ഇലക്‌​ട്രോ​ണിക്‌ ഗെയി​മു​കൾ അവയിൽ അപകടം പതിയി​രി​പ്പു​ണ്ടോ?

“നിരാ​യു​ധ​നാ​യി നിസ്സഹാ​യ​ത​യോ​ടെ നിൽക്കുന്ന എതിരാ​ളി​യു​ടെ ശിരസ്സിൽ” ആ പന്ത്രണ്ടു​കാ​രൻ “തോക്കു ചേർത്തു​പി​ടി​ച്ചു. ‘ഇനി നിനക്കു രക്ഷയില്ല!’ കമ്പ്യൂട്ടർ സ്‌ക്രീ​നി​ലെ കഥാപാ​ത്രത്തെ നോക്കി അവൻ ഒരു കൊല​ച്ചി​രി പാസ്സാക്കി. ‘നിന്നെ ഞാൻ തട്ടും!’ അവൻ ബട്ടണിൽ വിരല​മർത്തി. കഥാപാ​ത്ര​ത്തി​ന്റെ മുഖത്തു​തന്നെ വെടി​യേറ്റു, ചീറ്റിയ രക്തം അയാളു​ടെ വെള്ളക്കു​പ്പാ​യ​ത്തി​ലേക്കു തെറിച്ചു, അയാൾ കുഴഞ്ഞു​വീ​ണു. ‘അവന്റെ കഥ കഴിഞ്ഞു!’ പയ്യൻ തിമിർത്തു ചിരിച്ചു.”

“കമ്പ്യൂട്ടർ അക്രമം: നിങ്ങളു​ടെ കുട്ടികൾ അപകട​ത്തി​ലോ?” എന്ന പേരിൽ സ്റ്റീവൻ ബാർ എഴുതിയ ലേഖന​ത്തിൽ നിന്നു​ള്ള​താണ്‌ മേലു​ദ്ധ​രിച്ച ഭാഗം. കമ്പ്യൂട്ടർ ഗെയി​മു​ക​ളി​ലെ ഇത്തരം രംഗങ്ങൾ ശീർഷ​ക​ത്തി​ലെ ചോദ്യം തന്നെ നമ്മുടെ മനസ്സിൽ ഉയർത്തു​ന്നു. വൈവി​ധ്യ​മാർന്ന 5,000-ത്തിലധി​കം കമ്പ്യൂട്ടർ-വീഡി​യോ ഗെയി​മു​കൾ ഇന്നു വിപണി​യിൽ ഉണ്ട്‌. അവയിൽ ഒരു വിഭാഗം വിദ്യാ​ഭ്യാ​സ​മൂ​ല്യ​മു​ള്ള​വ​യും ഒപ്പം നിരു​പ​ദ്ര​വ​ക​ര​മായ വിനോ​ദം പകരു​ന്ന​വ​യു​മാണ്‌ എന്നു കരുത​പ്പെ​ടു​ന്നു.

അത്തര​മൊ​രു ഗെയിം ഭൂമി​ശാ​സ്‌ത്രം പഠിക്കാൻ സഹായി​ക്കു​ന്നു; മറ്റൊന്ന്‌ വിമാനം പറപ്പി​ക്കാൻ പഠിപ്പി​ക്കു​ന്നു. വേറെ ചിലത്‌ യുക്തി​സ​ഹ​മാ​യി ചിന്തി​ക്കു​ന്ന​തി​നും പ്രശ്‌നങ്ങൾ പരിഹ​രി​ക്കു​ന്ന​തി​നും പരിശീ​ലനം നൽകുന്നു. കളിക്കാ​രന്റെ മേൽ ഒരു ചികി​ത്സ​യു​ടെ ഫലം ചെയ്യുന്ന ഗെയി​മു​കൾ പോലു​മുണ്ട്‌. ഉദാഹ​ര​ണ​ത്തിന്‌, വായനാ​സം​ബ​ന്ധ​മായ തകരാ​റു​കൾ ഉള്ളവരെ സഹായി​ക്കു​ന്ന​തി​നു വേണ്ടി വിശേ​ഷാൽ രൂപകൽപ്പന ചെയ്‌തി​രി​ക്കുന്ന ഒരു ഗെയിം വിപണി​യിൽ ലഭ്യമാണ്‌. സാങ്കേ​തി​ക​വി​ദ്യ അനുദിന ജീവി​ത​ത്തി​ന്റെ ചുക്കാൻ പിടി​ക്കുന്ന വർത്തമാ​ന​യു​ഗ​ത്തിൽ കമ്പ്യൂട്ടർ സാക്ഷരത നേടാൻ ചില കമ്പ്യൂട്ടർ ഗെയി​മു​കൾ യുവജ​ന​ങ്ങളെ സഹായി​ച്ചേ​ക്കാം.

ഗെയി​മു​ക​ളു​ടെ ഇരുണ്ട​വശം വിദഗ്‌ധർ ചൂണ്ടി​ക്കാ​ട്ടു​ന്നു

“ഒരുകൂ​ട്ടം ഗെയി​മു​കൾ അക്രമം, ലൈം​ഗി​കത, അസഭ്യ​ഭാഷ തുടങ്ങിയ സാമൂ​ഹി​ക​വി​രു​ദ്ധ​മായ വിഷയങ്ങൾ വിശേ​ഷ​വ​ത്‌ക​രി​ക്കു​ന്നു” എന്ന്‌ ഐക്യ​നാ​ടു​ക​ളി​ലെ നാഷണൽ ഇൻസ്റ്റി​റ്റ്യൂട്ട്‌ ഓൺ മീഡിയാ ആൻഡ്‌ ദ ഫാമി​ലി​യു​ടെ അധ്യക്ഷ​നായ ഡേവിഡ്‌ വോൾഷ്‌ പറയുന്നു. “സങ്കടക​ര​മെന്നു പറയട്ടെ, 8-നും 15-നും മധ്യേ പ്രായ​മുള്ള കുട്ടി​കൾക്ക്‌ ഇത്തരം ഗെയി​മു​ക​ളോ​ടാണ്‌ പ്രിയം,” അദ്ദേഹം തുടരു​ന്നു.

യുവ​പ്രാ​യ​ക്കാർ താത്‌പ​ര്യം പ്രകടി​പ്പിച്ച വീഡി​യോ ഗെയി​മു​ക​ളിൽ ഏതാണ്ട്‌ 80 ശതമാ​ന​വും അക്രമം നിറഞ്ഞ​വ​യാ​യി​രു​ന്നു എന്ന്‌ ഐക്യ​നാ​ടു​ക​ളിൽ നടന്ന ഒരു പഠനം സൂചി​പ്പി​ക്കു​ന്നു. വെർച്വൽ ഇമേജ്‌ പ്രൊ​ഡ​ക്‌ഷൻസ്‌ എന്ന കമ്പനി​യു​ടെ അധ്യക്ഷൻ റിക്‌ ഡയർ ഇപ്രകാ​രം പറയുന്നു: “ഇവ വെറും കളികളല്ല. മറിച്ച്‌, പഠനോ​പാ​ധി​ക​ളാണ്‌. നിറ​യൊ​ഴി​ക്കു​ന്നത്‌ എങ്ങനെ​യെന്ന്‌ ഏറ്റവും വിദഗ്‌ധ​മായ രീതി​യിൽ ഞങ്ങൾ കുട്ടി​കളെ പഠിപ്പി​ക്കു​ന്നു . . . യഥാർഥ ജീവി​ത​ത്തിൽ ഇങ്ങനെ​യൊ​ക്കെ ചെയ്‌താ​ലുള്ള ഭവിഷ്യ​ത്തു​കളെ കുറിച്ചു മാത്രമേ അവർ പഠിക്കാ​തി​രി​ക്കു​ന്നു​ള്ളൂ.”

നാണയം ഇട്ടു കളിക്കുന്ന ‘ഡെത്ത്‌ റേസ്‌’ എന്ന പേരോ​ടു​കൂ​ടിയ ഒരു ഗെയിം 1976-ൽ പുറത്തി​റങ്ങി. അക്രമത്തെ പ്രോ​ത്സാ​ഹി​പ്പി​ക്കുന്ന ഗെയി​മു​കൾക്ക്‌ എതി​രെ​യുള്ള പൊതു​ജന പ്രതി​ഷേധം അന്നു മുതൽ കേട്ടു​തു​ട​ങ്ങി​യ​താണ്‌. ഈ കളിയിൽ, സ്‌ക്രീ​നി​ലൂ​ടെ തലങ്ങും വിലങ്ങും നീങ്ങുന്ന വഴിയാ​ത്ര​ക്കാ​രെ വണ്ടിയി​ടി​പ്പി​ച്ചു കൊല്ലു​ക​യാണ്‌ കളിക്കാ​രൻ ചെയ്യേ​ണ്ടി​യി​രു​ന്നത്‌. ഏറ്റവും കൂടുതൽ പേരെ കൊല്ലുന്ന കളിക്കാ​ര​നാ​യി​രി​ക്കും വിജയി. സങ്കീർണ​മായ അത്യാ​ധു​നിക ഗെയി​മു​കൾ ദൃശ്യ​പ്ര​തി​രൂ​പ​ങ്ങളെ അതീവ വ്യക്തത​യോ​ടെ ആവിഷ്‌ക​രി​ക്കു​ന്ന​തി​നാൽ കൂടുതൽ വാസ്‌ത​വി​കത തുളു​മ്പുന്ന അക്രമ​രം​ഗ​ങ്ങ​ളിൽ പങ്കുപ​റ്റാൻ അവ കളിക്കാ​രന്‌ അവസര​മൊ​രു​ക്കു​ന്നു.

ദൃഷ്ടാ​ന്ത​ത്തിന്‌, ‘കാർമ​ഗെ​ദോൻ’ എന്നു പേരുള്ള ഗെയി​മി​ന്റെ അവസാ​നത്തെ ലെവൽ കളിച്ചു​തീ​രു​മ്പോൾ ഒരു കളിക്കാ​രൻ 33,000 പേരെ കാറി​ടി​പ്പി​ച്ചു കൊന്നി​രി​ക്കും. ഈ ഗെയി​മി​ന്റെ അനുബ​ന്ധ​ക്കു​റി​പ്പിൽ പറഞ്ഞി​രി​ക്കു​ന്നതു നോക്കുക: “ഇരയുടെ മേൽ കാർ കയറി​യി​റങ്ങി ചതഞ്ഞര​യുന്ന ശബ്ദവും ചില്ലിൽ രക്തം തെറിച്ചു വീഴു​ന്ന​തും മാത്രമല്ല കളിയിൽ ക്രമീ​ക​രി​ച്ചി​രി​ക്കു​ന്നത്‌. ആത്മഹത്യ ചെയ്യു​ന്ന​വ​രെ​യും മുട്ടിൽ നിന്ന്‌ കരുണ​യ്‌ക്കാ​യി യാചി​ക്കു​ന്ന​വ​രെ​യും ഒക്കെ കാണാ​വു​ന്ന​താണ്‌. വേണ​മെ​ങ്കിൽ നിങ്ങൾക്ക്‌ അവരുടെ അവയവങ്ങൾ മുറിച്ചു മാറ്റു​ക​പോ​ലും ചെയ്യാം.”

ഇത്തരം സാങ്കൽപ്പിക അക്രമ​ങ്ങ​ളെ​ല്ലാം ഹാനി​ക​ര​മാ​ണോ? ഈ വിഷയത്തെ കുറിച്ച്‌ 3,000-ത്തോളം പഠനങ്ങൾ നടന്നി​ട്ടുണ്ട്‌. ഗെയി​മു​ക​ളി​ലെ അക്രമ​ങ്ങൾക്കും കളിക്കാ​രിൽ വളർന്നു​വ​രുന്ന അക്രമ​വാ​സ​ന​യ്‌ക്കും തമ്മിൽ ബന്ധമു​ണ്ടെ​ന്നാണ്‌ പലരു​ടെ​യും അഭി​പ്രാ​യം. യുവ​പ്രാ​യ​ക്കാർക്കി​ട​യിൽ പെരു​കി​വ​രുന്ന അക്രമ​പ്ര​വർത്ത​നങ്ങൾ ഇതിനുള്ള തെളി​വാ​യി ചൂണ്ടി​ക്കാ​ണി​ക്ക​പ്പെ​ടു​ന്നു.

ഗെയി​മു​കൾ ചെലു​ത്തുന്ന സ്വാധീ​നത്തെ വിദഗ്‌ധ​രിൽ ചിലർ നിസ്സാ​രീ​ക​രി​ക്കു​ന്നു. പരിഗ​ണി​ക്കേണ്ട മറ്റു ഘടകങ്ങൾ ഉണ്ടെന്ന്‌ അവർ പറയുന്നു. അക്രമാ​സ​ക്ത​മായ ഗെയി​മു​കൾ തിര​ഞ്ഞെ​ടു​ക്കുന്ന കുട്ടികൾ നൈസർഗി​ക​മാ​യി​ത്തന്നെ അക്രമ​വാ​സന ഉള്ളവർ ആയിരു​ന്നി​രി​ക്കണം എന്നാണ്‌ അവരുടെ പക്ഷം. അങ്ങനെ​യാ​ണെ​ങ്കിൽത്തന്നെ അക്രമ രംഗങ്ങൾ നിറഞ്ഞ ഗെയി​മു​കൾ അതിന്‌ വീണ്ടും വളം​വെച്ചു കൊടു​ക്കു​ക​യാ​യി​രി​ക്കി​ല്ലേ? തങ്ങൾ കാണുന്ന കാര്യ​ങ്ങ​ളാൽ ആളുകൾ ഒട്ടും​തന്നെ സ്വാധീ​നി​ക്ക​പ്പെ​ടു​ന്നില്ല എന്നൊക്കെ പറയു​ന്നതു വെറു​തെ​യാണ്‌. അല്ലെങ്കിൽ പിന്നെ കച്ചവട​ലോ​കം ടെലി​വി​ഷൻ പരസ്യ​ങ്ങൾക്കാ​യി വർഷം തോറും കോടി​കൾ വാരി എറിയു​ന്നത്‌ എന്തിനാണ്‌?

“നിഗ്ര​ഹി​ക്കാ​നുള്ള വ്യഗ്രത”

കൊല​പാ​ത​കത്തെ കുറ്റം വിധി​ക്കുന്ന തങ്ങളുടെ നൈസർഗിക ധാർമിക ബോധത്തെ മറിക​ട​ക്കാൻ പോന്ന​വി​ധം പട്ടാള പരിശീ​ലനം പട്ടാള​ക്കാ​രെ രൂപ​പ്പെ​ടു​ത്തി​യെ​ടു​ക്കു​ന്നു. കുട്ടി​ക​ളു​ടെ കാര്യ​ത്തിൽ അക്രമം നിറഞ്ഞ കമ്പ്യൂട്ടർ ഗെയി​മു​കൾ ചെയ്യു​ന്ന​തും ഇതു തന്നെയാണ്‌. കൊല​യെ​പ്പറ്റി (ഇംഗ്ലീഷ്‌) എന്ന ഗ്രന്ഥ​മെ​ഴു​തിയ പട്ടാള മനശ്ശാ​സ്‌ത്രജ്ഞൻ ഡേവിഡ്‌ ഗ്രോ​സ്‌മാ​ന്റേ​താണ്‌ ആ അഭി​പ്രാ​യം. ഉദാഹ​ര​ണ​ത്തിന്‌, വെടി​വെ​ക്കാൻ കാലാൾപ്പ​ട​യ്‌ക്കു പരിശീ​ലനം നൽകവേ, വളയങ്ങൾ വരച്ച ബോർഡി​നു പകരം ആൾ രൂപങ്ങൾ ഉപയോ​ഗി​ച്ചത്‌ അവരെ മനസ്സാക്ഷി തഴമ്പി​ച്ചവർ ആക്കി​യെ​ടു​ക്കാൻ സഹായി​ച്ച​താ​യി കണ്ടെത്തി​യി​ട്ടുണ്ട്‌. അതേ വിധത്തിൽ തന്നെയാണ്‌ അക്രമാ​സ​ക്ത​മായ ഗെയി​മു​കൾ കുട്ടി​ക​ളിൽ “നിഗ്ര​ഹി​ക്കാ​നുള്ള വ്യഗ്രത” ഉൾനടു​ന്ന​തെന്ന്‌ ഗ്രോ​സ്‌മാൻ വാദി​ക്കു​ന്നു.

ജേർണൽ ഓഫ്‌ പേഴ്‌സ​ണാ​ലി​റ്റി ആൻഡ്‌ സോഷ്യൽ സൈ​ക്കോ​ള​ജി​യിൽ പ്രസി​ദ്ധ​പ്പെ​ടു​ത്തുന്ന ഗവേഷ​ണ​പ​ഠനം പറയുന്ന പ്രകാരം, വീഡി​യോ ഗെയി​മു​ക​ളി​ലും കമ്പ്യൂട്ടർ ഗെയി​മു​ക​ളി​ലും ഉൾപ്പെ​ടു​ത്തി​യി​രി​ക്കുന്ന അക്രമം ചലച്ചി​ത്ര​ങ്ങ​ളി​ലും ടെലി​വി​ഷ​നി​ലും ദൃശ്യ​വ​ത്‌ക​രി​ക്കുന്ന അക്രമ​ത്തെ​ക്കാൾ പതിന്മ​ടങ്ങു ദോഷ​ക​ര​മാണ്‌. കാരണം അത്തരം ഗെയി​മു​ക​ളിൽ ഏർപ്പെ​ടുന്ന വ്യക്തി സ്‌ക്രീ​നിൽ അക്രമ​പ്ര​വർത്തനം നടത്തുന്ന കഥാപാ​ത്ര​ങ്ങ​ളു​മാ​യി താദാ​ത്മ്യം പ്രാപി​ക്കു​ന്നു. ടെലി​വി​ഷ​നിൽ നാം അക്രമ​ത്തി​നു വെറും ദൃക്‌സാ​ക്ഷി​കൾ ആയിരി​ക്കു​മ്പോൾ ഗെയി​മു​ക​ളിൽ നാം നേരിട്ട്‌ അക്രമ​പ്ര​വർത്ത​ന​ങ്ങ​ളിൽ ഏർപ്പെ​ടുന്ന പ്രതീതി ഉളവാ​കു​ന്നു. കൂടാതെ സിനി​മ​യാ​കു​മ്പോൾ ഏതാനും മണിക്കൂർ നേരമേ കാണൂ. എന്നാൽ ഒരു വീഡി​യോ ഗെയിം നന്നായി പഠി​ച്ചെ​ടു​ക്കാൻതന്നെ ഒരു കുട്ടിക്കു നൂറു മണിക്കൂർ വേണ്ടി​വ​ന്നേ​ക്കാം.

ക്രൂര​മാ​യ കുറ്റകൃ​ത്യ​ങ്ങൾ നിറഞ്ഞ ഗെയി​മു​കൾ മുതിർന്ന​വർക്കു മാത്ര​മാ​യി വേർതി​രി​ച്ചു​കൊണ്ട്‌ ഗെയി​മു​കൾ തരംതി​രി​ക്കുന്ന സമ്പ്രദാ​യം ചില രാജ്യങ്ങൾ കൈ​ക്കൊ​ണ്ടി​ട്ടുണ്ട്‌. എന്നിരു​ന്നാ​ലും നിയമം കൊണ്ടു​വ​ന്ന​തു​കൊണ്ട്‌ ആയില്ല, അവ എത്ര​ത്തോ​ളം നടപ്പി​ലാ​ക്കു​ന്നുണ്ട്‌ എന്നതിനെ ആശ്രയി​ച്ചി​രി​ക്കും അതിന്റെ ഫലപ്രാ​പ്‌തി. ഐക്യ​നാ​ടു​ക​ളിൽ നടത്തിയ ഒരു സർവേ​യിൽ പങ്കെടുത്ത 66 ശതമാനം മാതാ​പി​താ​ക്കൾക്കും ഗെയി​മു​ക​ളു​ടെ തരംതി​രി​ക്കൽ സമ്പ്രദാ​യം (rating) സംബന്ധിച്ച്‌ ഒരു സാമാ​ന്യ​ജ്ഞാ​നം പോലു​മി​ല്ലാ​യി​രു​ന്നു. എന്റർടെ​യ്‌ൻമെന്റ്‌ സോഫ്‌ട്‌വെയർ റേറ്റിംഗ്‌ ബോർഡി​ന്റെ ഡയറക്ടർ പറയു​ന്ന​ത​നു​സ​രിച്ച്‌, ചില ഗെയി​മു​കൾ കുട്ടികൾ ഉപയോ​ഗി​ക്കു​ന്നതു തടയുക എന്നതല്ല ഈ തരംതി​രി​ക്കൽ സമ്പ്രദാ​യ​ത്തി​ന്റെ പ്രാഥ​മിക ലക്ഷ്യം. “ഏതൊക്കെ ഗെയി​മു​കൾ ഇഷ്ടപ്പെ​ടണം അല്ലെങ്കിൽ ഇഷ്ടപ്പെ​ടാ​തി​രി​ക്കണം എന്നതു സംബന്ധിച്ച്‌ കൽപ്പന പുറ​പ്പെ​ടു​വി​ക്കലല്ല ഞങ്ങളുടെ ജോലി. തങ്ങളുടെ കുട്ടി​കൾക്ക്‌ എന്തു വേണം എന്തു വേണ്ട എന്നു തീരു​മാ​നി​ക്കാൻ മാതാ​പി​താ​ക്കൾക്കു ചില വഴികൾ പറഞ്ഞു കൊടു​ക്കു​ക​യാണ്‌ ഞങ്ങൾ ചെയ്യു​ന്നത്‌.”

ഗെയി​മു​കൾ ആസക്തി ഉളവാ​ക്കു​മോ?

ഇന്റർനെറ്റ്‌ വഴി ഗോള​ത്തി​നു ചുറ്റു​മുള്ള ആളുക​ളു​മാ​യി കളിക​ളിൽ ഏർപ്പെ​ടുക സാധ്യ​മാ​ണെന്നു നാം കണ്ടുക​ഴി​ഞ്ഞ​ല്ലോ. ഈ ആധുനിക ഓൺ-ലൈൻ ഗെയി​മു​ക​ളിൽ ഓരോ കളിക്കാ​ര​നും കഥാപാ​ത്ര​ങ്ങളെ യഥേഷ്ടം തിര​ഞ്ഞെ​ടുത്ത്‌ ആ കഥാപാ​ത്ര​മാ​യി നടിച്ചു​കൊണ്ട്‌ കളിക്കാൻ കഴിയും. വെല്ലു​വി​ളി​കളെ ഒന്നൊ​ന്നാ​യി തരണം​ചെ​യ്‌തു​കൊണ്ട്‌ അയാൾ മുന്നേ​റു​ന്നു. അതു​കൊ​ണ്ടു​തന്നെ താനൊ​രു ജൈ​ത്ര​യാ​ത്ര നടത്തു​ക​യാ​ണെന്നു കളിക്കാ​രനു തോന്നു​ന്നു. അങ്ങനെ, താൻ ചെലവ​ഴി​ക്കുന്ന സമയം വൃഥാ​വ​ല്ലെ​ന്നും പ്രതി​ഫ​ല​ദാ​യ​ക​മായ ഒരു നിക്ഷേപം പോ​ലെ​യാ​ണെ​ന്നും ഒക്കെ തോന്നി​ത്തു​ട​ങ്ങു​ന്ന​തോ​ടെ അയാൾ വീണ്ടും വീണ്ടും അതി​ലേക്കു തിരി​യു​ന്നു. ചിലർക്ക്‌ ഗെയിം ഒരു ആസക്തി​യാ​യി മാറുന്നു—ഓൺ-ലൈൻ ഗെയി​മു​കൾ ചില​പ്പോൾ മാസങ്ങ​ളോ വർഷങ്ങ​ളോ പോലും നീണ്ടു​നിൽക്കു​ന്നത്‌ ഒരുപക്ഷേ ഇതു​കൊ​ണ്ടാ​യി​രി​ക്കാം.

ദക്ഷിണ കൊറി​യ​യിൽ അടുത്ത​കാ​ലത്ത്‌, ‘ലീനി​യേജ്‌’ എന്നു വിളി​ക്കുന്ന ഒരു ഓൺ-ലൈൻ ഗെയി​മി​നോ​ടു പ്രിയം വർധി​ച്ചി​ട്ടു​ണ്ടെന്ന്‌ ടൈം മാസിക റിപ്പോർട്ടു ചെയ്‌തു. ഒരു മധ്യകാ​ല​യുഗ പശ്ചാത്ത​ല​ത്തിൽ കളിക്കാർ വിജയ​ത്തി​നാ​യി മത്സരി​ക്കു​ക​യാണ്‌ ഈ കളിയിൽ. ഓരോ ഗ്രേഡും എത്തിപ്പി​ടി​ക്കും വരെ വിവിധ ഘട്ടങ്ങളി​ലൂ​ടെ കളിക്കാ​രൻ മുന്നേ​റു​ന്നു. ചില കുട്ടികൾ രാത്രി മുഴുവൻ ഇരുന്നു കളിച്ചിട്ട്‌ പകൽ ക്ലാസ്സി​ലി​രുന്ന്‌ ഉറക്കം തൂങ്ങുന്നു. പലപ്പോ​ഴും മാതാ​പി​താ​ക്കൾക്ക്‌ ഇതു സംബന്ധിച്ച്‌ ഉത്‌ക​ണ്‌ഠ​യു​ണ്ടെ​ങ്കി​ലും ഇതെങ്ങനെ നിയ​ന്ത്രി​ക്ക​ണ​മെന്ന്‌ അവർക്ക്‌ അറിയില്ല. ഓൺ-ലൈൻ ഗെയി​മു​കൾ കളിക്കാ​റുള്ള ഒരു കുട്ടി ഒരു അഭിമു​ഖ​ത്തിൽ ഇങ്ങനെ പറഞ്ഞു: “ഓൺ-ലൈനിൽ എന്നെ ‘കണ്ടുമു​ട്ടു​മ്പോൾ’ ഞാൻ വലിയ കേമനാണ്‌ എന്നാണ്‌ ആളുക​ളു​ടെ വിചാരം. പക്ഷേ നേരിട്ട്‌ എന്നെ കാണു​മ്പോൾ ഈ പൊണ്ണ​ത്തടി അൽപ്പം കുറയ്‌ക്ക​ണ​മെന്ന്‌ ആരും പറഞ്ഞു​പോ​കും.”

ലീനി​യേജ്‌ എന്ന ഗെയിം ഇത്ര ജനപ്രീ​തി നേടി​യി​രി​ക്കു​ന്ന​തി​ന്റെ കാരണം സംബന്ധിച്ച്‌ കൊറി​യൻ മനശ്ശാ​സ്‌ത്രജ്ഞൻ ജുൺമോ ക്വോങ്‌ അഭി​പ്രാ​യ​പ്പെ​ടു​ന്നത്‌ ഇങ്ങനെ​യാണ്‌: “കൊറി​യ​യി​ലെ ആളുകൾ യഥാർഥ ജീവി​ത​ത്തിൽ തങ്ങളുടെ ഉള്ളിന്റെ ഉള്ളിലെ മോഹ​ങ്ങ​ളും അഭിനി​വേ​ശ​ങ്ങ​ളും അടക്കി​പ്പി​ടി​ച്ചു ജീവി​ക്കാൻ നിർബ​ന്ധി​ത​രാണ്‌. ഗെയി​മു​ക​ളി​ലാണ്‌ അവയെ​ല്ലാം പുറത്തു ചാടു​ന്നത്‌.” അങ്ങനെ യാഥാർഥ്യ​ത്തിൽ നിന്നും ഒരു കാൽപ്പ​നിക ലോക​ത്തി​ലേക്കു യുവാക്കൾ ഒളി​ച്ചോ​ടു​ന്നു. ക്രാന്ത​ദർശി​യായ ഒരു ഭാഷ്യ​കാ​രൻ ഗെയിം കളിക്കാ​രെ വിലയി​രു​ത്തു​ന്നത്‌ ഇങ്ങനെ​യാണ്‌: “കളിക്കാ​രനെ സംബന്ധി​ച്ചി​ട​ത്തോ​ളം യാഥാർഥ്യ​ത്തെ അപേക്ഷിച്ച്‌ ഗെയി​മി​ന്റെ ലോക​മാ​ണു കൂടുതൽ ആകർഷ​ണീ​യം. കളി വീണ്ടും തുടരാൻ ആവശ്യ​മായ പണം തേടി​യി​റ​ങ്ങുന്ന ആ ഒരു ഇടവേ​ള​യിൽ മാത്ര​മാണ്‌ അയാൾ യഥാർഥ ലോക​ത്താ​യി​രി​ക്കു​ന്നത്‌.”

ആരോ​ഗ്യ​ത്തെ ബാധി​ക്കുന്ന വിധം

ഐക്യ​നാ​ടു​ക​ളിൽ ഒരു ശരാശരി ആറാം ക്ലാസ്സു​കാ​രൻ പ്രതി​ദി​നം നാലു മണിക്കൂർ ടിവി കാണു​ന്നു​ണ്ടെ​ന്നാ​ണു കണക്ക്‌—ഗെയി​മു​ക​ളിൽ മുഴുകി കമ്പ്യൂ​ട്ട​റി​ന്റെ​യോ ടിവി സ്‌ക്രീ​നി​ന്റെ​യോ മുന്നിൽ കുത്തി​യി​രി​ക്കുന്ന സമയം വേറെ. ഉദ്ദേശി​ച്ച​തി​ലും കൂടുതൽ സമയം തങ്ങൾ കളിയിൽ മുഴു​കി​യെന്ന്‌ 1995-ൽ നടത്തിയ ഒരു സർവേ​യിൽ 60 ശതമാ​ന​ത്തി​ല​ധി​കം കുട്ടികൾ സമ്മതി​ക്കു​ക​യു​ണ്ടാ​യി. അങ്ങനെ പഠനകാ​ര്യ​ങ്ങ​ളിൽ അവർ ഉഴപ്പാൻ തുടങ്ങു​ന്നു. കമ്പ്യൂട്ടർ ഗെയി​മു​കൾ കുഞ്ഞു​ങ്ങ​ളു​ടെ തലച്ചോ​റി​ന്റെ ഒരു പരിമി​ത​മായ ഭാഗത്തെ മാത്രമേ ഉത്തേജി​പ്പി​ക്കു​ന്നു​ള്ളു എന്ന്‌ ജപ്പാനിൽ നടന്ന ഒരു പഠനം വെളി​പ്പെ​ടു​ത്തി. കുട്ടികൾ കൂടുതൽ വായി​ക്കു​ക​യും എഴുതു​ക​യും കണക്കുകൾ ചെയ്‌തു പഠിക്കു​ക​യും ചെയ്യേ​ണ്ടത്‌ ആവശ്യ​മാ​ണെന്നു പഠന റിപ്പോർട്ടു തുടർന്നു പറഞ്ഞു. എന്നാൽ അവരുടെ തലച്ചോർ പൂർണ​വി​കാ​സം പ്രാപി​ക്ക​ണ​മെ​ങ്കിൽ അവർ മറ്റു കുട്ടി​ക​ളോ​ടൊ​പ്പം പുറത്തി​റങ്ങി കളിക്കു​ക​യും ഇടപഴ​കു​ക​യും ചെയ്യേ​ണ്ട​തുണ്ട്‌.

ഐക്യ​നാ​ടു​ക​ളിൽ അഞ്ചിനും എട്ടിനും മധ്യേ പ്രായ​മുള്ള ഏതാണ്ട്‌ 40 ശതമാനം കുട്ടി​ക​ളും പൊണ്ണ​ത്തടി എന്ന ആരോ​ഗ്യ​പ്ര​ശ്‌നത്തെ നേരി​ടു​ന്നു എന്നാണു റിപ്പോർട്ട്‌. ടിവി​യു​ടെ​യും കമ്പ്യൂട്ടർ സ്‌ക്രീ​നി​ന്റെ​യും മുന്നിൽ ഒരുപാ​ടു സമയം ഇരുന്നും കിടന്നും ചെലവ​ഴി​ക്കു​ന്നതു നിമിത്തം ശരീര​ത്തിന്‌ ആവശ്യ​മായ വ്യായാ​മം കിട്ടാതെ പോകു​ന്ന​താ​യി​രി​ക്കാം ഈ പ്രശ്‌ന​ത്തി​നുള്ള പ്രധാന കാരണം. കമ്പ്യൂട്ടർ ഗെയി​മു​കൾ കളിക്കു​ന്ന​തോ​ടൊ​പ്പം​തന്നെ വ്യായാ​മം ചെയ്യാ​നും സഹായി​ക്കുന്ന ഒരു ഉപകരണം പോലും ഒരു കമ്പനി വികസി​പ്പി​ച്ചെ​ടു​ത്തി​രി​ക്കു​ന്നു. എന്നാൽ, ഇത്തരം ഗെയി​മു​കൾ കളിക്കാൻ ചെലവ​ഴി​ക്കുന്ന സമയം വെട്ടി​ച്ചു​രു​ക്കി​യിട്ട്‌, ഒരു ബഹുമുഖ വ്യക്തി​ത്വം വളർത്തി​യെ​ടു​ക്കാൻ തങ്ങളെ സഹായി​ക്കുന്ന മറ്റു നാനാ​വിധ പ്രവർത്ത​ന​ങ്ങൾക്കാ​യി സമയം മാറ്റി​വെ​ക്കു​ന്ന​താ​യി​രി​ക്കും കുട്ടി​കളെ സംബന്ധി​ച്ചി​ട​ത്തോ​ളം ഏറെ നന്ന്‌.

വേറൊ​രു ആരോ​ഗ്യ​പ്ര​ശ്‌നം ഇതാണ്‌: തുടർച്ച​യാ​യി ദീർഘ​നേരം കണ്ണെടു​ക്കാ​തെ സ്‌ക്രീ​നിൽ തന്നെ നോക്കി​യി​രി​ക്കു​ന്നതു കണ്ണിനു പ്രശ്‌നങ്ങൾ സൃഷ്ടി​ക്കും. കമ്പ്യൂട്ടർ ഉപയോ​ഗി​ക്കുന്ന നാലിൽ ഒരാൾക്കു കാഴ്‌ച​ത്ത​ക​രാ​റു​കൾ സാധാ​ര​ണ​മാ​ണെന്നു സർവേകൾ സൂചി​പ്പി​ക്കു​ന്നു. ഇമവെ​ട്ടു​ന്നതു കുറയു​ന്നു എന്നതാണ്‌ ഒരു കാരണം. തത്‌ഫ​ല​മാ​യി മിഴി​യു​ടെ നനവു കുറഞ്ഞിട്ട്‌ ചൊറി​ച്ചി​ലും മറ്റ്‌ അസ്വസ്ഥ​ത​ക​ളും ഉണ്ടാകു​ന്നു. ഇമവെ​ട്ടു​ന്നത്‌ കണ്ണീർ ഗ്രന്ഥിയെ ഉത്തേജി​പ്പി​ക്കു​ക​യും പൊടി​യും മറ്റും കഴുകി​ക്ക​ള​ഞ്ഞു​കൊണ്ട്‌ കണ്ണുകളെ തെളി​മ​യു​ള്ള​താ​യി നിലനി​റു​ത്തു​ക​യും ചെയ്യുന്നു.

കുട്ടി​കൾക്കു സ്വയാ​വ​ബോ​ധം കുറവാ​യ​തി​നാൽ അവർ എല്ലാം മറന്ന്‌ മണിക്കൂ​റു​ക​ളോ​ളം കമ്പ്യൂട്ടർ ഗെയി​മു​ക​ളിൽ മുഴു​കാ​റുണ്ട്‌. ഇടയ്‌ക്കെ​ങ്ങാ​നും ഒന്ന്‌ എഴു​ന്നേ​റ്റെ​ങ്കി​ലാ​യി. ഇത്‌ നയനങ്ങൾക്കു ക്ഷീണവും ദൃഷ്ടി​കേ​ന്ദ്രീ​ക​രി​ക്കു​ന്ന​തിൽ പ്രശ്‌ന​വും സൃഷ്ടി​ച്ചേ​ക്കാം. കമ്പ്യൂട്ടർ ഉപയോ​ഗി​ക്കു​ന്നവർ ഓരോ മണിക്കൂർ ഇടവിട്ട്‌ ഏതാനും മിനി​ട്ടു​കൾ എങ്കിലും ‘ബ്രേക്ക്‌’ എടുക്ക​ണ​മെന്ന്‌ വിദഗ്‌ധർ ശുപാർശ ചെയ്യുന്നു.a

തഴച്ചു​വ​ള​രുന്ന ഒരു ആഗോള വ്യവസാ​യം

ഓൺ-ലൈൻ ഗെയി​മു​കൾക്കു ലോക​മെ​ങ്ങും പ്രചാരം വർധി​ക്കു​ക​യാണ്‌. കൂണു മുളയ്‌ക്കും​പോ​ലെ​യാണ്‌ ഇന്റർനെറ്റ്‌ കഫേകൾ പ്രത്യ​ക്ഷ​പ്പെ​ടു​ന്നത്‌. ഓരോ കഫേയി​ലും നിരവധി കമ്പ്യൂ​ട്ട​റു​കൾ കാണും. ചെന്നി​രു​ന്നാൽ നെറ്റ്‌ വർക്ക്‌ ഗെയി​മു​കൾ കളിക്കാം, പണം കൊടു​ക്ക​ണ​മെന്നു മാത്രം. ഇതിനാ​യി മാസം 10,000 രൂപവരെ മുടക്കുന്ന യുവാക്കൾ കുറവല്ല.

ഗെയിം വ്യവസാ​യം തഴച്ചു വളരു​ക​യാ​ണെ​ന്ന​തി​നു സംശയ​മില്ല. ഓൺ-ലൈൻ ഗെയി​മു​ക​ളു​ടെ വിപണന സാധ്യത അടുത്ത അഞ്ചു വർഷം കൊണ്ട്‌ 70 ശതമാ​ന​ത്തി​ല​ധി​കം വർധി​ക്കു​മെന്നു പ്രതീ​ക്ഷി​ക്കു​ന്നു.

എന്നിരു​ന്നാ​ലും പടർന്നു പന്തലി​ക്കുന്ന ഈ വ്യവസാ​യ​ത്തിന്‌ തീർച്ച​യാ​യും മറ്റൊരു വശമുണ്ട്‌. അപായ സാധ്യ​തകൾ യഥാർഥ​ത്തിൽ ഉള്ളതു​ത​ന്നെ​യാണ്‌. കൊല്ലും കൊല​യും പ്രോ​ത്സാ​ഹി​പ്പി​ക്കുന്ന, ആരോ​ഗ്യ​ത്തെ ഹനിക്കുന്ന, പണത്തി​ന്റെ​യും സമയത്തി​ന്റെ​യും കടിഞ്ഞാ​ണി​ല്ലാത്ത ധൂർത്തിന്‌ ഇടയാ​ക്കുന്ന ഏതൊരു ഏർപ്പാ​ടും ഭവിഷ്യ​ത്തു​കൾ കൂടാതെ നമുക്കാർക്കും മുന്നോ​ട്ടു​കൊ​ണ്ടു​പോ​കാ​നാ​വില്ല. വളരുന്ന തലമുറ വിശേ​ഷാൽ വില​യൊ​ടു​ക്കേണ്ടി വരും. അതു​കൊണ്ട്‌ കമ്പ്യൂട്ടർ ഗെയി​മു​കൾ എല്ലായ്‌പോ​ഴും വിദ്യാ​ഭ്യാ​സോ​ന്മു​ഖ​വും നിർദോ​ഷ​വു​മായ വിനോദ ഉപാധി ആണെന്നു പറഞ്ഞാൽ അതു യാഥാർഥ്യ​ത്തി​നു നിരക്കു​ന്നതല്ല. മേലു​ദ്ധ​രിച്ച ഡേവിഡ്‌ വാൾവ്‌ ഇങ്ങനെ മുന്നറി​യി​പ്പു നൽകുന്നു: “വിനോദ മാധ്യ​മങ്ങൾ ചെലു​ത്തുന്ന പ്രഭാവം നാം തിരി​ച്ച​റി​യു​ന്ന​തി​ലും പ്രബല​മാ​യി​രി​ക്കാൻ സാധ്യ​ത​യുണ്ട്‌.” അദ്ദേഹം ഇങ്ങനെ തുടരു​ന്നു: “കുട്ടി​കളെ പരിപാ​ലി​ക്കാ​നുള്ള ചുമതല മാതാ​പി​താ​ക്കൾക്ക്‌ ആയിരി​ക്കുന്ന സ്ഥിതിക്ക്‌, മാധ്യമ രംഗത്തു​ണ്ടാ​കുന്ന മാറ്റങ്ങൾ സംബന്ധിച്ച്‌ ജാഗരൂ​ക​രാ​യി​രു​ന്നു​കൊ​ണ്ടും കൂടി ആ ചുമതല നിർവ​ഹി​ക്കാൻ അവർ ശ്രദ്ധി​ക്കേ​ണ്ട​തുണ്ട്‌.”

ബൈബിൾ പറയു​ന്ന​തു​പോ​ലെ “ഈ ലോക​ത്തി​ന്റെ രംഗം മാറി​ക്കൊ​ണ്ടി​രി​ക്കു​ക​യാണ്‌.” (1 കൊരി​ന്ത്യർ 7:31, NW) വിനോദ മാധ്യമ രംഗത്താ​വണം മറ്റെന്തി​നെ​ക്കാ​ളും വേഗം മാറ്റങ്ങൾ ഉണ്ടാകു​ന്നത്‌. തങ്ങളുടെ കുട്ടി​ക​ളു​ടെ​മേൽ പിടി​മു​റു​ക്കുന്ന മാറി​വ​രുന്ന എണ്ണമറ്റ നൂതന​പ്ര​വ​ണ​ത​ക​ളും സ്വാധീ​ന​ങ്ങ​ളും സംബന്ധി​ച്ചു ജാഗ്രത പുലർത്തുക ബുദ്ധി​മു​ട്ടാ​ണെന്ന്‌ അനേകം മാതാ​പി​താ​ക്ക​ളും കണ്ടെത്തു​ന്നു. പക്ഷേ ശ്രമം നിറു​ത്തി​ക്ക​ള​യ​രുത്‌. യഥാർഥ മൂല്യ​മുള്ള സംഗതി​ക​ളിൽ ശ്രദ്ധ​കേ​ന്ദ്രീ​ക​രി​ക്കാൻ സഹായി​ച്ചു​കൊണ്ട്‌ കുട്ടി​കളെ വളർത്തി​ക്കൊ​ണ്ടു വരുന്ന​തിൽ ധാരാളം മാതാ​പി​താ​ക്കൾ വിജയി​ക്കു​ന്നുണ്ട്‌. കമ്പ്യൂ​ട്ട​റോ ടിവി​യോ മറ്റേ​തൊ​രു മാധ്യ​മ​മോ ആയാലും ശരി അവ നൽകുന്ന വിനോ​ദങ്ങൾ നമ്മുടെ ഏറ്റവും വലിയ ആവശ്യത്തെ ഒരിക്ക​ലും തൃപ്‌തി​പ്പെ​ടു​ത്തു​ക​യില്ല എന്നു മുതിർന്ന​വ​രെ​പ്പോ​ലെ​തന്നെ കുട്ടി​ക​ളും മനസ്സി​ലാ​ക്കണം. യേശു ഒരിക്കൽ പറഞ്ഞതു​പോ​ലെ, “തങ്ങളുടെ ആത്മീയ ആവശ്യ​ത്തെ​ക്കു​റി​ച്ചു ബോധ​മു​ള്ളവർ” ആണ്‌ യഥാർഥ സന്തോഷം ആസ്വദി​ക്കു​ന്നത്‌.—മത്തായി 5:3, NW.

(g02 12/22)

[അടിക്കു​റിപ്പ്‌]

[6-ാം പേജിലെ ചതുരം]

ഇലക്‌ട്രോണിക്‌ ഗെയി​മു​കൾ—അപായ സാധ്യ​തകൾ സംക്ഷി​പ്‌ത​മാ​യി

▸ അക്രമാ​സ​ക്ത​മായ കമ്പ്യൂട്ടർ-വീഡി​യോ ഗെയി​മു​കൾ കളിക്കു​ന്നത്‌ അക്രമ​വാ​സന വളർത്തി​യേ​ക്കാം.

▸ ഇലക്‌​ട്രോ​ണിക്‌ ഗെയി​മു​ക​ളിൽ നിങ്ങൾ വെറു​മൊ​രു കാഴ്‌ച​ക്കാ​രനല്ല. പകരം നിങ്ങൾതന്നെ അക്രമ​ത്തിൽ ഏർപ്പെ​ടു​ന്നു എന്ന പ്രതീതി ജനിപ്പി​ക്കും വിധമാണ്‌ അവ രൂപകൽപ്പന ചെയ്‌തി​രി​ക്കു​ന്നത്‌.

▸ ഇത്തരം ഗെയി​മു​കൾ വിവേകം കുറഞ്ഞ​വരെ യാഥാർഥ്യ​വും സങ്കൽപ്പ​വും തമ്മിലുള്ള വ്യത്യാ​സം തിരി​ച്ച​റി​യാൻ കഴിയാത്ത അവസ്ഥയിൽ കൊ​ണ്ടെ​ത്തി​ച്ചേ​ക്കാം.

▸ മയക്കു​മ​രുന്ന്‌ ആസക്തി പോലെ, ഗെയി​മിൽ മുഴു​കു​ന്നത്‌ കടപ്പാ​ടു​ക​ളും സ്വന്തബ​ന്ധ​ങ്ങ​ളും മറക്കു​ന്ന​തി​ലേക്കു നയി​ച്ചേ​ക്കാം.

▸ പഠനം, മറ്റുള്ള​വ​രു​മാ​യുള്ള ഇടപഴകൽ, സർഗോ​ന്മു​ഖ​മാ​യുള്ള കളികൾ എന്നിങ്ങനെ കൂടുതൽ പ്രധാ​ന​പ്പെട്ട കാര്യ​ങ്ങൾക്കാ​യി കുട്ടികൾ ചെലവി​ടേണ്ട സമയം ഗെയി​മു​കൾ കവർന്നെ​ടു​ക്കു​ന്നു.

▸ നിരന്ത​ര​മാ​യി സ്‌ക്രീ​നിൽ നോക്കി​യി​രി​ക്കു​ന്നതു കണ്ണുകളെ ക്ഷീണി​പ്പി​ക്കും.

▸ പതിവാ​യി ഗെയി​മിൽ മുഴു​കു​മ്പോൾ വ്യായാ​മം തീരെ​യി​ല്ലാ​താ​വു​ന്നു; പൊണ്ണ​ത്ത​ടി​ക്കു സാധ്യ​ത​യേ​റു​ന്നു.

▸ ഗെയി​മു​കൾ നിങ്ങളു​ടെ പണവും സമയവും കവർന്നെ​ടു​ത്തേ​ക്കാം.

[8-ാം പേജിലെ ചതുരം/ചിത്രം]

ഈ ദുശ്ശീലം മറിക​ട​ക്കാൻ ഇതാ ഒരു മാർഗം

ഇരുപ​ത്തി​മൂ​ന്നു വയസ്സുള്ള തോമസ്‌ എന്ന ക്രിസ്‌തീയ യുവാവ്‌ ഇപ്രകാ​രം സ്‌മരി​ക്കു​ന്നു: “സ്‌കൂ​ളിൽ പഠിക്കുന്ന കാലത്തു ഗെയിം കളി മൂത്ത്‌ ഗൃഹപാ​ഠം ചെയ്യു​ന്ന​തിൽ ഞാൻ ഒരുപാട്‌ ഉഴപ്പി. തുടർന്നുള്ള ജീവി​ത​ത്തിൽ ഇതു മറ്റു കാര്യ​ങ്ങ​ളെ​യും ബാധിച്ചു. മുഴു​സമയ ശുശ്രൂഷ ഏറ്റെടുത്ത ശേഷവും ഞാൻ കളി തുടർന്നു. വളരെ​യ​ധി​കം സമയവും ഊർജ​വും അതിലൂ​ടെ കളഞ്ഞു​കു​ളി​ക്കു​ക​യാ​ണെന്ന്‌ ഒടുവിൽ ഞാൻ മനസ്സി​ലാ​ക്കി. കളിച്ചു​കൊ​ണ്ടി​രു​ന്നി​ടത്തു നിന്നു നേരെ ശുശ്രൂ​ഷ​യ്‌ക്കും ക്രിസ്‌തീയ യോഗ​ങ്ങൾക്കും പോയ​പ്പോ​ഴൊ​ക്കെ ശ്രദ്ധ​കേ​ന്ദ്രീ​ക​രി​ക്കാൻ പറ്റാതെ ഞാൻ വിഷമി​ച്ചി​ട്ടുണ്ട്‌. വീട്ടിൽ ചെന്ന്‌ കളി തുടരു​ന്ന​തി​നെ കുറി​ച്ചാ​യി​രി​ക്കും എന്റെ ചിന്ത മുഴുവൻ. വ്യക്തി​പ​ര​മായ പഠന​ത്തെ​യും ബൈബിൾ വായന​യെ​യും എല്ലാം അതു ബാധിച്ചു. എനിക്കു ദൈവ​സേ​വ​ന​ത്തിൽ സന്തോഷം കുറഞ്ഞു​തു​ടങ്ങി.

“അങ്ങനെ​യി​രി​ക്കെ ഒരു ദിവസം പാതി​രാ​ത്രിക്ക്‌ കിടക്ക​യിൽ കിടന്ന്‌ ഞാൻ ചിന്തിച്ചു, ഇങ്ങനെ പോയാൽ ശരിയാ​വില്ല. ഞാൻ ചാടി​യെ​ണീ​റ്റു. കമ്പ്യൂട്ടർ ഓൺ ചെയ്‌ത്‌ ഗെയി​മു​കൾ മുഴുവൻ സെലക്ടു​ചെ​യ്‌തു, എന്നിട്ട്‌ ഡിലീറ്റ്‌ ബട്ടണിൽ വിരല​മർത്തി. ഞൊടി​യി​ട​യിൽ എന്റെ പ്രശ്‌നം അവസാ​നി​ച്ചു! തീർച്ച​യാ​യും അത്‌ അൽപ്പം ബുദ്ധി​മു​ട്ടുള്ള തീരു​മാ​ന​മാ​യി​രു​ന്നു. വിചാ​രി​ക്കാത്ത വിധം ഗെയി​മു​കൾക്ക്‌ അടി​പ്പെട്ടു പോ​യെന്നു ഞാൻ തിരി​ച്ച​റി​ഞ്ഞു. എന്നാൽ ഇപ്പോൾ വിജയം വരിക്കാ​നാ​യ​തി​ലുള്ള സന്തോ​ഷ​മാണ്‌ എനിക്ക്‌. എന്റെ നന്മയ്‌ക്കു വേണ്ടി​യാണ്‌ ഞാനതു ചെയ്‌ത​തെന്ന്‌ എനിക്ക​റി​യാം. അതിനു ശേഷവും ഞാൻ ചില ഗെയി​മു​കൾ വാങ്ങി​യി​ട്ടു​ണ്ടെ​ന്നു​ള്ളതു സത്യമാണ്‌. പക്ഷേ ഇപ്പോൾ ഞാൻ എന്നോ​ടു​തന്നെ കൂടുതൽ കർക്കശ​നാണ്‌. കളിയു​ടെ കാര്യ​ത്തിൽ സമനില കുറയു​ന്നു എന്നു തോന്നി​ത്തു​ട​ങ്ങി​യാൽ, ഉടൻ ഞാൻ ഡിലീറ്റ്‌ ബട്ടൺ അമർത്തു​ക​യാ​യി.”

[6-ാം പേജിലെ ചിത്രം]

ഗെയിമുകളിലെ അക്രമ​ങ്ങൾക്കും കളിക്കാ​രി​ലെ അക്രമ​വാ​സ​ന​യ്‌ക്കും തമ്മിൽ ബന്ധമു​ണ്ടെ​ന്നാണ്‌ പലരു​ടെ​യും അഭി​പ്രാ​യം

[7-ാം പേജിലെ ചിത്രം]

കൊറിയയിലെ സോളി​ലുള്ള ഒരു ഇന്റർനെറ്റ്‌ ഗെയിം റൂം