രാജ്യ​പ്ര​ഘോ​ഷകർ റിപ്പോർട്ടു ചെയ്യുന്നു

ദൈവ​ത്തി​ന്റെ വചനം ശക്തി പ്രയോ​ഗി​ക്കു​ന്നു

“ദൈവ​ത്തി​ന്റെ വചനം ജീവനു​ള്ള​തും ശക്തി പ്രയോ​ഗി​ക്കു​ന്ന​തും ആകുന്നു.” (എബ്രായർ 4:12, NW) വ്യാജ​മ​ത​ത്താൽ വഞ്ചിക്ക​പ്പെ​ട്ടി​രുന്ന ആളുകൾ ബൈബിൾ സത്യങ്ങ​ളോ​ടു സമ്പർക്ക​ത്തിൽ വരു​മ്പോൾ ഈ വചനങ്ങൾ നിരവധി പ്രാവ​ശ്യം സത്യ​മെന്നു തെളി​യു​ക​യു​ണ്ടാ​യി. ഡൊമി​നി​ക്കൻ റിപ്പബ്ലി​ക്കിൽനി​ന്നുള്ള പിൻവ​രുന്ന അനുഭവം പ്രകട​മാ​ക്കു​ന്ന​തു​പോ​ലെ, ബൈബി​ളി​ന്റെ ശക്തിക്ക്‌ ആളുക​ളു​ടെ ജീവി​ത​ത്തി​നു മാററം വരുത്താ​നും പ്രത്യാശ നൽകാ​നും കഴിയും.

അടുത്ത​കാ​ല​ത്തു മരണത്തിൽ രണ്ടു കൊച്ചു​കു​ട്ടി​കൾ നഷ്ടപ്പെട്ട ഒരു പ്രമുഖ കത്തോ​ലി​ക്കാ സ്‌ത്രീ​യെ യഹോ​വ​യു​ടെ സാക്ഷികൾ സന്ദർശി​ച്ചു. അവൾ ദുഃഖി​ത​യാ​യി​രു​ന്നു, ഓരോ ദിവസ​വും തന്റെ ദുരന്ത​ത്തെ​ക്കു​റി​ച്ചു വിലപി​ച്ചി​രു​ന്നു. പുനരു​ത്ഥാന പ്രത്യാ​ശ​യെ​ക്കു​റി​ച്ചു യോഹ​ന്നാൻ 5:28, 29-ൽ ബൈബിൾ പറയു​ന്നത്‌ സാക്ഷികൾ അവളെ കാണി​ച്ചു​കൊ​ടു​ത്തു. സാക്ഷി​ക​ളോ​ടൊ​ത്തുള്ള കൂടു​ത​ലായ ചർച്ചകൾക്കു​ശേഷം അവൾ പുനരു​ത്ഥാന പ്രത്യാ​ശ​യിൽ ആശ്വാസം കണ്ടെത്തി​യെന്നു മാത്രമല്ല തന്റെ കത്തോ​ലി​ക്കാ മതനേ​താ​ക്കൾ തന്നെ വഞ്ചിക്കു​ക​യാ​യി​രു​ന്നു എന്നു തിരി​ച്ച​റി​യു​ക​യും ചെയ്‌തു.

അവൾ സമയം പാഴാ​ക്കാ​തെ കത്തോ​ലി​ക്കാ സഭയിൽനി​ന്നു രാജി​വെ​ക്കു​ക​യും യഹോ​വ​യു​ടെ സാക്ഷി​ക​ളു​മൊ​ത്തു നിരന്ത​ര​മായ ഒരു ബൈബി​ള​ദ്ധ്യ​യനം സ്വീക​രി​ക്കു​ക​യും ചെയ്‌തു. എന്നിരു​ന്നാ​ലും, അവളുടെ ഭർത്താവ്‌ അവളുടെ വീക്ഷണ​ങ്ങ​ളോ​ടു യോജി​ച്ചില്ല. അയാളും വളരെ പ്രമു​ഖ​നായ ഒരു കത്തോ​ലി​ക്ക​നാ​യി​രു​ന്ന​തു​കൊണ്ട്‌, അവളെ തന്റെ ഗതിയിൽനി​ന്നു പിന്തി​രി​പ്പി​ക്കാ​നും കത്തോ​ലി​ക്കാ സഭയി​ലേക്കു തിരി​ച്ചു​കൊ​ണ്ടു​വ​രാ​നു​മുള്ള ശ്രമത്തിൽ രാഷ്‌ട്രീ​യ​ത്തി​ലും മതത്തി​ലും സുപ്ര​സി​ദ്ധ​രാ​യി​രുന്ന സ്‌നേ​ഹി​തർ തന്റെ ഭാര്യയെ സന്ദർശി​ക്കാൻ അയാൾ ക്രമീ​ക​രണം ചെയ്‌തു. പിന്നീട്‌ അവളെ ഉപേക്ഷി​ക്കു​മെന്ന്‌ അയാൾ ഭീഷണി​പ്പെ​ടു​ത്തി, തങ്ങൾ വിവാ​ഹ​മോ​ചനം നേടു​ക​യാ​ണെന്ന്‌ ഒരുസ​മ​യത്തു തന്റെ ബന്ധുക്ക​ളെ​യും കൂട്ടു സഭാം​ഗ​ങ്ങ​ളെ​യും അറിയി​ക്കു​ക​പോ​ലും ചെയ്‌തു.

എന്നാൽ അയാളു​ടെ തന്ത്രം ഫലിച്ചില്ല. നേരെ​മ​റിച്ച്‌, അവൾ തന്റെ ബൈബിൾ അദ്ധ്യയ​നങ്ങൾ തുടരാൻ പൂർവാ​ധി​കം ദൃഢനി​ശ്ച​യ​മു​ള്ള​വ​ളാ​യി​ത്തീർന്നു. അവളുടെ ആത്മീയ​വ​ളർച്ച​യും ശ്രേഷ്‌ഠ ക്രിസ്‌തീയ ഗുണങ്ങ​ളു​ടെ വളർത്തി​യെ​ടു​ക്ക​ലും നിമിത്തം ഒരു വിവാ​ഹ​മോ​ചനം നേടു​ന്ന​തി​നു പകരം അവളോ​ടൊ​ത്തു കഴിയാൻ ഭർത്താവു തീരു​മാ​നി​ച്ചു. ഒരു ദിവസം അവൾ പഠിച്ചു​കൊ​ണ്ടി​രുന്ന ബൈബിൾ സാഹി​ത്യം പരി​ശോ​ധി​ച്ചു​നോ​ക്കാൻ അയാൾ സമ്മതി​ക്കു​ക​പോ​ലും ചെയ്‌തു—പക്ഷേ ഒരു ഉപാധി​യോ​ടെ. അയാൾ കത്തോ​ലി​ക്കാ പരിഭാ​ഷ​യി​ലുള്ള തന്റെ സ്വന്തം ബൈബിൾ ഉപയോ​ഗി​ക്കാൻ ആഗ്രഹി​ച്ചു.

അയാളെ ആശ്ചര്യ​പ്പെ​ടു​ത്തു​മാറ്‌, യഹോ​വ​യു​ടെ സാക്ഷി​ക​ളിൽനി​ന്നുള്ള സാഹി​ത്യ​ത്തി​ന്റെ സഹായ​ത്തോ​ടെ അയാൾ തന്റെ സ്വന്തം ബൈബി​ളിൽനി​ന്നു നേരിട്ടു പുതിയ കാര്യങ്ങൾ പഠിക്കാൻ തുടങ്ങി. തന്റെ ഭാര്യ ശരിയായ ഗതിയാ​ണു തിര​ഞ്ഞെ​ടു​ത്തി​ട്ടു​ള്ള​തെന്ന്‌ അയാൾ തിരി​ച്ച​റി​ഞ്ഞു, പെട്ടെ​ന്നു​തന്നെ അവളുടെ ദൃഷ്ടാന്തം പിൻപ​റ​റാൻ അയാൾ തയ്യാറാ​യി. അതേ, തന്റെ സ്വന്തം ജീവി​ത​ത്തിൽ മാററങ്ങൾ വരു​ത്തേ​ണ്ട​തി​ന്റെ ആവശ്യം അയാൾ കണ്ടു. സിഗറ​റ​റു​വലി നിറു​ത്തുക എന്നതാ​യി​രു​ന്നു വിഷമം​പി​ടിച്ച ഒരു വെല്ലു​വി​ളി. പുറം​ച​ട്ട​യിൽ, “മരണം വില്‌പ​നക്ക്‌—പുകവലി നിർത്താ​നുള്ള പത്തു മാർഗ്ഗങ്ങൾ” എന്ന തലക്കെ​ട്ടുള്ള 1989 ജൂലൈ 8-ലെ ഉണരുക! മാസിക (ഇംഗ്ലീഷ്‌) വായി​ച്ച​ശേഷം തന്റെ തിരു​വെ​ഴു​ത്തു​വി​രുദ്ധ ശീലം ഉപേക്ഷി​ക്കാൻ അയാൾ തീരു​മാ​നി​ച്ചു. പോക്ക​റ​റിൽ സിഗറ​റ​റു​കൂ​ടു കൊണ്ടു​ന​ട​ന്നി​രുന്ന സ്ഥാനത്ത്‌ അയാൾ ആ ഉണരുക! ലക്കം കൊണ്ടു​ന​ട​ക്കാൻ തുടങ്ങി. പുക വലിക്കാൻ പ്രചോ​ദനം തോന്നുന്ന ഓരോ സമയത്തും അയാൾ പുകവലി സംബന്ധിച്ച ലേഖനങ്ങൾ വായിച്ചു. ആ രീതി ഫലിച്ചു! പല പ്രാവ​ശ്യം ലേഖനങ്ങൾ വായി​ച്ച​ശേഷം പുകവലി നിറു​ത്താൻ അയാൾക്കു കഴിഞ്ഞു.

ഇപ്പോൾ ഭർത്താ​വും ഭാര്യ​യും സ്‌നാ​പ​ന​മേററ ശുശ്രൂ​ഷ​ക​രെന്ന നിലയിൽ യഹോ​വയെ സേവി​ക്കു​ന്നു. സാഹച​ര്യ​ങ്ങൾ അനുവ​ദി​ക്കു​മ്പോൾ ദൈവ​രാ​ജ്യ​ത്തി​ന്റെ സുവാർത്ത പ്രസം​ഗി​ക്കു​ന്ന​തിൽ തന്റെ സമയത്തി​ല​ധി​ക​വും സമർപ്പി​ച്ചു​കൊണ്ട്‌ അയാൾ ഒരു മുഴു​സമയ ശുശ്രൂ​ഷ​ക​നാ​യി സേവി​ക്കു​ന്നു. യഹോ​വ​യു​ടെ സാക്ഷി​ക​ളു​ടെ പ്രാ​ദേ​ശിക സഭയിൽ അയാൾ ഒരു ശുശ്രൂ​ഷാ​ദാ​സ​നാ​യും സേവി​ക്കു​ന്നു. തങ്ങളുടെ മക്കളെ ഒരു പുതിയ ലോക​ത്തി​ലെ ജീവനി​ലേക്കു സ്വാഗതം ചെയ്യാൻ കഴിയുന്ന പുനരു​ത്ഥാ​ന​ത്തി​നാ​യി അയാളും ഭാര്യ​യും നോക്കി​പ്പാർത്തി​രി​ക്കു​ന്നു. അതേ, ദൈവ​ത്തി​ന്റെ വചനമായ ബൈബിൾ ജീവനു​ള്ള​തും ശക്തി പ്രയോ​ഗി​ക്കു​ന്ന​തും ആകുന്നു!