തേനീച്ച വളർത്തൽ—“തേനൂ​റുന്ന” കഥ

ഗ്രീസിലെ ഉണരുക! ലേഖകൻ

അരു​ണോ​ദയം വാനമാ​കെ മെല്ലെ സുവർണ​ശോഭ വാരി​വി​ത​റു​ന്നു. പുലർകാല മൂടൽമ​ഞ്ഞി​ലും തണുപ്പി​ലും, ഒരു പർവത​ചെ​രി​വി​ന്റെ അടിവാ​ര​ത്തി​ലുള്ള റോഡിൽ ഒരു ചെറിയ ട്രക്ക്‌ സാവധാ​നം ഓരം​ചേർത്തു നിർത്തി. അവ്യക്ത​മായ രണ്ടു രൂപങ്ങൾ പ്രത്യ​ക്ഷ​പ്പെട്ടു. കയ്യുറ​ക​ളും ബൂട്ടു​ക​ളും പരുത്തി​കൊ​ണ്ടുള്ള മേലങ്കി​ക​ളും മുഖം​മൂ​ടി​കൾ ഘടിപ്പിച്ച വീതി​യേ​റിയ വക്കുക​ളുള്ള തൊപ്പി​ക​ളും ധരിച്ചി​രു​ന്നു അവർ. സൂക്ഷ്‌മ​വും എന്നാൽ ഉദ്വേ​ഗ​ഭ​രി​ത​വു​മായ ചലനങ്ങ​ളോ​ടെ, അവർ ബഹുദശം തടി​പ്പെ​ട്ടി​കൾ ട്രക്കിൽ കയറ്റി​വെ​ക്കു​ന്നു. അവർ എളുപ്പ​ത്തിൽ മോഷണം നടത്തി കടന്നു​ക​ള​യാ​നൊ​രു​ങ്ങുന്ന രണ്ടു കള്ളന്മാ​രാ​ണോ? അല്ല, മറിച്ച്‌ തങ്ങളുടെ അമൂല്യ​മായ തേനീ​ച്ച​പ്പ​ടയെ നന്നായി സംരക്ഷി​ക്കുന്ന രണ്ടു തേനീച്ച വളർത്ത​ലു​കാ​രാണ്‌ അവർ—പൂന്തേ​നു​ത്‌പാ​ദി​പ്പി​ക്കുന്ന ചെടി​ക​ളുള്ള മറ്റൊരു സ്ഥലം ലക്ഷ്യമാ​ക്കി പോകാൻ ഒരുങ്ങു​ക​യാ​ണവർ.

ഒരു അനിത​ര​സാ​ധാ​രണ ഷഡ്‌പ​ദ​വു​മാ​യുള്ള തങ്ങളുടെ സഹവർത്തി​ത്വ ബന്ധത്തിൽ അഭിമാ​നം​കൊ​ള്ളുന്ന പ്രത്യേ​ക​തരം ആളുക​ളാ​ണു തേനീച്ച വളർത്ത​ലു​കാർ. തേനും മെഴു​കും ഉത്‌പാ​ദി​പ്പി​ക്കു​ക​യും വ്യത്യ​സ്‌ത​ങ്ങ​ളായ അനേക​തരം വിളക​ളിൽ പരാഗണം നടത്തു​ക​യും ചെയ്യുന്ന, ഒരുപക്ഷേ, ലോക​ത്തി​ലെ ഏറ്റവും സാമ്പത്തിക മൂല്യ​മുള്ള ഷഡ്‌പ​ദ​മാ​യി​രു​ന്നേ​ക്കാ​വുന്ന തേനീച്ച ഒരു വശത്ത്‌. മറുവ​ശത്ത്‌, തേനീ​ച്ച​കളെ വളർത്തു​ന്ന​തി​ലൂ​ടെ ഉപജീ​വ​ന​മാർഗം കണ്ടെത്തു​ക​യും അതേസ​മയം ഈ കൊച്ചു ജീവി​കളെ സ്‌നേ​ഹി​ക്കു​ക​യും, അവരി​ലൊ​രാൾ പറയു​ന്ന​തു​പോ​ലെ, “അവയുടെ പ്രവർത്ത​ന​ങ്ങ​ളെ​ക്കു​റി​ച്ചു മനസ്സി​ലാ​ക്കു​ക​യും” ചെയ്യുന്ന ആളുകൾ.

“ദൈനം​ദിന അത്ഭുത​ങ്ങ​ളു​ടെ” പരിപാ​ല​കൻ

ഒരു തേനീച്ച വളർത്ത​ലു​കാ​ര​നാ​കുക എളുപ്പ​മാ​ണെന്നു തോന്നി​യേ​ക്കാം: നിറയെ തേനീ​ച്ച​ക്കോ​ള​ണി​ക​ളുള്ള കുറെ കൂടുകൾ സംഘടി​പ്പി​ക്കുക, അവ കൊണ്ടു​പോ​യി പൂന്തേൻ ലഭിക്കുന്ന ഒരു സ്ഥലത്തു സ്ഥാപി​ക്കു​ക​യും ഏതാനും മാസങ്ങൾക്കു​ശേഷം വിള​വെ​ടു​ക്കാൻ മടങ്ങി​ച്ചെ​ല്ലു​ക​യും ചെയ്യുക. എന്നാൽ അത്ര​യൊ​ന്നും പോരാ. വാസ്‌ത​വ​ത്തിൽ ഉൾപ്പെ​ട്ടി​രി​ക്കു​ന്ന​തെ​ന്താ​ണെന്നു മനസ്സി​ലാ​ക്കു​ന്ന​തിന്‌ ഞങ്ങൾ തേനീച്ച വളർത്തൽ തൊഴി​ലാ​യി സ്വീക​രിച്ച ജോണി​നോ​ടും മരീയ​യോ​ടും സംസാ​രി​ച്ചു. അവർ തങ്ങളുടെ പ്രിയ​പ്പെട്ട ജോലി​യെ​പ്പറ്റി സന്തോ​ഷ​പൂർവം ഞങ്ങളോ​ടു പറഞ്ഞു.

“തേനീച്ച വളർത്തൽ ദൈനം​ദിന അത്ഭുത​ങ്ങ​ളു​ടെ ഒരു അനുഭ​വ​മാണ്‌,” ഒരു തുറന്ന തേനീ​ച്ച​ക്കൂ​ടി​ലേക്കു കുനി​ഞ്ഞു​കൊണ്ട്‌ ജോൺ വിശദീ​ക​രി​ക്കു​ന്നു. “തേനീ​ച്ച​യു​ടെ സങ്കീർണ​മാ​യി സംഘടി​ത​മായ സമൂഹ ജീവി​ത​ത്തെ​യും ഉദാത്ത​മായ ആശയവി​നി​മയ വൈദ​ഗ്‌ധ്യ​ത്തെ​യും അനുപ​മ​മായ അധ്വാ​ന​ശീ​ല​ത്തെ​യും കുറിച്ച്‌ ഇപ്പോ​ഴും ഒരാൾക്കും വ്യക്തമാ​യി മനസ്സി​ലാ​ക്കാൻ കഴിഞ്ഞി​ട്ടില്ല.”

പ്രൊ​ഫ​ഷ​ണൽ തേനീച്ച വളർത്ത​ലി​ന്റെ ചരിത്രം പരി​ശോ​ധി​ക്കു​മ്പോൾ, കഴിഞ്ഞ കാലങ്ങ​ളിൽ തേനീച്ച വളർത്ത​ലു​കാർ തേനെ​ടു​ത്തി​രു​ന്നതു മരപ്പൊ​ത്തു​ക​ളി​ലും മറ്റു ദ്വാര​ങ്ങ​ളി​ലു​മുള്ള തേനീ​ച്ച​ക്കോ​ള​ണി​കൾ നശിപ്പി​ച്ചു​കൊ​ണ്ടാ​യി​രു​ന്നു​വെന്നു മനസ്സി​ലാ​ക്കാൻ കഴിയു​മെന്നു ജോൺ പറയുന്നു. എന്നിരു​ന്നാ​ലും, 1851-ൽ ലോ​റെൻസോ ലോ​റെയ്‌ൻ ലാങ്‌സ്‌​റ്റ്രോത്ത്‌ എന്ന ഒരു അമേരി​ക്കൻ തേനീച്ച വളർത്ത​ലു​കാ​രൻ തേനീ​ച്ചകൾ മെഴു​ക​റ​പ്പാ​ളി​കൾക്കി​ട​യിൽ ഏകദേശം ആറു മില്ലി​മീ​റ്റ​റോ​ളം സ്ഥലം വിടുന്നു എന്നു കണ്ടെത്തി. അങ്ങനെ, പാളി​ക​ളാ​യുള്ള അറകളു​ടെ ചട്ടങ്ങൾക്കി​ട​യിൽ സമാന​മാ​യി സ്ഥലം വിട്ടു​കൊണ്ട്‌ മനുഷ്യ​നിർമിത മരക്കൂ​ടു​ക​ളും ഉപയോ​ഗി​ക്കാ​മാ​യി​രു​ന്നു. ചട്ടങ്ങൾ ഓരോ​ന്നാ​യി തേനീ​ച്ച​ക്കൂ​ട്ടിൽ നിന്നു മാറ്റി​ക്കൊണ്ട്‌ തേനും മെഴു​കും ശേഖരി​ക്കുക ഇങ്ങനെ സാധ്യ​മാ​യി.

ജോൺ തുടരു​ന്നു, “തേനീച്ച വളർത്തൽ വിജയ​ക​ര​മാ​ക്കു​ന്ന​തിന്‌ നിങ്ങൾക്കു നിങ്ങളു​ടെ തേനീ​ച്ച​ക്കോ​ള​ണി​ക​ളോ​ടു നല്ല സ്‌നേ​ഹ​ബ​ന്ധ​മു​ണ്ടാ​യി​രി​ക്കണം. നിങ്ങൾ നിങ്ങളു​ടെ തേനീ​ച്ച​കൾക്ക്‌ ഒരു പിതാ​വി​നെ​പ്പോ​ലെ​യാണ്‌. അവ ഇതു തിരി​ച്ച​റിഞ്ഞ്‌ അതിന​നു​സ​രി​ച്ചു പ്രതി​ക​രി​ക്കു​ന്നു​വെന്നു ഞാൻ വിശ്വ​സി​ക്കു​ന്നു. നിങ്ങൾ അവയുടെ ഡോക്ട​റും പരിപാ​ല​ക​നും ശിശി​ര​ത്തി​ലെ ദുഷ്‌കര സമയങ്ങ​ളിൽ അവയുടെ അന്നദാ​താ​വു​മാ​യി​ത്തീ​രു​ന്നു.”

മരീയ കൂട്ടി​ച്ചേർക്കു​ന്നു: “ഒരു നല്ല തേനീച്ച വളർത്ത​ലു​കാ​രന്‌, സാധാ​ര​ണ​ഗ​തി​യിൽ എണ്ണായി​ര​ത്തി​നും എൺപതി​നാ​യി​ര​ത്തി​നും ഇടയ്‌ക്കു തേനീ​ച്ച​ക​ള​ട​ങ്ങിയ ഒരു തേനീ​ച്ച​ക്കൂട്‌ വെറുതെ ഒന്നു കണ്ടാൽത്തന്നെ അതേക്കു​റി​ച്ചു വളരെ​യേറെ കാര്യങ്ങൾ പറയാൻ സാധി​ക്കും. നിങ്ങൾ പരിച​യ​സ​മ്പ​ന്ന​നാ​ണെ​ങ്കിൽ കൂടു തുറക്കു​മ്പോൾ കേൾക്കുന്ന ഇരമ്പലിൽനി​ന്നു മാത്രം ആ കോളണി അഭിവൃ​ദ്ധി​യും ഉത്‌പാ​ദ​ന​ക്ഷ​മ​ത​യും ‘സന്തോഷ’വുമു​ള്ള​താ​ണോ; അതോ പട്ടിണി​യി​ലാ​ണോ; റാണി ഈച്ച ചത്തു​പോ​യതു നിമിത്തം ‘അനാഥ’മായതാ​ണോ; അസുഖ​ക​ര​മായ എന്തെങ്കി​ലും നിമിത്തം അസ്വസ്ഥ​മാ​ണോ തുടങ്ങി അനേകം സംഗതി​കൾ അറിയാൻ സാധി​ക്കും.”

വിജയ​ക​ര​മായ തേനീച്ച വളർത്ത​ലി​ന്റെ സുപ്ര​ധാന ഘടകങ്ങൾ

“ഒരു തേനീച്ച വളർത്ത​ലു​കാ​രൻ തന്റെ തേനീ​ച്ച​ക്കൂ​ടു​കൾ സ്ഥാപി​ക്കേണ്ട സ്ഥലം തിര​ഞ്ഞെ​ടു​ക്കു​ന്ന​തിൽ സൂക്ഷ്‌മത പാലി​ക്കു​ന്നതു നിർണാ​യ​ക​മാണ്‌,” ജോൺ വിശദീ​ക​രി​ക്കു​ന്നു. “തേനീ​ച്ച​കൾക്ക്‌ ആഹാരം തേടാൻ കഴിയുന്ന പൂക്കളുള്ള മേച്ചിൽ സ്ഥലങ്ങൾ കണ്ടെത്താൻ ഞങ്ങൾക്കു വളരെ​യേറെ ശ്രമം ചെലു​ത്തേ​ണ്ട​തുണ്ട്‌.”

“തേനീച്ച വളർത്ത​ലു​കാ​രൻ തന്റെ തേനീ​ച്ച​ക്കോ​ള​ണി​കളെ ജോലി​യിൽ വ്യാപൃ​ത​മാ​ക്കു​ന്ന​തി​നു​വേണ്ടി ഓറഞ്ചി​ന്റെ​യും ബാസ്‌വു​ഡി​ന്റെ​യും പൂക്കളുള്ള സ്ഥലങ്ങള​ന്വേ​ഷി​ച്ചു പോ​യേ​ക്കാം. വേനൽക്കാ​ല​ത്തും ശരത്‌കാ​ല​ത്തും പൈൻ മരങ്ങളും ഫിർ മരങ്ങളും നിറഞ്ഞ ഒരു പ്രദേശം തെളിഞ്ഞ ഇളം ചുവപ്പു നിറമുള്ള, വിപണി​യിൽ നന്നായി ചെലവാ​കുന്ന വിശേ​ഷ​പ്പെ​ട്ട​തരം തേൻ ഉത്‌പാ​ദി​പ്പി​ക്കാൻ സഹായ​ക​മാണ്‌. കാട്ട്‌ ഒടതള​പ്പൂ​ക്കൾ നിറഞ്ഞ വയലേ​ല​ക​ളാണ്‌ മേൽത്തരം തേൻ ഉത്‌പാ​ദി​പ്പി​ക്കു​ന്നത്‌—തേനു​ക​ളു​ടെ രാജാവ്‌ എന്നാണ്‌ തേനീച്ച വളർത്ത​ലു​കാർ അതിനെ വിളി​ക്കു​ന്നത്‌. തേനീ​ച്ചകൾ വെള്ള ക്ലോവ​റിൽനി​ന്നും മധുര​മുള്ള മഞ്ഞ ക്ലോവ​റിൽനി​ന്നും അൽഫാൽഫ​യിൽനി​ന്നു​മെ​ല്ലാം തേനെ​ടു​ക്കു​ന്നു.”

സാമാ​ന്യ​ബോ​ധം ഏറ്റവും അത്യാ​വ​ശ്യ​മാണ്‌. മരീയ വിശദീ​ക​രി​ക്കു​ന്നു: “തേനീ​ച്ച​ക്കൂ​ടു​കൾ ഒരു മലമ്പ്ര​ദേ​ശ​ത്താ​ണു സ്ഥാപി​ക്കു​ന്ന​തെ​ങ്കിൽ അതു മലയുടെ അടിവാ​ര​ത്തിൽ വെക്കു​ന്നതു പ്രയോ​ജ​ന​ക​ര​മാ​യി​രി​ക്കും. അപ്പോൾ തേനീ​ച്ച​കൾക്ക്‌ മലയുടെ മുകളി​ലേക്കു പറന്നു​യർന്നു പൂമരങ്ങൾ സന്ദർശി​ക്കാം. എന്നിട്ട്‌, നിറയെ പൂന്തേൻ ശേഖരിച്ച്‌, താഴെ​യുള്ള കൂട്ടി​ലേക്ക്‌ അനായാ​സം പറന്നി​റ​ങ്ങു​ക​യും ചെയ്യാം. കൂടുകൾ മലഞ്ചെ​രി​വി​നു മുകളിൽ വൃക്ഷങ്ങൾക്കു മീതെ​യാ​ണെ​ങ്കിൽ അതു തേനീ​ച്ച​കളെ തളർത്തി​ക്ക​ള​യു​ക​യും കോള​ണി​ക​ളു​ടെ ഉത്‌പാ​ദ​നത്തെ പ്രതി​കൂ​ല​മാ​യി ബാധി​ക്കു​ക​യും ചെയ്യും.”

“തേനീ​ച്ച​ക്കോ​ള​ണി​യു​ടെ ക്ഷേമത്തി​ലും ഉത്‌പാ​ദ​ന​ത്തി​ലു​മുള്ള റാണി​യു​ടെ സുപ്ര​ധാന പങ്ക്‌ ഓരോ തേനീച്ച വളർത്ത​ലു​കാ​ര​നും നന്നായ​റി​യാം,” നടുക്ക്‌ ഒരു യുവറാ​ണി കൂടു​കൂ​ട്ടി​യി​രി​ക്കുന്ന തേനീ​ച്ച​ക്കൂ​ടി​ന്റെ ചട്ടങ്ങളിൽ ഒന്നു സാവധാ​നം ഉയർത്തി​ക്കൊ​ണ്ടു ജോൺ പറഞ്ഞു. “വളരെ കുറഞ്ഞ അളവിൽമാ​ത്രം കുഞ്ഞു​ങ്ങ​ളും തേനും ഉത്‌പാ​ദി​പ്പി​ക്ക​പ്പെ​ടുന്ന കൂടു​ക​ളിൽ റാണിയെ കൊന്ന്‌ വേറൊ​ന്നി​നെ വെക്കേ​ണ്ട​തുണ്ട്‌. യുവറാ​ണി​മാ​രുള്ള കോള​ണി​ക​ളാണ്‌ ഏറ്റവു​മ​ധി​കം തേനു​ത്‌പാ​ദി​പ്പി​ക്കു​ന്നത്‌. പുതിയ കോള​ണി​കൾ ഉണ്ടാ​ക്കേ​ണ്ട​പ്പോൾ ഞങ്ങൾ, തേനീ​ച്ചകൾ നിറഞ്ഞ ഊനം​ത​ട്ടാത്ത രണ്ടു ഭാഗങ്ങ​ളുള്ള ഒരു കൂടെ​ടുത്ത്‌ മുകളി​ലും താഴത്തു​മുള്ള പെട്ടികൾ തമ്മിൽ വേർതി​രി​ക്കു​ന്നു. ഒരു പകുതി റാണി​യു​ള്ള​താ​യി​രി​ക്കും, മറ്റേ പകുതി​യിൽ ഇണചേരൽ കഴിഞ്ഞ ഒരു റാണിയെ ഞങ്ങൾ വെക്കുന്നു. പൂക്കൾ വിരി​യുന്ന സമയമാ​കു​മ്പോ​ഴേ​ക്കും പുതിയ റാണി മുട്ടയി​ടാൻ തുടങ്ങി​യി​ട്ടു​ണ്ടാ​കും. അങ്ങനെ, വേലക്കാ​രായ തേനീ​ച്ച​ക​ളെ​ക്കൊണ്ട്‌ കൂടു നിറയു​ന്നു.”

ഒരു തേനീച്ച എത്രകാ​ലം ജീവി​ക്കും? വേലക്കാ​രായ തേനീ​ച്ച​ക​ളു​ടെ ആയുസ്സ്‌ അതിന്റെ അധ്വാ​ന​ശീ​ല​വു​മാ​യി ബന്ധപ്പെ​ട്ടി​രി​ക്കു​ന്നു എന്നു പറയ​പ്പെ​ടു​ന്നു. മണിക്കൂ​റിൽ 21 കിലോ​മീ​റ്റർ വേഗത​യിൽ ദിവസം 15 മണിക്കൂ​റോ​ളം പൂക്കൾതോ​റും തീറ്റ​തേടി പറന്നു​ന​ട​ക്കുന്ന വേനൽക്കാ​ല​ങ്ങ​ളിൽ, ഒരു തേനീച്ച വെറും ആറാഴ്‌ച മാത്രമേ ജീവി​ക്കു​ന്നു​ള്ളു. ശിശി​ര​കാ​ലത്ത്‌ തേനീ​ച്ച​കൾക്ക്‌ ശാരീ​രി​ക​മാ​യി അത്ര​യേറെ അധ്വാ​ന​മില്ല. ദിവസം രണ്ടോ മൂന്നോ മണിക്കൂർ മാത്രമേ ജോലി​ചെ​യ്യേ​ണ്ടി​വ​രു​ന്നു​ള്ളൂ. അതു​കൊണ്ട്‌ അവ ഏതാനും മാസങ്ങൾവരെ ജീവി​ച്ചേ​ക്കാം.

വ്യത്യസ്‌ത ഉത്‌പ​ന്ന​ങ്ങൾ

തേനീച്ച വളർത്ത​ലി​നെ​ക്കു​റി​ച്ചു സംസാ​രി​ക്കു​മ്പോൾ മനസ്സിൽ വരുന്ന ആദ്യത്തെ സംഗതി തീർച്ച​യാ​യും തേൻ തന്നെയാണ്‌. ഈ മധുര​മുള്ള കൊഴുത്ത ദ്രാവകം, വേലക്കാ​രി തേനീച്ച പൂന്തേ​നി​നു മാറ്റം വരുത്തി ഉണ്ടാക്കി​യെ​ടു​ക്കു​ന്ന​താണ്‌. വാണി​ജ്യോ​ദ്ദേ​ശ്യ​ത്തിൽ നിർമിച്ച ഒരു സാധാരണ കൂടിന്‌ വർഷത്തിൽ 29 കിലോ​ഗ്രാം തേനു​ത്‌പാ​ദി​പ്പി​ക്കാൻ സാധി​ക്കും. തേനീ​ച്ച​യു​ടെ പ്രവർത്ത​ന​ഫ​ല​മാ​യി ഉളവാ​കുന്ന മറ്റൊരു ഉപോ​ത്‌പ​ന്ന​മാണ്‌ തേന്മെ​ഴുക്‌. ഒരു തേനറ ഏകദേശം അഞ്ചുമു​തൽ ആറുവരെ വർഷങ്ങൾ ഉപയോ​ഗ​പ്ര​ദ​മാണ്‌. വ്യത്യസ്‌ത സൂക്ഷ്‌മാ​ണു​ക്ക​ളും പരാദ​ങ്ങ​ളും അതിൽ വാസം​പി​ടി​ക്കു​ന്നതു നിമിത്തം അത്രയും കാലം​കൊണ്ട്‌ അതിന്റെ നിറം​മ​ങ്ങി​യി​രി​ക്കു​മെ​ന്ന​തി​നാൽ അതു മാറ്റി വേറൊ​ന്നു വെക്കേ​ണ്ടി​വ​രു​ന്നു. കളയുന്ന തേനീ​ച്ച​ക്കൂ​ടു​കളെ തേന്മെ​ഴു​കു വേർതി​രി​ക്കുന്ന പ്രക്രി​യ​യ്‌ക്കു വിധേ​യ​മാ​ക്കു​ന്നു. ഓരോ ടൺ തേനെ​ടു​ക്കു​മ്പോ​ഴും ശരാശരി 9 മുതൽ 18 വരെ കിലോ​ഗ്രാം തേന്മെ​ഴു​കു ലഭിക്കു​ന്നു.

പൂമ്പൊ​ടി​യെ—റാണി​യു​ടെ​യും വേലക്കാ​രു​ടെ​യും മടിയ​ന്മാ​രു​ടെ​യും വളർച്ച​യ്‌ക്കാ​വ​ശ്യ​മായ മാംസ്യ​ങ്ങൾ, ജീവകങ്ങൾ, ധാതുക്കൾ, കൊഴുപ്പ്‌ എന്നിവ​യു​ടെ മുഖ്യ ഉറവിടം അതാണ്‌—നിരവധി രോഗ​ങ്ങൾക്കുള്ള വളരെ നല്ല പ്രകൃ​തി​ദ​ത്ത​മായ മരുന്നാ​യി ചിലയാ​ളു​കൾ വാഴ്‌ത്തു​ന്നു. ഒരു തേനീ​ച്ച​ക്കൂ​ടിന്‌ വർഷത്തിൽ ഏകദേശം അഞ്ചു കിലോ​ഗ്രാം പൂമ്പൊ​ടി പ്രദാനം ചെയ്യാൻ സാധി​ക്കും. തേനീ​ച്ചകൾ തങ്ങളുടെ കൂട്‌ അടയ്‌ക്കു​ന്ന​തി​നും നീക്കം​ചെ​യ്യാ​നാ​കാ​ത്ത​വണ്ണം വലുപ്പ​മുള്ള അനാവശ്യ സാധനങ്ങൾ പൊതി​യു​ന്ന​തി​നും ഉപയോ​ഗി​ക്കുന്ന ഒരു വസ്‌തു​വാണ്‌ പ്രോ​പ​ലിസ്‌.

നമ്മൾ കഴിക്കുന്ന ആഹാര​ത്തി​ന്റെ നാലി​ലൊ​രു ഭാഗത്തി​ന്റെ ഉത്‌പാ​ദനം, പരാഗണം നടത്താ​നുള്ള തേനീ​ച്ച​യു​ടെ കഴിവു​മാ​യി നേരി​ട്ടോ അല്ലാ​തെ​യോ, ബന്ധപ്പെ​ട്ടി​രി​ക്കു​ന്നു. ആപ്പിൾ, ബദാം, തണ്ണിമത്തങ്ങ, പ്ലം, പിയർ, വെള്ളരിക്ക, വ്യത്യസ്‌ത തരം ബെറികൾ തുടങ്ങി​യ​വ​യെ​ല്ലാം പരാഗ​ണ​ത്തി​നു​വേണ്ടി തേനീ​ച്ച​കളെ ആശ്രയി​ക്കു​ന്നു. കാരറ്റ്‌, ഉള്ളി മുതലാ​യ​വ​തൊട്ട്‌ സൂര്യ​കാ​ന്തി​വ​രെ​യുള്ള വ്യത്യസ്‌ത വിത്തു സസ്യങ്ങ​ളും അങ്ങനെ​തന്നെ. കാലി​ത്തീ​റ്റ​യ്‌ക്കു വേണ്ടുന്ന അൽഫാൽഫ​യി​ലും പരാഗണം നടത്തു​ന്നതു തേനീ​ച്ച​ക​ളാ​ണെ​ന്ന​തി​നാൽ മാംസ​ത്തി​ന്റെ​യും പാലു​ത്‌പ​ന്ന​ങ്ങ​ളു​ടെ​യും​പോ​ലും ഉത്‌പാ​ദ​ന​ത്തിൽ തേനീ​ച്ച​യ്‌ക്കു പങ്കുണ്ട്‌.

“സഹജ ജ്ഞാനമു​ള്ളവ”

“തേനീച്ച വളർത്ത​ലു​കാർ മിക്കവ​രും ദൈവ​വി​ശ്വാ​സി​ക​ളാ​യി​രി​ക്കും എന്നാണ്‌ എനിക്കു തോന്നു​ന്നത്‌,” മരീയ പറയുന്നു. തേനീ​ച്ച​യു​ടെ ദുർഗ്ര​ഹ​മായ സാമൂ​ഹിക ഘടന​യെ​യും അവയുടെ സങ്കീർണ​മായ സമൂഹ ജീവി​ത​ത്തി​ന്റെ വിസ്‌മ​യ​മു​ള​വാ​ക്കുന്ന വികസ​ന​ത്തെ​യും ഗതിനിർണ​യ​ത്തി​നും ആശയവി​നി​മ​യ​ത്തി​നു​മുള്ള അവയുടെ അവിശ്വ​സ​നീ​യ​മായ പ്രാപ്‌തി​ക​ളെ​യും കുറിച്ചു വിശദീ​ക​രി​ക്കാൻ നാം അപ്രാ​പ്‌ത​രാ​ണെ​ന്നും അവർ ഓർമി​പ്പി​ച്ചു. തേനീ​ച്ച​ക​ളെ​ക്കു​റി​ച്ചു പഠിക്കു​ക​യും അവയെ സംരക്ഷി​ക്കു​ക​യും ചെയ്യുന്ന ഒട്ടുമിക്ക ആളുക​ളും ഇതി​നെ​ല്ലാം കാരണം അവയുടെ “സഹജ ജ്ഞാന”മാണെന്നു സമ്മതിച്ചു പറയുന്നു. നമ്മുടെ മഹാ​സ്ര​ഷ്ടാ​വായ യഹോ​വ​യാം ദൈവം ഉദാര​മാ​യി അവയ്‌ക്കു നൽകി​യ​താണ്‌ ഈ സഹജജ്ഞാ​നം.—സദൃശ്യ​വാ​ക്യ​ങ്ങൾ 30:24 താരത​മ്യം ചെയ്യുക.

[26-ാം പേജിലെ ചതുരം/ചിത്രങ്ങൾ]

പൂവിൽനിന്നു തീൻമേ​ശ​യി​ലേക്ക്‌

1 തേൻവേ​ട്ട​ക്കാ​രായ തേനീ​ച്ചകൾ പൂവ്‌ സന്ദർശിച്ച്‌ പൂന്തേൻ ശേഖരി​ക്കു​ന്നു

തേനീ​ച്ചകൾ, പൂക്കൾ സന്ദർശി​ച്ചു​കൊണ്ട്‌ തങ്ങളുടെ തേൻസ​ഞ്ചി​യിൽ പൂന്തേൻ ശേഖരി​ക്കു​ന്നു. ഈ സഞ്ചി അവയുടെ വികസി​ത​മായ അന്നനാ​ള​മാണ്‌. ഈ സഞ്ചി നിറയ്‌ക്കു​ന്ന​തി​നു​വേണ്ടി, തേനീ​ച്ച​യ്‌ക്ക്‌ 1,000 മുതൽ 1,500 വരെ പുഷ്‌പങ്ങൾ സന്ദർശി​ക്കേ​ണ്ടി​വ​രും.

2 തിരിച്ചു കൂട്ടി​ലെത്തി, പൂന്തേൻ തേനറ​ക​ളിൽ സൂക്ഷി​ക്കു​ന്നു

കൂട്ടിൽ കടന്നു​ക​ഴി​ഞ്ഞാൽ തേൻവേ​ട്ട​ക്കാ​രി തേനീച്ച ഒരു യുവ വേലക്കാ​രി തേനീ​ച്ച​യു​ടെ വായി​ലേക്ക്‌ തന്റെ തേൻസ​ഞ്ചി​യി​ലെ തേൻ തികട്ടി​ക്കൊ​ടു​ക്കു​ന്നു. വേലക്കാ​രി തേനീച്ച ഇത്‌ ഒരു അറയി​ലാ​ക്കി പൂന്തേൻ തേനാ​ക്കുന്ന ജോലി​യിൽ വ്യാപൃ​ത​യാ​കു​ന്നു.

3 തേനീച്ച വളർത്ത​ലു​കാ​രൻ തേനെ​ടു​ക്കു​ന്നു

ചൂടാ​ക്കിയ ഒരു കത്തി​കൊണ്ട്‌ അയാൾ ഓരോ ചട്ടങ്ങളു​ടെ​യും ഉള്ളിലുള്ള അറകൾ മൂടി​യി​രി​ക്കുന്ന മെഴുകു ചീകി​ക്ക​ള​യു​ന്നു. അടുത്ത​താ​യി അയാൾ ചട്ടങ്ങൾ തേനെ​ടു​ക്കാ​നുള്ള ഉപകര​ണ​ത്തിൽ വെക്കുന്നു. അപകേന്ദ്ര ശക്തിയു​പ​യോ​ഗി​ച്ചാണ്‌ ഈ യന്ത്രം അതു ചെയ്യു​ന്നത്‌.

4 ഭരണി​ക​ളി​ലോ കൊച്ചു പാത്ര​ങ്ങ​ളി​ലോ തേൻ പായ്‌ക്കു​ചെ​യ്യു​ന്നു

തേൻ-ഭരണി​ക​ളു​ടെ മുകളി​ലുള്ള ലേബലു​ക​ളിൽ തേനീ​ച്ചകൾ തേനു​ത്‌പാ​ദി​പ്പി​ച്ചത്‌ ഏതു തരം സസ്യങ്ങ​ളിൽ നിന്നാണ്‌ എന്നു രേഖ​പ്പെ​ടു​ത്തി​യി​ട്ടു​ണ്ടാ​കും. ഭരണി സുതാ​ര്യ​മാ​ണെ​ങ്കിൽ തേനിന്റെ നിറം പരി​ശോ​ധിച്ച്‌ നിങ്ങൾക്ക​തി​ന്റെ ഗുണനി​ല​വാ​ര​മ​റി​യാൻ സാധി​ക്കും.

5 തേൻ ആരോ​ഗ്യ​ത്തിന്‌ ഉത്തമം!

തേൻ, ശരീര​ത്തിൽ എളുപ്പ​ത്തിൽ ദഹിച്ചു ചേരു​ക​യും വളരെ​വേഗം ഊർജ​മാ​ക്കി മാറ്റ​പ്പെ​ടു​ക​യും ചെയ്യുന്നു. പൊള്ള​ലു​ക​ളും മാംസ​ത്തി​ലു​ണ്ടാ​കുന്ന വ്യത്യസ്‌ത തരം വ്രണങ്ങ​ളും ചികി​ത്സി​ക്കാൻ തേൻ ഉപയോ​ഗി​ക്കാ​വു​ന്ന​താണ്‌ എന്നു റിപ്പോർട്ടു​കൾ വെളി​പ്പെ​ടു​ത്തു​ന്നു.