സുരക്ഷിത ജീവി​ത​ത്തി​നാ​യുള്ള അന്വേ​ഷ​ണം

സുരക്ഷി​ത​ത്വം. പലരും അതിനെ പല തരത്തിൽ വ്യാഖ്യാ​നി​ക്കു​ന്നു. ഒരാളെ സംബന്ധി​ച്ചി​ട​ത്തോ​ളം സുരക്ഷി​ത​ത്വം എന്നാൽ ഒരു തൊഴിൽ ഉണ്ടായി​രി​ക്കുക എന്നാണ്‌; വേറൊ​രാൾക്ക്‌ അതു സമ്പത്തും മൂന്നാ​മ​തൊ​രാൾക്ക്‌ അത്‌ കുറ്റകൃ​ത്യ​ര​ഹിത ചുറ്റു​പാ​ടും ആണ്‌. നിങ്ങളെ സംബന്ധി​ച്ചി​ട​ത്തോ​ളം സുരക്ഷി​ത​ത്വം മറ്റെ​ന്തെ​ങ്കി​ലു​മാ​ണോ അർഥമാ​ക്കു​ന്നത്‌?

നിങ്ങളു​ടെ വീക്ഷണം എന്തുതന്നെ ആയിരു​ന്നാ​ലും, ജീവിതം പരമാ​വധി സുരക്ഷി​തം ആക്കാനുള്ള ശ്രമത്തിൽ നിങ്ങൾ പല നടപടി​ക​ളും സ്വീക​രി​ക്കു​ന്നുണ്ട്‌ എന്നതിൽ സംശയ​മില്ല. ഒരു പരിധി വരെ എങ്കിലും വ്യക്തി​പ​ര​മായ സുരക്ഷി​ത​ത്വം ഉറപ്പു​വ​രു​ത്താൻ യൂറോ​പ്പി​ലെ ജനങ്ങൾ ചെയ്യു​ന്നത്‌ എന്തൊ​ക്കെ​യെന്നു പരിചി​ന്തി​ക്കുക.

ഉന്നത വിദ്യാ​ഭ്യാ​സം

യൂറോ​പ്യൻ കമ്മീഷന്റെ പ്രസി​ഡ​ന്റായ ഷാക്‌ സാന്റേ​യു​ടെ അഭി​പ്രാ​യ​ത്തിൽ, യൂറോ​പ്യൻ യൂണി​യ​നി​ലെ 20 ശതമാനം യുവജ​ന​ങ്ങ​ളും തൊഴിൽര​ഹി​ത​രാണ്‌. തന്മൂലം, അവരെ സംബന്ധി​ച്ചി​ട​ത്തോ​ളം, നിരവധി കാര്യ​ങ്ങ​ളും ഈ ചോദ്യ​ത്തെ ആശ്രയി​ച്ചി​രി​ക്കു​ന്നു: ജീവിതം സുരക്ഷി​തം ആക്കുന്ന ഒരു തൊഴിൽ എനി​ക്കെ​ങ്ങനെ കണ്ടെത്താ​നാ​കും? ഉന്നത വിദ്യാ​ഭ്യാ​സ​ത്തി​ലൂ​ടെ ആ ലക്ഷ്യം നേടി​യെ​ടു​ക്കാം എന്നാണു പലരും വിശ്വ​സി​ക്കു​ന്നത്‌. അത്തരം വിദ്യാ​ഭ്യാ​സം, വിദ്യാർഥി​കൾക്ക്‌ “തൊഴിൽ കമ്പോ​ള​ത്തിൽ കാര്യ​മായ പ്രയോ​ജനം ചെയ്യും” എന്ന്‌ ലണ്ടനിലെ ദ സൺഡേ ടൈംസ്‌ പറയുന്നു.

ഉദാഹ​ര​ണ​ത്തിന്‌, ജർമനി​യിൽ “ഉന്നത വിദ്യാ​ഭ്യാ​സ​ത്തി​നുള്ള വാഞ്‌ഛ എന്നത്തെ​യും പോ​ലെ​തന്നെ ശക്തമാണ്‌” എന്ന്‌ നാസൊ​യി​ഷെ നോയി​യെ പ്രെസെ റിപ്പോർട്ടു ചെയ്യുന്നു. അവിടെ, ഒരു സർവക​ലാ​ശാ​ലാ കോഴ്‌സ്‌ പൂർത്തി​യാ​ക്കാൻ ഒരു വിദ്യാർഥി ശരാശരി 22,00,000 രൂപ ചെലവ​ഴി​ക്കേണ്ടി വരുന്നു എന്ന വസ്‌തു​ത​യൊ​ന്നും ഒരു വിഷയമല്ല.

വിദ്യാ​ഭ്യാ​സ​ത്തെ ഗൗരവ​മാ​യി എടുക്കു​ക​യും തൊഴിൽ സുരക്ഷ ആഗ്രഹി​ക്കു​ക​യും ചെയ്യുന്ന യുവജ​നങ്ങൾ അഭിന​ന്ദനം അർഹി​ക്കു​ന്നു. തൊഴിൽ വൈദ​ഗ്‌ധ്യ​ങ്ങ​ളും യോഗ്യ​ത​ക​ളു​മുള്ള ഒരാൾക്ക്‌ തൊഴിൽ സമ്പാദി​ക്കാൻ എളുപ്പ​മാണ്‌. എന്നാൽ ഉന്നത വിദ്യാ​ഭ്യാ​സം എല്ലായ്‌പോ​ഴും തൊഴിൽ സുരക്ഷി​ത​ത്വം പ്രദാനം ചെയ്യു​ന്നു​ണ്ടോ? ഒരു വിദ്യാർഥി​നി ഇങ്ങനെ പറഞ്ഞു: “ഞാൻ എടുത്തി​രി​ക്കുന്ന കോഴ്‌സ്‌, അതിനു തക്ക ഒരു തൊഴിൽ സമ്പാദി​ക്കാൻ എന്നെ സഹായി​ക്കി​ല്ലെ​ന്നും തൊഴിൽ സുരക്ഷി​ത​ത്വം പ്രദാനം ചെയ്യി​ല്ലെ​ന്നും എനിക്കു തുടക്ക​ത്തി​ലേ അറിയാ​മാ​യി​രു​ന്നു.” ആ പെൺകു​ട്ടി​യു​ടേത്‌ ഒറ്റപ്പെട്ട കേസല്ല. ഒരു സമീപ വർഷത്തിൽ, ജർമനി​യിൽ തൊഴിൽര​ഹിത സർവക​ലാ​ശാ​ലാ ബിരു​ദ​ധാ​രി​ക​ളു​ടെ എണ്ണം സർവകാല അത്യു​ച്ച​ത്തിൽ എത്തി.

യുവജ​ന​ങ്ങൾക്ക്‌ ഇടയിലെ വർധിച്ച നിരക്കി​ലുള്ള തൊഴി​ലി​ല്ലാ​യ്‌മ​യു​ടെ വീക്ഷണ​ത്തിൽ ഹയർ സെക്കൻഡറി സ്‌കൂൾ വിദ്യാ​ഭ്യാ​സ​ത്തി​നു യാതൊ​രു വിലയും ഇല്ലാത്ത​തി​നാ​ലാ​ണു ഫ്രാൻസിൽ യുവജ​നങ്ങൾ സർവക​ലാ​ശാ​ലാ വിദ്യാ​ഭ്യാ​സം നേടു​ന്ന​തെന്ന്‌ ഒരു വർത്തമാ​ന​പ​ത്രം വ്യക്തമാ​ക്കി. എന്നാൽ, “ഡിഗ്രി ഉണ്ടെങ്കിൽ പോലും അതു​കൊ​ണ്ടു കാര്യ​മായ മെച്ച​മൊ​ന്നും ഇല്ല” എന്ന്‌ പല സർവക​ലാ​ശാ​ലാ വിദ്യാർഥി​ക​ളും തിരി​ച്ച​റി​യു​ന്നു. ബ്രിട്ട​നിൽ “സർവക​ലാ​ശാ​ലാ വിദ്യാ​ഭ്യാ​സ ജീവി​ത​ത്തി​ലെ സമ്മർദം വിദ്യാർഥി​ക​ളിൽ ഭയങ്കര ക്ഷതമേൽപ്പി​ക്കു​ന്നു” എന്ന്‌ ദി ഇൻഡി​പെ​ന്റന്റ്‌ റിപ്പോർട്ടു ചെയ്യുന്നു. ജീവി​ത​ത്തി​ലെ അരക്ഷി​താ​വ​സ്ഥയെ നേരി​ടാൻ വിദ്യാർഥി​കളെ സഹായി​ക്കു​ന്ന​തി​നു പകരം സർവക​ലാ​ശാ​ലാ ജീവിതം ചില​പ്പോ​ഴൊ​ക്കെ അവർക്കി​ട​യിൽ വിഷാദം, ഉത്‌കണ്‌ഠ, ആത്മാഭി​മാ​ന​ക്കു​റവ്‌ എന്നിങ്ങ​നെ​യുള്ള പ്രശ്‌ന​ങ്ങൾക്കു വഴിമ​രു​ന്നി​ടു​ന്ന​താ​യി റിപ്പോർട്ടു ചെയ്യ​പ്പെ​ടു​ന്നു.

മിക്ക​പ്പോ​ഴും, സുരക്ഷി​ത​മായ തൊഴിൽ സമ്പാദി​ക്കു​ന്ന​തിന്‌ സർവക​ലാ​ശാ​ലാ ബിരു​ദ​ത്തെ​ക്കാൾ കൂടുതൽ സഹായകം ആയിരി​ക്കു​ന്നത്‌ ഒരു തൊഴിൽ പഠിക്കു​ന്ന​തോ ഏതെങ്കി​ലും ഉത്‌പാ​ദന മേഖല​യിൽ പ്രാ​യോ​ഗിക പരിശീ​ലനം നേടു​ന്ന​തോ ആണ്‌.

10,000 സാധന​സാ​മ​ഗ്രി​കൾ ഉണ്ടായി​രു​ന്നാൽ മതിയോ?

സുരക്ഷിത ജീവി​ത​ത്തി​ന്റെ രഹസ്യം സമ്പത്താ​ണെന്നു പലരും കരുതു​ന്നു. അതു നല്ല ഒരു സമീപ​ന​മാ​ണെന്നു തോന്നി​യേ​ക്കാം. കാരണം ബാങ്കിൽ കാര്യ​മായ നിക്ഷേപം ഉണ്ടെങ്കിൽ പ്രയാസ കാലത്ത്‌ അത്‌ ഉപകരി​ക്കും. ‘ധനം പരിരക്ഷ നൽകുന്നു’ എന്നു ബൈബിൾ വിശദീ​ക​രി​ക്കു​ന്നു. (സഭാ​പ്ര​സം​ഗി 7:12, പി.ഒ.സി. ബൈബിൾ) എന്നാൽ, സമ്പൽസ​മൃ​ദ്ധി എല്ലായ്‌പോ​ഴും വ്യക്തിഗത സുരക്ഷി​ത​ത്വം മെച്ച​പ്പെ​ടു​ത്തു​ന്നു​ണ്ടോ?

അവശ്യം മെച്ച​പ്പെ​ടു​ത്ത​ണ​മെ​ന്നില്ല. കഴിഞ്ഞ 50 വർഷമാ​യി സമ്പത്തു വർധി​ച്ച​തി​നെ കുറിച്ചു പരിചി​ന്തി​ക്കുക. രണ്ടാം ലോക മഹായു​ദ്ധ​ത്തി​ന്റെ അവസാ​ന​ത്തോ​ടെ ജർമൻ ജനതതി​യിൽ ഒരു വലിയ പങ്ക്‌ ദാരി​ദ്ര്യ​ത്തി​ന്റെ പിടി​യിൽ അമർന്നു. എന്നാൽ, ഇന്ന്‌ ഒരു ജർമൻ വർത്തമാ​ന​പ​ത്രം പറയു​ന്നത്‌ അനുസ​രിച്ച്‌ ഒരു സാധാരണ ജർമൻകാ​രന്റെ പക്കൽ 10,000 സാധന​സാ​മ​ഗ്രി​കൾ ഉണ്ട്‌. സാമ്പത്തിക പ്രവച​നങ്ങൾ ശരിയാ​ണെന്നു വരികിൽ, വരും തലമുറ അതിലു​മ​ധി​കം വസ്‌തു​വ​കകൾ സ്വന്തമാ​ക്കും. എന്നുവ​രി​കി​ലും, ഇങ്ങനെ സമ്പത്തു കുന്നു​കൂ​ട്ടു​ന്നത്‌ ജീവിതം കൂടുതൽ സുരക്ഷി​തം ആക്കി തീർക്കു​മോ? ഇല്ല. ജർമനി​യിൽ നടത്തിയ ഒരു സർവേ അനുസ​രിച്ച്‌, 3-ൽ 2 പേർ വിചാ​രി​ക്കു​ന്നത്‌ 20-ഓ 30-ഓ വർഷം മുമ്പ്‌ ജീവിതം ഇന്നത്തെ​ക്കാൾ സുരക്ഷി​തം ആയിരു​ന്നു എന്നാണ്‌. അതു​കൊണ്ട്‌, സമ്പത്തിന്റെ വലിയ വർധനവ്‌ ആളുകൾക്കു കൂടുതൽ സുരക്ഷി​ത​ത്വം തോന്നാൻ ഇടവരു​ത്തി​യി​ട്ടില്ല.

അതു മനസ്സി​ലാ​ക്കാ​വു​ന്നതേ ഉള്ളൂ. കാരണം, മുൻ ലേഖന​ത്തിൽ പരാമർശിച്ച പ്രകാരം അരക്ഷി​തത്വ ബോധം ഒരു വൈകാ​രിക ഭാരമാണ്‌. ഭൗതിക സമ്പത്തിന്‌ ഒരു വൈകാ​രിക ഭാരം പൂർണ​മാ​യി ഇല്ലാതാ​ക്കാൻ സാധി​ക്കില്ല. തീർച്ച​യാ​യും, സമ്പത്ത്‌ ദാരി​ദ്ര്യ​ത്തെ ദൂരീ​ക​രി​ക്കു​ന്നു, ദുർഘട സമയങ്ങ​ളിൽ അതു വളരെ ഉപകരി​ക്കും. എന്നാൽ ചില സാഹച​ര്യ​ങ്ങ​ളിൽ, ധാരാളം പണം ഉണ്ടായി​രി​ക്കു​ന്നത്‌ ദാരി​ദ്ര്യം പോ​ലെ​തന്നെ ഒരു ഭാരമാണ്‌.

അതു​കൊണ്ട്‌, സമ്പത്ത്‌ ഒരു അനു​ഗ്രഹം ആണെങ്കി​ലും സുരക്ഷിത ജീവി​ത​ത്തി​നുള്ള താക്കോൽ അല്ലെന്നു മനസ്സിൽ പിടി​ക്കാൻ ഭൗതിക സ്വത്തു​ക്കളെ സംബന്ധിച്ച സമനി​ല​യുള്ള ഒരു മനോ​ഭാ​വം നമ്മെ സഹായി​ക്കും. യേശു​ക്രി​സ്‌തു ഭൂമി​യി​ലാ​യി​രു​ന്ന​പ്പോൾ തന്റെ ശിഷ്യ​ന്മാ​രെ ഇങ്ങനെ പ്രോ​ത്സാ​ഹി​പ്പി​ച്ചു: “ഒരുത്തന്നു സമൃദ്ധി ഉണ്ടായാ​ലും അവന്റെ വസ്‌തു​വ​കയല്ല അവന്റെ ജീവന്നു ആധാര​മാ​യി​രി​ക്കു​ന്നതു.” (ലൂക്കൊസ്‌ 12:15) ജീവി​ത​ത്തിൽ പരിപൂർണ സുരക്ഷി​ത​ത്വം തോന്നു​ന്ന​തിന്‌ ഒരു വ്യക്തിക്ക്‌ ഭൗതിക സ്വത്തുക്കൾ മാത്രം ഉണ്ടായി​രു​ന്നാൽ പോരാ.

പ്രായം ചെന്നവർ വസ്‌തു​വ​ക​കൾക്കു പ്രാധാ​ന്യം കൽപ്പി​ക്കു​ന്ന​തി​ന്റെ കാരണം അവയുടെ സാമ്പത്തിക മൂല്യമല്ല, മറിച്ച്‌ അവർ അതിനു കൽപ്പി​ക്കുന്ന വൈകാ​രിക മൂല്യ​മാണ്‌. സമ്പത്തല്ല, കുറ്റകൃ​ത്യ​ത്തിന്‌ ഇരയാ​കു​ന്ന​താ​ണു പ്രായം​ചെ​ന്ന​വരെ കൂടുതൽ ഉത്‌ക​ണ്‌ഠാ​കു​ലർ ആക്കുന്നത്‌.

സൂക്ഷി​ക്കുക!

“കുറ്റകൃ​ത്യം . . . കഴിഞ്ഞ 30 വർഷമാ​യി ലോക​മെ​മ്പാ​ടും ആഞ്ഞടി​ക്കു​ക​യാണ്‌” എന്ന്‌ ബ്രിട്ട​നിൽ പ്രസി​ദ്ധീ​ക​രിച്ച, കുറ്റകൃ​ത്യം തടയാ​നുള്ള പ്രാ​യോ​ഗിക മാർഗങ്ങൾ (ഇംഗ്ലീഷ്‌) എന്ന ചെറു​പു​സ്‌തകം പറയുന്നു. പൊലീസ്‌ സേനകൾ പരമാ​വധി പരി​ശ്ര​മി​ക്കു​ന്നുണ്ട്‌. ചിലർ കുറ്റകൃ​ത്യ​ത്തെ നേരി​ടു​ന്നത്‌ എങ്ങനെ​യാണ്‌?

വ്യക്തി​പ​ര​മാ​യ സുരക്ഷി​ത​ത്വം കുടും​ബ​ത്തിൽ തുടങ്ങു​ന്നു. ഉദാഹ​ര​ണ​ത്തിന്‌, സ്വിറ്റ്‌സർലൻഡിൽ ഒരു വാസ്‌തു​ശിൽപ്പി, മോഷ്ടാ​ക്കൾക്കു പ്രവേ​ശി​ക്കാ​നാ​കാത്ത, സുരക്ഷാ താഴു​ക​ളും അത്യന്തം ബലിഷ്‌ഠ​മായ വാതി​ലു​ക​ളും കമ്പിയഴി പിടി​പ്പിച്ച ജനാല​ക​ളും ഉള്ള വീടുകൾ രൂപകൽപ്പന ചെയ്യു​ന്ന​തിൽ വൈദ​ഗ്‌ധ്യം നേടി​യി​രി​ക്കു​ന്നു. ആ വീട്ടു​ട​മസ്ഥർ, “എന്റെ വീട്‌ എന്റെ കോട്ട” എന്ന പ്രസി​ദ്ധ​മായ ഇംഗ്ലീഷ്‌ പഴമൊ​ഴി അക്ഷരാർഥ​ത്തിൽ ബാധക​മാ​ക്കു​ന്ന​താ​യി തോന്നു​ന്നു. ഇത്തരം വീടു​കൾക്കു ചെല​വേ​റും എങ്കിലും ആവശ്യ​ക്കാർ ഏറെയാണ്‌ എന്ന്‌ ഫോക്കസ്‌ മാസിക പറയുന്നു.

വീടി​നു​ള്ളി​ലും പുറത്തും വ്യക്തി​പ​ര​മായ സുരക്ഷ ഉറപ്പു വരുത്തു​ന്ന​തിന്‌ ചില സമൂഹ​ങ്ങ​ളി​ലെ ആളുകൾ ചുറ്റുവട്ട നിരീക്ഷണ പദ്ധതികൾ ക്രമീ​ക​രി​ച്ചി​രി​ക്കു​ന്നു. ചില നഗര പ്രാന്ത​ങ്ങ​ളി​ലെ ആളുകൾ അതി​നെ​ക്കാൾ ഒരു പടികൂ​ടി മുന്നോ​ട്ടു പോകു​ന്നു. നിശ്ചിത സമയങ്ങ​ളിൽ തങ്ങളുടെ പ്രദേ​ശത്തു റോന്തു ചുറ്റു​ന്ന​തിന്‌ ഒരു സുരക്ഷാ സ്ഥാപനത്തെ കൂലി​ക്കെ​ടു​ക്കു​ന്നു. ഏകാന്ത നഗര വീഥി​ക​ളിൽ രാത്രി​യിൽ ഒറ്റയ്‌ക്കു സഞ്ചരി​ക്കു​ന്നത്‌ ഉചിത​മ​ല്ലെന്ന്‌ അനേക​രും മനസ്സി​ലാ​ക്കു​ന്നു. കുട്ടി​ക​ളു​ടെ ക്ഷേമത്തിൽ സ്വാഭാ​വി​ക​മാ​യും താത്‌പ​ര്യ​മുള്ള മാതാ​പി​താ​ക്കൾ അവരെ സംരക്ഷി​ക്കാൻ കൂടുതൽ മുൻക​രു​ത​ലു​കൾ സ്വീക​രി​ക്കു​ന്നു എന്നു വരാം. ഈ പേജിലെ ചതുര​ത്തിൽ കൊടു​ത്തി​രി​ക്കുന്ന നിർദേ​ശങ്ങൾ പരിചി​ന്തി​ക്കുക.

എങ്കിലും, മോഷ്ടാ​ക്കൾക്കു പ്രവേ​ശി​ക്കാ​നാ​കാത്ത വീടുകൾ പണിയാൻ എല്ലാവർക്കും വകയില്ല. മാത്രമല്ല, സുരക്ഷി​ത​ത്വ​ത്തി​നു വേണ്ടി​യുള്ള ചുറ്റുവട്ട നിരീക്ഷണ പദ്ധതി​ക​ളും റോന്തു ചുറ്റൽ ക്രമീ​ക​ര​ണ​വു​മൊ​ന്നും മൊത്ത​ത്തി​ലുള്ള കുറ്റകൃ​ത്യ​ങ്ങൾ കുറയ്‌ക്കു​ന്നില്ല; സംരക്ഷണ ക്രമീ​ക​രണം ഇല്ലാത്ത മേഖല​ക​ളി​ലേക്കു കുറ്റകൃ​ത്യം മാറ്റാൻ മാത്രമേ അത്‌ ഉപകരി​ക്കു​ന്നു​ള്ളൂ. അങ്ങനെ, കുറ്റകൃ​ത്യം വ്യക്തി​പ​ര​മായ സുരക്ഷി​ത​ത്വ​ത്തിന്‌ ഏറ്റവും വലിയ ഭീഷണി​യാ​യി തീർന്നി​രി​ക്കു​ന്നു. നമ്മുടെ ജീവിതം സുരക്ഷി​തം ആയിരി​ക്കു​ന്ന​തിൽ കുറ്റകൃ​ത്യ​ത്തിന്‌ അറുതി വരുത്തു​ന്ന​തി​നുള്ള സമഗ്ര ശ്രമത്തി​ലും അധികം ആവശ്യ​മാണ്‌.

രോഗ ലക്ഷണങ്ങ​ളെയല്ല—രോഗത്തെ ചികി​ത്സി​ക്കു​ക

നാം ഓരോ​രു​ത്ത​രും സുരക്ഷി​ത​ത്വ​മുള്ള ജീവിതം കാംക്ഷി​ക്കു​ന്നതു സ്വാഭാ​വി​ക​മാണ്‌. അതിനാ​യി ന്യായ​യു​ക്ത​വും പ്രാ​യോ​ഗി​ക​വു​മായ പടികൾ സ്വീക​രി​ക്കു​ന്നത്‌ ഉചിത​മാ​യി​രി​ക്കും. നമ്മുടെ ജീവിതം അരക്ഷിതം ആക്കിത്തീർക്കുന്ന കുറ്റകൃ​ത്യ​വും തൊഴി​ലി​ല്ലാ​യ്‌മ​യും മറ്റെല്ലാ കാര്യ​ങ്ങ​ളും മുഴു മനുഷ്യ​വർഗ​ത്തെ​യും ബാധി​ച്ചി​രി​ക്കുന്ന ഒരു സ്ഥിതി​വി​ശേ​ഷ​ത്തി​ന്റെ ലക്ഷണങ്ങൾ മാത്ര​മാണ്‌. അതിനു പരിഹാ​രം കാണു​ന്ന​തിന്‌ അത്തരം ലക്ഷണങ്ങളെ മാത്രം പ്രതി​രോ​ധി​ച്ചാൽ പോരാ. മറിച്ച്‌, ആ സ്ഥിതി​വി​ശേ​ഷ​ത്തി​ന്റെ കാരണത്തെ തന്നെ ചെറു​ക്കേ​ണ്ട​തുണ്ട്‌.

നമ്മുടെ ജീവി​ത​ത്തി​ലെ അരക്ഷി​താ​വ​സ്ഥ​യ്‌ക്കു മൂലകാ​രണം എന്താണ്‌? അതു പിഴുതു കളഞ്ഞ്‌ അരക്ഷി​താ​വ​സ്ഥയെ എന്നേക്കു​മാ​യി ഇല്ലായ്‌മ ചെയ്യാൻ നമുക്ക്‌ എങ്ങനെ സാധി​ക്കും? അടുത്ത ലേഖന​ത്തിൽ അതു ചർച്ച ചെയ്യു​ന്ന​താണ്‌.

[6-ാം പേജിലെ ചതുരം]

കൊച്ചു കുട്ടി​കളെ സംരക്ഷി​ക്കാ​നുള്ള മാർഗങ്ങൾ

കുട്ടി​കളെ ആക്രമി​ക്കു​ക​യും തട്ടി​ക്കൊ​ണ്ടു പോകു​ക​യും കൊല​പ്പെ​ടു​ത്തു​ക​യും ചെയ്യു​ന്നത്‌ സാധാ​രണം ആയതി​നാൽ തങ്ങളുടെ കുട്ടി​കളെ പിൻവ​രുന്ന കാര്യങ്ങൾ പഠിപ്പി​ക്കു​ന്നത്‌ ഉപയോ​ഗ​പ്രദം ആണെന്നു നിരവധി മാതാ​പി​താ​ക്കൾ തിരി​ച്ച​റി​ഞ്ഞി​രി​ക്കു​ന്നു:

1. ശരിയല്ല എന്നു തങ്ങൾക്കു തോന്നുന്ന കാര്യങ്ങൾ ചെയ്യി​ക്കാൻ ആരെങ്കി​ലും ശ്രമി​ക്കു​മ്പോൾ ചെയ്യു​ക​യില്ല എന്ന്‌ ഉറച്ച സ്വരത്തിൽ പറയുക.

2. മാതാ​പി​താ​ക്ക​ളിൽ ഒരാളു​ടെ സാമീ​പ്യ​ത്തിൽ അല്ലാതെ—ഒരു ഡോക്ട​റു​ടെ​യോ നേഴ്‌സി​ന്റെ​യോ കാര്യ​ത്തിൽ എന്നപോ​ലെ—ശരീര​ത്തി​ലെ സ്വകാര്യ ഭാഗങ്ങ​ളിൽ സ്‌പർശി​ക്കാൻ ആരെയും അനുവ​ദി​ക്കാ​തി​രി​ക്കുക.

3. അപകട​ത്തിൽ പെടു​മ്പോൾ ഓടി​പ്പോ​കു​ക​യോ ഉച്ചത്തിൽ വിളി​ച്ചു​കൂ​വു​ക​യോ മുറവി​ളി കൂട്ടു​ക​യോ ചെയ്യുക, അല്ലെങ്കിൽ സമീപ​ത്തുള്ള ഒരു മുതിർന്ന ആളുടെ സഹായം അഭ്യർഥി​ക്കുക.

4. അലോ​സ​ര​പ്പെ​ടു​ത്തുന്ന ഏതെങ്കി​ലും സംഭവ​മോ സംഭാ​ഷ​ണ​മോ ഉണ്ടായാൽ അതു മാതാ​പി​താ​ക്കളെ അറിയി​ക്കുക.

5. മാതാ​പി​താ​ക്ക​ളിൽനി​ന്നു രഹസ്യം മറച്ചു​പി​ടി​ക്കാ​തി​രി​ക്കുക.

അവസാ​ന​മാ​യി ഒരു ആശയം കൂടി: കുട്ടി​കളെ നോക്കാൻ ആളെ തിര​ഞ്ഞെ​ടു​ക്കു​മ്പോൾ മാതാ​പി​താ​ക്കൾ ശ്രദ്ധാ​ലു​ക്കൾ ആയിരി​ക്കണം.

[5-ാം പേജിലെ ചിത്രങ്ങൾ]

ജീവിതം സുരക്ഷി​തം ആയിരി​ക്കു​ന്ന​തിന്‌ വിദ്യാ​ഭ്യാ​സം, സമ്പത്ത്‌, കുറ്റകൃ​ത്യം ഇല്ലായ്‌മ ചെയ്യാ​നുള്ള സമഗ്ര ശ്രമം എന്നിവ​യെ​ക്കാൾ അധികം നമുക്ക്‌ ആവശ്യ​മാണ്‌