ബൈബി​ളി​ന്റെ വീക്ഷണം

അമിത മദ്യപാ​നം തീർത്തും അനഭി​കാ​മ്യ​മോ?

കുടി​യ​നാ​യി അഭിന​യിച്ച്‌ കാണി​കളെ രസിപ്പി​ക്കുന്ന കഥാപാ​ത്രം വർഷങ്ങ​ളാ​യി അരങ്ങി​ലും വെള്ളി​ത്തി​ര​യി​ലും സ്ഥാനം പിടി​ച്ചി​രി​ക്കു​ന്നു. അത്‌ അഭിനയം മാത്ര​മാ​ണെ​ങ്കി​ലും അത്തരം തമാശ, അമിത​കു​ടി​യോ​ടുള്ള ആളുക​ളു​ടെ പരസ്‌പ​ര​വി​രുദ്ധ മനോ​ഭാ​വ​ങ്ങൾക്ക്‌ ഉത്തമ ഉദാഹ​ര​ണ​മാണ്‌. ഒരു ദൗർബ​ല്യം ആണെങ്കിൽത്ത​ന്നെ​യും അതു​കൊ​ണ്ടു കാര്യ​മായ ദോഷ​മൊ​ന്നു​മില്ല എന്നു കരുതു​ന്ന​വ​രാണ്‌ അനേക​രും.

എന്നാൽ യാഥാർഥ്യ​ങ്ങ​ളു​ടെ ലോക​ത്തി​ലേക്കു വരു​മ്പോൾ ഇതിൽ രസാവ​ഹ​മാ​യി യാതൊ​ന്നു​മില്ല എന്നു മനസ്സി​ലാ​കു​ന്നു. ലോക​മെ​മ്പാ​ടും ആരോ​ഗ്യ​ത്തി​നു ഭീഷണി ഉയർത്തുന്ന ഏറ്റവും വലിയ ഘടകങ്ങ​ളിൽ ഒന്നായാണ്‌ ലോകാ​രോ​ഗ്യ സംഘടന മദ്യത്തി​ന്റെ ദുരു​പ​യോ​ഗത്തെ കണക്കാ​ക്കു​ന്നത്‌. പുകയില കഴിഞ്ഞാൽ ഏറ്റവു​മ​ധി​കം രോഗ​ങ്ങൾക്കും മരണത്തി​നും കാരണ​മാ​കുന്ന ആസക്തി​ജന്യ വസ്‌തു മദ്യമാ​ണെന്നു പറയ​പ്പെ​ടു​ന്നു. കൂടാതെ, അമേരി​ക്ക​യിൽ മാത്രം ഓരോ വർഷവും 18,400 കോടി​യി​ല​ധി​കം ഡോള​റാണ്‌ ആ വഴിക്ക്‌ നഷ്ടമാ​കു​ന്നത്‌.

വസ്‌തു​ത​കൾ ഇങ്ങനെ​യൊ​ക്കെ ആയിരു​ന്നി​ട്ടും പലരും അമിത മദ്യപാ​ന​ത്തി​ന്റെ ഗൗരവം കുറച്ചു​കാ​ട്ടു​ന്ന​തിൽ തുടരു​ന്നു. ദീർഘ​കാല അടിസ്ഥാ​ന​ത്തി​ലുള്ള ദുരു​പ​യോ​ഗ​ത്തി​ന്റെ ദുഷ്‌ഫ​ലങ്ങൾ അവർ അംഗീ​ക​രി​ച്ചേ​ക്കാം എങ്കിലും വല്ലപ്പോ​ഴും കാര്യ​മാ​യി കഴിക്കു​ന്ന​തിൽ കുഴപ്പ​മൊ​ന്നു​മില്ല എന്നാണ്‌ അവരുടെ നിലപാട്‌. ലോക​ത്തി​ന്റെ ചില ഭാഗങ്ങ​ളിൽ യുവജ​ന​ങ്ങളെ സംബന്ധി​ച്ചി​ട​ത്തോ​ളം മദ്യല​ഹരി നുണയു​ന്നത്‌ തങ്ങൾ മുതിർന്നി​രി​ക്കു​ന്നു എന്നതിന്റെ തെളിവു നൽകലാണ്‌. ആരോഗ്യ സംഘട​നകൾ ഗൗരവ​ത​ര​മായ മുന്നറി​യി​പ്പു​കൾ മുഴക്കു​ന്നു​ണ്ടെ​ങ്കി​ലും ഒറ്റയടിക്ക്‌ അഞ്ചോ അതില​ധി​ക​മോ പെഗ്ഗ്‌ അകത്താ​ക്കുന്ന പ്രവണത എല്ലാ പ്രായ​ക്കാ​രു​ടെ​യും ഇടയിൽ വർധി​ച്ചു​വ​രി​ക​യാണ്‌. അതു​കൊണ്ട്‌ സ്വാഭാ​വി​ക​മാ​യും പല വ്യക്തി​ക​ളും അമിത മദ്യപാ​ന​ത്തിൽ അത്രയ്‌ക്കു കുഴപ്പ​മു​ണ്ടോ എന്നു സംശയി​ക്കു​ന്നു. ബൈബി​ളിന്‌ എന്താണു പറയാ​നു​ള്ളത്‌?

വീഞ്ഞും മദ്യവും—ദൈവ​ത്തിൽ നിന്നുള്ള ദാനങ്ങൾ

വീഞ്ഞി​നെ​യും മദ്യ​ത്തെ​യും കുറി​ച്ചുള്ള ധാരാളം പരാമർശങ്ങൾ ബൈബി​ളി​ലുണ്ട്‌. ശലോ​മോൻ രാജാവ്‌ ഇങ്ങനെ എഴുതി: “നീ ചെന്നു സന്തോ​ഷ​ത്തോ​ടു​കൂ​ടെ അപ്പം തിന്നുക; ആനന്ദഹൃ​ദ​യ​ത്തോ​ടെ വീഞ്ഞു കുടിക്ക; ദൈവം നിന്റെ പ്രവൃ​ത്തി​ക​ളിൽ പ്രസാ​ദി​ച്ചി​രി​ക്കു​ന്നു​വ​ല്ലോ.” (സഭാ​പ്ര​സം​ഗി 9:7) ‘മനുഷ്യ​ന്റെ ഹൃദയത്തെ സന്തോ​ഷി​പ്പി​ക്കുന്ന വീഞ്ഞ്‌’ പ്രദാനം ചെയ്യു​ന്നത്‌ യഹോ​വ​യാം ദൈവ​മാ​ണെന്ന്‌ സങ്കീർത്ത​ന​ക്കാ​രൻ തിരി​ച്ച​റി​ഞ്ഞു. (സങ്കീർത്തനം 104:14, 15) മനുഷ്യ​വർഗ​ത്തി​നുള്ള യഹോ​വ​യു​ടെ അനു​ഗ്ര​ഹ​ങ്ങ​ളിൽ വീഞ്ഞും ഉൾപ്പെ​ട്ടി​രി​ക്കു​ന്നു എന്നതു വ്യക്തം.

വീഞ്ഞ്‌ ഉപയോ​ഗി​ക്കു​ന്നത്‌ യേശു​വി​നും സ്വീകാ​ര്യ​മാ​യി​രു​ന്നു. അവന്റെ ആദ്യത്തെ അത്ഭുത​പ്ര​വർത്ത​നം​തന്നെ ഒരു വിവാഹ വിരു​ന്നിൽവെച്ച്‌ വെള്ളം ഗുണ​മേ​ന്മ​യുള്ള വീഞ്ഞാക്കി മാറ്റി​യ​താ​യി​രു​ന്നു. (യോഹ​ന്നാൻ 2:3-10) അതു​പോ​ലെ, കർത്താ​വി​ന്റെ സന്ധ്യാ​ഭ​ക്ഷണം ഏർപ്പെ​ടു​ത്തി​യ​പ്പോൾ തന്റെ രക്തത്തെ ഉചിത​മാ​യി പ്രതീ​ക​പ്പെ​ടു​ത്തുന്ന ചിഹ്നമാ​യി യേശു വീഞ്ഞാണ്‌ ഉപയോ​ഗി​ച്ചത്‌. (മത്തായി 26:27-29) വീഞ്ഞിന്റെ ഔഷധ​മൂ​ല്യ​ത്തെ കുറി​ച്ചും ബൈബിൾ പരാമർശി​ക്കു​ന്നുണ്ട്‌. ദൃഷ്ടാ​ന്ത​ത്തിന്‌ തിമൊ​ഥെ​യൊ​സി​നോട്‌ അവന്റെ “അജീർണ്ണത [‘ഉദരാ​സ്വാ​സ്ഥ്യം,’ ന്യൂ ഇൻഡ്യ ബൈബിൾ ഭാഷാ​ന്തരം]” നിമിത്തം അൽപ്പം വീഞ്ഞ്‌ ഉപയോ​ഗി​ച്ചു​കൊ​ള്ളാൻ അപ്പൊ​സ്‌ത​ല​നായ പൗലൊസ്‌ ശുപാർശ ചെയ്‌തു.—1 തിമൊ​ഥെ​യൊസ്‌ 5:23; ലൂക്കൊസ്‌ 10:34.

ഔചി​ത്യ​ത്തി​ന്റെ താക്കോൽ—മിതത്വം

പൗലൊസ്‌ ശുപാർശ ചെയ്‌തത്‌ ‘അല്‌പം വീഞ്ഞ്‌’ മാത്ര​മാ​യി​രു​ന്നു എന്നത്‌ കുറി​ക്കൊ​ള്ളുക. ലഹരി​പാ​നീ​യ​ങ്ങ​ളു​ടെ അമിത ഉപയോ​ഗത്തെ ബൈബിൾ വ്യക്തമാ​യും കുറ്റം​വി​ധി​ക്കു​ന്നു. യഹൂദ പുരോ​ഹി​ത​ന്മാർക്ക്‌ തങ്ങളുടെ ശുശ്രൂ​ഷ​യിൽ ഏർപ്പെ​ടാത്ത സമയത്ത്‌ മിതമാ​യി മദ്യം ഉപയോ​ഗി​ക്കാ​മാ​യി​രു​ന്നു. എന്നാൽ, നിയമ​നങ്ങൾ നിർവ​ഹി​ക്കു​മ്പോൾ അവർ യാതൊ​രു ലഹരി​പാ​നീ​യ​വും ഉപയോ​ഗി​ക്കാൻ പാടി​ല്ലെന്നു നിഷ്‌കർഷി​ക്ക​പ്പെ​ട്ടി​രു​ന്നു. (ലേവ്യ​പു​സ്‌തകം 10:8-11) അനേക വർഷങ്ങൾക്കു ശേഷം ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​കൾക്ക്‌ ഈ മുന്നറി​യി​പ്പു നൽക​പ്പെട്ടു: മദ്യപ​ന്മാർ “ദൈവ​രാ​ജ്യം അവകാ​ശ​മാ​ക്കു​ക​യില്ല.”—1 കൊരി​ന്ത്യർ 6:9, 10.

കൂടു​ത​ലാ​യി, തിമൊ​ഥെ​യൊ​സിന്‌ നിർദേ​ശങ്ങൾ നൽകവേ സഭയിൽ ഉത്തരവാ​ദി​ത്വ​ങ്ങൾ വഹിക്കു​ന്നവർ ‘മദ്യ​പ്രി​യ​രോ’ “ധാരാളം വീഞ്ഞു കുടി​ക്കു​ന്ന​വ​രോ” (NW) ആയിരി​ക്ക​രു​തെന്ന്‌ പൗലൊസ്‌ പറഞ്ഞു.a (1 തിമൊ​ഥെ​യൊസ്‌ 3:3, 8) വാസ്‌ത​വ​ത്തിൽ, അനുതാ​പ​മി​ല്ലാത്ത കുടി​യ​ന്മാ​രെ ക്രിസ്‌തീയ സഭയിൽനി​ന്നു പുറത്താ​ക്കാ​നാണ്‌ ബൈബിൾ അനുശാ​സി​ക്കു​ന്നത്‌. (1 കൊരി​ന്ത്യർ 5:11-13) ഉചിത​മാ​യി​ത്തന്നെ, “വീഞ്ഞു പരിഹാ​സി”യാണെന്നു തിരു​വെ​ഴു​ത്തു​കൾ പ്രസ്‌താ​വി​ക്കു​ന്നു. (സദൃശ​വാ​ക്യ​ങ്ങൾ 20:1) മദ്യത്തി​ന്റെ അമിത ഉപയോ​ഗം ഒരുവന്റെ ആത്മനി​യ​ന്ത്ര​ണത്തെ ദുർബ​ല​പ്പെ​ടു​ത്തു​ക​യും തീരു​മാ​ന​ശേ​ഷി​യെ വികല​മാ​ക്കു​ക​യും ചെയ്യുന്നു.

ദൈവ​വ​ചനം അമിത മദ്യപാ​നത്തെ കുറ്റം​വി​ധി​ക്കു​ന്ന​തി​ന്റെ കാരണം

നാം എന്തെങ്കി​ലും ദുരു​പ​യോ​ഗം ചെയ്യു​മ്പോൾ അത്‌ നമ്മു​ടെ​യും മറ്റുള്ള​വ​രു​ടെ​യും ദോഷ​ത്തി​ലേ കലാശി​ക്കൂ എന്ന്‌ ‘ശുഭക​ര​മാ​യി പ്രവർത്തി​പ്പാൻ നമ്മെ അഭ്യസി​പ്പി​ക്കുന്ന’ യഹോ​വ​യ്‌ക്ക്‌ അറിയാം. (യെശയ്യാ​വു 48:17, 18) ലഹരി​പാ​നീ​യ​ങ്ങ​ളു​ടെ കാര്യ​ത്തി​ലും ഇതു സത്യമാണ്‌. ദൈവ​വ​ചനം ഇപ്രകാ​രം ചോദി​ക്കു​ന്നു: “ആർക്കു കഷ്ടം, ആർക്കു സങ്കടം, ആർക്കു കലഹം? ആർക്കു ആവലാതി, ആർക്കു അനാവ​ശ്യ​മായ മുറി​വു​കൾ, ആർക്കു കൺചു​വപ്പ്‌?” അത്‌ ഉത്തരം നൽകുന്നു: “വീഞ്ഞു കുടി​ച്ചു​കൊ​ണ്ടു നേരം വൈകി​ക്കു​ന്ന​വർക്കും മദ്യം രുചി​നോ​ക്കു​വാൻ പോകു​ന്ന​വർക്കും തന്നേ.”—സദൃശ​വാ​ക്യ​ങ്ങൾ 23:29, 30.

മദ്യല​ഹ​രി​യിൽ ആളുകൾ ചിന്താ​ര​ഹി​ത​വും അപകട​ക​ര​വു​മായ നിരവധി കാര്യങ്ങൾ ചെയ്‌തു​കൂ​ട്ടു​ന്നു: മദ്യല​ഹ​രി​യിൽ വാഹന​മോ​ടിച്ച്‌ തനിക്കു തന്നെയും മറ്റുള്ള​വർക്കും അപകട സാധ്യത സൃഷ്ടി​ക്കുക, മറ്റൊ​രു​വന്റെ ഇണയോട്‌ അതിരു​ക​വിഞ്ഞ അടുപ്പം കാണി​ച്ചു​കൊണ്ട്‌ ബന്ധങ്ങൾ താറു​മാ​റാ​ക്കുക, വിവേ​ക​ശൂ​ന്യ​മാ​യോ അപമര്യാ​ദ​യാ​യോ സംസാ​രി​ക്കു​ക​യും പെരു​മാ​റു​ക​യും ചെയ്യുക എന്നിങ്ങനെ പലതും. (സദൃശ​വാ​ക്യ​ങ്ങൾ 23:33) സമകാ​ലിക ലോകത്ത്‌ പടർന്നു പിടി​ച്ചി​രി​ക്കുന്ന ഏറ്റവും ഹാനി​ക​ര​മായ സാമൂ​ഹിക തിന്മക​ളിൽ ഒന്നായി മദ്യദു​രു​പ​യോ​ഗത്തെ വിശേ​ഷി​പ്പി​ച്ചി​രി​ക്കു​ന്നത്‌ തികച്ചും ഉചിത​മാണ്‌. ദൈവം ഇങ്ങനെ ആഹ്വാനം ചെയ്യു​ന്ന​തിൽ അത്ഭുത​മില്ല: “നീ ധാരാളം വീഞ്ഞു കുടി​ക്കു​ന്ന​വ​രു​ടെ കൂട്ടത്തിൽ ഇരിക്ക​രുത്‌.”—സദൃശ​വാ​ക്യ​ങ്ങൾ 23:20, NW.

ഗലാത്യർ 5:19-21-ൽ, (NW) ദൈവാ​ത്മാ​വി​ന്റെ ഫലത്തിനു വിപരീ​ത​മാ​യി അമിത മദ്യപാ​ന​വും വെറി​ക്കൂ​ത്തും “ജഡത്തിന്റെ പ്രവൃ​ത്തി​കളി”ലാണ്‌ പൗലൊസ്‌ പട്ടിക​പ്പെ​ടു​ത്തു​ന്നത്‌. അമിത മദ്യപാ​നം ഒരുവനു ദൈവ​വു​മാ​യുള്ള ബന്ധത്തിനു ഹാനി വരുത്തും. തന്നിമി​ത്തം, ക്രിസ്‌ത്യാ​നി​കൾ നിശ്ചയ​മാ​യും ലഹരി​പാ​നീ​യ​ങ്ങ​ളു​ടെ അമിത ഉപയോ​ഗം ഒഴിവാ​ക്കേ​ണ്ട​താണ്‌. (g04 3/8)

[അടിക്കു​റിപ്പ്‌]