ഗമാലി​യേൽ—അവൻ തർസൊ​സു​കാ​ര​നായ ശൗലിനെ പഠിപ്പി​ച്ചു

ജനസഞ്ചയം നിശ്ശബ്ദ​രാ​യി നില​കൊ​ണ്ടു. പൗലോസ്‌ അപ്പോ​സ്‌ത​ലനെ അവർ കൊല്ലു​ന്ന​തി​ന്റെ വക്കോ​ള​മെ​ത്തി​യി​ട്ടു വെറും നിമി​ഷ​ങ്ങളേ ആയിരു​ന്നു​ള്ളൂ. തർസൊ​സു​കാ​ര​നായ ശൗൽ എന്നും അറിയ​പ്പെ​ട്ടി​രുന്ന അവനെ റോമൻ പടയാ​ളി​ക​ളാ​ണു രക്ഷിച്ചത്‌. ഇപ്പോൾ അവൻ യെരു​ശ​ലേം ആലയത്തി​ന്റെ പടി​ക്കെ​ട്ടിൽ നിന്നു​കൊണ്ട്‌ ജനക്കൂ​ട്ടത്തെ അഭിമു​ഖീ​ക​രി​ച്ചു.

നിശ്ശബ്ദ​രാ​കാൻ കൈ ഉയർത്തി ആംഗ്യം കാണി​ച്ചു​കൊണ്ട്‌ പൗലോസ്‌ എബ്രായ ഭാഷയിൽ ഇങ്ങനെ സംസാ​രി​ക്കാൻ തുടങ്ങി: “സഹോ​ദ​ര​ന്മാ​രും പിതാ​ക്ക​ന്മാ​രു​മാ​യു​ള്ളോ​രേ, എനിക്കു ഇന്നു നിങ്ങ​ളോ​ടുള്ള പ്രതി​വാ​ദം കേട്ടു​കൊൾവിൻ. . . . ഞാൻ കിലി​ക്യ​യി​ലെ തർസൊ​സിൽ ജനിച്ച യെഹൂ​ദ​നും ഈ നഗരത്തിൽ വളർന്നു ഗമാലി​യേ​ലി​ന്റെ കാല്‌ക്കൽ ഇരുന്നു പിതാ​ക്ക​ന്മാ​രു​ടെ ന്യായ​പ്ര​മാ​ണം സൂക്ഷ്‌മ​ത​യോ​ടെ അഭ്യസി​ച്ച​വ​നു​മാ​ക​യാൽ നിങ്ങൾ എല്ലാവ​രും ഇന്നു ഇരിക്കു​ന്ന​തു​പോ​ലെ ദൈവ​സേ​വ​യിൽ എരിവു​ള്ള​വ​നാ​യി​രു​ന്നു.”—പ്രവൃ​ത്തി​കൾ 22:1-3.

ജീവൻ അപകട​ത്തി​ലാ​യി​രി​ക്കേ, താൻ ഗമാലി​യേ​ലി​നാൽ അഭ്യസി​പ്പി​ക്ക​പ്പെ​ട്ട​വ​നാ​ണെന്നു പറഞ്ഞു​കൊ​ണ്ടു പൗലോസ്‌ പ്രതി​വാ​ദം തുടങ്ങി​യ​തെ​ന്തു​കൊ​ണ്ടാണ്‌? ഗമാലി​യേൽ ആരായി​രു​ന്നു, അവനാൽ പഠിപ്പി​ക്ക​പ്പെ​ടു​ന്ന​തിൽ എന്താണ്‌ ഉൾപ്പെ​ട്ടി​രു​ന്നത്‌? ക്രിസ്‌തീയ അപ്പോ​സ്‌ത​ല​നായ പൗലോസ്‌ ആയ ശേഷവും ഈ പരിശീ​ലനം ശൗലിനെ സ്വാധീ​നി​ച്ചോ?

ഗമാലി​യേൽ ആരായി​രു​ന്നു?

ഗമാലി​യേൽ വിഖ്യാ​ത​നായ ഒരു പരീശ​നാ​യി​രു​ന്നു. പരീശ യഹൂദ​മ​ത​ത്തി​നു​ള്ളി​ലെ രണ്ടു മുഖ്യ ആശയഗ​തി​ക​ളി​ലൊ​ന്നിന്‌ അടിത്ത​റ​പാ​കിയ ഹിലൽ മൂപ്പന്റെ പൗത്ര​നാ​യി​രു​ന്നു അവൻ.a ഹിലലി​ന്റെ സമീപനം അദ്ദേഹ​ത്തി​ന്റെ എതിരാ​ളി​യാ​യി​രുന്ന ഷാ​മൈ​യു​ടേ​തി​ലും സഹ്യമാ​യി കരുത​പ്പെ​ട്ടി​രു​ന്നു. പൊ.യു. 70-ൽ യെരു​ശ​ലേ​മി​ലെ ആലയത്തി​ന്റെ നാശത്തി​നു​ശേഷം ബെറ്റ്‌ ഷാ​മൈ​യെ​ക്കാൾ (ഷാമൈയുടെ കുടും​ബം) ബെറ്റ്‌ ഹിലലി​നെ​യാണ്‌ (ഹിലലി​ന്റെ കുടും​ബം) ജനങ്ങൾ കൂടുതൽ ഇഷ്ടപ്പെ​ട്ടത്‌. ആലയത്തി​ന്റെ നാശ​ത്തോ​ടെ മറ്റു മതവി​ഭാ​ഗ​ങ്ങ​ളെ​ല്ലാം അപ്രത്യ​ക്ഷ​മാ​യ​തി​നാൽ ഹിലലി​ന്റെ കുടും​ബം എന്നത്‌ യഹൂദ​മ​ത​ത്തി​ന്റെ ഔദ്യോ​ഗിക സംജ്ഞയാ​യി. ബെറ്റ്‌ ഹിലലി​ന്റെ തീരു​മാ​ന​ങ്ങ​ളാ​ണു തൽമൂ​ദി​ന്റെ അടിത്ത​റ​യാ​യി​ത്തീർന്ന മിഷ്‌ന​യി​ലെ യഹൂദ നിയമ​ങ്ങൾക്കു മിക്ക​പ്പോ​ഴും ആധാരം. പ്രത്യ​ക്ഷ​ത്തിൽ ഗമാലി​യേ​ലി​ന്റെ സ്വാധീ​ന​മാ​യി​രു​ന്നു അതിന്റെ പ്രാധാ​ന്യ​ത്തി​ന്റെ മുഖ്യ ഘടകം.

റബി എന്നതി​നേ​ക്കാൾ ഉയർന്ന റബാൻ എന്ന സ്ഥാന​പ്പേര്‌ ആദ്യമാ​യി അലങ്കരി​ക്ക​ത്ത​ക്ക​വണ്ണം ഗമാലി​യേൽ വളരെ ആദരണീ​യ​നാ​യി​രു​ന്നു. വാസ്‌ത​വ​ത്തിൽ, “റബാൻ ഗമാലി​യേൽ മൂപ്പൻ മരിച്ച​തോ​ടെ തോറ​യു​ടെ മഹത്വം അപ്രത്യ​ക്ഷ​മാ​യി, നിർമ​ല​ത​യും വിശു​ദ്ധി​യും [അക്ഷരീ​യ​മാ​യി, “വേർപെടൽ”] നശിച്ചു​പോ​യി” എന്നു മിഷ്‌ന പറയത്ത​ക്ക​വണ്ണം അവൻ അത്യന്തം ആദരണീയ വ്യക്തി​യാ​യി​ത്തീർന്നു.—സൊതാഹ്‌ 9:15.

ഗമാലി​യേ​ലി​നാൽ പഠിപ്പി​ക്ക​പ്പെട്ടു—എങ്ങനെ?

താൻ ‘ഗമാലി​യേ​ലി​ന്റെ കാല്‌ക്കൽ ഇരുന്ന്‌ അഭ്യസി​ച്ച​വ​നാ​ണെ’ന്നു പൗലോസ്‌ അപ്പോ​സ്‌തലൻ യെരു​ശ​ലേ​മിൽ കൂടി​യി​രുന്ന ജനസഞ്ച​യ​ത്തോ​ടു പറഞ്ഞ​പ്പോൾ അവൻ എന്താണ്‌ അർഥമാ​ക്കി​യത്‌? ഗമാലി​യേ​ലി​നെ​പ്പോ​ലുള്ള ഒരു ഉപദേ​ഷ്ടാ​വി​ന്റെ ശിഷ്യ​നാ​യി​രി​ക്കു​ന്ന​തിൽ എന്താണ്‌ ഉൾപ്പെ​ട്ടി​രു​ന്നത്‌?

അത്തരം പരിശീ​ല​ന​ത്തെ​ക്കു​റിച്ച്‌, ജൂയിഷ്‌ തിയ​ളോ​ജി​ക്കൽ സെമി​നാ​രി ഓഫ്‌ അമേരി​ക്ക​യു​ടെ പ്രൊ​ഫ​സ​റായ ഡോവ്‌ സ്ലോട്ട്‌നിക്ക്‌ ഇങ്ങനെ എഴുതു​ന്നു: “അലിഖിത നിയമ​ത്തി​ന്റെ കൃത്യത, തന്മൂലം അതിന്റെ വിശ്വാ​സ​യോ​ഗ്യത, ഒട്ടുമു​ക്കാ​ലും ഗുരു-ശിഷ്യ ബന്ധത്തെ ആശ്രയി​ച്ചി​രി​ക്കു​ന്നു: നിയമം പഠിപ്പി​ക്കു​ന്ന​തിൽ ഗുരു കാട്ടുന്ന ശ്രദ്ധയും അതു പഠിക്കു​ന്ന​തി​ലുള്ള ശിഷ്യന്റെ താത്‌പ​ര്യ​വും. . . . അതു​കൊണ്ട്‌, ശിഷ്യ​ന്മാർ പണ്ഡിത​ന്മാ​രു​ടെ പാദങ്ങ​ളി​ലി​രുന്ന്‌ . . . ‘അവരുടെ വാക്കുകൾ ദാഹ​ത്തോ​ടെ കുടി​ക്കു​വാൻ’ ഉദ്‌ബോ​ധി​പ്പി​ക്ക​പ്പെ​ട്ടി​രു​ന്നു.”—അവൊട്ട്‌ 1:4, ദ മിഷ്‌ന.

യേശു​ക്രി​സ്‌തു​വി​ന്റെ കാലത്തെ യഹൂദ ജനങ്ങളു​ടെ ചരിത്രം (ഇംഗ്ലീഷ്‌) എന്ന തന്റെ പുസ്‌ത​ക​ത്തിൽ, ഏമിൽ ഷ്യൂറർ ഒന്നാം നൂറ്റാ​ണ്ടി​ലെ റബിമാ​രാ​യി​രുന്ന ഉപദേ​ഷ്ടാ​ക്ക​ളു​ടെ രീതി​ക​ളിൽ വെളിച്ചം വിതറു​ന്നു. അദ്ദേഹം ഇങ്ങനെ എഴുതു​ന്നു: “സുപ്ര​സി​ദ്ധ​രാ​യി​രുന്ന റബിമാർ മിക്ക​പ്പോ​ഴും, പ്രബോ​ധനം ആഗ്രഹി​ക്കുന്ന ഒട്ടനവധി ചെറു​പ്പ​ക്കാ​രെ തങ്ങൾക്കു​ചു​റ്റും വിളി​ച്ചു​കൂ​ട്ടി​യി​രു​ന്നു. ശാഖോ​പ​ശാ​ഖ​ക​ളാ​യി പിരി​ഞ്ഞി​രി​ക്കുന്ന, വിപു​ല​മായ ‘അലിഖിത നിയമം’ പൂർണ​മാ​യി ഗ്രഹി​ക്കാൻ അവരെ സഹായി​ക്കു​ക​യാ​യി​രു​ന്നു ലക്ഷ്യം. . . . പ്രബോ​ധ​ന​ത്തിൽ, ഓർമ​ശ​ക്തി​യു​ടെ അക്ഷീണ​മായ, തുടർച്ച​യായ അഭ്യാസം ഉൾപ്പെ​ട്ടി​രു​ന്നു. . . . ഉപദേ​ഷ്ടാ​വു വിദ്യാർഥി​യു​ടെ മുമ്പാകെ, തീർപ്പു​കൽപ്പി​ക്കു​ന്ന​തി​നാ​യി നിയമ​പ​ര​മായ ഒട്ടേറെ ചോദ്യ​ങ്ങൾ നിരത്തു​ന്നു. എന്നിട്ട്‌ അവരെ​ക്കൊണ്ട്‌ ഉത്തരം പറയി​പ്പി​ക്കു​ന്നു അല്ലെങ്കിൽ അയാൾതന്നെ ഉത്തരം നൽകുന്നു. ഉപദേ​ഷ്ടാ​ക്ക​ന്മാ​രോ​ടു ചോദ്യം ചോദി​ക്കാ​നും വിദ്യാർഥി​കളെ അനുവ​ദി​ച്ചി​രു​ന്നു.”

റബിമാ​രു​ടെ വീക്ഷണ​ത്തിൽ, വിദ്യാർഥി​കൾ വെറും ജയിക്കാ​നുള്ള മാർക്കു കിട്ടു​ന്ന​തി​നെ​ക്കാൾ ഉയർന്ന കടമ്പ കടക്കേ​ണ്ടി​യി​രു​ന്നു. അത്തരം ഉപദേ​ഷ്ടാ​ക്ക​ന്മാ​രു​ടെ കീഴിൽ പഠിച്ചു​കൊ​ണ്ടി​രു​ന്ന​വർക്ക്‌ ഈ മുന്നറി​യി​പ്പു നൽക​പ്പെട്ടു: “പഠിച്ച കാര്യ​ങ്ങ​ളിൽ ഒരു സംഗതി​യെ​ങ്കി​ലും മറന്നു പോകുന്ന ഏതൊ​രു​വനെ സംബന്ധി​ച്ചും—തിരു​വെ​ഴു​ത്ത​നു​സ​രിച്ച്‌, അതൊരു ജീവന്മരണ സംഗതി​യാണ്‌. (അവൊട്ട്‌ 3:8) “തുള്ളി വെള്ളവും വറ്റാത്ത കിണറു”പോലുള്ള ഒരു വിദ്യാർഥിക്ക്‌ അങ്ങേയറ്റം ബഹുമതി നൽക​പ്പെ​ട്ടി​രു​ന്നു. (അവൊട്ട്‌ 2:8) തർസൊ​സു​കാ​ര​നായ ശൗൽ എന്ന എബ്രായ പേരി​നാൽ അറിയ​പ്പെ​ട്ടി​രുന്ന പൗലോ​സി​നു ഗമാലി​യേ​ലിൽനിന്ന്‌ അത്തരം പരിശീ​ല​ന​മാ​ണു ലഭിച്ചി​രു​ന്നത്‌.

ഗമാലി​യേ​ലി​ന്റെ പഠിപ്പി​ക്ക​ലു​ക​ളു​ടെ അർഥം

പരീശ​ന്മാ​രു​ടെ പഠിപ്പി​ക്ക​ലി​നു ചേർച്ച​യിൽ ഗമാലി​യേൽ അലിഖിത നിയമ​ങ്ങ​ളി​ലുള്ള വിശ്വാ​സത്തെ ഉയർത്തി​പ്പി​ടി​ച്ചു. അങ്ങനെ, അവൻ നിശ്വസ്‌ത തിരു​വെ​ഴു​ത്തി​നെ​ക്കാൾ റബിമാ​രു​ടെ പാരമ്പ​ര്യ​ങ്ങൾക്കു കൂടുതൽ ഊന്നൽ നൽകി. (മത്തായി 15:3-9) മിഷ്‌ന ഗമാലി​യേ​ലി​നെ ഇങ്ങനെ ഉദ്ധരി​ക്കു​ന്നു: “ഒരു ഉപദേ​ഷ്ടാ​വി​നെ [ഒരു റബി] നിയമി​ക്കുക, നിങ്ങൾക്കു സംശയങ്ങൾ ഉണ്ടായി​രി​ക്കു​ക​യില്ല. കാരണം, ഊഹിച്ചു നിങ്ങൾ അധികം ദശാംശം കൊടു​ക്ക​രുത്‌.” (അവൊട്ട്‌ 1:16) എന്തു ചെയ്യണ​മെന്ന്‌ എബ്രായ തിരു​വെ​ഴു​ത്തു​കൾ വ്യക്തമാ​ക്കാ​ഞ്ഞ​പ്പോൾ, തീരു​മാ​ന​മെ​ടു​ക്കു​ന്ന​തിന്‌ ഒരു വ്യക്തി സ്വന്തം യുക്തി​യെ​യോ മനസ്സാ​ക്ഷി​യെ​യോ ആശ്രയി​ക്കാൻ പാടി​ല്ലാ​യി​രു​ന്നു​വെന്ന്‌ അത്‌ അർഥമാ​ക്കി. പകരം, തനിക്കു​വേണ്ടി തീരു​മാ​ന​മെ​ടു​ക്കുന്ന യോഗ്യ​നായ ഒരു റബിയെ അവൻ കണ്ടെ​ത്തേ​ണ്ടി​യി​രു​ന്നു. ഗമാലി​യേ​ലി​ന്റെ അഭി​പ്രാ​യ​ത്തിൽ, ഇങ്ങനെ​മാ​ത്രമേ ഒരു വ്യക്തിക്കു പാപം ചെയ്യു​ന്നത്‌ ഒഴിവാ​ക്കാ​നാ​കു​മാ​യി​രു​ന്നു​ള്ളൂ.—റോമർ 14:1-12 താരത​മ്യം ചെയ്യുക.

എന്നിരു​ന്നാ​ലും, മതപര​മായ ന്യായ​ത്തീർപ്പു​ക​ളിൽ ഗമാലി​യേൽ പൊതു​വേ, കൂടുതൽ സഹിഷ്‌ണു​ത​യ്‌ക്കും വിശാ​ല​മ​ന​സ്ഥി​തി​ക്കും ശ്രദ്ധേ​യ​നാ​യി​രു​ന്നു. ഉദാഹ​ര​ണ​ത്തിന്‌, “[ഭർത്താ​വി​ന്റെ മരണത്തിന്‌] ഏക സാക്ഷി​യു​ടെ മൊഴി​യ​നു​സ​രിച്ച്‌, ഒരു സ്‌ത്രീ​യെ പുനർവി​വാ​ഹം ചെയ്യാൻ അനുവദി”ക്കുമെന്നു തീർപ്പു​കൽപ്പി​ച്ചു​കൊണ്ട്‌ അദ്ദേഹം സ്‌ത്രീ​ക​ളോ​ടു പരിഗണന കാട്ടി. (യെവ​മൊട്ട്‌ 16:7, ദ മിഷ്‌ന) അതിനു​പു​റമേ, വിവാ​ഹ​മോ​ചി​തയെ സംരക്ഷി​ക്കു​ന്ന​തിന്‌, ഉപേക്ഷ​ണ​പ​ത്രം പുറത്തി​റ​ക്കു​ന്ന​തി​നോ​ടുള്ള ബന്ധത്തിൽ ഗമാലി​യേൽ ഒട്ടേറെ നിയ​ന്ത്ര​ണങ്ങൾ ഏർപ്പെ​ടു​ത്തി.

യേശു​ക്രി​സ്‌തു​വി​ന്റെ ആദിമ അനുഗാ​മി​ക​ളോ​ടുള്ള ഗമാലി​യേ​ലി​ന്റെ ഇടപെ​ട​ലി​ലും ഈ വിശാ​ല​മ​ന​സ്ഥി​തി ദർശി​ക്കാ​വു​ന്ന​താണ്‌. പ്രസം​ഗ​വേ​ല​യോ​ടുള്ള ബന്ധത്തിൽ അറസ്റ്റു ചെയ്യപ്പെട്ട യേശു​വി​ന്റെ അപ്പോ​സ്‌ത​ല​ന്മാ​രെ യഹൂദ മതനേ​താ​ക്കൾ കൊന്നു​ക​ള​യാൻ ഭാവി​ച്ച​പ്പോൾ, “സർവ്വജ​ന​ത്തി​ന്നും ബഹുമാ​ന​മുള്ള ധർമ്മോ​പ​ദേ​ഷ്ടാ​വായ ഗമാലീ​യേൽ എന്നൊരു പരീശൻ ന്യായാ​ധി​പ​സം​ഘ​ത്തിൽ എഴു​ന്നേറ്റു, അവരെ കുറേ​നേരം പുറത്താ​ക്കു​വാൻ കല്‌പി​ച്ചു. പിന്നെ അവൻ അവരോ​ടു: യിസ്രാ​യേൽ പുരു​ഷ​ന്മാ​രേ, ഈ മനുഷ്യ​രു​ടെ കാര്യ​ത്തിൽ നിങ്ങൾ എന്തു ചെയ്‌വാൻ പോകു​ന്നു എന്നു സൂക്ഷി​ച്ചു​കൊൾവിൻ. . . . ഈ മനുഷ്യ​രെ വിട്ടു ഒഴിഞ്ഞു​കൊൾവിൻ എന്നു ഞാൻ നിങ്ങ​ളോ​ടു പറയുന്നു; . . . നിങ്ങൾ ദൈവ​ത്തോ​ടു പോരാ​ടു​ന്നു എന്നു വരരു​ത​ല്ലോ എന്നു പറഞ്ഞു.” ഗമാലി​യേ​ലി​ന്റെ ഉപദേശം അനുസ​രിച്ച്‌ അപ്പോ​സ്‌ത​ല​ന്മാർ വിടു​വി​ക്ക​പ്പെട്ടു.—പ്രവൃ​ത്തി​കൾ 5:34-40.

അതു പൗലോ​സിന്‌ എന്തർഥ​മാ​ക്കി?

പൊ.യു. (പൊതു​യു​ഗം) ഒന്നാം നൂറ്റാ​ണ്ടി​ലെ ഏറ്റവും ശ്രേഷ്‌ഠ​രായ റബിമാ​രിൽ ഒരുവ​നാ​ലാ​ണു പൗലോസ്‌ പരിശീ​ലി​പ്പി​ക്ക​പ്പെ​ടു​ക​യും പഠിപ്പി​ക്ക​പ്പെ​ടു​ക​യും ചെയ്‌തത്‌. ഗമാലി​യേ​ലി​നെ​ക്കു​റി​ച്ചുള്ള അപ്പോ​സ്‌ത​ലന്റെ പരാമർശം യെരു​ശ​ലേ​മിൽ കൂടി​യി​രുന്ന ജനക്കൂട്ടം അവന്റെ പ്രസം​ഗ​ത്തി​നു പ്രത്യേ​കം ചെവി​ചാ​യ്‌ക്കാൻ ഇടയാ​ക്കി​യെ​ന്ന​തിൽ സംശയ​മില്ല. എന്നാൽ അവൻ, ഗമാലി​യേ​ലി​നെ​ക്കാൾ അത്യന്തം ഉയർന്ന​വ​നായ ഒരു ഉപദേ​ഷ്ടാ​വി​നെ​ക്കു​റിച്ച്‌—മിശി​ഹാ​യായ യേശു​വി​നെ​ക്കു​റിച്ച്‌—അവരോ​ടു സംസാ​രി​ച്ചു. പൗലോസ്‌ ഇപ്പോൾ ജനസഞ്ച​യത്തെ അഭിസം​ബോ​ധ​ന​ചെ​യ്‌തത്‌ യേശു​വി​ന്റെ ഒരു ശിഷ്യ​നാ​യി​ട്ടാണ്‌, അല്ലാതെ ഗമാലി​യേ​ലി​ന്റെ ശിഷ്യ​നാ​യി​ട്ടല്ല.—പ്രവൃ​ത്തി​കൾ 22:4-21.

ഗമാലി​യേ​ലി​ന്റെ പരിശീ​ലനം ഒരു ക്രിസ്‌ത്യാ​നി എന്ന നിലയി​ലുള്ള പൗലോ​സി​ന്റെ പഠിപ്പി​ക്ക​ലി​നെ സ്വാധീ​നി​ച്ചോ? സാധ്യ​ത​യ​നു​സ​രിച്ച്‌, തിരു​വെ​ഴു​ത്തി​ലും യഹൂദ നിയമ​ത്തി​ലും ലഭിച്ച കർശന​മായ പ്രബോ​ധനം ഒരു ക്രിസ്‌തീയ ഉപദേ​ഷ്ടാ​വെന്ന നിലയിൽ പൗലോ​സി​നു പ്രയോ​ജ​ന​ക​ര​മെന്നു തെളിഞ്ഞു. എങ്കിലും, ബൈബി​ളിൽ കാണ​പ്പെ​ടുന്ന പൗലോ​സി​ന്റെ ദിവ്യ നിശ്വസ്‌ത ലേഖനങ്ങൾ അവൻ ഗമാലി​യേ​ലി​ന്റെ പരീശ വിശ്വാ​സ​ങ്ങ​ളു​ടെ മൂലത​ത്ത്വ​ങ്ങളെ നിരാ​ക​രി​ച്ച​താ​യി സുവ്യ​ക്ത​മാ​ക്കു​ന്നു. യഹൂദ​മ​ത​ത്തി​ലെ റബിമാ​രി​ലേ​ക്കോ മനുഷ്യ​നിർമിത പാരമ്പ​ര്യ​ങ്ങ​ളി​ലേ​ക്കോ അല്ല, മറിച്ച്‌ യേശു​ക്രി​സ്‌തു​വി​ലേ​ക്കാ​ണു പൗലോസ്‌ തന്റെ സഹ യഹൂദ​ന്മാ​രെ​യും മറ്റുള്ള​വ​രേ​യും നയിച്ചത്‌.—റോമർ 10:1-4.

പൗലോസ്‌, ഗമാലി​യേ​ലി​ന്റെ ശിഷ്യ​നാ​യി തുടർന്നിരു​ന്നെ​ങ്കിൽ അവൻ വളരെ വിലയും നിലയും ആസ്വദി​ക്കു​മാ​യി​രു​ന്നു. ഗമാലി​യേ​ലി​ന്റെ കൂട്ടത്തി​ലു​ണ്ടാ​യി​രുന്ന മറ്റുള്ള​വ​രാ​ണു യഹൂദ​മ​ത​ത്തി​ന്റെ ഭാവി കരുപ്പി​ടി​പ്പി​ക്കാൻ സഹായി​ച്ചത്‌. ഉദാഹ​ര​ണ​ത്തിന്‌, ഗമാലി​യേ​ലി​ന്റെ പുത്ര​നും ഒരുപക്ഷേ പൗലോ​സി​ന്റെ സഹപാ​ഠി​യു​മാ​യി​രുന്ന ശിമ​യോൻ യഹൂദർ റോമി​നെ​തി​രെ നടത്തിയ പ്രക്ഷോ​ഭ​ത്തിൽ മുഖ്യ പങ്കുവ​ഹി​ച്ചി​രു​ന്നു. ആലയത്തി​ന്റെ നാശത്തി​നു​ശേഷം ഗമാലി​യേ​ലി​ന്റെ പൗത്രൻ ഗമാലി​യേൽ II-ാമൻ സൻഹെ​ദ്രി​മി​നെ യാവ്‌നെ​യി​ലേക്കു മാറ്റി​ക്കൊണ്ട്‌ അതിന്റെ അധികാ​രം പുനഃ​സ്ഥാ​പി​ച്ചു. ഗമാലി​യേൽ II-ാമന്റെ പൗത്രൻ ജൂഡാ ഹ-നസിയാണ്‌, ഇന്നുവ​രെ​യുള്ള യഹൂദ ചിന്താ​ഗ​തി​യു​ടെ അടിസ്ഥാ​ന​ക്ക​ല്ലാ​യി​ത്തീർന്ന മിഷ്‌ന​യു​ടെ സമാഹർത്താവ്‌.

ഗമാലി​യേ​ലി​ന്റെ വിദ്യാർഥി എന്ന നിലയിൽ തർസൊ​സു​കാ​ര​നായ ശൗൽ യഹൂദ​മ​ത​ത്തിൽ വിഖ്യാ​ത​നാ​യി​ത്തീ​രു​മാ​യി​രു​ന്നു. എന്നിട്ടും, അത്തരം ജീവി​ത​വൃ​ത്തി​യെ​ക്കു​റി​ച്ചു പൗലോസ്‌ ഇങ്ങനെ എഴുതി: “എനിക്കു ലാഭമാ​യി​രു​ന്നതു ഒക്കെയും ഞാൻ ക്രിസ്‌തു​നി​മി​ത്തം ചേതം എന്നു എണ്ണിയി​രി​ക്കു​ന്നു. അത്രയു​മല്ല, എന്റെ കർത്താ​വായ ക്രിസ്‌തു​യേ​ശു​വി​നെ​ക്കു​റി​ച്ചുള്ള പരിജ്ഞാ​ന​ത്തി​ന്റെ ശ്രേഷ്‌ഠ​ത​നി​മി​ത്തം ഞാൻ ഇപ്പോ​ഴും ചേതം എന്നു എണ്ണുന്നു. ഞാൻ ക്രിസ്‌തു​വി​നെ നേടേ​ണ്ട​തി​ന്നു . . . അവന്റെ നിമിത്തം എല്ലാം ഉപേക്ഷി​ച്ചു ചവറു എന്നു എണ്ണുന്നു.”—ഫിലി​പ്പി​യർ 3:7-9, 11.

ഒരു പരീശ​നെന്ന ജീവി​ത​വൃ​ത്തി പിന്നി​ലു​പേ​ക്ഷി​ക്കു​ക​യും യേശു​ക്രി​സ്‌തു​വി​ന്റെ അനുഗാ​മി​യാ​യി​ത്തീ​രു​ക​യും ചെയ്‌തു​കൊണ്ട്‌ പൗലോസ്‌, “ദൈവ​ത്തോ​ടു പോരാ​ടു​ന്നു”വെന്നു വരാതി​രി​ക്കാൻ സൂക്ഷി​ക്ക​ണ​മെന്ന തന്റെ മുൻ അധ്യാ​പ​കന്റെ ഉപദേശം പ്രാവർത്തി​ക​മാ​ക്കു​ക​യാ​യി​രു​ന്നു. യേശു​വി​ന്റെ ശിഷ്യ​ന്മാർക്കെ​തി​രെ​യുള്ള പീഡനം നിർത്തി​വ​ച്ചു​കൊ​ണ്ടു പൗലോസ്‌ ദൈവ​ത്തി​നെ​തി​രെ മത്സരി​ക്കു​ന്നതു നിർത്തി. പ്രത്യുത, ക്രിസ്‌തു​വി​ന്റെ അനുഗാ​മി​യാ​യി​ക്കൊണ്ട്‌ അവൻ “ദൈവ​ത്തി​ന്റെ കൂട്ടു​വേ​ലക്കാ”രിൽ ഒരാളാ​യി​ത്തീർന്നു.—1 കൊരി​ന്ത്യർ 3:9.

ശുഷ്‌കാ​ന്തി​യു​ള്ള യഹോ​വ​യു​ടെ സാക്ഷികൾ നമ്മുടെ നാളിൽ സത്യ​ക്രി​സ്‌ത്യാ​നി​ത്വ​ത്തെ​ക്കു​റി​ച്ചുള്ള സന്ദേശം പ്രഘോ​ഷി​ച്ചു​കൊ​ണ്ടി​രി​ക്കു​ക​യാണ്‌. പൗലോ​സി​നെ​പ്പോ​ലെ ഇവരി​ല​നേകർ തങ്ങളുടെ ജീവി​ത​ത്തിൽ വിസ്‌മ​യാ​വ​ഹ​മായ മാറ്റങ്ങൾ വരുത്തി​യി​ട്ടുണ്ട്‌. യഥാർഥ​ത്തിൽ “ദൈവിക”മായ, രാജ്യ​പ്ര​സംഗ പ്രവർത്ത​ന​ത്തിൽ കൂടു​ത​ലായ പങ്കുണ്ടാ​യി​രി​ക്കു​ന്ന​തി​നു ചിലർ വളരെ​യേറെ നേട്ടങ്ങ​ളുള്ള ജീവി​ത​വൃ​ത്തി​പോ​ലും ഉപേക്ഷി​ച്ചി​രി​ക്കു​ന്നു. (പ്രവൃ​ത്തി​കൾ 5:39) പൗലോ​സി​ന്റെ മുൻ അധ്യാ​പ​ക​നാ​യി​രുന്ന ഗമാലി​യേ​ലി​ന്റെയല്ല മറിച്ച്‌, പൗലോ​സി​ന്റെ ദൃഷ്ടാന്തം പിന്തു​ടർന്നി​രി​ക്കു​ന്ന​തിൽ അവർ എത്ര സന്തുഷ്ട​രാണ്‌!

[അടിക്കു​റിപ്പ്‌]

[28-ാം പേജിലെ ചിത്രം]

തർസൊസുകാരനായ ശൗൽ, അപ്പോ​സ്‌ത​ല​നായ പൗലോസ്‌ എന്ന നിലയിൽ സകല ജനതക​ളി​ലു​മുള്ള ആളുക​ളോ​ടു സുവാർത്ത പ്രഘോ​ഷി​ച്ചു