സമാധാ​നം തേടി മതങ്ങൾ അസ്സീസി​യിൽ സമ്മേളി​ക്കു​ന്നു

“അക്രമം അവസാ​നി​ക്കട്ടെ! യുദ്ധം അവസാ​നി​ക്കട്ടെ! ഭീകര​പ്ര​വർത്തനം അവസാ​നി​ക്കട്ടെ! ഭൂമി​യിൽ നീതി​യും സമാധാ​ന​വും ക്ഷമയും ജീവനും സ്‌നേ​ഹ​വും സാധ്യ​മാ​ക്കി​ത്തീർക്കാൻ സകല മതങ്ങളും ദൈവ​ത്തി​ന്റെ നാമത്തിൽ യത്‌നി​ക്കട്ടെ!”—ജോൺ പോൾ രണ്ടാമൻ പാപ്പാ.

ഇറ്റലി​യി​ലെ അസ്സീസി. 2002 ജനുവരി 24-ന്‌ ലോക​ത്തി​ലെ സംഘടിത മതങ്ങളു​ടെ പ്രതി​നി​ധി​കൾ സമാധാ​ന​ത്തിന്‌—ഭീകര​പ്ര​വർത്തനം, അസഹി​ഷ്‌ണുത അനീതി എന്നിവ മൂലം അപകട​ത്തി​ലാ​യി​രി​ക്കുന്ന സമാധാ​ന​ത്തിന്‌—വേണ്ടി പ്രാർഥി​ക്കാൻ അവിടെ കൂടി​വന്നു. പാപ്പാ ആയിരു​ന്നു ആ യോഗം വിളി​ച്ചു​കൂ​ട്ടി​യത്‌, ന്യൂ​യോർക്ക്‌ നഗരത്തി​ലെ ഇരട്ട​ഗോ​പു​രങ്ങൾ തകർക്ക​പ്പെട്ട്‌ ഏകദേശം രണ്ടു മാസം കഴിഞ്ഞ​പ്പോൾ. മതനേ​താ​ക്ക​ന്മാ​രിൽ അനേക​രും വത്തിക്കാ​ന്റെ ക്ഷണം ഉത്സാഹ​പൂർവം സ്വീക​രി​ച്ചു.

ഇതിനു മുമ്പ്‌ രണ്ടു തവണ—1986-ലും 1993-ലും—ഇറ്റലി​യി​ലെ ഇതേ പട്ടണത്തിൽ പാപ്പാ​യു​ടെ ആഹ്വാ​ന​പ്ര​കാ​രം പ്രാർഥനാ ദിനങ്ങൾ ആചരി​ക്ക​പ്പെ​ട്ടി​ട്ടുണ്ട്‌.a 2002-ലെ യോഗ​ത്തി​നു സാക്ഷ്യം വഹിക്കാൻ ലോക​മെ​മ്പാ​ടു​നി​ന്നും ആയിര​ത്തി​ല​ധി​കം പത്ര​പ്ര​വർത്തകർ എത്തി​ച്ചേർന്നു. വിവിധ മതങ്ങളെ പ്രതി​നി​ധീ​ക​രി​ച്ചു​കൊ​ണ്ടുള്ള സമാധാന പ്രാർഥ​നകൾ അർപ്പി​ക്ക​പ്പെട്ടു. ക്രൈ​സ്‌തവ മതം (കത്തോ​ലി​ക്കർ, ലൂഥറൻകാർ, ആംഗ്ലിക്കൻ സഭക്കാർ, ഓർത്ത​ഡോ​ക്‌സു​കാർ, മെഥഡി​സ്റ്റു​കാർ, ബാപ്‌റ്റി​സ്റ്റു​കാർ, പെന്ത​ക്കോ​സ്‌തു​കാർ, മെനൊ​നൈറ്റ്‌ വിഭാ​ഗ​ക്കാർ, ക്വേക്കർ സഭക്കാർ തുടങ്ങി​യവർ), ഇസ്ലാം, ഹിന്ദു മതം, കൺഫ്യൂ​ഷ്യസ്‌ മതം, സിക്കു മതം, ജൈന മതം, ടെന്‌റി​ക്യോ, ബുദ്ധ മതം, യഹൂദ മതം, പരമ്പരാ​ഗത ആഫ്രിക്കൻ മതങ്ങൾ, ഷിന്റോ മതം, സൊറാ​സ്‌ട്രി​യൻ മതം തുടങ്ങി പല മതങ്ങളു​ടെ പ്രതി​നി​ധി​കൾ സന്നിഹി​ത​രാ​യി​രു​ന്നു. കൂടാതെ ലോക സഭാ സമിതി​യു​ടെ ഒരു പ്രതി​നി​ധി​യും ഉണ്ടായി​രു​ന്നു.

സമാധാ​നത്തെ പ്രകീർത്തി​ച്ചു​കൊ​ണ്ടുള്ള പ്രസ്‌താ​വ​ന​കൾ

രാവിലെ 8:40-ന്‌ ‘സമാധാന സംഘത്തെ’ വഹിച്ചു​കൊ​ണ്ടുള്ള ട്രെയിൻ വത്തിക്കാ​നി​ലെ ചെറിയ റെയിൽവേ സ്റ്റേഷനിൽനി​ന്നു പുറ​പ്പെട്ടു. എല്ലാ സുഖസൗ​ക​ര്യ​ങ്ങ​ളോ​ടും കൂടിയ ഏഴു ബോഗി​ക​ളാണ്‌ അതിലു​ണ്ടാ​യി​രു​ന്നത്‌. യാത്ര​ക്കാ​രു​ടെ സംരക്ഷ​ണാർഥം രണ്ടു ഹെലി​ക്കോ​പ്‌റ്റ​റു​കൾ അതിനെ പിന്തു​ടർന്നു. രണ്ടു മണിക്കൂർ നേരത്തെ യാത്ര​യ്‌ക്കു​ശേഷം പാപ്പാ​യും മറ്റു മതനേ​താ​ക്ക​ന്മാ​രും അസ്സീസി​യിൽ എത്തി. അവിടെ കനത്ത സുരക്ഷാ സന്നാഹങ്ങൾ ഒരുക്കി​യി​രു​ന്നു—ആയിര​ത്തോ​ളം പോലീ​സു​കാർ അതീവ ജാഗ്ര​ത​യോ​ടെ കാവൽനി​ന്നു.

പട്ടണത്തി​ലെ ഒരു പുരാതന ചത്വര​ത്തിൽ ഒരുക്കി​യി​രുന്ന വലിയ പന്തലി​ലാ​ണു മതനേ​താ​ക്ക​ന്മാർ കൂടി​വ​ന്നത്‌. ‘V’ ആകൃതി​യി​ലുള്ള ഒരു വലിയ ചെമന്ന സ്റ്റേജി​ലാണ്‌ മത പ്രതി​നി​ധി​കൾക്കുള്ള ഇരിപ്പി​ടങ്ങൾ സജ്ജീക​രി​ച്ചി​രു​ന്നത്‌. മധ്യത്തി​ലാ​യി​രു​ന്നു പാപ്പാ​യു​ടെ ഇരിപ്പി​ടം. സ്റ്റേജിന്റെ ഒരു വശത്ത്‌ സമാധാ​ന​ത്തി​ന്റെ പ്രതീ​ക​മാ​യി ഒരു ഒലിവു വൃക്ഷം ഉണ്ടായി​രു​ന്നു. ശ്രദ്ധാ​പൂർവം തിര​ഞ്ഞെ​ടുത്ത 2,000-ത്തിലധി​കം അതിഥി​കൾ സദസ്സിൽ ഉണ്ടായി​രു​ന്നു. ഇറ്റലി​യി​ലെ ഏറ്റവും ഉന്നത ഉദ്യോ​ഗ​സ്ഥ​ന്മാ​രിൽ ചിലരാ​യി​രു​ന്നു മുൻനി​ര​യിൽ. പ്രഭാ​ഷ​ണ​ങ്ങൾക്കി​ട​യിൽ മതിപ്പു​ള​വാ​ക്കും വിധത്തി​ലുള്ള സമാധാന കീർത്ത​നങ്ങൾ ആലപി​ക്ക​പ്പെട്ടു. പട്ടണത്തി​ന്റെ ഇതര ഭാഗങ്ങ​ളിൽ ആയിര​ക്ക​ണ​ക്കിന്‌ ആളുകൾ, വിശേ​ഷി​ച്ചും യുവജ​നങ്ങൾ, പല ഭാഷക​ളിൽ യുദ്ധവി​രുദ്ധ മുദ്രാ​വാ​ക്യ​ങ്ങൾ പ്രദർശി​പ്പി​ക്കു​ക​യും സമാധാ​നത്തെ കുറി​ച്ചുള്ള ഗാനങ്ങൾ ആലപി​ക്കു​ക​യും ചെയ്‌തു. പലരു​ടെ​യും കൈയിൽ ഒലിവ്‌ വൃക്ഷത്തി​ന്റെ ശാഖകൾ കാണാ​മാ​യി​രു​ന്നു.

സ്റ്റേജിൽ ആസനസ്ഥ​നാ​യ​ശേഷം, പാപ്പാ കൂടിവന്ന വ്യത്യസ്‌ത മതപ്ര​തി​നി​ധി​കളെ സ്വാഗതം ചെയ്‌തു. തുടർന്ന്‌, യെശയ്യാ​വു 2:4-നെ—‘ജാതി ജാതിക്കു നേരെ വാളോ​ങ്ങു​ക​യി​ല്ലാത്ത’ കാലം വരുമെന്ന പ്രവച​നത്തെ—ആസ്‌പ​ദ​മാ​ക്കി​യുള്ള ഒരു കീർത്തനം ലത്തീനിൽ ആലപി​ക്ക​പ്പെട്ട ശേഷം വ്യതി​രിക്ത മത വേഷങ്ങൾ അണിഞ്ഞ പന്ത്രണ്ടു പ്രതി​നി​ധി​കൾ ഔദ്യോ​ഗിക സമാധാന പ്രഖ്യാ​പ​നങ്ങൾ നടത്തി. ചില ഉദാഹ​ര​ണ​ങ്ങ​ളാ​ണു താഴെ കൊടു​ക്കു​ന്നത്‌.

“ഈ ചരി​ത്ര​പ്ര​ധാന വേളയിൽ മനുഷ്യ​വർഗം സമാധാ​നം സ്ഥാപി​ക്കാ​നുള്ള ശ്രമങ്ങൾ കാണു​ക​യും പ്രത്യാശ പകരുന്ന വാക്കുകൾ കേൾക്കു​ക​യും ചെയ്യേ​ണ്ട​തുണ്ട്‌.”—കർദി​നാൾ ഫ്രാൻസ്വാ ഗ്‌സാ​വ്യേ നുവീ​യേൻ വാൻ ടൂവാൻ.

ദൈവം “യുദ്ധത്തി​ന്റെ​യും കലഹത്തി​ന്റെ​യും ദൈവമല്ല, മറിച്ച്‌ സമാധാ​ന​ത്തി​ന്റെ ദൈവ​മാണ്‌.”—എക്യൂ​മെ​നി​ക്കൽ പാത്രി​യാർക്കീസ്‌ ബാർത്തൊ​ലൊ​മേ​യുസ്‌ ഒന്നാമൻ.

“മത ഭിന്നത​ക​ളു​ടെ പേരിൽ [ആളുകൾ] മറ്റുള്ള​വരെ അവഗണി​ക്കു​ക​യോ വെറു​ക്കു​ക​യോ ചെയ്യരുത്‌.”—ഡോ. സേറ്റ്രി നീയോ​മി, നവീകൃത സഭകളു​ടെ ലോക സഖ്യം.

“മനുഷ്യർക്കി​ട​യിൽ യഥാർഥ സമാധാ​നം കെട്ടി​പ്പ​ടു​ക്കു​ന്ന​തിന്‌ അത്യന്താ​പേ​ക്ഷി​ത​മായ രണ്ടു തൂണു​ക​ളാണ്‌ നീതി​യും സഹോ​ദ​ര​സ്‌നേ​ഹ​വും.”—പരമ്പരാ​ഗത ആഫ്രിക്കൻ മതങ്ങളു​ടെ പ്രതി​നി​ധി​യാ​യി എത്തിയ മൂപ്പൻ ആമാഡൂ ഗസെറ്റോ.

“സമാധാ​നം മാത്ര​മാ​ണു വിശുദ്ധം, യുദ്ധം ഒരിക്ക​ലും വിശു​ദ്ധമല്ല!”—ആൻഡ്രേയ റിക്കാർഡോ, കത്തോ​ലിക്ക സഭ.

അസഹി​ഷ്‌ണു​ത​യെ​യും യുദ്ധ​ത്തെ​യും ഊട്ടി​വ​ളർത്തു​ന്ന​തിൽ മതങ്ങൾ വളരെ വലിയ ഒരു പങ്കു വഹിക്കു​ന്നു​ണ്ടെന്ന്‌ ചില പ്രതി​നി​ധി​കൾ തുറന്നു സമ്മതിച്ചു. “മതമൗ​ലി​ക​വാ​ദി​കൾ ഊതി​ക്ക​ത്തിച്ച വിദ്വേ​ഷ​ത്തി​ന്റെ ചൂടേറ്റ്‌” ലോകം “നീറി​പ്പു​ക​യു​ക​യാണ്‌” എന്ന്‌ ലൂഥറൻ ലോക ഫെഡ​റേ​ഷന്റെ പ്രതി​നി​ധി അഭി​പ്രാ​യ​പ്പെട്ടു. ഒരു യഹൂദമത പ്രതി​നി​ധി പറഞ്ഞു: “നിഷ്‌ഠു​ര​വും രക്തപങ്കി​ല​വു​മായ ഒട്ടനവധി യുദ്ധങ്ങൾക്ക്‌ മതങ്ങൾ കാരണ​മാ​യി​ട്ടുണ്ട്‌.” “രക്ഷകന്റെ കുപ്പാ​യ​മ​ണിഞ്ഞ്‌ എത്തുന്നവർ അധികാ​രം കയ്യാളാ​നും ഭിന്നി​പ്പു​ണ്ടാ​ക്കാ​നും ഉള്ള ഉപകര​ണ​മാ​യി മതത്തെ ഉപയോ​ഗി​ച്ചി​ട്ടു​ള്ള​തി​ന്റെ എത്രയോ ഉദാഹ​ര​ണങ്ങൾ ചരി​ത്ര​ത്തി​ലുണ്ട്‌” എന്ന്‌ ഒരു ഹൈന്ദവ പ്രതി​നി​ധി പ്രഖ്യാ​പി​ച്ചു.

ഭീകര​പ്ര​വർത്ത​ന​ത്തെ​യും യുദ്ധ​ത്തെ​യും ഔദ്യോ​ഗി​ക​മാ​യി അപലപിച്ച ശേഷം പ്രതി​നി​ധി​കൾ എല്ലാവ​രും സമാധാ​ന​ത്തി​നാ​യി അവരവ​രു​ടെ ദൈവ​ത്തോ​ടു യാചി​ക്കു​ന്ന​തിന്‌ തങ്ങൾക്കു നിയമി​ച്ചി​രുന്ന സ്ഥാനങ്ങ​ളി​ലേക്കു പോയി.

സമാധാന പ്രാർഥ​ന​കൾ

ക്രൈ​സ്‌തവ സഭകളു​ടെ പ്രതി​നി​ധി​കൾ സെന്റ്‌ ഫ്രാൻസിസ്‌ പള്ളിയു​ടെ താഴത്തെ ബസിലി​ക്ക​യിൽ—പള്ളിക്ക്‌ ആ പേര്‌ വരാൻ കാരണ​മായ ശവകു​ടീ​രം അതിന്‌ അടുത്താ​ണു സ്ഥിതി​ചെ​യ്യു​ന്നത്‌—പ്രാർഥ​ന​യ്‌ക്കാ​യി ഒരുമി​ച്ചു കൂടി. പാപ്പാ​യും മറ്റു മൂന്നു പ്രതി​നി​ധി​ക​ളും “ത്രിത്വ​ദൈ​വത്തെ സംബോ​ധന ചെയ്‌തു​കൊണ്ട്‌” പ്രാരം​ഭ​പ്രാർഥന നടത്തി. പ്രാർഥ​ന​കൾക്കി​ട​യിൽ കീർത്തന ആലാപ​ന​വും സമാധാ​നത്തെ പ്രകീർത്തി​ച്ചു​കൊ​ണ്ടുള്ള ശ്ലോകം ചൊല്ല​ലും അതേ വിഷയത്തെ ആസ്‌പ​ദ​മാ​ക്കി​യുള്ള ബൈബിൾ വായന​യും ഉണ്ടായി​രു​ന്നു. “വിഭജി​ത​മ​ല്ലാത്ത ഒരു വിശ്വാ​സം” സ്ഥാപി​ക്ക​പ്പെ​ട​ണ​മെന്ന അപേക്ഷ ഉൾക്കൊ​ള്ളു​ന്ന​താ​യി​രു​ന്നു ഒരു പ്രാർഥന. സമാപ​ന​ത്തി​ങ്കൽ കൂടി​വ​ന്നവർ എല്ലാവ​രും മത്തായി 6-ാം അധ്യായം 9 മുതൽ 13 വരെയുള്ള വാക്യ​ങ്ങ​ളിൽ കാണുന്ന സ്വർഗ​സ്ഥ​നായ പിതാവേ എന്നു തുടങ്ങുന്ന പ്രാർഥന ലത്തീനിൽ ചൊല്ലി.

അതേസ​മ​യം മറ്റു മതങ്ങളു​ടെ പ്രതി​നി​ധി​കൾ വെവ്വേറെ സ്ഥാനങ്ങ​ളിൽ അവരുടെ പ്രാർഥ​ന​ക​ളിൽ മുഴു​കി​യി​രു​ന്നു. ഒരു ഹാളിൽ മുസ്ലീങ്ങൾ പരവതാ​നി വിരിച്ച തറയിൽ മെക്കയു​ടെ ദിശയി​ലേക്കു തിരിഞ്ഞ്‌ മുട്ടു​കു​ത്തി​നിന്ന്‌ അള്ളാഹു​വി​നോ​ടു പ്രാർഥി​ച്ചു. ജൈന മതക്കാ​രു​ടെ​യും കൺഫ്യൂ​ഷ്യസ്‌ മതക്കാ​രു​ടെ​യും സമീപ​ത്താ​യി പ്രാർഥി​ച്ചു​കൊ​ണ്ടി​രുന്ന സൊറാ​സ്‌ട്രി​യൻ മതക്കാർ പവി​ത്രാ​ഗ്നി കൊളു​ത്തി. പരമ്പരാ​ഗത ആഫ്രിക്കൻ മതങ്ങളു​ടെ പ്രതി​നി​ധി​കൾ തങ്ങളുടെ പൂർവി​ക​രു​ടെ ആത്മാക്ക​ളോ​ടു പ്രാർഥി​ച്ചു. ഹിന്ദുക്കൾ സമാധാ​ന​ത്തി​നു​വേണ്ടി തങ്ങളുടെ ദൈവ​ങ്ങ​ളോട്‌ അപേക്ഷി​ച്ചു. എല്ലാവ​രും അവരവ​രു​ടെ ആചാര​പ്ര​കാ​രം സ്വന്തം ദൈവ​ങ്ങ​ളോ​ടു പ്രാർഥി​ച്ചു.

സമാധാ​ന​ത്തി​നു വേണ്ടി പ്രവർത്തി​ക്കു​മെന്ന പൊതു പ്രതിജ്ഞ

പരിപാ​ടി​യു​ടെ സമാപന ചടങ്ങു​കൾക്കാ​യി പ്രതി​നി​ധി സംഘങ്ങൾ വീണ്ടും പന്തലിൽ ഒത്തുകൂ​ടി. സമാധാന പ്രതീ​ക്ഷയെ പ്രതി​നി​ധാ​നം ചെയ്യുന്ന എരിയുന്ന വിളക്കു​കൾ ക്രൈ​സ്‌തവ സന്ന്യാ​സി​മാർ പ്രതി​നി​ധി​കൾക്കു കൈമാ​റി. പ്രൗഢ​ഗം​ഭീ​ര​മായ ഒരു രംഗമാ​യി​രു​ന്നു അത്‌. തുടർന്ന്‌ വിവിധ പ്രതി​നി​ധി​കൾ സമാധാ​ന​ത്തി​നാ​യി പ്രവർത്തി​ക്കു​മെന്ന ഒരു പൊതു പ്രതിജ്ഞ വായിച്ചു. ഓരോ​രു​ത്ത​രും അതി​നോട്‌ അനുബ​ന്ധിച്ച്‌ വ്യത്യസ്‌ത പ്രസ്‌താ​വ​നകൾ നടത്തി.

“സമാധാ​നം സ്ഥാപി​ക്കു​ന്ന​തിന്‌ അയൽക്കാ​രനെ സ്‌നേ​ഹി​ക്കേ​ണ്ട​തുണ്ട്‌.”—എക്യൂ​മെ​നി​ക്കൽ പാത്രി​യാർക്കീസ്‌ ബാർത്തൊ​ലൊ​മേ​യുസ്‌ ഒന്നാമൻ.

“അക്രമ​വും ഭീകര​പ്ര​വർത്ത​ന​വും മതത്തിന്റെ അന്തഃസ​ത്ത​യു​മാ​യി യോജി​പ്പി​ലല്ല.”—ഡോ. കൊൺറാട്ട്‌ റൈസെ, ലോക സഭാ സമിതി​യു​ടെ പ്രതി​നി​ധി.

“പരസ്‌പര ആദരവും ബഹുമാ​ന​വും വളർത്തി​യെ​ടു​ക്കാൻ ആളുകളെ പഠിപ്പി​ക്കു​മെന്ന്‌ ഞങ്ങൾ പ്രതിജ്ഞ ചെയ്യുന്നു.”—ബായ്‌ സായി​ബ്‌ജി മോഹീ​ന്ദർ സിംഗ്‌, സിക്കു മത പ്രതി​നി​ധി.

“നീതി നടപ്പാ​ക്കാ​തെ​യുള്ള സമാധാ​നം യഥാർഥ സമാധാ​നമല്ല.”—ഓർത്ത​ഡോ​ക്‌സ്‌ ബിഷപ്പ്‌ വാസി​ല്യോസ്‌.

ഒടുവിൽ, പാപ്പാ ഈ ലേഖന​ത്തി​ന്റെ ആമുഖ​ത്തിൽ കാണുന്ന വാക്കുകൾ വായിച്ചു. പിന്നീട്‌ സമാധാ​ന​ത്തി​ന്റെ പ്രതീ​ക​മാ​യി പ്രതി​നി​ധി​കൾ പരസ്‌പരം ആലിം​ഗനം ചെയ്‌തു. ശ്രദ്ധാ​പൂർവം തയ്യാറാ​ക്കിയ വിശിഷ്ട പ്രസ്‌താ​വ​നകൾ ഉൾപ്പെട്ട ആഘോ​ഷ​ക​ര​മായ ചടങ്ങിന്‌ അങ്ങനെ പരിസ​മാ​പ്‌തി കുറി​ക്ക​പ്പെട്ടു. മതിപ്പാർന്ന ഈ പരിപാ​ടി​യോ​ടുള്ള പുറം​ലോ​ക​ത്തി​ന്റെ പ്രതി​ക​രണം എന്തായി​രു​ന്നു?

‘വാക്കു​കൾക്കു ചേർച്ച​യി​ലുള്ള പ്രവൃ​ത്തി​കൾ ഉണ്ടാകു​മോ?’

ഇത്തരം ഒരു യോഗം സംഘടി​പ്പി​ക്കാൻ മുൻ​കൈ​യെ​ടു​ത്ത​തിന്‌ വർത്തമാ​ന​പ്പ​ത്ര​ങ്ങ​ളും ടെലി​വി​ഷ​നും പാപ്പായെ വാനോ​ളം പുകഴ്‌ത്തി. ചിലർ പാപ്പായെ “മുഴു ക്രൈ​സ്‌ത​വ​ലോ​ക​ത്തി​ന്റെ​യും വക്താവ്‌” എന്നുവരെ വിശേ​ഷി​പ്പി​ച്ചു. വത്തിക്കാൻ പത്രമായ ലൊ​സ്സേർവാ​റ്റോ​റേ റോമാ​നോ അസ്സീസി​യി​ലെ ആ ദിനത്തെ “സമാധാ​ന​പൂർണ​മായ ഒരു സമൂഹത്തെ വാർത്തെ​ടു​ക്കു​ന്ന​തി​ലേ​ക്കുള്ള പാതയി​ലെ ഒരു നാഴി​ക​ക്കല്ല്‌” എന്നു വിശേ​ഷി​പ്പി​ച്ചു. കൊറി​യറേ ഡെൽ ഉമ്പ്രിയാ എന്ന പത്രത്തിൽ പിൻവ​രുന്ന തലക്കെട്ട്‌ പ്രത്യ​ക്ഷ​പ്പെട്ടു: “അസ്സീസി​യിൽ സമാധാന ദീപം തെളി​യു​ന്നു.”

എന്നാൽ എല്ലാ നിരീ​ക്ഷ​ക​രും അത്ര ആവേശ​ഭ​രി​ത​രാ​യി​രു​ന്നില്ല. 1986-ലെയും 1993-ലെയും സമാധാ​ന​ത്തി​നു വേണ്ടി​യുള്ള ഇത്തരം പ്രാർഥനാ ദിനങ്ങൾക്കു ശേഷവും മതത്തിന്റെ പേരിൽ നടക്കുന്ന യുദ്ധങ്ങൾക്കു കുറ​വൊ​ന്നും സംഭവി​ച്ചി​ട്ടി​ല്ലാ​ത്ത​തി​നാൽ ചിലർ യോഗം അതിന്റെ ഉദ്ദേശ്യം സാധി​ക്കു​മോ എന്ന കാര്യ​ത്തിൽ സംശയം പ്രകടി​പ്പി​ച്ചു. മതപര​മായ വിദ്വേ​ഷം ഉഗാണ്ട, മുൻ യൂഗോ​സ്ലാ​വിയ, ഇന്തൊ​നീ​ഷ്യ, പാകി​സ്ഥാൻ, മധ്യപൂർവ ദേശങ്ങൾ, വടക്കൻ അയർലൻഡ്‌ എന്നിവി​ട​ങ്ങ​ളിൽ രക്തപങ്കി​ല​മായ പോരാ​ട്ടങ്ങൾ ഇളക്കി​വി​ട്ടി​രി​ക്കു​ന്നു.

ചില വിമർശകർ യോഗത്തെ “വെറും പ്രഹസനം” എന്നു പറഞ്ഞ്‌ തള്ളിക്ക​ള​ഞ്ഞ​താ​യി ഇറ്റാലി​യൻ പത്രമായ ലാ റേപ്പൂ​ബ്ലി​ക്കാ റിപ്പോർട്ടു ചെയ്‌തു. സമാധാ​നം ഉന്നമി​പ്പി​ക്ക​ണ​മെ​ങ്കിൽ മതവി​ശ്വാ​സി​ക​ളായ ആളുകൾ “സുവി​ശേഷം പ്രവൃ​ത്തി​പ​ഥ​ത്തിൽ കൊണ്ടു​വ​രേ​ണ്ട​തുണ്ട്‌,” അതായത്‌ “ശത്രു​ക്കളെ സ്‌നേ​ഹി​ക്കുക, മറ്റേ ചെകി​ടും കൂടെ കാണി​ച്ചു​കൊ​ടു​ക്കുക” എന്നിങ്ങ​നെ​യുള്ള തത്ത്വങ്ങൾക്കു ചേർച്ച​യിൽ ജീവി​ക്കേ​ണ്ട​തുണ്ട്‌ എന്ന്‌ ഒരു യൂറോ​പ്യൻ പാർല​മെന്റ്‌ അംഗം അഭി​പ്രാ​യ​പ്പെട്ടു. അദ്ദേഹ​ത്തി​ന്റെ വീക്ഷണ​ത്തിൽ “ആരും ചെയ്യാത്ത” ഒരു കാര്യ​മാണ്‌ അത്‌.

ഇറ്റലി​യി​ലെ യഹൂദ സമുദാ​യ​ങ്ങ​ളു​ടെ പ്രസി​ഡന്റ്‌ പറഞ്ഞു: “ഇനിയി​പ്പോൾ എന്താണു സംഭവി​ക്കു​ന്ന​തെന്ന്‌, വാക്കു​കൾക്കു ചേർച്ച​യി​ലുള്ള പ്രവൃ​ത്തി​ക​ളും യഥാർഥ മാറ്റവും ഉണ്ടാകു​മോ എന്ന്‌ കാത്തി​രു​ന്നു കാണാം.” സമാന​മാ​യി, “സമാധാന ആഹ്വാ​നങ്ങൾ വെറും സദു​ദ്ദേ​ശ്യ​ങ്ങ​ളാ​യി അവശേ​ഷി​ക്കു​ന്നി​ല്ലെന്ന്‌” ഉറപ്പാ​ക്കേ​ണ്ട​തുണ്ട്‌ എന്ന്‌ ഇറ്റലി​യി​ലെ ബുദ്ധമ​ത​ക്കാ​രു​ടെ പ്രതി​നി​ധി അഭി​പ്രാ​യ​പ്പെട്ടു. ഇറ്റാലി​യൻ മാസി​ക​യായ ലെസ്‌​പ്രെ​സ്സോ​യു​ടെ ഒരു ലേഖകൻ അസ്സീസി​യി​ലെ യോഗം അവിടെ കൂടിവന്ന ക്രൈ​സ്‌തവ മതങ്ങളെ സംബന്ധി​ച്ചി​ട​ത്തോ​ളം മറ്റൊരു ഉദ്ദേശ്യം സാധി​ച്ച​താ​യി പറഞ്ഞു. അദ്ദേഹം അതിനെ “മതപര​മായ അസംതൃ​പ്‌തി, അച്ചടക്ക​രാ​ഹി​ത്യം, അവിശ്വാ​സം എന്നിവയെ ചെറു​ക്കാ​നും” “ക്രൈ​സ്‌തവ പാരമ്പ​ര്യം” വകവെ​ക്കാ​തെ യൂറോ​പ്പി​നെ വരിഞ്ഞു​മു​റു​ക്കി​ക്കൊ​ണ്ടി​രി​ക്കുന്ന മതേത​ര​ത്വ​ത്തെ എതിർക്കാ​നും “നടത്തപ്പെട്ട കൂട്ടായ ഒരു ശ്രമം” എന്നു വിളിച്ചു.

സഭാ പഠിപ്പി​ക്ക​ലു​ക​ളിൽ വെള്ളം ചേർക്ക​പ്പെ​ടു​മെന്നു ഭയക്കുന്ന പരമ്പരാ​ഗത ചിന്താ​ഗ​തി​ക്കാ​രായ കത്തോ​ലി​ക്ക​രാ​യി​രു​ന്നു പരിപാ​ടി​യെ ഏറ്റവു​മ​ധി​കം വിമർശി​ച്ച​വ​രിൽ ചിലർ. പ്രസിദ്ധ കത്തോ​ലിക്ക ലേഖകൻ വിറ്റോ​റ്യോ മെസോ​റി, അസ്സീസി​യി​ലെ യോഗം മതങ്ങൾ തമ്മിലുള്ള അന്തരം അവ്യക്ത​മാ​യി​ത്തീ​രു​ന്ന​തിന്‌ ഇടയാ​ക്കി​യേ​ക്കാം എന്ന്‌ ഒരു ടെലി​വി​ഷൻ അഭിമു​ഖ​ത്തിൽ പറഞ്ഞു. ഒരു മത സങ്കലനം നടക്കു​ക​യാ​ണെന്ന ധാരണ ഒഴിവാ​ക്കാൻ മത അധികാ​രി​കൾ ആവശ്യ​മായ മുൻക​രു​ത​ലു​കൾ എടുത്തി​രു​ന്നു. പാപ്പാ തന്നെ അത്തരം ആരോ​പ​ണ​ങ്ങളെ ഖണ്ഡിച്ചു​കൊ​ണ്ടുള്ള ഒരു പ്രസ്‌താ​വന നടത്തി. എന്നിരു​ന്നാ​ലും പരിപാ​ടി നടത്തപ്പെട്ട രീതി​തന്നെ, വ്യത്യസ്‌ത മതങ്ങൾ ഒരേ പരമോ​ന്നത ശക്തിയെ സമീപി​ക്കാ​നുള്ള വ്യത്യസ്‌ത പാതകൾ മാത്ര​മാ​ണെന്ന സൂചന നൽകി​യ​താ​യാ​ണു പലർക്കും തോന്നി​യത്‌.

മതവും സമാധാ​ന​വും

എന്നാൽ സമാധാ​നം കൈവ​രു​ത്താൻ സംഘടിത മതങ്ങൾക്ക്‌ എന്താണു ചെയ്യാ​നാ​വുക? അത്തര​മൊ​രു ചോദ്യം​തന്നെ വിചി​ത്ര​മാ​ണെന്നു ചിലർക്കു തോന്നു​ന്നു. കാരണം മതങ്ങൾ കൂടു​ത​ലും യുദ്ധം നിറു​ത്ത​ലാ​ക്കു​ന്ന​തി​നു പകരം അവയെ പ്രോ​ത്സാ​ഹി​പ്പി​ക്കു​ന്ന​താ​യാ​ണു കാണു​ന്നത്‌. യുദ്ധത്തി​നു തിരി​കൊ​ളു​ത്താ​നാ​യി ലൗകിക ഭരണാ​ധി​കാ​രി​കൾ മതത്തെ ഉപയോ​ഗി​ച്ചി​രി​ക്കു​ന്ന​തി​നെ കുറി​ച്ചുള്ള ചരി​ത്ര​രേ​ഖകൾ ഉണ്ട്‌. അപ്പോൾ ചോദ്യ​മി​താണ്‌: ഭരണാ​ധി​കാ​രി​ക​ളു​ടെ താളത്തി​നൊ​ത്തു തുള്ളാൻ മതങ്ങൾ തയ്യാറാ​യി​രി​ക്കു​ന്നത്‌ എന്തു​കൊ​ണ്ടാണ്‌?

ക്രൈ​സ്‌തവ മതങ്ങൾക്കെ​ങ്കി​ലും യുദ്ധവു​മാ​യി ബന്ധപ്പെട്ട രക്തപാതക കുറ്റം ഒഴിവാ​ക്കാ​നാ​കു​മാ​യി​രു​ന്നു—തങ്ങൾക്കു ലഭിച്ചി​ട്ടുള്ള ഒരു ദിവ്യ​നി​യമം അനുസ​രി​ച്ചി​രു​ന്നെ​ങ്കിൽ. തന്റെ അനുഗാ​മി​കൾ ‘ഈ ലോക​ത്തി​ന്റെ ഭാഗം ആയിരി​ക്കില്ല’ എന്ന്‌ യേശു പറഞ്ഞു. (യോഹ​ന്നാൻ 15:19; 17:16, NW) ക്രൈ​സ്‌ത​വ​ലോ​ക​ത്തി​ലെ മതങ്ങൾ ആ വാക്കു​കൾക്കു ചേർച്ച​യിൽ പ്രവർത്തി​ച്ചി​രു​ന്നെ​ങ്കിൽ, അവ രാഷ്‌ട്രീയ ശക്തിക​ളു​മാ​യി കൈ​കോർക്കു​ക​യോ യുദ്ധ​ത്തെ​യും യുദ്ധ​സൈ​ന്യ​ങ്ങ​ളെ​യും അംഗീ​ക​രി​ക്കു​ക​യോ അനു​ഗ്ര​ഹി​ക്കു​ക​യോ ചെയ്യു​മാ​യി​രു​ന്നില്ല.

വാസ്‌ത​വ​ത്തിൽ, അസ്സീസി​യിൽ നടത്തപ്പെട്ട വിശിഷ്ട പ്രസ്‌താ​വ​ന​കൾക്കൊ​ത്തു ജീവി​ക്ക​ണ​മെ​ങ്കിൽ മതനേ​താ​ക്ക​ന്മാർ രാഷ്‌ട്രീയ ശക്തിക​ളിൽനി​ന്നു വിട്ടു​നിൽക്കേ​ണ്ട​തുണ്ട്‌. കൂടാതെ, അവർ തങ്ങളുടെ അനുയാ​യി​കളെ സമാധാ​ന​മാർഗം പഠിപ്പി​ക്കു​ക​യും വേണം. എന്നാൽ ലോക​ത്തിൽ അക്രമങ്ങൾ നടത്തു​ന്ന​വ​രിൽ അനേക​രും ദൈവ​ത്തിൽ വിശ്വ​സി​ക്കു​ന്നവർ—അഥവാ വിശ്വ​സി​ക്കു​ന്നു​ണ്ടെന്ന്‌ അവകാ​ശ​പ്പെ​ടു​ന്നവർ—ആണെന്ന്‌ ചരി​ത്ര​കാ​ര​ന്മാർ ചൂണ്ടി​ക്കാ​ണി​ക്കു​ന്നു. അടുത്ത കാലത്ത്‌ ഒരു വർത്തമാ​ന​പ​ത്ര​ത്തി​ന്റെ മുഖ​പ്ര​സം​ഗം ഇങ്ങനെ പറഞ്ഞു: “സെപ്‌റ്റം​ബർ 11-നെ തുടർന്ന്‌, നടുക്കു​ന്ന​തെ​ങ്കി​ലും ചിന്തോ​ദ്ദീ​പ​ക​മായ ഈ വാക്കുകൾ ആരോ വാഷി​ങ്‌ടൺ ഡി.സി.-യിലെ ഒരു ചുവരിൽ കുത്തി​ക്കു​റി​ച്ചു: ‘പ്രിയ​പ്പെട്ട ദൈവമേ, നിന്നിൽ വിശ്വ​സി​ക്കു​ന്ന​വ​രു​ടെ കൈയിൽനിന്ന്‌ ഞങ്ങളെ രക്ഷി​ക്കേ​ണമേ.’”

ആർഭാ​ടാ​ഘോ​ഷ​ങ്ങ​ളോ​ടെ അസ്സീസി​യിൽ നടത്തപ്പെട്ട യോഗം വിഷമ​മേ​റിയ ചില ചോദ്യ​ങ്ങൾ അവശേ​ഷി​പ്പി​ച്ചു. അവയിൽ മതവി​ശ്വാ​സി​ക​ളായ പലരെ​യും ഏറ്റവു​മ​ധി​കം അലട്ടു​ന്ന​തും അവരെ സംബന്ധിച്ച്‌ ഏറ്റവും പ്രധാ​ന​പ്പെ​ട്ട​തു​മായ ചോദ്യം ഒരുപക്ഷേ ഇതായി​രി​ക്കാം: ലോക​മ​തങ്ങൾ സമാധാ​ന​ത്തി​നാ​യി നടത്തി​യി​രി​ക്കുന്ന പ്രാർഥ​നകൾ ചെവി​ക്കൊ​ള്ളാൻ ദൈവം ഇതുവരെ വിസമ്മ​തി​ച്ചി​രി​ക്കു​ന്നത്‌ എന്തു​കൊ​ണ്ടാണ്‌? (g02 10/22)

[അടിക്കു​റിപ്പ്‌]

[7-ാം പേജിലെ ചിത്രം]

സമാധാന പ്രതീ​ക്ഷ​യു​ടെ പ്രതീ​ക​ങ്ങ​ളായ എരിയുന്ന വിളക്കു​ക​ളേ​ന്തിയ പ്രതി​നി​ധി​കൾ

[കടപ്പാട്‌]

AP Photo/Pier Paolo Cito

[5-ാം പേജിലെ ചിത്ര​ങ്ങൾക്ക്‌ കടപ്പാട്‌]

AP Photo/Pier Paolo Cito