പരാദമെങ്കിലും ഉപകാരിയായ ഒരു കടന്നൽ
ഇക്ക്‌ന്യൂമൊൺ കടന്നൽ കാഴ്‌ചയ്‌ക്ക്‌ ഒരു വിചിത്രജീവിയാണ്‌, ഏതാണ്ട്‌ പേടിപ്പെടുത്തുന്ന ഒരു രൂപം. എന്നാൽ അതിനെ പരാദജീവികളുടെ പട്ടികയിൽ പെടുത്തിയിരിക്കുന്നത്‌ എന്തുകൊണ്ടാണ്‌? കാരണം ഇത്‌ സാധാരണ മറ്റു പ്രാണികളുടെയും ചിലന്തികളുടെയുമൊക്കെ ലാർവയുടെ പുറത്തോ ഉള്ളിലോ മുട്ടയിട്ടാണ്‌ പ്രജനനം നടത്തുന്നത്‌.
വടക്കേ അമേരിക്കയിൽ, ഇക്ക്‌ന്യൂമൊൺ കടന്നലുകളുടെതന്നെ 3,000-ത്തിലധികം സ്‌പീഷീസുകൾ ഉണ്ട്‌. ഈ കടന്നലുകൾ, പരാദജീവികളായ വിവിധതരം കടന്നലുകൾ ഉൾപ്പെട്ട വലിയൊരു കുടുംബത്തിന്റെ ഭാഗമാണ്‌. ലോകമൊട്ടാകെ, ഈ പ്രാണിക്കുടുംബത്തിൽ 40,000-ത്തിൽ അധികം സ്‌പീഷീസുകളുണ്ട്‌ എന്ന്‌ ശാസ്‌ത്രജ്ഞന്മാർ കണക്കാക്കുന്നു.
ഇക്ക്‌ന്യൂമൊൺ കടന്നലുകൾ വലുപ്പത്തിൽ വ്യത്യാസപ്പെട്ടിരിക്കുന്നു. അതായത്‌, ഇവയ്‌ക്ക്‌ ഏതാണ്ട്‌ 0.3 മുതൽ 5 വരെ സെന്റിമീറ്റർ നീളമുണ്ട്‌. ഇവയുടെ, വണ്ണം കുറഞ്ഞു വളഞ്ഞിരിക്കുന്ന ഉദരഭാഗത്തിന്‌ തലയും ഉരസ്സും ചേർന്നാൽ ഉള്ളതിനെക്കാൾ നീളമുണ്ട്‌. കുത്തുന്ന കടന്നലുകളുടേതിനെക്കാൾ നീളംകൂടിയ കൊമ്പുകളാണ്‌ ഇക്ക്‌ന്യൂമൊണുകൾക്ക്‌ ഉള്ളത്‌.
ഇക്ക്‌ന്യൂമൊണുകളുടെ ഉദരത്തിന്റെ അറ്റത്ത്‌ സൂചിപോലുള്ള ഒരു കുഴലുണ്ട്‌. ഇവയുടെ തികച്ചും വ്യതിരിക്തമായ ഒരു സവിശേഷതയാണിത്‌. അണ്ഡനിക്ഷേപിണി എന്നറിയപ്പെടുന്ന, മുട്ടയിടാനുപയോഗിക്കുന്ന ഈ അവയവത്തിനു മിക്കപ്പോഴും ശരീരത്തെക്കാൾ നീളമുണ്ട്‌. ഒരു കുതിരരോമത്തോളം മാത്രം കട്ടിയുള്ള ഈ അവയവത്തിന്‌ നൂലുപോലുള്ള മൂന്ന്‌ ഇഴകളുണ്ട്‌. ഈ ഇഴകൾ മുന്നോട്ടും പിന്നോട്ടും തെന്നുമ്പോൾ മുട്ട കുഴലിലൂടെ പുറത്തുവരും.
മുട്ട നിക്ഷേപിക്കാൻ പറ്റിയ ഒരു ലാർവയെ ഇക്ക്‌ന്യൂമൊൺ കണ്ടുപിടിക്കുന്നത്‌ എങ്ങനെയാണ്‌? ഇക്ക്‌ന്യൂമൊൺ ജനുസ്സിൽപ്പെട്ട പെൺ മെഗാരിസ്സാ കടന്നലുകൾ, കൊമ്പുകൾ ഉപയോഗിച്ച്‌ മരത്തിൽ കൊട്ടുന്നത്‌ നിരീക്ഷിക്കപ്പെട്ടിട്ടുണ്ട്‌. മരപ്പട്ടയ്‌ക്ക്‌ അടിയിൽ രണ്ടോ അതിലധികമോ സെന്റിമീറ്റർ ആഴത്തിൽ ജീവിക്കുന്ന ലാർവയുടെ സ്‌പന്ദനം പിടിച്ചെടുക്കുകയാണ്‌ അതിന്റെ ഉദ്ദേശ്യം. ലാർവയുടെ സാന്നിധ്യം തിരിച്ചറിഞ്ഞാൽ അവൾ കൊട്ടലിന്‌ ആക്കം കൂട്ടുന്നു. ഒടുവിൽ, അവൾ അണ്ഡനിക്ഷേപിണിക്കുഴൽ മരപ്പട്ടയ്‌ക്കുള്ളിലൂടെ തുരന്നിറക്കാൻ തുടങ്ങുന്നു.
നിരീക്ഷകർ പിൻവരുന്ന പ്രകാരം പറഞ്ഞിട്ടുണ്ട്‌: “കടന്നലിന്റെ അണ്ഡനിക്ഷേപിണിക്കുഴലിന്റെ അഗ്രം ലാർവയെ സ്‌പർശിക്കുമ്പോൾ, കുഴലിലൂടെ ഒരു മുട്ട തെന്നിയിറങ്ങുന്നു. അതിനെ നാശത്തിനു വിധിക്കപ്പെട്ട ആതിഥേയ ലാർവയുടെ സമീപത്തോ മുകളിലോ ഉറപ്പിച്ചുവെക്കുന്നു.” മുട്ട വിരിയുമ്പോൾ, പുതിയ ലാർവ ആതിഥേയ ലാർവയുടെ കൊഴുപ്പും ശരീര ദ്രവങ്ങളും ഭക്ഷിച്ചു ജീവിക്കുന്നു. തുടർന്ന്‌ അത്‌ പട്ടുനൂൽകൊണ്ട്‌ ഒരു സമാധിക്കൂട്‌ ഉണ്ടാക്കുന്നു. ഈ കൂട്ടിൽ വെച്ചാണ്‌ ലാർവ വളർച്ചെയെത്തിയ കടന്നലായി വികാസം പ്രാപിക്കുന്നത്‌. വളർച്ചപ്രാപിച്ച കടന്നൽ മരപ്പട്ടയ്‌ക്കുള്ളിൽനിന്നു പുറത്തെത്തുമ്പോൾ പ്രാണികളുടെ ഒരു പുതിയ തലമുറയെ ആക്രമിക്കാൻ തയ്യാറായിക്കഴിഞ്ഞിരിക്കും.
നിർദയരായ പരാദജീവികൾ എന്ന്‌ ചിലർ ഇവയെ വർണിച്ചേക്കാം. എന്നാൽ, ഇക്ക്‌ന്യൂമൊണുകൾ ഒരു പ്രധാന ഉദ്ദേശ്യം സാധിക്കുന്നു. ഭക്ഷ്യവിളകൾക്ക്‌ ഭീഷണിയാകുന്ന പ്രാണികളുടെ ലാർവകളെ ഇവയുടെ ലാർവകൾ ഭക്ഷണമാക്കുന്നു. അമേരിക്കൻ മൂട്ടകൾ, പഞ്ഞിപ്പൂച്ചികൾ, ആപ്പിൾപ്പഴങ്ങളെ നശിപ്പിക്കുന്ന കീടങ്ങളെ വഹിക്കുന്ന ഒരുതരം നിശാശലഭം, അസ്‌പാരഗസ്‌ നശിപ്പിക്കുന്ന വണ്ടുകൾ എന്നിവയുടെ ലാർവകൾ ഇത്തരം കടന്നലുകളുടെ പ്രജനനകേന്ദ്രങ്ങളിൽ ഏതാനും ചിലതുമാത്രം. അങ്ങനെ, ഇക്ക്‌ന്യൂമൊണുകൾ കൃഷിനാശം വരുത്തുന്ന കീടങ്ങളുടെ വളർച്ചയെ നിയന്ത്രിക്കുന്നതായി കാണുന്നു.
ഇക്ക്‌ന്യൂമൊണുകളുടെ എണ്ണം വളരെയുണ്ടെങ്കിലും ആളുകൾ അവയെ അപൂർവമായേ കാണാറുള്ളൂ. ഇവ ഇരതേടുന്നതും ഇണചേരുന്നതും മുട്ടയിടുന്നതുമെല്ലാം മനുഷ്യ സാന്നിധ്യം വളരെ വിരളമായ ആവാസവ്യവസ്ഥയിലാണ്‌ എന്നതാണു കാരണം. അങ്ങനെ, മനുഷ്യന്‌ ഇനിയും പൂർണമായി ഗ്രഹിക്കാനായിട്ടില്ലാത്ത ജീവലോകത്തെ വൈവിധ്യങ്ങളുടെയും സന്തുലിതാവസ്ഥയുടെയും മറ്റൊരു ഉദാഹരണമായി ഇക്ക്‌ന്യൂമോണുകൾ നിലകൊള്ളുന്നു. (g03 10/22)
[12-ാം പേജിലെ ചിത്രം]
ഇക്ക്‌ന്യൂമൊൺ കടന്നൽ മുട്ടയിടാൻ തയ്യാറെടുക്കുന്നു
[കടപ്പാട്‌]
Scott Bauer/Agricultural Research Service, USDA