രൂപം മാനവ​സ​മൂ​ഹത്തെ പിടി​ച്ചു​ല​യ്‌ക്കു​ക​യാണ്‌. അതു സംബന്ധിച്ച്‌ എന്തു ചെയ്യാൻ കഴിയു​മെന്നു കാണു​ന്ന​തി​നു കുട്ടി​കൾക്കു നേരേ​യുള്ള വാണിജ്യ ലൈം​ഗിക ചൂഷണ​ത്തി​നെ​തി​രെ​യുള്ള ആദ്യത്തെ ലോക​സ​മ്മേ​ള​ന​ത്തിൽ 130 രാജ്യ​ങ്ങ​ളിൽനി​ന്നുള്ള പ്രതി​നി​ധി​കൾ സ്വീഡ​നി​ലെ സ്റ്റോക്ക്‌ഹോ​മിൽ കൂടി​വ​രു​ക​യു​ണ്ടാ​യി. സ്വീഡ​നി​ലെ ഉണരുക! ലേഖക​നും അവി​ടെ​യു​ണ്ടാ​യി​രു​ന്നു.

മാഗ്‌ഡ​ലന്‌ 14 വയസ്സു​ണ്ടാ​യി​രു​ന്ന​പ്പോ​ഴാണ്‌ അവളെ ഒരു ജോലി​യി​ലേക്കു വശീക​രി​ച്ചു​കൊ​ണ്ടു​പോ​യത്‌. അവളുടെ ജോലി ഫിലി​പ്പീൻസി​ലെ മനില​യി​ലുള്ള ഒരു ബാറിൽ “ആതിഥേയ” ആയിരി​ക്കു​ക​യാ​യി​രു​ന്നു. വാസ്‌ത​വ​ത്തിൽ, അവിടെ ഇടപാ​ടു​കാ​രാ​യി വരുന്ന പുരു​ഷ​ന്മാ​രെ ഒരു കൊച്ചു മുറി​യി​ലേക്കു കൊണ്ടു​പോ​യി അവരുടെ ലൈം​ഗിക ചൂഷണ​ത്തി​നു വേണ്ടി സ്വന്തം തുണി​യു​രി​യു​ന്നത്‌ അവളുടെ ജോലി​യിൽ ഉൾപ്പെ​ട്ടി​രു​ന്നു—ഓരോ രാത്രി​യി​ലും ശരാശരി 15 പേരു കാണും, ശനിയാ​ഴ്‌ച​ക​ളിൽ 30 പേരും. ചില​പ്പോൾ, തനിക്കു മേലാൽ ഇതിനാ​വി​ല്ലെന്ന്‌ അവൾ പറയു​മ്പോൾ അവളുടെ മാനേജർ ആ ജോലി​യിൽ തുടരാൻ സമ്മർദം ചെലു​ത്തു​മാ​യി​രു​ന്നു. മിക്ക​പ്പോ​ഴും രാവിലെ നാലു മണിയാ​കു​മ്പോ​ഴാ​യി​രു​ന്നു അവളുടെ ജോലി​സ​മയം തീരു​ന്നത്‌, അപ്പോ​ഴേ​ക്കും അവൾ അവശയും വിഷാ​ദ​മ​ഗ്ന​യും മാനസി​ക​മാ​യി കഷ്ടമനു​ഭ​വി​ക്കു​ന്ന​വ​ളും ആയിക്ക​ഴി​ഞ്ഞി​രി​ക്കും.

കമ്പോ​ഡി​യ​യി​ലെ ഫ്‌നോം പെന്നി​ലുള്ള ഒരു തെരു​വി​ലെ അനാഥ​ബാ​ല​നാ​യി​രു​ന്നു സാരൂൺ. അവനു സിഫി​ലിസ്‌ പിടി​പെ​ട്ടി​രു​ന്നു, വിദേ​ശി​ക​ളു​മാ​യി ‘ബന്ധപ്പെ​ട്ടി​രു​ന്നതു’ സംബന്ധിച്ച്‌ അവൻ കുപ്ര​സി​ദ്ധി​യാർജി​ച്ചി​രു​ന്നു. ഒരു പഗോ​ഡ​യിൽ അവനു താമസ​സൗ​ക​ര്യം ലഭിച്ചു. മുമ്പ്‌ സന്ന്യാ​സി​യാ​യി​രുന്ന ഒരുവൻ അവനെ ‘പരിപാ​ലി​ക്കേ​ണ്ട​താ​യി​രു​ന്നു.’ എന്നാൽ, അയാൾ ആ ബാലനെ ലൈം​ഗി​ക​മാ​യി ദ്രോ​ഹി​ക്കു​ക​യും വിദേ​ശി​ക​ളു​മാ​യുള്ള ലൈം​ഗിക ഇടപാ​ടിന്‌ അവനെ കരുതി​വെ​ക്കു​ക​യും ചെയ്‌തി​രു​ന്നു. പഗോ​ഡ​യി​ലെ സാരൂ​ണി​ന്റെ താമസ​സ്ഥലം ഇടിച്ചു​പൊ​ളി​ച്ചു​ക​ള​ഞ്ഞ​പ്പോൾ അവൻ തന്റെ ആൻറി​യോ​ടൊ​ത്തു താമസി​ക്കാൻ തുടങ്ങി, അപ്പോ​ഴും അവൻ തെരു​വിൽ അതേ ജോലി ചെയ്യാൻ നിർബ​ന്ധി​ത​നാ​യി.

കഴിഞ്ഞ വർഷാ​വ​സാ​നം സംഘടി​പ്പിച്ച, കുട്ടി​കൾക്കു നേരേ​യുള്ള വ്യാവ​സാ​യിക ലൈം​ഗിക ചൂഷണ​ത്തി​നെ​തി​രെ​യുള്ള ആദ്യത്തെ ലോക​സ​മ്മേ​ള​ന​ത്തിൽ പ്രതി​പാ​ദിച്ച ഈ പ്രശ്‌ന​ത്തി​ന്റെ കേവലം രണ്ട്‌ ഉദാഹ​ര​ണങ്ങൾ മാത്ര​മാ​ണിവ. ഇത്‌ എത്ര വ്യാപ​ക​മാണ്‌? ലക്ഷക്കണ​ക്കി​നു കുട്ടികൾ ഉൾപ്പെ​ട്ടി​രി​ക്കു​ന്നു—ചിലർ പറയു​ന്നതു കോടി​ക്ക​ണ​ക്കി​നു കുട്ടികൾ ഉൾപ്പെ​ട്ടി​രി​ക്കു​ന്നു​വെ​ന്നാണ്‌. ഒരു പ്രതി​നി​ധി ഈ പ്രശ്‌നത്തെ ഇങ്ങനെ സംഗ്ര​ഹി​ച്ചു: “ലൈം​ഗിക, സാമ്പത്തിക ഉപഭോ​ഗ​വ​സ്‌തു​ക്കൾ പോ​ലെ​യാ​ണു കുട്ടി​കളെ വാങ്ങു​ന്ന​തും വിൽക്കു​ന്ന​തും. നിയമ​വി​രുദ്ധ കള്ളക്കട​ത്തു​പോ​ലെ, അവരെ അതിർത്തി​ക്കു​ള്ളിൽത്ത​ന്നെ​യും പുറ​ത്തേ​ക്കും കടത്തി​ക്കൊ​ണ്ടു​പോ​കു​ന്നു, വേശ്യാ​ല​യ​ങ്ങ​ളിൽ തടവി​ലാ​ക്കു​ന്നു, ലൈം​ഗിക ചൂഷണം ചെയ്യുന്ന ഒട്ടേറെ പേർക്കു വഴങ്ങാൻ നിർബ​ന്ധി​ത​രാ​ക്ക​പ്പെ​ടു​ന്നു.”

ഈ ചൂഷണത്തെ “ഏറ്റവും മൃഗീ​യ​വും അതിനി​ഷ്‌ഠു​ര​വും കുത്സി​ത​വു​മാ​യ​തരം കുറ്റകൃ​ത്യം” എന്നു സ്വീഡ​നി​ലെ പ്രധാ​ന​മ​ന്ത്രി​യായ യോറൻ പെർസോൺ മുദ്ര കുത്തു​ക​യു​ണ്ടാ​യി. അത്‌ “കുട്ടി​ക​ളോ​ടുള്ള സർവ​തോ​ന്മു​ഖ​മായ ആക്രമ​ണ​മാണ്‌ . . . , തികഞ്ഞ ദുഷ്ടത​യാണ്‌, മനുഷ്യാ​വ​കാ​ശ​ങ്ങ​ളു​ടെ സങ്കൽപ്പി​ക്കാ​നാ​വു​ന്ന​തി​ലേ​ക്കും​വെച്ച്‌ ഏറ്റവും നിന്ദ്യ​മായ ലംഘന​മാണ്‌” എന്ന്‌ ഒരു ഐക്യ​രാ​ഷ്‌ട്ര പ്രതി​നി​ധി പറഞ്ഞു. കുട്ടി​കളെ ലൈം​ഗിക ചൂഷണ​ത്തി​നു വിധേ​യ​മാ​ക്കു​ന്ന​തി​ന്റെ വ്യാപ്‌തി​യും സ്വഭാ​വ​വും കാരണ​ങ്ങ​ളും ഫലങ്ങളും പരിചി​ന്തി​ക്കവെ ഉഗ്ര​രോ​ഷ​ത്തി​ന്റെ സമാന​മായ ആശയ​പ്ര​ക​ട​നങ്ങൾ സമ്മേള​ന​ത്തി​ലു​ട​നീ​ളം വേദി​യിൽ മുഴങ്ങി​ക്കേട്ടു.

“അതിന്റെ വ്യാപ്‌തി ദേശീ​യാ​തിർത്തി​കൾക്ക്‌ അപ്പുറ​ത്തെ​ത്തു​ന്നു, അതിന്റെ ഫലം തലമു​റ​കൾക്ക​പ്പു​റ​ത്തേക്കു വ്യാപി​ക്കു​ന്നു,” ഒരു ഉറവിടം അതേക്കു​റി​ച്ചു പറഞ്ഞത്‌ അങ്ങനെ​യാണ്‌. മറ്റൊന്ന്‌ ഇങ്ങനെ പ്രസ്‌താ​വി​ച്ചു: “അനേക ശതകോ​ടി ഡോള​റി​ന്റെ ഈ നിയമ​വി​രുദ്ധ കമ്പോ​ള​ത്തിൽ പ്രതി​വർഷം പത്തു ലക്ഷത്തോ​ളം കുട്ടികൾ പ്രവേ​ശി​ക്കു​ന്ന​താ​യി വിശ്വ​സി​ക്ക​പ്പെ​ടു​ന്നു.” അതിന്റെ ഫലമെ​ന്താണ്‌? “അന്തസ്സ്‌, താദാ​ത്മ്യം, ആത്മാഭി​മാ​നം തുടങ്ങി​യവ സംബന്ധിച്ച കുട്ടി​യു​ടെ അവബോ​ധം തുരങ്കം വെക്ക​പ്പെ​ടു​ന്നു​വെന്നു മാത്രമല്ല, ആശ്രയി​ക്കാ​നുള്ള അവരുടെ പ്രാപ്‌തി​ക്കു മങ്ങലേൽക്കു​ക​യും ചെയ്യുന്നു. അവരുടെ ശാരീ​രി​ക​വും മാനസി​ക​വു​മായ ആരോ​ഗ്യം അപകട​ത്തി​ലാ​കു​ന്നു, അവരുടെ അവകാ​ശങ്ങൾ ലംഘി​ക്ക​പ്പെ​ടു​ന്നു, അവരുടെ ഭാവി തകരുന്നു.”

ചില കാരണങ്ങൾ

ഈ പ്രശ്‌ന​ത്തി​ന്റെ സ്‌ഫോ​ട​നാ​ത്മക വളർച്ച​യു​ടെ ചില കാരണങ്ങൾ എന്തൊ​ക്കെ​യാണ്‌? ചില കുട്ടികൾ, “ദരി​ദ്ര​മായ നഗര​പ്ര​ദേ​ശ​ങ്ങ​ളിൽ അതിജീ​വി​ക്കു​ന്ന​തി​നോ തങ്ങളുടെ കുടും​ബ​ങ്ങളെ സഹായി​ക്കു​ന്ന​തി​നോ വസ്‌ത്ര​ങ്ങ​ളും സാധന​ങ്ങ​ളും മറ്റും വാങ്ങു​ന്ന​തി​നോ ഉള്ള ഒരു മാർഗ​മെ​ന്ന​നി​ല​യിൽ സാഹച​ര്യ​ങ്ങ​ളു​ടെ നിർബ​ന്ധ​ത്താൽ വേശ്യാ​വൃ​ത്തി​യിൽ” ഏർപ്പെ​ടു​ന്ന​താ​യി പ്രസ്‌താ​വി​ക്ക​പ്പെട്ടു. “പരസ്യ​മാ​ധ്യ​മ​ങ്ങ​ളി​ലെ ഉപഭോ​ക്താ​ക്ക​ളു​ടെ ആക്രമ​ണ​ത്താൽ വശീക​രി​ക്ക​പ്പെ​ടു​ന്ന​വ​രാ​ണു മറ്റു ചിലർ.” ഇനിയും വേറെ ചിലരെ തട്ടി​ക്കൊ​ണ്ടു​പോ​യി വേശ്യ​വൃ​ത്തി​യി​ലേർപ്പെ​ടു​ത്തു​ന്നു. അതിന്റെ കാരണ​ങ്ങ​ളു​ടെ കൂട്ടത്തിൽ ധാർമിക മൂല്യ​ങ്ങ​ളിൽ എല്ലായി​ട​ത്തു​മുള്ള സത്വര അധഃപ​ത​ന​വും പൊതു​വായ പ്രത്യാ​ശ​യി​ല്ലാ​യ്‌മ​യും പരാമർശി​ക്ക​പ്പെട്ടു.

കുടും​ബ​ത്തി​ലെ ദുഷ്‌പെ​രു​മാ​റ്റം നിമിത്തം പല പെൺകു​ട്ടി​ക​ളും ആൺകു​ട്ടി​ക​ളും ലൈം​ഗി​ക​വി​പ​ണ​ന​ത്തിൽ ഉൾപ്പെ​ടു​ന്നു—ഭവനത്തി​ലെ അക്രമ​വും നിഷിദ്ധ ബന്ധു​വേ​ഴ്‌ച​യും അവരെ തെരു​വി​ലേക്കു തള്ളിവി​ടു​ന്നു. അവിടെ അവർ ലൈം​ഗി​ക​പീ​ഡനം നടത്തു​ന്ന​വ​രു​ടെ​യും മറ്റുള്ള​വ​രു​ടെ​യും, ചില​പ്പോൾ പൊലീ​സു​കാ​രു​ടെ പോലും, ദുഷ്‌പെ​രു​മാ​റ്റ​ത്തി​നു വിധേ​യ​രാ​കു​ന്നു. ഈ പ്രശ്‌ന​ത്തെ​ക്കു​റിച്ച്‌ കുട്ടികൾ വിൽപ്പ​ന​യ്‌ക്ക്‌ (ഇംഗ്ലീഷ്‌) എന്ന ശീർഷ​ക​ത്തി​ലുള്ള പ്രസി​ദ്ധീ​ക​ര​ണ​ത്തി​ലെ ഒരു റിപ്പോർട്ട്‌ ബ്രസീ​ലി​ലെ ആറുവ​യ​സ്സു​കാ​രി​യായ കാത്തി​യ​യെ​ക്കു​റി​ച്ചു പറയുന്നു. അവളെ ഒരു പൊലീ​സു​കാ​രൻ പിടി​കൂ​ടി അപഹാ​സ്യ​മായ ക്രീഡ​ക​ളി​ലേർപ്പെ​ടാൻ നിർബ​ന്ധി​ച്ചു. മേലധി​കാ​രി​യോ​ടു പറഞ്ഞാൽ അവളുടെ കുടും​ബത്തെ കൊന്നു​ക​ള​യു​മെന്നു ഭീഷണി​പ്പെ​ടു​ത്തു​ക​യും ചെയ്‌തു. പിറ്റേ ദിവസം അയാൾ മടങ്ങി​വ​ന്ന​പ്പോൾ കൂടെ മറ്റ്‌ അഞ്ചു പുരു​ഷ​ന്മാ​രു​ണ്ടാ​യി​രു​ന്നു, അവർക്കു വേണ്ടി​യും അവൾ ലൈം​ഗി​ക​സേ​വനം ചെയ്യാൻ അവരാ​ഗ്ര​ഹി​ച്ചു.

കുട്ടി​ക​ളു​ടെ ഓംബു​ഡ്‌സ്‌മൻ എന്ന ഒരു സ്വീഡിഷ്‌ സ്ഥാപനം സമ്മേള​ന​പ്ര​തി​നി​ധി​ക​ളോട്‌ ഇങ്ങനെ പറഞ്ഞു: “ബാല​വേ​ശ്യാ​വൃ​ത്തി​ക്കു കാരണ​ങ്ങ​ളെ​ന്തെന്നു പഠനം നടത്തി​യി​ട്ടുണ്ട്‌, അതിന്റെ പ്രമുഖ കാരണ​ങ്ങ​ളിൽ ഒന്ന്‌ [ലൈം​ഗിക] വിനോ​ദ​സ​ഞ്ചാ​ര​മാ​ണെ​ന്നു​ള്ള​തി​നു സംശയ​മില്ല.” ഒരു റിപ്പോർട്ട്‌ ഇങ്ങനെ പറയു​ക​യു​ണ്ടാ​യി: “ബാല​വേ​ശ്യാ​വൃ​ത്തി​യിൽ കഴിഞ്ഞ പത്തു വർഷമാ​യി ഉണ്ടായി​ട്ടുള്ള അവിശ്വ​സ​നീ​യ​മായ അതി​പ്ര​സരം ഈ വിനോ​ദ​സ​ഞ്ചാര ബിസി​ന​സി​ന്റെ നേരി​ട്ടുള്ള ഫലമാണ്‌. വികസ്വര രാഷ്‌ട്രങ്ങൾ നൽകുന്ന ഏറ്റവും പുതിയ വിനോ​ദ​സ​ഞ്ചാര ആകർഷ​ണ​മാ​യി​ത്തീർന്നി​രി​ക്കു​ന്നു ബാല​വേ​ശ്യാ​വൃ​ത്തി.” യൂറോപ്പ്‌, ഐക്യ​നാ​ടു​കൾ, ജപ്പാൻ, മറ്റു സ്ഥലങ്ങൾ എന്നിവി​ട​ങ്ങ​ളിൽനി​ന്നുള്ള “ലൈം​ഗിക വിനോ​ദ​യാ​ത്രകൾ” ലോക​ത്തു​ട​നീ​ളം ബാല​വേ​ശ്യ​ക​ളു​ടെ ഡിമാൻറ്‌ വർധി​പ്പി​ക്കു​ന്നു. ലൈം​ഗിക വിനോ​ദ​യാ​ത്ര​കൾക്കു പ്രചാ​ര​മേ​കാൻ തികച്ചും ലൈം​ഗി​കാ​സക്തി ജനിപ്പി​ക്കുന്ന രീതി​യിൽ നിൽക്കുന്ന ഒരു കുട്ടി​യു​ടെ കാർട്ടൂൺ ചിത്രം യൂറോ​പ്പി​ലെ ഒരു എയർ​ലൈൻസ്‌ കമ്പനി ഉപയോ​ഗി​ക്കു​ക​യു​ണ്ടാ​യി. വർഷം​തോ​റും ആയിര​ങ്ങൾക്കു ട്രാവൽ ഏജൻസി​കൾ ലൈം​ഗിക വിനോ​ദ​യാ​ത്രകൾ ക്രമീ​ക​രി​ക്കു​ന്നു.

പുതിയ സാങ്കേ​തി​ക​വി​ദ്യ​യി​ലൂ​ടെ ബാല​ലൈം​ഗിക വ്യവസാ​യ​ത്തി​നു നൽകുന്ന അന്തർദേ​ശീയ പ്രോ​ത്സാ​ഹനം അതിന്റെ കാരണ​ങ്ങ​ളു​ടെ നീണ്ട പട്ടിക​യി​ലൊ​ന്നാണ്‌. ഇൻറർനെ​റ്റും മറ്റു ബന്ധപ്പെട്ട കമ്പ്യൂട്ടർ സാങ്കേ​തി​ക​വി​ദ്യ​ക​ളും അശ്ലീല​ത്തി​ന്റെ ഏറ്റവും വലിയ ഉറവി​ട​മാ​ണെന്നു റിപ്പോർട്ടു ചെയ്യ​പ്പെ​ട്ടി​രി​ക്കു​ന്നു. അതു​പോ​ലെ​തന്നെ, ബാല അശ്ലീലം നിർമി​ക്കു​ന്ന​തിൽ വിലകു​റഞ്ഞ വീഡി​യോ ഉപകര​ണ​ങ്ങ​ളും ഒരു സഹായ​മാ​യി​ത്തീർന്നി​രി​ക്കു​ന്നു.

അവർ ആരാണ്‌?

കുട്ടി​കളെ ലൈം​ഗി​ക​മാ​യി ദ്രോ​ഹി​ക്കുന്ന മുതിർന്ന​വ​രിൽ പലരും ബാലര​തി​പ്രി​യ​രാണ്‌. കുട്ടി​കളെ ലൈം​ഗി​ക​മാ​യി ദ്രോ​ഹി​ക്കുന്ന ഒരുവന്‌ കുട്ടി​ക​ളോ​ടു വികല​മായ ലൈം​ഗി​കാ​കർഷ​ണ​മാ​യി​രി​ക്കും ഉള്ളത്‌. സ്വീഡ​നി​ലെ കുട്ടി​ക​ളു​ടെ ഓംബു​ഡ്‌സ്‌മൻ പറയു​ന്ന​ത​നു​സ​രിച്ച്‌, “അവർ അവശ്യം പ്രായം ചെല്ലുന്ന, അലസമ​നോ​ഭാ​വ​ക്കാ​രായ, മഴക്കോ​ട്ടു​ധാ​രി​ക​ളായ പുരു​ഷ​ന്മാ​രോ ഉഗ്രസ്വ​ഭാ​വി​ക​ളായ ആണുങ്ങ​ളോ അല്ല. ഒരു സാധാരണ ബാലര​തി​പ്രി​യൻ നല്ല വിദ്യാ​ഭ്യാ​സ​മുള്ള മധ്യവ​യ​സ്‌ക​നാണ്‌. അയാൾ മിക്ക​പ്പോ​ഴും അധ്യാ​പ​ക​നോ ഡോക്ട​റോ സാമൂ​ഹിക പ്രവർത്ത​ക​നോ പുരോ​ഹി​ത​നോ ആയി കുട്ടി​ക​ളോ​ടൊ​പ്പം പ്രവർത്തി​ക്കു​ന്ന​വ​നാണ്‌.”

ഫിലി​പ്പീൻസി​ലുള്ള 12 വയസ്സു​കാ​രി​യായ റോസാ​റി​യോ എന്ന പെൺകു​ട്ടി​യു​ടെ ഉദാഹ​രണം സ്വീഡിഷ്‌ സംഘം പരാമർശി​ക്കു​ക​യു​ണ്ടാ​യി. അവളെ ഓസ്‌ട്രി​യ​യിൽനി​ന്നുള്ള ലൈം​ഗിക വിനോ​ദ​സ​ഞ്ചാ​രി​യായ ഒരു ഡോക്ടർ ദ്രോ​ഹി​ച്ചു. അയാളു​ടെ ദുഷ്‌പെ​രു​മാ​റ്റം അവളുടെ മരണത്തിൽ കലാശി​ച്ചു.

ജനീവ​യി​ലെ യുനി​സെ​ഫി​ന്റെ എക്‌സി​ക്യു​ട്ടീവ്‌ ഡയറക്ട​റായ കാരൾ ബെലാമി 12 വയസ്സുള്ള ആ ഫിലി​പ്പീൻസു​കാ​രി​യെ​ക്കു​റിച്ച്‌ ഇങ്ങനെ പ്രസ്‌താ​വി​ച്ചു: “കുട്ടി​കളെ പരിപാ​ലി​ക്കാ​നും സംരക്ഷി​ക്കാ​നും അധികാ​ര​പ്പെ​ടു​ത്ത​പ്പെ​ട്ടി​രി​ക്കു​ന്നവർ തന്നെയാണ്‌ പൊറു​ക്കാ​നാ​വാത്ത ഈ നടപടി​യെ അനുവ​ദി​ക്കു​ന്ന​തും അനുവർത്തി​ക്കു​ന്ന​തും. തങ്ങളുടെ അന്തസ്സും അധികാ​ര​വും കുട്ടി​കളെ ലൈം​ഗി​ക​മാ​യി ചൂഷണം ചെയ്യാൻ ഉപയോ​ഗി​ക്കുന്ന അധ്യാ​പ​ക​രും ആരോ​ഗ്യ​വി​ദ​ഗ്‌ധ​രും പൊലീസ്‌ ഉദ്യോ​ഗ​സ്ഥ​ന്മാ​രും രാഷ്‌ട്രീ​യ​ക്കാ​രും വൈദി​ക​രും ഇതിലുൾപ്പെ​ടു​ന്നു.”

മതം ഉൾപ്പെ​ട്ടി​രി​ക്കു​ന്നു

കുട്ടി​കളെ ചൂഷണം ചെയ്യു​ന്നത്‌ “അതിനി​കൃ​ഷ്ട​മായ കുറ്റകൃ​ത്യ”വും “മൂല്യ​ങ്ങ​ളു​ടെ വലിയ വികല​ത​യു​ടെ​യും തകർച്ച​യു​ടെ​യും ഫലവു”മാണെന്ന്‌ സ്റ്റോക്ക്‌ഹോം സമ്മേള​ന​ത്തിൽ കത്തോ​ലി​ക്കാ സഭയുടെ ഒരു പ്രതി​നി​ധി പ്രഖ്യാ​പി​ക്കു​ക​യു​ണ്ടാ​യി. അതേസ​മയം, കത്തോ​ലി​ക്കാ സഭയിലെ വൈദി​ക​രു​ടെ ഇടയി​ലുള്ള അത്തരം ചെയ്‌തി​കൾ ആ സഭയെ വളരെ മോശ​മാ​യി ബാധി​ച്ചി​രി​ക്കു​ന്നു.

1993 ആഗസ്റ്റ്‌ 16-ലെ ന്യൂസ്‌വീ​ക്കിൽ “പുരോ​ഹി​ത​ന്മാ​രും ദുരു​പ​യോ​ഗ​വും” എന്ന ശീർഷ​ക​ത്തി​ലുള്ള ഒരു ലേഖനം “യു.എസ്‌. കത്തോ​ലി​ക്കാ സഭയുടെ ആധുനിക ചരി​ത്ര​ത്തി​ലെ ഏറ്റവും വലിയ പൗരോ​ഹി​ത്യ അപകീർത്തി”യെക്കു​റിച്ച്‌ റിപ്പോർട്ടു ചെയ്യു​ക​യു​ണ്ടാ​യി. അതിങ്ങനെ പ്രസ്‌താ​വി​ച്ചു: “1982 മുതൽ 400-ഓളം പുരോ​ഹി​ത​ന്മാർക്കെ​തി​രെ ആരോ​പ​ണങ്ങൾ ഉന്നയി​ച്ചി​ട്ടു​ണ്ടെ​ങ്കി​ലും, 2,500-ഓളം പുരോ​ഹി​ത​ന്മാർ കുട്ടി​ക​ളെ​യും കൗമാ​ര​പ്രാ​യ​ക്കാ​രെ​യും ദ്രോ​ഹി​ച്ചി​ട്ടു​ള്ള​താ​യി ചില സഭാം​ഗങ്ങൾ ഊഹി​ക്കു​ന്നു. . . . പണനഷ്ട​ത്തെ​ക്കാ​ളു​പരി, ഈ കുത്സിത പ്രവൃത്തി സഭയ്‌ക്കു വലിയ അപകീർത്തി വരുത്തി​വെ​ച്ചി​രി​ക്കു​ന്നു. മാത്രമല്ല, അതിന്റെ ധാർമിക അധികാ​ര​ത്തി​നും നഷ്ടം സംഭവി​ച്ചി​രി​ക്കു​ന്നു.” ലോക​ത്തി​ലു​ട​നീ​ള​മുള്ള മറ്റു മതങ്ങളും സമാന​മായ സാഹച​ര്യ​ത്തി​ലാണ്‌.

യു​ണൈ​റ്റഡ്‌ കിങ്‌ഡ​ത്തിൽനി​ന്നുള്ള ലൈം​ഗിക കുറ്റകൃ​ത്യ ഉപദേ​ഷ്ടാ​വായ റേയ്‌ വയർ, ഒരു പുരോ​ഹി​തൻ അതി​ക്രൂ​ര​മാ​യി ദുരു​പ​യോ​ഗം ചെയ്‌ത രണ്ട്‌ ആൺകു​ട്ടി​ക​ളെ​ക്കു​റിച്ച്‌ സ്റ്റോക്ക്‌ഹോ​മി​ലെ സമ്മേള​ന​ത്തിൽ പറയു​ക​യു​ണ്ടാ​യി. ആ ആൺകു​ട്ടി​ക​ളിൽ ഒരാളി​പ്പോൾ പുരോ​ഹി​ത​ന്മാ​രു​ടെ ബാലദു​രു​പ​യോ​ഗ​ത്തിന്‌ ഇരകളാ​യി​രി​ക്കു​ന്ന​വരെ സഹായി​ക്കു​ന്ന​തിന്‌ ഒരു ഏജൻസി നടത്തുന്നു. മറ്റേ കുട്ടി​യാ​ണെ​ങ്കിൽ, കുട്ടി​കളെ ദുരു​പ​യോ​ഗം ചെയ്യുന്ന ഒരുവ​നാ​യി മാറി​യി​രി​ക്കു​ന്നു.

“തായ്‌ലൻഡിൽ പല തലങ്ങളിൽ, കുട്ടി​കളെ വാണി​ജ്യ​പ​ര​മാ​യി ലൈം​ഗിക ചൂഷണം ചെയ്യു​ന്ന​തി​ന്റെ ഉത്തരവാ​ദി​ത്വ​ത്തിൽ ചിലതരം ബുദ്ധമത ആചാര​ങ്ങൾക്ക്‌ ഒരു പങ്കുണ്ട്‌. തായ്‌ലൻഡി​ലെ ചില പ്രാ​ദേ​ശിക ഗ്രാമ​ങ്ങ​ളിൽ വേശ്യാ​വൃ​ത്തി​ക്കു നിർബ​ന്ധി​ക്ക​പ്പെട്ട കുട്ടികൾ സമൂഹ​ത്തി​നു തിരിച്ചു നൽകുന്ന പണത്തിൽനിന്ന്‌ ചില​പ്പോൾ സന്ന്യാ​സി​മാർ പ്രയോ​ജനം നേടി​യി​രി​ക്കു​ന്നു” എന്ന്‌ തായ്‌ലൻഡിൽനി​ന്നുള്ള ഒരു ബുദ്ധമത പണ്ഡിത​നായ മിഡാ​നാൻഡൂ ബൈക്കു റിപ്പോർട്ടു ചെയ്യു​ക​യു​ണ്ടാ​യി.

എന്തു ചെയ്യാൻ കഴിയും?

തങ്ങളുടെ പെരു​മാ​റ്റത്തെ ചൂഷകർ ന്യായീ​ക​രി​ക്കു​ന്നത്‌ നീതിക്കു നിരക്കാ​ത്ത​താ​ണെന്നു വ്യക്തമാ​ക്കാൻ യു​ണൈ​റ്റഡ്‌ കിങ്‌ഡ​ത്തിൽ ലെയ്‌സെസ്റ്റർ യൂണി​വേ​ഴ്‌സി​റ്റി​യി​ലെ ഡോ. ജൂലിയ ഒ’കൊണൽ ഡേവി​ഡ്‌സൺ ആ സമ്മേള​നത്തെ ആഹ്വാനം ചെയ്യു​ക​യു​ണ്ടാ​യി. ഇതി​നോ​ട​കം​തന്നെ കുട്ടി കൊള്ള​രു​താ​ത്ത​വ​നാണ്‌ എന്നു വാദി​ച്ചു​കൊണ്ട്‌, ദുരു​പ​യോ​ഗം ചെയ്യു​ന്നവർ മിക്ക​പ്പോ​ഴും കുട്ടി​യു​ടെ ലൈം​ഗിക ദുർന്ന​ട​ത്ത​യി​ലേ​ക്കും അധാർമി​ക​ത​യി​ലേ​ക്കും വിരൽ ചൂണ്ടുന്നു. തങ്ങളുടെ പ്രവൃ​ത്തി​ക​ളാൽ കുട്ടിക്കു ദോഷ​മൊ​ന്നും വരുക​യില്ല, മറിച്ച്‌ പ്രയോ​ജ​നമേ ഉണ്ടാകു​ക​യു​ള്ളൂ എന്ന്‌ വികല​വും വ്യാജ​വു​മായ വിധത്തിൽ മറ്റു ചില ചൂഷകർ അവകാ​ശ​പ്പെ​ടു​ന്നു.

സ്‌കൂൾ പാഠ്യ​പ​ദ്ധ​തി​യി​ലെ വിദ്യാ​ഭ്യാ​സ​ത്തി​ലൂ​ടെ ഇതി​നെ​തി​രെ പോരാ​ട​ണ​മെന്ന്‌ ലൈം​ഗിക വിനോ​ദ​സ​ഞ്ചാ​രം കൈകാ​ര്യം ചെയ്യുന്ന ഒരു സംഘം ശുപാർശ ചെയ്യു​ക​യു​ണ്ടാ​യി. മാത്രമല്ല, കുട്ടി​കളെ ലൈം​ഗിക ചൂഷണം ചെയ്യു​ന്ന​തി​നെ​തി​രെ​യുള്ള വിവരങ്ങൾ യാത്ര​യി​ലു​ട​നീ​ളം യാത്രി​കർക്കു ലഭിച്ചി​രി​ക്കണം—യാത്ര പുറ​പ്പെ​ടു​ന്ന​തി​നു മുമ്പും യാത്രാ​വേ​ള​യി​ലും ഉദ്ദിഷ്ട സ്ഥലത്ത്‌ എത്തി​ച്ചേർന്ന​ശേ​ഷ​വും.

പുതിയ വാർത്താ​വി​നി​മയ സാങ്കേ​തി​ക​വി​ദ്യ​ക​ളു​ടെ കാര്യ​ത്തിൽ, കുട്ടി​കളെ ചൂഷണം ചെയ്യുന്ന വിവരങ്ങൾ നീക്കം ചെയ്യു​ന്ന​തി​നുള്ള മാർഗ​നിർദേ​ശങ്ങൾ രാഷ്‌ട്ര​ങ്ങൾക്കു നൽകണ​മെന്ന്‌ ഒരു സംഘം നിർദേ​ശി​ക്കു​ക​യു​ണ്ടാ​യി. ഈ മേഖല​യി​ലുള്ള പ്രവർത്ത​നത്തെ ഏകോ​പി​പ്പി​ക്കാൻ ഒരൊറ്റ അന്താരാ​ഷ്‌ട്ര ഏജൻസി സ്ഥാപി​ക്കുക എന്ന കാര്യ​ത്തെ​ക്കു​റി​ച്ചു പരിചി​ന്തി​ക്കു​ക​യു​ണ്ടാ​യി. കമ്പ്യൂട്ടർ നിർമിത ബാല അശ്ലീല​വും ബാല അശ്ലീലം കൈവശം വെക്കു​ന്ന​തും പൊതു​വേ, നിയമം അനുശാ​സി​ക്കുന്ന ശിക്ഷ ലഭിക്കുന്ന കുറ്റകൃ​ത്യ​മാ​യി എല്ലാ രാജ്യ​ങ്ങ​ളി​ലും കണക്കാ​ക്ക​ണ​മെന്നു മറ്റൊരു സംഘം ശുപാർശ ചെയ്‌തു.

മാതാ​പി​താ​ക്കൾക്ക്‌ എന്തു ചെയ്യാൻ സാധി​ക്കും? തങ്ങളുടെ കുട്ടി​കളെ സംരക്ഷി​ക്കു​ന്ന​തി​ന്റെ ഉത്തരവാ​ദി​ത്വം മാതാ​പി​താ​ക്കൾ ഏറ്റെടു​ക്ക​ണ​മെന്ന്‌ മാധ്യ​മ​ങ്ങ​ളു​ടെ പങ്കി​നെ​ക്കു​റി​ച്ചു പ്രതി​പാ​ദി​ക്കുന്ന ഒരു സംഘം നിർദേ​ശി​ക്കു​ക​യു​ണ്ടാ​യി. അതിങ്ങനെ പ്രസ്‌താ​വി​ച്ചു: “മാധ്യ​മങ്ങൾ ഉപയോ​ഗ​പ്പെ​ടു​ത്തു​ന്ന​വ​രാ​യി കുട്ടികൾ വളർന്നു​വ​രവെ മാതാ​പി​താ​ക്കൾ അവർക്കു മാർഗ​നിർദേശം നൽകു​ക​യും വിവര​ങ്ങ​ളു​ടെ ഉറവി​ട​ത്തി​ന്റെ പശ്ചാത്ത​ല​വും വിശദീ​ക​ര​ണ​വും നാനാ​ത്വ​വും പകർന്നു​കൊ​ടു​ക്കു​ക​യും വേണം. ഇതിന്റെ ലക്ഷ്യം മാധ്യ​മ​ങ്ങ​ളു​ടെ സ്വാധീ​നത്തെ സമനി​ല​യിൽ നിർത്തു​ക​യും ഗ്രാഹ്യ​ത്തോ​ടെ വളർന്നു​വ​രാൻ കുട്ടിയെ സഹായി​ക്കു​ക​യു​മാണ്‌.”

ആ സമ്മേള​ന​ത്തെ​ക്കു​റി​ച്ചു റിപ്പോർട്ടു ചെയ്‌ത ഒരു സ്വീഡിഷ്‌ ടിവി പരിപാ​ടി, മാതാ​പി​താ​ക്കൾ തങ്ങളുടെ കുട്ടി​ക​ളു​ടെ​മേൽ നല്ല രീതി​യിൽ മേൽനോ​ട്ടം വഹി​ക്കേ​ണ്ട​തി​ന്റെ​യും അപകടങ്ങൾ സംബന്ധി​ച്ചു ജാഗ്രത പുലർത്തേ​ണ്ട​തി​ന്റെ​യും ആവശ്യം ഊന്നി​പ്പ​റഞ്ഞു. എങ്കിലും, അത്‌ ഇങ്ങനെ ബുദ്ധ്യു​പ​ദേ​ശി​ച്ചു: “കേവലം ‘വൃത്തി​കെട്ട കിഴവൻമാ​രെ’ക്കുറിച്ച്‌ കുട്ടി​കൾക്കു മുന്നറി​യി​പ്പു കൊടു​ത്താൽ പോരാ. കാരണം, . . . വയസ്സന്മാ​രും അലസരു​മായ പുരു​ഷ​ന്മാ​രെ മാത്രം സൂക്ഷി​ച്ചാൽ മതി എന്നു കുട്ടികൾ ചിന്തി​ക്കും. അത്തരം കുറ്റകൃ​ത്യം ചെയ്യുന്ന ഒരു വ്യക്തി യൂണി​ഫോ​മോ ഭംഗി​യുള്ള സൂട്ടോ ധരി​ച്ചേ​ക്കാം. അതു​കൊണ്ട്‌, അവരിൽ അസാധാ​ര​ണ​മായ താത്‌പ​ര്യ​മെ​ടു​ക്കുന്ന അപരി​ചി​തർക്കെ​തി​രെ മുന്നറി​യി​പ്പു കൊടു​ക്കുക.” തങ്ങൾക്ക്‌ അറിയാ​വു​ന്നവർ ഉൾപ്പെടെ, കുട്ടി​കൾക്കു​നേരേ അനുചി​ത​മായ മുന്നേ​റ്റങ്ങൾ നടത്തുന്ന ഏതു വ്യക്തി​യെ​ക്കു​റി​ച്ചും കുട്ടി​കൾക്കു മുന്നറി​യി​പ്പു കൊടു​ക്കേ​ണ്ട​താണ്‌—ഒപ്പംതന്നെ അത്തരം കാര്യങ്ങൾ സംബന്ധിച്ച്‌ അധികാ​രി​കൾക്ക്‌ അറിവു കൊടു​ക്കാ​നും അവരെ പ്രോ​ത്സാ​ഹി​പ്പി​ക്കുക.

ഒരേ​യൊ​രു പരിഹാ​രം

കുട്ടി​ക​ളോ​ടുള്ള ലൈം​ഗിക ചൂഷണ​ത്തി​ന്റെ കാരണ​ങ്ങളെ എങ്ങനെ മറിക​ട​ക്കാം എന്നു വ്യക്തമാ​ക്കുന്ന കാര്യ​ത്തിൽ സ്റ്റോക്ക്‌ഹോം സമ്മേളനം പരാജ​യ​പ്പെട്ടു. ആ കാരണ​ങ്ങ​ളിൽ പിൻവ​രുന്ന കാര്യങ്ങൾ ഉൾപ്പെ​ടു​ന്നു: എല്ലായി​ട​ത്തും അതി​വേ​ഗ​ത്തിൽ സംഭവി​ച്ചു​കൊ​ണ്ടി​രി​ക്കുന്ന മൂല്യ​ത്ത​കർച്ച; സ്വാർഥ​ത​യു​ടെ​യും ഭൗതിക കാര്യ​ങ്ങ​ളോ​ടുള്ള തൃഷ്‌ണ​യു​ടെ​യും വർധനവ്‌; ആളുകളെ അനീതി​യിൽനി​ന്നു സംരക്ഷി​ക്കാ​നു​ദ്ദേ​ശി​ച്ചുള്ള നിയമ​ങ്ങ​ളോ​ടുള്ള വർധി​ച്ചു​വ​രുന്ന അനാദ​രവ്‌; മറ്റുള്ള​വ​രു​ടെ ക്ഷേമം, അന്തസ്സ്‌, ജീവൻ എന്നിവ​യോ​ടുള്ള ആദരവി​ല്ലായ്‌മ; കുടും​ബ​ക്ര​മീ​ക​ര​ണ​ത്തി​ന്റെ ദ്രുത​ഗ​തി​യി​ലുള്ള തകർച്ച; ജനപ്പെ​രു​പ്പം, തൊഴി​ലി​ല്ലായ്‌മ, നഗരവ​ത്‌ക​രണം, കുടി​യേറ്റം എന്നിവ മൂലമു​ണ്ടാ​കുന്ന വ്യാപ​ക​മായ ദാരി​ദ്ര്യം; വിദേ​ശി​കൾക്കും അഭയാർഥി​കൾക്കു​മെ​തി​രെ വർധി​ച്ചു​വ​രുന്ന വർഗീയത; മയക്കു​മ​രു​ന്നു​കൾ ഉത്‌പാ​ദി​പ്പി​ക്കു​ന്ന​തി​ലും കടത്തി​ക്കൊ​ണ്ടു​പോ​കു​ന്ന​തി​ലു​മുള്ള നിരന്തര വർധനവ്‌; വികല​മായ മതവീ​ക്ഷ​ണങ്ങൾ, ആചാരങ്ങൾ, പാരമ്പ​ര്യ​ങ്ങൾ തുടങ്ങി​യവ.

കുട്ടി​ക​ളെ ലൈം​ഗി​ക​മാ​യി ചൂഷണം ചെയ്യു​ന്നത്‌ ഞെട്ടി​ക്കുന്ന ഒരു സംഗതി​യാ​ണെ​ങ്കി​ലും, അവധാ​ന​പൂർവം ബൈബിൾ വായി​ക്കു​ന്ന​വർക്ക്‌ അത്‌ അതിശ​യമല്ല. എന്തു​കൊണ്ട്‌? കാരണം, ബൈബിൾ പറയുന്ന “അന്ത്യകാല”ത്താണു നാം ജീവി​ക്കു​ന്നത്‌, ദൈവ​വ​ചനം പറയു​ന്ന​ത​നു​സ​രിച്ച്‌ “ദുർഘ​ട​സ​മ​യങ്ങൾ” ഇപ്പോ​ഴുണ്ട്‌. (2 തിമൊ​ഥെ​യൊസ്‌ 3:1-5, 13) അതു​കൊണ്ട്‌, ധാർമിക നിലവാ​രങ്ങൾ പൂർവാ​ധി​കം അധഃപ​തി​ച്ചു​പോ​യി​രി​ക്കു​ന്ന​തിൽ എന്തെങ്കി​ലും അതിശ​യി​ക്കാ​നു​ണ്ടോ?

എന്നിരു​ന്നാ​ലും, ലോക​ത്തി​ന്റെ വൻ പ്രശ്‌ന​ങ്ങൾക്കുള്ള ഏക പരിഹാ​രം ബൈബിൾ എടുത്തു​കാ​ണി​ക്കു​ന്നു—സർവശ​ക്ത​നായ ദൈവം നടത്തുന്ന സമൂല ശുദ്ധീ​ക​രണം. പെട്ടെ​ന്നു​തന്നെ അവൻ തന്റെ തത്ത്വങ്ങ​ളും നിയമ​ങ്ങ​ളും അനുസ​രി​ച്ചു ജീവി​ക്കാ​ത്ത​വരെ തന്റെ സർവശ​ക്തി​യു​പ​യോ​ഗി​ച്ചു ഭൂമി​യിൽനി​ന്നു നീക്കം ചെയ്യും: “നേരു​ള്ളവർ ദേശത്തു വസിക്കും; നിഷ്‌ക​ള​ങ്ക​ന്മാർ അതിൽ ശേഷി​ച്ചി​രി​ക്കും. എന്നാൽ ദുഷ്ടന്മാർ ദേശത്തു​നി​ന്നു ഛേദി​ക്ക​പ്പെ​ടും; ദ്രോ​ഹി​കൾ അതിൽനി​ന്നു നിർമ്മൂ​ല​മാ​കും.”—സദൃശ​വാ​ക്യ​ങ്ങൾ 2:21, 22; 2 തെസ്സ​ലൊ​നീ​ക്യർ 1:6-9.

കുട്ടി​ക​ളെ വേശ്യ​മാ​രാ​ക്കുന്ന എല്ലാവ​രും അവരെ ദുരു​പ​യോ​ഗം ചെയ്യുന്ന ആളുക​ളും “ഛേദി​ക്ക​പ്പെടു”ന്നവരിൽ ഉൾപ്പെ​ടും. ദൈവ​വ​ചനം ഇങ്ങനെ പ്രസ്‌താ​വി​ക്കു​ന്നു: “ദുർന്ന​ട​പ്പു​കാർ . . . വ്യഭി​ചാ​രി​കൾ . . . പുരു​ഷ​കാ​മി​കൾ [ബാലകാ​മി​കൾ] . . . എന്നിവർ ദൈവ​രാ​ജ്യം അവകാ​ശ​മാ​ക്കു​ക​യില്ല.” (1 കൊരി​ന്ത്യർ 6:9, 10) “അറെക്ക​പ്പെ​ട്ടവർ . . . ദുർന്ന​ട​പ്പു​കാർ” തുടങ്ങി​യവർ “രണ്ടാമത്തെ മരണ”ത്തിന്‌—നിത്യ നാശത്തിന്‌—ഏൽപ്പി​ക്ക​പ്പെ​ടു​മെന്ന്‌ അതു കൂട്ടി​ച്ചേർക്കു​ന്നു.—വെളി​പ്പാ​ടു 21:8.

ദൈവം ഭൂമിയെ ശുദ്ധീ​ക​രിച്ച്‌ തികച്ചും പുതി​യ​തും നീതി​യു​ള്ള​തു​മായ ഒരു വ്യവസ്ഥി​തി, ‘പുതിയ ആകാശ​വും പുതിയ ഭൂമി​യും,’ ആനയി​ക്കും. (2 പത്രൊസ്‌ 3:13) അപ്പോൾ, ദൈവം സൃഷ്ടി​ക്കുന്ന ആ പുതിയ ലോക​ത്തിൽ, ദുഷിച്ച, വികട​രായ ആളുകൾ മേലാൽ നിർദോ​ഷി​കളെ മുത​ലെ​ടു​ക്കു​ക​യില്ല. ആ നിർദോ​ഷി​കൾ വീണ്ടും ബലിയാ​ടു​ക​ളാ​കു​മെന്ന ഭയവു​മു​ണ്ടാ​യി​രി​ക്കു​ക​യില്ല. കാരണം, “ആരും അവരെ ഭയപ്പെ​ടു​ത്തു​ക​യില്ല.”—മീഖാ 4:4.

[12-ാം പേജിലെ ആകർഷ​ക​വാ​ക്യം]

“അതിനി​ഷ്‌ഠു​ര​വും കുത്സി​ത​വു​മാ​യ​തരം കുറ്റകൃ​ത്യം.”—സ്വീഡ​നി​ലെ പ്രധാ​ന​മ​ന്ത്രി

[13-ാം പേജിലെ ആകർഷ​ക​വാ​ക്യം]

“ഓരോ വാരത്തി​ലും ഒരു കോടി​ക്കും 1.2 കോടി​ക്കും ഇടയിൽ പുരു​ഷ​ന്മാർ ചെറു​പ്പ​ക്കാ​രി​ക​ളായ വേശ്യ​കളെ സന്ദർശി​ക്കു​ന്നു.”—ദി ഇക്കണോ​മിസ്റ്റ്‌, ലണ്ടൻ

[14-ാം പേജിലെ ആകർഷ​ക​വാ​ക്യം]

വികസ്വര രാജ്യ​ങ്ങ​ളിൽ കുട്ടി​കളെ ചൂഷണം ചെയ്യു​ന്ന​തി​ന്റെ ഒരു മുഖ്യ കാരണ​മാണ്‌ ലൈം​ഗിക വിനോ​ദ​സ​ഞ്ചാ​രം

[13-ാം പേജിലെ ചതുരം]

ലൈംഗിക വിനോ​ദ​സ​ഞ്ചാ​രം—എന്തു​കൊണ്ട്‌?

(വിനോ​ദ​സ​ഞ്ചാ​രി​കൾ കുട്ടി​ക​ളു​മാ​യി ലൈം​ഗി​ക​ബ​ന്ധ​ത്തിൽ ഏർപ്പെ​ടു​ന്ന​തി​ന്റെ ചില കാരണങ്ങൾ)

(1) താൻ ആരാ​ണെന്ന്‌ അറിയി​ല്ലെ​ന്നുള്ള സംഗതി സ്വന്തരാ​ജ്യ​ത്തെ സാമൂ​ഹിക വിലക്കു​ക​ളിൽനിന്ന്‌ അദ്ദേഹത്തെ മുക്തനാ​ക്കു​ന്നു

(2) പ്രാ​ദേ​ശിക ഭാഷ നന്നായി അല്ലെങ്കിൽ ഒട്ടും​തന്നെ അറിയി​ല്ലാ​ത്ത​തു​കൊണ്ട്‌, ഒരു കുട്ടി​യു​മാ​യി ലൈം​ഗി​ക​ബ​ന്ധ​ത്തിൽ ഏർപ്പെ​ടു​ന്ന​തി​നു പണം നൽകി​യാൽ അത്‌ അംഗീ​ക​രി​ക്ക​പ്പെ​ടു​മെ​ന്നോ അവരെ ദാരി​ദ്ര്യ​ത്തിൽനി​ന്നു മുക്തമാ​ക്കാ​നുള്ള ഒരു വഴിയാ​ണെ​ന്നോ വിശ്വ​സി​ക്കാൻ വിനോ​ദ​സ​ഞ്ചാ​രി​കൾ എളുപ്പം വഴി​തെ​റ്റി​ക്ക​പ്പെ​ടാം

(3) വർഗീയ മനോ​ഭാ​വങ്ങൾ, തങ്ങൾ താണവ​രാ​യി കണക്കാ​ക്കു​ന്ന​വരെ ചൂഷണം ചെയ്യാൻ സന്ദർശ​കർക്കു പ്രോ​ത്സാ​ഹനം നൽകുന്നു

(4) വികസ്വര രാജ്യ​ങ്ങ​ളിൽ ലൈം​ഗിക സേവനങ്ങൾ കുറഞ്ഞ വിലയ്‌ക്കു ലഭ്യമാ​ണെന്നു കാണു​മ്പോൾ തങ്ങൾ സമ്പന്നരാ​ണെന്നു വിനോ​ദ​സ​ഞ്ചാ​രി​കൾക്കു തോന്നു​ന്നു

[15-ാം പേജിലെ ചതുരം]

ഈ പ്രശ്‌ന​ത്തി​ന്റെ ആഗോള വ്യാപ്‌തി

(പല ഗവൺമെൻറ്‌ അധികാ​രി​ക​ളു​ടെ​യും മറ്റു സംഘട​ന​ക​ളു​ടെ​യും കണക്കു​ക​ളാ​ണു പിൻവ​രു​ന്നവ)

ബ്രസീൽ: ചുരു​ങ്ങി​യത്‌ 2,50,000 ബാല​വേ​ശ്യ​ക​ളുണ്ട്‌

കാനഡ: സംഘടിത കൂട്ടി​ക്കൊ​ടു​പ്പു വലയങ്ങൾ ആയിര​ക്ക​ണ​ക്കി​നു കൗമാ​ര​പ്രാ​യ​ക്കാ​രി​കളെ വേശ്യാ​വൃ​ത്തി​യിൽ ഏർപ്പെ​ടു​ത്തു​ന്നു

ചൈന: 2,00,000-ത്തിനും 5,00,000-ത്തിനും ഇടയ്‌ക്കു കുട്ടികൾ വേശ്യാ​വൃ​ത്തി​യിൽ ഏർപ്പെ​ടു​ന്നു. സമീപ വർഷങ്ങ​ളിൽ ഏതാണ്ട്‌ 5,000-ത്തോളം ചൈനീസ്‌ പെൺകു​ട്ടി​കളെ അതിർത്തി​ക്ക​പ്പു​റ​ത്തേക്ക്‌ ആകർഷിച്ച്‌ വേശ്യ​ക​ളാ​യി മ്യാൻമാ​റി​ലേക്കു വിറ്റി​ട്ടുണ്ട്‌

കൊളം​ബിയ: ബോ​ഗോ​ട്ടാ തെരു​വു​ക​ളിൽ ലൈം​ഗിക ചൂഷണ​ത്തി​നു വിധേ​യ​രാ​കുന്ന കുട്ടി​ക​ളു​ടെ സംഖ്യ കഴിഞ്ഞ ഏഴു വർഷം​കൊണ്ട്‌ അഞ്ചിര​ട്ടി​യാ​യി വർധി​ച്ചി​രി​ക്കു​ന്നു

പൂർവ യൂറോപ്പ്‌: 1,00,000 തെരുവു കുട്ടികൾ. പലരെ​യും പശ്ചിമ യൂറോ​പ്പി​ലെ വേശ്യാ​ല​യ​ങ്ങ​ളി​ലേക്ക്‌ അയയ്‌ക്കു​ന്നു

ഇന്ത്യ: ലൈം​ഗിക വ്യവസാ​യ​ത്തിൽ 4,00,000 കുട്ടികൾ ഉൾപ്പെ​ട്ടി​രി​ക്കു​ന്നു

മൊസാ​മ്പിക്ക്‌: കുട്ടി​കളെ ലൈം​ഗി​ക​മാ​യി ചൂഷണം ചെയ്‌ത​തി​ന്റെ പേരിൽ സഹായ ഏജൻസി​കൾ യുഎൻ സമാധാ​ന​പാ​ലന സേനകളെ കുറ്റ​പ്പെ​ടു​ത്തി

മ്യാൻമാർ: ഓരോ വർഷവും 10,000 പെൺകു​ട്ടി​ക​ളെ​യും സ്‌ത്രീ​ക​ളെ​യും തായ്‌ലൻഡി​ലെ വേശ്യാ​ല​യ​ങ്ങ​ളി​ലേക്ക്‌ കയറ്റി അയയ്‌ക്കു​ന്നു

ഫിലി​പ്പീൻസ്‌: 40,000 കുട്ടികൾ ഉൾപ്പെ​ട്ടി​രി​ക്കു​ന്നു

ശ്രീലങ്ക: 6-നും 14-നും ഇടയിൽ പ്രായ​മുള്ള 10,000 കുട്ടികൾ വേശ്യാ​ല​യ​ങ്ങ​ളിൽ അടിമ​ക​ളാണ്‌. 10-നും 18-നും ഇടയിൽ പ്രായ​മുള്ള 5,000 കുട്ടികൾ വിനോ​ദ​സ​ഞ്ചാര കേന്ദ്ര​ങ്ങ​ളിൽ സ്വത​ന്ത്ര​മാ​യി പണി​യെ​ടു​ക്കു​ന്നു

തയ്‌വാൻ: 30,000 കുട്ടികൾ ഉൾപ്പെ​ട്ടി​രി​ക്കു​ന്നു

തായ്‌ലൻഡ്‌: 3,00,000 കുട്ടികൾ ഉൾപ്പെ​ട്ടി​രി​ക്കു​ന്നു

ഐക്യ​നാ​ടു​കൾ: 1,00,000-ത്തിലധി​കം കുട്ടികൾ ഉൾപ്പെ​ട്ടി​രി​ക്കു​ന്ന​താ​യി ഔദ്യോ​ഗിക വൃത്തങ്ങൾ പറയുന്നു