മൈക്കിൾ സെർവീ​റ്റസ്‌ സത്യാ​ന്വേ​ഷ​ണ​ത്തിൽ ഒരു ഏകാന്ത​പ​ഥി​കൻ

സ്‌പെയിനിലെ ഉണരുക! ലേഖകൻ

സ്വിറ്റ്‌സർലൻഡിലെ ജനീവ​യിൽ 1553 ഒക്ടോബർ 27-ന്‌ മൈക്കിൾ സെർവീ​റ്റ​സി​നെ ഒരു സ്‌തം​ഭ​ത്തിൽ ചുട്ടെ​രി​ച്ചു. ജോൺ കാൽവി​ന്റെ ഉപദേ​ഷ്ടാ​വും സെർവീ​റ്റ​സി​ന്റെ വധത്തിന്റെ സൂത്ര​ധാ​ര​നു​മായ ഗിയോം ഫാരൽ കാണി​കൾക്ക്‌ ഇങ്ങനെ മുന്നറി​യി​പ്പു നൽകി: “താൻ പഠിപ്പി​ക്കു​ന്നതു സത്യമാ​ണെന്നു വിശ്വ​സി​ച്ചി​രുന്ന ഒരു ജ്ഞാനി​യാ​യി​രു​ന്നു സെർവീ​റ്റസ്‌. പക്ഷേ അയാൾ പിശാ​ചി​ന്റെ സ്വാധീ​ന​ത്തിൽ വീണു​പോ​യി. . . . നിങ്ങൾക്കും ഈ ഗതി വരാതെ സൂക്ഷി​ക്കുക!” ഇത്ര ഭീതി​ദ​മായ മരണശിക്ഷ അർഹി​ക്കുന്ന എന്തു തെറ്റാണ്‌ ഈ ഹതഭാ​ഗ്യൻ ചെയ്‌തത്‌?

മൈക്കിൾ സെർവീ​റ്റസ്‌ 1511-ൽ സ്‌പെ​യി​നി​ലെ ബില്യാൻവാ​ബാ ഡി സിക്കേന എന്ന ഗ്രാമ​ത്തി​ലാ​ണു ജനിച്ചത്‌. ചെറുപ്പം മുതലേ അദ്ദേഹം പഠനത്തിൽ ബഹുസ​മർഥ​നാ​യി​രു​ന്നു. ഒരു ജീവച​രി​ത്ര​കാ​രൻ പറയു​ന്ന​ത​നു​സ​രിച്ച്‌ “പതിന്നാ​ലു വയസ്സാ​യ​പ്പോ​ഴേ​ക്കും സെർവീ​റ്റസ്‌ ഗ്രീക്ക്‌, ലത്തീൻ, എബ്രായ എന്നീ ഭാഷകൾ വശമാ​ക്കി​യി​രു​ന്നു. കൂടാതെ തത്ത്വശാ​സ്‌ത്രം, ഗണിത​ശാ​സ്‌ത്രം, ദൈവ​ശാ​സ്‌ത്രം എന്നിവ​യി​ലും വേണ്ടത്ര അറിവു​നേ​ടി​യി​രു​ന്നു.”

കൗമാ​ര​പ്രാ​യ​ക്കാ​ര​നായ സെർവീ​റ്റ​സി​നെ സ്‌പെ​യി​നി​ലെ ചാൾസ്‌ അഞ്ചാമൻ ചക്രവർത്തി​യു​ടെ സ്വകാ​ര്യ​പു​രോ​ഹി​ത​നായ ഹ്വാൻ കെന്റാനാ അദ്ദേഹ​ത്തി​ന്റെ സഹായി​യാ​യി നിയമി​ച്ചു. ഔദ്യോ​ഗിക യാത്ര​ക​ളിൽ അദ്ദേഹ​ത്തോ​ടൊ​പ്പം പോകു​മാ​യി​രുന്ന സെർവീ​റ്റ​സിന്‌ സ്‌പെ​യി​നി​ലെ മതഭി​ന്ന​ത​ക​ളു​ടെ അടി​വേ​രു​കൾ കണ്ടെത്താ​നാ​യി. സ്‌പെ​യി​നിൽ യഹൂദ​രെ​യും മുസ്ലീ​ങ്ങ​ളെ​യും നാടു​ക​ട​ത്തു​ക​യോ നിർബ​ന്ധി​ച്ചു കത്തോ​ലി​ക്കാ​മ​ത​ത്തിൽ ചേർക്കു​ക​യോ ചെയ്‌തി​രു​ന്നു.a

പതിനാ​റാം വയസ്സിൽ സെർവീ​റ്റസ്‌ നിയമ​ബി​രു​ദം നേടാ​നാ​യി ഫ്രാൻസി​ലെ ടൂലൂസ്‌ യൂണി​വേ​ഴ്‌സി​റ്റി​യിൽ ചേർന്നു. അവി​ടെ​വെ​ച്ചാണ്‌ അദ്ദേഹം ആദ്യമാ​യി സമ്പൂർണ ബൈബിൾ കാണു​ന്നത്‌. ബൈബിൾ വായി​ക്കു​ന്നത്‌ കർശന​മാ​യി വിലക്കി​യി​രു​ന്നെ​ങ്കി​ലും അദ്ദേഹം രഹസ്യ​മാ​യി അതു വായിച്ചു. ആദ്യവാ​യന പൂർത്തി​യാ​ക്കിയ സെർവീ​റ്റസ്‌ ഇനി “ഒരായി​രം വട്ടം” അതു വായി​ക്കു​മെന്നു ശപഥം ചെയ്‌തു. ടൂലൂ​സി​ലാ​യി​രു​ന്ന​പ്പോൾ അദ്ദേഹം പഠിച്ചത്‌ കോം​പ്ലൂ​ട്ടെൻസി​യാൻ പോളി​ഗ്ലൊട്ട്‌ എന്ന ബൈബിൾ ഭാഷാ​ന്തരം ആയിരി​ക്കാം. അത്‌ ലത്തീൻ വിവർത്ത​ന​ത്തോ​ടൊ​പ്പം എബ്രായ, ഗ്രീക്ക്‌ എന്നീ മൂലഭാ​ഷ​ക​ളി​ലും തിരു​വെ​ഴു​ത്തു​കൾ വായി​ക്കാൻ അവസര​മേകി.b ബൈബി​ളി​ന്റെ പഠന​ത്തോ​ടൊ​പ്പം സ്‌പെ​യി​നി​ലെ പുരോ​ഹി​ത​വൃ​ന്ദ​ത്തി​നി​ട​യിൽ നടമാ​ടിയ ധാർമിക അധഃപ​തനം കാണു​ക​യും​കൂ​ടി ചെയ്‌ത​പ്പോൾ കത്തോ​ലി​ക്കാ​മ​ത​ത്തി​ലുള്ള സെർവീ​റ്റ​സി​ന്റെ വിശ്വാ​സ​ത്തിന്‌ ഇളക്കം തട്ടി.

ചാൾസ്‌ അഞ്ചാമൻ രാജാ​വി​ന്റെ കിരീ​ട​ധാ​ര​ണ​ച്ച​ട​ങ്ങിൽ പങ്കെടു​ത്ത​പ്പോൾ സെർവീ​റ്റ​സി​ന്റെ സംശയ​ങ്ങൾക്ക്‌ ആക്കം കൂടി. സ്‌പെ​യി​നി​ലെ രാജാ​വി​നെ ക്ലെമന്റ്‌ ഏഴാമൻ പാപ്പാ വിശുദ്ധ റോമാ​സാ​മ്രാ​ജ്യ​ത്തി​ന്റെ ചക്രവർത്തി​യാ​യി അവരോ​ധി​ച്ചു. രാജാ​വി​നെ സ്വീക​രി​ക്കാൻ സിംഹാ​സ​ന​ത്തിൽ എഴു​ന്നെ​ള്ളി​ച്ചു​കൊ​ണ്ടു​വന്ന പാപ്പാ​യു​ടെ പാദങ്ങ​ളിൽ രാജാവ്‌ ചുംബ​ന​മർപ്പി​ച്ചു. സെർവീ​റ്റസ്‌ പിന്നീട്‌ ഇപ്രകാ​രം എഴുതി: “പാപ്പായെ സർവാ​ഢം​ബര വിഭൂ​ഷി​ത​നാ​യി രാജകു​മാ​ര​ന്മാ​രു​ടെ ചുമലി​ലേറ്റി എഴു​ന്നെ​ള്ളി​ക്കു​ന്ന​തും അദ്ദേഹ​ത്തിന്‌ സ്‌തു​ത്യാ​ദ​രങ്ങൾ അർപ്പി​ച്ചു​കൊ​ണ്ടു ജനങ്ങൾ നഗരവീ​ഥി​ക​ളിൽ തടിച്ചു​കൂ​ടി​യി​രി​ക്കു​ന്ന​തും ഞാൻ നേരിൽ കാണാൻ ഇടയായി.” അവിടെ കണ്ട അതിരു​ക​വിഞ്ഞ ആർഭാ​ട​ങ്ങ​ളെ​യും ധാരാ​ളി​ത്ത​ത്തെ​യും സുവി​ശേ​ഷ​ങ്ങ​ളി​ലെ ലാളി​ത്യ​വു​മാ​യി പൊരു​ത്ത​പ്പെ​ടു​ത്താൻ അദ്ദേഹ​ത്തി​നു കഴിഞ്ഞില്ല.

മതസത്യ​ങ്ങൾക്കാ​യുള്ള അദ്ദേഹ​ത്തി​ന്റെ ദാഹം

കെന്റാ​നാ​യു​ടെ കൂടെ​യുള്ള ജോലി ആർക്കും സംശയ​മു​ള​വാ​ക്കാ​ത്ത​വി​ധം ഉപേക്ഷിച്ച സെർവീ​റ്റസ്‌ സത്യം തേടി​യുള്ള തന്റെ ഏകാന്ത​യാ​ത്ര തുടങ്ങി. ക്രിസ്‌തു​വി​ന്റെ സന്ദേശം ദൈവ​ശാ​സ്‌ത്ര​ജ്ഞ​രെ​യും തത്ത്വചി​ന്ത​ക​രെ​യും ഉദ്ദേശി​ച്ചു​ള്ള​താ​യി​രു​ന്നില്ല പകരം അതു മനസ്സി​ലാ​ക്കി അതനു​സ​രി​ച്ചു പ്രവർത്തി​ക്കുന്ന സാധാ​ര​ണ​ക്കാർക്കു വേണ്ടി​യു​ള്ള​താ​ണെന്ന്‌ അദ്ദേഹം വിശ്വ​സി​ച്ചു. അതു​കൊണ്ട്‌ ബൈബിൾ വാക്യങ്ങൾ മൂലഭാ​ഷ​ക​ളിൽത്തന്നെ പരി​ശോ​ധി​ക്കാ​നും തിരു​വെ​ഴു​ത്തി​നു വിരു​ദ്ധ​മായ പഠിപ്പി​ക്ക​ലു​കളെ തള്ളിക്ക​ള​യാ​നും അദ്ദേഹം തീരു​മാ​നി​ച്ചു. അദ്ദേഹ​ത്തി​ന്റെ കൃതി​ക​ളിൽ “സത്യം” എന്ന പദവും അതി​നോ​ടു ബന്ധപ്പെട്ട പദങ്ങളും മറ്റേ​തൊ​രു പദത്തെ​ക്കാ​ളും കൂടെ​ക്കൂ​ടെ കാണു​ന്നു​വെ​ന്നത്‌ ശ്രദ്ധേ​യ​മാണ്‌.

ചരി​ത്ര​ത്തി​ന്റെ​യും ബൈബി​ളി​ന്റെ​യും പഠനത്തിൽനിന്ന്‌ ക്രിസ്‌ത്യാ​നി​ത്വം ആദ്യ മൂന്നു നൂറ്റാ​ണ്ടു​ക​ളിൽത്തന്നെ കളങ്ക​പ്പെ​ട്ട​താ​യി സെർവീ​റ്റസ്‌ തിരി​ച്ച​റി​ഞ്ഞു. കോൺസ്റ്റ​ന്റ​യ്‌നും പിൻഗാ​മി​ക​ളും വ്യാ​ജോ​പ​ദേ​ശങ്ങൾ ഉന്നമി​പ്പി​ച്ച​താണ്‌ ക്രമേണ ത്രി​ത്വോ​പ​ദേശം ഒരു ഔദ്യോ​ഗിക പഠിപ്പി​ക്ക​ലാ​യി സ്വീക​രി​ക്കു​ന്ന​തി​ലേക്കു നയിച്ച​തെന്ന്‌ അദ്ദേഹ​ത്തി​നു മനസ്സി​ലാ​യി. 20-ാമത്തെ വയസ്സിൽ സെർവീ​റ്റസ്‌ ത്രി​ത്വോ​പ​ദേ​ശ​ത്തി​ലെ പാളി​ച്ചകൾ (ഇംഗ്ലീഷ്‌) എന്ന തന്റെ കൃതി പ്രകാ​ശനം ചെയ്‌തു. മതവി​ചാ​ര​ണ​യു​ടെ പ്രതി​ക്കൂ​ട്ടി​ലേക്ക്‌ അദ്ദേഹത്തെ വലിച്ചി​ഴച്ച മുഖ്യ​കാ​ര​ണ​മാ​യി​രു​ന്നു ഈ പുസ്‌തകം.

സെർവീ​റ്റ​സി​നു കാര്യങ്ങൾ വളരെ വ്യക്തമാ​യി​രു​ന്നു. അദ്ദേഹം എഴുതി: “ബൈബി​ളിൽ ത്രിത്വ​ത്തെ​ക്കു​റി​ച്ചുള്ള ഒരു പരാമർശം​പോ​ലും ഇല്ല. . . . നാം അഭിമാ​നം​കൊ​ള്ളുന്ന തത്ത്വശാ​സ്‌ത്ര സങ്കൽപ്പ​ങ്ങ​ളി​ലൂ​ടെയല്ല നാം ദൈവ​ത്തെ​ക്കു​റിച്ച്‌ അറിയു​ന്നത്‌, മറിച്ച്‌ ക്രിസ്‌തു​വി​ലൂ​ടെ​യാണ്‌.”c കൂടാതെ പരിശു​ദ്ധാ​ത്മാവ്‌ ഒരു വ്യക്തിയല്ല പകരം ദൈവ​ത്തി​ന്റെ പ്രവർത്ത​ന​നി​ര​ത​മായ ശക്തിയാണ്‌ എന്നും അദ്ദേഹം മനസ്സി​ലാ​ക്കി​യി​രു​ന്നു.

സെർവീ​റ്റ​സിന്‌ ചില അനുകൂല പ്രതി​ക​ര​ണങ്ങൾ സൃഷ്ടി​ക്കാ​നാ​യി. പ്രൊ​ട്ട​സ്റ്റന്റ്‌ നവീകർത്താ​വായ സെബാ​സ്റ്റ്യൻ ഫ്രാങ്ക്‌ ഇപ്രകാ​രം എഴുതി: “സ്‌പെ​യിൻകാ​ര​നായ സെർവീ​റ്റസ്‌ ദൈവം ഏകനാ​ണെന്നു തന്റെ ലഘു​ലേ​ഖ​യിൽ സമർഥി​ക്കു​ന്നു. റോമൻ സഭ മൂന്നാ​ളു​കൾ ചേർന്ന ഒരു ദൈവ​ത്തെ​ക്കു​റി​ച്ചാണ്‌ പഠിപ്പി​ക്കു​ന്നത്‌. ഞാൻ ആ സ്‌പെ​യിൻകാ​രന്റെ പക്ഷത്താണ്‌.” എന്തുത​ന്നെ​യാ​യാ​ലും റോമൻ കത്തോ​ലി​ക്കാ സഭയോ പ്രൊ​ട്ട​സ്റ്റന്റ്‌ സഭകളോ തങ്ങളുടെ അടിസ്ഥാന ഉപദേ​ശത്തെ ചോദ്യം ചെയ്‌ത സെർവീ​റ്റ​സി​നോ​ടു ക്ഷമിക്കാൻ കൂട്ടാ​ക്കി​യില്ല.

ബൈബിൾ പഠിച്ച​തി​ന്റെ ഫലമായി മറ്റു മതോ​പ​ദേ​ശ​ങ്ങ​ളും സെർവീ​റ്റസ്‌ തള്ളിക്ക​ളഞ്ഞു. പ്രതി​മ​ക​ളു​ടെ ഉപയോ​ഗം തിരു​വെ​ഴു​ത്തു​വി​രു​ദ്ധ​മാ​യി അദ്ദേഹം കണക്കാക്കി. ത്രി​ത്വോ​പ​ദേ​ശ​ത്തി​ലെ പാളി​ച്ചകൾ എന്ന പുസ്‌തകം പ്രകാ​ശനം ചെയ്‌ത്‌ ഒന്നരവർഷം കഴിഞ്ഞ​പ്പോൾ കത്തോ​ലി​ക്ക​രെ​യും പ്രൊ​ട്ട​സ്റ്റ​ന്റു​കാ​രെ​യും​കു​റിച്ച്‌ സെർവീ​റ്റസ്‌ ഇപ്രകാ​രം പറഞ്ഞു: “മതപഠി​പ്പി​ക്ക​ലു​ക​ളു​ടെ കാര്യ​ത്തിൽ ഏതെങ്കി​ലും ഒരു വിഭാഗം പൂർണ​മാ​യി ശരിയാ​ണെ​ന്നോ മറ്റേ വിഭാഗം പൂർണ​മാ​യി തെറ്റാ​ണെ​ന്നോ ഞാൻ പറയു​ന്നില്ല. കാരണം എന്റെ നോട്ട​ത്തിൽ ഇരുകൂ​ട്ട​രു​ടെ​യും പഠിപ്പി​ക്ക​ലു​ക​ളിൽ കുറെ സത്യവും കുറെ വ്യാജ​വും ഉണ്ട്‌. പക്ഷേ എല്ലാവ​രും മറ്റുള്ള​വ​രു​ടെ തെറ്റുകൾ കാണുന്നു, ആരും സ്വന്തം തെറ്റു തിരി​ച്ച​റി​യു​ന്നില്ല.” സത്യം തേടി​യുള്ള യാത്ര​യിൽ അദ്ദേഹം ഒറ്റയ്‌ക്കാ​യി​രു​ന്നു.d

സത്യാ​ന്വേ​ഷ​ണ​ത്തിൽ ആത്മാർഥത പുലർത്തി​യി​രു​ന്നെ​ങ്കി​ലും സെർവീ​റ്റസ്‌ ചില തെറ്റായ നിഗമ​ന​ങ്ങ​ളിൽ എത്തി​ച്ചേർന്നു. ഉദാഹ​ര​ണ​മാ​യി അർമ​ഗെ​ദോ​നും ക്രിസ്‌തു​വി​ന്റെ സഹസ്രാ​ബ്ദ​വാ​ഴ്‌ച​യും തന്റെ ജീവി​ത​കാ​ല​ത്തു​തന്നെ സംഭവി​ക്കു​മെന്ന്‌ അദ്ദേഹം കരുതി.

ശാസ്‌ത്രീയ സത്യങ്ങൾക്കാ​യുള്ള അന്വേ​ഷ​ണം

പീഡക​രിൽനി​ന്നും പലായനം ചെയ്‌ത സെർവീ​റ്റസ്‌ തന്റെ പേര്‌ വീയാ​നോ​വാ​നൂസ്‌ എന്നാക്കി മാറ്റി. അദ്ദേഹം പാരീ​സിൽ താമസ​മാ​ക്കി. അവി​ടെ​വെച്ച്‌ കലയി​ലും വൈദ്യ​ശാ​സ്‌ത്ര​ത്തി​ലും ബിരുദം നേടി. ശാസ്‌ത്രീ​യ​കാ​ര്യ​ങ്ങ​ളി​ലെ ജിജ്ഞാസ നിമിത്തം അദ്ദേഹം ശരീരാ​വ​യ​വ​ങ്ങളെ കീറി​മു​റി​ച്ചു പരി​ശോ​ധിച്ച്‌ അതിന്റെ ഘടനയും പ്രവർത്ത​ന​ങ്ങ​ളും മനസ്സി​ലാ​ക്കി. ശ്വാസ​കോശ-രക്തചം​ക്രമണ വ്യവസ്ഥ​യെ​ക്കു​റി​ച്ചു വിവരിച്ച ആദ്യത്തെ യൂറോ​പ്യ​നാ​യി​രി​ക്കാം ഒരുപക്ഷേ സെർവീ​റ്റസ്‌. ഇതേക്കു​റിച്ച്‌ ക്രിസ്‌ത്യാ​നി​ത്വ​ത്തി​ന്റെ പുനരു​ദ്ധാ​രണം (ഇംഗ്ലീഷ്‌) എന്ന കൃതി​യിൽ അദ്ദേഹം വിവരി​ക്കു​ന്നുണ്ട്‌. രക്തപര്യ​യ​ന​വ്യ​വ​സ്ഥ​യെ​ക്കു​റി​ച്ചുള്ള ഒരു പൂർണ​ചി​ത്രം വില്യം ഹാർവി അവതരി​പ്പി​ക്കു​ന്ന​തിന്‌ 75 വർഷം മുമ്പാ​യി​രു​ന്നു സെർവീ​റ്റ​സി​ന്റെ ഈ വിവരണം.

ടോള​മി​യു​ടെ ജിയോ​ഗ്രഫി എന്ന ഗ്രന്ഥത്തി​ന്റെ ഒരു പരിഷ്‌ക​രിച്ച പതിപ്പ്‌ സെർവീ​റ്റസ്‌ തയ്യാറാ​ക്കി. അതു വൻവി​ജ​യ​മാ​യി​രു​ന്നു. തന്നിമി​ത്തം ചിലർ അദ്ദേഹത്തെ താരത​മ്യ​ഭൂ​മി​ശാ​സ്‌ത്ര​ത്തി​ന്റെ​യും വംശവി​വ​ര​ണ​ശാ​സ്‌ത്ര​ത്തി​ന്റെ​യും പിതാവ്‌ എന്നു വിളി​ക്കു​ക​യു​ണ്ടാ​യി. പിന്നീട്‌ ജനീവ​യിൽ നടന്ന സെർവീ​റ്റ​സി​ന്റെ വിചാ​ര​ണാ​വേ​ള​യിൽ, പാലസ്‌തീ​നെ​ക്കു​റിച്ച്‌ ഫലഭൂ​യി​ഷ്‌ഠ​മ​ല്ലാത്ത തരിശു​ഭൂ​മി എന്ന്‌ അദ്ദേഹം നടത്തിയ പ്രസ്‌താ​വ​ന​യെ​ച്ചൊ​ല്ലി ആരോ​പ​ണ​മു​യർന്നു. എന്നാൽ താൻ വിവരി​ച്ചത്‌ ഇപ്പോ​ഴത്തെ പാലസ്‌തീ​നെ​ക്കു​റി​ച്ചാണ്‌, മോ​ശെ​യു​ടെ നാളിലെ പാലും തേനും ഒഴുകുന്ന പാലസ്‌തീ​നെ​ക്കു​റി​ച്ചല്ല എന്ന്‌ അദ്ദേഹം പ്രതി​വാ​ദം നടത്തി.

സെർവീ​റ്റസ്‌ യൂണി​വേ​ഴ്‌സൽ ട്രീറ്റീസ്‌ ഓൺ സിറപ്‌സ്‌ എന്നൊരു പുസ്‌ത​ക​വും എഴുതി. ഇത്‌ പഴങ്ങളു​ടെ സത്ത്‌ ഉപയോ​ഗി​ച്ചുള്ള ചികി​ത്സാ​രീ​തി സംബന്ധിച്ച്‌ സന്തുലി​ത​മായ ഒരു പുതിയ വീക്ഷണം പ്രദാനം ചെയ്‌തു. അതിൽ അടങ്ങി​യി​രുന്ന വൈദ്യ​ശാ​സ്‌ത്ര​വി​ജ്ഞാ​നം അദ്ദേഹത്തെ ഔഷധ​ശാ​സ്‌ത്ര​രം​ഗ​ത്തും വിറ്റാ​മി​നു​ക​ളു​ടെ ഉപയോ​ഗ​ത്തി​ലും ഒരു മാർഗ​ദർശി​യാ​ക്കി. നാനാ​തു​റ​ക​ളി​ലുള്ള സെർവീ​റ്റ​സി​ന്റെ വൈദ​ഗ്‌ധ്യം കണക്കാക്കി “മാനവ​രാ​ശി​യു​ടെ അറിവി​ന്റെ ഭണ്ഡാര​ത്തി​ലേക്കു വില​യേ​റിയ സംഭാ​വ​നകൾ അർപ്പിച്ച ബഹുമു​ഖ​പ്ര​തി​ഭ​ക​ളിൽ ഒരാളാ​യി” ഒരു ചരി​ത്ര​കാ​രൻ അദ്ദേഹത്തെ വിശേ​ഷി​പ്പി​ച്ചു.

ഒരു ശക്തനായ എതിരാ​ളി

സത്യാ​ന്വേ​ഷി​കൾക്ക്‌ എക്കാല​ത്തും നിരവധി എതിരാ​ളി​കൾ ഉണ്ടായി​രു​ന്നി​ട്ടുണ്ട്‌. (ലൂക്കൊസ്‌ 21:15) ജനീവ​യിൽ പ്രൊ​ട്ട​സ്റ്റന്റ്‌ ആശയത്തി​ലുള്ള ഏകാധി​പ​ത്യ​ഭ​രണം സ്ഥാപിച്ച ജോൺ കാൽവിൻ അതിൽ ഒരാളാ​യി​രു​ന്നു. ചരി​ത്ര​കാ​ര​നായ വിൽ ഡ്യൂറ​ന്റി​ന്റെ അഭി​പ്രാ​യ​ത്തിൽ “കാൽവിൻ മേധാ​വി​ത്വം പുലർത്തി​യി​രു​ന്നത്‌ നിയമ​ത്തി​ലൂ​ടെ​യോ അടിച്ച​മർത്ത​ലി​ലൂ​ടെ ആയിരു​ന്നില്ല മറിച്ച്‌ നിശ്ചയ​ദാർഢ്യ​വും ശക്തമായ വ്യക്തി​ത്വ​വും ഉപയോ​ഗി​ച്ചാ​യി​രു​ന്നു. കൂടാതെ എന്തു വിശ്വ​സി​ക്ക​ണ​മെന്ന്‌ സ്വന്തമാ​യി തീരു​മാ​ന​മെ​ടു​ത്തി​രു​ന്ന​വരെ എതിർക്കുന്ന കാര്യ​ത്തിൽ പാപ്പാ​മാ​രെ​പ്പോ​ലെ​ത​ന്നെ​യാ​യി​രു​ന്നു അദ്ദേഹ​വും.”

സെർവീ​റ്റ​സും കാൽവി​നും യുവാ​ക്ക​ളാ​യി​രു​ന്ന​പ്പോൾ സാധ്യ​ത​യ​നു​സ​രിച്ച്‌ പാരീ​സിൽവെച്ചു കണ്ടുമു​ട്ടി​യി​രി​ക്കാം. തുടക്കം​മു​തൽത്തന്നെ വ്യക്തി​ത്വ​ഭി​ന്ന​തകൾ ഉടലെ​ടു​ക്കു​ക​യും കാൽവിൻ സെർവീ​റ്റ​സി​ന്റെ ബദ്ധശ​ത്രു​വാ​യി​ത്തീ​രു​ക​യും ചെയ്‌തു. പ്രൊ​ട്ട​സ്റ്റന്റ്‌ മതനവീ​കരണ പ്രസ്ഥാ​ന​ത്തി​നു നേതൃ​ത്വം വഹിച്ച കാൽവിൻ കത്തോ​ലി​ക്കാ മതവി​ചാ​ര​ണ​സം​ഘ​ത്തി​ന്റെ മുമ്പാകെ സെർവീ​റ്റ​സി​നെ​തി​രെ കുറ്റാ​രോ​പണം നടത്തി. സെർവീ​റ്റസ്‌ ഫ്രാൻസിൽനി​ന്നു കഷ്ടിച്ചു രക്ഷപ്പെട്ടു. എന്നാൽ അവിടെ അദ്ദേഹ​ത്തി​ന്റെ കോലം കത്തിച്ചു. എന്നിരു​ന്നാ​ലും ഫ്രാൻസി​ന്റെ അതിർത്തി​യി​ലുള്ള ജനീവ​ന​ഗ​ര​ത്തിൽവെച്ച്‌ അദ്ദേഹത്തെ പിടി​കൂ​ടു​ക​യും ജയിലി​ല​ട​യ്‌ക്കു​ക​യും ചെയ്‌തു. അവിടെ കാൽവി​ന്റെ വാക്കാ​യി​രു​ന്നു നിയമം.

സെർവീ​റ്റ​സി​ന്റെ​മേൽ കടുത്ത മർദ്ദന​മു​റകൾ പ്രയോ​ഗി​ക്കാൻ കാൽവിൻ നിർദേ​ശി​ച്ചു. എന്നിരു​ന്നാ​ലും വിചാ​ര​ണ​യ്‌ക്കി​ട​യിൽ കാൽവി​നു​മാ​യു​ണ്ടായ വാദ​പ്ര​തി​വാ​ദ​ത്തിൽ, ബോധ്യം വരുത്തുന്ന തിരു​വെ​ഴു​ത്ത​ധി​ഷ്‌ഠി​ത​മായ തെളി​വു​കൾ നൽകി​യാൽ തന്റെ ചിന്താ​ഗ​തി​ക്കു മാറ്റം​വ​രു​ത്താം എന്ന്‌ സെർവീ​റ്റസ്‌ പറഞ്ഞു. എന്നാൽ കാൽവിന്‌ തെളി​വു​കൾ നൽകാൻ കഴിഞ്ഞില്ല. വിചാ​ര​ണ​യ്‌ക്കു​ശേഷം അദ്ദേഹത്തെ സ്‌തം​ഭ​ത്തിൽ ചുട്ടെ​രി​ക്കാൻ വിധിച്ചു. കത്തോ​ലി​ക്കർ കോലം കത്തിക്കു​ക​യും പ്രൊ​ട്ട​സ്റ്റ​ന്റു​കാർ ജീവ​നോ​ടെ ചുട്ടെ​രി​ക്കു​ക​യും ചെയ്‌ത ഒരേ​യൊ​രു മത​വൈ​രി​യാ​യി​രു​ന്നു സെർവീ​റ്റസ്‌ എന്ന്‌ ചില ചരി​ത്ര​കാ​ര​ന്മാർ അവകാ​ശ​പ്പെ​ടു​ന്നു.

മതസ്വാ​ത​ന്ത്ര്യ​ത്തി​ന്റെ തേരാളി

കാൽവിന്‌ തന്റെ ശത്രു​വി​നെ ഇല്ലാതാ​ക്കാൻ കഴി​ഞ്ഞെ​ങ്കി​ലും മറ്റുള്ളവർ അദ്ദേഹ​ത്തി​ന്റെ വാക്കു​കൾക്കു വിലകൽപ്പി​ക്കാ​തെ​യാ​യി. സെർവീ​റ്റ​സി​ന്റെ വധം ഒരുത​ര​ത്തി​ലും നീതീ​ക​രി​ക്കാ​നാ​കാ​ത്ത​താ​യി​രു​ന്നു. അതു യൂറോ​പ്പി​ലു​ട​നീ​ള​മുള്ള ചിന്തി​ക്കുന്ന ആളുകളെ ചൊടി​പ്പി​ച്ചു. ഒപ്പം വ്യക്തി​സ്വാ​ത​ന്ത്ര്യ​ത്തി​നാ​യി വാദി​ക്കു​ന്ന​വർക്കു കരു​ത്തേ​കു​ക​യും ചെയ്‌തു. ആരും സ്വന്തം മതവി​ശ്വാ​സ​ങ്ങ​ളു​ടെ​പേ​രിൽ വധിക്ക​പ്പെ​ടാൻ ഇടയാ​ക​രു​തെന്ന്‌ അവർ ശക്തമായി വാദിച്ചു. മതസ്വാ​ത​ന്ത്ര്യ​ത്തി​നാ​യി മുമ്പെ​ന്ന​ത്തേ​ക്കാ​ളും വീറോ​ടെ പോരാ​ടാൻ അവർ നിശ്ചയി​ച്ചു​റച്ചു.

ഇറ്റലി​യു​ടെ കവിയായ കാമി​ല്ലൊ റെനാ​റ്റോ​യു​ടെ പ്രതി​ഷേധ വാക്കുകൾ ശ്രദ്ധി​ക്കുക: “ദൈവ​മോ ദൈവാ​ത്മാ​വോ ഇത്തരം നടപടി​യെ അനുകൂ​ലി​ച്ചി​ട്ടില്ല. തന്നെ എതിർത്ത​വ​രോ​ടു ക്രിസ്‌തു ഒരിക്ക​ലും ഈ വിധത്തിൽ പെരു​മാ​റി​യി​ട്ടില്ല.” കൂടാതെ ഫ്രഞ്ചു മാനവ​താ​വാ​ദി​യായ സെബാ​സ്റ്റ്യൻ ഷട്ടേയോ എഴുതി: “ഒരാളെ കൊല്ലു​ന്ന​തി​ലൂ​ടെ മതോ​പ​ദേശം സംരക്ഷി​ക്കാ​നാ​വില്ല, മറിച്ച്‌ അയാളു​ടെ ജീവന​ഷ്ട​ത്തി​നേ അത്‌ ഇടയാക്കൂ.” സെർവീ​റ്റ​സ്‌തന്നെ ഇപ്രകാ​രം പറഞ്ഞി​രു​ന്നു: “ചില തിരു​വെ​ഴു​ത്തു വ്യാഖ്യാ​ന​ങ്ങ​ളിൽ സംഭവി​ക്കുന്ന തെറ്റിന്റെ പേരിൽ ഒരാളെ കൊല്ലു​ന്നതു ഗൗരവ​മുള്ള ഒരു സംഗതി​യാണ്‌. കാരണം തിര​ഞ്ഞെ​ടു​ക്ക​പ്പെ​ട്ട​വർക്കു​പോ​ലും ചില​പ്പോൾ തെറ്റു​പ​റ്റി​യേ​ക്കാം.”

സെർവീ​റ്റ​സി​ന്റെ വധത്തിന്റെ ദൂരവ്യാ​പ​ക​ഫ​ല​ങ്ങ​ളെ​ക്കു​റിച്ച്‌ മൈക്കിൾ സെർവീ​റ്റസ്‌—ബുദ്ധി​രാ​ക്ഷസൻ, മാനവി​ക​താ​വാ​ദി, രക്തസാക്ഷി (ഇംഗ്ലീഷ്‌) എന്ന പുസ്‌തകം പറയുന്നു: “പൊതു​യു​ഗം നാലാം നൂറ്റാ​ണ്ടു​മു​തൽ പ്രബല​മാ​യി​രുന്ന പ്രത്യ​യ​ശാ​സ്‌ത്ര​ത്തി​നും ചിന്താ​ഗ​തി​ക്കും സെർവീ​റ്റ​സി​ന്റെ മരണം ഒരു വഴിത്തി​രി​വാ​യി.” ഈ പുസ്‌തകം തുടരു​ന്നു: “ചരി​ത്ര​പ​ര​മായ വീക്ഷണ​കോ​ണിൽനി​ന്നു നോക്കു​മ്പോൾ ആധുനിക സമൂഹ​ത്തി​നു മനസ്സാ​ക്ഷി​സ്വാ​ത​ന്ത്ര്യം എന്ന പൗരാ​വ​കാ​ശം അനുവ​ദി​ച്ചു​കി​ട്ടു​ന്ന​തിന്‌ അദ്ദേഹ​ത്തി​ന്റെ മരണം കാരണ​മാ​യി.”

1908-ൽ ഫ്രാൻസി​ലെ ആൻമാസ്‌ നഗരത്തിൽ സെർവീ​റ്റ​സി​ന്റെ ഒരു സ്‌മാ​രകം പണിതു​യർത്തി. അത്‌ അദ്ദേഹ​ത്തി​ന്റെ മരണസ്ഥ​ല​ത്തു​നി​ന്നും ഏകദേശം അഞ്ചു കിലോ​മീ​റ്റർ അകലെ​യാ​യി​രു​ന്നു. അതിലുള്ള ആലേഖനം ഇപ്രകാ​ര​മാണ്‌: “ഭൂമി​ശാ​സ്‌ത്ര​ജ്ഞ​നും ഡോക്ട​റും ശരീര​ധർമ ശാസ്‌ത്ര​ജ്ഞ​നും . . . ആയ മീഷൽ സെർവീറ്റ[സ്‌] തന്റെ ശാസ്‌ത്രീയ കണ്ടുപി​ടി​ത്ത​ങ്ങ​ളാ​ലും രോഗി​കൾക്കും ദരി​ദ്രർക്കും വേണ്ടി ചെയ്‌ത അകമഴിഞ്ഞ സേവന​ത്താ​ലും തന്റെ ചിന്താ​ഗ​തി​യും മനസ്സാ​ക്ഷി​യും മറ്റാർക്കും അടിയ​റ​വെ​ക്കാ​തെ കാത്തു​സൂ​ക്ഷി​ച്ച​തി​നാ​ലും മാനവ​രാ​ശി​യു​ടെ ക്ഷേമത്തി​നു സംഭാവന ചെയ്‌തു. അചഞ്ചല​മായ ഉറച്ച ബോധ്യ​ത്തി​ന്റെ ഉടമയാ​യി​രുന്ന അദ്ദേഹം സത്യത്തി​നു​വേണ്ടി സ്വന്തം ജീവൻ ബലിയർപ്പി​ച്ചു.”

[അടിക്കു​റി​പ്പു​കൾ]

[21-ാം പേജിലെ ചതുരം/ചിത്രങ്ങൾ]

സെർവീറ്റസും യഹോവ എന്ന നാമവും

സെർവീ​റ്റ​സി​ന്റെ സത്യാ​ന്വേ​ഷണം യഹോവ എന്ന നാമം ഉപയോ​ഗി​ക്കു​ന്ന​തി​ലേ​ക്കും അദ്ദേഹത്തെ നയിച്ചു. വില്യം ടിൻഡെയ്‌ൽ പഞ്ചഗ്ര​ന്ഥി​ക​ളു​ടെ വിവർത്ത​ന​ത്തിൽ ദൈവ​നാ​മം ഉൾപ്പെ​ടു​ത്തി ഏതാനും മാസത്തി​നു​ശേഷം സെർവീ​റ്റസ്‌ തന്റെ ത്രി​ത്വോ​പ​ദേ​ശ​ത്തി​ലെ പാളി​ച്ചകൾ എന്ന പുസ്‌ത​ക​ത്തി​ലു​ട​നീ​ളം യഹോവ എന്ന നാമം ഉൾപ്പെ​ടു​ത്തി. അദ്ദേഹം തന്റെ കൃതി​യിൽ ഇപ്രകാ​രം വിവരി​ച്ചു: “എല്ലാറ്റി​ലും അത്യു​ന്ന​ത​മാ​യി​രി​ക്കുന്ന മറ്റേ നാമമായ יהוה [യോദ്‌ഹെ​വൗ​ഹെ] . . . എന്നതിന്റെ അർഥം . . . ‘ആയിരി​ക്കാൻ അവൻ ഇടയാ​ക്കു​ന്നു,’ ‘അസ്‌തി​ത്വ​ത്തി​ലേക്ക്‌ കൊണ്ടു​വ​രു​ന്നവൻ,’ ‘കാരണ​ഭൂ​തൻ’ എന്നെല്ലാ​മാണ്‌. യഹോവ എന്ന നാമം പിതാ​വി​നു മാത്രമേ ഉചിത​മാ​യി യോജി​ക്കൂ.”

1542-ൽ, സാന്റേസ്‌ പാനി​നോ​യു​ടെ പ്രസി​ദ്ധ​മായ ലാറ്റിൻ ബൈബിൾ വിവർത്ത​ന​ത്തിൽ സെർവീ​റ്റസ്‌ ആവശ്യ​മായ തിരു​ത്ത​ലു​കൾ വരുത്തി (താഴെ കൊടു​ത്തി​രി​ക്കു​ന്നു). അതിന്റെ മാർജി​നി​ലെ വിപു​ല​മായ കുറി​പ്പു​ക​ളിൽ സെർവീ​റ്റസ്‌ ദൈവ​നാ​മം ഉപയോ​ഗി​ച്ചു​കൊണ്ട്‌ അതിന്റെ പ്രാധാ​ന്യം എടുത്തു​കാ​ട്ടി. സങ്കീർത്തനം 83:18 പോലുള്ള പ്രധാ​ന​പ്പെട്ട തിരു​വെ​ഴു​ത്തു​ക​ളിൽ മുഖ്യ​പാ​ഠ​ഭാ​ഗത്ത്‌ “കർത്താവ്‌” എന്ന പദം ഉപയോ​ഗി​ച്ചി​രി​ക്കു​ന്നി​ടത്ത്‌ മാർജി​നി​ലെ പരാമർശ​ങ്ങ​ളിൽ അദ്ദേഹം യഹോവ എന്ന നാമം ഉൾപ്പെ​ടു​ത്തി.

ക്രിസ്‌ത്യാ​നി​ത്വ​ത്തി​ന്റെ പുനരു​ദ്ധാ​രണം എന്ന തന്റെ അവസാ​ന​കൃ​തി​യിൽ യഹോവ എന്ന ദൈവ​നാ​മ​ത്തെ​ക്കു​റിച്ച്‌ സെർവീ​റ്റസ്‌ ഇപ്രകാ​രം പ്രസ്‌താ​വി​ച്ചു: “പുരാതന നാളു​ക​ളിൽ നിരവ​ധി​പേർ ഈ നാമം ഉച്ചരി​ച്ചി​രു​ന്നു​വെ​ന്നത്‌ . . . വ്യക്തമാണ്‌.”

[ചിത്രം]

ഫ്രാൻസിലുള്ള ആൻമാ​സി​ലെ സ്‌മാ​ര​കം

[18-ാം പേജിലെ ചിത്രം]

സ്‌പെയിനിലെ മുസ്ലീ​ങ്ങൾക്ക്‌ നിർബ​ന്ധിത മാമ്മോ​ദീസ നൽകുന്ന 15-ാം നൂറ്റാ​ണ്ടി​ലെ ഒരു കൊത്തു​പ​ണി

[കടപ്പാട്‌]

Capilla Real, Granada

[19-ാം പേജിലെ ചിത്രം]

“ത്രി​ത്വോ​പ​ദേ​ശ​ത്തി​ലെ പാളി​ച്ചകൾ” എന്ന പുസ്‌ത​ക​ത്തി​ന്റെ ആദ്യ​പേജ്‌

[കടപ്പാട്‌]

From the book De Trinitatis Erroribus, by Michael Servetus, 1531

[20-ാം പേജിലെ ചിത്രം]

സെർവീറ്റസ്‌ ശ്വാസ​കോശ -രക്തചം​ക്രമണ വ്യവസ്ഥ യെക്കു​റി​ച്ചു പഠനം നടത്തി

[കടപ്പാട്‌]

Anatomie descriptive et physiologique, Paris, 1866-7, L. Guérin, Editor

[20-ാം പേജിലെ ചിത്രം]

സെർവീറ്റസിന്റെ “യൂണി​വേ​ഴ്‌സൽ ട്രീറ്റീസ്‌ ഓൺ സിറപ്‌സ്‌” എന്ന പുസ്‌തകം ഔഷധ​ശാ​സ്‌ത്ര​രം​ഗത്ത്‌ മാർഗ​ദീ​പം തെളിച്ചു

[21-ാം പേജിലെ ചിത്രം]

ജോൺ കാൽവിൻ സെർവീ​റ്റ​സി​ന്റെ ബദ്ധശ​ത്രു​വാ​യി​ത്തീർന്നു

[കടപ്പാട്‌]

Biblioteca Nacional, Madrid

[18-ാം പേജിലെ ചിത്ര​ങ്ങൾക്ക്‌ കടപ്പാട്‌]

Biblioteca Nacional, Madrid