മൂപ്പൻമാ​രേ—സൗമ്യ​ത​യു​ടെ ആത്മാവിൽ മററു​ള്ള​വരെ യഥാസ്ഥാ​ന​പ്പെ​ടു​ത്തുക

ഒരു യഥാർത്ഥ ക്രിസ്‌ത്യാ​നി​യു​ടെ ഹൃദയത്തെ നല്ല ഫലം വിളയി​ക്കുന്ന ഒരു ആത്മീയ തോട്ട​ത്തോ​ടു സാദൃ​ശ​പ്പെ​ടു​ത്താൻ കഴിയും. സാധാ​ര​ണ​മാ​യി സ്‌നേഹം, സന്തോഷം, സമാധാ​നം, ദീർഘക്ഷമ, ദയ, പരോ​പ​കാ​രം, വിശ്വ​സ്‌തത, സൗമ്യത, ഇന്ദ്രി​യ​ജയം എന്നിവ അവിടെ തഴച്ചു​വ​ള​രു​ന്നു. എന്തായാ​ലും, ഇവയെ​ല്ലാം യഹോ​വ​യാം ദൈവം തന്റെ സമർപ്പിത ദാസൻമാർക്കു കൊടു​ത്തി​ട്ടുള്ള പരിശു​ദ്ധാ​ത്മാ​വി​ന്റെ ഫലങ്ങളാണ്‌. (ഗലാത്യർ 5:22, 23) എന്നിരു​ന്നാ​ലും, തന്റെ സ്വർഗ്ഗീയ പിതാ​വി​നു പ്രസാ​ദ​ക​ര​മായ ഒരു സ്ഥലം​പോ​ലെ ഹൃദയ​മാ​കുന്ന തോട്ടത്തെ കാത്തു​പ​രി​പാ​ലി​ക്കാൻ ആഗ്രഹി​ക്കുന്ന ഓരോ ക്രിസ്‌ത്യാ​നി​യും, അവകാ​ശ​പ്പെ​ടു​ത്തിയ പാപത്തി​ന്റെ അനഭി​ല​ഷ​ണീയ ഫലങ്ങൾക്കെ​തി​രെ ഊർജ്ജ​സ്വ​ല​മായ, തുടർച്ച​യായ, ഒരു പോരാ​ട്ടം നടത്തേ​ണ്ട​തുണ്ട്‌.—റോമർ 5:5, 12.

ചില​പ്പോൾ, ദൈവിക ഭക്തിയുള്ള ഒരു വ്യക്തി​യു​ടെ അപൂർണ്ണ ഹൃദയ​ത്തിൽ അഭികാ​മ്യ​മ​ല്ലാത്ത എന്തെങ്കി​ലും വളരാൻ തുടങ്ങു​ന്നു. അയാൾക്ക്‌ അല്ലെങ്കിൽ അവൾക്ക്‌ ഒരു മികച്ച ആത്മീയ പൂർവ്വ​ച​രി​ത്രം ഉണ്ടായി​രു​ന്നി​രി​ക്കാം. എന്നാൽ ചില പ്രശ്‌നങ്ങൾ ഉടലെ​ടു​ക്കു​ന്നു, സാധ്യ​ത​യ​നു​സ​രിച്ച്‌ അനാ​രോ​ഗ്യ​ക​ര​മായ സഹവാ​സ​ത്തി​ലോ അല്ലെങ്കിൽ വിവേ​ക​മി​ല്ലാത്ത തീരു​മാ​ന​ത്തി​ലോ വേരു​ന്നി​യവ തന്നെ. സഭാമൂ​പ്പൻമാർക്ക്‌ അത്തര​മൊ​രു വ്യക്തിയെ എപ്രകാ​രം ആത്മീയ​മാ​യി സഹായി​ക്കാൻ കഴിയും?

അപ്പൊ​സ്‌ത​ലിക ബുദ്ധ്യു​പ​ദേ​ശം

തെററു ചെയ്‌തി​ട്ടുള്ള ഒരു ക്രിസ്‌ത്യാ​നി​യെ സഹായി​ക്കു​ന്ന​തി​നു മൂപ്പൻമാർ അപ്പൊ​സ്‌ത​ല​നായ പൗലോ​സി​ന്റെ ബുദ്ധ്യു​പ​ദേശം അനുസ​രി​ക്കേ​ണ്ട​തുണ്ട്‌: “സഹോ​ദ​രൻമാ​രേ, ഒരു മനുഷ്യൻ വല്ല തെററി​ലും അകപ്പെ​ട്ടു​പോ​യെ​ങ്കിൽ ആത്മിക​രായ നിങ്ങൾ അങ്ങനെ​യു​ള്ള​വനെ സൌമ്യ​ത​യു​ടെ ആത്മാവിൽ യഥാസ്ഥാ​ന​പ്പെ​ടു​ത്തു​വിൻ; നീയും പരീക്ഷ​യിൽ അകപ്പെ​ടാ​തി​രി​പ്പാൻ സൂക്ഷി​ച്ചു​കൊൾക.” (ഗലാത്യർ 6:1) ഒരു സഹവി​ശ്വാ​സി “വല്ല തെററി​ലും അകപ്പെട്ടു”പോകു​മ്പോൾ സാധ്യ​മാ​കു​ന്നത്ര വേഗത്തിൽ സഹായം കൊടു​ക്കു​ന്ന​തി​നുള്ള ഉത്തരവാ​ദി​ത്വം മൂപ്പൻമാർക്കുണ്ട്‌.

“ഒരു മനുഷ്യൻ” തെററായ നടപടി എടുക്കു​ന്ന​തി​നെ പൗലോസ്‌ പരാമർശി​ക്കു​ന്നു. എന്നിരു​ന്നാ​ലും, ഇവിടെ ഉപയോ​ഗി​ച്ചി​രി​ക്കുന്ന ഗ്രീക്കു പദം (ആന്ത്രോ​പോസ്‌) പുരു​ഷ​നോ സ്‌ത്രീ​ക്കോ ബാധക​മാ​കാം. ഒരു വ്യക്തിയെ “യഥാസ്ഥാ​ന​പ്പെ​ടു​ത്തുക” എന്നതി​നാൽ അർത്ഥമാ​ക്കു​ന്ന​തെ​ന്താണ്‌? ഈ ഗ്രീക്കു​പദം (കററാർറ​റി​സോ) “ശരിയായ സ്ഥാന​ത്തേക്കു കൊണ്ടു​വ​രു​ന്ന​തി​നെ” അർത്ഥമാ​ക്കു​ന്നു. ഇതേ പദം വലകൾ നന്നാക്കു​ന്ന​തിന്‌ ഉപയോ​ഗി​ച്ചി​രി​ക്കു​ന്നു. (മത്തായി 4:21) ഒരു വ്യക്തി​യു​ടെ ഒടിഞ്ഞ അവയവം നേരെ​യാ​ക്കു​ന്ന​തി​നും ഇതു ബാധക​മാ​കു​ന്നു. ഒരു ഡോക്ടർ തന്റെ രോഗിക്ക്‌ അനാവ​ശ്യ​മായ വേദന വരുത്തു​ന്നത്‌ ഒഴിവാ​ക്കാൻ ശ്രദ്ധാ​പൂർവ്വം ഇതു ചെയ്യുന്നു. അതു​പോ​ലെ, ഒരു സഹോ​ദരൻ അല്ലെങ്കിൽ സഹോ​ദരി ഉചിത​മായ ആത്മീയ സ്ഥാന​ത്തേക്കു വരാൻ സഹായി​ക്കു​ന്ന​തി​നു പരിച​ര​ണ​വും നയവും മനസ്സലി​വും ആവശ്യ​മാണ്‌.

ഒരു വ്യക്തിയെ യഥാസ്ഥാ​ന​പ്പെ​ടു​ത്താൻ മൂപ്പൻമാർ ശ്രമി​ക്കു​മ്പോൾ സൗമ്യ​ത​യു​ടെ ആത്മാവ്‌ പ്രകട​മാ​ക്കു​ന്ന​തി​നാൽ അവർ തങ്ങളു​ടെ​തന്നേ ആത്മീയ​ത​യു​ടെ തെളിവു നല്‌കു​ന്നു. സൗമ്യ​പ്ര​കൃ​ത​മു​ണ്ടാ​യി​രുന്ന യേശു തീർച്ച​യാ​യും അത്തരം കാര്യങ്ങൾ സൗമ്യ​ത​യോ​ടെ കൈകാ​ര്യം ചെയ്യു​മാ​യി​രു​ന്നു. (മത്തായി 11:29) തങ്ങളുടെ ഹൃദയ​ത്തി​ലെ ഉദ്ദേശ്യ​ങ്ങൾക്കു വിരു​ദ്ധ​മാ​യി തങ്ങൾതന്നെ പാപത്തിൽ അകപ്പെ​ടാ​മെ​ന്നു​ള്ള​തു​കൊണ്ട്‌ മൂപ്പൻമാർ, തെററായ ചുവടു​വെച്ച യഹോ​വ​യു​ടെ ഒരു ദാസ​നോട്‌ ഈ ഗുണം പ്രകട​മാ​ക്കി​യേ തീരൂ. മൂപ്പൻമാർക്ക്‌ ഇതി​നോ​ടകം ഇതു സംഭവി​ച്ചു​ക​ഴി​ഞ്ഞി​ട്ടി​ല്ലെ​ങ്കിൽ ഭാവി​യിൽ സംഭവി​ച്ചേ​ക്കാം.

ആത്മീയ​മാ​യി യോഗ്യ​രായ ഈ പുരു​ഷൻമാർ സ്‌നേ​ഹ​പൂർവ്വം അവരുടെ സഹാരാ​ധ​ക​രു​ടെ ‘ഭാരങ്ങൾ ചുമക്കണം.’ തീർച്ച​യാ​യും, ഒരു സഹോ​ദ​ര​നെ​യോ അല്ലെങ്കിൽ സഹോ​ദ​രി​യെ​യോ സാത്താ​നും പ്രലോ​ഭ​ന​ങ്ങൾക്കും ജഡത്തിന്റെ ദൗർബ്ബ​ല്യ​ങ്ങൾക്കും പാപത്തി​ന്റെ പീഡകൾക്കും എതിരെ പോരാ​ടാൻ സഹായി​ക്കണം എന്നതു മൂപ്പൻമാ​രു​ടെ ഹൃദയ​ത്തിൽ ഉണ്ടായി​രി​ക്കണം. ഇത്‌ തീർച്ച​യാ​യും ക്രിസ്‌തീ​യ​മേൽവി​ചാ​ര​കൻമാർക്ക്‌ “ക്രിസ്‌തു​വി​ന്റെ ന്യായ​പ്ര​മാ​ണം നിവർത്തി​പ്പാൻ” ഉള്ള ഒരു നല്ല മാർഗ്ഗ​മാണ്‌.—ഗലാത്യർ 6:2.

യഥാർത്ഥ ആത്മീയ യോഗ്യ​ത​ക​ളുള്ള പുരു​ഷൻമാർ താഴ്‌മ​യു​ള്ളവർ ആണ്‌, “താൻ അല്‌പ​നാ​യി​രി​ക്കെ മഹാൻ ആകുന്നു എന്നു ഒരുത്തൻ നിരൂ​പി​ച്ചാൽ തന്നെത്താൻ വഞ്ചിക്കു​ന്നു” എന്നു തിരി​ച്ച​റി​യു​ന്നവർ തന്നെ. (ഗലാത്യർ 6:3) ശരിയും സഹായ​ക​വും ആയതു ചെയ്യാൻ മൂപ്പൻമാർ എത്ര കഠിന​മാ​യി ശ്രമി​ച്ചാ​ലും, ദൈവ​ത്തി​ന്റെ പൂർണ്ണ​നും സ്‌നേ​ഹാർദ്ര​ത​യു​ള്ള​വ​നു​മായ പുത്ര​നായ യേശു​ക്രി​സ്‌തു​വി​നെ അപേക്ഷിച്ച്‌ അവർ കുറവു​ള്ള​വ​രാ​യി​ത്തീ​രും. എന്നാൽ പരമാ​വധി ചെയ്യാ​തി​രി​ക്കു​ന്ന​തിന്‌ ഇത്‌ അവർക്കൊ​രു കാരണ​മാ​യി​രി​ക്കു​ന്നില്ല.

താൻ മററു​ള്ള​വ​രെ​ക്കാൾ ഭക്തിയിൽ​ശ്രേ​ഷ്‌ഠ​നാ​ണെന്ന മട്ടിൽ ഒരു സഹവി​ശ്വാ​സി​യെ ഔദ്ധത്യ​ത്തോ​ടെ, അധി​ക്ഷേ​പി​ക്കു​ന്നതു തെററാ​യി​രി​ക്കു​മെന്നു മൂപ്പൻമാർ തിരി​ച്ച​റി​യു​ന്നു! യേശു തീർച്ച​യാ​യും അങ്ങനെ ചെയ്യു​ക​യില്ല. എന്തിന്‌, യേശു തന്റെ ജീവാർപ്പണം നടത്തി​യതു മിത്ര​ങ്ങൾക്കു വേണ്ടി മാത്രമല്ല അവന്റെ ശത്രു​ക്കൾക്കു​കൂ​ടി​യാണ്‌! സഹോ​ദ​രൻമാ​രെ​യോ സഹോ​ദ​രി​മാ​രെ​യോ ബുദ്ധി​മു​ട്ടിൽനി​ന്നു രക്ഷിക്കാ​നും അവരെ സ്വർഗ്ഗീയ പിതാ​വി​നോ​ടും അവന്റെ നീതി​യുള്ള നിലവാ​ര​ങ്ങ​ളോ​ടും കുറേ​ക്കൂ​ടെ അടുപ്പി​ക്കാ​നും ശ്രമി​ക്കു​മ്പോൾ മൂപ്പൻമാർ സമാന​മായ സ്‌നേഹം പ്രകട​മാ​ക്കാൻ യത്‌നി​ക്കു​ന്നു. സഹാരാ​ധ​കരെ യഥാസ്ഥാ​ന​പ്പെ​ടു​ത്താൻ മൂപ്പൻമാ​രെ സഹായി​ക്കുന്ന ചില പടികൾ ഏവയാണ്‌?

ചില സഹായ​ക​മായ പടികൾ

സൗമ്യ​മായ വിധത്തിൽ സംസാ​രി​ക്കു​ക​യും പ്രവർത്തി​ക്കു​ക​യും ചെയ്യു​മ്പോൾത്തന്നെ പ്രാർത്ഥ​നാ​പൂർവ്വം യഹോ​വ​യിൽ ആശ്രയി​ക്കുക. യേശു സൗമ്യ​പ്ര​കൃ​ത​മു​ള്ള​വ​നാ​യി​രു​ന്നു, മാർഗ്ഗ​നിർദ്ദേ​ശ​ത്തി​നു​വേണ്ടി അവൻ സ്വർഗ്ഗീയ പിതാ​വി​നോട്‌ ഏകാ​ഗ്ര​മാ​യി പ്രാർത്ഥി​ക്കു​ക​യും എല്ലായ്‌പോ​ഴും അവനു പ്രസാ​ദ​ക​ര​മായ കാര്യങ്ങൾ ചെയ്യു​ക​യും ചെയ്‌തു. (മത്തായി 21:5; യോഹ​ന്നാൻ 8:29) തെററായ എന്തെങ്കി​ലും നടപടി സ്വീക​രിച്ച ഒരു വ്യക്തിയെ യഥാസ്ഥാ​ന​പ്പെ​ടു​ത്താൻ ശ്രമി​ക്കു​മ്പോൾ മൂപ്പൻമാർ ഇതുതന്നെ ചെയ്യണം. സൗമ്യ​പ്ര​കൃ​ത​മുള്ള ഒരു കീഴി​ടയൻ എന്നനി​ല​യിൽ മൂപ്പൻ സംസാ​ര​ത്തിൽ പ്രോ​ത്സാ​ഹി​പ്പി​ക്കു​ന്ന​വ​നും കെട്ടു​പ​ണി​ചെ​യ്യു​ന്ന​വ​നും ആയിരി​ക്കണം, ഭീഷണി​പ്പെ​ടു​ത്തു​ന്ന​വ​നാ​യി​രി​ക്ക​രുത്‌. ചർച്ചാ​വേ​ള​യിൽ, സഹായം ആവശ്യ​മുള്ള ക്രിസ്‌ത്യാ​നി​ക്കു തന്റെ വിചാ​രങ്ങൾ പ്രകടി​പ്പി​ക്കാൻ സാധ്യ​മാ​കു​ന്ന​ട​ത്തോ​ളം സുഖ​പ്ര​ദ​മായ ഒരു അന്തരീക്ഷം സൃഷ്ടി​ക്കാൻ മൂപ്പൻ ശ്രമി​ക്കണം. ആ ഉദ്ദേശ്യ​ത്തിൽ, ഹൃദയം​ഗ​മ​മായ പ്രാരംഭ പ്രാർത്ഥന വലിയ സഹായ​ക​മാ​യി​രി​ക്കും. സൗമ്യ​ത​യിൽ കൊടു​ക്കുന്ന അത്തരം ബുദ്ധ്യു​പ​ദേശം സ്വീക​രി​ക്കുന്ന വ്യക്തി, ഉപദേ​ശകൻ യേശു​വി​നെ​പ്പോ​ലെ ദൈവ​ത്തി​നു പ്രസാ​ദ​ക​ര​മായ കാര്യങ്ങൾ ചെയ്യാൻ ആഗ്രഹി​ക്കു​ന്നു​വെന്ന്‌ അറിയു​ന്നു​വെ​ങ്കിൽ അതു സ്വീക​രി​ക്കാൻ കൂടുതൽ മനസ്സൊ​രു​ക്ക​ത്തോ​ടെ തന്റെ ഹൃദയത്തെ തുറക്കും. സമാപ​ന​പ്രാർത്ഥന സ്‌നേ​ഹ​പൂർവ്വം, സൗമ്യ​മായ രീതി​യിൽ കൊടു​ക്ക​പ്പെട്ട അത്തരം ബുദ്ധ്യു​പ​ദേശം ബാധക​മാ​ക്കേ​ണ്ട​തി​ന്റെ ആവശ്യം വ്യക്തിയെ ബോദ്ധ്യ​പ്പെ​ടു​ത്താ​നി​ട​യുണ്ട്‌.

പ്രാർത്ഥ​ന​യ്‌ക്കു​ശേഷം, ആത്മാർത്ഥ​മാ​യി അഭിന​ന്ദി​ക്കുക. അതു വ്യക്തി​യു​ടെ ദയ, ആശ്രയ​യോ​ഗ്യത അല്ലെങ്കിൽ അദ്ധ്വാ​ന​ശീ​ലം എന്നിങ്ങ​നെ​യുള്ള നല്ല ഗുണങ്ങ​ളോ​ടു ബന്ധപ്പെ​ട്ടി​രു​ന്നേ​ക്കാം. യഹോ​വ​യ്‌ക്കുള്ള അയാളു​ടെ​യോ അവളു​ടെ​യോ വിശ്വ​സ്‌ത​സേ​വ​ന​ത്തി​ന്റെ, ഒരുപക്ഷേ അനേക​വർഷ​ക്കാ​ലത്തെ പൂർവ്വ​ച​രി​ത്രത്തെ പരാമർശി​ക്കാൻ കഴിയും. ഈ വിധത്തിൽ, ആ വ്യക്തി​യിൽ നാം തല്‌പ​ര​രാ​ണെ​ന്നും ക്രിസ്‌തു​തു​ല്യ പരിഗണന നമുക്കു​ണ്ടെ​ന്നും നാം പ്രകട​മാ​ക്കു​ന്നു. യേശു തുയ​ഥൈര സഭയ്‌ക്കുള്ള തന്റെ സന്ദേശം അഭിന​ന്ദ​ന​ത്തോ​ടെ തുടങ്ങി, ഇങ്ങനെ പറഞ്ഞു​കൊണ്ട്‌: “ഞാൻ നിന്റെ പ്രവൃ​ത്തി​യും നിന്റെ സ്‌നേഹം, വിശ്വാ​സം, ശുശ്രൂഷ, സഹിഷ്‌ണുത എന്നിവ​യും നിന്റെ ഒടുവി​ലത്തെ പ്രവൃത്തി ആദ്യ​ത്തേ​തി​ലും ഏറെ​യെ​ന്നും അറിയു​ന്നു.” (വെളി​പ്പാ​ടു 2:19) ആ വാക്കുകൾ അവർ ചെയ്‌തു​കൊ​ണ്ടി​രുന്ന നല്ല പ്രവൃ​ത്തി​കൾ സംബന്ധി​ച്ചു യേശു ബോധ​വാ​നാ​യി​രു​ന്നു​വെന്നു സഭയിലെ അംഗങ്ങൾക്ക്‌ ഉറപ്പു​കൊ​ടു​ത്തു. സഭയ്‌ക്ക്‌ അതിന്റെ തെററു​കൾ ഉണ്ടായി​രു​ന്നു​വെ​ങ്കി​ലും—ഒരു “ഈസബേൽ” സ്വാധീ​നം അനുവ​ദി​ക്ക​പ്പെ​ട്ടി​രു​ന്നു—മററു കാര്യ​ങ്ങ​ളിൽ അതു നന്നായി ചെയ്യു​ക​യാ​യി​രു​ന്നു. അവരുടെ തീക്ഷ്‌ണ​മായ പ്രവർത്തനം ശ്രദ്ധി​ക്ക​പ്പെ​ടാ​തെ പോയി​ട്ടി​ല്ലെന്ന്‌ ആ സഹോ​ദ​രൻമാ​രും സഹോ​ദ​രി​മാ​രും അറിയ​ണ​മെ​ന്നും യേശു ആഗ്രഹി​ച്ചു. (വെളി​പ്പാ​ടു 2:20) അതേവി​ധ​ത്തിൽ മൂപ്പൻമാർ, അഭിന​ന്ദനം അർഹി​ക്കു​ന്നി​ടത്ത്‌ അതു കൊടു​ക്കണം.

ഒരു തെററായ നടപടി​യെ സാഹച​ര്യ​ങ്ങൾ ആവശ്യ​പ്പെ​ടു​ന്ന​തി​ല​ധി​കം ഗൗരവ​പൂർവം കൈകാ​ര്യം ചെയ്യരുത്‌. മൂപ്പൻമാർ ദൈവ​ത്തി​ന്റെ ആട്ടിൻകൂ​ട്ടത്തെ സംരക്ഷി​ക്കു​ക​യും അവന്റെ സ്ഥാപനത്തെ ശുദ്ധി​യു​ള്ള​താ​യി സൂക്ഷി​ക്കു​ക​യും വേണം. എന്നാൽ ശക്തമായ ബുദ്ധ്യു​പ​ദേശം ആവശ്യ​മാ​യി​രി​ക്കുന്ന ചില ആത്മീയ ചുവടു​പി​ഴ​യ്‌ക്ക​ലു​കൾ നീതി​ന്യാ​യ വിചാരണ കൂടാതെ ഒന്നോ രണ്ടോ മൂപ്പൻമാർക്കു സ്വമേ​ധയാ കൈകാ​ര്യം ചെയ്യാ​വു​ന്ന​താണ്‌. അനേക കേസു​ക​ളി​ലും മനഃപൂർവ്വ ദുഷ്ടതക്കു പകരം മാനു​ഷിക ദൗർബ​ല്യ​ങ്ങൾ ആണ്‌ ഒരു ക്രിസ്‌ത്യാ​നി​യു​ടെ തെററായ നടപടിക്ക്‌ അടിസ്ഥാ​ന​മാ​യി​രി​ക്കു​ന്നത്‌. മൂപ്പൻമാർ ആട്ടിൻകൂ​ട്ട​ത്തോട്‌ ആർദ്ര​ത​യോ​ടെ പെരു​മാ​റു​ക​യും ഇത്‌ ഓർമ്മി​ക്കു​ക​യും വേണം: “കരുണ കാണി​ക്കാ​ത്ത​വന്നു കരുണ​യി​ല്ലാത്ത ന്യായ​വി​ധി ഉണ്ടാകും; കരുണ ന്യായ​വി​ധി​യെ ജയിച്ചു പ്രശം​സി​ക്കു​ന്നു.” (യാക്കോബ്‌ 2:13; പ്രവൃ​ത്തി​കൾ 20:28-30) ആ സ്ഥിതിക്ക്‌, കാര്യങ്ങൾ പർവ്വതീ​ക​രി​ക്കു​ന്ന​തി​നു​പ​കരം മൂപ്പൻമാർ പശ്ചാത്ത​പി​ക്കുന്ന സഹവി​ശ്വാ​സി​ക​ളോട്‌ സൗമ്യ​മായ രീതി​യിൽ ഇടപെ​ടണം, മനസ്സലി​വും കരുണ​യും ഉള്ള നമ്മുടെ ദൈവ​മായ യഹോ​വ​യെ​പ്പോ​ലെ തന്നെ.—എഫെസ്യർ 4:32.

തെററായ നടപടി​യി​ലേക്കു നയിച്ചി​രി​ക്കാ​വുന്ന വസ്‌തു​തകൾ സംബന്ധി​ച്ചു ഗ്രാഹ്യം പ്രകട​മാ​ക്കുക. സഹവി​ശ്വാ​സി ഉള്ളുതു​റന്നു സംസാ​രി​ക്കു​മ്പോൾ മൂപ്പൻമാർ ശ്രദ്ധാ​പൂർവ്വം കേൾക്കേ​ണ്ടത്‌ ആവശ്യ​മാണ്‌. ‘തകർന്നും നുറു​ങ്ങി​യു​മി​രി​ക്കുന്ന ഹൃദയത്തെ ദൈവം നിരസി​ക്കു​ക​യി​ല്ലാ’ത്തതിനാൽ അവരും നിരസി​ക്ക​രുത്‌. (സങ്കീർത്തനം 51:17) ഒരുപക്ഷേ വിവാ​ഹിത ഇണയുടെ വൈകാ​രിക പിന്തു​ണ​യു​ടെ അഭാവ​മാ​യി​രി​ക്കാം പ്രശ്‌ന​ത്തി​ന്റെ അടിസ്ഥാന ഹേതു. രൂക്ഷവും ദീർഘി​ച്ച​തു​മായ മാനസിക വിഷാദം സാധാരണ ചിലരു​ടെ ശക്തമായ വൈകാ​രിക ബലത്തെ ക്ഷയിപ്പി​ച്ചി​രി​ക്കാം അല്ലെങ്കിൽ ജ്ഞാനപൂർവ്വ​ക​മായ തീരു​മാ​നങ്ങൾ എടുക്കു​ന്നത്‌ അങ്ങേയ​ററം വിഷമ​ക​ര​മാ​ക്കി​യി​രി​ക്കാം. സ്‌നേ​ഹ​മുള്ള മൂപ്പൻമാർ അത്തരം വസ്‌തു​തകൾ പരിഗ​ണി​ക്കും, എന്തെന്നാൽ “ക്രമം​കെ​ട്ട​വരെ ബുദ്ധി​യു​പ​ദേശി”പ്പാൻ പൗലോസ്‌ തന്റെ സഹോ​ദ​രൻമാ​രെ പ്രബോ​ധി​പ്പി​ച്ചു​വെ​ങ്കി​ലും “ഉൾക്കരു​ത്തി​ല്ലാ​ത്ത​വരെ ധൈര്യ​പ്പെ​ടു​ത്തു​വിൻ; ബലഹീ​നരെ താങ്ങു​വിൻ; എല്ലാവ​രോ​ടും ദീർഘക്ഷമ കാണി​പ്പിൻ” എന്നും അവൻ പ്രോ​ത്സാ​ഹി​പ്പി​ച്ചു. (1 തെസ്സ​ലൊ​നീ​ക്യർ 5:14) മൂപ്പൻമാർ ദൈവ​ത്തി​ന്റെ നീതി​യുള്ള പ്രമാ​ണ​ങ്ങ​ളു​ടെ ശക്തി ക്ഷയിപ്പി​ക്ക​രു​തെ​ന്നി​രി​ക്കെ, അവർ ദൈവം ചെയ്യു​ന്ന​തു​പോ​ലെ, ഉഗ്രത കുറക്കുന്ന വസ്‌തു​തകൾ കണക്കി​ലെ​ടു​ക്കണം.—സങ്കീർത്തനം 103:10-14; 130:3.

നിങ്ങളു​ടെ സഹക്രി​സ്‌ത്യാ​നി​യു​ടെ ആത്മാഭി​മാ​നം നശിപ്പി​ക്കു​ന്നത്‌ ഒഴിവാ​ക്കുക. ഏതെങ്കി​ലും ഒരു സഹോ​ദ​ര​ന്റെ​യോ സഹോ​ദ​രി​യു​ടെ​യോ അന്തസ്സിനു കോട്ടം തട്ടിക്കു​ന്ന​തി​നോ അയാൾ അല്ലെങ്കിൽ അവൾ വില​കെ​ട്ട​യാ​ളാ​ണെ​ന്നുള്ള ധാരണ കൊടു​ക്കു​ന്ന​തി​നോ നാം ആഗ്രഹി​ക്കു​ന്നില്ല. പകരം, വ്യക്തി​യു​ടെ ക്രിസ്‌തീയ ഗുണങ്ങ​ളി​ലും ദൈവ​ത്തോ​ടുള്ള സ്‌നേ​ഹ​ത്തി​ലും നമുക്ക്‌ ആത്മവി​ശ്വാ​സ​മു​ണ്ടെന്ന ഉറപ്പ്‌ ഒരു തെററു​തി​രു​ത്തു​ന്ന​തി​നുള്ള പ്രോ​ത്സാ​ഹ​ന​മാ​യി ഉതകും. സാധ്യ​ത​യ​നു​സ​രിച്ച്‌, കൊരി​ന്ത്യ​രു​ടെ “മനസ്സൊ​രു​ക്ക​വും” “എരിവും” സംബന്ധി​ച്ചു താൻ മററു​ള്ള​വ​രോ​ടു പ്രശം​സി​ച്ചു​പ​റഞ്ഞു എന്ന്‌ പൗലോസ്‌ അവരോ​ടു പറഞ്ഞതി​നാൽ ഉദാര​മ​തി​ക​ളാ​യി​രി​ക്കാൻ അവർ പ്രോ​ത്സാ​ഹി​ത​രാ​യി.—2 കൊരി​ന്ത്യർ 9:1-3.

യഹോ​വ​യിൽ ആശ്രയി​ക്കു​ന്ന​തി​നാൽ പ്രശ്‌നം തരണം​ചെ​യ്യാൻ കഴിയു​മെന്ന്‌ അറിയി​ക്കുക. അതെ, ദൈവ​ത്തിൽ ആശ്രയി​ക്കു​ന്ന​തും അവന്റെ വചനത്തി​ന്റെ ബുദ്ധ്യു​പ​ദേശം ബാധക​മാ​ക്കു​ന്ന​തും ആവശ്യ​മായ യഥാസ്ഥാ​ന​പ്പെ​ടു​ത്തൽ കൈവ​രു​ത്താൻ പ്രയോ​ജ​ന​പ്പെ​ടു​മെന്നു കാണു​ന്ന​തി​നു വ്യക്തിയെ ആത്മാർത്ഥ​മാ​യി സഹായി​ക്കാൻ ശ്രമി​ക്കുക. ആ ഉദ്ദേശ്യ​ത്തിൽ നമ്മുടെ പ്രസ്‌താ​വ​നകൾ തിരു​വെ​ഴു​ത്തു​ക​ളി​ലും ബൈബി​ള​ധി​ഷ്‌ഠിത പ്രസി​ദ്ധീ​ക​ര​ണ​ങ്ങ​ളി​ലും അടിസ്ഥാ​ന​പ്പെ​ട്ട​താ​യി​രി​ക്കണം. നമ്മുടെ ലക്ഷ്യം ഇരുമ​ട​ങ്ങാണ്‌: (1) സഹായം ആവശ്യ​മു​ള്ള​യാ​ളെ യഹോ​വ​യു​ടെ വീക്ഷണം കാണു​ന്ന​തി​നും ഗ്രഹി​ക്കു​ന്ന​തി​നും സഹായി​ക്കു​ക​യും (2) ഈ ദിവ്യ മാർഗ്ഗ​രേ​ഖകൾ പിന്തു​ട​രു​ന്ന​തിൽ ഒരു പരിധി​വരെ അയാൾ അവഗണ​ന​കാ​ട്ടു​ക​യോ പരാജ​യ​പ്പെ​ടു​ക​യോ ചെയ്‌ത​തെ​ങ്ങ​നെ​യെന്നു വ്യക്തിയെ കാണി​ക്കു​ക​യും ചെയ്യുക.

ദയാപൂർവ​ക​വും എന്നാൽ പ്രസക്ത​വു​മായ ചോദ്യ​ങ്ങൾ ചോദി​ച്ചു​കൊ​ണ്ടു ബുദ്ധ്യു​പ​ദേശം കൊടു​ക്കുക. ഹൃദയ​ത്തിൽ ഇറങ്ങി​ചെ​ല്ലു​ന്ന​തിന്‌ ഇതു വളരെ ഫലപ്ര​ദ​മാ​യി​രി​ക്കും. യഹോ​വ​യു​ടെ ജനം എങ്ങനെ വഴിവി​ട്ടു​പോ​യി​രി​ക്കു​ന്നു​വെന്ന്‌ അവർക്കു മനസ്സി​ലാ​ക്കി​ക്കൊ​ടു​ക്കാൻ തന്റെ പ്രവാ​ച​ക​നായ മലാഖി മുഖേന യഹോവ ഒരു ചോദ്യം ഉപയോ​ഗി​ച്ചു. “മനുഷ്യ​ന്നു ദൈവത്തെ തോല്‌പി​ക്കാ​മോ?” എന്നു യഹോവ ചോദി​ച്ചു. “എങ്കിലും നിങ്ങൾ എന്നെ തോല്‌പി​ക്കു​ന്നു” എന്ന്‌ അവൻ കൂട്ടി​ച്ചേർത്തു. (മലാഖി 3:8) മോ​ശൈക ന്യായ​പ്ര​മാ​ണം ആവശ്യ​പ്പെ​ട്ട​ത​നു​സ​രി​ച്ചു വിളവി​ന്റെ പത്തി​ലൊ​രു ഭാഗം സംഭാവന ചെയ്യു​ന്ന​തി​ലെ ഇസ്ര​യേ​ലി​ന്റെ പരാജയം യഹോ​വയെ തോല്‌പി​ക്കു​ന്ന​തി​നു തുല്യ​മാ​യി​രു​ന്നു. ഈ സാഹച​ര്യ​ത്തി​നു പരിഹാ​ര​മു​ണ്ടാ​ക്കു​ന്ന​തിന്‌, ദൈവം തങ്ങളെ സമൃദ്ധ​മാ​യി അനു​ഗ്ര​ഹി​ക്കു​മെ​ന്നുള്ള വിശ്വാ​സ​ത്തോ​ടെ ഇസ്ര​യേ​ല്യർ ശുദ്ധാ​രാ​ധന സംബന്ധിച്ച തങ്ങളുടെ കടപ്പാ​ടു​കൾ നിറ​വേ​റേ​റ​ണ്ട​തു​ണ്ടാ​യി​രു​ന്നു. ഇന്നു ശരിയാ​യതു ചെയ്യു​ന്ന​തിൽ നമ്മുടെ സ്വർഗ്ഗീയ പിതാ​വിൽ ആശ്രയി​ക്കു​ന്ന​തും അവനെ അനുസ​രി​ക്കു​ന്ന​തും ഉൾപ്പെ​ടു​ന്നു​വെന്നു ചിന്തോ​ദ്ദീ​പ​ക​വും പരിഗ​ണ​നാർഹ​വു​മായ ചോദ്യ​ങ്ങ​ളി​ലൂ​ടെ മൂപ്പൻമാർക്കും ഊന്നി​പ്പ​റ​യാൻ കഴിയും. (മലാഖി 3:10) ആ ആശയം ഹൃദയ​ത്തി​ലേക്കു പകർന്നു​കൊ​ടു​ക്കു​ന്നത്‌, ‘തന്റെ കാലിന്നു പാത നിരത്തു​ന്ന​തി​നു’ നമ്മുടെ സഹോ​ദ​രനെ സഹായി​ക്കു​ന്ന​തിൽ വളരെ പ്രയോ​ജനം ചെയ്യും.—എബ്രായർ 12:13.

ബുദ്ധ്യു​പ​ദേശം സ്വീക​രി​ക്കു​ന്ന​തി​ന്റെ പ്രയോ​ജ​നങ്ങൾ ഊന്നി​പ്പ​റ​യുക. ഫലപ്ര​ദ​മായ ബുദ്ധ്യു​പ​ദേ​ശ​ത്തിൽ, ഒരു തെററായ ഗതി പിന്തു​ട​രു​ന്ന​തി​ന്റെ പരിണ​ത​ഫ​ല​ങ്ങ​ളെ​ക്കു​റി​ച്ചുള്ള മുന്നറി​യി​പ്പും കാര്യങ്ങൾ നേരെ​യാ​ക്കു​ന്ന​തിൽനി​ന്നു ലഭിക്കുന്ന പ്രയോ​ജ​ന​ങ്ങ​ളെ​ക്കു​റി​ച്ചുള്ള ഓർമ്മി​പ്പി​ക്ക​ലു​ക​ളും ഉൾപ്പെ​ടു​ന്നു. ഒരു സമയോ​ചിത മുന്നറി​യി​പ്പി​നു​ശേഷം, ആത്മീയ​മാ​യി ഉദാസീ​ന​മായ ലവോ​ദി​ക്യ​യി​ലെ സഭയിൽപെ​ട്ടവർ തങ്ങളുടെ മുൻഗതി സംബന്ധിച്ച്‌ അനുത​പി​ക്കു​ക​യും തീക്ഷ്‌ണ​ത​യുള്ള ശിഷ്യൻമാ​രാ​യി​ത്തീ​രു​ക​യും ചെയ്യു​ന്നു​വെ​ങ്കിൽ അവർ സ്വർഗ്ഗ​ത്തിൽ തന്നോ​ടൊ​പ്പം ഭരിക്കു​ന്ന​തി​നുള്ള പ്രത്യാ​ശ​യുൾപ്പെടെ മുന്തിയ പദവികൾ ആസ്വദി​ക്കും എന്ന്‌ യേശു ഉറപ്പു​കൊ​ടു​ത്തു.—വെളി​പ്പാ​ടു 3:14-21.

ബുദ്ധ്യു​പ​ദേ​ശം അനുസ​രി​ക്കു​ന്നു​ണ്ടോ എന്നതിൽ താത്‌പ​ര്യം കാണി​ക്കുക. ഒരു നല്ല ഡോക്ടർ താൻ നേരെ​യാ​ക്കിയ അസ്ഥി ശരിയായ സ്ഥാനത്തു​തന്നെ ഇരിക്കു​ന്നു​വോ എന്നു കാണാൻ ഇടയ്‌ക്കി​ടെ പരി​ശോ​ധി​ക്കു​ന്ന​തു​പോ​ലെ തിരു​വെ​ഴു​ത്തു ബുദ്ധ്യു​പ​ദേശം ബാധക​മാ​ക്കു​ന്നു​ണ്ടോ​യെന്നു ഉറപ്പു​വ​രു​ത്താൻ മൂപ്പൻമാർ ശ്രമി​ക്കണം. അവർക്ക്‌ തങ്ങളോ​ടു​തന്നെ ചോദി​ക്കാൻ കഴിയും: കൂടു​ത​ലായ സഹായം ആവശ്യ​മു​ണ്ടോ? ഒരുപക്ഷേ മറെറാ​രു രീതി​യിൽ, ബുദ്ധ്യു​പ​ദേശം ആവർത്തി​ക്കേ​ണ്ട​തു​ണ്ടോ? താഴ്‌മ​യു​ടെ ആവശ്യ​ത്തെ​ക്കു​റി​ച്ചു യേശു​വി​നു തന്റെ ശിഷ്യൻമാ​രെ ആവർത്തി​ച്ചു ബുദ്ധ്യു​പ​ദേ​ശി​ക്കേ​ണ്ടി​വന്നു. ഒരു ദീർഘിച്ച കാലഘ​ട്ട​ത്തിൽ, അവൻ ബുദ്ധ്യു​പ​ദേ​ശ​ത്തി​ലൂ​ടെ​യും ദൃഷ്ടാ​ന്ത​ങ്ങ​ളി​ലൂ​ടെ​യും സാധന​പാ​ഠ​ങ്ങ​ളി​ലൂ​ടെ​യും അവരുടെ ചിന്തയെ യഥാസ്ഥാ​ന​പ്പെ​ടു​ത്താൻ ക്ഷമാപൂർവ്വം ശ്രമിച്ചു. (മത്തായി 20:20-28; മർക്കൊസ്‌ 9:33-37; ലൂക്കൊസ്‌ 22:24-27; യോഹ​ന്നാൻ 13:5-17) സമാന​മാ​യി, വ്യക്തി​യു​ടെ പൂർണ്ണ ആത്മീയ ആരോ​ഗ്യ​ത്തി​ലേ​ക്കുള്ള പുരോ​ഗ​തി​യെ പ്രോ​ത്സാ​ഹി​പ്പി​ക്കാൻ ഉദ്ദേശി​ച്ചി​ട്ടുള്ള അനുബന്ധ തിരു​വെ​ഴു​ത്തു​ചർച്ച ക്രമീ​ക​രി​ക്കു​ന്ന​തി​ലൂ​ടെ മൂപ്പൻമാർക്ക്‌ ഒരു സഹോ​ദ​ര​ന്റെ​യോ സഹോ​ദ​രി​യു​ടെ​യോ പരിപൂർണ്ണ യഥാസ്ഥാ​ന​പ്പെ​ടു​ത്തൽ ഉറപ്പു​വ​രു​ത്തു​ന്ന​തി​നു സഹായി​ക്കാൻ കഴിയും.

വരുത്തി​യി​ട്ടു​ള്ള ഏതു പുരോ​ഗ​തി​യ്‌ക്കും ശ്ലാഘി​ക്കുക. ഒരു തെററായ ചുവടു​വെച്ച ഒരുവൻ തിരു​വെ​ഴു​ത്തു ബുദ്ധ്യു​പ​ദേശം ബാധക​മാ​ക്കാൻ ആത്മാർത്ഥ​മാ​യി ശ്രമി​ക്കു​ന്നു​വെ​ങ്കിൽ അയാളെ ശ്ലാഘി​ക്കുക. ഇത്‌ ആദ്യബു​ദ്ധ്യു​പ​ദേ​ശത്തെ ബലിഷ്‌ഠ​മാ​ക്കും, സാധ്യ​ത​യ​നു​സ​രിച്ച്‌ കൂടു​ത​ലായ പുരോ​ഗ​തി​ക്കു പ്രോ​ത്സാ​ഹി​പ്പി​ക്കു​ക​യും ചെയ്യും. കൊരി​ന്ത്യർക്കുള്ള പൗലോ​സി​ന്റെ ആദ്യ ലേഖന​ത്തിൽ അനേകം കാര്യങ്ങൾ സംബന്ധിച്ച്‌ അവർക്കു ദൃഢമായ ബുദ്ധ്യു​പ​ദേശം കൊടു​ക്കാൻ അവനു കടപ്പാ​ടു​ണ്ടാ​യി​രു​ന്നു. അപ്പൊ​സ്‌ത​ലന്റെ ലേഖന​ത്തോ​ടുള്ള മികച്ച പ്രതി​ക​ര​ണ​ത്തെ​ക്കു​റി​ച്ചു തീത്തോസ്‌ അവനെ അറിയി​ച്ച​ശേഷം ഉടനെ അവരെ പ്രശം​സി​ക്കാൻ പൗലോസ്‌ എഴുതി: “ഇപ്പോൾ ഞാൻ സന്തോ​ഷി​ക്കു​ന്നു” അവൻ പറഞ്ഞു, “നിങ്ങൾ ദുഃഖി​ച്ച​തി​നാ​ലല്ല, മാനസാ​ന്ത​ര​ത്തി​ന്നാ​യി ദുഃഖി​ച്ച​തി​നാൽ അത്രേ. . .ദൈവ​ഹി​ത​പ്ര​കാ​ര​മ​ല്ലോ നിങ്ങൾ ദുഃഖി​ച്ചത്‌.”—2 കൊരി​ന്ത്യർ 7:9.

സന്തോ​ഷി​ക്കു​ന്ന​തി​നുള്ള ഒരു കാരണം

അതെ, പൗലോ​സി​ന്റെ ബുദ്ധ്യു​പ​ദേശം കൊരി​ന്ത്യ​രെ സഹായി​ച്ച​താ​യി കേട്ട​പ്പോൾ അവൻ സന്തോ​ഷി​ച്ചു. സമാന​മാ​യി, ഒരു സഹാരാ​ധകൻ മൂപ്പൻമാ​രു​ടെ സ്‌നേ​ഹ​പൂർവ്വ​ക​മായ സഹായ​ത്തോട്‌ അനുകൂ​ല​മാ​യി പ്രതി​ക​രി​ച്ച​തി​ന്റെ ഫലമായി തെററായ ചുവടു​വെ​പ്പിൽനി​ന്നു പിൻമാ​റു​ന്നു​വെ​ങ്കിൽ ആധുനി​ക​കാല മൂപ്പൻമാർക്കു വലിയ സന്തോ​ഷ​മുണ്ട്‌. ദൈവിക ഫലങ്ങൾ ഹൃദയ​ത്തിൽ സമൃദ്ധ​മാ​യി വളരാൻ കഴിയ​ത്ത​ക്ക​വണ്ണം അവി​ടെ​നി​ന്നു പാപത്തി​ന്റെ ശല്യക​ര​മായ കളകളെ വേരോ​ടെ പിഴു​തു​ക​ള​യു​ന്ന​തി​നു പശ്ചാത്താ​പ​മുള്ള ഒരു ക്രിസ്‌ത്യാ​നി​യെ സഹായി​ക്കു​ന്ന​തിൽ മൂപ്പൻമാർക്കു തീർച്ച​യാ​യും സന്തോ​ഷി​ക്കാൻ കഴിയും.

എന്തെങ്കി​ലും തെററായ നടപടി സ്വീക​രി​ച്ചി​ട്ടുള്ള ഒരു വ്യക്തിയെ യഥാസ്ഥാ​ന​പ്പെ​ടു​ത്തു​ന്ന​തിൽ മൂപ്പൻമാർ വിജയം വരിക്കു​ന്നു​വെ​ങ്കിൽ, ആത്മീയ​മാ​യി തികച്ചും വിനാ​ശ​ക​ര​മായ ഒരു ഗതിയിൽനിന്ന്‌ അയാളെ പിന്തി​രി​പ്പി​ച്ചേ​ക്കാം. (യാക്കോബ്‌ 5:19, 20 താരത​മ്യം​ചെ​യ്യുക) അത്തരം സഹായ​ത്തിന്‌, സഹായം സ്വീക​രി​ക്കു​ന്ന​യാൾ യഹോ​വ​യാം ദൈവ​ത്തോ​ടു നന്ദി പ്രകടി​പ്പി​ക്കണം. മൂപ്പൻമാ​രു​ടെ സ്‌നേ​ഹ​പൂർവ്വ​ക​മായ സഹായ​ത്തി​നും മനസ്സലി​വി​നും ഗ്രാഹ്യ​ത്തി​നു​മുള്ള യഥാർത്ഥ വിലമ​തി​പ്പി​ന്റെ വാക്കു​ക​ളും ഉചിത​മാ​യി​രി​ക്കും. ആത്മീയ മടങ്ങി​വ​രവു പൂർണ്ണ​മാ​യി​രി​ക്കു​മ്പോൾ, സൗമ്യ​ത​യു​ടെ ആത്മാവിൽ യഥാസ്ഥാ​ന​പ്പെ​ടു​ത്തൽ നടത്തു​ന്ന​തിൽ ബന്ധപ്പെട്ട എല്ലാവർക്കും ആഹ്ലാദി​ക്കാൻ കഴിയും.