കഥ 88
യോഹന്നാൻ യേശുവിനെ സ്‌നാനപ്പെടുത്തുന്നു
ഒരു പ്രാവ്‌ ഈ മനുഷ്യന്റെ തലയിലേക്ക്‌ ഇറങ്ങിവരുന്നതു കണ്ടോ? ഈ മനുഷ്യൻ യേശുവാണ്‌. അവന്‌ ഇപ്പോൾ ഏകദേശം 30 വയസ്സുണ്ട്‌. അവന്റെ കൂടെയുള്ള മനുഷ്യൻ യോഹന്നാനാണ്‌. അവനെക്കുറിച്ച്‌ മുമ്പ്‌ നമ്മൾ ഈ പുസ്‌തകത്തിൽ വായിച്ചിട്ടുണ്ട്‌. മറിയ തന്റെ ബന്ധുവായ എലീശബെത്തിനെ കാണാൻ ചെന്നപ്പോൾ എലീശബെത്തിന്റെ വയറ്റിൽ കിടന്നിരുന്ന കുഞ്ഞ്‌ സന്തോഷംകൊണ്ടു തുള്ളിച്ചാടിയത്‌ ഓർക്കുന്നുണ്ടോ? ആ കുഞ്ഞ്‌ യോഹന്നാൻ ആയിരുന്നു. എന്നാൽ യോഹന്നാനും യേശുവും ഇപ്പോൾ എന്താണു ചെയ്യുന്നത്‌?
യോഹന്നാൻ യേശുവിനെ ഇപ്പോൾ യോർദ്ദാൻ നദിയിലെ വെള്ളത്തിൽ മുക്കിയതേയുള്ളൂ. ഇങ്ങനെയാണ്‌ ഒരു വ്യക്തി സ്‌നാപനമേൽക്കുന്നത്‌. ആദ്യം അയാളെ വെള്ളത്തിൽ മുക്കുന്നു, പിന്നെ ഉയർത്തുന്നു. യോഹന്നാൻ ഇങ്ങനെ ആളുകളെ സ്‌നാനപ്പെടുത്തുന്നതുകൊണ്ട്‌ ആളുകൾ അവനെ യോഹന്നാൻ സ്‌നാപകൻ എന്നു വിളിക്കുന്നു. എന്നാൽ യോഹന്നാൻ യേശുവിനെ സ്‌നാനപ്പെടുത്തിയത്‌ എന്തുകൊണ്ടാണ്‌?
യേശു വന്നു പറഞ്ഞിട്ടാണ്‌ യോഹന്നാൻ അതു ചെയ്‌തത്‌. തെറ്റുകൾ ചെയ്‌തു പോയതിൽ ഖേദമുണ്ടെന്നു പ്രകടമാക്കാൻ ആഗ്രഹിക്കുന്ന ആളുകളെയാണു യോഹന്നാൻ സ്‌നാനപ്പെടുത്തുന്നത്‌. എന്നാൽ യേശുവിന്‌ അങ്ങനെ ഖേദം തോന്നേണ്ട കാര്യമുണ്ടായിരുന്നോ? അവൻ എപ്പോഴെങ്കിലും എന്തെങ്കിലും തെറ്റു ചെയ്‌തിരുന്നോ? ഇല്ല, കാരണം യേശു സ്വർഗത്തിൽനിന്നുള്ള ദൈവത്തിന്റെ സ്വന്തം പുത്രനായിരുന്നു. അതുകൊണ്ട്‌ തന്നെ സ്‌നാനപ്പെടുത്താൻ അവൻ യോഹന്നാനോട്‌ ആവശ്യപ്പെട്ടതിന്റെ കാരണം മറ്റൊന്നായിരുന്നു. അത്‌ എന്തായിരുന്നുവെന്ന്‌ നമുക്കു നോക്കാം.
യേശു ഇവിടെ യോഹന്നാന്റെ അടുക്കൽ വരുന്നതിനു മുമ്പ്‌ ഒരു തച്ചൻ ആയിരുന്നു. തടികൊണ്ട്‌ മേശയും കസേരയും ബെഞ്ചും ഒക്കെ ഉണ്ടാക്കുന്ന ആളാണ്‌ തച്ചൻ. മറിയയുടെ ഭർത്താവായ യോസേഫ്‌ ഒരു തച്ചൻ ആയിരുന്നു. അവൻ യേശുവിനെയും ആ ജോലി പഠിപ്പിച്ചു. എന്നാൽ ഒരു തച്ചൻ ആയിരിക്കാനല്ല യഹോവ തന്റെ പുത്രനെ ഭൂമിയിലേക്ക്‌ അയച്ചത്‌. പകരം ഒരു പ്രത്യേക വേലയ്‌ക്കായിട്ടാണ്‌. യേശു ആ വേല ചെയ്‌തു തുടങ്ങാനുള്ള സമയം ഇപ്പോൾ വന്നിരിക്കുകയാണ്‌. അതുകൊണ്ട്‌ തന്റെ പിതാവിന്റെ ഇഷ്ടം ചെയ്യാൻ താൻ വന്നിരിക്കുന്നുവെന്നു പ്രകടമാക്കാനാണ്‌, യേശു യോഹന്നാനോടു തന്നെ സ്‌നാനപ്പെടുത്താൻ പറയുന്നത്‌. ദൈവം ഇതിൽ സന്തുഷ്ടനാണോ?
അതേ. എന്തെന്നാൽ യേശു സ്‌നാപനമേറ്റ ഉടനെ സ്വർഗത്തിൽനിന്ന്‌ ഒരു ശബ്ദം ഇങ്ങനെ പറയുന്നു: “ഇവൻ എന്റെ പ്രിയപുത്രൻ; ഇവനിൽ ഞാൻ പ്രസാദിച്ചിരിക്കുന്നു.” കൂടാതെ സ്വർഗം തുറന്ന്‌ ഈ പ്രാവ്‌ യേശുവിന്റെമേൽ ഇറങ്ങിവരുന്നതായി കാണുന്നു. എന്നാൽ അത്‌ ശരിക്കുമുള്ള ഒരു പ്രാവല്ല, കേട്ടോ. അത്‌ ഒരു പ്രാവിനെപ്പോലെ ഇരിക്കുന്നുവെന്നേ ഉള്ളൂ. അത്‌ ദൈവത്തിന്റെ പരിശുദ്ധാത്മാവാണ്‌.
ഇപ്പോൾ യേശുവിന്‌ അനേകം കാര്യങ്ങൾ ചിന്തിക്കാനുണ്ട്‌. അതുകൊണ്ട്‌ അവൻ 40 ദിവസത്തേക്ക്‌, തനിച്ച്‌ ആയിരിക്കാൻ കഴിയുന്ന ഒരു സ്ഥലത്തേക്കു പോകുന്നു. അവിടെവെച്ച്‌ സാത്താൻ അവനെ പരീക്ഷിക്കാൻ വരുന്നു. യേശുവിനെക്കൊണ്ട്‌ ദൈവനിയമങ്ങൾക്ക്‌ എതിരായി പ്രവർത്തിപ്പിക്കാൻ സാത്താൻ മൂന്നു പ്രാവശ്യം ശ്രമിക്കുന്നു. എന്നാൽ യേശു അതു ചെയ്യുകയില്ല.
അതിനുശേഷം യേശു മടങ്ങിപ്പോകുകയും ചില പുരുഷന്മാരെ കണ്ടുമുട്ടുകയും ചെയ്യുന്നു. അവർ അവന്റെ ആദ്യ അനുഗാമികൾ അഥവാ ശിഷ്യന്മാർ ആയിത്തീരുന്നു. അവരിൽ ചിലരുടെ പേരുകൾ അന്ത്രെയാസ്‌, പത്രൊസ്‌ (ശിമോൻ എന്നും പേരുണ്ട്‌), ഫിലിപ്പോസ്‌, നഥനയേൽ (ബർത്തൊലൊമായി എന്നും പേരുണ്ട്‌) എന്നിവയാണ്‌. യേശുവും ഈ പുതിയ ശിഷ്യന്മാരും ഗലീല എന്ന ഡിസ്‌ട്രിക്‌റ്റിലേക്കു പുറപ്പെടുന്നു. ഗലീലയിൽ അവർ നഥനയേലിന്റെ സ്വദേശമായ കാനായിൽ തങ്ങുന്നു. അവിടെവെച്ച്‌ യേശു ഒരു വലിയ കല്യാണസദ്യക്കു പോകുകയും തന്റെ ഒന്നാമത്തെ അത്ഭുതം പ്രവർത്തിക്കുകയും ചെയ്യുന്നു. ആ അത്ഭുതം എന്താണെന്ന്‌ അറിയാമോ? അവൻ വെള്ളം വീഞ്ഞാക്കി മാറ്റുന്നു.