ആത്മമണ്ഡ​ല​ത്തി​ലെ ഭരണാ​ധി​പ​ന്മാർ

ആരാണു ലോകത്തെ ഭരിക്കു​ന്നത്‌? ഏതെങ്കി​ലും തരത്തി​ലുള്ള അമാനു​ഷിക മേൽനോ​ട്ട​മു​ണ്ടോ? അതോ ദൈവം മനുഷ്യ​രെ സ്വന്തം കാര്യം നോക്കാൻ വിട്ടി​രി​ക്കു​ക​യാ​ണോ? ഈ ചോദ്യ​ങ്ങൾക്കുള്ള ഉത്തരം തേടവേ, ആദ്യമാ​യി യേശു​ക്രി​സ്‌തു​വി​ന്റെ ഭൗമിക ശുശ്രൂ​ഷ​യ്‌ക്കി​ട​യിൽ നടന്ന ഒരു സംഭവം നമുക്കു പരിചി​ന്തി​ക്കാം.

യേശു​വി​ന്റെ സ്‌നാ​പ​ന​ത്തി​നു​ശേഷം അധികം താമസി​യാ​തെ അവൻ പിശാ​ചായ സാത്താൻ എന്നു വിളി​ക്ക​പ്പെ​ടുന്ന ഒരു അദൃശ്യ ആത്മസൃ​ഷ്ടി​യാൽ പരീക്ഷി​ക്ക​പ്പെട്ടു. അതി​ലൊ​രു പ്രലോ​ഭ​നത്തെ വർണി​ച്ചു​കൊണ്ട്‌ ബൈബിൾ പറയുന്നു: “പിശാചു [യേശു​വി​നെ] ഏറ്റവും ഉയർന്നൊ​രു മലമേൽ കൂട്ടി​ക്കൊ​ണ്ടു​പോ​യി ലോക​ത്തി​ലുള്ള സകല രാജ്യ​ങ്ങ​ളെ​യും അവയുടെ മഹത്വ​ത്തെ​യും കാണിച്ചു.” (മത്തായി 4:8) എന്നിട്ടു സാത്താൻ യേശു​വി​നോ​ടു പറഞ്ഞു: “ഈ അധികാ​രം ഒക്കെയും അതിന്റെ മഹത്വ​വും നിനക്കു തരാം; അതു എങ്കൽ ഏല്‌പ്പി​ച്ചി​രി​ക്കു​ന്നു; എനിക്കു മനസ്സു​ള്ള​വന്നു ഞാൻ കൊടു​ക്കു​ന്നു. നീ എന്നെ നമസ്‌ക​രി​ച്ചാൽ അതെല്ലാം നിന്റെ​താ​കും.”—ലൂക്കൊസ്‌ 4:6, 7.

ഈ ലോക​ത്തി​ലെ സകല രാജ്യ​ങ്ങ​ളു​ടെ​യും, അഥവാ ഗവൺമെ​ന്റു​ക​ളു​ടെ​യും​മേൽ തനിക്ക്‌ അധികാ​ര​മു​ണ്ടെന്നു സാത്താൻ അവകാ​ശ​പ്പെട്ടു. യേശു ആ അവകാ​ശ​വാ​ദത്തെ നിഷേ​ധി​ച്ചു​വോ? ഇല്ല. വാസ്‌ത​വ​ത്തിൽ, സാത്താനെ “ലോക​ത്തി​ന്റെ ഭരണാ​ധി​പൻ” എന്നു പരാമർശി​ച്ചു​കൊണ്ട്‌ മറ്റൊ​ര​വ​സ​ര​ത്തിൽ അവൻ അതു സ്ഥിരീ​ക​രി​ക്കു​ക​യാ​ണു ചെയ്‌തത്‌.—യോഹ​ന്നാൻ 14:30, NW.

ബൈബിൾ പറയു​ന്ന​ത​നു​സ​രിച്ച്‌, മഹാശ​ക്തി​യുള്ള ഒരു ദുഷ്ട ദൂതനാ​ണു സാത്താൻ. ക്രിസ്‌തീയ അപ്പോ​സ്‌ത​ല​നായ പൗലോസ്‌ സാത്താനെ “ദുഷ്ടാ​ത്മ​സേന”യുമായി ബന്ധപ്പെ​ടു​ത്തു​ക​യും അവരെ ‘ഈ അന്ധകാ​ര​ത്തി​ന്റെ ലോകാ​ധി​പ​തി​കളാ’യി പ്രതി​പാ​ദി​ക്കു​ക​യും ചെയ്യുന്നു. (എഫെസ്യർ 6:11, 12) കൂടാതെ, “സർവ്വ​ലോ​ക​വും ദുഷ്ടന്റെ അധീന​ത​യിൽ കിടക്കു​ന്നു”വെന്ന്‌ അപ്പോ​സ്‌ത​ല​നായ യോഹ​ന്നാൻ പറഞ്ഞു. (1 യോഹ​ന്നാൻ 5:19) സാത്താൻ “മുഴു​നി​വ​സിത ഭൂമി​യെ​യും വഴി​തെ​റ്റി​ക്കു”കയാ​ണെന്നു ബൈബി​ളി​ലെ വെളി​പാ​ടു പുസ്‌തകം പ്രസ്‌താ​വി​ക്കു​ന്നു. (വെളി​പാട്‌ 12:9, NW) പ്രതീ​കാ​ത്മക ഭാഷയിൽ, ലോക രാഷ്ട്രീയ വ്യവസ്ഥി​തി​ക്കു “തന്റെ ശക്തിയും സിംഹാ​സ​ന​വും വലിയ അധികാ​ര​വും” കൊടു​ക്കുന്ന ഒരു മഹാസർപ്പ​മാ​യും വെളി​പാട്‌ സാത്താനെ ചിത്രീ​ക​രി​ക്കു​ന്നു.—വെളി​പ്പാ​ടു 13:2.

തങ്ങൾക്കു​ത​ന്നെ ദോഷം വരുത്തി​ക്കൂ​ട്ടാൻ മനുഷ്യ​രെ പ്രേരി​പ്പി​ക്കുന്ന ഒരു ദുഷ്ട ശക്തി പ്രവർത്തി​ക്കു​ന്നു​ണ്ടെന്നു ലോക​സം​ഭ​വ​ങ്ങ​ളും സാക്ഷ്യ​പ്പെ​ടു​ത്തു​ന്നു. അല്ലാതെ വേറെ ഏതു കാരണ​ത്താ​ലാ​ണു മാനു​ഷിക ഗവൺമെൻറു​കൾ സമാധാ​നം വളർത്താൻ പരാജ​യ​പ്പെ​ടു​ന്നത്‌? വേറെ ഏതു കാരണ​ത്താ​ലാണ്‌ ആളുകൾ പരസ്‌പരം വെറു​ക്കാ​നും കൊ​ന്നൊ​ടു​ക്കാ​നും ഇടയാ​കു​ന്നത്‌? ഒരു ആഭ്യന്തര യുദ്ധത്തി​ലെ കൂട്ട​ക്കൊ​ല​യും മരണവും കണ്ട്‌ നടുങ്ങിയ ഒരു ദൃക്‌സാ​ക്ഷി പറഞ്ഞു: “ഇതൊക്കെ എങ്ങനെ സംഭവി​ക്കു​ന്നെന്ന്‌ എനിക്ക​റി​യില്ല. ഇതു വെറും പകയല്ല. പരസ്‌പരം നശിപ്പി​ക്കാൻ ഈ മനുഷ്യ​രെ ഉപയോ​ഗി​ക്കു​ന്നത്‌ ഒരു ദുഷ്ടാ​ത്മാ​വാണ്‌.”

ദൈവത്തെ എതിർക്കുന്ന ഒരു യഥാർഥ വ്യക്തി

ഇന്ന്‌, അനേക​രും പിശാ​ചായ സാത്താ​നിൽ വിശ്വ​സി​ക്കു​ന്നില്ല. എന്നിരു​ന്നാ​ലും, ചിലർ വിശ്വ​സി​ക്കു​ന്ന​തു​പോ​ലെ, അവൻ മനുഷ്യ​വർഗ​ത്തി​ലുള്ള ദുഷ്ടത​യു​ടെ കേവല​മൊ​രു ഗുണമല്ല. ബൈബി​ളും ലോക​സം​ഭ​വ​ങ്ങ​ളും പ്രകട​മാ​ക്കു​ന്നത്‌ അവൻ ഒരു യഥാർഥ വ്യക്തി​യാ​ണെ​ന്നാണ്‌. കൂടാതെ, യഹോ​വ​യാം ദൈവത്തെ പൂർണ​മാ​യി എതിർക്കു​ന്ന​വ​നാ​ണു സാത്താൻ. തീർച്ച​യാ​യും, സാത്താൻ ദൈവ​ത്തോ​ടു തുല്യനല്ല. യഹോവ സർവശ​ക്ത​നായ സ്രഷ്ടാ​വാ​യ​തു​കൊണ്ട്‌, സകല സൃഷ്ടി​യു​ടെ​യും​മേൽ അവനാണ്‌ ശരിയായ ഭരണാ​ധി​പൻ.—വെളി​പ്പാ​ടു 4:11.

തനിക്കു​ത​ന്നെ എതിരാ​യി​ട്ടുള്ള ഒരു ദുഷ്ടസൃ​ഷ്ടി​യെ ദൈവം സൃഷ്ടി​ച്ചില്ല. മറിച്ച്‌, “ദൈവ​ത്തി​ന്റെ” ദൂത“പുത്രന്മാ”രിൽ ഒരുവൻ യഹോ​വക്കു ന്യായ​മാ​യും ലഭിക്കേണ്ട ആരാധന തനിക്കാ​യി പിടി​ച്ചെ​ടു​ക്കാ​നുള്ള ഒരു സ്വാർത്ഥ മോഹം വളർത്തി​യെ​ടു​ത്തു. (ഇയ്യോബ്‌ 38:7, NW; യാക്കോബ്‌ 1:14, 15) ഈ മോഹം അവനെ ദൈവ​ത്തി​നെ​തി​രെ മത്സരത്തി​ന്റേ​തായ ഒരു ഗതിക്കു തുടക്കം കുറി​ക്കു​ന്ന​തിൽ കൊ​ണ്ടെ​ത്തി​ച്ചു. മത്സരി​ച്ചു​കൊണ്ട്‌, ഈ ആത്മസൃഷ്ടി സ്വയം സാത്താ​നും (അർഥം “എതിരാ​ളി”) പിശാ​ചും (അർഥം “ദൂഷകൻ”) ആക്കിത്തീർത്തു. ഇതി​ന്റെ​യെ​ല്ലാം വീക്ഷണ​ത്തിൽ, ലോകത്തെ ഭരിക്കാൻ സാത്താനെ അനുവ​ദി​ച്ചി​രി​ക്കു​ന്നത്‌ എന്തു​കൊ​ണ്ടെന്നു നിങ്ങൾ അതിശ​യി​ച്ചേ​ക്കാം.

സാത്താനെ ഭരിക്കാൻ അനുവ​ദി​ച്ചി​രി​ക്കു​ന്ന​തി​ന്റെ കാരണം

ഭൂമി​യു​ടെ​മേ​ലുള്ള ഭരണാ​ധി​പ​ത്യ​ത്തെ​ക്കു​റി​ച്ചു സാത്താൻ യേശു​വി​നോ​ടു പറഞ്ഞതു നിങ്ങൾ ഓർക്കു​ന്നു​ണ്ടോ? “ഈ അധികാ​രം ഒക്കെയും . . . [ഞാൻ] നിനക്കു തരാം; അതു എങ്കൽ ഏല്‌പ്പി​ച്ചി​രി​ക്കു​ന്നു.” (ലൂക്കൊസ്‌ 4:6) ദൈവം അനുവ​ദി​ച്ചി​രി​ക്കു​ന്ന​തു​കൊ​ണ്ടു മാത്ര​മാണ്‌ പിശാ​ചായ സാത്താൻ അധികാ​രം പ്രയോ​ഗി​ക്കു​ന്നത്‌ എന്നാണ്‌ ആ പ്രസ്‌താ​വന പ്രകട​മാ​ക്കു​ന്നത്‌. എന്നാൽ ദൈവം സാത്താനെ വെച്ചു​പൊ​റു​പ്പി​ക്കു​ന്ന​തെ​ന്തു​കൊണ്ട്‌?

ആ ചോദ്യ​ത്തി​നുള്ള ഉത്തരം ഏദെൻതോ​ട്ട​ത്തി​ലെ സംഭവ​ങ്ങ​ളു​മാ​യി ബന്ധപ്പെ​ട്ടു​കി​ട​ക്കു​ന്നു. അവി​ടെ​വെ​ച്ചാ​യി​രു​ന്നു ലോക​ഭ​ര​ണാ​ധി​പൻ എന്നനി​ല​യി​ലുള്ള തന്റെ ജീവി​ത​ഗ​തി​ക്കു സാത്താൻ തുടക്ക​മി​ട്ടത്‌. നല്ല ചില​തൊ​ക്കെ ആദ്യ മനുഷ്യ​നും സ്‌ത്രീ​യു​മായ ആദാമിൽനി​ന്നും ഹവ്വായിൽനി​ന്നും പിടി​ച്ചു​വെ​ച്ചു​കൊണ്ട്‌ ദൈവം മോശ​മായ വിധത്തി​ലാ​ണു ഭരണം നടത്തി​യി​രു​ന്നത്‌ എന്നു സാത്താൻ അവി​ടെ​വെച്ചു സൂചി​പ്പി​ച്ചു. ദൈവം വിലക്കി​യി​രുന്ന കനി ഭക്ഷിക്കു​ന്ന​പക്ഷം അവർക്കു വിമോ​ചി​ത​രാ​കാ​മെ​ന്നാ​യി​രു​ന്നു സാത്താൻ പറഞ്ഞത്‌. ആദാമും ഹവ്വായും സ്വത​ന്ത്ര​രും യഹോ​വ​യിൽനി​ന്നു മുക്തി​നേ​ടി​യ​വ​രു​മാ​കു​മാ​യി​രു​ന്നു. അവർ ദൈവ​ത്തെ​പ്പോ​ലെ​യാ​കു​മാ​യി​രു​ന്നു!—ഉല്‌പത്തി 2:16, 17; 3:1-5.

ഈവിധം നുണപ​റഞ്ഞ്‌ ഹവ്വായെ വശീക​രി​ച്ചു​കൊ​ണ്ടും ദൈവ​നി​യമം ലംഘി​ക്കാൻ അവളി​ലൂ​ടെ ആദാമി​നെ പ്രേരി​പ്പി​ച്ചു​കൊ​ണ്ടും സാത്താൻ ആദ്യ മനുഷ്യ​ജോ​ഡി​കളെ തന്റെ ഭരണാ​ധി​പ​ത്യ​ത്തി​നും നിയ​ന്ത്ര​ണ​ത്തി​നും കീഴി​ലാ​ക്കി. അങ്ങനെ പിശാച്‌ അവരുടെ ദൈവം, യഹോ​വ​ക്കെ​തി​രായ ഒരു ദൈവം, ആയിത്തീർന്നു. എന്നിരു​ന്നാ​ലും, വിമോ​ച​ന​ത്തി​നു​പ​കരം, ആദാമും ഹവ്വായും സാത്താ​ന്റെ​യും പാപത്തി​ന്റെ​യും മരണത്തി​ന്റെ​യും അടിമ​ത്ത​ത്തി​ലാ​യി.—റോമർ 6:16; എബ്രായർ 2:14, 15.

തന്റെ പൂർണ​ത​യുള്ള നീതിക്കു ചേർച്ച​യിൽ യഹോ​വക്ക്‌ ഉടൻതന്നെ സാത്താ​നെ​യും അവന്റെ പുതിയ രണ്ട്‌ അനുഗാ​മി​ക​ളെ​യും നിഗ്ര​ഹി​ക്കാ​മാ​യി​രു​ന്നു. (ആവർത്ത​ന​പു​സ്‌തകം 32:4) എന്നിരു​ന്നാ​ലും, ഒരു ധാർമിക പ്രശ്‌നം ഉൾപ്പെ​ട്ടി​രു​ന്നു. സാത്താൻ യഹോ​വ​യു​ടെ ഭരണവി​ധ​ത്തി​ന്റെ ഔചി​ത്യ​ത്തെ വെല്ലു​വി​ളി​ച്ചി​രു​ന്നു. തന്റെ ജ്ഞാനം ഹേതു​വാ​യി ദൈവം സമയം കടന്നു​പോ​കാൻ അനുവ​ദി​ച്ചു. അങ്ങനെ തന്നിൽനി​ന്നുള്ള സ്വാത​ന്ത്ര്യം ദുരന്തം കൈവ​രു​ത്തു​മെന്നു തെളി​യി​ക്കാ​നാ​വു​മാ​യി​രു​ന്നു. മക്കളു​ണ്ടാ​വാൻ ആദാമി​നെ​യും ഹവ്വാ​യെ​യും അനുവ​ദി​ച്ചു​കൊണ്ട്‌, കുറച്ചു കാല​ത്തേക്കു തുടർന്നു ജീവി​ക്കാൻ യഹോവ ആ മത്സരി​കളെ അനുവ​ദി​ച്ചു.—ഉല്‌പത്തി 3:14-19.

ആദാമി​ന്റെ മക്കളിൽ മിക്കവ​രും യഹോ​വ​യു​ടെ ഭരണാ​ധി​പ​ത്യ​ത്തി​നു കീഴ്‌പെ​ട്ടി​ട്ടില്ല. എങ്കിലും തന്റെ ആരാധ​ക​രു​മാ​യുള്ള ദൈവ​ത്തി​ന്റെ ഇടപെ​ട​ലു​കൾ കീഴ്‌പെ​ട​ലി​ന്റെ ശ്രേഷ്‌ഠത പ്രകട​മാ​ക്കി​യി​രി​ക്കു​ന്നു. യഹോ​വ​യു​ടെ അധികാ​രത്തെ ശരിയായ വിധത്തിൽ അംഗീ​ക​രി​ക്കു​ന്നതു സന്തോ​ഷ​വും യഥാർഥ സുരക്ഷി​ത​ത്വ​വും കൈവ​രു​ത്തു​ന്നു. നേരേ​മ​റിച്ച്‌, സാത്താന്റെ സ്വാധീ​ന​ത്തിൻ കീഴി​ലുള്ള മാനു​ഷ​ഭ​ര​ണ​ത്തിൽനിന്ന്‌ ഉളവാ​യി​രി​ക്കു​ന്നതു കഷ്ടപ്പാ​ടും അരക്ഷി​താ​വ​സ്ഥ​യു​മാണ്‌. അതേ, “മനുഷ്യൻ മനുഷ്യ​ന്റെ​മേൽ അവന്റെ ദോഷ​ത്തി​നാ​യി അധികാ​രം നടത്തി​യി​രി​ക്കു​ന്നു.” (സഭാ​പ്ര​സം​ഗി 8:9, NW) സാത്താന്റെ അധികാ​ര​ത്തിൽ കിടക്കുന്ന ഈ ലോക​ത്തിൽ മനുഷ്യർക്കു യഥാർഥ സുരക്ഷി​ത​ത്വ​വും നിലനിൽക്കുന്ന സന്തോ​ഷ​വും ലഭിച്ചി​ട്ടില്ല. എന്നുവ​രി​കി​ലും, ശുഭാ​പ്‌തി​വി​ശ്വാ​സ​ത്തി​നു സാധു​വായ കാരണ​മുണ്ട്‌.

സാത്താന്റെ സമയം ചുരു​ങ്ങി​യി​രി​ക്കു​ന്നു!

ഭൂമി​യിൽ സാത്താ​നുള്ള സ്വാധീ​നം താത്‌കാ​ലി​ക​മാണ്‌. യഹോവ സാത്താന്യ ഭരണത്തെ ഇനിയ​ധി​ക​നാൾ വെച്ചു​പൊ​റു​പ്പി​ക്കില്ല! താമസി​യാ​തെ സാത്താൻ നിർവീ​ര്യ​നാ​ക്ക​പ്പ​ടും. ഒരു പുതിയ ഭരണാ​ധി​പൻ, ദൈവം​തന്നെ തിര​ഞ്ഞെ​ടു​ക്കുന്ന നീതി​നി​ഷ്‌ഠ​നായ ഒരു രാജാവ്‌, ഭൂമി​യു​ടെ നിയ​ന്ത്രണം ഏറ്റെടു​ക്കും. ആ രാജാവ്‌ യേശു​ക്രി​സ്‌തു​വാണ്‌. സ്വർഗ​ത്തിൽവെച്ച്‌ അവൻ സിംഹാ​സ​ന​സ്ഥ​നാ​യ​തി​നെ​ക്കു​റി​ച്ചു വെളി​പ്പാ​ടു പറയുന്നു: “ലോക​രാ​ജ​ത്വം നമ്മുടെ കർത്താ​വി​ന്നും [യഹോ​വ​ക്കും] അവന്റെ ക്രിസ്‌തു​വി​ന്നും ആയിത്തീർന്നി​രി​ക്കു​ന്നു. (വെളി​പ്പാ​ടു 11:15) ഈ സംഭവം 1914 എന്ന വർഷം നടന്നു​വെന്ന്‌ ബൈബിൾ കാലഗ​ണ​ന​യും തിരു​വെ​ഴു​ത്തു പ്രവചന നിവൃ​ത്തി​യും തെളി​യി​ക്കു​ന്നു.—മത്തായി 24:3, 6, 7.

യേശു സിംഹാ​സ​ന​സ്ഥ​നായ ഉടൻ എന്തു സംഭവി​ച്ചു​വെ​ന്നും ബൈബിൾ വർണി​ക്കു​ന്നു. അത്‌ ഇങ്ങനെ പറയുന്നു: “സ്വർഗ്ഗ​ത്തിൽ യുദ്ധം ഉണ്ടായി; മീഖാ​യേ​ലും [യേശു​ക്രി​സ്‌തു] അവന്റെ ദൂതന്മാ​രും മഹാസർപ്പ​ത്തോ​ടു [പിശാ​ചായ സാത്താൻ] പടവെട്ടി; തന്റെ ദൂതന്മാ​രു​മാ​യി മഹാസർപ്പ​വും പടവെട്ടി ജയിച്ചി​ല്ല​താ​നും. സ്വർഗ്ഗ​ത്തിൽ അവരുടെ സ്ഥലം പിന്നെ കണ്ടതു​മില്ല. ഭൂതലത്തെ മുഴുവൻ തെറ്റി​ച്ചു​ക​ള​യുന്ന പിശാ​ചും സാത്താ​നും എന്ന മഹാസർപ്പ​മായ പഴയ പാമ്പിനെ ഭൂമി​യി​ലേക്കു തള്ളിക്ക​ളഞ്ഞു; അവന്റെ ദൂതന്മാ​രെ​യും അവനോ​ടു​കൂ​ടെ തള്ളിക്ക​ളഞ്ഞു.”—വെളി​പ്പാ​ടു 12:7-9.

സാത്താൻ സ്വർഗ​ത്തിൽനി​ന്നു പുറത്താ​ക്ക​പ്പെ​ട്ട​തി​ന്റെ അനന്തര​ഫലം എന്തായി​രു​ന്നു? സ്വർഗ​ത്തി​ലു​ള്ള​വർക്ക്‌ ആഹ്ലാദി​ക്കാൻ കഴിഞ്ഞു, എന്നാൽ ഭൂവാ​സി​ക​ളു​ടെ കാര്യ​മോ? വെളി​പ്പാ​ടു 12:12 പറയുന്നു: “ഭൂമി​ക്കും സമു​ദ്ര​ത്തി​ന്നും അയ്യോ കഷ്ടം; പിശാചു തനിക്കു അല്‌പ​കാ​ല​മേ​യു​ള്ളു എന്നു അറിഞ്ഞു മഹാ​ക്രോ​ധ​ത്തോ​ടെ നിങ്ങളു​ടെ അടുക്കൽ ഇറങ്ങി​വ​ന്നി​രി​ക്കു​ന്നു.” തീർച്ച​യാ​യും, സാത്താൻ സ്വർഗ​ത്തിൽനി​ന്നു പുറത്താ​ക്ക​പ്പെ​ട്ടതു ഭൂമിക്കു കഷ്ടം കൈവ​രു​ത്തു​ക​തന്നെ ചെയ്‌തു. ദ കൊളം​ബിയ ഹിസ്റ്ററി ഓഫ്‌ ദ വേൾഡ്‌ പ്രസ്‌താ​വി​ക്കു​ന്നു: “സ്വന്തം മൗഢ്യ​ത്തിൽനി​ന്നോ ദുഷ്‌​പ്രേ​ര​ണ​യിൽനി​ന്നോ നാഗരി​ക​തയെ സംരക്ഷി​ക്കാൻ പാശ്ചാത്യ ലോക​ത്തി​നു സാധി​ച്ചി​ല്ലെന്ന്‌ . . . 1914-1918 വരെയുള്ള നാലു​വർഷ യുദ്ധമെന്ന മഹാദു​രന്തം കാട്ടി​ക്കൊ​ടു​ത്തു. ആ തകർച്ച​യ്‌ക്കു​ശേഷം പാശ്ചാ​ത്യ​രു​ടെ ആത്മവീ​ര്യം വാസ്‌ത​വ​ത്തിൽ ഇതുവ​രെ​യും പഴയപ​ടി​യാ​യി​ട്ടില്ല.”

തകർന്ന​ടി​ഞ്ഞ ഒരു ആത്മവീ​ര്യ​ത്തെ​ക്കാൾ കൂടു​ത​ലായ സംഗതി​കൾ ഈ തലമു​റ​യി​ലെ കഷ്ടങ്ങളു​ടെ പ്രത്യേ​ക​ത​യാണ്‌. യേശു ഇപ്രകാ​രം പ്രവചി​ച്ചു: “ജാതി ജാതി​യോ​ടും രാജ്യം രാജ്യ​ത്തോ​ടും എതിർക്കും; ക്ഷാമവും ഭൂകമ്പ​വും അവിട​വി​ടെ ഉണ്ടാകും.” അവൻ മഹാമാ​രി​ക​ളെ​പ്പ​റ്റി​യും മുൻകൂ​ട്ടി​പ്പ​റഞ്ഞു. (മത്തായി 24:7, 8; ലൂക്കൊസ്‌ 21:11) അതിലു​പരി, സാത്താന്റെ വ്യവസ്ഥി​തി​യു​ടെ “അവസാന നാളു”കളിൽ അനേക​രും “സ്വസ്‌നേ​ഹി​ക​ളും ദ്രവ്യാ​ഗ്ര​ഹി​ക​ളും . . . അമ്മയപ്പ​ന്മാ​രെ അനുസ​രി​ക്കാ​ത്ത​വ​രും . . . ഇണങ്ങാ​ത്ത​വ​രും” ആയിരി​ക്കു​മെന്നു ബൈബിൾ പറയുന്നു. ആളുകൾ “ദൈവ​പ്രി​യ​മി​ല്ലാ​തെ ഭോഗ​പ്രിയ”രുമാ​യി​രി​ക്കും.—2 തിമൊ​ഥെ​യൊസ്‌ 3:1-5.

യുദ്ധങ്ങൾ, മഹാമാ​രി​കൾ, ഭക്ഷ്യക്ഷാ​മങ്ങൾ, ഭൂകമ്പങ്ങൾ, ധാർമിക മൂല്യ​ങ്ങ​ളു​ടെ കാര്യ​ത്തി​ലുള്ള അധഃപ​തനം—അത്തരം സംഗതി​ക​ളെ​ല്ലാം, ബൈബിൾ മുൻകൂ​ട്ടി​പ്പ​റ​ഞ്ഞ​തു​പോ​ലെ​തന്നെ, 1914 മുതൽ മുമ്പൊ​രി​ക്ക​ലും ഉണ്ടായി​ട്ടി​ല്ലാത്ത അളവിൽ സംഭവി​ച്ചി​രി​ക്കു​ന്നു. ദൈവ​ത്തി​ന്റെ​യും മനുഷ്യ​രു​ടെ​യും നേർക്കു കലിപൂണ്ട ശത്രു—പിശാ​ചായ സാത്താൻ—സ്വർഗ​ത്തിൽനി​ന്നു തള്ളപ്പെ​ട്ടി​രി​ക്ക​യാണ്‌, തന്റെ കോപം ഭൂമി​യിൽ മാത്ര​മാ​യി ഒതുക്കി നിർത്തണം എന്ന്‌ അവ സൂചി​പ്പി​ക്കു​ന്നു. എന്നാൽ അധിക​നാൾ പ്രവർത്തി​ക്കാൻ സാത്താനെ അനുവ​ദി​ക്കു​ക​യി​ല്ലെ​ന്നും ബൈബിൾ പ്രകട​മാ​ക്കു​ന്നുണ്ട്‌. അർമ​ഗെ​ദോ​നിൽ ദൈവം സാത്താന്റെ നിയ​ന്ത്ര​ണ​ത്തി​ലുള്ള ലോക​വ്യ​വ​സ്ഥി​തി​യെ നശിപ്പി​ക്കു​ന്ന​തു​വരെ അവന്‌ അവശേ​ഷി​ക്കു​ന്നത്‌ ‘അല്‌പ​കാ​ലം’ മാത്ര​മാണ്‌.

അപ്പോൾ സാത്താന്‌ എന്തു സംഭവി​ക്കും? “ഒരു ദൂതൻ അഗാധ​ത്തി​ന്റെ താക്കോ​ലും ഒരു വലിയ ചങ്ങലയും കയ്യിൽ പിടി​ച്ചു​കൊ​ണ്ടു സ്വർഗ്ഗ​ത്തിൽനി​ന്നു ഇറങ്ങു​ന്നതു ഞാൻ കണ്ടു. അവൻ പിശാ​ചും സാത്താ​നും എന്നുള്ള പഴയ പാമ്പായ മഹാസർപ്പത്തെ പിടിച്ചു ആയിരം ആണ്ടേക്കു ചങ്ങലയി​ട്ടു. . . . അവനെ അഗാധ​ത്തിൽ തള്ളിയി​ട്ടു അടെച്ചു​പൂ​ട്ടു​ക​യും മീതെ മുദ്ര​യി​ടു​ക​യും ചെയ്‌തു” എന്ന്‌ അപ്പോ​സ്‌ത​ല​നായ യോഹ​ന്നാൻ എഴുതി. (വെളി​പ്പാ​ടു 20:1-3) കഷ്ടപ്പെ​ടുന്ന മനുഷ്യ​വർഗ​ത്തിന്‌ എന്തൊ​രാ​ശ്വാ​സം!

രാജ്യ​ഭ​ര​ണ​ത്തിൻ കീഴിൽ ആഹ്ലാദി​ക്കൽ

സാത്താനെ അകറ്റി​ക്ക​ഴിഞ്ഞ്‌, യേശു​ക്രി​സ്‌തു​വിൻ കീഴിലെ ദൈവ​രാ​ജ്യം മനുഷ്യ​വർഗ​ത്തി​ന്റെ കാര്യ​ങ്ങ​ളു​ടെ മുഴു നിയ​ന്ത്ര​ണ​വും ഏറ്റെടു​ക്കും. ഭൂമി​യിൽ അനേകം ഗവൺമെൻറു​കൾ ഉണ്ടായി​രി​ക്കു​ന്ന​തി​നു​പ​കരം, മുഴു ഗ്രഹത്തി​ന്മേ​ലും ഭരണം നടത്താൻ ഒരേ ഒരു സ്വർഗീയ ഗവൺമെൻറ്‌ മാത്രമേ ഉണ്ടായി​രി​ക്കു​ക​യു​ള്ളൂ. യുദ്ധം ഒരു കഴിഞ്ഞ​കാല സംഭവം മാത്ര​മാ​യി​രി​ക്കും, എവി​ടെ​യും സമാധാ​നം കളിയാ​ടും. ദൈവ​രാ​ജ്യ ഭരണത്തിൻകീ​ഴിൽ, എല്ലാവ​രും സ്‌നേ​ഹ​പു​ര​സ്സ​ര​മായ സാഹോ​ദ​ര്യ​ത്തിൽ ഒരുമി​ച്ചു പാർക്കും.—സങ്കീർത്തനം 72:7, 8; 133:1; ദാനീ​യേൽ 2:44.

യേശു ഏതുത​ര​ത്തി​ലുള്ള രാജാ​വാ​ണെന്നു തെളി​യി​ക്കും? ഭൂമി​യി​ലാ​യി​രു​ന്ന​പ്പോൾ, അവൻ ആളുക​ളോട്‌ ആഴമായ സ്‌നേഹം പ്രകട​മാ​ക്കി. വിശക്കു​ന്ന​വർക്ക്‌ അവൻ അനുക​മ്പാ​പൂർവം ഭക്ഷണം പ്രദാനം ചെയ്‌തു. രോഗി​കളെ സുഖ​പ്പെ​ടു​ത്തു​ക​യും അന്ധർക്കു കാഴ്‌ച കൊടു​ക്കു​ക​യും ഊമർക്കു സംസാ​ര​പ്രാ​പ്‌തി​യും മുടന്തർക്കു കാലിനു സൗഖ്യ​വും പ്രദാനം ചെയ്യു​ക​യും ചെയ്‌തു. യേശു മരിച്ച​വരെ ജീവനി​ലേക്ക്‌ ഉയിർപ്പി​ക്കു​ക​പോ​ലും ചെയ്‌തു! (മത്തായി 15:30-38; മർക്കൊസ്‌ 1:34; ലൂക്കൊസ്‌ 7:11-17) അവൻ ഇനി രാജാവ്‌ എന്നനി​ല​യിൽ ചെയ്യാ​നി​രി​ക്കുന്ന അത്ഭുത​ക​ര​മായ സംഗതി​ക​ളു​ടെ ഭാവി​ദർശ​ന​ങ്ങ​ളാ​യി​രു​ന്നു ആ അത്ഭുതങ്ങൾ. അത്തര​മൊ​രു ഉദാര​മ​തി​യായ ഭരണാ​ധി​പൻ ഉണ്ടായി​രി​ക്കു​ന്നത്‌ എത്ര മഹത്താ​യി​രി​ക്കും!

യഹോ​വ​യു​ടെ പരമാ​ധി​കാ​ര​ത്തി​നു കീഴ്‌പെ​ടു​ന്നവർ അനന്തമായ അനു​ഗ്ര​ഹങ്ങൾ അനുഭ​വി​ക്കും. “അന്നു കുരു​ട​ന്മാ​രു​ടെ കണ്ണു തുറന്നു​വ​രും; ചെകി​ട​ന്മാ​രു​ടെ ചെവി അടഞ്ഞി​രി​ക്ക​യു​മില്ല. അന്നു മുടന്തൻ മാനി​നെ​പ്പോ​ലെ ചാടും; ഊമന്റെ നാവും ഉല്ലസി​ച്ചു​ഘോ​ഷി​ക്കും,” എന്നു തിരു​വെ​ഴു​ത്തു​കൾ വാഗ്‌ദാ​നം ചെയ്യുന്നു. (യെശയ്യാ​വു 35:5, 6) ആ മഹത്തായ നാളി​ലേക്കു വിരൽചൂ​ണ്ടി​ക്കൊണ്ട്‌, അപ്പോ​സ്‌ത​ല​നായ യോഹ​ന്നാൻ എഴുതി: “ഇതാ, മനുഷ്യ​രോ​ടു​കൂ​ടെ ദൈവ​ത്തി​ന്റെ കൂടാരം; അവൻ അവരോ​ടു​കൂ​ടെ വസിക്കും; അവർ അവന്റെ ജനമാ​യി​രി​ക്കും; ദൈവം താൻ അവരുടെ ദൈവ​മാ​യി അവരോ​ടു​കൂ​ടെ ഇരിക്കും. അവൻ അവരുടെ കണ്ണിൽനി​ന്നു കണ്ണുനീർ എല്ലാം തുടെ​ച്ചു​ക​ള​യും. ഇനി മരണം ഉണ്ടാക​യില്ല; ദുഃഖ​വും മുറവി​ളി​യും കഷ്ടതയും ഇനി ഉണ്ടാക​യില്ല; ഒന്നാമ​ത്തേതു കഴിഞ്ഞു​പോ​യി.”—വെളി​പ്പാ​ടു 21:3, 4.

പിശാ​ചായ സാത്താന്റെ ആധിപ​ത്യ​ത്തിൻ കീഴി​ലുള്ള ഇന്നത്തെ വ്യവസ്ഥി​തി​യിൽ നാം അനുഭ​വി​ച്ചി​രി​ക്കാ​നി​ട​യുള്ള ഏതൊരു കഷ്ടവും നഷ്ടപൂ​രണം ചെയ്യു​ന്ന​തി​നെ​ക്കാൾ കൂടു​ത​ലാ​യി​രി​ക്കും തന്റെ പുത്ര​നായ യേശു​ക്രി​സ്‌തു​വി​ലൂ​ടെ യഹോ​വ​യാം ദൈവ​ത്തി​ന്റെ ഭരണാ​ധി​പ​ത്യം പ്രദാനം ചെയ്യുന്ന ആനന്ദക​ര​മായ സംഗതി​കൾ. ദൈവ​ത്തി​ന്റെ വാഗ്‌ദത്ത പുതിയ ലോക​ത്തിൽ, ‘ആരാണു വാസ്‌ത​വ​ത്തിൽ ഭരിക്കു​ന്നത്‌?’ എന്ന്‌ ആരും സംശയി​ക്കു​ക​യില്ല. (2 പത്രൊസ്‌ 3:13) ആത്മമണ്ഡ​ല​ത്തി​ലെ ഭരണാ​ധി​പ​ന്മാ​രായ യഹോ​വ​യു​ടെ​യും യേശു​ക്രി​സ്‌തു​വി​ന്റെ​യും ഭൗമിക ഭരണ​പ്ര​ദേ​ശത്ത്‌ അനുസ​ര​ണ​മുള്ള മനുഷ്യ​വർഗം സന്തുഷ്ട​രും സുരക്ഷി​ത​രു​മാ​യി​രി​ക്കും. അവരുടെ പ്രജകൾക്കി​ട​യിൽ ആയിത്തീ​രു​ക​യെന്ന പ്രത്യാശ എന്തു​കൊ​ണ്ടു മുറു​കെ​പ്പി​ടി​ച്ചു​കൂ​ടാ?

[7-ാം പേജിലെ ചിത്രം]

ദൈവരാജ്യത്തിന്റെ ഭൗമിക ഭരണ​പ്ര​ദേ​ശത്ത്‌ മനുഷ്യ​വർഗം സുരക്ഷി​ത​രാ​യി​രി​ക്കും

[4-ാം പേജിലെ ചിത്ര​ത്തിന്‌ കടപ്പാട]

NASA photo