പരാദ​ങ്ങ​ളിൽ നിന്ന്‌—സ്വയം സംരക്ഷി​ക്കുക!

ഹോണ്ടുറാസിലെ ഉണരുക! ലേഖകൻ

ഉറക്കം ഉണരു​മ്പോൾ തന്നെ നിങ്ങൾക്ക്‌ മനം പിരട്ടൽ അനുഭ​വ​പ്പെ​ടു​ന്നു. വളരെ പെട്ടെന്നു നിങ്ങൾ ക്ഷീണി​ത​യാ​കു​ന്നു. നിങ്ങളു​ടെ വയറാ​കട്ടെ, അൽപ്പം വീർത്താണ്‌ ഇരിക്കു​ന്ന​തും. ഗർഭധാ​ര​ണ​ത്തി​ന്റെ ലക്ഷണങ്ങ​ളാ​ണോ ഇവയെ​ല്ലാം? ഒരുപക്ഷേ ആയിരി​ക്കാം. പക്ഷേ, നിങ്ങൾ ഒരു ഉഷ്‌ണ​മേ​ഖലാ പ്രദേ​ശ​ത്തോ ഉപോ​ഷ്‌ണ​മേ​ഖലാ പ്രദേ​ശ​ത്തോ ആണു ജീവി​ക്കു​ന്നത്‌ എങ്കിൽ, കുഴപ്പ​ക്കാ​രൻ നിങ്ങളു​ടെ കുടലിൽ താമസ​മാ​ക്കിയ ഏതെങ്കി​ലും തരത്തി​ലുള്ള പരാദ​ങ്ങ​ളാ​യി​രി​ക്കാൻ വളരെ സാധ്യ​ത​യുണ്ട്‌. എന്താണ്‌ കുടലി​ലെ പരാദങ്ങൾ? ക്ഷണിക്ക​പ്പെ​ടാ​തെ കയറി​ക്കൂ​ടുന്ന ഈ അതിഥി​കൾക്കു നിങ്ങൾ ആതിഥ്യ​മ​രു​ളു​ന്നു​ണ്ടോ എന്ന്‌ എങ്ങനെ​യാണ്‌ അറിയാൻ കഴിയുക?

ലളിത​മാ​യി പറഞ്ഞാൽ, മറ്റു ജീവജാ​ല​ങ്ങ​ളിൽ കയറി​ക്കൂ​ടി അവയെ ആശ്രയി​ച്ചു കഴിയുന്ന ജീവി​ക​ളാ​ണു പരാദങ്ങൾ. ആതിഥേയ ജീവി​യു​ടെ ശരീര​ത്തിന്‌ അകത്തോ പുറത്തോ ആണ്‌ അവയുടെ വാസം. കുടലി​ലെ പരാദങ്ങൾ രണ്ടുതരം ഉണ്ട്‌. അമീബ ഉൾപ്പെ​ടുന്ന പ്രോ​ട്ടോ​സോ​വ​ക​ളും അതു​പോ​ലെ ഹെൽമി​ന്തു​കൾ അഥവാ വിരക​ളും. പരാദങ്ങൾ ആതിഥേയ ജീവിക്ക്‌ എത്രമാ​ത്രം ഹാനി വരുത്തു​ന്നു എന്നത്‌ അവയുടെ ഇനം, എണ്ണം അതു​പോ​ലെ ആതിഥേയ ജീവി​യു​ടെ പ്രായം, ആരോ​ഗ്യം എന്നിവയെ ആശ്രയി​ച്ചി​രി​ക്കും.

ഉദാഹ​ര​ണ​ത്തിന്‌, പെൺ ഉരുളൻവി​ര​കൾക്ക്‌ ഒരൊറ്റ ദിവസം ഏതാണ്ട്‌ 2,00,000 മുട്ടകൾ ഇടാൻ കഴിയും. എന്നിരു​ന്നാ​ലും, പക്വമാ​കു​ന്ന​തിന്‌ ഈ മുട്ടകൾ മണ്ണിൽ കഴിയേണ്ട ആവശ്യ​മുണ്ട്‌. ഒരാളു​ടെ ശരീര​ത്തി​ലുള്ള ഉരുളൻവി​ര​ക​ളു​ടെ എണ്ണം അയാളു​ടെ ശരീര​ത്തിൽ കടക്കുന്ന പക്വമായ മുട്ടക​ളു​ടെ അല്ലെങ്കിൽ ലാർവ​ക​ളു​ടെ എണ്ണത്തെ ആശ്രയി​ച്ചി​രി​ക്കു​ന്നു. ഇത്തരം വിരകൾ തങ്ങളുടെ അകത്തു പെട്ട സംഗതി അറിയാ​തെ തന്നെ അനേകം ആളുകൾ അവയുടെ ആതി​ഥേ​യ​രാ​കാ​റുണ്ട്‌. പക്ഷേ എണ്ണത്തിൽ പെരു​കി​യാൽ കുടലിൽ ഗുരു​ത​ര​മായ തടസ്സങ്ങൾ സൃഷ്ടി​ക്കാൻ ഈ ഉരുളൻവി​ര​കൾക്കു കഴിയും.

കുടലിൽ പരാദങ്ങൾ ഉള്ളതിന്റെ ചില സാധാരണ ലക്ഷണങ്ങൾ വയറു​വേദന, മനം പിരട്ടൽ, വിശപ്പി​ല്ലായ്‌മ, വയറു വീർക്കൽ, ക്ഷീണം അതു​പോ​ലെ വിട്ടു​മാ​റാത്ത ദഹന​ക്കേ​ടോ വയറി​ള​ക്ക​മോ മലബന്ധ​മോ ഒക്കെ ആണ്‌. മെലി​ച്ചിൽ, അസുഖ​ക​ര​മായ നിദ്ര, ചൊറി​ച്ചിൽ, ശ്വാസ​ത​ടസ്സം, പനി ഇവയെ​ല്ലാം പരാദങ്ങൾ ഉള്ളിലു​ള്ള​തി​ന്റെ സൂചന​ക​ളാ​യി​രി​ക്കാം. തീർച്ച​യാ​യും, ഇതേ ലക്ഷണങ്ങൾ തന്നെ മറ്റു പല രോഗ​ങ്ങൾക്കും ഉണ്ട്‌. പക്ഷേ, പരാദങ്ങൾ അകത്തു​ള്ള​തി​ന്റെ ലക്ഷണങ്ങ​ളാ​ണോ ഇവ എന്നു വിവിധ മലപരി​ശോ​ധ​ന​യാൽ നിർണ​യി​ക്കാൻ കഴിയും.

പ്രശ്‌ന​ക്കാ​രൻ ആരാ​ണെന്നു കൃത്യ​മാ​യി കണ്ടുപി​ടി​ക്കേ​ണ്ടത്‌ അനിവാ​ര്യ​മാണ്‌. ഉദാഹ​ര​ണ​ത്തിന്‌, ഉരുളൻവി​ര​ക​ളും വേറെ ചില പരാദ​ങ്ങ​ളും ഉള്ളതായി കണ്ടെത്തു​ന്നെ​ങ്കിൽ, ഉരുളൻവി​ര​കൾക്കുള്ള മരുന്നാണ്‌ ആദ്യം കഴി​ക്കേ​ണ്ടത്‌. എന്തു​കൊണ്ട്‌? ചില മരുന്നു​കൾ ഈ വിരകളെ കൊല്ലു​ന്ന​തി​നു പകരം അവയെ അലോ​സ​ര​പ്പെ​ടു​ത്തുക മാത്ര​മാ​ണു ചെയ്യു​ന്നത്‌. അതിനാൽ അവ ശരീര​ത്തി​ന്റെ മറ്റു ഭാഗങ്ങ​ളി​ലേക്കു ചേക്കേ​റു​ക​യും അതുവഴി ഗുരു​ത​ര​മായ പ്രശ്‌നം വരുത്തി​ക്കൂ​ട്ടു​ക​യും ചെയ്യും.

പ്രതി​രോ​ധം പ്രതി​വി​ധി​യെ​ക്കാൾ ഉത്തമം

പരാദ​ങ്ങളെ നശിപ്പി​ക്കു​ന്ന​തിൽ മരുന്നു​കൾ ഫലപ്ര​ദ​മെന്നു തെളി​ഞ്ഞി​ട്ടു​ണ്ടെ​ങ്കി​ലും, അവ ഉള്ളിൽ കടക്കാതെ സൂക്ഷി​ക്കു​ന്ന​താണ്‌ ഏറെ നന്ന്‌. അങ്ങനെ​യെ​ങ്കിൽ, പരാദ​ങ്ങ​ളിൽ നിന്നു നിങ്ങൾക്ക്‌ എങ്ങനെ സ്വയം സംരക്ഷി​ക്കാൻ കഴിയും?

ശുചി​ത്വ​മാണ്‌ ഏറ്റവും മികച്ച സംരക്ഷണം. തുറസ്സായ സ്ഥലത്തു വിസർജനം നടത്തരുത്‌. കക്കൂസു​ക​ളും മറ്റും ജല​സ്രോ​ത​സ്സിൽ നിന്ന്‌ ഒരു സുരക്ഷി​ത​മായ അകലത്തി​ലാ​യി​രി​ക്കാൻ ശ്രദ്ധി​ക്കണം. മനുഷ്യ​വി​സർജ്യം വളമായി ഉപയോ​ഗി​ക്കാൻ പാടില്ല. ഉചിത​മായ ആരോ​ഗ്യ​പ​രി​പാ​ലന രീതികൾ പിന്തു​ട​രേ​ണ്ട​തും അത്യാ​വ​ശ്യ​മാണ്‌. കൂടാതെ, കുട്ടികൾ മണ്ണു തിന്നാ​തി​രി​ക്കാൻ ശ്രദ്ധി​ക്കണം. ഒരു കുട്ടി​യു​ടെ ഉള്ളിൽ പരാദങ്ങൾ ഉണ്ടെന്നു കണ്ടെത്തി​യാൽ, കുടും​ബ​ത്തി​ലെ മുഴു അംഗങ്ങ​ളെ​യും പരി​ശോ​ധ​ന​യ്‌ക്കു വിധേ​യ​രാ​ക്കു​ന്നതു നല്ലതാ​യി​രി​ക്കും.

ആഹാര​സാ​ധ​ന​ങ്ങൾ വാങ്ങു​മ്പോ​ഴും തയ്യാറാ​ക്കു​മ്പോ​ഴും നല്ല ശ്രദ്ധ ആവശ്യ​മാണ്‌. ശുചി​ത്വ​ത്തി​നു പ്രാധാ​ന്യം കൊടു​ക്കു​ന്ന​തിൽ പേരു​കേട്ട ഒരു പ്രദേ​ശത്തു വളർത്തി​യെ​ടു​ക്കുന്ന ഉത്‌പ​ന്നങ്ങൾ വാങ്ങാൻ ശ്രമി​ക്കുക. മാംസം വേവി​ക്കു​മ്പോൾ, ഏറ്റവും കട്ടി കൂടിയ ഭാഗം പോലും ശരിക്കു വെന്തു​വെന്ന്‌ ഉറപ്പു വരുത്തുക. പച്ച മാംസം ഒരിക്ക​ലും ഭക്ഷിക്ക​രുത്‌. പച്ചക്കറി​ക​ളും പഴങ്ങളും വേവി​ക്കാ​തെ ഭക്ഷിക്കു​ക​യാ​ണെ​ങ്കിൽ അവ ആദ്യമേ നല്ല വൃത്തി​യാ​യി കഴുകണം. ഒരിക്കൽ ഉപയോ​ഗിച്ച വെള്ളം തന്നെ വീണ്ടും ഉപയോ​ഗി​ക്കാ​തി​രി​ക്കാൻ ശ്രദ്ധി​ക്കുക, അതു മലിന​മാ​യി​രി​ക്കാൻ സാധ്യ​ത​യുണ്ട്‌.

കുടി​ക്കാൻ ഉപയോ​ഗി​ക്കുന്ന വെള്ളം നന്നായി തിളപ്പി​ക്കുക. തണുത്ത​തി​നു ശേഷം, മറ്റൊരു പാത്ര​ത്തി​ലേക്കു കുത്തി​യൊ​ഴി​ച്ചു കൊണ്ടോ നന്നായി ഇളക്കി​ക്കൊ​ണ്ടോ ഒക്കെ അതിൽ വീണ്ടും ഓക്‌സി​ജൻ നിറയാൻ ഇടയാ​ക്കുക. വീടു​ക​ളിൽ ഉപയോ​ഗി​ച്ചു വരുന്ന മിക്ക ഫിൽട്ട​റു​ക​ളും പരാദ​ങ്ങളെ മുഴു​വ​നാ​യി നീക്കം ചെയ്യാൻ മതിയാ​കു​ന്നതല്ല. കടകളിൽ നിന്നു കുപ്പി​ക​ളിൽ വാങ്ങാൻ കിട്ടുന്ന കുടി​വെള്ളം എത്ര മാത്രം ശുദ്ധമാണ്‌ എന്നത്‌ അതു നിറയ്‌ക്കു​ന്നി​ടത്ത്‌ എത്ര മാത്രം ശുചി​ത്വം പാലി​ക്കു​ന്നുണ്ട്‌ എന്നതിനെ ആശ്രയി​ച്ചി​രി​ക്കു​ന്നു.

യാത്ര ചെയ്യു​മ്പോ​ഴോ അല്ലെങ്കിൽ പുറത്തു നിന്ന്‌ ആഹാരം കഴിക്കു​മ്പോ​ഴോ കൂടു​ത​ലായ മുൻക​രു​ത​ലു​കൾ സ്വീക​രി​ക്കേണ്ടി വരും. കുപ്പി​ക​ളി​ലോ കട്ടിക്ക​ട​ലാ​സു കൊണ്ട്‌ ഉണ്ടാക്കിയ കൂടു​ക​ളി​ലോ നിറച്ചി​രി​ക്കുന്ന പാനീ​യങ്ങൾ ഐസ്‌ ഇടാതെ കുടി​ക്കു​ന്ന​താ​ണു പൊതു​വെ സുരക്ഷി​തം. ചില പരാദ​ങ്ങൾക്കു വെള്ളം ഉറയുന്ന താപനില പോലും അതിജീ​വി​ക്കാൻ കഴിവുണ്ട്‌. അതിനാൽ ഐസിന്‌, അതുണ്ടാ​ക്കിയ വെള്ളത്തി​ന്റെ ശുദ്ധി മാത്രമേ ഉണ്ടാക​യു​ള്ളൂ. തെരുവു കച്ചവട​ക്കാ​രിൽ നിന്ന്‌ എന്തെങ്കി​ലും വാങ്ങി ഭക്ഷിക്കു​ന്നതു സംബന്ധി​ച്ചും ശ്രദ്ധയു​ള്ള​വ​രാ​യി​രി​ക്കാൻ നിങ്ങൾ ആഗ്രഹി​ച്ചേ​ക്കാം. മുറിച്ചു വെച്ചി​രി​ക്കുന്ന കൈത​ച്ച​ക്ക​യോ തണ്ണിമ​ത്ത​നോ കാണു​ന്നതു വായിൽ വെള്ളമൂ​റു​ന്ന​തിന്‌ ഇടയാ​ക്കി​യേ​ക്കാ​മെ​ങ്കി​ലും, മിക്ക​പ്പോ​ഴും വെള്ളം തളിച്ചാണ്‌ അവ വരണ്ടു​പോ​കാ​തെ സൂക്ഷി​ക്കു​ന്നത്‌. ഇത്‌ ഒരു പക്ഷേ മലിനീ​ക​രി​ക്ക​പ്പെട്ട വെള്ളമാ​കാം. അതു​കൊണ്ട്‌, സൂക്ഷി​ക്കുക. പക്ഷേ, നിങ്ങളു​ടെ യാത്ര​യു​ടെ ആസ്വാ​ദനം നഷ്ടപ്പെ​ടു​മാറ്‌ കാര്യ​ങ്ങളെ സംബന്ധിച്ച്‌ അമിത​ഭയം വെച്ചു​പു​ലർത്താ​തി​രി​ക്കാ​നും ശ്രദ്ധി​ക്കുക. ന്യായ​മായ മുൻക​രു​ത​ലു​കൾ സ്വീക​രി​ക്കുക വഴി, പരാദ​ങ്ങ​ളിൽ നിന്നു സ്വയം സംരക്ഷി​ക്കാൻ നിങ്ങൾക്കു ധാരാളം കാര്യങ്ങൾ ചെയ്യാൻ കഴിയും.

[14-ാം പേജിലെ ചിത്രം]

ശുചിത്വമാണ്‌ ഏറ്റവും മികച്ച സംരക്ഷണം

[15-ാം പേജിലെ ചിത്രം]

ഐസിന്‌, അതുണ്ടാ​ക്കിയ വെള്ളത്തി​ന്റെ ശുദ്ധി മാത്രമേ ഉള്ളൂ

[15-ാം പേജിലെ ചിത്രം]

അമീബകളും വിരക​ളും രണ്ടു തരത്തി​ലുള്ള പരാദ​ങ്ങ​ളാണ്‌

[കടപ്പാട്‌]

DPDx, the CDC Parasitology Website