പോലീസ്‌ സംരക്ഷണം പ്രതീ​ക്ഷ​ക​ളും ഭയാശ​ങ്ക​ക​ളും

യൂണി​ഫോ​റം ധരിച്ച ഒരു ഔദ്യോ​ഗിക പോലീസ്‌ സേന എന്ന ആശയത്തെ 19-ാം നൂറ്റാ​ണ്ടി​ന്റെ തുടക്ക​ത്തിൽ ഇംഗ്ലണ്ടിൽ ജീവി​ച്ചി​രുന്ന അനേക​രും എതിർത്തു. ദേശീയ സർക്കാ​രി​ന്റെ നിയ​ന്ത്ര​ണ​ത്തി​ലുള്ള ഒരു സായുധ സേന തങ്ങളുടെ സ്വാത​ന്ത്ര്യ​ത്തി​നു ഭീഷണി ആകു​മെന്ന്‌ അവർ ഭയപ്പെട്ടു. ഷോ​സെഫ്‌ ഫൂഷേ​യു​ടെ കീഴിൽ ഫ്രാൻസിൽ രൂപം​കൊണ്ട പോലീസ്‌ ചാരസം​ഘത്തെ പോലുള്ള ഒന്നു സ്ഥാപി​ക്ക​പ്പെ​ടു​ന്ന​തി​ലേക്ക്‌ അതു നയി​ച്ചേ​ക്കു​മോ എന്നു ചിലർ ശങ്കിച്ചു. എങ്കിലും ‘ഒരു പോലീസ്‌ സേനയെ കൂടാതെ നാം എന്തു ചെയ്യും’ എന്ന ചോദ്യം പരിചി​ന്തി​ക്കാൻ അവർ നിർബ​ന്ധി​ത​രാ​യി.

ലണ്ടൻ ലോക​ത്തി​ലെ ഏറ്റവും വലുതും സമ്പന്നവു​മായ നഗരമാ​യി വളർന്നി​രു​ന്നു; അതോടെ കുറ്റകൃ​ത്യം പെരുകി, അതു വ്യാപാ​ര​രം​ഗ​ത്തി​നു ഭീഷണി​യാ​യി. അവിടത്തെ സന്നദ്ധ രാത്രി കാവൽക്കാർക്കോ സ്വകാര്യ ചെലവിൽ പ്രവർത്തി​ച്ചു​വന്ന ഡിറ്റക്ടീവ്‌ സംഘമായ ‘ബോ സ്റ്റ്രീറ്റ്‌ റണ്ണേഴ്‌സി’നോ ജനങ്ങ​ളെ​യും അവരുടെ വസ്‌തു​വ​ക​ക​ളെ​യും സംരക്ഷി​ക്കാൻ കഴിഞ്ഞില്ല. ഇംഗ്ലണ്ടി​ലെ പോലീസ്‌: രാഷ്‌ട്രീയ, സാമൂ​ഹിക ചരിത്രം (ഇംഗ്ലീഷ്‌) എന്ന പുസ്‌ത​ക​ത്തിൽ ക്ലൈവ്‌ എംസ്ലി പറയുന്നു: “സംസ്‌കാ​ര​മുള്ള ഒരു സമൂഹ​ത്തിൽ കുറ്റകൃ​ത്യ​വും ക്രമ​ക്കേ​ടും ഉണ്ടായി​രി​ക്കാൻ പാടില്ല എന്ന അഭി​പ്രാ​യ​ത്തി​നു ശക്തി​യേറി.” അതു​കൊണ്ട്‌ ലണ്ടൻകാർ ഏറ്റവും നല്ലതി​നാ​യി പ്രത്യാ​ശി​ച്ചു​കൊണ്ട്‌ സർ റോബർട്ട്‌ പീലിന്റെ നേതൃ​ത്വ​ത്തിൽ ഒരു ഔദ്യോ​ഗിക പോലീസ്‌ സേന രൂപീ​ക​രി​ക്കാൻ തീരു​മാ​നി​ച്ചു.a 1829 സെപ്‌റ്റം​ബ​റിൽ യൂണി​ഫോ​റം ധരിച്ച കോൺസ്റ്റ​ബിൾമാർ വൻനഗ​ര​ത്തിൽ റോന്തു ചുറ്റാൻ തുടങ്ങി.

പോലീ​സി​ന്റെ ആധുനിക ചരി​ത്ര​ത്തി​ന്റെ തുടക്കം മുതൽ അവരെ കുറി​ച്ചുള്ള പ്രതീ​ക്ഷ​ക​ളും ഭയാശ​ങ്ക​ക​ളും നിലനി​ന്നി​ട്ടുണ്ട്‌—അവർ സുരക്ഷി​ത​ത്വം പ്രദാനം ചെയ്യു​മെന്ന പ്രതീ​ക്ഷ​യും അധികാ​രം ദുർവി​നി​യോ​ഗം ചെയ്‌തേ​ക്കു​മോ എന്ന ഭയവും.

അമേരി​ക്ക​യിൽ പോലീ​സി​ന്റെ തുടക്കം

ഐക്യ​നാ​ടു​ക​ളിൽ ആദ്യമാ​യി ഒരു ഔദ്യോ​ഗിക പോലീസ്‌ സേന നിലവിൽ വന്നത്‌ ന്യൂ​യോർക്ക്‌ നഗരത്തി​ലാണ്‌. നഗരത്തി​ലെ സമ്പത്തു വർധി​ച്ച​തോ​ടെ കുറ്റകൃ​ത്യ​വും പെരുകി. 1830-കളിൽ വിലകു​റഞ്ഞ വർത്തമാ​ന​പ്പ​ത്ര​ങ്ങ​ളിൽ കുറ്റകൃ​ത്യ​ത്തെ കുറി​ച്ചുള്ള ഞെട്ടി​ക്കുന്ന വാർത്തകൾ വരാൻ തുടങ്ങി​യ​പ്പോൾ ഓരോ കുടും​ബ​ത്തി​നും അവയെ കുറിച്ചു വായി​ക്കാ​നുള്ള അവസരം കിട്ടി. പൊതു​ജനം മുറവി​ളി കൂട്ടാൻ തുടങ്ങി​യ​തി​ന്റെ ഫലമായി 1845-ൽ ന്യൂ​യോർക്കിൽ ഒരു പോലീസ്‌ സേന രൂപീ​കൃ​ത​മാ​യി. അന്നു മുതൽ ന്യൂ​യോർക്കു​കാർ ലണ്ടൻകാ​രു​ടെ​യും ലണ്ടൻകാർ ന്യൂ​യോർക്കു​കാ​രു​ടെ​യും പോലീസ്‌ സേനയിൽ അതീവ താത്‌പ​ര്യം കാട്ടി​യി​ട്ടുണ്ട്‌.

സർക്കാ​രി​ന്റെ നിയ​ന്ത്ര​ണ​ത്തി​ലുള്ള ഒരു സായുധ സേനയെ കുറി​ച്ചുള്ള ഭയം ഇംഗ്ലീ​ഷു​കാ​രെ പോ​ലെ​തന്നെ അമേരി​ക്ക​ക്കാർക്കും ഉണ്ടായി​രു​ന്നു. എന്നാൽ രണ്ടു രാഷ്‌ട്ര​ങ്ങ​ളും ഇതിനു കണ്ടെത്തിയ പരിഹാ​രങ്ങൾ വ്യത്യ​സ്‌ത​മാ​യി​രു​ന്നു. ഉയർന്ന ഒരു തൊപ്പി​യും കടും​നീല നിറത്തി​ലുള്ള യൂണി​ഫോ​റ​വും ധരിച്ച മാന്യ​പു​രു​ഷ​ന്മാ​രു​ടെ സംഘമാ​യി​രു​ന്നു ഇംഗ്ലണ്ടു​കാ​രു​ടെ പോലീസ്‌ സേന. പുറമേ കാണാൻ കഴിയാത്ത വിധത്തിൽ വെച്ചി​രുന്ന ഒരു ചെറിയ ലാത്തി ആയിരു​ന്നു അവരുടെ ഏക ആയുധം. ഇന്നും അടിയ​ന്തിര സാഹച​ര്യ​ങ്ങ​ളി​ല​ല്ലാ​തെ ബ്രിട്ട​നി​ലെ പോലീസ്‌ തോക്കു​കൾ കൊണ്ടു​ന​ട​ക്കാ​റില്ല. എന്നിരു​ന്നാ​ലും ഒരു റിപ്പോർട്ട്‌ ഇങ്ങനെ പറയുന്നു: “ബ്രിട്ട​നി​ലെ പോലീസ്‌ കാല​ക്ര​മ​ത്തിൽ ഒരു പൂർണ സായു​ധ​സേ​ന​യാ​യി വളരും . . . എന്ന തോന്നൽ പ്രബല​മാ​യി​ക്കൊ​ണ്ടി​രി​ക്കു​ക​യാണ്‌.”

എന്നാൽ ഐക്യ​നാ​ടു​ക​ളിൽ ഗവൺമെന്റ്‌ അധികാ​രം ദുർവി​നി​യോ​ഗം ചെയ്‌തേ​ക്കു​മോ എന്ന ഭയം “ആയുധം കൈവശം വെക്കാ​നും കൊണ്ടു​ന​ട​ക്കാ​നു​മുള്ള ജനങ്ങളു​ടെ അവകാശം” ഉറപ്പു​വ​രു​ത്തുന്ന യു.എസ്‌. ഭരണഘ​ട​ന​യു​ടെ രണ്ടാമത്തെ ഭേദഗതി സ്വീക​രി​ക്കു​ന്ന​തി​ലേക്കു നയിച്ചു. അതിന്റെ ഫലമായി പോലീ​സി​നും തോക്ക്‌ ആവശ്യ​മാ​യി​വന്നു. കാല​ക്ര​മ​ത്തിൽ, അതിന്റെ ഉപയോ​ഗം അമേരി​ക്കൻ പോലീ​സു​കാ​രു​ടെ​യും കള്ളന്മാ​രു​ടെ​യും സവി​ശേഷത—പൊതു​വേ​യുള്ള ധാരണ​പ്ര​കാ​ര​മെ​ങ്കി​ലും—ആയിത്തീർന്ന തെരുവു വെടി​വെ​പ്പു​ക​ളി​ലേക്കു നയിക്കു​ക​യും ചെയ്‌തു. തോക്കു​കൾ കൈവശം വെക്കു​ന്ന​തി​നോ​ടുള്ള അമേരി​ക്കൻ മനോ​ഭാ​വ​ത്തിന്‌ മറ്റൊരു കാരണം ഐക്യ​നാ​ടു​ക​ളി​ലെ പോലീസ്‌ സേനയു​ടെ ഉത്ഭവം ലണ്ടനിൽനി​ന്നു വളരെ വ്യത്യ​സ്‌ത​മായ ഒരു സമൂഹ​ത്തി​ലാ​യി​രു​ന്നു എന്നതാണ്‌. ന്യൂ​യോർക്കി​ലെ ജനസംഖ്യ പെരു​കി​യ​തോ​ടെ അവിടത്തെ ക്രമസ​മാ​ധാ​നം ആകെ താറു​മാ​റാ​യി​രു​ന്നു. 1861-65-ലെ ആഭ്യന്തര യുദ്ധം തുടങ്ങി​യ​ശേഷം പ്രധാ​ന​മാ​യും യൂറോ​പ്പിൽനി​ന്നുള്ള കുടി​യേ​റ്റ​ക്കാ​രു​ടെ എണ്ണവും ആഫ്രിക്കൻ അമേരി​ക്ക​ക്കാ​രു​ടെ എണ്ണവും വർധി​ച്ചത്‌ വംശീയ കലാപ​ത്തി​ലേക്കു നയിച്ചു. തങ്ങൾ കൂടുതൽ കടുത്ത നടപടി​കൾ കൈ​ക്കൊ​ള്ളേ​ണ്ട​തു​ണ്ടെന്നു പോലീ​സി​നു തോന്നി.

അതു​കൊണ്ട്‌ പോലീസ്‌ അനിവാ​ര്യ​മായ ഒരു തിന്മ ആണെന്ന പൊതു അഭി​പ്രാ​യം നിലവിൽവന്നു. ഒരളവി​ലുള്ള ക്രമസ​മാ​ധാ​ന​വും സുരക്ഷി​ത​ത്വ​വും പാലി​ക്ക​പ്പെ​ടു​ന്നു​വെന്ന്‌ ഉറപ്പു​വ​രു​ത്തു​ന്ന​തി​നാ​യി ചില സമയങ്ങ​ളി​ലെ അതിരു​കടന്ന നടപടി​കൾ സഹിക്കാൻ ജനങ്ങൾ തയ്യാറാ​യി. എന്നാൽ ലോക​ത്തി​ന്റെ മറ്റു ചില ഭാഗങ്ങ​ളിൽ വ്യത്യ​സ്‌ത​മായ ഒരുതരം പോലീസ്‌ സേന രൂപം​കൊ​ള്ളു​ക​യാ​യി​രു​ന്നു.

ഭീതി പരത്തുന്ന പോലീസ്‌

പത്തൊ​മ്പ​താം നൂറ്റാ​ണ്ടി​ന്റെ ആദ്യം ആധുനിക പോലീസ്‌ സേനകൾ രൂപം​കൊ​ണ്ടു തുടങ്ങിയ സമയത്ത്‌, മനുഷ്യ​വർഗ​ത്തിൽ ഭൂരി​ഭാ​ഗ​വും യൂറോ​പ്യൻ സാമ്രാ​ജ്യ ശക്തിക​ളു​ടെ ഭരണത്തിൻ കീഴി​ലാ​യി​രു​ന്നു. പൊതു​വേ പറഞ്ഞാൽ യൂറോ​പ്യൻ പോലീസ്‌, ജനങ്ങളു​ടെയല്ല മറിച്ച്‌ ഭരണാ​ധി​കാ​രി​ക​ളു​ടെ സംരക്ഷ​ക​രാ​യാ​ണു പ്രവർത്തി​ച്ചി​രു​ന്നത്‌. സ്വന്തം മണ്ണിൽ പട്ടാള മാതൃ​ക​യി​ലുള്ള ആയുധ​ധാ​രി​ക​ളായ ഒരു പോലീസ്‌ സേന എന്ന ആശയത്തെ നഖശി​ഖാ​ന്തം എതിർത്ത ബ്രിട്ടീ​ഷു​കാർക്കു പോലും കോള​നി​കളെ അധീന​ത​യിൽ നിറു​ത്താൻ സൈനിക പോലീ​സി​നെ ഉപയോ​ഗി​ക്കു​ന്ന​തിൽ യാതൊ​രു മനസ്സാ​ക്ഷി​ക്കു​ത്തും അനുഭ​വ​പ്പെ​ട്ടില്ല. ലോക​മെ​മ്പാ​ടു​മുള്ള പോലീസ്‌ ക്രമസ​മാ​ധാ​ന​പാ​ലനം (ഇംഗ്ലീഷ്‌) എന്ന പുസ്‌ത​ക​ത്തിൽ റോബ്‌ മോബി ഇങ്ങനെ പറയുന്നു: “കോള​നി​വാ​ഴ്‌ച​ക്കാ​ലത്തെ പോലീ​സി​ന്റെ ചരിത്രം പരി​ശോ​ധി​ച്ചാൽ എല്ലാ ദശകങ്ങ​ളി​ലും​തന്നെ പോലീസ്‌ നടത്തുന്ന ക്രൂരത, അഴിമതി, അക്രമം, കൊല​പാ​തകം, അധികാര ദുർവി​നി​യോ​ഗം എന്നിവ ഉൾപ്പെട്ട സംഭവങ്ങൾ അരങ്ങേ​റി​യി​ട്ടു​ള്ള​താ​യി കാണാം.” സാമ്രാ​ജ്യ​ത്വ ഭരണത്തിൻ കീഴിലെ പോലീസ്‌ സംവി​ധാ​നം ചില വിധങ്ങ​ളിൽ പ്രയോ​ജ​ന​ക​ര​വും ആയിരു​ന്നു എന്നു ചൂണ്ടി​ക്കാ​ട്ടിയ ശേഷം, അത്‌ “പോലീ​സു​കാ​രു​ടേത്‌ ഒരു സർക്കാർ സേവന​മാണ്‌, മറിച്ച്‌ പൊതു​സേ​വ​നമല്ല എന്ന ആഗോ​ള​വ്യാ​പ​ക​മായ ഒരു ധാരണ ഉടലെ​ടു​ക്കു​ന്ന​തി​ലേക്കു നയിച്ചു” എന്ന്‌ അതേ പുസ്‌തകം കൂട്ടി​ച്ചേർക്കു​ന്നു.

വിപ്ലവ​ങ്ങ​ളെ ഭയന്ന്‌ സ്വേച്ഛാ​ധി​പത്യ ഭരണകൂ​ടങ്ങൾ ഏതാണ്ട്‌ എല്ലായ്‌പോ​ഴും​തന്നെ പൗരന്മാ​രു​ടെ നീക്കങ്ങൾ നിരീ​ക്ഷി​ക്കാൻ രഹസ്യ പോലീ​സി​നെ ഉപയോ​ഗി​ച്ചി​ട്ടുണ്ട്‌. ഇത്തരം പോലീസ്‌ ആളുകളെ മർദി​ച്ചു​കൊണ്ട്‌ അവരിൽനി​ന്നു വിവരങ്ങൾ ശേഖരി​ക്കു​ക​യും അട്ടിമ​റി​ക്കാ​രെന്നു സംശയ​മു​ള്ള​വരെ വധിച്ചു​കൊ​ണ്ടോ വിചാരണ കൂടാതെ അറസ്റ്റു ചെയ്‌തു​കൊ​ണ്ടോ തങ്ങൾക്കെ​തി​രെ​യുള്ള എല്ലാ ഭീഷണി​യും അവസാ​നി​പ്പി​ക്കു​ക​യും ചെയ്‌തി​രു​ന്നു. നാസി​ക​ളു​ടെ ഗെസ്റ്റ​പ്പോ​യും സോവി​യറ്റ്‌ യൂണി​യന്റെ കെജിബി-യും പൂർവ ജർമനി​യു​ടെ ഷ്‌റ്റാ​സി​യും ഇതിന്‌ ഉദാഹ​ര​ണ​ങ്ങ​ളാണ്‌. ഏകദേശം 1.6 കോടി വരുന്ന ജനങ്ങളെ നിയ​ന്ത്രി​ക്കാൻ ഷ്‌റ്റാസി 1,00,000 പോലീസ്‌ ഉദ്യോ​ഗ​സ്ഥ​രെ​യും സാധ്യ​ത​യ​നു​സ​രിച്ച്‌ രഹസ്യ​വി​വ​രങ്ങൾ ചോർത്താൻ സഹായിച്ച അഞ്ചു ലക്ഷം പേരെ​യും ഉപയോ​ഗി​ച്ചി​രു​ന്നു! ഉദ്യോ​ഗസ്ഥർ 24 മണിക്കൂ​റും ടെലി​ഫോൺ സംഭാ​ഷ​ണങ്ങൾ ചോർത്തു​ക​യും ജനസം​ഖ്യ​യിൽ മൂന്നി​ലൊ​ന്നി​നെ കുറി​ച്ചുള്ള ഫയലുകൾ സൂക്ഷി​ക്കു​ക​യും ചെയ്‌തി​രു​ന്നു. “ഷ്‌റ്റാസി ഓഫീ​സർമാർ എല്ലാ അതിരു​ക​ളും ലംഘിച്ചു, ലജ്ജ എന്നു പറയു​ന്നത്‌ അവർക്ക്‌ ഇല്ലായി​രു​ന്നു” എന്ന്‌ ജോൺ ക്യോലർ ഷ്‌റ്റാസി എന്ന പുസ്‌ത​ക​ത്തിൽ പറയുന്നു. “പ്രൊ​ട്ട​സ്റ്റന്റ്‌, കത്തോ​ലി​ക്കാ വിഭാ​ഗ​ങ്ങ​ളു​ടെ ഉയർന്ന അധികാ​രി​കൾ ഉൾപ്പെ​ടെ​യുള്ള അനേകം വൈദി​കരെ രഹസ്യ വിവരങ്ങൾ ശേഖരി​ക്കാൻ അവർ നിയമി​ച്ചു. അവരുടെ ഓഫീ​സു​ക​ളി​ലും കുമ്പസാ​ര​ക്കൂ​ടു​ക​ളി​ലും എല്ലാം സംഭാ​ഷ​ണങ്ങൾ ചോർത്താ​നുള്ള ഉപകര​ണങ്ങൾ ധാരാ​ള​മാ​യി ഘടിപ്പി​ച്ചി​രു​ന്നു.”

എന്നിരു​ന്നാ​ലും, സ്വേച്ഛാ​ധി​പത്യ ഭരണ​പ്ര​ദേ​ശ​ങ്ങ​ളിൽ മാത്രമല്ല ഭീതി പരത്തുന്ന പോലീസ്‌ ഉള്ളത്‌. മറ്റു വലിയ നഗരങ്ങ​ളി​ലും പോലീസ്‌ നിയമം നടപ്പി​ലാ​ക്കാൻ വളരെ കടുത്ത മാർഗങ്ങൾ അവലം​ബി​ക്കു​മ്പോൾ ജനങ്ങൾക്കി​ട​യിൽ ഭീതി പരത്തു​ന്നു​വെന്ന ആരോ​പ​ണ​ത്തി​നു വിധേ​യ​രാ​യി​ത്തീർന്നി​ട്ടുണ്ട്‌, അവരുടെ നടപടി​കൾ ന്യൂനപക്ഷ വിഭാ​ഗ​ങ്ങൾക്കെ​തി​രെ ആണെങ്കിൽ വിശേ​ഷി​ച്ചും. ലോസാ​ഞ്ച​ല​സിൽ വളരെ ഒച്ചപ്പാ​ടിന്‌ ഇടയാ​ക്കിയ ഒരു കേസിനെ കുറിച്ചു റിപ്പോർട്ടു ചെയ്യവേ, ഒരു വാർത്താ മാസിക ഇങ്ങനെ പറഞ്ഞു: “ഇത്‌ പോലീ​സി​ന്റെ പക്ഷത്തെ ദുഷ്‌പെ​രു​മാ​റ്റത്തെ നിയമ​രാ​ഹി​ത്യ​ത്തി​ന്റെ ഒരു പുതിയ തലത്തി​ലെ​ത്തി​ക്കു​ക​യും ‘പോലീസ്‌ ഗുണ്ടാ​യി​സം’ എന്ന ഒരു പുതിയ പ്രയോ​ഗം രൂപം കൊള്ളാൻ ഇടയാ​ക്കു​ക​യും ചെയ്‌തി​രി​ക്കു​ന്നു.”

അതു​കൊണ്ട്‌ പോലീസ്‌ ഡിപ്പാർട്ട്‌മെ​ന്റു​കൾക്ക്‌ തങ്ങളുടെ പ്രതി​ച്ഛായ മെച്ച​പ്പെ​ടു​ത്താൻ എന്തു ചെയ്യാ​നാ​കു​മെന്ന്‌ അധികാ​രി​കൾ ചോദി​ക്കു​ന്നു. പൊതു​ജ​ന​സേ​വ​ന​ത്തി​ലെ തങ്ങളുടെ പങ്കി​ലേക്കു ജനശ്രദ്ധ ആകർഷി​ക്കാ​നുള്ള ശ്രമത്തിൽ നിരവധി പോലീസ്‌ സേനകൾ സമൂഹ​ത്തി​നു ഗുണം ചെയ്യുന്ന തങ്ങളുടെ പ്രവൃ​ത്തി​കൾക്ക്‌ ഊന്നൽ നൽകു​ക​യാണ്‌.

പ്രതീക്ഷ ഉണർത്തുന്ന സമുദായ ക്രമസ​മാ​ധാ​ന​പാ​ലനം

ജപ്പാനിൽ പരമ്പരാ​ഗ​ത​മാ​യി തുടർന്നു പോന്നി​രി​ക്കുന്ന ചെറിയ പ്രദേ​ശ​ങ്ങളെ കേന്ദ്രീ​ക​രി​ച്ചുള്ള ക്രമസ​മാ​ധാ​ന​പാ​ലനം മറ്റു രാഷ്‌ട്ര​ങ്ങ​ളു​ടെ ശ്രദ്ധ പിടിച്ചു പറ്റിയി​രി​ക്കു​ന്നു. സാധാ​ര​ണ​മാ​യി ജപ്പാനിൽ ചെറിയ ഓരോ പ്രദേ​ശ​ത്തെ​യും സ്റ്റേഷനിൽ ഷിഫ്‌റ്റു​ക​ളാ​യി പ്രവർത്തി​ക്കുന്ന ഒരു ഡസനോ​ളം പോലീ​സു​കാ​രാണ്‌ ഉണ്ടായി​രി​ക്കുക. വളരെ കാലമാ​യി ജപ്പാനിൽ താമസ​മാ​ക്കി​യി​രി​ക്കുന്ന ബ്രിട്ടീ​ഷു​കാ​ര​നായ കുറ്റകൃ​ത്യ​ശാ​സ്‌ത്ര ലക്‌ചറർ ഫ്രാങ്ക്‌ ലൈഷ്‌മൻ ഇങ്ങനെ പറയുന്നു: “കൊബാൻ (ചെറിയ പോലീസ്‌ സ്റ്റേഷൻ) ഓഫീ​സർമാ​രു​ടെ സൗഹാർദ​പ​ര​മായ സേവന​ത്തി​ന്റെ വ്യാപ്‌തി പ്രസി​ദ്ധ​മാണ്‌: ജപ്പാനി​ലെ പേരി​ല്ലാത്ത അനവധി തെരു​വു​ക​ളി​ലെ മേൽവി​ലാ​സങ്ങൾ സംബന്ധി​ച്ചു വിവരം നൽകുക; ഉടമസ്ഥർ അന്വേ​ഷി​ച്ചു വരാത്ത കളഞ്ഞു​കി​ട്ടിയ കുടകൾ മഴയത്തു കുടു​ങ്ങി​പ്പോ​യ​വർക്കു നൽകുക; മദ്യപി​ച്ചു ലക്കുകെട്ട സാരാ​രി​മാൻമാർക്ക്‌ (ബിസി​ന​സ്സു​കാ​രും ഉദ്യോ​ഗ​സ്ഥ​രും) വീട്ടി​ലേ​ക്കുള്ള അവസാ​നത്തെ വണ്ടി കിട്ടു​ന്നു​വെന്ന്‌ ഉറപ്പു​വ​രു​ത്തുക; ‘പൗരന്മാ​രു​ടെ പ്രശ്‌നങ്ങൾ’ സംബന്ധിച്ച്‌ ഉപദേശം നൽകുക എന്നതെ​ല്ലാം അതിൽപ്പെ​ടു​ന്നു.” സുരക്ഷി​ത​മാ​യി നടക്കാ​വുന്ന തെരു​വു​ക​ളുള്ള നഗരം എന്ന അസൂയാ​വ​ഹ​മായ ഖ്യാതി ജപ്പാനു നേടി​ക്കൊ​ടു​ക്കു​ന്ന​തിൽ ചെറിയ പ്രദേ​ശ​ങ്ങളെ കേന്ദ്രീ​ക​രി​ച്ചുള്ള ക്രമസ​മാ​ധാ​ന​പാ​ലനം പങ്കുവ​ഹി​ച്ചി​ട്ടുണ്ട്‌.

ഈ വിധത്തി​ലുള്ള ക്രമസ​മാ​ധാ​ന​പാ​ലനം മറ്റു സ്ഥലങ്ങളിൽ വിജയി​ക്കു​മോ? ചില കുറ്റകൃ​ത്യ​ശാ​സ്‌ത്രജ്ഞർ, ഇതു പ്രയോ​ജ​ന​പ്ര​ദ​മാ​ണെന്ന നിഗമ​ന​ത്തിൽ എത്തി​ച്ചേർന്നി​ട്ടുണ്ട്‌. വാർത്താ​വി​നി​മയ രംഗത്തെ നൂതന സൗകര്യ​ങ്ങ​ളു​ടെ ഉപയോ​ഗം പോലീ​സു​കാ​രെ ജനങ്ങളിൽനിന്ന്‌ അകറ്റു​ന്ന​തിന്‌ ഇടയാ​ക്കി​യി​ട്ടുണ്ട്‌. ഇന്നു പല നഗരങ്ങ​ളി​ലും പോലീ​സി​ന്റെ മുഖ്യ ജോലി അടിയ​ന്തിര സാഹച​ര്യ​ങ്ങ​ളോ​ടു പ്രതി​ക​രി​ക്കുക എന്നത്‌ ആയിത്തീർന്നി​രി​ക്കു​ന്നു. കുറ്റകൃ​ത്യം തടയുക എന്ന പ്രാഥ​മിക ലക്ഷ്യത്തി​ന്റെ പ്രാധാ​ന്യം നഷ്ടപ്പെട്ടു പോയി​രി​ക്കു​ന്നതു പോലെ ചില​പ്പോൾ തോന്നു​ന്നു. ഈ പ്രവണത കണക്കി​ലെ​ടു​ത്തു​കൊണ്ട്‌ അയൽപക്ക ജാഗ്രത എന്ന ആശയത്തി​നു വീണ്ടും ഊന്നൽ കൊടു​ത്തു തുടങ്ങി​യി​രി​ക്കു​ക​യാണ്‌.

അയൽപക്ക ജാഗ്രതാ പരിപാ​ടി

“ഇത്‌ വളരെ ഫലപ്ര​ദ​മാണ്‌; ഇത്‌ കുറ്റകൃ​ത്യ​നി​രക്ക്‌ കുറയ്‌ക്കു​ന്നു” എന്ന്‌ വെയിൽസി​ലെ ഒരു പോലീസ്‌ കോൺസ്റ്റ​ബി​ളായ ഡൂയി പറയുന്നു. “മറ്റുള്ള​വ​രു​ടെ സുരക്ഷ സംബന്ധിച്ച്‌ ഓരോ​രു​ത്ത​രെ​യും ജാഗ്രത ഉള്ളവരാ​ക്കി​ത്തീർക്കു​ക​യാണ്‌ അയൽപക്ക ജാഗ്രതാ പരിപാ​ടി​യു​ടെ ലക്ഷ്യം. അയൽക്കാർക്കു പരസ്‌പരം അറിയാ​നും പേരും ഫോൺ നമ്പരു​ക​ളും കൈമാ​റാ​നും കുറ്റകൃ​ത്യം തടയാ​നുള്ള മാർഗ​ങ്ങളെ കുറിച്ചു കേൾക്കാ​നു​മാ​യി ഞങ്ങൾ യോഗങ്ങൾ സംഘടി​പ്പി​ക്കു​ന്നു. അയൽക്കാർക്കി​ട​യി​ലെ ആ പഴയ അടുപ്പ​വും സ്‌നേ​ഹ​വു​മൊ​ക്കെ തിരി​ച്ചു​കൊ​ണ്ടു​വ​രാൻ സഹായി​ക്കു​ന്ന​തി​നാൽ ഈ പദ്ധതി എനിക്ക്‌ ഇഷ്ടമാണ്‌. പലപ്പോ​ഴും ആളുകൾക്ക്‌ തങ്ങളുടെ അയൽക്കാർ ആരാ​ണെന്നു പോലും അറിയില്ല. ആളുകളെ ബോധ​വാ​ന്മാ​രാ​ക്കാൻ കഴിയു​ന്ന​താണ്‌ ഈ പദ്ധതി​യു​ടെ വിജയം.” പോലീ​സും പൊതു​ജ​ന​വും തമ്മിലുള്ള ബന്ധത്തെ​യും ഇതു മെച്ച​പ്പെ​ടു​ത്തു​ന്നു.

കുറ്റകൃ​ത്യ​ത്തിന്‌ ഇരയാ​യ​വ​രോ​ടു കൂടുതൽ അനുക​മ്പാ​പൂർവം പെരു​മാ​റാൻ പോലീ​സി​നെ പ്രോ​ത്സാ​ഹി​പ്പി​ക്കാ​നുള്ള ശ്രമങ്ങ​ളും നടന്നു​വ​രു​ന്നു. കുറ്റകൃ​ത്യ​ങ്ങൾക്ക്‌ ഇരയാ​യ​വരെ കുറിച്ചു പഠനം നടത്തു​ന്ന​തിൽ പ്രശസ്‌ത​നായ ഡച്ചുകാ​രൻ യാൻ വാൻ ഡേക്ക്‌ എഴുതി: “ഡോക്ടർമാർ രോഗി​ക​ളോ​ടു പെരു​മാ​റുന്ന രീതി എത്ര പ്രധാ​ന​മാ​ണോ അത്രതന്നെ പ്രധാ​ന​മാണ്‌ പോലീസ്‌ ഉദ്യോ​ഗസ്ഥർ കുറ്റകൃ​ത്യ​ത്തിന്‌ ഇരയാ​യ​വ​രോട്‌ ഇടപെ​ടുന്ന വിധവും എന്ന്‌ പോലീ​സു​കാർക്കു മനസ്സി​ലാ​ക്കി കൊടു​ക്കേ​ണ്ട​താണ്‌.” പല സ്ഥലങ്ങളിൽ പോലീസ്‌ ഇപ്പോ​ഴും ഭവനത്തി​ലെ അക്രമ​ത്തെ​യും ബലാത്സം​ഗ​ത്തെ​യും യഥാർഥ കുറ്റകൃ​ത്യ​ങ്ങ​ളാ​യി കണക്കാ​ക്കു​ന്നില്ല. എന്നാൽ റോബ്‌ മോബി പറയുന്നു: “വീട്ടിലെ അക്രമ​ത്തോ​ടും ബലാത്സം​ഗ​ത്തോ​ടു​മുള്ള പോലീസ്‌ സമീപ​ന​ത്തിൽ സമീപ വർഷങ്ങ​ളിൽ വലിയ പുരോ​ഗതി ഉണ്ടായി​ട്ടുണ്ട്‌. എങ്കിലും ഇനിയും ഏറെ പുരോ​ഗ​മി​ക്കേ​ണ്ടി​യി​രി​ക്കു​ന്നു.” അധികാര ദുർവി​നി​യോ​ഗ​മാണ്‌ ഏതാണ്ട്‌ എല്ലായി​ട​ത്തു​മുള്ള പോലീസ്‌ സേനക​ളും അഭിവൃ​ദ്ധി​പ്പെ​ടേണ്ട മറ്റൊരു മണ്ഡലം.

പോലീസ്‌ അഴിമതി സംബന്ധിച്ച ഭയം

പോലീസ്‌ അഴിമ​തി​യെ കുറി​ച്ചുള്ള വാർത്തകൾ വ്യാപ​ക​മാ​യി​ക്കൊ​ണ്ടി​രി​ക്കുന്ന ഇക്കാലത്ത്‌ പോലീ​സു​കാ​രെ ജനങ്ങളു​ടെ സംരക്ഷ​ക​രാ​യി വീക്ഷി​ക്കു​ന്ന​തിൽ അർഥമി​ല്ലെന്നു ചില​പ്പോൾ തോന്നാം. പോലീസ്‌ പ്രവർത്തനം തുടങ്ങിയ കാലം​തൊട്ട്‌ ഇത്തരം റിപ്പോർട്ടു​കൾ നിലവി​ലി​രു​ന്നി​ട്ടുണ്ട്‌. 1855 എന്ന വർഷത്തെ പരാമർശി​ച്ചു​കൊണ്ട്‌ ന്യൂ​യോർക്ക്‌ പോലീസ്‌ ഡിപ്പാർട്ട്‌മെന്റ്‌—ഒരു നഗരവും അതിന്റെ പോലീ​സും (ഇംഗ്ലീഷ്‌) എന്ന പുസ്‌തകം “അനേകം ന്യൂ​യോർക്കു​കാർക്ക്‌ പോലീ​സു​കാ​രെ​യും കുറ്റവാ​ളി​ക​ളെ​യും തമ്മിൽ തിരി​ച്ച​റി​യുക ബുദ്ധി​മു​ട്ടാ​യി​ക്കൊ​ണ്ടി​രി​ക്കു​ക​യാണ്‌ എന്ന ധാരണ” ഉള്ളതായി പറഞ്ഞു. ഡങ്കൻ ഗ്രീൻ എഴുതിയ ലാറ്റിൻ അമേരി​ക്ക​യു​ടെ മുഖങ്ങൾ (ഇംഗ്ലീഷ്‌) എന്ന പുസ്‌തകം അവിടത്തെ പോലീ​സു​കാർ “അങ്ങേയറ്റം അഴിമ​തി​ക്കാ​രും കാര്യ​ക്ഷ​മ​ത​യി​ല്ലാ​ത്ത​വ​രും മനുഷ്യാ​വ​കാശ ലംഘി​ക​ളും ആണെന്നു പൊതു​വേ കരുത​പ്പെ​ടു​ന്നു” എന്ന്‌ പറഞ്ഞു. ലാറ്റിൻ അമേരി​ക്ക​യി​ലെ 14,000 അംഗങ്ങ​ളുള്ള പോലീസ്‌ സേനയു​ടെ ചീഫ്‌ പേഴ്‌സണൽ ഓഫീസർ പറഞ്ഞു: “പോലീ​സു​കാ​രന്‌ ഒരു മാസം കിട്ടുന്ന ശമ്പളം 100 ഡോള​റിൽ [5,000 രൂപ] കുറവാ​യി​രി​ക്കു​മ്പോൾ മറ്റെന്താ​ണു പ്രതീ​ക്ഷി​ക്കാൻ കഴിയുക? ആരെങ്കി​ലും കൈക്കൂ​ലി വെച്ചു​നീ​ട്ടി​യാൽ അയാ​ളെന്തു ചെയ്യും?”

അഴിമതി എത്ര വലിയ ഒരു പ്രശ്‌ന​മാണ്‌? അതിനുള്ള ഉത്തരം നിങ്ങൾ ചോദി​ക്കു​ന്നത്‌ ആരോ​ടാണ്‌ എന്നതിനെ ആശ്രയി​ച്ചി​രി​ക്കു​ന്നു. 1,00,000 ജനങ്ങൾ വസിക്കുന്ന ഒരു നഗരത്തിൽ വർഷങ്ങ​ളോ​ളം റോന്തു ചുറ്റൽ ചുമതല ഉണ്ടായി​രുന്ന വടക്കേ അമേരി​ക്ക​യി​ലെ ഒരു പോലീ​സു​കാ​രൻ ഇങ്ങനെ പറയുന്നു: “സത്യസ​ന്ധ​ര​ല്ലാത്ത ചില പോലീ​സു​കാർ ഉണ്ടെന്നു​ള്ളത്‌ ശരിയാണ്‌. എന്നാൽ പോലീ​സു​കാ​രിൽ ഭൂരി​പ​ക്ഷ​വും ആത്മാർഥ​ത​യു​ള്ള​വ​രാണ്‌. അതാണ്‌ എന്റെ അനുഭവം.” നേരെ മറിച്ച്‌ കുറ്റാ​ന്വേ​ഷകൻ എന്ന നിലയിൽ 26 വർഷത്തെ അനുഭ​വ​പ​രി​ച​യ​മുള്ള മറ്റൊരു രാജ്യ​ത്തു​നി​ന്നുള്ള ഒരു വ്യക്തി ഇങ്ങനെ പറയുന്നു: “അഴിമതി സമസ്‌ത വ്യാപ​ക​മാ​ണെ​ന്നാണ്‌ എന്റെ അഭി​പ്രാ​യം. പോലീ​സു​കാർക്കി​ട​യിൽ സത്യസന്ധത വളരെ അപൂർവ​മാണ്‌. സാധ്യ​ത​യ​നു​സ​രിച്ച്‌ മോഷണം നടന്ന ഒരു വീടു പരി​ശോ​ധി​ക്കു​മ്പോൾ പണം കണ്ടെത്തി​യാൽ പോലീ​സു​കാ​രൻ അതെടു​ക്കും. കളവു​പോയ വസ്‌തു​ക്കൾ കണ്ടെത്തി​യാൽ അതി​ലൊ​രു ഭാഗം അയാൾ സ്വന്തമാ​ക്കും.” ചില പോലീ​സു​കാർ അഴിമ​തി​ക്കാ​രാ​കു​ന്നത്‌ എന്തു​കൊ​ണ്ടാണ്‌?

ചിലർ ഉത്തമ ആദർശ​ങ്ങ​ളോ​ടെ​യാ​ണു ജോലി​യിൽ പ്രവേ​ശി​ക്കു​ന്നത്‌. എന്നാൽ പിന്നീട്‌ അവർ അഴിമ​തി​ക്കാ​രായ സഹപ്ര​വർത്ത​ക​രാ​ലും തങ്ങൾ ഇടപഴ​കുന്ന കുറ്റകൃ​ത്യ ലോക​ത്തി​ന്റെ അധഃപ​തിച്ച നിലവാ​ര​ങ്ങ​ളാ​ലും സ്വാധീ​നി​ക്ക​പ്പെ​ടു​ന്നു. പോലീ​സു​കാർക്ക്‌ അറിയാ​വു​ന്നത്‌ (ഇംഗ്ലീഷ്‌) എന്ന പുസ്‌ത​ക​ത്തിൽ, ഷിക്കാ​ഗോ​യിൽ റോന്തു​ചു​റ്റൽ ചുമത​ല​യുള്ള ഒരു പോലീ​സു​കാ​രൻ ഇങ്ങനെ പറഞ്ഞതാ​യി റിപ്പോർട്ടു ചെയ്യുന്നു: “പോലീ​സു​കാർക്ക്‌ തിന്മയു​മാ​യി വളരെ​യ​ടുത്ത സമ്പർക്കം ഉണ്ട്‌. ഊണി​ലും ഉറക്കത്തി​ലും അവർക്ക്‌ അതുമാ​യി ഇടപഴ​കേണ്ടി വരുന്നു.” അത്തരം വഷളത്ത​വു​മാ​യുള്ള സമ്പർക്ക​ത്തിന്‌ വളരെ വേഗം ഒരു വ്യക്തിയെ മോശ​മാ​യി ബാധി​ക്കാ​നാ​കും.

പോലീസ്‌ വളരെ വിലപ്പെട്ട സേവനങ്ങൾ ചെയ്യു​ന്നെ​ങ്കി​ലും അവ തികവു​റ്റ​വയല്ല. മെച്ചമായ എന്തെങ്കി​ലും നമുക്കു പ്രതീ​ക്ഷി​ക്കാ​നാ​കു​മോ? (g02 7/8)

[അടിക്കു​റിപ്പ്‌]

[8, 9 പേജു​ക​ളി​ലെ ചതുരം/ചിത്രങ്ങൾ]

“ബ്രിട്ടീഷ്‌ പോലീസ്‌ എത്ര നല്ലവരാണ്‌!”

സ്വന്തമാ​യി ഒരു ഔദ്യോ​ഗിക പോലീസ്‌ സേനയെ സംഘടി​പ്പി​ക്കു​ന്ന​തി​ന്റെ ചെലവു വഹിക്കാൻ സാധിച്ച ആദ്യ രാഷ്‌ട്ര​ങ്ങ​ളിൽ ഒന്നായി​രു​ന്നു ബ്രിട്ടൻ. കാര്യ​ക്ഷ​മ​ത​യോ​ടും സമയനി​ഷ്‌ഠ​യോ​ടും കൂടെ പ്രവർത്തി​ച്ചി​രുന്ന ബ്രിട്ട​നി​ലെ കുതി​ര​വണ്ടി സംവി​ധാ​നം പോ​ലെ​തന്നെ തങ്ങളുടെ സമൂഹ​വും സുസം​ഘ​ടി​തം ആയിരി​ക്കാൻ അവർ ആഗ്രഹി​ച്ചു. 1829-ൽ, ആഭ്യന്ത​ര​കാ​ര്യ സെക്ര​ട്ട​റി​യാ​യി​രുന്ന സർ റോബർട്ട്‌ പീൽ സ്‌കോ​ട്ട്‌ലൻഡ്‌ യാർഡ്‌ ആസ്ഥാന​മാ​യുള്ള ഒരു ലണ്ടൻ നഗര പോലീസ്‌ വിഭാ​ഗ​ത്തിന്‌ അംഗീ​കാ​രം നൽകാൻ പാർല​മെ​ന്റി​നെ​ക്കൊ​ണ്ടു സമ്മതി​പ്പി​ക്കു​ന്ന​തിൽ വിജയി​ച്ചു. മദ്യപാ​നി​കൾക്കും തെരുവ്‌ ചൂതാ​ട്ട​ക്കാർക്കും എതിരെ കടുത്ത നടപടി​കൾ സ്വീക​രിച്ച അവർ തുടക്ക​ത്തിൽ അത്ര ജനസമ്മതർ അല്ലായി​രു​ന്നെ​ങ്കി​ലും, പിന്നീടു ജനപ്രീ​തി നേടി.

ബ്രിട്ടന്റെ വ്യാവ​സാ​യിക നേട്ടങ്ങൾ ലോക​മു​മ്പാ​കെ പ്രദർശി​പ്പി​ക്കാൻ 1851-ൽ ലണ്ടൻ അവിടെ ഒരുക്കിയ മഹാ​മേ​ള​യ്‌ക്കാ​യി സകല രാഷ്‌ട്ര​ങ്ങ​ളെ​യും അഭിമാ​ന​പൂർവം ക്ഷണിച്ചു. മദ്യപാ​നി​ക​ളും വേശ്യ​ക​ളും അലഞ്ഞു​തി​രി​ഞ്ഞു നടക്കു​ന്ന​വ​രു​മൊ​ന്നും ഇല്ലാത്ത ക്രമസ​മാ​ധാ​ന​മുള്ള തെരു​വു​കൾ കണ്ട്‌ സന്ദർശകർ വിസ്‌മ​യം​കൂ​റി. കാര്യ​ക്ഷ​മ​ത​യുള്ള പോലീസ്‌ ജനക്കൂ​ട്ട​ത്തി​നു നിർദേ​ശങ്ങൾ നൽകു​ക​യും സന്ദർശ​ക​രു​ടെ സാധനങ്ങൾ ചുമക്കു​ക​യും റോഡു മുറിച്ചു കടക്കാൻ ആളുകളെ സഹായി​ക്കു​ക​യും എന്തിന്‌, വൃദ്ധമാ​രെ എടുത്തു​കൊ​ണ്ടു​പോ​യി ടാക്‌സി​ക​ളിൽ ഇരുത്തു​ക​യും പോലും ചെയ്‌തു. “ബ്രിട്ടീഷ്‌ പോലീസ്‌ എത്ര നല്ലവരാണ്‌” എന്ന്‌ ബ്രിട്ടീ​ഷു​കാ​രും വിദേ​ശീ​യ​രും ഒരു​പോ​ലെ പറഞ്ഞു​കേ​ട്ട​തിൽ അതിശ​യ​മു​ണ്ടോ?

കുറ്റകൃ​ത്യം തടയു​ന്ന​തിൽ അവർ വളരെ മിടു​ക്ക​രാ​യി​രു​ന്ന​തി​നാൽ 1873-ൽ ചെസ്റ്ററി​ലെ ചീഫ്‌ കോൺസ്റ്റ​ബിൾ ആസൂ​ത്രിത കുറ്റകൃ​ത്യം ഇല്ലാതാ​കുന്ന ഒരു സമയം ഭാവന​യിൽ കണ്ടു! ആംബു​ലൻസ്‌-അഗ്നിശമന സേവന​ങ്ങ​ളും പോലീസ്‌ ലഭ്യമാ​ക്കാൻ തുടങ്ങി. പാവ​പ്പെ​ട്ട​വർക്ക്‌ വസ്‌ത്ര​ങ്ങ​ളും ചെരി​പ്പു​ക​ളും മറ്റും പ്രദാനം ചെയ്യുന്ന ധർമസം​ഘ​ട​നകൾ അവർ രൂപീ​ക​രി​ച്ചു. ചിലർ ആൺകു​ട്ടി​കൾക്കാ​യി ക്ലബ്ബുകൾ, ഉല്ലാസ​യാ​ത്രകൾ, ഒഴിവു​കാല ഭവനങ്ങൾ എന്നിവ​യും സംഘടി​പ്പി​ച്ചു.

പുതിയ പോലീസ്‌ സേനയി​ലും അഴിമ​തി​യും ക്രൂര​ത​യും ഉണ്ടായി​രു​ന്നതു നിമിത്തം ചില ഉദ്യോ​ഗ​സ്ഥർക്ക്‌ എതിരെ ശിക്ഷണ നടപടി​കൾ എടു​ക്കേ​ണ്ടി​വന്നു. എങ്കിലും മിക്കവ​രും ബലപ്ര​യോ​ഗം കഴിയു​ന്നത്ര ഒഴിവാ​ക്കി​ക്കൊണ്ട്‌ ക്രമസ​മാ​ധാ​നം പാലി​ക്കു​ന്ന​തിൽ അഭിമാ​നം​കൊ​ണ്ടു. 1853-ൽ ലാങ്കഷ​യ​റി​ലെ വിഗണിൽ പോലീ​സിന്‌ സമരക്കാ​രായ ഖനി​ത്തൊ​ഴി​ലാ​ളി​ക​ളു​ടെ കലാപത്തെ നേരി​ടേ​ണ്ടി​വന്നു. കൂടെ പത്തു പോലീ​സു​കാ​രേ ഉണ്ടായി​രു​ന്നു​ള്ളു​വെ​ങ്കി​ലും ധീരനായ സാർജന്റ്‌ ഖനി ഉടമയു​ടെ വെടി​ക്കോ​പ്പു​കൾ ഉപയോ​ഗി​ക്കില്ല എന്ന തീരു​മാ​ന​ത്തിൽ ഉറച്ചു​നി​ന്നു. 1886-ൽ ഹെക്ടർ മക്ലൗഡ്‌ തന്റെ പിതാ​വി​ന്റെ കാൽച്ചു​വ​ടു​കൾ പിന്തു​ടർന്നു​കൊണ്ട്‌ പോലീ​സിൽ ചേർന്ന​പ്പോൾ അദ്ദേഹ​ത്തി​നു ലഭിച്ച ഒരു കത്ത്‌ അന്നു നിലവി​ലി​രുന്ന മനോ​ഭാ​വ​ത്തി​ന്റെ ഒരു പ്രതി​ഫ​ല​ന​മാണ്‌. ദി ഇംഗ്ലീഷ്‌ പോലീസ്‌ അത്‌ ഇപ്രകാ​രം ഉദ്ധരിച്ചു: “പരുഷ​മാ​യി പെരു​മാ​റി​യാൽ നിങ്ങൾക്കു പൊതു​ജന പിന്തുണ നഷ്ടമാ​കും . . . ഞാൻ എപ്പോ​ഴും പൊതു​ജ​നത്തെ ഒന്നാമതു വെക്കുന്നു, കാരണം പോലീ​സു​കാ​രൻ സമൂഹ​ത്തി​ന്റെ ദാസനാണ്‌, അവരെ സേവി​ക്കു​ക​യാണ്‌ അയാളു​ടെ നിയമനം. അവരെ​യും അതേസ​മയം നിങ്ങളു​ടെ മേലു​ദ്യോ​ഗ​സ്ഥ​നെ​യും സന്തോ​ഷി​പ്പി​ക്കേ​ണ്ടതു നിങ്ങളു​ടെ കടമയാണ്‌.”

നഗര പോലീസ്‌ സേനയിൽനിന്ന്‌ ഇൻസ്‌പെക്ടർ ആയി വിരമിച്ച ഹെയ്‌ഡൻ പറയുന്നു: “വിജയ​ക​ര​മാ​യി ക്രമസ​മാ​ധാ​ന​പാ​ലനം നടത്തു​ന്ന​തിന്‌ സമൂഹ​ത്തി​ന്റെ പിന്തുണ ആവശ്യ​മാ​യി​രി​ക്കു​ന്ന​തി​നാൽ എപ്പോ​ഴും ആത്മനി​യ​ന്ത്ര​ണ​ത്തോ​ടെ പ്രവർത്തി​ക്കാൻ ഞങ്ങളെ പഠിപ്പി​ച്ചി​രു​ന്നു. ഞങ്ങളുടെ ചെറിയ ലാത്തി മറ്റൊരു മാർഗ​വും ഇല്ലാത്ത​പ്പോൾ മാത്ര​മാണ്‌ ഉപയോ​ഗി​ച്ചി​രു​ന്നത്‌. മിക്കവ​രും തങ്ങളുടെ സേവന​കാ​ലത്ത്‌ ഒരിക്കൽപ്പോ​ലും അത്‌ ഉപയോ​ഗി​ച്ചി​ട്ടില്ല.” 21 വർഷം ഓടിയ ഡിക്‌സൺ ഓഫ്‌ ഡോക്ക്‌ ഗ്രീൻ എന്ന ജനപ്രീ​തി​യാർജിച്ച ടെലി​വി​ഷൻ സീരി​യ​ലും ബ്രിട്ടീഷ്‌ പോലീ​സിന്‌ നല്ലൊരു പ്രതി​ച്ഛായ ഉണ്ടാക്കി​ക്കൊ​ടു​ക്കു​ന്ന​തിൽ ഒരു പങ്കുവ​ഹി​ച്ചു. തനിക്കു റോന്തു​ചു​റ്റൽ ചുമതല ഉണ്ടായി​രുന്ന പ്രദേ​ശത്തെ ആളുക​ളെ​യെ​ല്ലാം അറിയാ​മാ​യി​രുന്ന സത്യസ​ന്ധ​നായ ഒരു കോൺസ്റ്റ​ബി​ളി​നെ പറ്റിയുള്ള കഥയാ​യി​രു​ന്നു അത്‌. ആ പ്രതി​ച്ഛാ​യ​യ്‌ക്കൊ​ത്തു ജീവി​ക്കാൻ പോലീ​സു​കാ​രെ അതു പ്രേരി​പ്പി​ച്ചി​രി​ക്കാം, എന്നാൽ പോലീ​സി​നോ​ടുള്ള ബ്രിട്ടീ​ഷു​കാ​രു​ടെ ബഹുമാ​ന​വും സ്‌നേ​ഹ​വും അതു വർധി​പ്പി​ച്ചു എന്നതിൽ സംശയ​മില്ല.

ബ്രിട്ട​നിൽ ആളുക​ളു​ടെ മനോ​ഭാ​വ​ത്തിന്‌ 1960-കളിൽ സാരമായ മാറ്റം വന്നു. പരമ്പരാ​ഗത ദേശീയ അഭിമാ​നം അധികാ​രത്തെ ചോദ്യം ചെയ്യുന്ന പ്രവണ​ത​യ്‌ക്കു വഴിമാ​റി. അയൽപക്ക ജാഗ്രതാ പരിപാ​ടി​ക​ളി​ലൂ​ടെ പൊതു​പി​ന്തുണ നേടി​യെ​ടു​ക്കാ​നുള്ള ശ്രമങ്ങൾ നടത്തി​യി​ട്ടും, 1970-കളിൽ പോലീ​സു​കാർക്കി​ട​യി​ലെ അഴിമ​തി​യെ​യും വർഗീ​യ​ത​യെ​യും കുറി​ച്ചുള്ള റിപ്പോർട്ടു​കൾ അവരുടെ പ്രതി​ച്ഛാ​യ​യ്‌ക്കു മങ്ങലേൽപ്പി​ച്ചു. വർഗീയ വേർതി​രി​വു കാണി​ക്കു​ക​യും കള്ളത്തെ​ളി​വു​കൾ കെട്ടി​ച്ച​മ​യ്‌ക്കു​ക​യും ചെയ്‌ത​താ​യുള്ള അനേകം ആരോ​പ​ണ​കൾക്കു ശേഷം, അടുത്ത കാലത്തു പോലീ​സു​കാർ മെച്ച​പ്പെ​ടാൻ ആത്മാർഥ ശ്രമങ്ങൾ നടത്തി​യി​ട്ടുണ്ട്‌.

[കടപ്പാട്‌]

മുകളിലത്തെ ഫോട്ടോ: http://www.constabulary.com

[10-ാം പേജിലെ ചതുരം/ചിത്രം]

ന്യൂയോർക്കിൽ ഒരു അത്ഭുത​മോ?

പോലീസ്‌ പ്രത്യേക ശ്രമം ചെലു​ത്തു​മ്പോൾ ശ്രദ്ധേ​യ​മായ ഫലങ്ങൾ കൈവ​രി​ക്കാ​നാ​കും. കാലങ്ങ​ളാ​യി ന്യൂ​യോർക്ക്‌ നഗരത്തെ ലോക​ത്തി​ലെ ഏറ്റവും അപകട​ക​ര​മായ നഗര​മെന്നു വിശേ​ഷി​പ്പി​ച്ചി​രു​ന്നു. 1980-കളുടെ അവസാ​ന​മാ​യ​പ്പോ​ഴേ​ക്കും ആത്മവി​ശ്വാ​സ​വും മനോ​വീ​ര്യ​വും നഷ്ടപ്പെട്ട പോലീസ്‌ സേനകൾക്കു കുറ്റകൃ​ത്യം നിയ​ന്ത്രി​ക്കാൻ കഴിയാ​ത്തതു പോലെ കാണ​പ്പെട്ടു. സാമ്പത്തിക പ്രശ്‌നങ്ങൾ നിമിത്തം നഗര അധികൃ​തർക്ക്‌ അവരുടെ ശമ്പളനി​ര​ക്കിൽ വർധന വരുത്താൻ കഴിയാത്ത സ്ഥിതി​യാ​യി, പോലീ​സു​കാ​രു​ടെ എണ്ണം കുറയ്‌ക്കേ​ണ്ട​താ​യും വന്നു. മയക്കു​മ​രു​ന്നു വ്യാപാ​രി​കൾ തങ്ങളുടെ പ്രവർത്തനം വ്യാപി​പ്പി​ച്ച​തോ​ടെ അക്രമ​ത്തിൽ ഭയാന​ക​മായ വർധന ഉണ്ടായി. നഗരത്തി​ന്റെ ഉൾഭാ​ഗ​ങ്ങ​ളിൽ വെടി​യൊച്ച കേട്ടാണ്‌ ആളുകൾ ഉറങ്ങാൻ പോയി​രു​ന്നത്‌. 1991-ൽ വലിയ വംശീയ കലാപ​ങ്ങ​ളും ഉണ്ടായി. പോലീ​സു​കാർ തന്നെയും തങ്ങളുടെ പ്രശ്‌ന​ങ്ങ​ളി​ലേക്കു ശ്രദ്ധ ക്ഷണിക്കാൻ ശബ്ദായ​മാ​ന​മായ ഒരു പ്രതി​ഷേധ പ്രകടനം സംഘടി​പ്പി​ച്ചു.

എന്നാൽ ഒരു പുതിയ പോലീസ്‌ മേധാവി തന്റെ കീഴി​ലുള്ള ഉദ്യോ​ഗ​സ്ഥർക്ക്‌ ഉത്സാഹം പകരു​ന്ന​തിൽ താത്‌പ​ര്യ​മെ​ടു​ത്തു. അദ്ദേഹം ഓരോ പോലീസ്‌ സംഘവു​മാ​യും ക്രമമാ​യി കൂടി​വന്ന്‌ പ്രവർത്തന തന്ത്രങ്ങൾ വിശക​ലനം ചെയ്‌തു. ന്യൂ​യോർക്ക്‌ പോലീസ്‌ ഡിപ്പാർട്ടു​മെന്റ്‌ എന്ന പുസ്‌ത​ക​ത്തിൽ ജെയിംസ്‌ ലാർഡ​ന​റും തോമസ്‌ റെപെ​റ്റോ​യും ഇങ്ങനെ വിശദീ​ക​രി​ക്കു​ന്നു: “പ്രാ​ദേ​ശിക പോലീസ്‌ സംഘങ്ങ​ളു​ടെ കമാൻഡർമാർ ഡിറ്റക്ടീവ്‌ സംഘത്തി​ന്റെ​യും മയക്കു​മ​രു​ന്നു ബ്യൂ​റോ​യു​ടെ​യും തലവന്മാ​രെ കുറിച്ചു വർത്തമാ​ന​പ്പ​ത്ര​ങ്ങ​ളിൽ വായി​ക്കുക മാത്രമേ ചെയ്‌തി​രു​ന്നു​ള്ളൂ. അവരു​മാ​യുള്ള കൂടി​ക്കാ​ഴ്‌ചകൾ അപൂർവ​മാ​യി​രു​ന്നു. എന്നാൽ അവരെ​ല്ലാം ഇപ്പോൾ ഒന്നിച്ചി​രു​ന്നു മണിക്കൂ​റു​ക​ളോ​ളം ചർച്ചകൾ നടത്താൻ തുടങ്ങി.” കുറ്റകൃ​ത്യ നിരക്കു പെട്ടെന്നു കുറഞ്ഞു. 1993-ൽ ഏകദേശം 2,000 പേർ കൊല്ല​പ്പെട്ട സ്ഥാനത്ത്‌ 1998 ആയപ്പോ​ഴേ​ക്കും ആ സംഖ്യ 633 ആയി കുറഞ്ഞു—35 വർഷത്തി​നു​ള്ളി​ലെ ഏറ്റവും കുറഞ്ഞ കൊല​പാ​തക നിരക്ക്‌. ന്യൂ​യോർക്കു​കാർ അതിനെ ഒരു അത്ഭുത​മാ​യാ​ണു കണ്ടത്‌. കഴിഞ്ഞ എട്ടു വർഷത്തി​നു​ള്ളിൽ റിപ്പോർട്ടു ചെയ്യ​പ്പെ​ടുന്ന കുറ്റകൃ​ത്യ​ത്തിൽ 64 ശതമാനം കുറവ്‌ ഉണ്ടായി​രി​ക്കു​ന്നു.

ഈ നേട്ടം കൈവ​രി​ക്കാൻ കഴിഞ്ഞത്‌ എങ്ങനെ​യാണ്‌? 2002 ജനുവരി 1-ലെ ദ ന്യൂ​യോർക്ക്‌ ടൈംസ്‌ വിജയ​ത്തി​ലേക്കു നയിച്ച ഒരു ഘടകം ‘കോം​പ്‌സ്റ്റാറ്റ്‌’ ആണെന്നു പറഞ്ഞു. “പ്രശ്‌നങ്ങൾ ഉടലെ​ടു​ക്കു​മ്പോൾത്തന്നെ അവ കണ്ടെത്തി പരിഹ​രി​ക്കു​ന്ന​തിന്‌ ആഴ്‌ച​തോ​റും ഓരോ പോലീസ്‌ സംഘത്തി​ന്റെ​യും അധികാര പരിധി​യിൽ വരുന്ന പ്രദേ​ശ​ങ്ങ​ളി​ലെ കണക്കുകൾ പരി​ശോ​ധി​ക്കുന്ന ഒരു കുറ്റാ​ന്വേ​ഷക സംവി​ധാ​നം” ആണത്‌. മുൻ പോലീസ്‌ കമ്മീഷ​ണ​റായ ബെർണാർഡ്‌ കെറിക്‌ പറഞ്ഞു: “കുറ്റകൃ​ത്യം നടക്കു​ന്നത്‌ എവി​ടെ​യാണ്‌, എന്തു​കൊ​ണ്ടാണ്‌ എന്നു ഞങ്ങൾ പരി​ശോ​ധി​ക്കു​ക​യും ആ പ്രദേ​ശ​ങ്ങൾക്കു കൂടുതൽ ശ്രദ്ധ നൽകാൻ വേണ്ട പോലീസ്‌ സന്നാഹത്തെ അങ്ങോട്ടു മാറ്റി സ്ഥാപി​ക്കു​ക​യും ചെയ്‌തു. അങ്ങനെ​യാ​ണു കുറ്റകൃ​ത്യം കുറയ്‌ക്കു​ന്നത്‌.”

[7-ാം പേജിലെ ചിത്രം]

ഒരു സാധാരണ ജാപ്പനീസ്‌ പോലീസ്‌ സ്റ്റേഷൻ

[7-ാം പേജിലെ ചിത്രം]

ഹോങ്കോംഗിലെ ട്രാഫിക്‌ പോലീസ്‌

[8, 9 പേജു​ക​ളി​ലെ ചിത്രം]

ഇംഗ്ലണ്ടിലെ ഒരു ഫുട്‌ബോൾ മത്സരത്തി​നി​ട​യിൽ ജനക്കൂ​ട്ടത്തെ നിയ​ന്ത്രി​ക്കു​ന്നു

[9-ാം പേജിലെ ചിത്രം]

അപകടങ്ങളിൽ പെട്ടവരെ സഹായി​ക്കു​ന്ന​തും പോലീ​സി​ന്റെ കടമക​ളിൽപ്പെ​ടു​ന്നു