നിങ്ങൾക്കു ജോലി​യിൽ വിരസത അനുഭ​വ​പ്പെ​ടു​ന്നു​വോ?

ദിവസ​ത്തിൽ എട്ടു മണിക്കൂ​റോ​ളം നിങ്ങൾ ജോലി ചെയ്യു​ന്നു​ണ്ടാ​യി​രി​ക്കാം. അതു വിരസ​മാ​ണെ​ങ്കിൽ ജീവി​ത​ത്തി​ന്റെ നല്ലൊരു ഭാഗമാണ്‌ വിരസ​ത​യ്‌ക്ക്‌ അടി​പ്പെ​ടു​ന്നത്‌! 20-ാം നൂറ്റാ​ണ്ടി​ലെ ജോലി​യി​ല​ധി​ക​വും വിരസ​ത​യു​ള​വാ​ക്കു​ന്ന​വ​യാണ്‌. അവ, ജോലി ചെയ്യുന്ന ആൾക്ക്‌ അഭിമാ​നി​ക്കാൻ കാര്യ​മായ വക നൽകു​ന്നില്ല.

അതു​കൊണ്ട്‌ തൊഴിൽ രസകര​മാ​ക്കി​ത്തീർക്കു​ന്നെ​ങ്കിൽ നിങ്ങൾക്കു വളരെ പ്രയോ​ജ​നങ്ങൾ കൈവ​രി​ക്കാൻ കഴിയും. ജോലി ചെയ്യു​ന്ന​തിൽനി​ന്നു നിങ്ങൾക്കു കൂടുതൽ സന്തോഷം ലഭിക്കു​ന്നു, ഭാവി​യിൽ ചെയ്യാ​നുള്ള ഏതു ജോലി​യും കൂടുതൽ രസകര​മാ​ക്കാ​നുള്ള രഹസ്യം നിങ്ങൾ പഠിക്കു​ന്നു. ആ സ്ഥിതിക്ക്‌ അപ്രകാ​രം ചെയ്യാ​നുള്ള ചില വഴികൾ നമുക്ക്‌ പരി​ശോ​ധി​ക്കാം.

ഉത്സാഹ​ത്തോ​ടെ പ്രവർത്തി​ക്കു​ക

ചെയ്യുന്ന ജോലി ആസ്വദി​ച്ചു ചെയ്യാൻ ചില ആധികാ​രിക ഉറവി​ടങ്ങൾ നിർദേ​ശി​ക്കു​ന്നു. അങ്ങനെ ചെയ്യു​ന്ന​പക്ഷം ജോലി ആസ്വാ​ദ്യ​മാ​യി നിങ്ങൾക്ക​നു​ഭ​വ​പ്പെ​ടും.

‘പക്ഷേ എന്റെ ജോലി​യിൽ എനിക്ക്‌ ഒരിക്ക​ലും ഉത്സാഹം തോന്നി​യി​ട്ടില്ല!’ നിങ്ങൾ പ്രതി​ക​രി​ച്ചേ​ക്കാം. അനവധി ജോലി​ക്കാർ നിരനി​ര​യാ​യി​നിന്ന്‌ യന്ത്രഭാ​ഗങ്ങൾ കൂട്ടി​യി​ണ​ക്കു​ന്ന​തു​പോ​ലുള്ള കർശന​മായ നിഷ്‌ഠ​യുള്ള ഒന്നായി​രി​ക്കാം നിങ്ങളു​ടെ ജോലി. അല്ലെങ്കിൽ വർഷങ്ങ​ളാ​യി ഒരേ ജോലി ചെയ്യു​ന്ന​തു​കൊണ്ട്‌ അതിൽ താത്‌പ​ര്യം വീണ്ടെ​ടു​ക്കുക സാധ്യ​മ​ല്ലെന്ന്‌ നിങ്ങൾക്കു തോന്നി​യേ​ക്കാം. എന്നാൽ പുഞ്ചി​രി​ക്കു​ന്ന​തും നിവർന്നു​നിൽക്കു​ന്ന​തും​പോ​ലെ​യുള്ള ചെറിയ വിദ്യകൾ നിങ്ങളു​ടെ ജോലി​യിൽ കൂടുതൽ ഉത്സാഹം തോന്നാൻ സഹായി​ച്ചേ​ക്കും.

ചെയ്യുന്ന ജോലി​യിൽ പൂർണ​മാ​യും ശ്രദ്ധ കേന്ദ്രീ​ക​രി​ക്കു​ന്ന​തും സഹായ​ക​മാ​യേ​ക്കും. യാന്ത്രി​ക​മായ രീതി​യിൽ ജോലി ചെയ്യാ​തി​രി​ക്കുക. ജോലി ചെയ്യു​ന്ന​തി​നി​ട​യിൽ ഉച്ചഭക്ഷ​ണ​സ​മ​യ​ത്തെ​ക്കു​റി​ച്ചോ വാരാ​ന്ത്യ​ത്തെ​ക്കു​റി​ച്ചോ ചെയ്യാ​നുള്ള മറ്റേ​തെ​ങ്കി​ലും ജോലി​യെ​ക്കു​റി​ച്ചോ ചിന്തി​ക്കാ​തി​രി​ക്കുക. ചെയ്‌തു​കൊ​ണ്ടി​രി​ക്കുന്ന ജോലി​യിൽത്തന്നെ പൂർണ​മാ​യി ശ്രദ്ധ കേന്ദ്രീ​ക​രി​ക്കു​ന്ന​താണ്‌ ബുദ്ധി. ഫലമോ? നിങ്ങൾ ജോലി ആസ്വദി​ക്കു​മെന്നു മാത്രമല്ല, സമയം പെട്ടെന്നു കടന്നു​പോ​കു​ന്ന​തു​പോ​ലെ​യും തോന്നും.

നിങ്ങൾ ശരിക്കും ഇഷ്ടപ്പെ​ടുന്ന ഒരു പ്രവൃ​ത്തി​യിൽ മുഴു​കി​യി​രി​ക്കു​മ്പോൾ സ്വാഭാ​വി​ക​മാ​യും സംഭവി​ക്കു​ന്നത്‌ ഇതാണ്‌. പൊതു​വേ ആസ്വാ​ദ്യ​മാ​യി തോന്നാത്ത ഒരു ജോലി​യിൽ പൂർണ ശ്രദ്ധ കേന്ദ്രീ​ക​രി​ക്കാൻ ശ്രമി​ക്കു​ക​വഴി നിങ്ങൾക്ക്‌ ഇതേ ഫലംതന്നെ കൈവ​രി​ക്കാൻ സാധി​ക്കും.

കഴിവി​ന്റെ പരമാ​വധി ചെയ്യുക

നിങ്ങളു​ടെ കഴിവി​ന്റെ പരമാ​വധി ചെയ്യു​ന്നത്‌ ജോലി​യിൽ സംതൃ​പ്‌തി കൈവ​രി​ക്കാൻ സഹായി​ക്കും. ജോലി രസമി​ല്ലാ​ത്ത​താ​യി തോന്നു​ന്നെ​ങ്കിൽ കുറഞ്ഞ ശ്രമം​കൊണ്ട്‌ വല്ല വിധേ​ന​യും അതു ചെയ്‌തു​തീർക്കുക എന്ന ആധുനിക ബുദ്ധ്യു​പ​ദേ​ശ​ത്തിന്‌ വിപരീ​ത​മാ​ണിത്‌. എന്നാൽ ഉദാസീ​നത, നീട്ടി​വെപ്പ്‌, കുറഞ്ഞ ശ്രമം എന്നിവ നിങ്ങളു​ടെ ഊർജം ചോർത്തി​ക്ക​ള​യു​ക​യും ഉത്‌ക​ണ്‌ഠ​യും ക്ഷീണവും വർധി​പ്പി​ക്കു​ക​യും ചെയ്‌തേ​ക്കാം. ജോലി കഴിഞ്ഞ്‌ പിരി​മു​റു​ക്ക​ത്തോ​ടും ഉത്‌ക​ണ്‌ഠ​യോ​ടും കൂടെ ഒരു വ്യക്തി ക്ഷീണി​ച്ച​വ​ശ​നാ​യി വീട്ടിൽ തിരി​ച്ചെ​ത്തു​ന്നത്‌ അയാൾ ഉത്സാഹ​ത്തോ​ടെ ജോലി ചെയ്യാ​ത്ത​തു​കൊ​ണ്ടാ​യി​രി​ക്കാം.

ബൈബിൾ പറയു​ന്ന​ത​നു​സ​രിച്ച്‌, ഒരു ജോലി ചെയ്‌തു​തീർക്കാൻ കഠിനാ​ധ്വാ​നം ചെയ്യു​മ്പോൾ അത്‌ ഒഴിവു​സ​മ​യ​ങ്ങ​ളും കൂടുതൽ ആസ്വാ​ദ്യ​മാ​യി​രി​ക്കാൻ ഇടയാ​ക്കും. “തിന്നു കുടിച്ചു തന്റെ പ്രയത്‌ന​ത്താൽ സുഖം അനുഭ​വി​ക്കു​ന്ന​ത​ല്ലാ​തെ മനുഷ്യ​ന്നു മറെറാ​രു നന്മയു​മില്ല; അതും ദൈവ​ത്തി​ന്റെ കയ്യിൽനി​ന്നു​ള്ളതു എന്നു ഞാൻ കണ്ടു.” (സഭാ​പ്ര​സം​ഗി 2:24) ചിലരെ സംബന്ധി​ച്ചി​ട​ത്തോ​ളം ഇത്‌ ഒരു കാലഹ​ര​ണ​പ്പെട്ട പഴമൊ​ഴി​യാ​യി തോന്നി​ച്ചേ​ക്കാ​മെ​ങ്കി​ലും മറ്റുചി​ലർ ഈ കാലാ​തീത തത്ത്വം ബാധക​മാ​ക്കു​ന്നു. തങ്ങളുടെ പ്രയത്‌ന​ത്തി​ന്റെ ഫലം അനുഭ​വി​ക്കു​ന്ന​തി​നെ​ക്കാൾ വലിയ “മറെറാ​രു നന്മയു​മില്ല” എന്ന്‌ അവർ സമ്മതി​ക്കു​ന്നു. ജോലി ചെയ്യു​ന്ന​തി​ലെ സന്തോഷം എന്ന പുസ്‌തകം സമ്മതി​ച്ചു​പ​റ​യു​ന്നു: “നന്നായി ചെയ്‌തു​തീർത്ത ജോലി ആത്മസം​തൃ​പ്‌തി​യേ​കു​ന്നു.”

അതു​കൊണ്ട്‌ കഴിവി​ന്റെ പരമാ​വധി ചെയ്യുക, നിങ്ങൾക്കു കൂടുതൽ ഉന്മേഷം തോന്നും. ജോലി കേവലം പേരി​നു​മാ​ത്ര​മാ​യി​രി​ക്കു​ന്ന​തിൽ കൂടുതൽ ചെയ്യുക, നിങ്ങൾക്കു കൂടുതൽ സന്തോഷം തോന്നും. പ്രധാ​ന​പ്പെട്ട ജോലി​കൾ ആദ്യം ചെയ്‌തു​തീർക്കുക. അങ്ങനെ​യെ​ങ്കിൽ, ജോലി ചെയ്യേണ്ട സമയത്തു ചെയ്യാതെ നീട്ടി​ക്കൊ​ണ്ടു​പോ​യി ഒടുവിൽ ക്ഷീണി​ച്ച​വ​ശ​നാ​കുന്ന ഒരു വ്യക്തി​യെ​ക്കാൾ ഉച്ചയ്‌ക്കുള്ള ഇടവേ​ള​ക​ളും വാരാ​ന്ത്യ​ങ്ങ​ളും നിങ്ങൾ ആസ്വദി​ക്കും.—എസ്ഥേർ 10:2 താരത​മ്യം ചെയ്യുക; റോമർ 12:11; 2 തിമൊ​ഥെ​യൊസ്‌ 2:15.

മറ്റുള്ള​വ​രോട്‌ മത്സരി​ക്കു​ന്ന​തി​നു പകരം നിങ്ങളു​ടെ കഴിവി​ന്റെ പരമാ​വധി ചെയ്യുക. (ഗലാത്യർ 6:4) പുതിയ മാനദ​ണ്ഡ​ങ്ങ​ളും ലക്ഷ്യങ്ങ​ളും വെക്കുക. ജോലി കൂടുതൽ മെച്ചമാ​യി ചെയ്യാൻ ശ്രമി​ക്കുക. അങ്ങേയറ്റം വിരസ​ത​യു​ള​വാ​ക്കു​ന്ന​താ​യി ചിലർ കരുതി​യേ​ക്കാ​വുന്ന തുന്നൽപ്പണി നിത്യേന ചെയ്‌തു​കൊ​ണ്ടി​രുന്ന ഒരു സ്‌ത്രീ മണിക്കൂർതോ​റു​മുള്ള തന്റെ ഉത്‌പാ​ദ​ന​ക്ഷമത കണക്കു​കൂ​ട്ടി ജോലി ചെയ്യു​ന്നത്‌ ഒരു വിനോ​ദ​മാ​ക്കി മാറ്റി. എന്നിട്ട്‌ അത്‌ വർധി​പ്പി​ക്കാൻ ശ്രമിച്ചു. കഴിവി​ന്റെ പരമാ​വധി ചെയ്യാൻ ശ്രമി​ക്കു​ന്ന​തി​നാൽ അവർ ശരിക്കും തന്റെ ജോലി ആസ്വദി​ക്കു​ന്നു.—സദൃശ​വാ​ക്യ​ങ്ങൾ 31:31.

നിങ്ങളു​ടെ ജോലി​യെ “അലങ്കരി​ക്കുക”

ഡോക്‌ടർമാ​രായ ഡെന്നിസ്‌ റ്റി. ജാഫീ​യും സിന്ത്യ ഡി. സ്‌കോ​ട്ടും നിർദേ​ശി​ക്കു​ന്നു: “നിങ്ങളു​ടെ ജോലി​യെ സാധന​സാ​മ​ഗ്രി​ക​ളൊ​ന്നു​മി​ല്ലാത്ത ഒരു വീടി​നോട്‌ ഉപമി​ക്കുക. നിങ്ങൾ അകത്തു കടന്ന്‌ അതിന്റെ രൂപവും ഭാവവും നോക്കു​ന്നു. അപ്പോൾ നിങ്ങളു​ടെ ഭാവന​യ്‌ക്ക്‌ ചിറകു മുളയ്‌ക്കു​ന്നു. നിങ്ങള​തി​നെ അലങ്കരിച്ച്‌ നിങ്ങളു​ടെ ഭവനമാ​ക്കി​ത്തീർക്കു​ന്നു. നിങ്ങളു​ടേ​തായ രീതി​യിൽ മോടി​പി​ടി​പ്പിച്ച്‌ അതിന്‌ തനിമ നൽകുന്നു.”

മിക്ക ജോലി​ക​ളും നിങ്ങൾക്കു നൽകു​ന്നത്‌ നിയമ​ങ്ങ​ളും മാർഗ​നിർദേ​ശ​ങ്ങ​ളും സഹിത​മാണ്‌. നിങ്ങളിൽനി​ന്നു പ്രതീ​ക്ഷി​ക്കു​ന്നതു മാത്രം ചെയ്യു​ന്നത്‌ സാധന​സാ​മ​ഗ്രി​ക​ളൊ​ന്നു​മി​ല്ലാത്ത വീട്ടിൽ താമസം തുടങ്ങു​ന്ന​തു​പോ​ലെ​യാണ്‌. അതിനു തനിമ​യില്ല. എന്നാൽ നിങ്ങളു​ടെ വ്യക്തി​പ​ര​മായ ശൈലി അതി​നോ​ടു ചേർക്കു​ന്നെ​ങ്കിൽ നിങ്ങളു​ടെ ജോലി കുറേ​ക്കൂ​ടെ രസകര​മാ​യി​ത്തീ​രും. രണ്ടു വ്യക്തികൾ ഒരേ രീതി​യിൽ ഒരു ജോലി​യെ “അലങ്കരി​ക്കു”കയില്ല. ഒരു വെയിറ്റർ പതിവു​കാ​രു​ടെ അഭിരു​ചി​കൾ ഓർത്തി​രി​ക്കും. മറ്റൊ​രു​വ​നാ​കട്ടെ വിശേ​ഷാൽ ദയയും മര്യാ​ദ​യും പ്രകടി​പ്പി​ക്കു​ന്ന​വ​നാ​യി​രി​ക്കും. തങ്ങൾ ചെയ്യുന്ന കാര്യ​ത്തിൽ പൂർണ ശ്രദ്ധ കൊടു​ക്കു​ന്ന​തു​കൊണ്ട്‌ ഇരുവ​രും തങ്ങളുടെ ജോലി ആസ്വദി​ക്കു​ന്നു.

പഠിച്ചു​കൊ​ണ്ടി​രി​ക്കുക

ജോലി​യിൽ സന്തോഷം കണ്ടെത്താ​നുള്ള മറ്റൊരു മാർഗ​മാണ്‌ പഠനം. നമ്മൾ വളരു​ന്ന​തോ​ടൊ​പ്പം മസ്‌തി​ഷ്‌കം വിവരങ്ങൾ വിശക​ലനം ചെയ്യാ​നുള്ള അതിന്റെ കഴിവ്‌ വർധി​പ്പി​ക്കു​ന്നു​വെന്ന്‌ പിരി​മു​റു​ക്കം മറിക​ട​ക്കുക (ഇംഗ്ലീഷ്‌) എന്ന പുസ്‌തകം വിവരി​ക്കു​ന്നു. പോയ​കാ​ല​ങ്ങ​ളിൽ നമ്മെ ഉത്സാഹ​ഭ​രി​ത​രാ​ക്കിയ കാര്യങ്ങൾ ഇന്ന്‌ നമുക്ക്‌ വിരസ​മാ​യി തോന്നാ​നുള്ള കാരണ​മെ​ന്തെന്നു മനസ്സി​ലാ​ക്കാൻ ഇതു നമ്മെ സഹായി​ക്കു​ന്നു. പുതിയ കാര്യങ്ങൾ പഠിച്ചു​കൊണ്ട്‌ പുതിയ വിവരങ്ങൾ ശേഖരി​ക്കാ​നുള്ള മസ്‌തി​ഷ്‌ക​ത്തി​ന്റെ ദാഹം ശമിപ്പി​ക്കു​ക​യാണ്‌ പരിഹാ​രം.

നിങ്ങളു​ടെ ജോലി സംബന്ധിച്ച്‌ കൂടുതൽ കാര്യങ്ങൾ പഠിക്കു​ന്നത്‌ കാലാ​ന്ത​ര​ത്തിൽ കൂടുതൽ ആകർഷ​ക​മായ ജോലി ലഭിക്കാൻ ഇടയാ​ക്കി​യേ​ക്കാം. എന്നാൽ അതു സംഭവി​ച്ചി​ല്ലെ​ങ്കിൽപ്പോ​ലും പഠന​പ്ര​ക്രി​യ​തന്നെ നിങ്ങളു​ടെ ജോലി കൂടുതൽ രസകര​വും സംതൃ​പ്‌തി​ദാ​യ​ക​വു​മാ​ക്കി​ത്തീർക്കും. ഗ്രന്ഥകർത്താ​ക്ക​ളായ ചാൾസ്‌ കാമ​റൊ​നും സൂസൻ എലു​സൊ​റും ഇതു ചൂണ്ടി​ക്കാ​ട്ടു​ന്നു: “പഠനം നിങ്ങളു​ടെ കഴിവു​കൾ വർധി​പ്പി​ച്ചു​കൊണ്ട്‌ നിങ്ങളു​ടെ ആത്മവി​ശ്വാ​സത്തെ ബലപ്പെ​ടു​ത്തുക മാത്രമല്ല ചെയ്യു​ന്നത്‌. ജീവി​ത​ത്തോ​ടുള്ള നിങ്ങളു​ടെ പൊതു​വി​ലുള്ള മനോ​ഭാ​വ​ത്തി​നും അതു മാറ്റം വരുത്തും: അതായത്‌, പ്രശ്‌നങ്ങൾ പരിഹ​രി​ക്കാ​നാ​കു​മെ​ന്നും ബുദ്ധി​മു​ട്ടു​കൾ തരണം ചെയ്യാ​നാ​കു​മെ​ന്നും ഭയം ദൂരീ​ക​രി​ക്കാ​നാ​കു​മെ​ന്നും വിചാ​രി​ച്ച​തി​നെ​ക്കാൾ അധികം കാര്യങ്ങൾ ചെയ്യാ​നാ​കു​മെ​ന്നും ഉള്ള മനോ​ഭാ​വം അതു നിങ്ങളിൽ ഉളവാ​ക്കും.”

‘പക്ഷേ എന്റെ ജോലി​യെ​പ്പറ്റി സകലതും ഞാൻ പണ്ടേ പഠിച്ച​താണ്‌!’ എന്നു നിങ്ങൾ തടസ്സവാ​ദം ഉന്നയി​ച്ചേ​ക്കാം. അങ്ങനെ​യാ​ണെ​ങ്കിൽ, നിങ്ങളു​ടെ ജോലി​യു​മാ​യി നേരി​ട്ട​ല്ലാ​തെ ബന്ധപ്പെ​ട്ടി​രി​ക്കുന്ന കാര്യങ്ങൾ പഠിക്ക​രു​തോ? ഉദാഹ​ര​ണ​ത്തിന്‌ നിങ്ങൾക്ക്‌ മനുഷ്യ ബന്ധങ്ങ​ളെ​ക്കു​റി​ച്ചോ നിങ്ങളു​ടെ ഉപകര​ണ​ത്തെ​ക്കു​റി​ച്ചോ കൂടുതൽ കാര്യങ്ങൾ പഠിക്കാൻ തീരു​മാ​നി​ക്കാ​വു​ന്ന​താണ്‌. കൂടുതൽ മെച്ചമാ​യി ഒരു ഓഫീസ്‌ മെമ്മോ തയ്യാറാ​ക്കു​ന്ന​തെ​ങ്ങ​നെ​യെ​ന്നോ ഒരു യോഗം നടത്തു​ന്ന​തെ​ങ്ങ​നെ​യെ​ന്നോ പഠിക്കാ​വു​ന്ന​താണ്‌. മേലധി​കാ​രി​ക​ളോട്‌ ഇടപെ​ടാ​നുള്ള ഏറ്റവും ഫലപ്ര​ദ​മായ മാർഗ​ങ്ങ​ളെ​ക്കു​റി​ച്ചും നിങ്ങൾക്കു പഠിക്കാൻ കഴിയും.

ഈ കാര്യ​ങ്ങ​ളൊ​ക്കെ നിങ്ങൾ എങ്ങനെ പഠിക്കും? ഒരുപക്ഷേ നിങ്ങൾക്ക്‌ ഉപകാ​ര​പ്പെ​ടുന്ന ചില കോഴ്‌സു​കൾ, നിങ്ങൾ ജോലി ചെയ്യുന്ന കമ്പനി വാഗ്‌ദാ​നം ചെയ്യു​ന്നു​ണ്ടാ​കും. അല്ലെങ്കിൽ നിങ്ങൾക്കാ​വ​ശ്യ​മായ പുസ്‌ത​കങ്ങൾ ഒരു ഗ്രന്ഥശാ​ല​യി​ലു​ണ്ടാ​യി​രി​ക്കാം. എന്നാൽ അത്ര പ്രാധാ​ന്യ​മു​ള്ള​താ​യി നമ്മൾ കണക്കാ​ക്കാത്ത ഉറവി​ട​ങ്ങ​ളു​മുണ്ട്‌. അവയെ​യും നാം അവഗണി​ച്ചു​കൂ​ടാ. സഹജോ​ലി​ക്കാ​രെ​യും അവരുടെ കഴിവു​ക​ളെ​യും കഴിവു​കേ​ടു​ക​ളെ​യും നിരീ​ക്ഷി​ക്കു​ന്ന​തും ഒരു പഠനരീ​തി​യാണ്‌. നിങ്ങളു​ടെ പരാജ​യ​ങ്ങ​ളിൽനിന്ന്‌ നിങ്ങൾക്കു പഠിക്കാൻ കഴിയും—വിജയ​ങ്ങ​ളിൽനി​ന്നും പഠിക്കാ​നാ​കും, അവയെ വിശക​ലനം ചെയ്‌തു​കൊണ്ട്‌. സ്വന്തം അനുഭ​വ​ങ്ങ​ളിൽനി​ന്നും മറ്റുള്ള​വരെ നിരീ​ക്ഷി​ക്കു​ന്ന​തിൽനി​ന്നും നിങ്ങൾക്ക്‌, പുസ്‌ത​ക​ങ്ങ​ളിൽ ഒരിക്ക​ലും വായി​ച്ചി​ട്ടി​ല്ലാത്ത അല്ലെങ്കിൽ ഒരു ക്ലാസി​ലും ഒരിക്ക​ലും കേട്ടി​ട്ടി​ല്ലാത്ത കാര്യങ്ങൾ പഠിക്കാ​നാ​കും.

അവസാ​ന​മാ​യി ചില നിർദേ​ശ​ങ്ങൾ

ജോലി​യെ നോക്കി​ക്കാ​ണാ​വുന്ന മറ്റൊരു വിധവു​മുണ്ട്‌. കൂടുതൽ അർഹനാ​ണെ​ങ്കി​ലും മറ്റുള്ള​വർക്കാണ്‌ എപ്പോ​ഴും സുവർണാ​വ​സ​രങ്ങൾ ലഭിക്കു​ന്ന​തെ​ന്നും യഥാർഥ​ത്തിൽ ചെയ്യാൻ ആഗ്രഹി​ക്കുന്ന ജോലി ചെയ്യാൻ ഒരിക്കൽപ്പോ​ലും അവസരം ലഭിച്ചി​ട്ടി​ല്ലെ​ന്നും നിങ്ങൾ ചിന്തി​ച്ചേ​ക്കാം. നിങ്ങ​ളോ​ടു യോജി​ക്കു​ന്ന​വ​രു​മാ​യി ഒട്ടേറെ പ്രാവ​ശ്യം സംസാ​രി​ച്ചു​ക​ഴി​യു​മ്പോൾ ഇതെല്ലാം സത്യമാ​ണെന്ന്‌ നിങ്ങൾ മനസ്സി​ലു​റ​പ്പി​ച്ചേ​ക്കാം.

എന്നാൽ ഇത്‌ സത്യമാ​യി​രി​ക്ക​ണ​മെ​ന്നില്ല. തങ്ങളുടെ ജോലി ആസ്വദി​ക്കുന്ന പലരും അത്‌ ആസ്വദി​ക്കാ​നുള്ള കഴിവ്‌ നേടി​യെ​ടു​ത്ത​താണ്‌. വീടുകൾ രൂപകൽപ്പന ചെയ്യുന്ന ഒരു വ്യക്തിക്ക്‌ ബസ്‌ ഓടി​ക്കു​ന്ന​തി​ലും ആനന്ദം കണ്ടെത്താം. കാരണം? ജോലി​യോ​ടുള്ള സർഗാത്മക സമീപനം അയാൾക്ക്‌ സന്തോ​ഷ​വും സംതൃ​പ്‌തി​യും നൽകുന്നു.

അതു​കൊണ്ട്‌ വാരാ​ന്ത​ങ്ങ​ളോ​ടുള്ള താരത​മ്യ​ത്തിൽ ജോലി​ദി​വ​സങ്ങൾ സന്തോ​ഷ​ര​ഹി​ത​മാ​ണെന്ന നിഷേ​ധാ​ത്മക ചിന്ത ഒഴിവാ​ക്കുക. ചെയ്‌തു​പോയ തെറ്റു​ക​ളെ​ക്കു​റിച്ച്‌ ആലോ​ചി​ച്ചും ഇനി എന്തു കുഴപ്പ​മാ​യി​രി​ക്കും സംഭവി​ക്കുക എന്നു സങ്കൽപ്പി​ച്ചും മറ്റുള്ളവർ നിങ്ങ​ളെ​പ്പറ്റി എന്തു കരുതും എന്ന്‌ വേവലാ​തി​പ്പെ​ട്ടും​കൊണ്ട്‌ സമയം പാഴാ​ക്ക​രുത്‌. ചെയ്യാ​നുള്ള ജോലി​യിൽ ശ്രദ്ധ പതിപ്പി​ക്കുക. അതിൽ നിങ്ങളു​ടെ മുഴു​ശ്ര​ദ്ധ​യും കേന്ദ്രീ​ക​രി​ക്കുക. ഏറ്റവും ഇഷ്ടപ്പെട്ട ഒരു ഹോബി​യിൽ എന്നപോ​ലെ അതിൽ മുഴു​കാൻ ശ്രമി​ക്കുക. കഴിവി​ന്റെ പരമാ​വധി ചെയ്യാൻ നോക്കുക, ജോലി നന്നായി ചെയ്‌തു​തീർത്ത്‌ അതിൽ ആനന്ദമ​ട​യുക.

[11-ാം പേജിലെ ചതുരം/ചിത്രം]

നിങ്ങളുടെ ജോലി​യെ അവഗണി​ക്കാ​തി​രി​ക്കുക

സദൃശ​വാ​ക്യ​ങ്ങൾ 27:23, 24-ൽ ബൈബിൾ പറയുന്നു: “നിന്റെ ആടുക​ളു​ടെ അവസ്ഥ അറിവാൻ ജാഗ്ര​ത​യാ​യി​രിക്ക; നിന്റെ കന്നുകാ​ലി​ക​ളിൽ നന്നായി ദൃഷ്ടി​വെ​ക്കുക. സമ്പത്തു എന്നേക്കും ഇരിക്കു​ന്ന​ത​ല്ല​ല്ലോ; കിരീടം തലമു​റ​ത​ല​മു​റ​യോ​ളം ഇരിക്കു​മോ?” എന്താണ്‌ ഇതിന്റെ അർഥം?

നിധി​യും (സമ്പത്തും) പ്രമുഖ സ്ഥാനങ്ങ​ളും (ഒരു കിരീടം) നേടി​യെ​ടു​ത്താൽത്തന്നെ മിക്ക​പ്പോ​ഴും അതു താത്‌കാ​ലി​ക​മാ​ണെന്നു തെളി​യും. അതു​കൊണ്ട്‌ ബൈബിൾ കാലങ്ങ​ളി​ലെ ഒരു ഇടയൻ തന്റെ ആടുകളെ പരിപാ​ലി​ക്കു​ന്ന​തിൽ, അതായത്‌ ‘കന്നുകാ​ലി​ക​ളിൽ നന്നായി ദൃഷ്ടി​വെക്കു’ന്നതിൽ, ഉത്സാഹ​പൂർവം ശ്രദ്ധ കൊടു​ത്തു​കൊണ്ട്‌, വിവേകം കാണി​ച്ചി​രു​ന്നു. തുടർന്നുള്ള വാക്യങ്ങൾ കാണി​ക്കു​ന്ന​തു​പോ​ലെ അത്‌ ജോലി​ക്കാ​ര​ന്റെ​യും കുടും​ബ​ത്തി​ന്റെ​യും സാമ്പത്തിക സുരക്ഷി​ത​ത്വ​ത്തിൽ കലാശി​ക്കു​മാ​യി​രു​ന്നു.—സദൃശ​വാ​ക്യ​ങ്ങൾ 27:25-27.

ഇന്നോ? ചെയ്‌തു​കൊ​ണ്ടി​രി​ക്കുന്ന ജോലി വിട്ടു​പോ​രാൻ തങ്ങളെ പ്രാപ്‌ത​രാ​ക്കു​മെന്ന്‌ കരുതുന്ന സമ്പത്തോ പ്രമുഖ സ്ഥാനമോ കൈവ​രി​ക്കു​ന്ന​തി​ലാണ്‌ ആളുകൾ മിക്ക​പ്പോ​ഴും മനസ്സു​വെ​ക്കു​ന്നത്‌. ഇവരിൽ ചിലർക്ക്‌ യാഥാർഥ്യ​ബോ​ധ​ത്തോ​ടു​കൂ​ടിയ ആസൂ​ത്ര​ണ​ങ്ങ​ളു​ണ്ടാ​യി​രി​ക്കും; മറ്റു ചിലരാ​കട്ടെ കിനാവു കാണു​ക​യാ​യി​രി​ക്കും. ഈ രണ്ടു സാഹച​ര്യ​ത്തി​ലും ചെയ്‌തു​കൊ​ണ്ടി​രി​ക്കുന്ന ജോലി​യെ വെറു​ക്കു​ന്ന​തോ അവഗണി​ക്കു​ന്ന​തോ ബുദ്ധി​യാ​യി​രി​ക്കില്ല. ഏറ്റവും ആശ്രയി​ക്കാ​വുന്ന വരുമാ​ന​മാർഗം, തുടർന്നും അങ്ങനെ​ത​ന്നെ​യാ​യി​രി​ക്കും. തന്റെ “കന്നുകാ​ലിക”ളിൽ ശ്രദ്ധ കേന്ദ്രീ​ക​രിച്ച്‌ ആശ്രയ​യോ​ഗ്യ​മായ ആ വരുമാ​ന​മാർഗ​ത്തിൽ പൂർണ ശ്രദ്ധ കേന്ദ്രീ​ക​രി​ക്കു​ന്നത്‌ എത്രയോ ബുദ്ധി​യാ​യി​രി​ക്കും. ഒരുവൻ അങ്ങനെ ചെയ്യു​ന്ന​പക്ഷം അത്‌ ഇപ്പോൾ മാത്രമല്ല ഭാവി​യി​ലും സാമ്പത്തിക സുരക്ഷി​ത​ത്വം ഉറപ്പു​വ​രു​ത്തി​യേ​ക്കാം.