ടയറുകൾ നിങ്ങളു​ടെ ജീവൻ അവയെ ആശ്രയി​ച്ചി​രു​ന്നേ​ക്കാം!

ഉരുക്കും സ്‌ഫടി​ക​വും കൊണ്ടു നിർമിച്ച ഒരു ചട്ടക്കൂ​ടി​നു​ള്ളിൽ ആസിഡും എളുപ്പം തീപി​ടി​ക്കുന്ന തരം ദ്രാവ​ക​ങ്ങ​ളും നിറച്ച പാത്ര​ങ്ങൾക്കു സമീപം ബന്ധിക്ക​പ്പെട്ട നിലയിൽ ഇരിക്കു​ക​യാണ്‌ നിങ്ങൾ എന്നു സങ്കൽപ്പി​ക്കുക. ഈ അപായ​ക​ര​മായ യന്ത്രം നിലത്തു​നിന്ന്‌ ഏതാനും സെന്റി​മീ​റ്റർ ഉയർത്തി ഒരു സെക്കൻഡിൽ 30 മീറ്റർ വേഗത്തിൽ മുന്നോ​ട്ടു ചലിപ്പി​ക്കുക. സമാന​മായ മറ്റു യന്ത്രങ്ങൾ ഇരുദി​ശ​യി​ലേ​ക്കും ചാട്ടു​ളി​പോ​ലെ പായു​ന്നു​മുണ്ട്‌!

ഒരു വാഹന​ത്തി​നു​ള്ളിൽ കയറി അത്‌ ഓടിച്ചു പോകുന്ന ഓരോ അവസര​ത്തി​ലും അതാണ്‌ വാസ്‌ത​വ​ത്തിൽ നിങ്ങൾ ചെയ്യു​ന്നത്‌. വാഹനം ഓടി​ക്കു​മ്പോൾ നിയ​ന്ത്രണം നിലനി​റു​ത്താ​നും സുരക്ഷി​ത​ത്വം തോന്നാ​നും നിങ്ങളെ സഹായി​ക്കു​ന്നത്‌ എന്താണ്‌? ഒരു വലിയ അളവോ​ളം ടയറു​ക​ളാണ്‌ ആ ധർമം നിർവ​ഹി​ക്കു​ന്നത്‌.

ടയറുകൾ ചെയ്യു​ന്നത്‌

ടയറുകൾ പ്രധാ​ന​പ്പെട്ട പല ഉദ്ദേശ്യ​ങ്ങ​ളും നിറ​വേ​റ്റു​ന്നുണ്ട്‌. അവ നിങ്ങളു​ടെ വാഹന​ത്തി​ന്റെ ഭാരം താങ്ങുക മാത്രമല്ല, നിരപ്പ​ല്ലാത്ത റോഡി​ലൂ​ടെ ഓടു​മ്പോ​ഴും ബമ്പിൽ കയറു​ക​യോ കുഴി​യിൽ ചാടു​ക​യോ ഒക്കെ ചെയ്യു​മ്പോ​ഴും ഉണ്ടാകുന്ന ആഘാതം കുറയ്‌ക്കു​ക​യും ചെയ്യുന്നു. ഏറെ പ്രധാ​ന​മാ​യി റോഡിൽ നല്ല പിടിത്തം (ഘർഷണം) ഉണ്ടായി​രി​ക്കാൻ ഇതു സഹായി​ക്കു​ന്നു. വ്യത്യസ്‌ത തരം റോഡു​ക​ളിൽ വേഗം കൂട്ടു​ക​യും വണ്ടി തിരി​ക്കു​ക​യും ബ്രേക്കി​ടു​ക​യു​മൊ​ക്കെ ചെയ്യു​മ്പോൾ വാഹനം പാളി​പ്പോ​കാ​തി​രി​ക്കാൻ ഇത്‌ അനിവാ​ര്യ​മാണ്‌. എന്നിരു​ന്നാ​ലും ടയറിന്റെ വളരെ ചെറിയ ഒരു ഭാഗം, അതായത്‌ ഏകദേശം ഒരു പോസ്റ്റ്‌കാർഡി​നോ​ളം വലുപ്പ​മുള്ള ഭാഗം മാത്രമേ ഏതെങ്കി​ലും ഒരു സമയത്ത്‌ റോഡു​മാ​യി സമ്പർക്ക​ത്തിൽ വരുന്നു​ള്ളൂ.

ടയറുകൾ എത്ര പ്രധാ​ന​മാണ്‌ എന്നതു പരിഗ​ണി​ക്കു​മ്പോൾ, അവ സുരക്ഷി​ത​മാ​യും കാര്യ​ക്ഷ​മ​മാ​യും ഉപയോ​ഗി​ക്കത്തക്ക വിധം സൂക്ഷി​ക്കാൻ നിങ്ങൾക്ക്‌ എന്തു ചെയ്യാൻ കഴിയും? നിങ്ങളു​ടെ വാഹന​ങ്ങൾക്ക്‌ കൃത്യ​മാ​യി ചേരുന്ന ടയറുകൾ എങ്ങനെ തിര​ഞ്ഞെ​ടു​ക്കാ​നാ​കും? ഈ ചോദ്യ​ങ്ങൾക്ക്‌ ഉത്തരം നൽകു​ന്ന​തി​നു മുമ്പ്‌ ടയറു​ക​ളു​ടെ ചരി​ത്ര​ത്തി​ലേക്ക്‌ നമു​ക്കൊ​ന്നു കണ്ണോ​ടി​ക്കാം.

റബ്ബർ ഉപയോ​ഗ​ത്തി​ലെ അഗ്രഗാ​മി​കൾ

വണ്ടിച്ച​ക്രങ്ങൾ ആയിര​ക്ക​ണ​ക്കി​നു വർഷങ്ങ​ളാ​യി ഉപയോ​ഗ​ത്തിൽ ഉണ്ടെങ്കി​ലും തടിയോ ഉരുക്കോ കൊണ്ടു നിർമിച്ച ചക്രത്തി​ന്റെ റിമ്മി​നു​മീ​തെ റബ്ബർ ചുറ്റുക എന്നത്‌ താരത​മ്യേന പുതിയ ഒരു സംഗതി​യാണ്‌. 1800-കളുടെ ആദ്യപാ​ദ​ത്തി​ലാ​യി​രു​ന്നു ഇതിന്റെ തുടക്കം. ഇതിന്‌ സ്വാഭാ​വിക റബ്ബറാണ്‌ ഉപയോ​ഗി​ച്ചി​രു​ന്നത്‌. എന്നാൽ അതു പെട്ടെ​ന്നു​തന്നെ തേഞ്ഞു​പോ​കു​മാ​യി​രു​ന്നു. അതു​കൊണ്ട്‌ അവയുടെ ഭാവി അത്ര ശോഭ​ന​മാ​യി കാണ​പ്പെ​ട്ടില്ല. എന്നാൽ ഐക്യ​നാ​ടു​ക​ളി​ലെ കണെറ്റി​ക്ക​ട്ടിൽ നിന്നുള്ള ചാൾസ്‌ ഗുഡ്‌ഇയർ എന്ന ദൃഢചി​ത്ത​നായ ഒരു വ്യക്തി​യു​ടെ കണ്ടുപി​ടി​ത്തം ഈ സ്ഥിതി​വി​ശേഷം മാറ്റി​മ​റി​ച്ചു. ഉയർന്ന മർദത്തിൽ റബ്ബറിനെ ഗന്ധകം ചേർത്ത്‌ ചൂടാ​ക്കുന്ന വൾക്ക​നൈ​സേഷൻ എന്ന പ്രക്രിയ 1839-ൽ ഗുഡ്‌ഇയർ ആവിഷ്‌ക​രി​ച്ചു. ഈ പ്രക്രിയ റബ്ബറിനെ ആവശ്യ​മായ വിധത്തിൽ രൂപ​പ്പെ​ടു​ത്തി​യെ​ടു​ക്കുക എളുപ്പ​മാ​ക്കി​ത്തീർത്തു, കൂടാതെ തേയ്‌മാ​നം സംഭവി​ക്കാ​നുള്ള സാധ്യത കുറയ്‌ക്കാ​നും ഇതുമൂ​ലം സാധിച്ചു. കട്ടിയുള്ള റബ്ബർ ടയറുകൾ കൂടുതൽ പ്രചാരം നേടി. പക്ഷേ, അവ ഉപയോ​ഗി​ച്ചുള്ള യാത്ര അത്ര സുഖക​ര​മാ​യി​രു​ന്നില്ല.

1845-ൽ സ്‌കോ​ട്ടിഷ്‌ എൻജി​നീ​യ​റായ റോബർട്ട്‌ ഡബ്ലിയു. തോംസൺ വായു നിറച്ച ആദ്യത്തെ (ന്യൂമാ​റ്റിക്‌) ടയറു​കൾക്കുള്ള പേറ്റന്റ്‌ (നിർമാ​ണാ​വ​കാ​ശം) നേടി​യെ​ങ്കി​ലും സ്‌കോ​ട്ട്‌ലൻഡിൽനി​ന്നു തന്നെയുള്ള ജോൺ ബോയിഡ്‌ ഡൺലപ്‌ തന്റെ മകന്റെ സൈക്കി​ളി​ന്റെ സഞ്ചാര​സു​ഖം മെച്ച​പ്പെ​ടു​ത്തു​ന്ന​തിന്‌ ഇറങ്ങി​ത്തി​രി​ക്കു​ന്ന​തു​വരെ അവ വ്യാവ​സാ​യിക വിജയം നേടി​യി​രു​ന്നില്ല. ഡൺലപ്‌ 1888-ൽ തന്റെ പുതിയ ടയറിനു നിർമാ​ണാ​വ​കാ​ശം നേടു​ക​യും സ്വന്തം കമ്പനി സ്ഥാപി​ക്കു​ക​യും ചെയ്‌തു. എന്നാൽ ടയറു​ക​ളു​ടെ വികസ​ന​പാ​ത​യിൽ ഇനിയും ഏറെ കടമ്പകൾ കടക്കാ​നു​ണ്ടാ​യി​രു​ന്നു.

1891-ൽ ഒരു ദിവസം ഫ്രാൻസി​ലെ ഒരു സൈക്കിൾ യാത്ര​ക്കാ​രന്റെ ടയറിന്റെ കാറ്റു​പോ​യി. എന്നാൽ ടയർ ചക്രത്തിൽനിന്ന്‌ ഊരി​യെ​ടു​ക്കാൻ കഴിയാ​ത്ത​വി​ധം ഘടിപ്പി​ച്ചി​രു​ന്ന​തി​നാൽ അതു നന്നാക്കാൻ അദ്ദേഹ​ത്തി​നു കഴിഞ്ഞില്ല. അദ്ദേഹം, വൾക്ക​നൈസ്‌ ചെയ്‌ത റബ്ബർ കൊണ്ടുള്ള ജോലി​ക​ളിൽ പ്രാവീ​ണ്യം നേടി​യി​രുന്ന സ്വന്തം നാട്ടു​കാ​ര​നായ ഏഡ്വാർ മിഷലി​ന്റെ സഹായം തേടി. ആ ടയർ നന്നാക്കാൻ മിഷലിൻ ഒമ്പതു മണിക്കൂർ എടുത്തു. ആ അനുഭവം, എളുപ്പ​ത്തിൽ നന്നാക്കാൻ കഴിയും​വി​ധം ചക്രത്തിൽനിന്ന്‌ ഊരി മാറ്റാ​വുന്ന തരത്തി​ലുള്ള ന്യൂമാ​റ്റിക്‌ ടയർ നിർമി​ക്കാൻ മിഷലി​നു പ്രചോ​ദ​ന​മാ​യി.

മിഷലി​ന്റെ ടയർ ഒരു വൻ വിജയ​മാ​യി​രു​ന്നു. പിറ്റേ വർഷം ആയപ്പോ​ഴേ​ക്കും 10,000 സൈക്കിൾയാ​ത്ര​ക്കാർ തങ്ങളുടെ സൈക്കി​ളു​ക​ളിൽ ഈ ടയർ ഉപയോ​ഗി​ച്ചു​തു​ട​ങ്ങി​യി​രു​ന്നു. അധികം​താ​മ​സി​യാ​തെ പാരീ​സിൽ കുതി​ര​വ​ണ്ടി​ക​ളിൽ ന്യൂമാ​റ്റിക്‌ ടയറുകൾ ഘടിപ്പി​ച്ചു തുടങ്ങി. യാത്ര​ക്കാർ ഈ മാറ്റത്തെ ഇരു​കൈ​യും നീട്ടി സ്വീക​രി​ച്ചു. 1895-ൽ ഏഡ്വാ​റും സഹോ​ദ​ര​നായ ആന്ദ്രേ​യും ന്യൂമാ​റ്റിക്‌ ടയറുകൾ മോ​ട്ടോർ വാഹന​ങ്ങ​ളി​ലും ഉപയോ​ഗി​ക്കാം എന്നു കാണി​ക്കു​ന്ന​തി​നു വേണ്ടി മത്സര​യോ​ട്ട​ത്തിൽ പങ്കെടുത്ത ഒരു കാറിൽ അവ ഘടിപ്പി​ച്ചു. കാർ അവസാ​ന​മാണ്‌ എത്തിയ​തെ​ങ്കി​ലും ഈ അസാധാ​രണ ടയറുകൾ കണ്ട്‌ കാണികൾ അത്ഭുതം​കൂ​റി. മിഷലിൻ സഹോ​ദ​ര​ന്മാർ അതിനു​ള്ളിൽ എന്താണ്‌ ഒളിപ്പി​ച്ചി​രി​ക്കു​ന്നത്‌ എന്ന്‌ അറിയാൻ അവർ അതു മുറിച്ചു നോക്കാൻ പോലും ശ്രമിച്ചു!

1930-40 കാലഘ​ട്ട​ത്തിൽ എളുപ്പം നശിച്ചു​പോ​കുന്ന പരുത്തി, സ്വാഭാ​വിക റബ്ബർ തുടങ്ങിയ വസ്‌തു​ക്കൾക്കു പകരം റയോൺ, നൈ​ലോൺ, പോളി​യെസ്റ്റർ തുടങ്ങിയ ഈടു​നിൽക്കുന്ന പദാർഥങ്ങൾ രംഗ​ത്തെത്തി. രണ്ടാം ലോക​മ​ഹാ​യു​ദ്ധ​ത്തി​നു മുമ്പ്‌, ഒരു ട്യൂബ്‌ ഉപയോ​ഗി​ച്ചാണ്‌ ടയറി​നു​ള്ളിൽ വായു നിലനി​റു​ത്തി​യി​രു​ന്നത്‌. എന്നാൽ പിൽക്കാ​ലത്ത്‌ ട്യൂബ്‌ ഇല്ലാ​തെ​തന്നെ വായു പുറത്തു പോകാത്ത വിധം ഒരു സീൽ നിർമി​ക്കാ​നുള്ള പ്രവർത്തനം ആരംഭി​ച്ചു. പിന്നീട്‌ അവ കൂടു​ത​ലാ​യി മെച്ച​പ്പെ​ടു​ത്തി.

ഇന്ന്‌ ടയർ നിർമാ​ണ​ത്തിൽ 200-ലധികം അസംസ്‌കൃത വസ്‌തു​ക്കൾ ഉപയോ​ഗി​ക്കു​ന്നു. ആധുനിക സാങ്കേ​തി​ക​വി​ദ്യ​യു​ടെ സഹായ​ത്തോ​ടെ നിർമി​ക്കുന്ന ചില ടയറുകൾ 1,30,000 കിലോ​മീ​റ്റ​റോ അതിൽ കൂടു​ത​ലോ ഓടി​ക്കാം. മത്സര​യോട്ട കാറു​ക​ളിൽ ഉപയോ​ഗി​ക്കുന്ന ഇനം ടയറിന്‌ മണിക്കൂ​റിൽ നൂറു​ക​ണ​ക്കിന്‌ കിലോ​മീ​റ്റർ വേഗം താങ്ങാൻ കഴിയു​ന്നു. ഇക്കാല​മ​ത്ര​യും ടയറു​ക​ളു​ടെ വില കുറഞ്ഞു​കൊ​ണ്ടി​രി​ക്കു​ക​യും ഇപ്പോൾ സാധാരണ ഉപഭോ​ക്താ​വിന്‌ താങ്ങാൻ കഴിയുന്ന അവസ്ഥയിൽ എത്തി​ച്ചേ​രു​ക​യും ചെയ്‌തി​രി​ക്കു​ന്നു.

ടയറുകൾ തിര​ഞ്ഞെ​ടു​ക്കൽ

നിങ്ങൾക്ക്‌ ഒരു മോ​ട്ടോർ വാഹനം ഉണ്ടെങ്കിൽ പുതിയ ടയറുകൾ തിര​ഞ്ഞെ​ടു​ക്കു​ക​യെന്ന വെല്ലു​വി​ളി നിങ്ങൾ അഭിമു​ഖീ​ക​രി​ക്കാ​നുള്ള സാധ്യ​ത​യുണ്ട്‌. ടയറുകൾ മാറ്റേണ്ട സമയമാ​യെന്ന്‌ എങ്ങനെ​യാണ്‌ നിങ്ങൾ മനസ്സി​ലാ​ക്കു​ന്നത്‌? തേയ്‌മാ​ന​മോ കേടു​പാ​ടു​ക​ളോ സംഭവി​ച്ചി​ട്ടു​ണ്ടോ എന്ന്‌ ക്രമമാ​യി പരി​ശോ​ധി​ക്കു​ന്ന​തി​നാൽ.a ടയർ ഉത്‌പാ​ദകർ, ടയറിന്റെ കാലാ​വധി തീർന്നു എന്നു സൂചി​പ്പി​ക്കുന്ന അന്തർനിർമിത തേയ്‌മാന സൂചകങ്ങൾ (വെയർ ബാറുകൾ) നൽകുന്നു. ട്രെഡി​ന്റെ (കട്ട) അടിയിൽ കുറു​കെ​യുള്ള റബ്ബർ പട്ടകളാ​യാണ്‌ അവ കാണ​പ്പെ​ടു​ന്നത്‌. ട്രെഡ്‌ എവി​ടെ​യെ​ങ്കി​ലും വിട്ടി​രി​പ്പു​ണ്ടോ, വയറു​ക​ളോ സൈഡ്‌വാ​ളോ എവി​ടെ​യെ​ങ്കി​ലും ഉന്തിനിൽപ്പു​ണ്ടോ, മറ്റ്‌ ക്രമ​ക്കേ​ടു​കൾ എന്തെങ്കി​ലും ഉണ്ടോ എന്നൊക്കെ പരി​ശോ​ധി​ക്കു​ന്നത്‌ നന്നായി​രി​ക്കും. എന്തെങ്കി​ലും കുഴപ്പം ഉള്ളതായി കണ്ടെത്തു​ന്നെ​ങ്കിൽ ടയർ നന്നാക്കു​ക​യോ മാറ്റി​യി​ടു​ക​യോ ചെയ്യാതെ വാഹനം ഓടി​ക്ക​രുത്‌. പുതിയ ടയറു​കൾക്കാ​ണു കേടു​പാ​ടു കണ്ടെത്തു​ന്ന​തെ​ങ്കിൽ, വാറന്റി​യുള്ള പക്ഷം, ചില്ലറ വിൽപ്പ​ന​ക്കാ​രൻ മുഴുവൻ വില ഈടാ​ക്കാ​തെ​തന്നെ പുതി​യൊ​രു ടയർ തന്നേക്കാം.

ടയർ മാറ്റി​യി​ടു​മ്പോൾ ജോഡി​ക​ളാ​യി അതായത്‌ ഒരേ ആക്‌സി​ലി​ലെ അഥവാ അച്ചുത​ണ്ടി​ലെ രണ്ടെണ്ണ​വും ഒരുമി​ച്ചു മാറ്റു​ന്ന​താണ്‌ ഏറ്റവും നല്ലത്‌. ഒരു ടയർ മാത്രമേ പുതി​യത്‌ ഇടുന്നു​ള്ളു​വെ​ങ്കിൽ, ബ്രേക്കു ചെയ്യു​മ്പോൾ രണ്ടു വശത്തെ​യും ടയറു​ക​ളു​ടെ ഘർഷണ​ത്തി​ന്റെ അളവ്‌ ഏതാണ്ട്‌ ഒരു​പോ​ലെ ആയിരി​ക്കു​ന്ന​തിന്‌ കൂടുതൽ ട്രെഡ്‌ ഉള്ള ടയർ പുതിയ ടയറിന്റെ അതേ ആക്‌സി​ലിൽ ഇടുക.

വ്യത്യസ്‌ത തരത്തി​ലും, വലുപ്പ​ത്തി​ലും, മോഡ​ലു​ക​ളി​ലും ഉള്ള ടയറുകൾ തിര​ഞ്ഞെ​ടു​ക്കു​ന്നത്‌ കുഴപ്പി​ക്കുന്ന ഒരു സംഗതി തന്നെയാ​യി​രി​ക്കാം. എന്നാൽ ചില പ്രധാ​ന​പ്പെട്ട കാര്യ​ങ്ങൾക്കു ശ്രദ്ധ നൽകു​ന്നത്‌ നിങ്ങളു​ടെ ജോലി കൂടുതൽ എളുപ്പ​മാ​ക്കും. നിങ്ങളു​ടെ വാഹന​ത്തി​നു ശുപാർശ ചെയ്യ​പ്പെ​ട്ടി​രി​ക്കുന്ന ടയറി​ന്റെ​യും ചക്രത്തി​ന്റെ​യും വലുപ്പം, വാഹന​ത്തി​ന്റെ ബോഡി​യു​ടെ അടിവ​ശ​വും റോഡും തമ്മിൽ ഉണ്ടായി​രി​ക്കേണ്ട ഇടദൂരം (ground clearance), വാഹനം വഹിക്കാൻ പ്രതീ​ക്ഷി​ക്കുന്ന പരമാ​വധി ഭാരം എന്നിവ സംബന്ധിച്ച നിർമാ​താ​വി​ന്റെ നിർദേ​ശങ്ങൾ ആദ്യം പരി​ശോ​ധി​ക്കുക. നിങ്ങളു​ടെ വാഹന​ത്തി​ന്റെ രൂപകൽപ്പ​ന​യും കണക്കി​ലെ​ടു​ക്കു​ന്നതു പ്രധാ​ന​മാണ്‌. ആന്റി​ലോക്ക്‌ ബ്രേക്ക്‌ സംവി​ധാ​നം, ഘർഷണ നിയ​ന്ത്രണം, ഓൾ വീൽ ഡ്രൈവ്‌ അഥവാ ചതുർച​ക്ര​ചാ​ലന സംവി​ധാ​നം എന്നിവ​യുള്ള ആധുനിക വാഹനങ്ങൾ, പ്രത്യേക പ്രവർത്തന സവി​ശേ​ഷ​ത​ക​ളുള്ള ടയറുകൾ ഉപയോ​ഗി​ക്കാൻ രൂപകൽപ്പന ചെയ്‌തി​ട്ടു​ള്ള​വ​യാണ്‌. സാധാ​ര​ണ​ഗ​തി​യിൽ ടയർ സംബന്ധിച്ച വ്യവസ്ഥകൾ വാഹന​ത്തി​ന്റെ മാന്വ​ലിൽ കൊടു​ക്കാ​റുണ്ട്‌.

റോഡി​ന്റെ അവസ്ഥയാണ്‌ മറ്റൊരു ഘടകം. നിങ്ങളു​ടെ വാഹനം കൂടുതൽ സമയവും മൺപാ​ത​ക​ളി​ലൂ​ടെ​യാ​ണോ ഓടു​ന്നത്‌ അതോ, ടാർ ചെയ്‌ത റോഡു​ക​ളി​ലൂ​ടെ​യാ​ണോ? നിങ്ങൾ വാഹനം ഓടി​ക്കു​ന്നത്‌ ഏറെയും മഴയത്താ​ണോ അതോ ഉണങ്ങിയ റോഡു​ക​ളി​ലൂ​ടെ​യാ​ണോ? ഒരുപക്ഷേ ഇങ്ങനെ ഏതെങ്കി​ലും ഒരു സാഹച​ര്യം എടുത്തു​പ​റ​യുക പ്രയാ​സ​മാ​യി​രി​ക്കാം, വ്യത്യസ്‌ത സാഹച​ര്യ​ങ്ങ​ളി​ലാ​യി​രി​ക്കാം നിങ്ങൾ വാഹനം ഓടി​ക്കു​ന്നത്‌. അങ്ങനെ​യാ​ണെ​ങ്കിൽ ഏതു സാഹച​ര്യ​ത്തി​ലും ഏതു കാലാ​വ​സ്ഥ​യി​ലും ഉപയോ​ഗി​ക്കാൻ രൂപകൽപ്പന ചെയ്‌തി​ട്ടുള്ള ടയർ ആണ്‌ നിങ്ങൾക്ക്‌ ആവശ്യം.

ടയറിന്റെ ആയുർ​ദൈർഘ്യ​വും ഘർഷണ നിലവാ​ര​വും പരിഗ​ണി​ക്കേ​ണ്ടത്‌ പ്രധാ​ന​മാണ്‌. പൊതു​വേ, ട്രെഡി​ന്റെ കടുപ്പം കുറയു​ന്ന​ത​നു​സ​രിച്ച്‌ ടയറിന്റെ ഘർഷണം കൂടും. പക്ഷേ അതിനു തേയ്‌മാ​നം കൂടുതൽ ആയിരി​ക്കും. ട്രെഡ്‌ ആപേക്ഷി​ക​മാ​യി കടുപ്പം ഉള്ളത്‌ ആണെങ്കിൽ ടയറിന്റെ ഘർഷണം കുറയും. എന്നാൽ ഈടു​നിൽക്കാ​നുള്ള സാധ്യത കൂടും. ഘർഷണ നിലവാ​രം സംബന്ധിച്ച വിവരം സാധാ​ര​ണ​ഗ​തി​യിൽ ടയർ വിൽപ്പന കേന്ദ്ര​ങ്ങ​ളിൽ ലഭ്യമാണ്‌. എന്നാൽ വ്യത്യസ്‌ത ഉത്‌പാ​ദകർ നൽകുന്ന ഘർഷണ നിലവാ​രം വ്യത്യ​സ്‌ത​മാ​യി​രി​ക്കും എന്ന്‌ ഓർക്കുക.

ഭൂരി​ഭാ​ഗം കാര്യ​ങ്ങ​ളി​ലും തീരു​മാ​നം എടുത്തു കഴിഞ്ഞാൽപ്പി​ന്നെ, അന്തിമ തീരു​മാ​നത്തെ സ്വാധീ​നി​ക്കുന്ന ഒരു സംഗതി​യേ ഉള്ളൂ—വില. അറിയ​പ്പെ​ടുന്ന ഉത്‌പാ​ദകർ മിക്ക​പ്പോ​ഴും മെച്ചപ്പെട്ട ഗുണ​മേ​ന്മ​യും വാറന്റി​യും ഉറപ്പു നൽകുന്നു.

ടയർ നല്ല അവസ്ഥയിൽ നിലനി​റു​ത്തൽ

ടയർ നന്നായി സൂക്ഷി​ക്കു​ന്ന​തിൽ മൂന്നു കാര്യങ്ങൾ ഉൾപ്പെ​ട്ടി​രി​ക്കു​ന്നു: കൃത്യ​മായ വായു​മർദം നിലനി​റു​ത്തൽ, ക്രമമായ അടിസ്ഥാ​ന​ത്തിൽ ടയർ മാറ്റി​യി​ടൽ, ടയറിന്റെ ബാലൻസും അലൈൻമെ​ന്റും തെറ്റാതെ സൂക്ഷിക്കൽ. കൃത്യ​മായ വായു​മർദം നിലനി​റു​ത്തു​ന്നതു വളരെ പ്രധാ​ന​മാണ്‌. ടയറിൽ കാറ്റ്‌ കൂടു​ത​ലാ​ണെ​ങ്കിൽ നിശ്ചിത കാലത്തി​നു മുമ്പു​തന്നെ ട്രെഡി​ന്റെ മധ്യഭാ​ഗം തേഞ്ഞു​പോ​കും. മറിച്ച്‌ വായു​മർദം വളരെ കുറഞ്ഞാൽ ടയറിന്റെ വക്കുകൾക്കു തേയ്‌മാ​നം സംഭവി​ക്കു​ക​യും ഇന്ധനക്ഷമത കുറയു​ക​യും ചെയ്യും.

റബ്ബറി​ലൂ​ടെ വായു നിർഗ​മി​ക്കു​ന്നതു കൊണ്ട്‌ ഒരു മാസത്തിൽ സാധാ​ര​ണ​മാ​യി അര കിലോ​ഗ്രാ​മോ അതിൽ കൂടു​ത​ലോ മർദം കുറയു​ന്നു. അതു​കൊണ്ട്‌ ടയറിന്റെ ആകൃതി​യി​ലുള്ള മാറ്റം കണ്ട്‌ മർദനഷ്ടം തീരു​മാ​നി​ക്കാം എന്നു വിചാ​രി​ക്ക​രുത്‌. റബ്ബർ ഉത്‌പാ​ദക സംഘട​ന​യു​ടെ അഭി​പ്രാ​യ​ത്തിൽ, “ഒരു ടയറിന്റെ പകുതി വായു​മർദം കുറഞ്ഞാ​ലും അത്‌ മനസ്സി​ലാ​ക്കാൻ പറ്റാതെ വന്നേക്കാം!” അതു​കൊണ്ട്‌ ഒരു മർദമാ​പി​നി ഉപയോ​ഗിച്ച്‌ ടയറിന്റെ മർദം അളക്കുക; അതു മാസത്തിൽ ഒരിക്ക​ലെ​ങ്കി​ലും ചെയ്യുക. സൗകര്യ​പ്ര​ദ​മാ​യി ഉപയോ​ഗി​ക്കു​ന്ന​തി​നു വേണ്ടി പല വാഹന ഉടമക​ളും മർദമാ​പി​നി, ഡാഷ്‌ ബോർഡി​ലെ സാധനങ്ങൾ സൂക്ഷി​ക്കു​ന്ന​തി​നുള്ള അറയായ ഗ്ലവ്‌ ബോക്‌സിൽ വെക്കുന്നു. നിങ്ങളു​ടെ വാഹന​ത്തി​ന്റെ എൻജിൻ ഓയിൽ മാറ്റു​മ്പോ​ഴെ​ല്ലാം ടയർ പരി​ശോ​ധി​ക്കുക. അപ്പോൾ ടയർ തണുത്തി​രി​ക്കണം. മറ്റു വാക്കു​ക​ളിൽ പറഞ്ഞാൽ വാഹനം ഓട്ടം നിറു​ത്തി​യിട്ട്‌ കുറഞ്ഞത്‌ മൂന്നു മണിക്കൂർ ആയിരി​ക്കണം അല്ലെങ്കിൽ 1.5 കിലോ​മീ​റ്റ​റിൽ താഴെയേ ഓടി​യി​രി​ക്കാ​വൂ. ടയർമർദത്തെ കുറി​ച്ചുള്ള വിവരങ്ങൾ വണ്ടിയു​ടെ മാന്വ​ലി​ലോ ഡ്രൈ​വ​റു​ടെ വാതി​ലി​ന​രി​കിൽ ഒരു ലേബലി​ലോ ഗ്ലവ്‌ ബോക്‌സി​ലോ ഇന്ധന ടാങ്കിന്റെ സമീപ​ത്തോ ഉണ്ടായി​രി​ക്കും. ഒരു അസുഖ​ക​ര​മായ യാത്ര ഒഴിവാ​ക്കാൻ നിങ്ങൾ ആഗ്രഹി​ക്കു​ന്നെ​ങ്കിൽ ടയറു​ക​ളിൽ പരമാ​വധി കാറ്റു നിറയ്‌ക്ക​രുത്‌. ഓരോ ടയറി​ലും എത്ര​ത്തോ​ളം കാറ്റു നിറയ്‌ക്കാം എന്ന്‌ സൈഡ്‌ വാളിൽ മോൾഡ്‌ ചെയ്‌തി​രി​ക്കും.

ക്രമമായ അടിസ്ഥാ​ന​ത്തിൽ ടയറുകൾ സ്ഥാനം മാറ്റി​യി​ട്ടാൽ അവ കൂടുതൽ കാലം ഉപയോ​ഗി​ക്കാം; അവയുടെ തേയ്‌മാ​നം ഒരു പോ​ലെ​യാ​യി​രി​ക്കു​ക​യും ചെയ്യും. നിങ്ങളു​ടെ വാഹനം നിർമിച്ച കമ്പനി മറിച്ചു ശുപാർശ ചെയ്യു​ന്നി​ല്ലെ​ങ്കിൽ ഓരോ 10,000 കിലോ​മീ​റ്റ​റി​നും 13,000 കിലോ​മീ​റ്റ​റി​നും ഇടയ്‌ക്ക്‌ ടയർ സ്ഥാനം മാറ്റി​യി​ടു​ന്നതു നന്നായി​രി​ക്കും. വീണ്ടും, നിർദേ​ശി​ച്ചി​രി​ക്കുന്ന രീതി ഏതെന്നു കാണാൻ മാന്വൽ കാണുക.

ഇനി, ഓരോ വർഷവും നിങ്ങളു​ടെ വാഹന​ത്തി​ന്റെ ടയർ അലൈൻമെന്റ്‌ പരി​ശോ​ധി​പ്പി​ക്കുക; നിങ്ങളു​ടെ വാഹന​ത്തി​ന്റെ സ്റ്റിയറിം​ഗിന്‌ പതിവി​ല്ലാത്ത കമ്പനമോ അസാധാ​ര​ണ​മായ എന്തെങ്കി​ലും പ്രശ്‌ന​മോ തോന്നുന്ന ഏതു സന്ദർഭ​ത്തി​ലും ഇതു ചെയ്യുക. ഭാരത്തി​ലുള്ള വ്യതി​യാ​നം പേറു​ന്ന​തിന്‌ അനു​യോ​ജ്യ​മായ വിധത്തി​ലാണ്‌ നിങ്ങളു​ടെ വാഹന​ത്തി​ന്റെ സസ്‌പെൻഷൻ സംവി​ധാ​നം ക്രമീ​ക​രി​ച്ചി​രി​ക്കു​ന്നത്‌. എങ്കിലും പതിവു തേയ്‌മാ​നം ഇടയ്‌ക്കി​ടെ ടയർ വീണ്ടും അലൈൻ ചെയ്യേ​ണ്ടത്‌ ആവശ്യ​മാ​ക്കി​ത്തീർക്കു​ന്നു. സസ്‌പെൻഷ​നി​ലും ടയർ അലൈൻമെ​ന്റി​ലും യോഗ്യ​ത​യുള്ള ഒരു മെക്കാ​നി​ക്കിന്‌ നിങ്ങളു​ടെ വാഹന​ത്തി​ന്റെ അലൈൻമെന്റ്‌ കൃത്യ​മാ​ക്കി​ക്കൊണ്ട്‌ ടയറിന്റെ ആയുർ​ദൈർഘ്യ​വും യാത്രാ​സു​ഖ​വും വർധി​പ്പി​ക്കാൻ കഴിയും.

“ബുദ്ധി​ശ​ക്തി​യുള്ള” ടയറുകൾ

കമ്പ്യൂ​ട്ട​റു​ക​ളു​ടെ സഹായ​ത്തോ​ടെ ചില കാറുകൾ, ടയറിലെ വായു​മർദം സുരക്ഷി​ത​മായ അളവിൽനി​ന്നു കുറയു​മ്പോൾ ഡ്രൈ​വർക്കു മുന്നറി​യി​പ്പു നൽകുന്നു. ചില ടയറു​കൾക്ക്‌ വായു​മർദം ഇല്ലെങ്കി​ലും കുറച്ചു ദൂരം അപായ​ര​ഹി​ത​മാ​യി സഞ്ചരി​ക്കാൻ കഴിയും. മറ്റു ചിലതാ​കട്ടെ, ടയർ പഞ്ചറാ​യാൽ സ്വയം അത്‌ ഒട്ടിക്കാൻ പര്യാ​പ്‌ത​മായ വിധത്തി​ലാ​ണു നിർമി​ച്ചി​രി​ക്കു​ന്നത്‌. വാസ്‌ത​വ​ത്തിൽ നാനാ​വി​ധ​ത്തി​ലുള്ള, സദാ വിപു​ല​മാ​യി​ക്കൊ​ണ്ടി​രി​ക്കുന്ന സാഹച​ര്യ​ങ്ങൾക്ക്‌ ഇണങ്ങുന്ന ടയറുകൾ എൻജി​നീ​യർമാർ രൂപകൽപ്പന ചെയ്‌തു​കൊ​ണ്ടി​രി​ക്കു​ക​യാണ്‌.

നിർമാ​ണ​ത്തിന്‌ ഉപയോ​ഗി​ക്കുന്ന വസ്‌തു​ക്കൾ, ട്രെഡി​ന്റെ മാതൃക, സസ്‌പെൻഷൻ, സ്റ്റിയറിങ്‌, ബ്രേക്കിങ്‌ സംവി​ധാ​നങ്ങൾ എന്നിവ ഒന്നി​നൊ​ന്നു മെച്ച​പ്പെട്ടു വരുന്ന സാഹച​ര്യ​ത്തിൽ ആധുനിക വാഹന​ങ്ങ​ളിൽ ടയറുകൾ, യാത്ര കൂടുതൽ സുഖകരം മാത്രമല്ല സുരക്ഷി​ത​വും ആക്കിത്തീർക്കു​ന്നു. (g04 6/8)

[അടിക്കു​റി​പ്പു​കൾ]

[17-ാം പേജിലെ ചാർട്ട്‌/ചിത്രങ്ങൾ]

ടയർ പരിച​ര​ണ​ത്തി​നുള്ള ചെക്ക്‌ലിസ്റ്റ്‌

ദൃശ്യ പരി​ശോ​ധന:

◻ സൈഡ്‌വാൾ തള്ളിനിൽക്കു​ന്നു​ണ്ടോ?

◻ ട്രെഡി​ന്റെ ഉപരി​ത​ല​ത്തിൽ വയറുകൾ ദൃശ്യ​മാ​ണോ?

◻ ട്രെഡിന്‌ സുരക്ഷി​ത​മായ അളവിൽ കനമു​ണ്ടോ, അതോ വെയർ ബാറുകൾ പുറത്തു കാണു​ന്നു​ണ്ടോ?

ഇവയും പരിഗ​ണി​ക്കുക:

◻ ടയറിന്റെ മർദം വാഹന നിർമാ​താവ്‌ നിർദേ​ശി​ച്ചി​രി​ക്കുന്ന അളവിൽത്ത​ന്നെ​യാ​ണോ?

◻ ടയറുകൾ മാറ്റി​യി​ടാൻ സമയമാ​യോ? (എത്ര ദൂരം ഓടി​യ​തി​നു ശേഷം മാറ്റി​യി​ടണം, ഏതു ക്രമത്തിൽ വേണം എന്നിവ സംബന്ധിച്ച്‌ വാഹന നിർമാ​താ​വി​ന്റെ നിർദേശം അനുസ​രി​ക്കുക.)

◻ കാലാ​വ​സ്ഥ​യിൽ ഉണ്ടാകുന്ന വ്യതി​യാ​നം അനുസ​രിച്ച്‌ ടയർ മാറ്റേ​ണ്ട​തു​ണ്ടോ?

[ചിത്രം]

വെയർ ബാർ

[16-ാം പേജിലെ രേഖാ​ചി​ത്രം]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

ടയറിന്റെ ഭാഗങ്ങൾ

ട്രെഡ്‌ ഘർഷണ​വും വാഹനം തിരി​ക്കു​മ്പോൾ റോഡിൽ നല്ല പിടി​ത്ത​വും പ്രദാനം ചെയ്യുന്നു

ബെൽറ്റുകൾ ട്രെഡിന്‌ ഉറപ്പും ശക്തിയും നൽകുന്നു

സൈഡ്‌വാൾ റോഡി​ലോ റോഡ​രി​കി​ലോ ഉള്ള എന്തി​ലെ​ങ്കി​ലും തട്ടി ടയറിന്റെ വശത്തിനു കേടു​പ​റ്റാ​തി​രി​ക്കാൻ സഹായി​ക്കു​ന്നു

ബോഡി പ്ലൈ ടയറിന്‌ ബലവും വഴക്കവും നൽകുന്നു

അകത്തെ പാളി ടയറിന്റെ ഉള്ളിൽ വായു നിലനി​റു​ത്തു​ന്നു

ബീഡ്‌ വായു​ക​ട​ക്കാൻ പോലും സ്ഥലമി​ല്ലാ​ത്ത​വി​ധം ടയർ ചക്രത്തിൽ ഉറപ്പി​ക്കു​ന്നു

[15-ാം പേജിലെ ചിത്രങ്ങൾ]

വായു നിറയ്‌ക്കാ​വുന്ന ടയറു​ക​ളോ​ടു കൂടിയ ആദ്യകാല സൈക്കി​ളും കാറും; ഒരു ആദ്യകാല ടയർ ഫാക്ടറി​യി​ലെ തൊഴി​ലാ​ളി​കൾ

[കടപ്പാട്‌]

The Goodyear Tire & Rubber Company