ചൂതാട്ടം എന്ന കെണി ഒഴിവാ​ക്കു​ക

“ചൂതാട്ടം എന്റെ ശാരീ​രിക ആരോ​ഗ്യ​ത്തെ ബാധി​ച്ചില്ല, അതു​പോ​ലെ ഞാൻ അതിനാ​യി ഒരു പരിധി​യിൽ കൂടുതൽ പണം ചെലവാ​ക്കി​യി​രു​ന്നു​മില്ല. എന്നാൽ ഒരു സംഗതി ഞാൻ സമ്മതി​ക്കു​ന്നു, എപ്പോൾ ലോട്ടറി എടുത്താ​ലും എന്റെ ഭാഗ്യ​ന​മ്പ​രു​ക​ളാ​യി വീക്ഷി​ച്ചി​രുന്ന സംഖ്യ​ക​ളാണ്‌ ഞാൻ തിര​ഞ്ഞെ​ടു​ത്തി​രു​ന്നത്‌.”—ലിൻഡ.

ചൂതാ​ട്ട​ക്കാ​രിൽ അനേക​രും ഭാഗ്യ​ന​മ്പ​രു​ക​ളി​ലും ഭാഗ്യം കൈവ​രു​ത്തു​മെന്നു കരുതുന്ന മറ്റു വസ്‌തു​ക്ക​ളി​ലു​മൊ​ക്കെ വിശ്വാ​സം വളർത്തി​യെ​ടു​ക്കു​ന്നു. ഇത്തരം അന്ധവി​ശ്വാ​സ​ങ്ങൾക്കു തങ്ങൾ വലിയ പ്രാധാ​ന്യം കൽപ്പി​ക്കു​ന്നി​ല്ലെന്ന്‌ അവർ വിചാ​രി​ച്ചേ​ക്കാം. എങ്കിലും എന്തു​കൊ​ണ്ടോ അവർ അവയെ മുറുകെ പിടി​ക്കു​ന്നു.

ചൂതു​ക​ളി​യി​ലെ വിജയ​ത്തി​നാ​യി പ്രാർഥി​ക്കു​ന്നവർ പോലു​മുണ്ട്‌. എന്നാൽ തന്നെ ആരാധി​ക്കു​ന്നു​വെന്ന്‌ അവകാ​ശ​പ്പെ​ടു​ക​യും അതേസ​മയം “ഭാഗ്യ​ദേ​വനു പീഠ​മൊ​രു​ക്കു​ക​യും” ചെയ്യുന്ന ആളുകളെ ദൈവം കുറ്റം​വി​ധി​ക്കു​ന്ന​താ​യി ബൈബിൾ പറയുന്നു. (യെശയ്യാ​വു 65:11, പി.ഒ.സി. ബൈബിൾ) അതേ, ഭാഗ്യ​ത്തി​ലുള്ള അന്ധവി​ശ്വാ​സത്തെ പ്രോ​ത്സാ​ഹി​പ്പി​ക്കുന്ന എല്ലാ പ്രവൃ​ത്തി​ക​ളെ​യും ദൈവം വെറു​ക്കു​ന്നു. ചൂതാട്ടം എല്ലാ വിധത്തി​ലും ‘ഭാഗ്യ​ദേവത’യിലുള്ള അന്ധമായ വിശ്വാ​സത്തെ പ്രോ​ത്സാ​ഹി​പ്പി​ക്കു​ന്ന​താണ്‌.

കൂടാതെ, ചൂതാട്ടം യാതൊ​രു സങ്കോ​ച​വും കൂടാതെ പണസ്‌നേ​ഹത്തെ പ്രോ​ത്സാ​ഹി​പ്പി​ക്കു​ന്നു. ആത്മീയ കാര്യ​ങ്ങ​ളിൽ താത്‌പ​ര്യം കുറഞ്ഞു​വ​രുന്ന ഇന്നത്തെ സമൂഹ​ത്തിൽ പണത്തെ ആളുകൾ ദൈവ​ത്തി​ന്റെ സ്ഥാനത്തു പ്രതി​ഷ്‌ഠി​ച്ചി​രി​ക്കു​ക​യാണ്‌. ചൂതാട്ടം ആ ദൈവത്തെ ആരാധി​ക്കു​ന്ന​തി​നുള്ള ഒരു ജനരഞ്‌ജക മാർഗ​വും ആയിത്തീർന്നി​രി​ക്കു​ന്നു. അവരുടെ കത്തീ​ഡ്ര​ലു​കൾ ഗംഭീര ചൂതാ​ട്ട​ശാ​ല​ക​ളാണ്‌, അത്യാ​ഗ്രഹം നല്ലതാണ്‌ എന്നത്‌ പുതിയ വിശ്വാ​സ​പ്ര​മാ​ണ​വും. ചൂതാ​ട്ട​ശാ​ലകൾ സന്ദർശി​ക്കുന്ന ബഹുഭൂ​രി​പക്ഷം ആളുക​ളും വിനോ​ദ​ത്തി​നോ അവിടത്തെ അന്തരീക്ഷം ആസ്വദി​ക്കു​ന്ന​തി​നോ അല്ല, മറിച്ച്‌ “ധാരാളം പണം നേടാ​നാണ്‌” അവിടെ പോകു​ന്ന​തെന്നു പറയു​ന്ന​താ​യി ഗവേഷകർ കണ്ടെത്തി​യി​രി​ക്കു​ന്നു. എന്നാൽ ബൈബിൾ ഈ മുന്നറി​യി​പ്പു നൽകുന്നു: “ദ്രവ്യാ​ഗ്രഹം [‘ധനമോ​ഹം,’ പി.ഒ.സി. ബൈ.] സകലവിധ ദോഷ​ത്തി​ന്നും മൂലമ​ല്ലോ. ഇതു ചിലർ കാംക്ഷി​ച്ചി​ട്ടു വിശ്വാ​സം വിട്ടു​ഴന്നു ബഹുദുഃ​ഖ​ങ്ങൾക്കു അധീന​രാ​യി​ത്തീർന്നി​രി​ക്കു​ന്നു.”—1 തിമൊ​ഥെ​യൊസ്‌ 6:10.

ബൈബിൾ 1 കൊരി​ന്ത്യർ 6:9, 10-ൽ വ്യക്തമാ​യി ഇങ്ങനെ പറയുന്നു: “നിങ്ങ​ളെ​ത്തന്നേ വഞ്ചിക്കാ​തി​രി​പ്പിൻ; . . . വിഗ്ര​ഹാ​രാ​ധി​കൾ, . . . അത്യാ​ഗ്ര​ഹി​കൾ, . . . എന്നിവർ ദൈവ​രാ​ജ്യം അവകാ​ശ​മാ​ക്കു​ക​യില്ല.” അത്യാ​ഗ്രഹം ദുർബ​ലീ​ക​രി​ക്കുന്ന ഒരു സാമൂ​ഹിക വ്യാധി മാത്രമല്ല; അതു മാരക​മായ ഒരു ആത്മീയ വ്യാധി കൂടെ​യാണ്‌—എന്നാൽ അതിനു പ്രതി​വി​ധി​യുണ്ട്‌.

മാറ്റം വരുത്താൻ അവർക്കു ശക്തി ലഭിച്ചു

ആദ്യ ലേഖന​ത്തിൽ പരാമർശിച്ച കാസൂ​ഷി​ഗെ അനുസ്‌മ​രി​ക്കു​ന്നു: “ചൂതാട്ടം നിറു​ത്താൻ ഞാൻ പല തവണ ശ്രമിച്ചു. കൂട്ടു​കാ​രു​മൊത്ത്‌ കുതി​ര​പ്പ​ന്ത​യ​ങ്ങ​ളിൽ വാതു വെക്കു​ന്നത്‌ എന്റെ കുടും​ബത്തെ തകർക്കു​ക​യാ​ണെന്നു ഞാൻ മനസ്സി​ലാ​ക്കി. ചൂതാ​ട്ട​ത്തിൽ എനിക്കു കിട്ടിയ പണം ചൂതാ​ട്ട​ത്തി​ലൂ​ടെ​തന്നെ എപ്പോ​ഴും എനിക്കു നഷ്ടമായി. ഞങ്ങളുടെ രണ്ടാമത്തെ മകന്റെ ജനന​ത്തോട്‌ അനുബ​ന്ധി​ച്ചുള്ള ചെലവു​കൾക്കാ​യി എന്റെ ഭാര്യ മാറ്റി​വെ​ച്ചി​രുന്ന പണം പോലും ഞാൻ ചൂതാ​ട്ട​ത്തി​ലൂ​ടെ കളഞ്ഞു​കു​ളി​ച്ചു. ഒടുവിൽ ഞാൻ ജോലി ചെയ്‌തി​രുന്ന കമ്പനി​യു​ടെ പണം എടുത്ത്‌ ചൂതാ​ട്ട​ത്തിൽ ഏർപ്പെ​ടാൻ തുടങ്ങി. അതിന്റെ ഫലമായി എന്റെ ആത്മാഭി​മാ​നം പാടേ നശിച്ചു. ചൂതാട്ടം നിറു​ത്താൻ എന്റെ ഭാര്യ പലപ്പോ​ഴും എന്നോടു കരഞ്ഞു​പ​റ​യു​മാ​യി​രു​ന്നു. എന്നാൽ എനിക്ക്‌ അതിനു കഴിഞ്ഞില്ല.”

അങ്ങനെ​യി​രി​ക്കെ, കാസൂ​ഷി​ഗെ യഹോ​വ​യു​ടെ സാക്ഷി​ക​ളോ​ടൊ​പ്പം ബൈബിൾ പഠിക്കാൻ തുടങ്ങി. അദ്ദേഹം പറയുന്നു: “ഞാൻ ബൈബിൾ എത്രയ​ധി​കം വായി​ച്ചോ അത്രയ​ധി​ക​മാ​യി ഒരു ദൈവം ഉണ്ടെന്നും അവനെ അനുസ​രി​ക്കു​ന്നത്‌ പ്രയോ​ജ​ന​ങ്ങ​ളിൽ കലാശി​ക്കും എന്നുമുള്ള എന്റെ ബോധ്യം ശക്തി​പ്പെട്ടു. ദൈവം നൽകുന്ന ശക്തിയാൽ ചൂതാട്ടം നിറു​ത്തു​മെന്നു ഞാൻ ദൃഢനി​ശ്ചയം ചെയ്‌തു. ഞാൻ ചൂതാട്ടം നിറു​ത്തുക മാത്രമല്ല, അതി​നോ​ടു വെറുപ്പു വളർത്തി​യെ​ടു​ക്കു​ക​യും ചെയ്‌തി​രി​ക്കു​ന്നു. അതിൽ എനിക്കു​തന്നെ അതിശയം തോന്നു​ന്നു. ചൂതാ​ട്ട​ത്തി​ലൂ​ടെ ഞാൻ എന്റെ കുടും​ബത്തെ എത്രമാ​ത്രം വിഷമി​പ്പി​ച്ചെന്ന്‌ ഓർക്കു​മ്പോൾ ഇപ്പോൾ എനിക്കു വളരെ ദുഃഖം തോന്നു​ന്നു. ചൂതാട്ട ആസക്തിയെ തരണം ചെയ്യാ​നും അർഥവ​ത്തായ ഒരു ജീവിതം നയിക്കാ​നും എന്നെ സഹായി​ച്ചി​രി​ക്കു​ന്ന​തിൽ ഞാൻ യഹോ​വ​യാം ദൈവ​ത്തോട്‌ എത്ര നന്ദിയു​ള്ള​വ​നാ​ണെ​ന്നോ!”—എബ്രായർ 4:12.

ആദ്യ ലേഖന​ത്തിൽ പരാമർശിച്ച ജോണും അതു​പോ​ലെ ബൈബിൾ പഠിക്കാൻ ആരംഭി​ച്ചു. അദ്ദേഹം അനുസ്‌മ​രി​ക്കു​ന്നു: “എന്റെ സാഹച​ര്യ​ങ്ങളെ കുറിച്ചു പുനർവി​ചി​ന്തനം ചെയ്യാൻ ബൈബിൾ പഠനം എന്നെ സഹായി​ച്ചു. അതെന്റെ കണ്ണു തുറപ്പി​ച്ചു. എന്റെ ചൂതാട്ടം എനിക്കും കുടും​ബ​ത്തി​നും എത്രമാ​ത്രം ദോഷം ചെയ്യു​ന്നു​ണ്ടെന്ന്‌ ആദ്യമാ​യി ഞാൻ മനസ്സി​ലാ​ക്കി. യഹോവ വെറു​ക്കുന്ന സ്വാർഥ​ത​യെ​യും അത്യാ​ഗ്ര​ഹ​ത്തെ​യും ചൂതാട്ടം പ്രോ​ത്സാ​ഹി​പ്പി​ക്കു​ന്നു​വെന്ന്‌ എനിക്കു കാണാൻ കഴിഞ്ഞു. പഠനം പുരോ​ഗ​മി​ക്കവേ, യഹോ​വ​യോ​ടുള്ള സ്‌നേഹം ചൂതാ​ട്ട​ത്തി​ന്റെ പിടി​യിൽനി​ന്നു വിമു​ക്ത​നാ​കാൻ വേണ്ട ശക്തി എനിക്കു നൽകി. ഒരു മെച്ചപ്പെട്ട ജീവിതം എന്ന സ്വപ്‌ന​മാ​ണു ചൂതാട്ടം തുടങ്ങാൻ എന്നെ പ്രേരി​പ്പി​ച്ചത്‌. ഇപ്പോൾ ചൂതാട്ടം ഉപേക്ഷി​ക്കു​ക​യും യഹോ​വയെ സന്തോ​ഷ​പൂർവം സേവി​ക്കാൻ തുടങ്ങു​ക​യും ചെയ്‌ത​തോ​ടെ ആ സ്വപ്‌നം സാക്ഷാ​ത്‌ക​രി​ക്ക​പ്പെ​ട്ടി​രി​ക്കു​ന്നു.”

ജോണി​ന്റെ ഭാര്യ ലിൻഡ​യും ചൂതാട്ടം അവസാ​നി​പ്പി​ക്കാൻ തീരു​മാ​നി​ച്ചു. “അത്‌ എളുപ്പ​മാ​യി​രു​ന്നില്ല,” അവർ പറയുന്നു. “എന്നാൽ ഞാനും ഭർത്താ​വും യഹോ​വ​യു​ടെ സാക്ഷി​ക​ളോ​ടൊ​പ്പം ബൈബിൾ പഠിക്കാൻ തുടങ്ങി​യ​പ്പോൾ ജീവി​ത​ത്തിൽ പ്രാധാ​ന്യം കൂടു​ത​ലുള്ള കാര്യ​ങ്ങ​ളിൽ ശ്രദ്ധ കേന്ദ്രീ​ക​രി​ക്കാൻ ഞാൻ പഠിച്ചു. ദൈവം സ്‌നേ​ഹി​ക്കുന്ന കാര്യ​ങ്ങളെ സ്‌നേ​ഹി​ക്കാൻ മാത്രമല്ല, എല്ലാത്തരം അത്യാ​ഗ്ര​ഹ​വും ഉൾപ്പെടെ അവൻ വെറു​ക്കുന്ന കാര്യ​ങ്ങളെ വെറു​ക്കാ​നും ഞാൻ പഠിച്ചു. ഇപ്പോൾ എന്റെ ജീവിതം കൂടുതൽ അർഥവ​ത്താ​യി​രി​ക്കു​ന്നു, കൂടാതെ പേഴ്‌സിൽ കൂടുതൽ കാശു​മുണ്ട്‌.”—സങ്കീർത്തനം 97:10.

യഹോ​വ​യാം ദൈവ​വു​മാ​യി ഒരു ബന്ധം വളർത്തി​യെ​ടു​ക്കു​ക​വഴി ചൂതാട്ടം എന്ന കെണി ഒഴിവാ​ക്കാൻ വേണ്ട ശക്തിയും ജ്ഞാനവും നേടാൻ നിങ്ങൾക്കും സാധി​ക്കും. അത്‌ നിങ്ങളു​ടെ സാമ്പത്തിക സ്ഥിതി മാത്രമല്ല വൈകാ​രി​ക​വും ആത്മീയ​വു​മായ ആരോ​ഗ്യ​വും മെച്ച​പ്പെ​ടു​ത്തും. അപ്പോൾ സദൃശ​വാ​ക്യ​ങ്ങൾ 10:22-ലെ (NW) വാക്കുകൾ എത്ര സത്യമാ​ണെന്ന്‌ അനുഭ​വി​ച്ച​റി​യു​ന്ന​തി​ന്റെ സന്തോഷം നിങ്ങൾ ആസ്വദി​ക്കും: “യഹോ​വ​യു​ടെ അനു​ഗ്രഹം—അതാണു സമ്പന്നരാ​ക്കു​ന്നത്‌, അവൻ അതി​നോ​ടു വേദന കൂട്ടുന്നില്ല.”(g02 7/22)

[11-ാം പേജിലെ ആകർഷക വാക്യം]

അത്യാഗ്രഹം ദുർബ​ലീ​ക​രി​ക്കുന്ന ഒരു സാമൂ​ഹിക വ്യാധി മാത്രമല്ല; അതു മാരക​മായ ഒരു ആത്മീയ വ്യാധി കൂടെ​യാണ്‌

[9-ാം പേജിലെ ചതുരം/ചിത്രങ്ങൾ]

ചൂതാട്ടവും പ്രകൃ​ത്യ​തീത ശക്തിക​ളും

‘ദേശീയ ചൂതാട്ട ഫല പഠന കമ്മീഷനു’ സമർപ്പിച്ച ഒരു റിപ്പോർട്ടിൽ ഡ്യൂക്ക്‌ സർവക​ലാ​ശാ​ല​യി​ലെ ഗവേഷകർ ചൂതാട്ട പരസ്യ​ങ്ങൾക്ക്‌ പ്രകൃ​ത്യ​തീത ശക്തിക​ളി​ലെ വിശ്വാ​സ​വു​മാ​യുള്ള ബന്ധത്തെ കുറിച്ചു സൂചി​പ്പി​ച്ചു. റിപ്പോർട്ട്‌ ഇങ്ങനെ പറയുന്നു: “അനേകം [ഭാഗ്യ​ക്കു​റി] പരസ്യ​ങ്ങ​ളും യാതൊ​രു സങ്കോ​ച​വും കൂടാതെ ധനസമ്പാ​ദ​നത്തെ പ്രോ​ത്സാ​ഹി​പ്പി​ക്കു​ന്നു . . . എന്നാൽ ഇത്‌ കഠിനാ​ധ്വാ​ന​ത്തെ​യും സ്ഥിരോ​ത്സാ​ഹ​ത്തെ​യും പ്രോ​ത്സാ​ഹി​പ്പി​ക്കുന്ന തരം ധനസമ്പാ​ദ​നമല്ല, മറിച്ച്‌ അത്ഭുത വിളക്കു​ക​ളി​ലും ഭൂതങ്ങ​ളി​ലും ആശ്രയി​ക്കു​ന്ന​തി​നു സമാന​മാ​യി പ്രതീ​ക്ഷ​ക​ളി​ലും സ്വപ്‌ന​ങ്ങ​ളി​ലും അന്ധവി​ശ്വാ​സ​ങ്ങ​ളി​ലും വേരൂ​ന്നിയ ഒന്നാണ്‌. ഓരോ ലോട്ടറി മാനേ​ജർക്കു​മ​റി​യാം തന്റെ ഏറ്റവും നല്ല ഉപഭോ​ക്താ​ക്ക​ളിൽ മിക്കവ​രും വാതു​വെ​ക്കു​ന്നത്‌ വ്യക്തി​പ​ര​മായ അന്ധവി​ശ്വാ​സങ്ങൾ, ജ്യോ​തിഷ ചാർട്ടു​കൾ, സ്വപ്ര​ഖ്യാ​പിത ഭാവി​ക​ഥ​ന​വി​ദ്യ​ക്കാ​രു​ടെ ഉപദേശം, ഓരോ പേരി​നും തീയതി​ക്കും സ്വപ്‌ന​ത്തി​നും അനു​യോ​ജ്യ​മായ സംഖ്യകൾ നൽകി​യി​ട്ടുള്ള പൂജി​ക്ക​പ്പെ​ടുന്ന ‘സ്വപ്‌ന പുസ്‌ത​കങ്ങൾ’ എന്നിവ​യു​ടെ അടിസ്ഥാ​ന​ത്തി​ലാ​ണെന്ന്‌. എല്ലാ സംഖ്യ​കൾക്കും തിര​ഞ്ഞെ​ടു​ക്ക​പ്പെ​ടാ​നുള്ള ഒരേ സാധ്യ​ത​യു​ണ്ടെ​ന്നും ജനരഞ്‌ജക സംഖ്യകൾ തിര​ഞ്ഞെ​ടു​ക്കു​ന്നത്‌ ഒരുവന്റെ വിജയ​സാ​ധ്യത കുറയ്‌ക്കു​മെ​ന്നും പറയു​ന്ന​തി​നു പകരം, ലോട്ടറി ഏജൻസി​കൾ വ്യക്തി​പ​ര​മാ​യി ഇഷ്ടമുള്ള സംഖ്യകൾ തിര​ഞ്ഞെ​ടു​ക്കാ​നും (അതി​നോ​ടു പറ്റിനിൽക്കാ​നും) അവ എടുക്കു​ന്ന​വരെ പ്രോ​ത്സാ​ഹി​പ്പി​ക്കു​ന്നു.”

[10-ാം പേജിലെ ചിത്രങ്ങൾ]

“യഹോ​വ​യോ​ടുള്ള സ്‌നേഹം ചൂതാ​ട്ട​ത്തി​ന്റെ പിടി​യിൽനി​ന്നു വിമു​ക്ത​നാ​കാൻ വേണ്ട ശക്തി എനിക്കു നൽകി.”—ജോൺ

“ഇപ്പോൾ എന്റെ ജീവിതം കൂടുതൽ അർഥവ​ത്താ​യി​രി​ക്കു​ന്നു, കൂടാതെ പേഴ്‌സിൽ കൂടുതൽ കാശു​മുണ്ട്‌.”—ലിൻഡ

[10-ാം പേജിലെ ചിത്രങ്ങൾ]

“ഞാൻ ചൂതാട്ടം നിറു​ത്തുക മാത്രമല്ല, അതി​നോ​ടു വെറുപ്പു വളർത്തി​യെ​ടു​ക്കു​ക​യും ചെയ്‌തി​രി​ക്കു​ന്നു. അതിൽ എനിക്കു​തന്നെ അതിശയം തോന്നു​ന്നു.”—കാസൂ​ഷി​ഗെ