പാർപ്പിട പ്രതി​സ​ന്ധി​യു​ടെ കാരണങ്ങൾ

ആഫ്രി​ക്ക​യി​ലെ ഒരു വൻനഗ​ര​ത്തി​ന്റെ പ്രാന്ത​പ്ര​ദേ​ശ​ത്താണ്‌ 36 വയസ്സുള്ള ജോസ​ഫി​നും 6-നും 11-നും ഇടയ്‌ക്ക്‌ പ്രായ​മുള്ള മൂന്ന്‌ ആൺമക്ക​ളും താമസി​ക്കു​ന്നത്‌. പ്ലാസ്റ്റിക്‌ പാത്രങ്ങൾ പെറുക്കി അടുത്തുള്ള ഒരു പുനഃ​സം​സ്‌കരണ പ്ലാന്റിൽ കൊണ്ടു​പോ​യി​ക്കൊ​ടു​ത്താണ്‌ ആ ഗൃഹനാഥ ഉപജീ​വനം കഴിക്കു​ന്നത്‌. നടു​വൊ​ടി​യുന്ന ഈ പണി ചെയ്‌താൽ ഒരു ദിവസം കിട്ടു​ന്ന​തോ 90 രൂപയിൽ താഴെ. ആ നഗരത്തിൽ ഒരു കുടും​ബം​പോ​റ്റാ​നും കുട്ടി​കളെ പള്ളിക്കൂ​ട​ത്തിൽ അയയ്‌ക്കാ​നും ഈ തുക മതിയാ​കു​ക​യില്ല.

വൈകു​ന്നേ​രം ജോസ​ഫിൻ തന്റെ കൂരയിൽ മടങ്ങി​യെ​ത്തു​ന്നു. വെയി​ല​ത്തു​ണ​ക്കിയ ഇഷ്ടിക​യും കളിമ​ണ്ണും കമ്പുക​ളും ചേർത്ത്‌ ഉണ്ടാക്കി​യ​താണ്‌ ചുവരു​കൾ. തുരു​മ്പെ​ടുത്ത ഇരുമ്പു​ഷീറ്റ്‌, തകരം, പ്ലാസ്റ്റിക്‌ എന്നിവ​കൊ​ണ്ടു​ള്ള​താണ്‌ മേൽക്കൂര, ഇതൊ​ന്നും ആണിയ​ടിച്ച്‌ ഉറപ്പി​ക്കാ​തെ വെറുതെ എടുത്തു​വെ​ച്ചി​രി​ക്കു​ക​യാണ്‌. കല്ല്‌, തടി, പഴയ ലോഹ​പാ​ളി​കൾ എന്നിവ മേൽക്കൂ​ര​യു​ടെ പുറത്തു വെച്ചി​ട്ടുണ്ട്‌. ശക്തമായ കാറ്റത്ത്‌ ഷീറ്റുകൾ പറന്നു​പോ​കാ​തി​രി​ക്കാ​നാ​ണിത്‌. ആ വീടിന്റെ ‘വാതി​ലു​ക​ളും’ ‘ജനലു​ക​ളും’ കീറച്ചാ​ക്കു​കൊ​ണ്ടു​ള്ള​താണ്‌. കള്ളന്മാ​രിൽനി​ന്നോ രൂക്ഷമായ കാലാ​വ​സ്ഥ​യിൽനി​ന്നോ അത്‌ ആ കുടും​ബ​ത്തിന്‌ ഒരു സംരക്ഷ​ണ​വും നൽകു​ക​യില്ല.

വീടെന്നു വിളി​ക്കാൻ പറ്റില്ലാത്ത ഈ കൂര​പോ​ലും അവരുടെ സ്വന്തമല്ല. കുടി​യൊ​ഴി​പ്പി​ക്കു​മോ​യെന്ന ഭീതി​യിൽ കഴിയു​ക​യാണ്‌ ജോസ​ഫി​നും മക്കളും. അവരുടെ ‘വീട്‌’ സ്ഥിതി​ചെ​യ്യുന്ന ഭാഗം അടുത്തുള്ള റോഡു വികസ​ന​ത്തി​നു​വേണ്ടി എടുക്കാ​നി​രി​ക്കു​ക​യാണ്‌. സങ്കടക​ര​മെന്നു പറയട്ടെ, ലോക​മെ​മ്പാ​ടും പല ദേശങ്ങ​ളി​ലും നിലവി​ലു​ള്ളത്‌ ഇതേ സാഹച​ര്യ​മാണ്‌.

വിഷമ​യ​മായ ഭവനം

“ദരി​ദ്ര​രു​ടെ പാർപ്പി​ടങ്ങ”ളെക്കു​റിച്ച്‌ ഒരു അന്താരാ​ഷ്‌ട്ര പാർപ്പിട സഹായ പരിപാ​ടി​യു​ടെ മുതിർന്ന ഉദ്യോ​ഗ​സ്ഥ​നായ റോബിൻ ഷെല്ലിന്റെ അഭി​പ്രാ​യം ശ്രദ്ധി​ക്കുക: അവിടെ “കുട്ടി​കൾക്ക്‌ തങ്ങളുടെ വീടി​നെ​ക്കു​റിച്ച്‌ നാണ​ക്കേ​ടാണ്‌, . . . കുടും​ബ​ത്തിൽ രോഗ​മൊ​ഴിഞ്ഞ നേരമില്ല, . . . സർക്കാർ ഉദ്യോ​ഗ​സ്ഥ​നോ സ്ഥലമു​ട​മ​യോ എപ്പോ​ഴാണ്‌ വന്ന്‌ കുടി​യൊ​ഴി​പ്പി​ക്കു​ക​യെന്ന്‌ അവർക്ക​റി​യില്ല.”

മേൽപ്പറഞ്ഞ ഒരു പരിസ്ഥി​തി​യിൽ ജീവിതം തള്ളിനീ​ക്കു​മ്പോൾ കുട്ടി​ക​ളു​ടെ ആരോ​ഗ്യ​ത്തെ​യും സുരക്ഷ​യെ​യും കുറിച്ചു വ്യാകു​ല​പ്പെ​ടാ​നേ മാതാ​പി​താ​ക്കൾക്കു നേരമു​ള്ളൂ. സാഹച​ര്യം മെച്ച​പ്പെ​ടു​ത്തു​ന്ന​തിന്‌ എന്തെങ്കി​ലും ചെയ്യു​ന്ന​തി​നു പകരം അവർ പലപ്പോ​ഴും ഭക്ഷണം, പാർപ്പി​ടം, വിശ്രമം തുടങ്ങി മക്കളുടെ അടിസ്ഥാന ആവശ്യ​ങ്ങൾക്കാ​യി തങ്ങളുടെ സമയത്തി​ന്റെ​യും ഊർജ​ത്തി​ന്റെ​യും ഭൂരി​ഭാ​ഗ​വും ചെലവ​ഴി​ക്കു​ന്നു.

സാഹച​ര്യം മെച്ച​പ്പെ​ടു​ത്തു​ന്ന​തിന്‌ ഈ ദരി​ദ്ര​ജനത ഒന്നു മനസ്സു​വെച്ചു മുന്നോ​ട്ടു​വ​ന്നാൽ മതിയ​ല്ലോ​യെന്ന്‌ ഇത്തര​മൊ​രു ജീവി​ത​ത്തി​ന്റെ കയ്‌പു​നീർ കുടി​ച്ചി​ട്ടി​ല്ലാത്ത ഒരാൾ ചിന്തി​ച്ചേ​ക്കാം. ജീവിതം മെച്ച​പ്പെ​ടു​ത്തു​ന്ന​തിന്‌ കൂടുതൽ ശ്രമി​ക്കണം എന്ന്‌ പാവ​പ്പെ​ട്ട​വ​രോ​ടു പറഞ്ഞതു​കൊണ്ട്‌ പരിഹാ​ര​മാ​കു​ന്നില്ല. പാർപ്പിട പ്രതി​സ​ന്ധി​ക്കു പിന്നിൽ ഏതൊരു വ്യക്തി​യു​ടെ​യും നിയ​ന്ത്ര​ണ​ത്തിന്‌ അപ്പുറ​ത്താ​യി​രി​ക്കുന്ന ചില ശക്തമായ ഘടകങ്ങ​ളുണ്ട്‌. ജനസം​ഖ്യാ വർധന, ത്വരി​ത​ഗ​തി​യി​ലുള്ള നഗരവ​ത്‌ക​രണം, പ്രകൃ​തി​വി​പ​ത്തു​കൾ, രാഷ്‌ട്രീയ ദുരന്തങ്ങൾ, ഒടുങ്ങാത്ത ദാരി​ദ്ര്യം എന്നിവ​യു​ടെ നേർക്ക്‌ ഗവേഷകർ വിരൽചൂ​ണ്ടു​ന്നു. അവയുടെ ഉരുക്കു​മു​ഷ്ടി​ക്കു​ള്ളിൽ ലോക​ത്തി​ലെ ദരി​ദ്ര​ജ​ന​ത​യു​ടെ ജീവിതം ഞെരി​ഞ്ഞ​മ​രു​ക​യാണ്‌.

ജനപ്പെ​രു​പ്പം—പ്രതി​സ​ന്ധി​യെ രൂക്ഷമാ​ക്കുന്ന മറ്റൊരു ഘടകം

ഓരോ വർഷവും ലോക​മൊ​ട്ടാ​കെ 6.8 കോടി​മു​തൽ 8 കോടി​വരെ ആളുകൾക്കു​കൂ​ടെ പാർപ്പി​ട​മൊ​രു​ക്കേ​ണ്ടി​വ​രു​ന്ന​താ​യി ഒരു കണക്കു സൂചി​പ്പി​ക്കു​ന്നു. ‘ഐക്യ​രാ​ഷ്‌ട്ര ജനസം​ഖ്യാ നിധി’ പറയു​ന്ന​ത​നു​സ​രിച്ച്‌ 2001-ൽ ലോക​ജ​ന​സം​ഖ്യ 610 കോടി കവിഞ്ഞു. 2050 ആകു​മ്പോ​ഴേക്ക്‌ അത്‌ 790 കോടി​ക്കും 1,090 കോടി​ക്കും ഇടയി​ലാ​കു​മെ​ന്നാ​ണു നിഗമനം. എന്നാൽ വർധന​യു​ടെ 98 ശതമാ​ന​വും അടുത്ത രണ്ടു ദശകങ്ങൾക്കു​ള്ളിൽ വികസ്വ​ര​രാ​ജ്യ​ങ്ങ​ളി​ലാ​ണു നടക്കാ​നി​രി​ക്കു​ന്നത്‌ എന്നാണു കണക്കാ​ക്ക​പ്പെ​ട്ടി​രി​ക്കു​ന്നത്‌. ഇതു കൂടുതൽ ആശങ്കയ്‌ക്കു വഴി​തെ​ളി​ക്കു​ന്നു. പാർപ്പിട പ്രതി​സ​ന്ധി​യെന്ന കനത്ത വെല്ലു​വി​ളി​യു​ടെ ഭീകര​മു​ഖ​മാണ്‌ ഈ കണക്കുകൾ വരച്ചു​കാ​ട്ടു​ന്നത്‌. പല രാജ്യ​ങ്ങ​ളി​ലെ​യും അതിശീ​ഘ്രം വളരുന്ന ജനവാ​സ​കേ​ന്ദ്രങ്ങൾ ഇപ്പോൾത്തന്നെ ജനനി​ബി​ഡ​മായ നഗര​പ്ര​ദേ​ശ​ങ്ങ​ളാണ്‌. ഇത്‌ പ്രശ്‌ന​ത്തി​ന്റെ രൂക്ഷത​യേ​റ്റു​ന്നു.

നിലയ്‌ക്കാത്ത നഗരവ​ത്‌ക​ര​ണം

ന്യൂ​യോർക്ക്‌, ലണ്ടൻ, ടോക്കി​യോ തുടങ്ങിയ വൻനഗ​രങ്ങൾ ഒരു രാജ്യ​ത്തി​ന്റെ സാമ്പത്തിക വളർച്ച​യു​ടെ മുഖമു​ദ്ര​ക​ളാ​യി പലപ്പോ​ഴും കണക്കാ​ക്ക​പ്പെ​ടു​ന്നു. ഫലമോ? വർഷം​തോ​റും ആയിര​ക്ക​ണ​ക്കി​നു ഗ്രാമ​വാ​സി​കൾ ‘പച്ചപ്പു​തേടി നഗരസ​മൃ​ദ്ധി​യി​ലേക്ക്‌’ പ്രവഹി​ക്കു​ക​യാണ്‌; പ്രധാ​ന​മാ​യും വിദ്യാ​ഭ്യാ​സ​ത്തി​നും തൊഴി​ലി​നും വേണ്ടി.

ഉദാഹ​ര​ണ​ത്തിന്‌ ചൈന​യിൽ സമ്പദ്‌വ്യ​വസ്ഥ കുതി​ച്ചു​യ​രു​ക​യാണ്‌. തത്‌ഫ​ല​മാ​യി, അടുത്ത ഏതാനും ദശകങ്ങൾക്കു​ള്ളിൽ പ്രധാന നഗര​പ്ര​ദേ​ശ​ങ്ങ​ളിൽ മാത്രം 20 കോടി​യി​ല​ധി​കം പുതിയ പാർപ്പിട സൗകര്യ​ങ്ങൾ ആവശ്യ​മാ​കു​മെന്ന്‌ ഒരു കണക്കു സൂചി​പ്പി​ക്കു​ന്നു. ഇത്‌ ഇപ്പോൾ ഐക്യ​നാ​ടു​ക​ളിൽ നിലവി​ലി​രി​ക്കുന്ന മുഴുവൻ പാർപ്പി​ട​ങ്ങ​ളു​ടെ​യും എണ്ണത്തിന്റെ ഇരട്ടി​യോ​ള​മാണ്‌. ഇത്തര​മൊ​രു ബൃഹത്തായ സംരംഭം നടപ്പി​ലാ​ക്കാൻ ഏതെങ്കി​ലു​മൊ​രു പാർപ്പിട പദ്ധതിക്കു കഴിയു​മെന്നു തോന്നു​ന്നു​ണ്ടോ?

ലോക​ബാങ്ക്‌ പറയുന്നു: “ഏകദേശം 1.2 കോടി​മു​തൽ 1.5 കോടി​വരെ പുതിയ കുടും​ബങ്ങൾ വർഷം​തോ​റും വികസ്വര ലോക​ത്തി​ലെ വൻനഗ​ര​ങ്ങ​ളിൽ രൂപം​കൊ​ള്ളു​ന്നു അല്ലെങ്കിൽ അവി​ടേക്കു ചേക്കേ​റു​ന്നു, ഇവർക്കെ​ല്ലാം അത്രയും​തന്നെ താമസ​സൗ​ക​ര്യ​ങ്ങ​ളും ആവശ്യ​മാണ്‌.” മടിശീ​ല​യ്‌ക്കൊ​തു​ങ്ങുന്ന പാർപ്പിട സൗകര്യ​ങ്ങൾ വേണ്ടു​വോ​ള​മി​ല്ലാ​ത്ത​തി​നാൽ എവി​ടെ​യെ​ങ്കി​ലു​മൊ​ക്കെ ഒരു കിടപ്പാ​ടം കണ്ടെത്താൻ നഗരങ്ങ​ളു​ടെ ഈ ദരി​ദ്ര​സ​ന്ത​തി​കൾ നിർബ​ന്ധി​ത​രാ​കു​ന്നു. പലപ്പോ​ഴും മറ്റാരും ജീവി​ക്കാ​നി​ഷ്ട​പ്പെ​ടു​ക​യി​ല്ലാത്ത ചിലയി​ട​ങ്ങ​ളിൽപ്പോ​ലും.

പ്രകൃ​തി​വി​പ​ത്തു​കൾ, രാഷ്‌ട്രീയ ദുരന്തങ്ങൾ

വെള്ള​പ്പൊ​ക്കം, ചെളി​യൊ​ഴുക്ക്‌, ഭൂകമ്പം എന്നീ പ്രകൃ​തി​ദു​ര​ന്തങ്ങൾ ആഞ്ഞടി​ക്കാൻ സാധ്യ​ത​യുള്ള സ്ഥലങ്ങളിൽ താമസി​ക്കാൻ പാവ​പ്പെ​ട്ടവർ നിർബ​ന്ധി​ത​രാ​യി​ത്തീ​രു​ന്നു. ഉദാഹ​ര​ണ​ത്തിന്‌, വെനെ​സ്വേ​ല​യി​ലെ കരാക്ക​സിൽ അഞ്ചുല​ക്ഷ​ത്തി​ലേ​റെ​പ്പേർ “കുത്ത​നെ​യുള്ള മലഞ്ചെ​രി​വു​ക​ളിൽ കെട്ടി​യു​യർത്തിയ അനധി​കൃത ജനവാ​സ​കേ​ന്ദ്ര​ങ്ങ​ളിൽ താമസി​ക്കു​ന്നു, നിരന്തരം ഉരുൾപൊ​ട്ടൽ ഉണ്ടാകുന്ന സ്ഥലമാ​ണിത്‌.” 1984-ൽ ഇന്ത്യയി​ലെ ഭോപ്പാ​ലി​ലു​ണ്ടായ ദുരന്തം നിങ്ങൾ ഓർക്കു​ന്നു​ണ്ടാ​കും. ആ വ്യാവ​സാ​യിക വിപത്തിൽ ആയിരങ്ങൾ കൊല്ല​പ്പെ​ടു​ക​യും അതി​ലേ​റെ​പ്പേർക്കു പരി​ക്കേൽക്കു​ക​യും ചെയ്‌തു. ഇത്രയ​ധി​കം മനുഷ്യ​ജീ​വൻ പൊലി​ഞ്ഞത്‌ എന്തു​കൊ​ണ്ടാണ്‌? ഫാക്ടറി പരിസ​രത്ത്‌ വളർന്നു​വന്ന ചേരി​പ്പ​ട്ട​ണ​വും ഫാക്ടറി​വ​ള​പ്പും തമ്മിൽ വെറും അഞ്ച്‌ മീറ്റർ ദൂരമേ ഉണ്ടായി​രു​ന്നു​ള്ളൂ.

ആഭ്യന്തര യുദ്ധങ്ങൾ പോലുള്ള രാഷ്‌ട്രീയ ദുരന്ത​ങ്ങ​ളും പാർപ്പിട പ്രതി​സ​ന്ധി​യു​ടെ രൂക്ഷത വർധി​പ്പി​ക്കു​ന്നു. വടക്കു​കി​ഴക്കൻ തുർക്കി​യിൽ 1984-നും 1999-നും ഇടയിൽ നടന്ന ആഭ്യന്തര കലാപ​ത്തിൽ 15 ലക്ഷം​പേർക്കെ​ങ്കി​ലും, പ്രധാ​ന​മാ​യും ഗ്രാമീ​ണർക്ക്‌ വീടു​വി​ട്ടു പോ​കേ​ണ്ടി​വ​ന്നി​ട്ടു​ണ്ടാ​യി​രി​ക്കണം എന്ന്‌ ഒരു മനുഷ്യാ​വ​കാശ സംഘടന 2002-ൽ പ്രസി​ദ്ധീ​ക​രിച്ച ഒരു റിപ്പോർട്ടു പറയുന്നു. പെരു​വ​ഴി​യി​ലായ ഈ നിസ്സഹാ​യ​രിൽ അനേകർക്കും പറ്റുന്നി​ട​ത്തൊ​ക്കെ താമസ​മാ​ക്കു​കയേ നിവൃ​ത്തി​യു​ണ്ടാ​യി​രു​ന്നു​ള്ളൂ. പലരും ജനനി​ബി​ഡ​മായ സ്ഥലങ്ങളിൽ പാർക്കുന്ന ബന്ധുക്ക​ളു​ടെ​യും അയൽക്കാ​രു​ടെ​യും കൂടെ താത്‌കാ​ലി​ക​മാ​യി അടിച്ചു​കൂ​ട്ടിയ കൂടാ​ര​ങ്ങ​ളിൽ അഭയം​തേടി, ചിലർ വാടക​യ്‌ക്കും. മറ്റുചി​ലർ കൃഷി​യി​ട​ങ്ങ​ളി​ലെ കെട്ടി​ട​ങ്ങ​ളി​ലും നിർമാ​ണ​സ്ഥ​ല​ങ്ങ​ളി​ലും കയറി​ക്കൂ​ടി. കുറെ കുടും​ബങ്ങൾ ഒരു കുതി​ര​ലാ​യ​ത്തിൽ താമസി​ക്കു​ന്ന​താ​യി റിപ്പോർട്ടു ചെയ്യ​പ്പെട്ടു. ഒരൊ​റ്റ​മു​റി​യിൽ പതിമൂ​ന്നോ അതില​ധി​ക​മോ ആളുക​ളാണ്‌ അന്തിയു​റ​ങ്ങി​യി​രു​ന്നത്‌. എല്ലാവർക്കും​കൂ​ടെ ഒറ്റ കക്കൂസും വെള്ള​മെ​ടു​ക്കാൻ ഒരു ടാപ്പും മാത്ര​മാണ്‌ ഉണ്ടായി​രു​ന്നത്‌. “ഞങ്ങൾക്ക്‌ ഈ ജീവിതം മടുത്തു” അഭയാർഥി​ക​ളി​ലൊ​രാൾ പറഞ്ഞു. “മൃഗങ്ങൾക്കു​വേണ്ടി ഉണ്ടാക്കി​യി​ട​ത്താണ്‌ ഞങ്ങൾ ജീവി​ക്കു​ന്നത്‌.”

സാമ്പത്തിക മാന്ദ്യം

പാർപ്പിട പ്രതി​സ​ന്ധി​യും പാവ​പ്പെ​ട്ട​വ​രു​ടെ സാമ്പത്തി​ക​നി​ല​യും തമ്മിൽ അഭേദ്യ​മായ ബന്ധമുണ്ട്‌ എന്നുള്ളതു നിഷേ​ധി​ക്കാ​നാ​വില്ല. മുമ്പ്‌ പരാമർശിച്ച ലോക​ബാങ്ക്‌ റിപ്പോർട്ട​നു​സ​രിച്ച്‌, 1988-ലെ മാത്രം കണക്കനു​സ​രിച്ച്‌ വികസ്വ​ര​രാ​ജ്യ​ങ്ങ​ളി​ലെ 33 കോടി നഗരവാ​സി​കൾ ദരി​ദ്ര​രു​ടെ പട്ടിക​യിൽ പെടു​ന്ന​വ​രാ​യി​രു​ന്നു. അടുത്ത വർഷങ്ങ​ളി​ലൊ​ന്നും അവരുടെ സാമ്പത്തിക നില കാര്യ​മാ​യി മെച്ച​പ്പെ​ടു​മെന്ന പ്രതീ​ക്ഷ​യു​മി​ല്ലാ​യി​രു​ന്നു. ഭക്ഷണം, വസ്‌ത്രം മുതലായ അടിസ്ഥാന ജീവി​താ​വ​ശ്യ​ങ്ങൾ കണ്ടെത്താൻപോ​ലും നട്ടംതി​രി​യുന്ന ദരി​ദ്ര​ജ​ന​ത​യ്‌ക്ക്‌ വാടക​യ്‌ക്ക്‌ ഒരു വീടെ​ടു​ക്കാ​നോ കൊള്ളാ​വുന്ന ഒരു വീടു​പ​ണി​യാ​നോ കഴിയു​ന്ന​തെ​ങ്ങനെ?

ഉയർന്ന പലിശ​നി​ര​ക്കും പണപ്പെ​രു​പ്പ​വു​മാണ്‌ മറ്റുരണ്ടു വൈത​ര​ണി​കൾ. ഫലമോ? ബാങ്ക്‌ ലോണു​കൾ നിർധ​ന​രു​ടെ എത്തുപാ​ടി​ന​കലെ. ഇനി വൈദ്യു​തി, വെള്ളം, പാചക​വാ​തകം എന്നിവ​യു​ടെ വില ഒന്നി​നൊ​ന്നു കുതി​ച്ചു​യ​രു​മ്പോൾ, ജീവി​ത​സാ​ഹ​ച​ര്യം മെച്ച​പ്പെ​ടു​ത്താ​നാ​യി എന്തെങ്കി​ലു​മൊ​ക്കെ മിച്ചം​പി​ടി​ക്കാ​നാ​കു​മെന്ന കണക്കു​കൂ​ട്ട​ലും പിഴയ്‌ക്കു​ന്നു. ചില രാജ്യ​ങ്ങ​ളിൽ തൊഴി​ലി​ല്ലായ്‌മ നിരക്ക്‌ 20 ശതമാ​ന​മാ​യി​രി​ക്കെ അഷ്ടിക്കു​വക കണ്ടെത്തു​ക​പോ​ലും അസാധ്യ​മാ​ണെ​ന്നു​തന്നെ പറയാം.

ഇവയും മറ്റുപല ഘടകങ്ങ​ളും ചേർന്ന്‌ ഭൂഗോ​ള​ത്തി​ലെ​മ്പാ​ടു​മുള്ള ദരിദ്ര ജനകോ​ടി​കളെ പരിതാ​പ​ക​ര​മായ ചുറ്റു​പാ​ടു​ക​ളി​ലേക്കു തള്ളിവി​ട്ടി​രി​ക്കു​ക​യാണ്‌. ഉപയോഗ ശൂന്യ​മായ ബസ്സുകൾ, ചരക്കുകൾ കൊണ്ടു​പോ​കുന്ന വലിയ കണ്ടെയ്‌ന​റു​കൾ, കാർഡ്‌ബോർഡ്‌ പെട്ടികൾ എന്നിവ​യി​ലൊ​ക്കെ ആളുകൾ താമസി​ക്കു​ന്നു. ഗോവ​ണി​പ്പ​ടി​കൾക്കു താഴെ​യും പ്ലാസ്റ്റി​ക്കു​കൊ​ണ്ടുള്ള കൂടാ​ര​ത്തി​ലും പാഴ്‌ത്ത​ടി​കൾകൊണ്ട്‌ തട്ടിക്കൂ​ട്ടിയ കൂരയി​ലും ആളുകൾ അന്തിയു​റ​ങ്ങു​ന്നു. തലചാ​യ്‌ക്കാ​നൊ​രി​ടം​തേടി, അടച്ചു​പൂ​ട്ടിയ വ്യവസാ​യ​ശാ​ല​ക​ളിൽപ്പോ​ലും ആളുകൾ കയറി​ക്കൂ​ടി​യി​ട്ടുണ്ട്‌.

പ്രശ്‌ന​പ​രി​ഹാ​ര​ത്തിന്‌ എന്തു ചെയ്‌തി​രി​ക്കു​ന്നു?

ഈ പ്രതി​സ​ന്ധി​ക്കു പരിഹാ​രം കാണു​ന്ന​തി​നാ​യി ജനക്ഷേമ തത്‌പ​ര​രായ വ്യക്തി​ക​ളും സംഘട​ന​ക​ളും ഗവൺമെ​ന്റു​ക​ളും ഇതി​നോ​ടകം ശ്ലാഘനീ​യ​മായ ഉദ്യമങ്ങൾ നടത്തി​യി​ട്ടുണ്ട്‌. ജപ്പാനിൽ ആളുക​ളു​ടെ സാമ്പത്തി​ക​നി​ല​യ്‌ക്കൊ​തു​ങ്ങുന്ന തരത്തി​ലുള്ള വീടുകൾ പണിയാൻ സഹായ​ഹ​സ്‌ത​വു​മാ​യി നിരവധി ഏജൻസി​കൾ രംഗത്തുണ്ട്‌. 1994-ൽ ദക്ഷിണാ​ഫ്രി​ക്ക​യിൽ രൂപ​മെ​ടുത്ത ഒരു ഭവനനിർമാ​ണ​പ​ദ്ധതി, നാലു​മു​റി​ക​ളുള്ള പത്തുല​ക്ഷ​ത്തി​ല​ധി​കം വീടുകൾ പണിയു​ക​യു​ണ്ടാ​യി. കെനി​യ​യിൽ, ബൃഹത്തായ സംരം​ഭങ്ങൾ ഉൾപ്പെ​ട്ടി​രി​ക്കുന്ന ഒരു ഭവനനിർമാ​ണ​പ​ദ്ധ​തി​യു​ടെ ലക്ഷ്യം വർഷം​തോ​റും നഗര​പ്ര​ദേ​ശ​ങ്ങ​ളിൽ 1,50,000 വീടു​ക​ളും ഗ്രാമ​പ്ര​ദേ​ശ​ങ്ങ​ളിൽ അതിന്റെ ഇരട്ടി​യും പണിയുക എന്നതാണ്‌. മഡഗാ​സ്‌കർ പോലുള്ള മറ്റു രാജ്യങ്ങൾ പാർപ്പി​ടങ്ങൾ പണിയാ​നുള്ള ചെലവു​കു​റഞ്ഞ മാർഗങ്ങൾ കണ്ടുപി​ടി​ക്കുക എന്ന ലക്ഷ്യത്തിൽ മുന്നോ​ട്ടു​പോ​കു​ന്നു.

യുഎൻ ഹാബി​റ്റാറ്റ്‌ പോലുള്ള അന്താരാ​ഷ്‌ട്ര സംഘട​നകൾ “വമ്പിച്ച ജനസാ​ന്ദ്ര​ത​യാൽ തിക്കു​മു​ട്ടുന്ന നഗരങ്ങ​ളിൽ മുള​പൊ​ട്ടുന്ന പ്രശ്‌നങ്ങൾ തടയാ​നോ ശമിപ്പി​ക്കാ​നോ” ഉള്ള ലോക​ത്തി​ന്റെ പ്രതി​ബദ്ധത എടുത്തു​കാ​ട്ടാ​നാ​യി രൂപം​കൊ​ടു​ത്ത​വ​യാണ്‌. ലാഭേ​ച്ഛ​കൂ​ടാ​തെ പ്രവർത്തി​ക്കു​ന്ന​തോ ഗവൺമെ​ന്റേ​ത​ര​മോ ആയ സംഘട​ന​ക​ളും സഹായ​ഹ​സ്‌ത​വു​മാ​യി രംഗത്തുണ്ട്‌. ലാഭേച്ഛ കൂടാതെ പ്രവർത്തി​ക്കുന്ന സംഘട​ന​ക​ളി​ലൊന്ന്‌ ശോച​നീ​യ​മായ പാർപ്പിട സൗകര്യ​ങ്ങൾ മെച്ച​പ്പെ​ടു​ത്തു​ന്ന​തിന്‌ പല ദേശങ്ങ​ളി​ലാ​യി 1,50,000 കുടും​ബ​ങ്ങളെ സഹായി​ക്കു​ക​യു​ണ്ടാ​യി. 2005-ഓടെ ഈ സംഘടന ലളിത​വും മാന്യ​വും സാമ്പത്തി​ക​നി​ല​യ്‌ക്ക്‌ ഒതുങ്ങു​ന്ന​തു​മായ പാർപ്പിട സൗകര്യ​ങ്ങൾ കണ്ടെത്താൻ പത്തുലക്ഷം പേരെ സഹായി​ച്ചി​രി​ക്കും എന്നു കണക്കാ​ക്ക​പ്പെ​ടു​ന്നു.

ഈ സംഘട​ന​ക​ളിൽ പലതും സത്വരം ലഭ്യമാ​കുന്ന തരത്തിൽ പ്രാ​യോ​ഗിക വിവരങ്ങൾ ക്രോ​ഡീ​ക​രി​ച്ചി​ട്ടുണ്ട്‌. നിലവാ​ര​മി​ല്ലാത്ത പാർപ്പി​ട​ങ്ങ​ളിൽ കഴിയു​ന്ന​വരെ തങ്ങളുടെ പരിതാ​പ​ക​ര​മായ ചുറ്റു​പാ​ടു​ക​ളോ​ടു കഴിയു​ന്നത്ര പൊരു​ത്ത​പ്പെ​ടാൻ സഹായി​ക്കാ​നും അവരുടെ സാഹച​ര്യം മെച്ച​പ്പെ​ടു​ത്താ​നും വേണ്ടി ഉള്ളതാണ്‌ ഇത്‌. നിങ്ങൾക്ക്‌ ഇക്കാര്യ​ത്തിൽ സഹായം ആവശ്യ​മു​ണ്ടെ​ങ്കിൽ ഈ ക്രമീ​ക​രണം പൂർണ​മാ​യി ഉപയോ​ഗ​പ്പെ​ടു​ത്താ​നാ​കും. നിങ്ങൾക്കു​തന്നെ സ്വയം ചെയ്യാ​വുന്ന നിരവധി അടിസ്ഥാന കാര്യ​ങ്ങ​ളു​മുണ്ട്‌—7-ാം പേജിലെ “വീടും നിങ്ങളു​ടെ ആരോ​ഗ്യ​വും” എന്ന ചതുരം കാണുക.

നിങ്ങൾ ആയിരി​ക്കുന്ന സാഹച​ര്യം മെച്ച​പ്പെ​ടു​ത്താൻ കഴിഞ്ഞാ​ലും ഇല്ലെങ്കി​ലും ഒരു കാര്യം വ്യക്തമാണ്‌; ഒരു വ്യക്തി​ക്കോ ഒരു മാനുഷ സംഘട​ന​യ്‌ക്കോ ഈ കടുത്ത പ്രതി​സ​ന്ധി​ക്കി​ട​യാ​ക്കുന്ന ശക്തമായ ഘടകങ്ങൾ ഉന്മൂലനം ചെയ്യാ​നാ​വില്ല. സാമ്പത്തിക വികസ​ന​വും മനുഷ്യ​ത്വ​പ​ര​മായ സഹായ​ങ്ങ​ളും അടിയ​ന്തി​ര​മാ​യി ആവശ്യ​മാ​യി​രി​ക്കുന്ന ഈ സാഹച​ര്യ​ത്തിൽ, പരാജ​യ​ത്തി​ന്റെ നീർച്ചു​ഴി​യി​ലേക്ക്‌ ഒന്നി​നൊ​ന്നു താണു​കൊ​ണ്ടി​രി​ക്കു​ക​യാണ്‌ അന്താരാ​ഷ്‌ട്ര സമൂഹം. ഓരോ വർഷവും ലക്ഷക്കണ​ക്കി​നു കുഞ്ഞു​ങ്ങ​ളാണ്‌ ദാരി​ദ്ര്യ​ത്തി​ന്റെ ദുരി​ത​ക്ക​യ​ത്തി​ലേക്കു പിറന്നു​വീ​ഴു​ന്നത്‌. അങ്ങനെ​യെ​ങ്കിൽ ഒരു ശാശ്വത പരിഹാ​ര​ത്തി​നു​വേണ്ടി പ്രത്യാ​ശി​ക്കാ​നാ​കു​മോ?

[7-ാം പേജിലെ ചതുരം]

വീടും നിങ്ങളു​ടെ ആരോ​ഗ്യ​വും

താമസ​ക്കാ​രു​ടെ ആരോ​ഗ്യ​ത്തി​നു സംഭാവന ചെയ്യു​ന്ന​തിന്‌ ഒരു വീടിന്‌ ചുരു​ങ്ങി​യത്‌ താഴെ​പ്പ​റ​യുന്ന കാര്യങ്ങൾ ഉണ്ടായി​രി​ക്കണം എന്ന്‌ ലോകാ​രോ​ഗ്യ സംഘടന പറയുന്നു.

◼ മഴയിൽനി​ന്നു സംരക്ഷണം നൽകുന്ന നല്ല മേൽക്കൂര

◼ പ്രതി​കൂല കാലാ​വ​സ്ഥ​യിൽനി​ന്നും മൃഗങ്ങ​ളിൽനി​ന്നും സംരക്ഷണം നൽകാൻ പറ്റിയ നല്ല ചുവരു​ക​ളും വാതി​ലു​ക​ളും

◼ പ്രാണി​കൾ, പ്രത്യേ​കിച്ച്‌ കൊതു​കു​കൾ കടക്കാ​തി​രി​ക്കാൻ കമ്പിവല പിടി​പ്പിച്ച ജനലുകൾ

◼ വേനലിൽ നേരി​ട്ട​ടി​ക്കുന്ന സൂര്യ​പ്ര​കാ​ശ​ത്തിൽനി​ന്നു ഭിത്തികൾ സംരക്ഷി​ക്കാൻ വെയിൽമറ

[8-ാം പേജിലെ ചതുരം/ചിത്രങ്ങൾ]

ആഫ്രിക്കൻ ഗ്രാമ​ങ്ങ​ളി​ലെ പരമ്പരാ​ഗത വീടുകൾ

കഴിഞ്ഞ വർഷങ്ങ​ളി​ലെ​ല്ലാം, പരമ്പരാ​ഗത രീതി​യിൽ നിർമിച്ച വീടുകൾ ആഫ്രി​ക്ക​യി​ലെ​ങ്ങും കാണാ​മാ​യി​രു​ന്നു. പല വലുപ്പ​ത്തി​ലും ആകൃതി​യി​ലും ഉള്ളതാ​യി​രു​ന്നു അവ. കെനി​യ​യി​ലെ കിക്കുയു, ലൂവോ തുടങ്ങിയ ജനവർഗ​ങ്ങൾക്ക്‌ വൃത്താ​കൃ​തി​യി​ലുള്ള ചുവരു​ക​ളും കോണാ​കൃ​തി​യിൽ മേഞ്ഞ മേൽക്കൂ​ര​യു​മുള്ള വീടു​ക​ളോ​ടാ​യി​രു​ന്നു പ്രിയം. കെനി​യ​യി​ലെ​യും ടാൻസാ​നി​യ​യി​ലെ​യും മസായി​കൾ ഉൾപ്പെ​ടെ​യു​ള്ളവർ ദീർഘ​ച​തു​രാ​കൃ​തി​യി​ലുള്ള വീടുകൾ നിർമി​ച്ചി​രു​ന്നു. കിഴക്കൻ ആഫ്രി​ക്ക​യു​ടെ തീര​പ്ര​ദേ​ശ​ങ്ങ​ളി​ലെ ചില വീടു​കൾക്ക്‌ നിലത്തു​മു​ട്ടുന്ന, മേഞ്ഞ മേൽക്കൂ​ര​യു​ണ്ടാ​യി​രു​ന്നു. ഇവ കാഴ്‌ച​യ്‌ക്ക്‌ ഒരു തേനീ​ച്ച​ക്കൂ​ടു​പോ​ലെ​യി​രി​ക്കും.

ഇത്തരം വീടുകൾ പണിയു​ന്ന​തി​നുള്ള സാമ​ഗ്രി​കൾ മിക്കതും അനായാ​സം ലഭ്യമാ​യി​രു​ന്ന​തി​നാൽ പാർപ്പിട പ്രശ്‌നങ്ങൾ വിരള​മാ​യി​രു​ന്നു. മണ്ണും വെള്ളവും കൂട്ടി​ക്കു​ഴ​ച്ചാൽ ചെളി ഉണ്ടാക്കി​യെ​ടു​ക്കാം. ചുറ്റു​പാ​ടു​മുള്ള വനപ്ര​ദേ​ശ​ങ്ങ​ളിൽനിന്ന്‌ തടി, പുല്ല്‌, ഈറ്റ, മുളയു​ടെ ഇല എന്നിവ കിട്ടാൻ ഒരു പ്രയാ​സ​വു​മി​ല്ലാ​യി​രു​ന്നു. ചുരു​ക്ക​ത്തിൽ, എത്ര ദരി​ദ്ര​രാ​യി​രു​ന്നാ​ലും സ്വന്തം വീടു​ണ്ടാ​ക്കാൻ ഒരു കുടും​ബ​ത്തിന്‌ യാതൊ​രു വിഷമ​വു​മി​ല്ലാ​യി​രു​ന്നു.

എന്നാൽ ഇത്തരം വീടു​കൾക്ക്‌ പോരാ​യ്‌മ​ക​ളും ഉണ്ടായി​രു​ന്നു. തീപി​ടി​ക്കുന്ന വസ്‌തു​ക്കൾകൊ​ണ്ടാ​യി​രു​ന്നു സാധാ​ര​ണ​ഗ​തി​യിൽ മേൽക്കൂര പണിതി​രു​ന്നത്‌, അതിനാൽ അഗ്നിബാധ ഉണ്ടാകു​വാ​നുള്ള സാധ്യത ഏറെയാ​യി​രു​ന്നു. ഇനി, മൺഭിത്തി തുരന്ന്‌ കള്ളന്മാർക്ക്‌ അനായാ​സം അകത്തു​ക​ട​ക്കാ​നും കഴിയു​മാ​യി​രു​ന്നു. അതിനാൽ ഇന്ന്‌ പല പ്രദേ​ശ​ങ്ങ​ളി​ലും പരമ്പരാ​ഗത ആഫ്രിക്കൻ വീടുകൾ അപ്രത്യ​ക്ഷ​മാ​യി​ക്കൊ​ണ്ടി​രി​ക്കു​ക​യാണ്‌. കൂടുതൽ ഈടുറ്റ നിർമി​തി​കൾ അവയുടെ സ്ഥാനം കൈയ​ട​ക്കി​യി​രി​ക്കു​ന്നു.

[കടപ്പാട്‌]

ഉറവിടം: പരമ്പരാ​ഗത ആഫ്രിക്കൻ വാസ്‌തു​വി​ദ്യ

കുടിലുകൾ: Courtesy Bomas of Kenya Ltd - A Cultural, Conference, and Entertainment Center

[5-ാം പേജിലെ ചിത്രം]

യൂറോപ്പ്‌

[കടപ്പാട്‌]

© Tim Dirven/Panos Pictures

[6-ാം പേജിലെ ചിത്രം]

ആഫ്രിക്ക

[6-ാം പേജിലെ ചിത്രം]

തെക്കേ അമേരിക്ക

[7-ാം പേജിലെ ചിത്രം]

തെക്കേ അമേരിക്ക

[7-ാം പേജിലെ ചിത്രം]

ഏഷ്യ

[6-ാം പേജിലെ ചിത്ര​ങ്ങൾക്ക്‌ കടപ്പാട്‌]

© Teun Voeten/Panos Pictures; J.R. Ripper/BrazilPhotos

[7-ാം പേജിലെ ചിത്ര​ങ്ങൾക്ക്‌ കടപ്പാട്‌]

JORGE UZON/AFP/Getty Images; © Frits Meyst/Panos Pictures