യുവജ​നങ്ങൾ ചോദി​ക്കു​ന്നു . . .

ഈ ദുശ്ശീലം എനി​ക്കെ​ങ്ങനെ ഉപേക്ഷി​ക്കാം?

“എട്ടു വയസ്സു​ള്ള​പ്പോൾ ഞാൻ സ്വയം​ഭോ​ഗം ചെയ്യാൻ തുടങ്ങി. ഇതു സംബന്ധിച്ച ദൈവ​ത്തി​ന്റെ വീക്ഷണം മനസ്സി​ലാ​ക്കി​യ​തി​നു​ശേഷം ഈ ദുശ്ശീ​ല​ത്തി​നു വഴങ്ങി​യ​പ്പോ​ഴൊ​ക്കെ എനിക്ക്‌ വല്ലാത്ത നിരാശ തോന്നി. ‘എന്നെ​പ്പോ​ലൊ​രു​വനെ ദൈവ​ത്തിന്‌ എങ്ങനെ സ്‌നേ​ഹി​ക്കാൻ സാധി​ക്കും?’ ഞാൻ ചിന്തിച്ചു. ദൈവ​ത്തി​ന്റെ പുതിയ ലോക​ത്തി​ലേക്ക്‌ കടക്കാ​നാ​വി​ല്ലെന്ന്‌ എനിക്കു​റ​പ്പാ​യി​രു​ന്നു.”—ലൂയിസ്‌.a

ഒരുപക്ഷേ നിങ്ങളും ലൂയി​സി​നെ​പ്പോ​ലെ സ്വയം​ഭോ​ഗം എന്ന ദുശ്ശീ​ല​ത്തി​ന്റെ അടിമ​യാ​യി​രി​ക്കാം. ദൈവ​ത്തി​ന്റെ പരിശു​ദ്ധാ​ത്മാ​വി​ന്റെ ഫലമായ ഇന്ദ്രി​യ​ജയം അഥവാ ആത്മനി​യ​ന്ത്രണം പ്രകട​മാ​ക്കി​ക്കൊണ്ട്‌ സംയമനം പാലി​ക്കാ​നാ​യാൽ അത്‌ യഹോ​വ​യാം ദൈവത്തെ വളരെ സന്തോ​ഷി​പ്പി​ക്കും എന്ന്‌ നിങ്ങൾക്ക​റി​യാം. (ഗലാത്യർ 5:22, 23; 2 പത്രൊസ്‌ 1:5, 6) പക്ഷേ ചില​പ്പോൾ നിങ്ങൾ പരാജ​യ​പ്പെ​ടു​ന്നു. ഓരോ വീഴ്‌ച​യ്‌ക്കു ശേഷവും, ദൈവ​ത്തി​ന്റെ നീതി​യുള്ള നിലവാ​ര​ങ്ങൾക്ക​നു​സ​രിച്ച്‌ ജീവി​ക്കാൻ കഴിയാത്ത ഒരു ‘പോക്കു​കേ​സാ​യി’ നിങ്ങൾ നിങ്ങ​ളെ​ത്തന്നെ മുദ്ര കുത്തുന്നു.

ഇതേ വീക്ഷണം തന്നെയാണ്‌ ചെറു​പ്പ​ക്കാ​ര​നായ പേ​ഡ്രോ​യ്‌ക്കു തന്നെക്കു​റി​ച്ചു​ണ്ടാ​യി​രു​ന്നത്‌. അവൻ പറയുന്നു: “പരാജ​യ​പ്പെ​ട്ട​പ്പോ​ഴെ​ല്ലാം എനിക്കു വളരെ വിഷമം തോന്നി. ഒരിക്ക​ലും പ്രായ​ശ്ചി​ത്തം ചെയ്യാ​നാ​വാത്ത ഒരു വലിയ തെറ്റ്‌ ചെയ്‌തെന്ന തോന്ന​ലാ​യി​രു​ന്നു എനിക്ക്‌. പ്രാർഥി​ക്കാൻ പോലും എനിക്കു വിഷമ​മാ​യി​രു​ന്നു. ‘യഹോവേ, ഈ പ്രാർഥന നീ കേൾക്കു​മോ​യെന്ന്‌ എനിക്ക​റി​യില്ല, എന്നാലും  . . .’ എന്നു പറഞ്ഞു​കൊണ്ട്‌ ഞാൻ തുടങ്ങു​മാ​യി​രു​ന്നു.” ആൻഡ്രേ എന്ന ചെറു​പ്പ​ക്കാ​ര​നും സമാന​മാ​യി ചിന്തിച്ചു, അവൻ പറയുന്നു: “ഒരു കപടനാ​ട്യ​ക്കാ​ര​നാണ്‌ ഞാനെന്ന്‌ എനിക്കു തോന്നി, രാവിലെ കിടക്ക​യിൽ നിന്നെ​ഴു​ന്നേറ്റ്‌ മുന്നി​ലുള്ള ദിവസത്തെ അഭിമു​ഖീ​ക​രി​ക്കു​ന്നത്‌ വളരെ ബുദ്ധി​മു​ട്ടുള്ള സംഗതി ആയിരു​ന്നു. ക്രിസ്‌തീയ യോഗ​ങ്ങ​ളിൽ സംബന്ധി​ക്കാ​നും വയൽ ശുശ്രൂ​ഷ​യിൽ പങ്കുപ​റ്റാ​നും ഞാൻ വളരെ പാടു​പെട്ടു.”

മേൽപ്പറഞ്ഞ ലൂയിസ്‌, പേഡ്രോ, ആൻഡ്രേ എന്നിവ​രെ​പ്പോ​ലെ​യാ​ണോ നിങ്ങളും ചിന്തി​ക്കു​ന്നത്‌? അങ്ങനെ​യാ​ണെ​ങ്കിൽ പോലും പരിഹാ​ര​മുണ്ട്‌. ഇതു നിങ്ങളു​ടെ മാത്രം പ്രശ്‌നമല്ല, നിങ്ങളു​ടെ സാഹച​ര്യം പ്രതീ​ക്ഷ​യ​റ്റ​തു​മല്ല. അനേകം ചെറു​പ്പ​ക്കാ​രും എന്തിന്‌ മുതിർന്ന​വ​രും സ്വയം​ഭോ​ഗ​വു​മാ​യി മല്ലടി​ച്ചി​ട്ടുണ്ട്‌, അത്‌ ഉപേക്ഷി​ക്കു​ന്ന​തിൽ വിജയി​ച്ചി​ട്ടു​മുണ്ട്‌. നിങ്ങൾക്കും വിജയി​ക്കാ​നാ​കും.b

അതിരു​കടന്ന കുറ്റ​ബോ​ധം തരണം ചെയ്യുക

സ്വയം​ഭോ​ഗം എന്ന ശീലത്തിന്‌ കീഴ്‌പെ​ട്ട​വരെ കുറ്റ​ബോ​ധം പലപ്പോ​ഴും വേട്ടയാ​ടു​ന്ന​താ​യി നാം കണ്ടുക​ഴി​ഞ്ഞു. ഈ ശീലം തരണം ചെയ്യാൻ “ദൈവി​ക​മായ . . . ദുഃഖം” നിങ്ങൾക്കൊ​രു ഉത്തേജ​ന​മാ​കും എന്നതിനു സംശയ​മില്ല. (2 കൊരി​ന്ത്യർ 7:11, ന്യൂ ഇൻഡ്യ ബൈബിൾ ഭാഷാ​ന്തരം) എന്നാൽ അതിരു കടന്ന കുറ്റ​ബോ​ധം വിപരീ​ത​ഫ​ല​മാ​യി​രി​ക്കാം ഉളവാ​ക്കുക. അത്‌ നിങ്ങളെ നിരാ​ശ​യു​ടെ പടുകു​ഴി​യി​ലേക്ക്‌ താഴ്‌ത്തി​ക്ക​ള​ഞ്ഞേ​ക്കാം, ഫലമോ ഈ ദുശ്ശീ​ല​ത്തി​നെ​തി​രെ​യുള്ള പോരാ​ട്ടം നിങ്ങൾ നിറു​ത്തി​ക്ക​ള​യും.—സദൃശ​വാ​ക്യ​ങ്ങൾ 24:10.

അതു​കൊണ്ട്‌ ഇക്കാര്യം സംബന്ധിച്ച്‌ ഒരു സമഗ്ര​വീ​ക്ഷണം നേടാൻ ശ്രമി​ക്കു​ന്നത്‌ നന്നായി​രി​ക്കും. സ്വയം​ഭോ​ഗം ഒരുതരം അശുദ്ധി​യാണ്‌. അത്‌ നിങ്ങളിൽ മാനസി​ക​മാ​യി ദുഷി​പ്പി​ക്കുന്ന മനോ​ഭാ​വങ്ങൾ വളർത്തു​ക​യും നിങ്ങളെ ‘നാനാ​മോ​ഹ​ങ്ങൾക്കും ഭോഗ​ങ്ങൾക്കും അധീനരാ’ക്കുകയും ചെയ്യും. (തീത്തൊസ്‌ 3:3) അതേസ​മയം സ്വയം​ഭോ​ഗം പരസംഗം പോലുള്ള ഗുരു​ത​ര​മായ ലൈം​ഗിക അധാർമി​ക​ത​യു​ടെ ഗണത്തിൽ പെടു​ന്നില്ല. (എഫെസ്യർ 4:19) അതു​കൊണ്ട്‌ സ്വയം​ഭോ​ഗം നിങ്ങളു​ടെ​യൊ​രു പ്രശ്‌ന​മാ​ണെ​ങ്കിൽ, ക്ഷമ ലഭിക്കാത്ത ഒരു പാപം ചെയ്‌തു എന്ന നിഗമ​ന​ത്തിൽ നിങ്ങൾ എത്തേണ്ട​തില്ല. മനസ്സിൽ പിടി​ക്കേണ്ട സംഗതി ഇതാണ്‌, ഈ ദുശ്ശീ​ല​ത്തി​നു വഴങ്ങാ​നുള്ള പ്രലോ​ഭ​നത്തെ ചെറു​ക്കുക, കൂടാതെ അതി​നെ​തി​രെ​യുള്ള പോരാ​ട്ടം ഒരിക്ക​ലും ഉപേക്ഷി​ക്കു​ക​യു​മ​രുത്‌!

ഒരു വീഴ്‌ച​യ്‌ക്കു​ശേഷം നിരാ​ശ​യിൽ ആണ്ടു​പോ​കാൻ ചില​പ്പോൾ എളുപ്പ​മാണ്‌. അങ്ങനെ സംഭവി​ക്കു​മ്പോൾ, സദൃശ​വാ​ക്യ​ങ്ങൾ 24:16-ലെ “നീതി​മാൻ ഏഴു പ്രാവ​ശ്യം വീണാ​ലും എഴു​ന്നേ​ല്‌ക്കും; ദുഷ്ടന്മാ​രോ അനർത്ഥ​ത്തിൽ നശിച്ചു​പോ​കും” എന്ന വാക്കുകൾ ഓർമി​ക്കുക. താത്‌കാ​ലി​ക​മാ​യി ഉണ്ടായ ഒരു തിരി​ച്ചടി നിങ്ങളെ ഒരു ദുഷ്ടമ​നു​ഷ്യ​നാ​ക്കു​ന്നില്ല. അതു​കൊണ്ട്‌ ശ്രമം ഉപേക്ഷി​ക്ക​രുത്‌. പകരം എന്താണ്‌ ഇത്തവണ അതി​ലേക്കു നയിച്ച​തെന്നു വിശക​ലനം ചെയ്യുക, എന്നിട്ട്‌ അവ ഒഴിവാ​ക്കാൻ ശ്രമി​ക്കുക.

ഈ ദുശ്ശീ​ല​ത്തെ​പ്രതി സ്വയം പഴിച്ചു​കൊ​ണ്ടി​രി​ക്കു​ന്ന​തി​നു പകരം, യഹോ​വ​യു​ടെ സ്‌നേ​ഹ​ത്തെ​യും കരുണ​യെ​യും കുറിച്ചു ധ്യാനി​ക്കുക. ബലഹീ​ന​തകൾ ഉണ്ടായി​രുന്ന സങ്കീർത്ത​ന​ക്കാ​ര​നായ ദാവീദ്‌ എഴുതി: “അപ്പന്നു മക്കളോ​ടു കരുണ തോന്നു​ന്നതു പോലെ യഹോ​വെക്കു തന്റെ ഭക്തന്മാ​രോ​ടു കരുണ തോന്നു​ന്നു. അവൻ നമ്മുടെ പ്രകൃതി അറിയു​ന്നു​വ​ല്ലോ; നാം പൊടി എന്നു അവൻ ഓർക്കു​ന്നു.” (സങ്കീർത്തനം 103:13, 14) അതേ, അപൂർണത കണക്കി​ലെ​ടു​ത്തു​കൊണ്ട്‌ നമ്മുടെ തെറ്റുകൾ ‘ക്ഷമിക്കാൻ’ യഹോവ സന്നദ്ധനാണ്‌. (സങ്കീർത്തനം 86:5) അതേസ​മയം മെച്ച​പ്പെ​ടാൻ ആവശ്യ​മായ ശ്രമങ്ങൾ നാം തുടരാൻ അവൻ പ്രതീ​ക്ഷി​ക്കു​ക​യും ചെയ്യുന്നു.

ഈ ദുശ്ശീലം ഉപേക്ഷി​ക്കാ​നും വീണ്ടും അതി​ലേക്ക്‌ വഴുതി​വീ​ഴാ​തി​രി​ക്കാ​നും നിങ്ങൾക്ക്‌ എന്തു ചെയ്യാൻ കഴിയും?

മനസ്സു തുറക്കു​ന്ന​തി​ന്റെ പ്രാധാ​ന്യം

പല രാജ്യ​ങ്ങ​ളി​ലും സെക്‌സി​നെ​ക്കു​റിച്ച്‌ വ്യാപ​ക​മാ​യി ചർച്ച ചെയ്യു​ന്നു​ണ്ടെ​ങ്കി​ലും, പലർക്കും അതി​നെ​ക്കു​റിച്ച്‌ മാന്യ​മാ​യും ഗൗരവ​ബു​ദ്ധി​യോ​ടെ​യും സംസാ​രി​ക്കാൻ ഇന്നും ബുദ്ധി​മു​ട്ടാണ്‌. ഒരുപക്ഷേ, മനസ്സു​തു​റ​ക്കാൻ സ്വാത​ന്ത്ര്യ​മുള്ള ഒരാ​ളോ​ടു​പോ​ലും നാണ​ക്കേട്‌ ഓർത്ത്‌ ഈ വിഷയ​ത്തെ​പ്പറ്റി സംസാ​രി​ക്കാൻ നിങ്ങൾക്കു മടിയാ​യി​രി​ക്കും. തന്റെ യൗവന​ത്തിൽ വർഷങ്ങ​ളോ​ളം സ്വയം​ഭോ​ഗ​വു​മാ​യി മല്ലടി​ച്ചി​രുന്ന ഒരു ക്രിസ്‌ത്യാ​നി പിൻവ​രുന്ന പ്രകാരം പറഞ്ഞു: “അന്ന്‌, ആരോ​ടെ​ങ്കി​ലും അതി​നെ​ക്കു​റി​ച്ചു സംസാ​രി​ക്കാ​നുള്ള ധൈര്യം കിട്ടി​യി​രു​ന്നെ​ങ്കിൽ എത്ര നന്നായി​രു​ന്നു എന്നു ഞാൻ ആശിച്ചു​പോ​കു​ക​യാണ്‌! കുറ്റ​ബോ​ധം വർഷങ്ങ​ളോ​ളം എന്നെ വേട്ടയാ​ടി. അത്‌ മറ്റുള്ള​വ​രു​മാ​യും സർവോ​പരി യഹോ​വ​യു​മാ​യും ഉള്ള എന്റെ ബന്ധത്തെ സാരമാ​യി ബാധിച്ചു.”

നിങ്ങൾക്ക്‌ ആരുടെ മുമ്പി​ലാ​ണു മനസ്സു തുറക്കാൻ കഴിയുക? ആത്മീയ പക്വത​യുള്ള ഒരാളാണ്‌ ഏറ്റവും പറ്റിയത്‌, മാതാ​പി​താ​ക്ക​ളിൽ ഒരാളാ​ണെ​ങ്കിൽ ഏറെ നന്ന്‌. ഇങ്ങനെ പറഞ്ഞു​കൊണ്ട്‌ നിങ്ങൾക്ക്‌ തുടങ്ങാൻ സാധി​ക്കും: “എന്നെ ഒത്തിരി വിഷമി​പ്പി​ക്കുന്ന ഒരു കാര്യ​ത്തെ​ക്കു​റിച്ച്‌ എനിക്കു പറയണ​മെ​ന്നുണ്ട്‌.”

മാരി​യോ തന്റെ പിതാ​വി​നോ​ടു സംസാ​രി​ക്കാ​നാ​ണു തീരു​മാ​നി​ച്ചത്‌. അദ്ദേഹ​ത്തിന്‌ മാരി​യോ​യെ മനസ്സി​ലാ​ക്കാ​നും സഹാനു​ഭൂ​തി പ്രകട​മാ​ക്കാ​നും കഴിഞ്ഞു. ചെറു​പ്പ​മാ​യി​രു​ന്ന​പ്പോൾ തനിക്കും ഈ പ്രശ്‌ന​മു​ണ്ടാ​യി​രു​ന്നെന്ന്‌ അദ്ദേഹം അവനോ​ടു തുറന്നു പറയു​ക​പോ​ലും ചെയ്‌തു. “പിതാ​വി​ന്റെ സത്യസ​ന്ധ​ത​യും ആത്മാർഥ​ത​യും എന്നെ വളരെ പ്രോ​ത്സാ​ഹി​പ്പി​ച്ചു,” മാരി​യോ അനുസ്‌മ​രി​ക്കു​ന്നു. “അദ്ദേഹ​ത്തിന്‌ ഈ ദുശ്ശീലം ഉപേക്ഷി​ക്കാ​നാ​യെ​ങ്കിൽ എനിക്കും അത്‌ സാധി​ക്കു​മെന്ന്‌ ഞാൻ ചിന്തിച്ചു. പിതാ​വി​ന്റെ മനോ​ഭാ​വം എന്റെ ഹൃദയത്തെ സ്‌പർശി​ച്ചു, ഞാൻ പൊട്ടി​ക്ക​ര​ഞ്ഞു​പോ​യി.”

ആൻഡ്രേ ധൈര്യം സംഭരിച്ച്‌ ഒരു ക്രിസ്‌തീയ മൂപ്പ​നോ​ടു തന്റെ ദുശ്ശീ​ല​ത്തെ​പ്പറ്റി പറഞ്ഞു. അങ്ങനെ ചെയ്‌ത​തിൽ അവനി​പ്പോൾ സന്തോ​ഷി​ക്കു​ന്നു.c ആൻഡ്രേ പറയുന്നു: “എന്നെ ശ്രദ്ധിച്ചു കൊണ്ടി​രു​ന്ന​പ്പോൾ അദ്ദേഹ​ത്തി​ന്റെ കണ്ണുകൾ നിറഞ്ഞു, ഞാൻ അവസാ​നി​പ്പി​ച്ച​പ്പോൾ അദ്ദേഹം യഹോ​വ​യു​ടെ സ്‌നേ​ഹ​ത്തെ​ക്കു​റിച്ച്‌ എനിക്ക്‌ ഉറപ്പു തന്നു. ഇത്‌ സാധാരണ കണ്ടുവ​രുന്ന ഒരു പ്രശ്‌ന​മാ​ണെ​ന്നും അദ്ദേഹം പറഞ്ഞു. ഞാൻ വരുത്തുന്ന പുരോ​ഗ​തി​യെ​പ്പറ്റി ഇടയ്‌ക്കി​ടെ അന്വേ​ഷി​ക്കാ​മെ​ന്നും ബൈബിൾ പഠന സഹായി​ക​ളിൽനിന്ന്‌ കൂടുതൽ വിവരങ്ങൾ തരാ​മെ​ന്നും അദ്ദേഹം വാഗ്‌ദാ​നം ചെയ്‌തു. ഇനിയും പരാജ​യ​പ്പെ​ട്ടാ​ലും ഈ ദുശ്ശീ​ല​ത്തി​നെ​തി​രെ​യുള്ള പോരാ​ട്ടം ഉപേക്ഷി​ക്കു​ക​യി​ല്ലെന്നു ഞാൻ നിശ്ചയി​ച്ചു.”

മാരി​യോ​യെ​യും ആൻ​ഡ്രേ​യെ​യും പോലെ നിങ്ങൾക്കും സ്വയം​ഭോ​ഗം എന്ന ഈ ദുശ്ശീലം ഉപേക്ഷി​ക്കാൻ ആവശ്യ​മായ സഹായം കണ്ടെത്താൻ കഴിയും. “ഈ ദുശ്ശീ​ല​ത്തി​നെ​തി​രെ പോരാ​ടുക!” എന്ന ചതുര​ത്തി​ലെ ഉപദേശം പിന്തു​ട​രുക. ഉറപ്പാ​യും, ഈ പോരാ​ട്ട​ത്തിൽ നിങ്ങൾക്ക്‌ വിജയി​ക്കാ​നാ​കും!

“യുവജ​നങ്ങൾ ചോദി​ക്കു​ന്നു . . . ” എന്ന പരമ്പര​യിൽനി​ന്നുള്ള കൂടുതൽ ലേഖനങ്ങൾ www.watchtower.org/ype എന്ന വെബ്‌​സൈ​റ്റിൽ കാണാ​വു​ന്ന​താണ്‌.

ചിന്തിക്കാൻ:

◼ യഹോവ ‘ക്ഷമിക്കാൻ’ സന്നദ്ധനാ​ണെന്ന്‌ ഓർക്കു​ന്നത്‌ പ്രധാ​ന​മാ​യി​രി​ക്കു​ന്നത്‌ എന്തു​കൊണ്ട്‌?—സങ്കീർത്തനം 86:5.

◼ സ്വയം​ഭോ​ഗം എന്ന ദുശ്ശീലം ഉപേക്ഷി​ക്കാൻ നിങ്ങൾ എന്തു നടപടി​കൾ എടുക്കും?

◼ സഹായം ചോദി​ക്കു​ന്ന​തിൽ നാണി​ക്കേ​ണ്ട​തി​ല്ലാ​ത്തത്‌ എന്തു​കൊണ്ട്‌?

◼ നിർമ​ല​മായ കാര്യ​ങ്ങ​ളിൽ മനസ്സു കേന്ദ്രീ​ക​രി​ച്ചു​നി​റു​ത്താൻ സാധി​ക്കു​ന്ന​തെ​ങ്ങനെ?

[അടിക്കു​റി​പ്പു​കൾ]

[19-ാം പേജിലെ ചതുരം/ചിത്രം]

ഒരു വീഴ്‌ച​യു​ടെ അർഥം, തീർത്തും പരാജ​യ​പ്പെട്ടു എന്നല്ല!

‘എന്തായാ​ലും ഞാൻ പരാജ​യ​പ്പെട്ടു, ഇനി ശ്രമി​ക്കു​ന്ന​തിൽ അർഥമില്ല’ എന്നു ചിന്തി​ക്കാൻ വളരെ എളുപ്പ​മാണ്‌. ആ മനോ​ഭാ​വ​ത്തി​നെ​തി​രെ പൊരു​തുക. ഒരിക്ക​ലോ പലതവ​ണ​യോ സംഭവി​ക്കുന്ന തിരി​ച്ച​ടി​കൾ, ശ്രമം പാടെ ഉപേക്ഷി​ക്കാ​മെന്നു ചിന്തി​ക്കാൻ ഇടയാ​ക്ക​രുത്‌.

ഒരു ഉദാഹ​രണം നോക്കാം: നിങ്ങൾ ഒരു സ്റ്റെയർകേസ്‌ കയറു​ക​യാ​ണെന്നു വിചാ​രി​ക്കുക. കയറു​ന്ന​തി​നി​ട​യിൽ കാലു​തെറ്റി ഒന്നു രണ്ടു പടി താഴേക്ക്‌ ഇറങ്ങുന്നു. ‘ഓ, ഇനി താഴെ​ച്ചെന്ന്‌ ആദ്യം മുതൽ കയറി​ത്തു​ട​ങ്ങാം’ എന്നു നിങ്ങൾ വിചാ​രി​ക്കു​മോ? തീർച്ച​യാ​യും ഇല്ല! അങ്ങനെ​യെ​ങ്കിൽ ദുശ്ശീ​ല​ങ്ങൾക്കെ​തി​രെ പൊരു​തു​മ്പോൾ നിങ്ങൾ എന്തിന്‌ അങ്ങനെ ന്യായ​വാ​ദം ചെയ്യണം?

ഒരു തിരി​ച്ച​ടി​ക്കു​ശേഷം മിക്ക​പ്പോ​ഴും കുറ്റ​ബോ​ധം നിങ്ങളെ പിന്തു​ടർന്നേ​ക്കാം. ഇതു ചില​പ്പോൾ പരിധി വിട്ടു​പോ​കും, എന്നിട്ട്‌, എന്നെ ഒന്നിനും കൊള്ളില്ല, ഇത്‌ ഉപേക്ഷി​ക്കാ​നുള്ള കരുത്ത്‌ എനിക്കില്ല, ഒരു നന്മയും സ്വീക​രി​ക്കാൻ ഞാൻ യോഗ്യ​നല്ല തുടങ്ങിയ ചിന്തകൾ നിങ്ങളെ ഭരി​ച്ചേ​ക്കാം. ഇതു​പോ​ലുള്ള പരിധി​വിട്ട കുറ്റ​ബോ​ധത്തെ മനസ്സി​ലി​ട്ടു വളർത്ത​രുത്‌. ദുശ്ശീ​ല​ത്തി​നെ​തി​രെ​യുള്ള പോരാ​ട്ടം പുനരാ​രം​ഭി​ക്കു​ന്ന​തി​നുള്ള നിങ്ങളു​ടെ ശക്തിയെ അത്‌ ചോർത്തി​ക്ക​ള​യും. ഇതോർക്കുക: യേശു​ക്രി​സ്‌തു വന്നത്‌ പാപി​കളെ വീണ്ടെ​ടു​ക്കാ​നാണ്‌, അല്ലാതെ പൂർണ​മ​നു​ഷ്യർക്കു വേണ്ടിയല്ല. അപൂർണ​രായ നമുക്കാർക്കും ഇപ്പോൾ ചെയ്യു​ന്ന​തെ​ല്ലാം പിഴവ​റ്റ​താ​യി​രി​ക്കു​മെന്നു പ്രതീ​ക്ഷി​ക്കാ​നാ​വില്ല.—1991 ഏപ്രിൽ 8 ഉണരുക! (ഇംഗ്ലീഷ്‌) പേജ്‌ 15.

[20-ാം പേജിലെ ചതുരം/ചിത്രം]

ഈ ദുശ്ശീ​ല​ത്തി​നെ​തി​രെ പോരാ​ടുക!

◼ മറ്റുകാ​ര്യ​ങ്ങ​ളി​ലേക്ക്‌ മനസ്സു തിരി​ച്ചു​വി​ടുക.—ഫിലി​പ്പി​യർ 4:8.

◼ അനുചിത ആഗ്രഹങ്ങൾ ഉണർത്തുന്ന കാര്യങ്ങൾ കാണു​ന്നത്‌ ഒഴിവാ​ക്കുക.—സങ്കീർത്തനം 119:37.

◼ “അത്യന്ത​ശക്തി”ക്കുവേണ്ടി പ്രാർഥി​ക്കുക. —2 കൊരി​ന്ത്യർ 4:7.

◼ ക്രിസ്‌തീയ പ്രവർത്ത​ന​ങ്ങ​ളിൽ തിരക്കു​ള്ള​വ​രാ​യി​രി​ക്കുക. —1 കൊരി​ന്ത്യർ 15:58.

[20-ാം പേജിലെ ചതുരം/ചിത്രം]

കൂടുതൽ സഹായം

സ്വയംഭോഗം എന്ന ദുശ്ശീലം ഉപേക്ഷി​ക്കാൻ സഹായി​ക്കുന്ന കൂടുതൽ വിവര​ങ്ങൾക്ക്‌ യഹോ​വ​യു​ടെ സാക്ഷികൾ പ്രസി​ദ്ധീ​ക​രിച്ച യുവജ​നങ്ങൾ ചോദി​ക്കുന്ന ചോദ്യ​ങ്ങ​ളും പ്രാ​യോ​ഗി​ക​മായ ഉത്തരങ്ങ​ളും എന്ന പുസ്‌ത​ക​ത്തി​ന്റെ 25, 26 അധ്യാ​യങ്ങൾ കാണുക.