ആൽപ്‌സി​ലെ ദേശീയ പാർക്കു​ക​ളു​ടെ മനോ​ഹാ​രി​ത

ഫ്രാൻസിലെ ഉണരുക! ലേഖകൻ

കുതി​ച്ചൊ​ഴു​കുന്ന തെളി​നീർച്ചോ​ലകൾ, കാറ്റിൽ ഇളകി​ക്ക​ളി​ക്കുന്ന ഇലച്ചാർത്തു​ക​ളു​ടെ നേർത്ത മർമരം, തലയ്‌ക്കു മുകളിൽ തെളിഞ്ഞ മാനം, വൃക്ഷപ്പ​ടർപ്പു​കൾക്കി​ട​യി​ലൂ​ടെ അരിച്ചി​റ​ങ്ങുന്ന സൂര്യ​പ്ര​കാ​ശം. മനം കുളിർപ്പി​ക്കുന്ന ആ കാഴ്‌ച​ക​ളും ശബ്ദങ്ങളു​മാണ്‌ ഞങ്ങളെ വരവേൽക്കു​ന്നത്‌. ആ സുദി​ന​ത്തിൽ ഞങ്ങൾ കാണാൻ പോകുന്ന കാഴ്‌ച​ക​ളു​ടെ തുടക്കം മാത്ര​മാണ്‌ അവയെന്ന്‌ ഞങ്ങൾക്കു​റ​പ്പുണ്ട്‌. ഏതാണീ സ്ഥലം? ഫ്രാൻസി​ലെ ഡോഫി​നെ ആൽപ്‌സി​ലുള്ള ഏക്രാൻ ദേശീയ പാർക്ക്‌.

പാർക്കിന്‌ എൽഫ്‌ർവാ​ഡി​ലുള്ള കവാട​ങ്ങ​ളി​ലൊ​ന്നിൽ—വനാതിർത്തി​യിൽ—വിവരങ്ങൾ നൽകുന്ന ബോർഡു​കൾ സ്ഥാപി​ച്ചി​രി​ക്കു​ന്നു. പാർക്കി​ന​കത്ത്‌ തമ്പടി​ക്കു​ന്ന​തും തീ കൂട്ടു​ന്ന​തും​മ​റ്റും നിരോ​ധി​ച്ചി​രി​ക്കു​ന്ന​താ​യി അവയിൽ എഴുതി​യി​ട്ടുണ്ട്‌. ചപ്പുച​വ​റു​കൾ അവി​ടെ​യി​ടാ​തെ തിരികെ കൊണ്ടു​പോ​കാൻ ഞങ്ങളോട്‌ ആവശ്യ​പ്പെ​ട്ടി​രി​ക്കു​ന്നു. നായ്‌ക്കളെ അകത്തു​ക​യ​റ്റു​ന്നത്‌ നിരോ​ധി​ച്ചി​രി​ക്കു​ന്ന​താ​യി ഞങ്ങൾ ശ്രദ്ധി​ക്കു​ന്നു. അവ പലപ്പോ​ഴും പാർക്കി​ലെ ജീവി​കളെ വിരട്ടു​ക​യും ശല്യ​പ്പെ​ടു​ത്തു​ക​യും ചെയ്യു​ന്ന​തു​കൊ​ണ്ടാണ്‌ ഇങ്ങനെ​യൊ​രു വിലക്ക്‌.

അവയുടെ ഉദ്ദേശ്യം

ദേശീയ പാർക്ക്‌ എന്നു പറഞ്ഞാൽ കൃത്യ​മാ​യി എന്താണ്‌, അത്‌ എന്ത്‌ ഉദ്ദേശ്യ​മാ​ണു നിവർത്തി​ക്കു​ന്നത്‌? ആദ്യത്തെ ദേശീയ പാർക്കായ ഐക്യ​നാ​ടു​ക​ളി​ലെ വൈ​യോ​മിംഗ്‌ സ്റ്റേറ്റി​ലുള്ള യെലോ​സ്റ്റോൺ ദേശീയ പാർക്ക്‌ 1872-ലാണ്‌ സ്ഥാപി​ക്ക​പ്പെ​ട്ടത്‌. അതിനു​ശേഷം എല്ലാ ഭൂഖണ്ഡ​ങ്ങ​ളി​ലും അനേകം ദേശീയ പാർക്കു​കൾ തുറന്നു. ഫ്രാൻസിൽ ഏഴു ദേശീയ പാർക്കു​ക​ളുണ്ട്‌. അവയിൽ മൂന്നെണ്ണം ഫ്രാൻസു​മു​തൽ ഓസ്‌ട്രി​യ​വരെ നീണ്ടു​കി​ട​ക്കുന്ന ആൽപ്പൈൻ ക്രെസൻറി​ലാണ്‌. യൂറോ​പ്പി​ലെ ആദ്യത്തെ ദേശീയ പാർക്ക്‌ സ്ഥാപി​ക്ക​പ്പെ​ട്ടത്‌ 1914-ൽ സ്വിറ്റ്‌സർലൻഡി​ലെ പ്രജാ​ധി​പ​ത്യ​സം​സ്ഥാ​ന​മായ ഗ്രൗബു​ണ്ട​നി​ലാണ്‌ (ഗ്രി​സോൺ). പിന്നീട്‌, 1922-ൽ ഇറ്റലി​യിൽ ഗ്രാൻപാ​ര​ഡി​സോ ദേശീയ പാർക്ക്‌ തുറന്നു. ആൽപ്പൈൻ ക്രെസൻറി​ലുള്ള മറ്റു ദേശീയ പാർക്കു​കൾ ജർമനി​യി​ലെ ബെർച്ച്‌റ്റ​സ്‌ഗാ​ഡൻ; ഓസ്‌ട്രി​യ​യി​ലെ ഹോവ​റ്റൗൺ; ഇറ്റലി​യി​ലെ സ്റ്റെൽവി​യോ; സ്ലോ​വേ​നി​യ​യി​ലെ ട്രിഗ്ലാവ്‌ എന്നിവ​യാണ്‌. ഫ്രാൻസി​ലെ ആദ്യത്തെ ദേശീയ പാർക്ക്‌ 1963-ൽ സ്ഥാപി​ക്ക​പ്പെട്ട വാൻവാസ്‌ ആണ്‌.

ദേശീയ പാർക്കു​ക​ളു​ടെ മുഖ്യ ലക്ഷ്യം പ്രകൃ​തി​യി​ലെ സസ്യജ​ന്തു​ജാ​ല​ങ്ങളെ സംരക്ഷി​ക്കു​ക​യെ​ന്ന​താണ്‌. ദേശീയ പാർക്കു​കൾ അല്ലെങ്കി​ലും അതേ ലക്ഷ്യത്തിൽ പ്രവർത്തി​ക്കുന്ന വേറെ​യും അനേകം പാർക്കു​ക​ളുണ്ട്‌ എന്നതു ശ്രദ്ധേ​യ​മാണ്‌. ഫ്രാൻസി​ലെ വെർകോർ മേഖലാ പാർക്കും ഓസ്‌ട്രി​യ​യി​ലെ കാർവെൻഡൽ വന്യജീ​വി​സ​ങ്കേ​ത​വും ഇവയിൽ പെടുന്നു. എങ്കിലും, ദേശീയ പാർക്കു​കൾക്കുള്ള പ്രത്യേക പദവി അവയുടെ സൂക്ഷി​പ്പു​കാർക്ക്‌ ഒരു പ്രത്യേക അധികാ​രം നൽകുന്നു, പാർക്കി​ലെ നിയമങ്ങൾ അനുസ​രി​ക്കാ​ത്ത​വ​രിൽനിന്ന്‌ പിഴ ഈടാ​ക്കാ​നുള്ള അധികാ​രം. ഉദാഹ​ര​ണ​ത്തിന്‌, സ്വിറ്റ്‌സർലൻഡി​ലെ ഒരു പാർക്കി​ലേക്ക്‌ പട്ടിയെ കൊണ്ടു​വ​രു​ന്ന​പക്ഷം 500 സ്വിസ്‌ ഫ്രാങ്ക്‌ (350 യു.എസ്‌. ഡോളർ) വരെ പിഴ അടയ്‌ക്കേ​ണ്ടി​വ​രും.

ആ തുക കുറെ കൂടു​ത​ലാ​ണെന്ന്‌ ഒരുപക്ഷേ ചിലർക്കു തോന്നി​യേ​ക്കാം. എന്നാൽ ചില പ്രത്യേക വിലക്കു​കൾ വെക്കു​ന്ന​തി​നും പിഴകൾ ഈടാ​ക്കു​ന്ന​തി​നും കാരണ​ങ്ങ​ളുണ്ട്‌. ഇതു പരിചി​ന്തി​ക്കുക. ഒരിക്കൽ തെക്കു​കി​ഴക്കൻ ഫ്രാൻസി​ലുള്ള മാരി​ട്ടൈം ആൽപ്‌സി​ലെ മെർകാൻടൂർ ദേശീയ പാർക്കിൽ ചെന്ന​പ്പോൾ ഞങ്ങൾ ഒരു ഷാമ്വാ​ക്കു​ഞ്ഞി​നെ കാണാ​നി​ട​യാ​യി. തീർത്തും നിസ്സഹാ​യ​നാ​യി​രുന്ന അത്‌ തനിച്ചാ​യി​രു​ന്ന​താ​യി തോന്നി. ഞങ്ങൾ അതിനെ തൊട്ടില്ല. എന്തു​കൊ​ണ്ടെ​ന്നാൽ ഞങ്ങളുടെ ഗന്ധമേ​റ്റാൽ തള്ള അതിനെ തിരികെ സ്വീക​രി​ക്കാ​തെ വരു​മെന്നു ഞങ്ങൾ വിചാ​രി​ച്ചു. എന്നാൽ ഞങ്ങളു​ടെ​കൂ​ടെ ഒരു പട്ടിയു​ണ്ടാ​യി​രു​ന്നെ​ങ്കിൽ എന്തു സംഭവി​ക്കു​മാ​യി​രു​ന്നു​വെന്നു സങ്കൽപ്പി​ക്കുക! പാവം ഷാമ്വാ ഭയന്നു​പോ​കു​മാ​യി​രു​ന്നു, പ്രത്യേ​കി​ച്ചും പട്ടി കുരയ്‌ക്കാൻ തുടങ്ങി​യാൽ.

സൂക്ഷി​പ്പു​കാർ കേവലം പാർക്കി​ലെ പൊലീ​സു​കാർ മാത്ര​മാ​ണെ​ന്നാ​ണോ ഇതിന്റെ അർഥം? തീർച്ച​യാ​യും അല്ല. മെർകാൻടൂർ പാർക്കി​ലെ ഒരു സൂക്ഷി​പ്പു​കാ​രൻ ഒരു ഷാമ്വാ പറ്റം പുതു​മ​ഞ്ഞി​ലൂ​ടെ കടന്നു​പോയ വഴി ഞങ്ങൾക്കു കാട്ടി​ത്തന്നു. അവയുടെ കുളമ്പു​മു​ദ്രകൾ പതിഞ്ഞി​രുന്ന രീതി​യും അദ്ദേഹം ഞങ്ങൾക്കു കാണി​ച്ചു​തന്നു. പാർക്കി​ലെ പ്രകൃതി സന്തുലനം നിലനിർത്തു​ന്ന​തി​നു പുറമേ, അറിവു പകർന്നു​നൽകു​ക​യും പഠിപ്പി​ക്കു​ക​യും ചെയ്യുക എന്ന ധർമം​കൂ​ടെ ഈ സൂക്ഷി​പ്പു​കാർക്കു​ണ്ടെന്നു മനസ്സി​ലാ​ക്കാൻ ഇതു ഞങ്ങളെ സഹായി​ച്ചു.

പ്രകൃ​തി​യു​ടെ സമൃദ്ധ​മായ വന്യമൃ​ഗ​ശേ​ഖ​രം

അകലെ കണ്ണോ​ടി​ക്കു​മ്പോൾ ഒരു മലഞ്ചെ​രു​വി​ലെ നേവേ​ക​ളിൽ അഥവാ ഹിമത​രി​കൾ പാകിയ വയലു​ക​ളിൽ ഷാമ്വാ​കൾ കൂത്താ​ടു​ന്നതു ഞങ്ങൾക്കു കാണാം. ചരൽനി​റഞ്ഞ ചെരി​വു​ക​ളിൽ രണ്ടു മലയണ്ണാൻമാർ തുള്ളി​ച്ചാ​ടു​ന്ന​തും ഞങ്ങളുടെ കണ്ണിൽ പെടുന്നു. ഈ മലയണ്ണാൻമാ​രിൽ ചിലത്‌ നല്ല ഇണക്കമു​ള്ള​വ​യാണ്‌. തിന്നാൻ വല്ലതും കിട്ടു​മെ​ന്നോർത്ത്‌ അവ കാൽന​ട​ക്കാ​രായ സന്ദർശ​കരെ സമീപി​ക്കാ​റുണ്ട്‌.

ആൽപ്‌സി​ലെ ചില പാർക്കു​ക​ളിൽ മലയാ​ടു​ക​ളു​ടെ പറ്റങ്ങളുണ്ട്‌. അവ ഏറ്റവും കൂടു​ത​ലു​ള്ളത്‌ ഇറ്റലി​യി​ലെ ഗ്രാൻപാ​ര​ഡി​സോ പാർക്കി​ലാണ്‌. മെർകാൻടൂ​റിൽ ചിലതി​നെ കണ്ടത്‌ ഞങ്ങളെ പുളകം​കൊ​ള്ളി​ച്ചു. ആൽപ്‌സി​ന്റെ തെക്കു​ഭാ​ഗ​ത്തുള്ള ഈ പാർക്കിൽ മൃഗങ്ങൾ അനവധി​യാണ്‌. മൂഫ്‌ളോ​ണു​കൾ എന്നു പറയുന്ന ഒരിനം കാട്ടാ​ടു​കൾ അവിടെ സ്വത​ന്ത്ര​മാ​യി വിഹരി​ക്കു​ന്നു. ചെന്നാ​യ്‌ക്ക​ളും അടുത്ത​യി​ടെ അവിടെ തിരി​ച്ചെ​ത്തി​യി​ട്ടുണ്ട്‌. എങ്കിലും സന്ദർശ​കർക്ക്‌ ഭയപ്പെ​ടാ​നൊ​ന്നു​മില്ല, കാരണം ചവിട്ട​ടി​പ്പാ​ത​ക​ളു​ടെ അടു​ത്തേക്കു വരാൻ ചെന്നാ​യ്‌ക്കൾ അങ്ങനെ​യൊ​ന്നും ധൈര്യം കാട്ടാ​റില്ല. അവർ മനുഷ്യ​രിൽനിന്ന്‌ ഒഴിഞ്ഞു​മാ​റു​ക​യാണ്‌ പതിവ്‌. പണ്ട്‌, സ്വിസ്‌ ആൽപ്‌സിൽ കരടികൾ വിഹരി​ച്ചി​രു​ന്നു. എന്നാൽ 1904-ൽ, അവിടെ കാണപ്പെട്ട അവസാ​നത്തെ കരടി​യും കൊല്ല​പ്പെട്ടു. പശ്ചിമ യൂറോ​പ്പിൽ ഇപ്പോൾ തവിട്ടു​ക​ര​ടി​ക​ളു​ള്ളത്‌ ഫ്രാൻസി​ന്റെ​യും സ്‌പെ​യി​നി​ന്റെ​യും അതിർത്തി​യി​ലുള്ള പൈറ​നീ​സി​ലും വടക്കൻ സ്‌പെ​യി​നി​ലെ കാൻടേ​ബ്രി​യൻ പർവത​ങ്ങ​ളി​ലും മധ്യ ഇറ്റലി​യി​ലെ ആബ്രൂ​റ്റ്‌സി ദേശീയ പാർക്കി​ലു​മാണ്‌. എന്നാൽ, സ്വിസ്‌ ദേശീയ പാർക്കിൽ കലമാ​നു​കൾ മുക്കു​റ​യി​ടു​ന്നത്‌ ചില സമയങ്ങ​ളിൽ കേൾക്കാൻ കഴിയും. അവിടെ അവ ധാരാ​ള​മുണ്ട്‌.

എന്നാൽ, വലിയ മൃഗങ്ങൾക്കു പുറമേ, അനേകം കൊച്ചു മൃഗങ്ങ​ളും സന്ദർശ​കരെ രസിപ്പി​ക്കു​ന്നു. എർമി​നു​കൾ, ശൈത്യ​കാ​ലത്ത്‌ വെള്ളനി​റ​മാ​യി മാറുന്ന നിറം​മാ​റും മുയലു​കൾ, കുറു​ക്കൻമാർ, മലയണ്ണാൻമാർ, അണ്ണാൻമാർ എന്നിവ ഇവയ്‌ക്ക്‌ ഉദാഹ​ര​ണ​ങ്ങ​ളാണ്‌. ചാരു​ത​യാർന്ന ചിത്ര​പ​തം​ഗങ്ങൾ, അധ്വാ​ന​ശീ​ല​രായ ഉറുമ്പു​കൾ തുടങ്ങിയ അസംഖ്യം ഷഡ്‌പ​ദ​ങ്ങ​ളു​ടെ​യും​കൂ​ടെ വാസസ്ഥ​ല​മാണ്‌ ഈ പ്രദേ​ശങ്ങൾ. പക്ഷി​പ്രേ​മി​കൾക്ക്‌ ഒരു കാരണ​വ​ശാ​ലും നിരാ​ശ​രാ​യി മടങ്ങേണ്ടി വരില്ല. തലയ്‌ക്കു മുകളി​ലാ​യി ഒരു കഴുകൻ ഉയർന്നു പറക്കു​ന്നത്‌ ഒരുപക്ഷേ നിങ്ങൾക്കു കാണാൻ കഴി​ഞ്ഞേ​ക്കും. സ്വിസ്‌ ദേശീയ പാർക്ക്‌, വാൻവാസ്‌-മെർകാൻടൂർ പാർക്കു​കൾ എന്നിവി​ട​ങ്ങ​ളിൽ ചെന്നാൽ ലാമെർ​ഗൈ​യ​റി​നെ അഥവാ താടി​ക്ക​ഴു​കനെ പോലും നിങ്ങൾക്കു കാണാൻ കഴി​ഞ്ഞേ​ക്കും. പ്രാണി​കളെ പിടി​ക്കു​ന്ന​തി​നാ​യി മരം​കൊ​ത്തി കൊക്കു​കൊണ്ട്‌ തായ്‌ത്ത​ടി​യിൽ കൊത്തുന്ന ശബ്ദം അവിടെ എപ്പോ​ഴും കേൾക്കാം. ഈ പർവത​വാ​സി​കൾ ആൽപ്‌സി​ലെ ശൈത്യ​ത്തെ എങ്ങനെ അതിജീ​വി​ക്കു​ന്നു​വെന്ന്‌ പലരും ചോദി​ക്കാ​റുണ്ട്‌. ഈ ജന്തുക്കൾ ഇവിടത്തെ പരിതഃ​സ്ഥി​തി​യോട്‌ നല്ല ഇണക്കമു​ള്ള​വ​യാണ്‌. എങ്കിലും രൂക്ഷമായ അവസ്ഥക​ളിൽ രോഗം ബാധി​ച്ച​തും വയസ്സു​ചെ​ന്ന​തു​മായ മൃഗങ്ങൾ ചത്തൊ​ടു​ങ്ങാ​റുണ്ട്‌.

ആൽപ്‌സി​ലെ സസ്യജാ​ലം

പാർക്കു​ക​ളിൽ സസ്യങ്ങ​ളും സംരക്ഷി​ക്ക​പ്പെ​ടു​ന്നു. അതു​കൊണ്ട്‌, പാതയി​റ​മ്പിൽ നിൽക്കുന്ന മനോ​ഹ​ര​മായ ഓറഞ്ച്‌ ലില്ലി​പ്പൂ​ക്കൾ ഉൾപ്പെ​ടെ​യുള്ള പുഷ്‌പങ്ങൾ പറിക്കു​ന്നത്‌ നിരോ​ധി​ച്ചി​രി​ക്കു​ന്നു. അത്‌ എന്തു​കൊ​ണ്ടാ​ണെന്ന്‌ ഒരുപക്ഷേ നിങ്ങൾ വിചാ​രി​ക്കു​ന്നു​ണ്ടാ​കും. പ്രസി​ദ്ധ​മായ ഏഡൽ​വൈസ്‌, ആൽപ്പൈൻ അനെമണി, ആൽപ്പൈൻ റോസ്‌, പർവത ബ്ലൂവറ്റ്‌, ചിലയി​നം കിരി​യാ​ത്തു​കൾ തുടങ്ങിയ ചില സസ്യങ്ങൾ അപൂർവ​ങ്ങ​ളാണ്‌. അതിജീ​വനം ഉറപ്പു​വ​രു​ത്തു​ന്ന​തിന്‌ അവയെ സംരക്ഷി​ക്കേ​ണ്ടത്‌ മർമ​പ്ര​ധാ​ന​മാണ്‌. പുഷ്‌പ വൈവി​ധ്യം വാസ്‌ത​വ​ത്തിൽ മനംക​വ​രു​ന്ന​താണ്‌.

പാർക്കു​കൾക്ക്‌ അലങ്കാ​ര​മായ വൃക്ഷങ്ങ​ളി​ലും പ്രകൃ​തി​സൗ​ന്ദ​ര്യം പ്രകട​മാണ്‌. ശരത്‌കാ​ലത്ത്‌ ലാർച്ചു​കൾ അവയുടെ പൊൻനി​റ​ച്ചാർത്തു​ക​ളാൽ വനത്തെ അണിയി​ച്ചൊ​രു​ക്കു​ന്നു. അതേസ​മയം അരോളാ അഥവാ സ്വിസ്‌ പൈൻ, നട്ട്‌ക്രാ​ക്കർ എന്നു സാധാ​ര​ണ​മാ​യി അറിയ​പ്പെ​ടുന്ന പക്ഷിക്കു​വേണ്ടി എപ്പോ​ഴും ആഹാരം ഉത്‌പാ​ദി​പ്പി​ച്ചു​കൊണ്ട്‌ കൊടും​ശൈ​ത്യ​ത്തെ വെല്ലു​വി​ളി​ക്കു​ന്ന​താ​യി തോന്നു​ന്നു. ഈ പക്ഷി പൈൻകാ​യ്‌കൾ കണ്‌ഠ​സ​ഞ്ചി​യി​ലി​ട്ടു​കൊ​ണ്ടു പോയി ഭാവി ഉപയോ​ഗ​ത്തി​നാ​യി കുഴി​ച്ചി​ടു​ന്നു. ഇത്‌, പൈൻവൃ​ക്ഷങ്ങൾ എത്തി​പ്പെ​ടു​മാ​യി​രു​ന്നി​ല്ലാഞ്ഞ ഇടങ്ങളി​ലേക്ക്‌ അവ വ്യാപി​ക്കു​ന്ന​തിന്‌ ഇടയാ​ക്കു​ന്നു. ചുറ്റു​പാ​ടി​ന്റെ സൗന്ദര്യം ആസ്വദി​ച്ചു​കൊണ്ട്‌ വേണ​മെ​ങ്കിൽ ഞങ്ങൾക്ക്‌ ദിവസം മുഴു​വ​നും അവിടെ നിൽക്കാം. എന്നാൽ പർവത​കാ​ബി​നിൽ എത്തി​ച്ചേ​ര​ണ​മെ​ങ്കിൽ മുന്നോ​ട്ടു നടന്നേ പറ്റൂ.

നടപ്പു തുടരുന്ന ഞങ്ങൾ പെട്ടെ​ന്നു​തന്നെ ഏറെ ദുർഘ​ട​മായ ഒരു പാതയി​ലെ​ത്തി​ച്ചേ​രു​ന്നു. ഷാമ്വാ​കൾ വനത്തിൽ ഞങ്ങൾക്കു​വേണ്ടി കാത്തി​രി​ക്കു​ന്ന​തു​പോ​ലെ തോന്നു​ന്നു. കുറെ ഫോ​ട്ടോ​കൾ എടുക്കാ​നും ഞങ്ങൾക്കു കഴിയു​ന്നു. എന്നാൽ കൂടുതൽ അടുത്തു​ചെ​ല്ലു​മ്പോൾ ആ അഴകാർന്ന ജീവികൾ ഓടി​ക്ക​ള​യു​ന്നു, ഞങ്ങളെ കണ്ടു പേടി​ച്ചി​ട്ടെ​ന്ന​പോ​ലെ. യെശയ്യാ​വു 11:6-9-ൽ രേഖ​പ്പെ​ടു​ത്തി​യി​രി​ക്കുന്ന ദൈവ​ത്തി​ന്റെ അത്ഭുത​ക​ര​മായ വാഗ്‌ദ​ത്ത​ത്തെ​ക്കു​റിച്ച്‌ ഞങ്ങൾ ധ്യാനി​ക്കു​ന്നു: “ചെന്നായി കുഞ്ഞാ​ടി​നോ​ടു​കൂ​ടെ പാർക്കും; പുള്ളി​പ്പു​ലി കോലാ​ട്ടു​കു​ട്ടി​യോ​ടു​കൂ​ടെ കിടക്കും; പശുക്കി​ടാ​വും ബാലസിം​ഹ​വും തടിപ്പിച്ച മൃഗവും ഒരുമി​ച്ചു പാർക്കും; ഒരു ചെറിയ കുട്ടി അവയെ നടത്തും. പശു കരടി​യോ​ടു​കൂ​ടെ മേയും; അവയുടെ കുട്ടികൾ ഒരുമി​ച്ചു കിടക്കും; . . . വിശു​ദ്ധ​പർവ്വ​ത​ത്തിൽ എങ്ങും ഒരു ദോഷ​മോ നാശമോ ആരും ചെയ്‌ക​യില്ല.” മുഴു​ഭൂ​മി​യും ഉടൻതന്നെ ഒരു വലിയ പാർക്കു​സ​മാന പറുദീ​സ​യാ​യി​ത്തീ​രു​മെ​ന്നും അതിൽ മനുഷ്യ​രും മൃഗങ്ങ​ളും നിർഭയം ഒത്തൊ​രു​മി​ച്ചു പാർക്കു​മെ​ന്നു​മുള്ള ഭാവി​പ്ര​തീ​ക്ഷ​യിൽ ഞങ്ങൾ ആനന്ദി​ക്കു​ന്നു.

[13-ാം പേജിലെ ചിത്രം]

ഫ്രഞ്ച്‌ ആൽപ്‌സിൽ സ്വസ്ഥമാ​യി വിഹരി​ക്കുന്ന ഒരു ഷാമ്വാ

[14-ാം പേജിലെ ചിത്രം]

ഫ്രാൻസിലെ വാൻവാസ്‌ ദേശീയ പാർക്കിൽ ജാഗരൂ​ക​നാ​യി​രി​ക്കുന്ന ഒരു മലയണ്ണാൻ

[14-ാം പേജിലെ ചിത്രം]

ഫ്രാൻസിലെ മെർകാൻടൂർ ദേശീയ പാർക്കി​ലെ ഒരു കഴുകൻ

[15-ാം പേജിലെ ചിത്രം]

ഷാമ്വാകൾ ഫ്രഞ്ച്‌ ആൽപ്‌സ്‌ കയറുന്നു

[15-ാം പേജിലെ ചിത്രം]

ഒരു ഷാമ്വാ കുഞ്ഞ്‌

[16-ാം പേജിലെ ചിത്രങ്ങൾ]

ആൽപ്പൈൻ റോസ്‌

[16-ാം പേജിലെ ചിത്രങ്ങൾ]

കാട്ടിൽവളരുന്ന ആർട്ടി​ച്ചോക്ക്‌

[16-ാം പേജിലെ ചിത്രങ്ങൾ]

ആങ്കൊളീ ഡെസാൽപ്‌

[16-ാം പേജിലെ ചിത്രങ്ങൾ]

മലയാട്‌

[17-ാം പേജിലെ ചിത്രങ്ങൾ]

ഓറഞ്ച്‌ ലില്ലി​പ്പു​ഷ്‌പം

[17-ാം പേജിലെ ചിത്രങ്ങൾ]

ടർക്‌സ്‌-കാപ്പ്‌ ലില്ലി

[17-ാം പേജിലെ ചിത്രങ്ങൾ]

പാനിക്കോ ഡെസാൽപ്‌

[17-ാം പേജിലെ ചിത്രങ്ങൾ]

മലയണ്ണാൻ