നിങ്ങൾക്കു ക്ഷമ പ്രകടി​പ്പി​ക്കാ​നാ​വു​മോ?

യഹോവ അബ്രാ​മി​നോ​ടു പറഞ്ഞു: “നീ നിന്റെ ദേശത്തെ . . . വിട്ടു പുറ​പ്പെട്ടു ഞാൻ നിന്നെ കാണി​പ്പാ​നി​രി​ക്കുന്ന ദേശ​ത്തേക്കു പോക. ഞാൻ നിന്നെ വലി​യൊ​രു ജാതി​യാ​ക്കും; നിന്നെ അനു​ഗ്ര​ഹി​ച്ചു നിന്റെ പേർ വലുതാ​ക്കും.” (ഉല്‌പത്തി 12:1, 2) അബ്രാ​മിന്‌ അന്ന്‌ 75 വയസ്സാ​യി​രു​ന്നു. യഹോ​വ​ക്കാ​യി കാത്തി​രു​ന്നു​കൊണ്ട്‌ അദ്ദേഹം അനുസ​രി​ക്ക​യും തന്റെ ശേഷിച്ച ജീവി​ത​കാ​ല​മൊ​ക്കെ​യും ബുദ്ധി​പൂർവം ക്ഷമ പ്രകട​മാ​ക്കു​ക​യും ചെയ്‌തു.

അവസാനം, ക്ഷമാശീ​ല​നായ അബ്രഹാ​മി​നോട്‌ (അബ്രാം) ദൈവം ഇങ്ങനെ​യൊ​രു വാഗ്‌ദത്തം നടത്തി: “ഞാൻ നിന്നെ അനു​ഗ്ര​ഹി​ക്ക​യും നിന്നെ വർദ്ധി​പ്പി​ക്ക​യും ചെയ്യും.” പൗലോസ്‌ ഇങ്ങനെ​യും കൂട്ടി​ച്ചേർത്തു: “അങ്ങനെ അവൻ ദീർഘ​ക്ഷ​മ​യോ​ടി​രു​ന്നു വാഗ്‌ദ​ത്ത​വി​ഷയം പ്രാപി​ച്ചു.”—എബ്രായർ 6:13-15.

എന്താണു ക്ഷമ? “എന്തി​നെ​ങ്കി​ലും​വേണ്ടി കാത്തി​രി​ക്കാ​നുള്ള” അഥവാ “പ്രകോ​പ​ന​മോ സമ്മർദ​മോ ഉള്ളപ്പോൾ സംയമനം” പ്രകട​മാ​ക്കാ​നുള്ള പ്രാപ്‌തി​യാ​യി നിഘണ്ടു​ക്കൾ അതിനെ നിർവ​ചി​ക്കു​ന്നു. അതു​കൊണ്ട്‌, നിങ്ങൾ ആർക്കെ​ങ്കി​ലു​മോ എന്തി​നെ​ങ്കി​ലു​മോ വേണ്ടി കാത്തി​രി​ക്കേ​ണ്ടി​വ​രു​മ്പോൾ അല്ലെങ്കിൽ നിങ്ങൾ പ്രകോ​പി​ത​നാ​കു​ക​യോ സമ്മർദ​ത്തിൻ കീഴി​ലാ​കു​ക​യോ ചെയ്യു​മ്പോൾ നിങ്ങളു​ടെ ക്ഷമ പരീക്ഷി​ക്ക​പ്പെ​ടു​ന്നു. അത്തരം സന്ദർഭ​ങ്ങ​ളിൽ ക്ഷമാശീ​ലൻ ശാന്തത കൈ​വെ​ടി​യു​ന്നില്ല. എന്നാൽ ക്ഷമാര​ഹി​തൻ അങ്ങനെയല്ല, അയാൾ തിടു​ക്ക​വും നീരസ​വും പ്രകടി​പ്പി​ക്കും.

നമ്മുടെ ക്ഷമാര​ഹി​ത​മായ ആധുനി​ക​ലോ​കം

ഇന്ന്‌ ഊന്നൽ ക്ഷമയ്‌ക്കല്ല, വേഗത​യ്‌ക്കാണ്‌. ഇത്‌ അനേകം നഗരങ്ങ​ളിൽ വിശേ​ഷാൽ സത്യമാണ്‌. ആളുകൾ തിങ്ങി​പ്പാർക്കുന്ന നഗരങ്ങ​ളി​ലെ ലക്ഷക്കണ​ക്കി​നാ​ളു​ക​ളു​ടെ ഓരോ ദിവസ​വും ഘടികാ​ര​ത്തി​ന്റെ അലാറ​ത്തോ​ടെ ആരംഭി​ക്കു​ന്നു. പിന്നെ അങ്ങോ​ട്ടൊ​രു മരണപ്പാ​ച്ചി​ലാണ്‌—എവി​ടെ​യെ​ങ്കി​ലും എത്താൻ, ആരെ​യെ​ങ്കി​ലും കാണാൻ, എന്തെങ്കി​ലും നേടാൻ. അനേകർ പിരി​മു​റു​ക്ക​ത്തി​ലാ​വു​ന്ന​തി​ലും അക്ഷമരാ​കു​ന്ന​തി​ലും വല്ല അത്ഭുത​വു​മു​ണ്ടോ?

മററു​ള്ള​വ​രു​ടെ കുററ​ങ്ങ​ളും കുറവു​ക​ളും കാണു​മ്പോൾ നിങ്ങൾ ബേജാ​റാ​കാ​റു​ണ്ടോ? “ആരെങ്കി​ലും സമയം പാലി​ക്കാ​തി​രു​ന്നാൽ എനിക്കത്‌ ഇഷ്ടമല്ല” എന്ന്‌ ആൽബർട്ട്‌ പറയുന്നു. സമയം കഴിഞ്ഞി​ട്ടും കാണാത്ത ഒരാളെ കാത്തി​രി​ക്കു​ന്നത്‌ വീർപ്പു​മു​ട്ട​ലു​ള​വാ​ക്കു​മെന്നു മിക്കയാ​ളു​ക​ളും സമ്മതി​ക്കും. ആ പ്രത്യേക സമയത്ത്‌ എന്തെങ്കി​ലും സാധി​ക്കേ​ണ്ട​തു​ണ്ടെ​ങ്കിൽ പിന്നെ പറയു​ക​യും​വേണ്ടാ. 18-ാം നൂററാ​ണ്ടി​ലെ ഒരു ബ്രിട്ടീഷ്‌ രാഷ്‌ട്രീ​യ​ക്കാ​ര​നായ, ന്യൂകാ​സി​ലി​ലെ ഒരു പ്രഭു​വി​നെ​ക്കു​റി​ച്ചു പറഞ്ഞി​രി​ക്കു​ന്നത്‌ ഇങ്ങനെ​യാണ്‌: ‘അദ്ദേഹം രാവിലെ അര മണിക്കൂർ പാഴാ​ക്കു​ന്നു. പിന്നെ ദിവസം മുഴുവൻ ഓട്ടം​തന്നെ ഓട്ടം. ഒരിട​ത്തും കൃത്യ​സ​മ​യത്ത്‌ എത്തുന്നു​മില്ല.’ ദിവസേന അതു​പോ​ലെ​യുള്ള ഒരാ​ളെ​യാണ്‌ ആശ്രയി​ക്കേ​ണ്ടി​വ​രു​ന്ന​തെ​ങ്കിൽ നിങ്ങൾക്ക്‌ ക്ഷമയോ​ടെ നില​കൊ​ള്ളാ​നാ​കു​മോ?

വണ്ടി ഓടി​ക്കു​മ്പോൾ നിങ്ങൾ എങ്ങനെയാ, പെട്ടെന്നു മുഷിവു തോന്നു​മോ, കാത്തു​നിൽക്കാൻ മടിക്കു​മോ, വളരെ വേഗത്തിൽ ഓടി​ക്കാൻ ഇഷ്ടപ്പെ​ടു​മോ? അത്തരം സാഹച​ര്യ​ങ്ങ​ളിൽ അക്ഷമ പലപ്പോ​ഴും ദുരന്തങ്ങൾ വിളി​ച്ചു​വ​രു​ത്തു​ന്നു. 1989-ൽ പശ്ചിമ​ജർമ​നി​യിൽ, പരിക്കി​ലോ മരണത്തി​ലോ കലാശിച്ച റോഡ​പ​ക​ടങ്ങൾ 4,00,000-ത്തിലധി​ക​മാ​യി​രു​ന്നു. ഇവയിൽ മൂന്നി​ലൊ​ന്നോ​ളം സംഭവി​ക്കാൻ കാരണം ഡ്രൈവർ ഒന്നുകിൽ വളരെ വേഗത്തിൽ അല്ലെങ്കിൽ മുമ്പി​ലുള്ള വാഹന​ത്തോ​ടു വളരെ അടുത്ത്‌ വാഹനം ഓടിച്ചു എന്നതാ​യി​രു​ന്നു. അപ്പോൾ ഒരു പരിധി​വരെ, 1,37,000-ത്തിലധി​കം ആളുകൾക്ക്‌ പരിക്കോ മരണമോ വരുത്തി​യ​തി​നു കാരണം അക്ഷമ പ്രകടി​പ്പി​ച്ച​താണ്‌ എന്നു വരുന്നു. അക്ഷമയ്‌ക്ക്‌ ഒടു​ക്കേ​ണ്ടി​വന്ന വില നോക്കുക!

“ചിലരുണ്ട്‌, നമ്മെ​ക്കൊ​ണ്ടു സംസാ​രി​പ്പി​ക്കില്ല, അല്ലെങ്കിൽ ഏതു​നേ​ര​വും പൊങ്ങ​ച്ച​മാ​യി​രി​ക്കും തട്ടിവി​ടുക. അവരുടെ അടുത്ത്‌ ക്ഷമയോ​ടെ നിൽക്കാ​മെ​ന്നു​വെ​ച്ചാൽ എനിക്കത്‌ വല്യ ബുദ്ധി​മു​ട്ടാ,” എന്നാണ്‌ ആനിന്റെ പരാതി. ഇനി, കാൾഹെർമാ​ന്റെ കാര്യ​മെ​ടു​ക്കുക. “പ്രായം​ചെ​ന്ന​വ​രോട്‌ ഒരു ആദരവു​മി​ല്ലാത്ത യുവാക്ക”ളെ കാണു​മ്പോൾ തന്റെ ക്ഷമ നശിക്കാ​റു​ണ്ടെ​ന്നാണ്‌ അദ്ദേഹം പറയു​ന്നത്‌.

ഇവയും മററു സന്ദർഭ​ങ്ങ​ളും നിങ്ങളെ അക്ഷമരാ​ക്കി​യേ​ക്കാം. അപ്പോൾ, നിങ്ങൾക്ക്‌ എങ്ങനെ​യാണ്‌ കൂടുതൽ ക്ഷമ നട്ടുവ​ളർത്താ​നാ​വുക?

നിങ്ങളു​ടെ ക്ഷമയ്‌ക്കു കരു​ത്തേ​കാൻ യഹോ​വക്കു കഴിയും

തീരു​മാ​ന​ശേ​ഷി​യി​ല്ലായ്‌മ, ബലഹീനത എന്നിവ​യെ​യാണ്‌ ക്ഷമ വെളി​വാ​ക്കു​ന്നത്‌ എന്നാണ്‌ പലരു​ടെ​യും ചിന്ത. എന്നാൽ കരുത്തി​ന്റെ ലക്ഷണമാ​യി​ട്ടാണ്‌ യഹോവ അതിനെ കാണു​ന്നത്‌. “ആരും നശിച്ചു​പോ​കാ​തെ എല്ലാവ​രും മാനസാ​ന്ത​ര​പ്പെ​ടു​വാൻ അവൻ ഇച്ഛിച്ചു നിങ്ങ​ളോ​ടു ദീർഘക്ഷമ കാണിക്കു”ന്നു. (2 പത്രൊസ്‌ 3:9) അതു​കൊണ്ട്‌, നിങ്ങളു​ടെ സംയമ​ന​ത്തി​നു കരു​ത്തേ​കാൻ യഹോ​വ​യോ​ടു പററി​നിന്ന്‌ നിങ്ങളു​ടെ മുഴു​ഹൃ​ദ​യ​ത്തോ​ടെ അവിടു​ത്തെ ആശ്രയി​ക്കു​വിൻ. ദൈവ​വു​മാ​യുള്ള നിങ്ങളു​ടെ ബന്ധത്തെ ബലിഷ്‌ഠ​മാ​ക്കു​ന്ന​താണ്‌ ക്ഷമാപൂർവ​ക​മായ ഒരു മാനസി​കാ​വസ്ഥ വികസി​പ്പി​ച്ചെ​ടു​ക്കു​ന്ന​തി​ലേ​ക്കുള്ള പരമ​പ്ര​ധാ​ന​മായ ഏക ചുവടു​വ​യ്‌പ്‌.

കൂടാതെ, ഭൂമി​യെ​യും മനുഷ്യ​വർഗ​ത്തെ​യും സംബന്ധി​ച്ചുള്ള യഹോ​വ​യു​ടെ ഉദ്ദേശ്യ​ങ്ങൾ അറിയു​ന്നതു മർമ​പ്ര​ധാ​ന​മാണ്‌. അബ്രഹാം “ദൈവം ശില്‌പി​യാ​യി നിർമി​ച്ച​തും അടിസ്ഥാ​ന​ങ്ങ​ളു​ള്ള​തു​മായ നഗരത്തി​ന്നാ​യി [ദൈവ​രാ​ജ്യ​ത്തി​ന്നാ​യി] കാത്തി​രു​ന്നു.” (എബ്രായർ 11:10) അതു​പോ​ലെ, ദിവ്യ വാഗ്‌ദ​ത്ത​ങ്ങ​ളു​ടെ വ്യക്തമായ ഒരു കാഴ്‌ച​പ്പാ​ടു വെച്ചു​പു​ലർത്തു​ന്ന​തും യഹോ​വ​ക്കാ​യി കാത്തി​രി​ക്കു​ന്ന​തിൽ സന്തുഷ്ട​രാ​യി​രി​ക്കു​ന്ന​തും പ്രയോ​ജ​ന​പ്ര​ദ​മാ​യി​രി​ക്കും. ക്ഷമ തീരു​മാ​ന​ശേ​ഷി​യി​ല്ലാ​യ്‌മയെ സൂചി​പ്പി​ക്കു​ന്നില്ല. മറിച്ച്‌ അത്‌ ആളുകളെ വാസ്‌ത​വ​ത്തിൽ സത്യാ​രാ​ധ​ന​യി​ലേക്കു കൊണ്ടു​വ​രു​മെന്നു നിങ്ങൾ തിരി​ച്ച​റി​യും. അതു​കൊണ്ട്‌, “നമ്മുടെ കർത്താ​വി​ന്റെ ദീർഘ​ക്ഷ​മയെ രക്ഷ എന്നു വിചാ​രി​പ്പിൻ.”—2 പത്രൊസ്‌ 3:14.

നിങ്ങളു​ടെ സാഹച​ര്യ​ങ്ങൾ നിങ്ങളെ ചില​പ്പോൾ ക്ഷമയുടെ നെല്ലി​പ്പ​ല​ക​യോ​ളം എത്തിക്കു​ന്നെ​ങ്കി​ലോ? അവിശ്വാ​സി​കൾ നിങ്ങളെ അങ്ങേയ​ററം വീർപ്പു​മു​ട്ടി​ക്കാ​റു​ണ്ടോ? ഇനി, എന്റെ അസുഖം മാറു​ക​യി​ല്ലാ​യി​രി​ക്കും എന്നു തോന്നും​വി​ധം ദീർഘ​കാ​ല​ത്തേക്കു നിങ്ങൾക്ക്‌ അസുഖ​മു​ണ്ടാ​യി​രു​ന്നി​ട്ടു​ണ്ടോ? അത്തരം സന്ദർഭ​ങ്ങ​ളിൽ ശിഷ്യ​നായ യാക്കോബ്‌ എഴുതി​യതു പരിചി​ന്തി​ക്കുക. ക്ഷമ കാണി​ക്കു​ന്ന​തിൽ പ്രവാ​ച​കൻമാർ വെച്ചി​രി​ക്കുന്ന മാതൃ​ക​യെ​പ്പ​ററി പറഞ്ഞ​ശേഷം കടുത്ത സമ്മർദ​ത്തിൻ കീഴിൽ ശാന്തരാ​യി നില​കൊ​ള്ളാ​നാ​വു​ന്ന​തി​ന്റെ രഹസ്യം അദ്ദേഹം വെളി​പ്പെ​ടു​ത്തി. യാക്കോബ്‌ പറഞ്ഞു: “നിങ്ങളിൽ കഷ്ടമനു​ഭ​വി​ക്കു​ന്നവൻ പ്രാർഥി​ക്കട്ടെ.”—യാക്കോബ്‌ 5:10, 13.

നിങ്ങളു​ടെ ക്ഷമയ്‌ക്കു കരു​ത്തേ​കാ​നും പരി​ശോ​ധനാ വേളയിൽ നിങ്ങളു​ടെ തന്റേടം കെടാതെ നിയ​ന്ത്രി​ച്ചു​നിർത്താ​നും​വേണ്ടി പ്രാർഥ​ന​യി​ലൂ​ടെ ആത്മാർഥ​മാ​യി ദൈവ​ത്തോട്‌ അപേക്ഷി​ക്കുക. ആവർത്തി​ച്ചു യഹോ​വ​യി​ലേക്കു തിരി​യുക. നിങ്ങളു​ടെ സമചി​ത്ത​ത​യ്‌ക്കു ഭീഷണി ഉയർത്തുന്ന മററു​ള്ള​വ​രു​ടെ സാഹച​ര്യ​ങ്ങ​ളെ​യോ സ്വഭാ​വ​ങ്ങ​ളെ​യോ തിരി​ച്ച​റി​യാൻ അവിടുന്ന്‌ നിങ്ങളെ സഹായി​ക്കും. പരി​ശോ​ധ​നാ​ത്മ​ക​മാ​കാൻ സാധ്യ​ത​യുള്ള സാഹച​ര്യ​ങ്ങ​ളിൽ മുന്ന​മേ​തന്നെ പ്രാർഥി​ക്കു​ന്നത്‌ ശാന്തമ​ന​സ്‌ക​രാ​യി നില​കൊ​ള്ളാൻ നിങ്ങളെ സഹായി​ക്കും.

തന്നെയും മററു​ള്ള​വ​രെ​യും കുറി​ച്ചുള്ള ശരിയായ കാഴ്‌ച​പ്പാട്‌

മനഃസ്വാ​സ്ഥ്യം കാത്തു​സൂ​ക്ഷി​ക്കാൻ നിങ്ങൾക്കു നിങ്ങ​ളെ​യും മററു​ള്ള​വ​രെ​യും കുറിച്ച്‌ ഒരു ശരിയായ കാഴ്‌ച​പ്പാട്‌ ഉണ്ടായി​രി​ക്കണം. ഇതു സാധ്യ​മാ​കു​ന്നതു ബൈബിൾ പഠനത്തി​ലൂ​ടെ​യാണ്‌. കാരണം സകലരും അപൂർണത അവകാ​ശ​പ്പെ​ടു​ത്തി​യി​രി​ക്കു​ന്നു എന്നും അതിനാൽത്തന്നെ ന്യൂന​തകൾ ഉള്ളവരാണ്‌ എന്നും അതു പ്രകട​മാ​ക്കു​ന്നു. അതിലു​പരി, സ്‌നേ​ഹ​ത്തിൽ വളരാൻ ബൈബിൾ പരിജ്ഞാ​നം നിങ്ങളെ സഹായി​ക്കും. മററു​ള്ള​വ​രോ​ടു ക്ഷമ കാണി​ക്കു​വാൻ ഈ ഗുണം അത്യന്താ​പേ​ക്ഷി​ത​മാണ്‌.—യോഹ​ന്നാൻ 13:34, 35; റോമർ 5:12; ഫിലി​പ്പി​യർ 1:9.

നിങ്ങൾ ക്ഷുഭി​ത​രാ​കുന്ന ഘട്ടങ്ങളിൽ സ്‌നേ​ഹ​വും ക്ഷമിക്കാ​നുള്ള വാഞ്‌ഛ​യു​മു​ണ്ടെ​ങ്കിൽ നിങ്ങൾ ശാന്തരാ​കും. ആരു​ടെ​യെ​ങ്കി​ലും സ്വഭാവം പ്രകോ​പി​പ്പി​ക്കു​ന്ന​താ​ണെ​ങ്കിൽ നിങ്ങൾക്കു വിയോ​ജി​പ്പു​ള്ളതു സ്വഭാ​വ​ത്തോ​ടാണ്‌ അല്ലാതെ വ്യക്തി​യോ​ടല്ല എന്നു സ്‌നേഹം നിങ്ങളെ ഓർമി​പ്പി​ക്കും. എത്ര പ്രാവ​ശ്യ​മാണ്‌ നിങ്ങളു​ടെ​തന്നെ ബലഹീ​ന​തകൾ ദൈവ​ത്തി​ന്റെ ക്ഷമയെ പരീക്ഷി​ക്കേ​ണ്ടത്‌, മററു​ള്ള​വരെ പ്രകോ​പി​പ്പി​ക്കേ​ണ്ടത്‌ എന്നെല്ലാം കണക്കി​ലെ​ടു​ക്കുക.

നിങ്ങ​ളെ​ക്കു​റി​ച്ചു​തന്നെ ഒരു ശരിയായ വീക്ഷണം ഉണ്ടായി​രി​ക്കു​ന്നത്‌ ക്ഷമാപൂർവം കാത്തി​രി​ക്കാൻ നിങ്ങളെ സഹായി​ക്കും. ഉദാഹ​ര​ണ​ത്തിന്‌, നിങ്ങൾ യഹോ​വ​യു​ടെ സേവന​ത്തിൽ പദവികൾ എത്തിപ്പി​ടി​ക്കാൻ ശ്രമി​ച്ചിട്ട്‌ എന്തുപ​ററി, നിരാ​ശി​ത​നാ​കേ​ണ്ടി​വ​ന്നോ? നിങ്ങളു​ടെ ക്ഷമ പൊടു​ന്നനെ നശിക്കു​ന്നു എന്നു തോന്നു​ന്നു​വോ? അങ്ങനെ​യെ​ങ്കിൽ, ഓർക്കുക, അക്ഷമയു​ടെ വേരു കിടക്കു​ന്നത്‌ അഹങ്കാ​ര​ത്തി​ലാണ്‌. “ഗർവ്വമാ​ന​സ​നെ​ക്കാൾ ക്ഷമാമാ​നസൻ ശ്രേഷ്‌ഠൻ” എന്നാണ്‌ ശലോ​മോൻ പറഞ്ഞി​രി​ക്കു​ന്നത്‌. (സഭാ​പ്ര​സം​ഗി 7:8) അതേ, ക്ഷമ നട്ടുവ​ളർത്തു​ന്ന​തിൽ അഹങ്കാരം ഒരു വലിയ പ്രതി​ബ​ന്ധ​മാണ്‌. ശാന്തത കൈ​വെ​ടി​യാ​തെ കാത്തി​രി​ക്കാൻ താഴ്‌മ​യുള്ള വ്യക്തി​കൾക്ക്‌ എളുപ്പ​മാ​യി തോന്നു​ന്നു എന്നതു സത്യമല്ലേ? അതിനാൽ, താഴ്‌മ നട്ടുവ​ളർത്തു​വിൻ. അപ്പോൾ എത്ര താമസി​ച്ചാ​ലും മനസ്സമാ​ധാ​ന​ത്തോ​ടെ അതുമാ​യി പൊരു​ത്ത​പ്പെ​ടാൻ നിങ്ങൾ കൂടുതൽ പ്രാപ്‌ത​നാ​കും.—സദൃശ​വാ​ക്യ​ങ്ങൾ 15:33.

ക്ഷമ സമൃദ്ധ​മായ പ്രതി​ഫ​ലങ്ങൾ കൈവ​രു​ത്തു​ന്നു

അബ്രഹാം അറിയ​പ്പെ​ടു​ന്നതു മുഖ്യ​മാ​യും വിശ്വാ​സം നിമി​ത്ത​മാണ്‌. (റോമർ 4:11) എന്നാൽ, അദ്ദേഹ​ത്തി​ന്റെ വിശ്വാ​സത്തെ നിലനിർത്തി​യത്‌ ക്ഷമയാ​യി​രു​ന്നു. യഹോ​വ​ക്കാ​യി കാത്തി​രു​ന്ന​തിന്‌ അദ്ദേഹ​ത്തി​നു ലഭിച്ച പ്രതി​ഫ​ല​മെ​ന്താ​യി​രു​ന്നു?

അബ്രഹാ​മി​നു യഹോ​വ​യു​ടെ വർധിച്ച വിശ്വാ​സ​മാർജി​ക്കാൻ കഴിഞ്ഞു. അങ്ങനെ അബ്രഹാ​മി​ന്റെ പേര്‌ മഹത്ത്വ​മു​ള്ള​തും അദ്ദേഹ​ത്തി​ന്റെ പിൻഗാ​മി​കൾ ഒരു മഹാജ​ന​ത​യും ആയിത്തീർന്നു. അദ്ദേഹ​ത്തി​ന്റെ സന്തതി മുഖാ​ന്തരം ഭൂമി​യി​ലെ സകല ജനതകൾക്കും അനു​ഗ്രഹം ലഭിക്കു​മെ​ന്നാ​യി. അബ്രഹാം ദൈവ​ത്തി​ന്റെ വക്താവാ​യും സ്രഷ്ടാ​വി​ന്റെ ഒരു പതിപ്പാ​യി​ട്ടു​പോ​ലും സേവിച്ചു. അബ്രഹാ​മി​ന്റെ വിശ്വാ​സ​ത്തി​നും ക്ഷമയ്‌ക്കും കിട്ടാ​വുന്ന അതിലും വലി​യൊ​രു പ്രതി​ഫ​ല​മു​ണ്ടോ?

പരി​ശോ​ധ​ന​ക​ളെ ക്ഷമാപൂർവം സഹിക്കുന്ന ക്രിസ്‌ത്യാ​നി​ക​ളോ​ടു “കർത്താവു മഹാ കരുണ​യും മനസ്സലി​വു​മു​ള്ള​വനാ”ണ്‌. (യാക്കോബ്‌ 5:10, 11) അവിടു​ത്തെ ഇഷ്ടം ചെയ്യു​ന്ന​തു​കൊണ്ട്‌ അത്തരം വ്യക്തി​കൾക്ക്‌ ഒരു ശുദ്ധ മനസ്സാ​ക്ഷി​യുണ്ട്‌. അപ്പോൾ നിങ്ങളു​ടെ കാര്യ​മോ, നിങ്ങൾ യഹോ​വ​ക്കാ​യി കാത്തി​രുന്ന്‌ പരി​ശോ​ധ​ന​കളെ ക്ഷമാപൂർവം സഹിക്കു​ന്നെ​ങ്കിൽ നിങ്ങളു​ടെ സംയമനം യഹോ​വ​യു​ടെ അംഗീ​കാ​ര​ത്തി​ലും അനു​ഗ്ര​ഹ​ത്തി​ലും കലാശി​ക്കും.

ക്ഷമ ദൈവ​ജ​ന​ത്തി​നു തങ്ങളുടെ ജീവി​ത​ത്തി​ന്റെ എല്ലാ വശങ്ങളി​ലും മെച്ചം കൈവ​രു​ത്തും. ഈ സംഗതി മനസ്സി​ലാ​ക്കി​യ​വ​രാണ്‌ വിവാ​ഹി​ത​രാ​കാൻ തീരു​മാ​നി​ച്ചു​റച്ച, യഹോ​വയെ സേവി​ക്കുന്ന ക്രിസ്‌റ​റ്യ​നും ആഗ്നസും. ക്രിസ്‌റ​റ്യ​ന്റെ മാതാ​പി​താ​ക്ക​ളോ​ടുള്ള ആദരവു നിമിത്തം അവർ വിവാ​ഹ​നി​ശ്ചയം നീട്ടി​വെച്ചു. കാരണം അവർ ആഗ്നസിനെ അറിയാൻത​ക്ക​വണ്ണം സമയം വേണ​മെന്ന്‌ ആവശ്യ​പ്പെട്ടു. ഈ പ്രവൃത്തി എന്തു ഫലം ഉളവാക്കി?

“എന്റെ മാതാ​പി​താ​ക്കളെ സംബന്ധി​ച്ചി​ട​ത്തോ​ളം ഞങ്ങളുടെ ക്ഷമ എത്ര പ്രധാ​ന​മാ​യി​രു​ന്നു എന്നു പിൽക്കാ​ലത്തു മാത്രമേ ഞങ്ങൾ മനസ്സി​ലാ​ക്കി​യു​ള്ളൂ” എന്നു ക്രിസ്‌റ​റ്യൻ വിശദീ​ക​രി​ക്കു​ന്നു. “ക്ഷമാപൂർവം ഞങ്ങൾ കാത്തി​രു​ന്നത്‌ എന്റെയും ഭാര്യ​യു​ടെ​യും ബന്ധത്തെ തകരാ​റി​ലാ​ക്കി​യില്ല.” മറിച്ച്‌, എന്റെ മാതാ​പി​താ​ക്ക​ളു​മാ​യുള്ള ഞങ്ങളുടെ ബന്ധത്തിലെ ഫലപ്ര​ദ​മായ ആദ്യത്തെ ചുവടു​വ​യ്‌പാ​യി​രു​ന്നു അത്‌. അതേ, ക്ഷമ നേട്ടം കൈവ​രി​ക്കു​ന്നു.

ക്ഷമ സമാധാ​ന​ത്തെ​യും ഊട്ടി​വ​ളർത്തു​ന്നു. കുടും​ബാം​ഗ​ങ്ങ​ളും കൂട്ടു​കാ​രും വരുത്തുന്ന ഓരോ പിഴവു​ക​ളെ​യും​ചൊ​ല്ലി നിങ്ങൾ ബഹളം കൂട്ടാ​തി​രി​ക്കു​ന്നെ​ങ്കിൽ അവർ നിങ്ങ​ളോ​ടു കൃതജ്ഞ​ത​യു​ള്ള​വ​രാ​യി​രി​ക്കും. മററു​ള്ള​വർക്ക്‌ അബദ്ധങ്ങൾ പിണയുന്ന അവസര​ങ്ങ​ളിൽ നിങ്ങളു​ടെ ശാന്തത​യും വസ്‌തുത മനസ്സി​ലാ​ക്ക​ലും ലജ്ജിപ്പി​ക്കുന്ന രംഗങ്ങൾ ഒഴിവാ​ക്കും. ചൈനാ​ക്കാ​രു​ടെ ഒരു പഴഞ്ചൊല്ല്‌ പറയുന്നു: “ദേഷ്യം​പൂ​ണ്ടി​രി​ക്കുന്ന ഒരു നിമി​ഷ​ത്തി​ലെ ക്ഷമ നൂറു ദിവസത്തെ വ്യഥ ഒഴിവാ​ക്കും.”

ക്ഷമ നിങ്ങളു​ടെ വ്യക്തി​ത്വ​ത്തി​നു മാററു കൂട്ടു​ക​യും മററ്‌ ഉത്തമ ഗുണങ്ങളെ കാത്തു​സൂ​ക്ഷി​ക്കു​ക​യും ചെയ്യുന്നു. അതു നിങ്ങളു​ടെ വിശ്വാ​സത്തെ ഈടു​റ​റ​താ​ക്കു​ന്നു, നിങ്ങളു​ടെ സമാധാ​നത്തെ നിലനിർത്തു​ന്നു, നിങ്ങളു​ടെ സ്‌നേ​ഹത്തെ അചഞ്ചല​മാ​ക്കു​ന്നു. ക്ഷമയു​ള്ള​വ​രാ​യി​രു​ന്നു​കൊണ്ട്‌ ദയ, നൻമ, സൗമ്യത എന്നിവ ശീലമാ​ക്കു​മ്പോൾ സന്തുഷ്ട​രാ​യി​രി​ക്കാൻ അതു നിങ്ങളെ സഹായി​ക്കും. ദീർഘ​ക്ഷ​മ​യും ആത്മനി​യ​ന്ത്ര​ണ​വും നട്ടുവ​ളർത്തു​ന്ന​തിന്‌ അത്യാ​വ​ശ്യ​മായ ശക്തിയും ക്ഷമ പ്രകടി​പ്പി​ക്കു​മ്പോൾ ലഭ്യമാ​കു​ന്നു.

യഹോ​വ​യു​ടെ വാഗ്‌ദ​ത്ത​ങ്ങ​ളു​ടെ നിവൃ​ത്തി​ക്കു​വേണ്ടി ക്ഷമയോ​ടെ കാത്തി​രി​ക്കുക. അപ്പോൾ, അത്ഭുത​ക​ര​മായ ഒരു ഭാവി നിങ്ങൾക്ക്‌ ഉറപ്പാണ്‌. അബ്രഹാ​മി​നെ​പ്പോ​ലെ, നിങ്ങൾ “വിശ്വാ​സ​ത്താ​ലും ദീർഘ​ക്ഷ​മ​യാ​ലും വാഗ്‌ദ​ത്ത​ങ്ങളെ അവകാ​ശ​മാ​ക്കു”മാറാ​കട്ടെ.—എബ്രായർ 6:12.

[23-ാം പേജിലെ ചിത്രം]

യഹോവയുമായുള്ള ഒരു അടുത്ത ബന്ധം, അബ്രഹാം ചെയ്‌ത​തു​പോ​ലെ ക്ഷമ പ്രകടി​പ്പി​ക്കാൻ നിങ്ങളെ സഹായി​ക്കും