മഴവന​ങ്ങളെ നശിപ്പി​ക്കൽ

പണ്ടുപണ്ട്‌ നമ്മുടെ ഗ്രഹത്തിന്‌ മരതക​പ്പ​ച്ച​നി​റ​ത്തി​ലുള്ള ഒരു അരപ്പട്ട​യു​ണ്ടാ​യി​രു​ന്നു. എല്ലാത്തരം വൃക്ഷങ്ങ​ളും​കൊ​ണ്ടാണ്‌ അതിന്റെ ഊടും പാവും നെയ്‌തി​രു​ന്നത്‌. വിശാ​ല​മായ നദികൾ അതിനു തൊങ്ങൽ ചാർത്തി​യി​രു​ന്നു.

പ്രകൃ​തി​യി​ലെ ഒരു കൂറ്റൻ ഹരിത​ഗൃ​ഹം​പോ​ലെ തോന്നി​ച്ചി​രുന്ന അത്‌ വശ്യസു​ന്ദ​ര​മായ, വൈവി​ധ്യ​മാർന്ന ഒരു മേഖല​യാ​യി​രു​ന്നു. ലോക​ത്തി​ലെ മൃഗ-സസ്യ-പ്രാണി വർഗങ്ങ​ളിൽ പകുതി​യും വസിച്ചി​രു​ന്നത്‌ അവി​ടെ​യാണ്‌. ഭൂമി​യിൽവെച്ച്‌ ഏറ്റവും സമ്പുഷ്ട​മായ പ്രദേ​ശ​മാ​യി​രു​ന്നെ​ങ്കി​ലും അത്‌ ലോല​മാ​യി​രു​ന്നു—ആരും സങ്കൽപ്പി​ച്ചി​ട്ടി​ല്ലാ​ത്ത​വി​ധം അത്ര ലോലം.

നാം ഇന്ന്‌ ഉഷ്‌ണ​മേ​ഖലാ മഴവനം എന്നു വിളി​ക്കുന്ന അത്‌ വിശാ​ല​വും നശിപ്പി​ക്കാ​നാ​കാ​ത്ത​തു​മായ ഒന്നായി കാണ​പ്പെട്ടു. എന്നാൽ വാസ്‌തവം അതായി​രു​ന്നില്ല. മഴവനം ആദ്യം കരീബി​യൻ ദ്വീപു​ക​ളിൽനിന്ന്‌ അപ്രത്യ​ക്ഷ​മാ​കാൻ തുടങ്ങി. 1671-ൽ—ഡോഡോ പക്ഷി നാമാ​വ​ശേ​ഷ​മാ​കു​ന്ന​തി​നു പത്തു വർഷം മുമ്പ്‌a—കരിമ്പിൻ തോട്ടങ്ങൾ ബാർബ​ഡോ​സി​ലെ വനം കയ്യടക്കി. ആ പ്രദേ​ശത്തെ മറ്റു ദ്വീപു​ക​ളി​ലും സമാന​മായ അനുഭ​വ​മു​ണ്ടാ​യി. 20-ാം നൂറ്റാ​ണ്ടിൽ അലയടി​ച്ചു​യർന്നി​രി​ക്കുന്ന ഒരു ആഗോള തരംഗ​ത്തി​ന്റെ മുന്നോ​ടി​യാ​യി​രു​ന്നു അത്‌.

ഇന്ന്‌ ഭൂതല​ത്തി​ന്റെ ഏതാണ്ട്‌ 5 ശതമാനം മാത്രമേ ഉഷ്‌ണ​മേ​ഖലാ മഴവന​ങ്ങ​ളു​ള്ളൂ. ഒരു നൂറ്റാണ്ടു മുമ്പ്‌ അത്‌ 12 ശതമാ​ന​മാ​യി​രു​ന്നു. ഓരോ വർഷവും ഇംഗ്ലണ്ടി​നെ​ക്കാൾ വലുപ്പ​മുള്ള, അഥവാ 1,30,000 ചതുരശ്ര കിലോ​മീ​റ്റർ വനം വെട്ടി​ത്തെ​ളി​ക്കു​ക​യോ തീയി​ടു​ക​യോ ചെയ്യുന്നു. ഞെട്ടി​ക്കുന്ന ഈ നശീകരണ തോത്‌ കാണി​ക്കു​ന്നത്‌ മഴവന​ത്തി​നും അതിലെ നിവാ​സി​കൾക്കും ഡോ​ഡോ​യു​ടെ അതേ ഗതിതന്നെ വരു​മെ​ന്നാണ്‌. “മഴവനം ഇന്ന വർഷ​ത്തോ​ടെ അപ്രത്യ​ക്ഷ​മാ​കു​മെന്നു പറയാ​നാ​കി​ല്ലെ​ങ്കി​ലും കാര്യ​ങ്ങൾക്കു മാറ്റം വരാത്ത​പക്ഷം വനം അപ്രത്യ​ക്ഷ​മാ​കു​ക​തന്നെ ചെയ്യും” എന്ന്‌ ബ്രസീ​ലി​ലെ ഒരു മഴവന ഗവേഷ​ക​നായ ഫിലിപ്പ്‌ ഫേർൺ​സൈഡ്‌ മുന്നറി​യി​പ്പു നൽകുന്നു. കഴിഞ്ഞ വർഷം ഒക്‌ടോ​ബ​റിൽ ഡയാന ജീൻ സ്‌കീ​മോ ഇങ്ങനെ റിപ്പോർട്ടു ചെയ്യു​ക​യു​ണ്ടാ​യി: “ബ്രസീ​ലിൽ ഈ വർഷം തുടർന്നു​കൊ​ണ്ടി​രി​ക്കുന്ന കാടു​വെട്ടി തീയിടൽ പ്രക്രിയ ഇന്തൊ​നീ​ഷ്യ​യി​ലു​ണ്ടായ സംഭവ​ത്തെ​ക്കാൾ വലുതാ​ണെന്ന്‌ ഇക്കഴിഞ്ഞ ആഴ്‌ച​ക​ളി​ലാ​യി ലഭിച്ച വിവരങ്ങൾ സൂചി​പ്പി​ക്കു​ന്നു. ഇന്തൊ​നീ​ഷ്യ​യിൽ പ്രമുഖ നഗരങ്ങളെ വലയം ചെയ്‌ത പുകപ​ടലം മറ്റു രാജ്യ​ങ്ങ​ളി​ലേ​ക്കും വ്യാപി​ക്കു​ക​യു​ണ്ടാ​യി. ഉപഗ്രഹ ചിത്ര​ങ്ങ​ളിൽനി​ന്നു ലഭിച്ച വിവര​ങ്ങ​ള​നു​സ​രിച്ച്‌ ആമസോൺ പ്രദേ​ശത്ത്‌ കാടു​വെട്ടി തീയി​ടു​ന്നത്‌ കഴിഞ്ഞ വർഷം 28 ശതമാ​ന​മാ​യി വർധി​ച്ചി​രി​ക്കു​ന്നു. ഏറ്റവും പുതിയ, അതായത്‌ 1994-ലെ വനനശീ​കരണ കണക്കുകൾ, 1991 മുതൽ 34 ശതമാനം വർധനവു കാണി​ക്കു​ന്നു.”

“മരുഭൂ​മി​യിൽ വളരുന്ന വൃക്ഷങ്ങൾ”

ഒരു നൂറ്റാണ്ടു മുമ്പു​വരെ മനുഷ്യ​സ്‌പർശ​മേൽക്കാ​തെ നില​കൊ​ണ്ടി​രുന്ന മഴവനങ്ങൾ ഇത്ര പെട്ടെന്ന്‌ നശിപ്പി​ക്ക​പ്പെ​ടു​ന്നത്‌ എന്തു​കൊ​ണ്ടാണ്‌? ഭൂതല​ത്തി​ന്റെ 20 ശതമാനം വരുന്ന മിതോഷ്‌ണ വനങ്ങൾക്ക്‌ കഴിഞ്ഞ 50 വർഷം​കൊണ്ട്‌ ഗണ്യമായ നാശം സംഭവി​ച്ചി​ട്ടില്ല. മഴവനം എളുപ്പ​ത്തിൽ നശിക്കാ​നി​ട​യാ​ക്കു​ന്നത്‌ എന്താണ്‌? അവയുടെ തനതായ പ്രത്യേ​ക​ത​യാണ്‌ അതിന്റെ കാരണം.

മഴവനത്തെ “മരുഭൂ​മി​യിൽ വളരുന്ന വൃക്ഷങ്ങൾ” എന്ന്‌ വിശേ​ഷി​പ്പി​ച്ചി​രി​ക്കു​ന്നത്‌ ഉചിത​മാ​ണെന്ന്‌ ഉഷ്‌ണ​മേ​ഖലാ മഴവനം എന്ന തന്റെ ഇംഗ്ലീഷ്‌ പുസ്‌ത​ക​ത്തിൽ ആർണോൾഡ്‌ ന്യൂമാൻ പറയുന്നു. ആമസോൺ നദീത​ട​ത്തി​ലെ​യും ബോർണി​യോ​യി​ലെ​യും ചില ഭാഗങ്ങ​ളിൽ “വെള്ളമ​ണ​ലി​ന്മേൽപ്പോ​ലും വിസ്‌മ​യാ​വ​ഹ​മാം​വി​ധം കൊടും​കാ​ടു​കൾ വളർന്നു​നിൽക്കുന്ന”തായി അദ്ദേഹം വിവരി​ക്കു​ന്നു. മിക്ക മഴവന​ങ്ങ​ളും മണലിൽ വളരു​ക​യി​ല്ലെ​ങ്കി​ലും ഏതാണ്ട്‌ എല്ലാം​തന്നെ വളക്കൂ​റി​ല്ലാ​ത്ത​തും മേൽമണ്ണ്‌ തീരെ കുറവാ​യ​തു​മായ പ്രദേ​ശ​ങ്ങ​ളി​ലാ​ണു വളർന്നു​നിൽക്കു​ന്നത്‌. മിതോഷ്‌ണ വനത്തിലെ മേൽമ​ണ്ണിന്‌ രണ്ടു മീറ്റർ ആഴം കാണു​മാ​യി​രി​ക്കു​മെ​ങ്കി​ലും ഒരു മഴവന​ത്തി​ന്റേ​തിന്‌ അഞ്ചു സെൻറി​മീ​റ്റ​റി​ല​ധി​കം വരിക​യില്ല. ഭൂമി​യിൽവെച്ച്‌ ഏറ്റവും നിബി​ഡ​മായ വനം ഇത്ര മോശ​മായ പരിസ്ഥി​തി​യിൽ തഴച്ചു​വ​ള​രു​ന്ന​തെ​ങ്ങനെ?

1960-കളിലും 1970-കളിലു​മാണ്‌ ശാസ്‌ത്ര​ജ്ഞ​ന്മാർ ഈ നിഗൂ​ഢ​ത​യു​ടെ ചുരു​ള​ഴി​ച്ചത്‌. വനം അക്ഷരാർഥ​ത്തിൽത്തന്നെ സ്വയം പോറ്റു​ന്ന​താ​യി അവർ കണ്ടെത്തി. സസ്യങ്ങൾക്കാ​വ​ശ്യ​മായ പോഷ​ക​ങ്ങ​ളി​ല​ധി​ക​വും ലഭിക്കു​ന്നതു മരച്ചി​ല്ല​ക​ളും ഇലകളും അടങ്ങിയ ചപ്പുച​വ​റു​ക​ളിൽനി​ന്നാണ്‌. സ്ഥായി​യായ ചൂടി​ന്റെ​യും ഈർപ്പ​ത്തി​ന്റെ​യും സഹായ​ത്തോ​ടെ ചിതലു​ക​ളും കുമി​ളു​ക​ളും മറ്റും ഇവയെ ദ്രുത​ഗ​തി​യിൽ വിഘടി​പ്പി​ക്കു​ന്നു. ഒന്നും പാഴാ​യി​പ്പോ​കു​ന്നില്ല; പകരം എല്ലാം പുനഃ​പ​ര്യ​യനം ചെയ്യ​പ്പെ​ടു​ന്നു. വനത്തിന്റെ പച്ചമേ​ലാ​പ്പിൽ നടക്കുന്ന സ്വേദ​ന​വും ബാഷ്‌പീ​ക​ര​ണ​വും​വഴി മഴവനം അതിനു ലഭിക്കുന്ന മഴയുടെ 75 ശതമാ​നം​വരെ പുനഃ​പ​ര്യ​യനം ചെയ്യുന്നു. പിന്നീട്‌, ഈ പ്രക്രി​യ​യി​ലൂ​ടെ രൂപം​കൊ​ള്ളുന്ന മേഘങ്ങൾ വനത്തെ വീണ്ടും നനയ്‌ക്കു​ന്നു.

എന്നാൽ ഈ അത്ഭുത വ്യവസ്ഥ​യ്‌ക്ക്‌ ഒരു ന്യൂന​ത​യുണ്ട്‌. ഏറെ കേടു​പ​റ്റി​യാൽ അതിനു സ്വയം കേടു​പോ​ക്കാ​നാ​കില്ല. മഴവന​ത്തി​ന്റെ ഒരു ചെറിയ ഭാഗം വെട്ടി​ത്തെ​ളി​ച്ചാൽ ഏതാനും വർഷങ്ങൾക്കു​ള്ളിൽ അതു പൂർവ​സ്ഥി​തി പ്രാപി​ക്കും. എന്നാൽ ഒരു വലിയ പ്രദേശം വെട്ടി​ത്തെ​ളി​ച്ചാൽ അത്‌ ഒരിക്ക​ലും പൂർവ​സ്ഥി​തി പ്രാപി​ച്ചെ​ന്നു​വ​രില്ല. കനത്ത മഴ പോഷ​ക​ങ്ങളെ ഒഴുക്കി​ക്ക​ള​യു​ന്നു, മേൽമ​ണ്ണി​ന്റെ നേർത്ത പാളി സൂര്യന്റെ ചൂടേറ്റു ചുട്ടു​പ​ഴു​ക്കു​ന്നു. ആ പ്രദേ​ശത്തു പിന്നെ പുല്ലു മാത്രമേ വളരു​ക​യു​ള്ളൂ.

കൃഷി​യി​ട​വും തടിയും ഹാംബർഗ​റും

കൃഷി ചെയ്യാൻ വേണ്ടത്ര സ്ഥലമി​ല്ലാത്ത വികസ്വര രാജ്യ​ങ്ങൾക്ക്‌ തങ്ങളുടെ ദേശത്തെ വിസ്‌തൃ​ത​മായ കന്യാ​വ​നങ്ങൾ വെട്ടി​ത്തെ​ളി​ക്കാൻ പാകത്തി​നു കിടക്കു​ന്ന​താ​യി തോന്നി. ദരി​ദ്ര​രും ഭൂരഹി​ത​രു​മായ കൃഷി​ക്കാ​രെ വനത്തിന്റെ ഭാഗങ്ങൾ വെട്ടി​ത്തെ​ളിച്ച്‌ കയ്യേറാൻ പ്രോ​ത്സാ​ഹി​പ്പി​ക്കു​ക​യാ​യി​രു​ന്നു “എളുപ്പ” പരിഹാ​രം—അമേരി​ക്ക​യു​ടെ പടിഞ്ഞാ​റൻ ഭാഗത്ത്‌ യൂറോ​പ്യൻ കുടി​യേ​റ്റ​ക്കാർ വാസമു​റ​പ്പി​ച്ച​തി​നോ​ടു സമാന​മായ ഒന്ന്‌. എന്നാൽ വനത്തെ​യും കർഷക​രെ​യും സംബന്ധി​ച്ചി​ട​ത്തോ​ളം ഫലങ്ങൾ വിനാ​ശ​ക​ര​മാ​യി​രു​ന്നു.

ഹരിത​സ​മൃ​ദ്ധ​മാ​യ മഴവനം കാണു​മ്പോൾ അവിടെ എന്തും വളരു​മെന്നു തോന്നി​യേ​ക്കാം. എന്നാൽ ഒരിക്കൽ മരങ്ങൾ വെട്ടി​വീ​ഴ്‌ത്തി​യാൽ, സമൃദ്ധ​മായ ഫലഭൂ​യി​ഷ്‌ഠ​ത​യെന്ന മിഥ്യാ​സ​ങ്കൽപ്പം പൊലി​യും. വിക്‌ടോ​റിയ എന്നു പേരുള്ള ഒരു ആഫ്രി​ക്ക​ക്കാ​രി ഈ പ്രശ്‌നം വിവരി​ക്കു​ന്നു. അവളുടെ കുടും​ബം അടുത്ത​യി​ടെ കയ്യേറിയ ഒരു കൊച്ചു​വ​ന​പ്ര​ദേ​ശ​ത്താണ്‌ അവൾ കൃഷി ചെയ്യു​ന്നത്‌.

“എനിക്കു നിലക്ക​ട​ല​യും മരച്ചീ​നി​യും വാഴയും കൃഷി​ചെ​യ്യാൻ വേണ്ടി​യാണ്‌ എന്റെ അമ്മായി​യപ്പൻ ഈ പ്രദേശം വെട്ടി​ത്തെ​ളിച്ച്‌ തീയി​ട്ടത്‌. ഇക്കൊല്ലം നല്ല വിളവു ലഭിക്കു​മെ​ന്നാണ്‌ വിശ്വാ​സം. പക്ഷേ രണ്ടോ മൂന്നോ വർഷം​കൊണ്ട്‌ ഈ മണ്ണിന്റെ വളക്കൂറു നഷ്ടമാ​കും. അപ്പോൾ ഞങ്ങൾക്ക്‌ കാടിന്റെ മറ്റൊരു ഭാഗം വെട്ടി​ത്തെ​ളി​ക്കേ​ണ്ടി​വ​രും. അത്‌ ബുദ്ധി​മു​ട്ടുള്ള പണിയാണ്‌. എന്തു ചെയ്യാൻ, ജീവി​ക്കാൻ വേറെ വഴിയില്ല.”

വിക്‌ടോ​റി​യ​യെ​യും കുടും​ബ​ത്തെ​യും​പോ​ലെ കാടു​വെട്ടി തീയി​ടുന്ന ഏതാണ്ട്‌ 20 കോടി കർഷക​രെ​ങ്കി​ലു​മുണ്ട്‌! മഴവന​ത്തി​ന്റെ വർഷം​തോ​റു​മുള്ള നശീക​ര​ണ​ത്തി​ന്റെ 60 ശതമാ​ന​ത്തിന്‌ ഉത്തരവാ​ദി​കൾ അവരാണ്‌. നാടോ​ടി​ക​ളായ ഈ കർഷകർ ഇതി​നെ​ക്കാൾ എളുപ്പ​മുള്ള ഒരു കൃഷി​രീ​തി​യാണ്‌ ഇഷ്ടപ്പെ​ടു​ന്ന​തെ​ങ്കി​ലും അവർക്ക്‌ ഇതല്ലാതെ വേറെ മാർഗ​മില്ല. നിത്യ​വൃ​ത്തി​ക്കു വകതേ​ടാൻ പാടു​പെ​ടുന്ന അവർ മഴവനത്തെ പരിര​ക്ഷി​ക്കാ​നുള്ള ചെലവ്‌ തങ്ങൾക്കു താങ്ങാ​വു​ന്ന​തി​ലേ​റെ​യാ​ണെന്നു കരുതു​ന്നു.

മിക്ക കൃഷി​ക്കാ​രും വനം വെട്ടി​ത്തെ​ളി​ക്കു​ന്നത്‌ കൃഷി ചെയ്യാ​നാ​ണെ​ങ്കി​ലും മറ്റുള്ളവർ കന്നുകാ​ലി​കളെ മേയ്‌ക്കാ​നാണ്‌ അങ്ങനെ ചെയ്യു​ന്നത്‌. മധ്യ അമേരി​ക്ക​യി​ലെ​യും തെക്കേ അമേരി​ക്ക​യി​ലെ​യും മഴവന​ങ്ങ​ളു​ടെ നശീക​ര​ണ​ത്തി​നി​ട​യാ​ക്കുന്ന മറ്റൊരു പ്രധാന കാരണം കാലി​വ​ളർത്ത​ലാണ്‌. ഈ കന്നുകാ​ലി​ക​ളിൽനി​ന്നു ലഭിക്കുന്ന മാംസം ചെന്നെ​ത്തു​ന്നതു വടക്കേ അമേരി​ക്ക​യി​ലാണ്‌. അവിടത്തെ ക്ഷിപ്ര​ഭ​ക്ഷ​ണ​ശാ​ല​ക​ളി​ലെ ഹാംബർഗ​റു​കൾക്കു വിലകു​റ​വാ​യ​തി​നാൽ അവയ്‌ക്കു നല്ല ചെലവാണ്‌.

എങ്കിലും വൻകിട കാലി​വ​ളർത്തു​കാ​രും ചെറു​കിട കർഷക​രു​ടെ അതേ പ്രശ്‌നം നേരി​ടു​ന്നു. മഴവന​ത്തി​ലെ ചാരത്തിൽനിന്ന്‌ ഉയിർക്കൊ​ള്ളുന്ന ഒരു മേച്ചിൽപ്പു​റം കന്നുകാ​ലി​കളെ അഞ്ചു വർഷത്തി​ല​ധി​കം പോറ്റു​ക​യി​ല്ലെ​ന്നു​തന്നെ പറയാം. മഴവനത്തെ മേച്ചിൽപ്പു​റ​മാ​ക്കി മാറ്റു​ന്നത്‌ ഏതാനും പേരെ സംബന്ധി​ച്ചി​ട​ത്തോ​ളം ആദായ​ക​ര​മാ​യി​രി​ക്കാം. എന്നാൽ ആഹാരം ഉത്‌പാ​ദി​പ്പി​ക്കാൻ മനുഷ്യൻ രൂപകൽപ്പന ചെയ്‌തി​ട്ടുള്ള ഏറ്റവും പാഴ്‌ചെ​ല​വുള്ള രീതി​ക​ളു​ടെ കൂട്ടത്തിൽ ഇതിനെ പട്ടിക​പ്പെ​ടു​ത്താ​വു​ന്ന​താണ്‌.b

മഴവനം നേരി​ടുന്ന മറ്റൊരു പ്രധാന ഭീഷണി​ക്കു കാരണം മരം മുറി​ക്ക​ലാണ്‌. മരം മുറിക്കൽ മഴവനത്തെ നശിപ്പി​ക്കു​ന്നു​വെന്ന്‌ അവശ്യം അർഥമില്ല. ചില കമ്പനികൾ വാണിജ്യ ഇനങ്ങളിൽപ്പെട്ട ഏതാനും മരങ്ങൾ മാത്രമേ വെട്ടി​യി​ടു​ന്നു​ള്ളൂ. അതു​കൊണ്ട്‌ വനം താമസി​യാ​തെ പൂർവ​സ്ഥി​തി പ്രാപി​ക്കു​ന്നു. എന്നാൽ തടിവ്യ​വ​സായ കമ്പനികൾ വർഷം​തോ​റും വെട്ടി​യി​ടുന്ന 45,000 ചതുരശ്ര കിലോ​മീ​റ്റർ വനത്തിന്റെ മൂന്നിൽ രണ്ടു ഭാഗം കനത്ത മരം മുറി​ക്ക​ലി​നു വിധേ​യ​മാ​കു​ന്ന​തു​കൊണ്ട്‌ അവിടത്തെ വൃക്ഷങ്ങ​ളു​ടെ 5-ൽ 1 വീതം മാത്രമേ ഒരു കേടും​കൂ​ടാ​തെ വീണ്ടും വളരു​ന്നു​ള്ളൂ.

“മനോ​ഹ​ര​മായ ഒരു വനം അനിയ​ന്ത്രിത മരം​വെട്ടു മൂലം നശിപ്പി​ക്ക​പ്പെ​ട്ടി​രി​ക്കു​ന്ന​താ​യി കാണു​മ്പോൾ ഞാൻ നടുങ്ങി​പ്പോ​കു​ന്നു,” സസ്യശാ​സ്‌ത്ര​ജ്ഞ​നായ മാനുവൽ ഫീഡാൽഗോ നെടു​വീർപ്പോ​ടെ പറയുന്നു. “വെട്ടി​ത്തെ​ളിച്ച ആ പ്രദേ​ശത്ത്‌ മറ്റു സസ്യജാ​ലങ്ങൾ മുളച്ചു​വ​രു​മെ​ങ്കി​ലും ഇപ്പോൾ അത്‌ രണ്ടാമതു രൂപം​കൊണ്ട ഒരു വനമാണ്‌—മുമ്പ​ത്തേ​തി​നെ അപേക്ഷിച്ച്‌ വളരെ കുറവ്‌ സസ്യയി​ന​ങ്ങളേ അവിടെ വളരു​ക​യു​ള്ളൂ. വനം പൂർവ​സ്ഥി​തി പ്രാപി​ക്കാൻ നൂറ്റാ​ണ്ടു​ക​ളോ സഹസ്രാ​ബ്ദ​ങ്ങ​ളോ​പോ​ലും എടു​ത്തേ​ക്കാം.”

തടിക്ക​മ്പ​നി​കൾ മറ്റു രീതി​ക​ളി​ലും വനനശീ​ക​രണം ത്വരി​ത​പ്പെ​ടു​ത്തു​ന്നുണ്ട്‌. മരം​വെ​ട്ടു​കാർ വെട്ടി​യു​ണ്ടാ​ക്കുന്ന റോഡു​ക​ളി​ലൂ​ടെ​യാണ്‌ മുഖ്യ​മാ​യും കന്നുകാ​ലി​കളെ മേയ്‌ക്കു​ന്ന​വ​രും നാടോ​ടി​ക​ളായ കർഷക​രും വനം കയ്യടക്കു​ന്നത്‌. ചില​പ്പോൾ മരം​വെ​ട്ടു​കാർ ഉപേക്ഷി​ച്ചു​പോ​രുന്ന അവശി​ഷ്ടങ്ങൾ കാട്ടു​തീ​യ്‌ക്ക്‌ ഇടയാ​ക്കു​ന്നു. തത്‌ഫ​ല​മാ​യി, അവർ വെട്ടി​ത്തെ​ളി​ച്ച​തി​നെ​ക്കാൾ അധികം വനം നശിക്കാ​നി​ട​യാ​കു​ന്നു. 1983-ലുണ്ടായ അത്തരം ഒരു കാട്ടു​തീ​യാണ്‌ ബൊർണി​യോ​യി​ലെ 30 ലക്ഷം ഏക്കർ വനം നശിക്കാൻ ഇടയാ​ക്കി​യത്‌.

വനം സംരക്ഷി​ക്കാൻ എന്തു ചെയ്‌തി​രി​ക്കു​ന്നു?

ഇത്തരം ഭീഷണി ഉണ്ടെങ്കി​ലും ശേഷി​ക്കുന്ന വനം പരിര​ക്ഷി​ക്കാൻ ചില ശ്രമങ്ങൾ നടക്കു​ന്നുണ്ട്‌. എന്നാൽ ഇതൊരു ഭഗീര​ഥ​പ്ര​യ​ത്‌ന​മാ​ണെ​ന്നു​തന്നെ പറയാം. ദേശീയ പാർക്കു​കൾക്ക്‌ മഴവന​ങ്ങ​ളു​ടെ ചെറിയ ഭാഗങ്ങൾ സംരക്ഷി​ക്കാൻ സാധി​ക്കും. എന്നാൽ പല പാർക്കു​കൾക്ക​ക​ത്തും നായാ​ട്ടും മരം​വെ​ട്ട​ലും തീയി​ട​ലു​മൊ​ക്കെ ഇപ്പോ​ഴും നടക്കു​ന്നുണ്ട്‌. പാർക്ക്‌ നോക്കി​ന​ട​ത്താൻ വികസ്വ​ര​രാ​ഷ്‌ട്ര​ങ്ങ​ളു​ടെ പക്കൽ വേണ്ടത്ര പണമില്ല.

അന്താരാ​ഷ്‌ട്ര കമ്പനികൾ പാപ്പരായ ഗവൺമെൻറു​കളെ എളുപ്പ​ത്തിൽ വശീക​രിച്ച്‌ മരം​വെ​ട്ടാ​നുള്ള അവകാശം നേടി​യെ​ടു​ക്കു​ന്നു—ചില സാഹച​ര്യ​ങ്ങ​ളിൽ വിദേശ കടം വീട്ടാൻ ലഭ്യമായ ഏതാനും ദേശീയ മുതൽക്കൂ​ട്ടു​ക​ളിൽ ഒന്ന്‌ അതാണ്‌. മാത്രമല്ല, നാടോ​ടി​ക​ളായ കോടി​ക്ക​ണ​ക്കി​നു കൃഷി​ക്കാർ മറ്റു പോം​വ​ഴി​ക​ളി​ല്ലാ​ത്ത​തു​കൊണ്ട്‌ വനാന്ത​ര​ങ്ങ​ളി​ലേക്ക്‌ ഇറങ്ങി​ച്ചെ​ല്ലു​ന്നു.

പലവിധ പ്രശ്‌ന​ങ്ങ​ളാൽ നട്ടംതി​രി​യുന്ന ഒരു ലോക​ത്തിൽ മഴവനത്തെ പരിര​ക്ഷി​ക്കു​ന്നത്‌ അത്ര പ്രാധാ​ന്യ​മേ​റിയ ഒരു സംഗതി​യാ​ണോ? അവ അപ്രത്യ​ക്ഷ​മാ​യാൽ നമുക്കു നഷ്ടമാ​കു​ന്നത്‌ എന്തായി​രി​ക്കും?

[അടിക്കു​റി​പ്പു​കൾ]