ഭൂമി അത്‌ എന്തിനു സൃഷ്ടി​ക്ക​പ്പെട്ടു?

നിങ്ങൾ പരിചി​ന്തി​ക്കേണ്ട ഒരു ചോദ്യ​മുണ്ട്‌: നമ്മുടെ ഈ മനോഹര ഗ്രഹം ഭൂമി​യെ​യും അതിലെ മനുഷ്യ​രെ​യും സംബന്ധിച്ച്‌ എന്തെങ്കി​ലും ഉദ്ദേശ്യ​മുള്ള ബുദ്ധി​മാ​നായ ഒരു സ്രഷ്ടാവ്‌ ഉണ്ടാക്കി​യ​താ​ണോ? ആ ചോദ്യ​ത്തിന്‌ തൃപ്‌തി​ക​ര​മായ ഉത്തരം കണ്ടെത്തു​ന്നത്‌, നമ്മുടെ ഗ്രഹത്തി​ന്റെ ഭാവി എന്തായി​രി​ക്കു​മെന്ന്‌ മനസ്സി​ലാ​ക്കാൻ നിങ്ങളെ സഹായി​ക്കും.

പ്രപഞ്ച​ത്തെ​യും നമ്മുടെ ഭൂമി​യെ​യും കുറിച്ച്‌ ആഴമായി പഠിച്ചി​ട്ടുള്ള ഒട്ടേറെ ശാസ്‌ത്ര​ജ്ഞ​ന്മാർ അതിനു പിന്നിൽ ഒരു സ്രഷ്ടാവ്‌, അതായത്‌ ദൈവം ഉണ്ടെന്നു സൂചി​പ്പി​ക്കുന്ന തെളി​വു​കൾ കണ്ടെത്തി​യി​ട്ടുണ്ട്‌. അവരിൽ ഒരാളിൽനി​ന്നുള്ള അഭി​പ്രാ​യങ്ങൾ പരിചി​ന്തി​ക്കുക:

പ്രൊ​ഫ​സർ പോൾ ഡേവിസ്‌ ദൈവ​മ​നസ്സ്‌ (ഇംഗ്ലീഷ്‌) എന്ന തന്റെ പുസ്‌ത​ക​ത്തിൽ ഇങ്ങനെ എഴുതു​ന്നു: “സുസ്ഥി​ര​വും സുസം​ഘ​ടി​ത​വും സങ്കീർണ​വു​മായ ഘടനകൾ ഉള്ള ക്രമനി​ബ​ദ്ധ​മായ, പരസ്‌പര ബന്ധമുള്ള ഒരു പ്രപഞ്ച​ത്തി​ന്റെ അസ്‌തി​ത്വ​ത്തിന്‌ തികച്ചും വിശേ​ഷ​വി​ധ​മായ നിയമ​ങ്ങ​ളും സ്ഥിതി​ഗ​തി​ക​ളും ആവശ്യ​മാണ്‌.”

ജ്യോ​തിർഭൗ​തിക ശാസ്‌ത്ര​ജ്ഞ​ന്മാ​രും മറ്റും സൂചി​പ്പിച്ച നിരവധി “യാദൃ​ച്ഛിക സംഭവങ്ങ”ളെ കുറിച്ച്‌ ചർച്ച​ചെയ്‌ത ശേഷം പ്രൊ​ഫസർ ഡേവിസ്‌ ഇങ്ങനെ കൂട്ടി​ച്ചേർക്കു​ന്നു: “അവയെ​ല്ലാം ഒരുമി​ച്ചു പരിഗ​ണി​ക്കു​മ്പോൾ, നമുക്ക​റി​യാ​വു​ന്നതു പോ​ലെ​തന്നെ, ഭൗതിക നിയമ​ങ്ങ​ളു​ടെ അടിസ്ഥാന സ്വഭാ​വ​ത്തി​ലും വ്യത്യസ്‌ത പിണ്ഡക​ണങ്ങൾ, ബലതീ​വ്രത, തുടങ്ങി​യ​വ​യ്‌ക്കാ​യി പ്രകൃതി തിര​ഞ്ഞെ​ടു​ത്തി​രി​ക്കുന്ന യഥാർഥ മൂല്യ​ങ്ങ​ളിൽ ശുഭക​ര​മാ​യി കാണ​പ്പെ​ടുന്ന ചില ആകസ്‌മി​ക​ത​ക​ളി​ലു​മാണ്‌ ജീവൻ ആശ്രയി​ച്ചി​രി​ക്കു​ന്നത്‌, അതും പെട്ടെന്നു മാറ്റം സംഭവി​ക്കാ​വുന്ന വിധത്തിൽ. . . . ദൈവ​ത്തി​ന്റെ സ്ഥാനത്തു​നി​ന്നു പ്രവർത്തി​ക്കാ​നും ഒരു കൂട്ടം നോബു​കൾ തിരി​ച്ചു​കൊണ്ട്‌ ഈ പരിമാ​ണ​ങ്ങ​ളു​ടെ മൂല്യങ്ങൾ തിര​ഞ്ഞെ​ടു​ക്കാ​നും നമുക്കു സാധി​ച്ചി​രു​ന്നെ​ങ്കിൽ, നോബ്‌ തിരി​ച്ചു​കൊ​ണ്ടുള്ള മിക്കവാ​റും ഏതൊരു ക്രമീ​ക​ര​ണ​വും പ്രപഞ്ചത്തെ നിവാ​സ​യോ​ഗ്യം അല്ലാതാ​ക്കു​മെന്ന്‌ നാം കണ്ടെത്തു​മാ​യി​രു​ന്നു എന്നു പറഞ്ഞാൽ മതിയാ​കും. ചില കേസു​ക​ളിൽ, പ്രപഞ്ചം ജീവൻ തഴച്ചു വളരു​ന്നി​ടം ആയിരി​ക്കു​ന്ന​തിന്‌ വ്യത്യസ്‌ത നോബു​കൾ അതീവ കൃത്യ​ത​യി​ലേക്ക്‌ അൽപ്പ​മൊ​ന്നു തിരി​ക്കേ​ണ്ട​തുണ്ട്‌ എന്നപോ​ലെ തോന്നാം. . . . എന്നാൽ, കാര്യങ്ങൾ ആയിരി​ക്കുന്ന സ്ഥിതി​യിൽനിന്ന്‌ ചെറി​യൊ​രു മാറ്റ​മെ​ങ്കി​ലും ഉണ്ടായാൽ പ്രപഞ്ച​ത്തിൽ മനുഷ്യർ ഉണ്ടാവി​ല്ലെന്ന വസ്‌തുത അതീവ പ്രാധാ​ന്യം അർഹി​ക്കു​ന്നു.”

പ്രപഞ്ച​ത്തി​ന്റെ ഇതര ഭാഗങ്ങ​ളോ​ടൊ​പ്പം നമ്മുടെ ഭൂമി​യും നിർമി​ക്ക​പ്പെ​ട്ടത്‌ ഉദ്ദേശ്യ​മുള്ള ഒരു സ്രഷ്ടാ​വി​നാൽ ആണെന്നു മേൽപ്പറഞ്ഞ കണ്ടെത്ത​ലു​കൾ അനേകരെ ബോധ്യ​പ്പെ​ടു​ത്തു​ന്നു. അതു ശരിയാ​ണെ​ങ്കിൽ, ആദ്യം തന്നെ, അവൻ എന്തിനാ​ണു ഭൂമിയെ സൃഷ്ടി​ച്ച​തെന്നു നാം കണ്ടെ​ത്തേ​ണ്ട​തുണ്ട്‌. നമുക്കു കഴിയു​മെ​ങ്കിൽ, ഭൂമിയെ സംബന്ധിച്ച അവന്റെ ഉദ്ദേശ്യം എന്താ​ണെ​ന്നും നാം ഉറപ്പു​വ​രു​ത്തണം. ഇതി​നോ​ടുള്ള ബന്ധത്തിൽ അസാധാ​ര​ണ​മാ​യൊ​രു വിരോ​ധാ​ഭാ​സം കാണുന്നു. നിരീ​ശ്വ​ര​വാ​ദ​ത്തി​നു വ്യാപ​ക​മായ ജനപ്രീ​തി ഉണ്ടായി​രു​ന്നി​ട്ടും, അതിശ​യ​ക​ര​മാം​വണ്ണം അനവധി ആളുകൾ ഇപ്പോ​ഴും ബുദ്ധി​ശ​ക്തി​യുള്ള ഒരു സ്രഷ്ടാ​വിൽ വിശ്വ​സി​ക്കു​ന്നു. ക്രൈ​സ്‌ത​വ​ലോ​ക​ത്തി​ലെ മിക്ക സഭകളും സർവശ​ക്ത​നായ ഒരു ദൈവ​ത്തെ​യും നമ്മുടെ പ്രപഞ്ച​ത്തി​ന്റെ സ്രഷ്ടാ​വി​നെ​യും കുറിച്ച്‌ നാമമാ​ത്ര​മാ​യി സംസാ​രി​ക്കു​ന്നു. പക്ഷേ, ദൈ​വോ​ദ്ദേ​ശ്യ​ത്തിൽ ഭൂമി​യു​ടെ ഭാവി എന്ത്‌ എന്നതി​നെ​ക്കു​റിച്ച്‌ ഈ മതങ്ങൾ ആത്മവി​ശ്വാ​സ​ത്തോ​ടും ബോധ്യ​ത്തോ​ടും കൂടെ ഒന്നും​തന്നെ പറയു​ന്നില്ല.

ബൈബിൾ എന്താണ്‌ പറയു​ന്നത്‌?

സ്രഷ്ടാ​വിൽനി​ന്നു​ള്ളത്‌ എന്നു വ്യാപ​ക​മാ​യി അംഗീ​ക​രി​ക്ക​പ്പെ​ട്ടി​രി​ക്കുന്ന ഒരു വിജ്ഞാന സ്രോ​ത​സ്സി​ലേക്കു നോക്കു​ന്നതു യുക്തി​സ​ഹ​മാണ്‌. ആ സ്രോ​തസ്സ്‌ ബൈബി​ളാണ്‌. നമ്മുടെ ഭൂമി​യു​ടെ ഭാവിയെ സംബന്ധി​ച്ചുള്ള അതിലെ ഏറ്റവും ലളിത​വും വ്യക്തവു​മായ പ്രസ്‌താ​വ​ന​ക​ളിൽ ഒന്ന്‌ സഭാ​പ്ര​സം​ഗി 1:4-ൽ കാണ​പ്പെ​ടു​ന്നു. നാം ഇങ്ങനെ വായി​ക്കു​ന്നു: “ഒരു തലമുറ പോകു​ന്നു; മറെറാ​രു തലമുറ വരുന്നു; ഭൂമി​യോ എന്നേക്കും നില്‌ക്കു​ന്നു.” യഹോ​വ​യാം ദൈവം എന്തിനാണ്‌ ഭൂമിയെ സൃഷ്ടി​ച്ച​തെന്ന്‌ ബൈബിൾ വളച്ചു​കെ​ട്ടി​ല്ലാ​തെ വിശദീ​ക​രി​ക്കു​ന്നു. അതിലെ ജീവൻ നിലനിർത്താ​നാ​യി അവൻ അതിനെ പ്രപഞ്ച​ത്തി​ലെ ഏറ്റവും ഉചിത​മായ സ്ഥാനത്തും സൂര്യ​നോ​ടുള്ള ബന്ധത്തിൽ ഉചിത​മായ അകലത്തി​ലും ആക്കി​വെ​ച്ചെ​ന്നും അതു നമുക്കു കാണി​ച്ചു​ത​രു​ന്നു. സർവശ​ക്ത​നായ ദൈവം പുരാതന പ്രവാ​ച​ക​നായ യെശയ്യാ​വി​നെ പിൻവ​രുന്ന പ്രകാരം എഴുതാൻ നിശ്വ​സ്‌ത​നാ​ക്കി: “ആകാശത്തെ സൃഷ്ടിച്ച യഹോവ ഇപ്രകാ​രം അരുളി​ച്ചെ​യ്യു​ന്നു— അവൻ തന്നേ ദൈവം; അവൻ ഭൂമിയെ നിർമ്മി​ച്ചു​ണ്ടാ​ക്കി; അവൻ അതിനെ ഉറപ്പിച്ചു; വ്യർത്ഥ​മാ​യി​ട്ടല്ല അവൻ അതിനെ സൃഷ്ടി​ച്ചതു; പാർപ്പി​ന്ന​ത്രേ അതിനെ നിർമ്മി​ച്ചതു:—ഞാൻ തന്നേ യഹോവ; വേറൊ​രു​ത്ത​നും ഇല്ല.”—യെശയ്യാ​വു 45:18.

എന്നാൽ, ഭൂമി​യി​ലെ സമസ്‌ത ജീവ​നെ​യും നശിപ്പി​ക്കാ​നുള്ള മാർഗം മനുഷ്യൻ വികസി​പ്പി​ച്ചെ​ടു​ക്കു​ന്ന​തോ? മനുഷ്യ​വർഗ​ത്തിന്‌ നമ്മുടെ ഗ്രഹത്തി​ലെ സമസ്‌ത ജീവ​നെ​യും നശിപ്പി​ക്കാൻ സാധി​ക്കു​ന്ന​തി​നു മുമ്പ്‌ താൻ ഇടപെ​ടു​മെന്ന്‌ ദൈവം തന്റെ അനുപമ ജ്ഞാനത്താൽ പ്രഖ്യാ​പി​ക്കു​ന്നു. ബൈബി​ളി​ലെ അവസാന പുസ്‌ത​ക​മായ വെളി​പ്പാ​ടി​ലെ ഈ ഉറപ്പേ​കുന്ന വാഗ്‌ദാ​നം ശ്രദ്ധി​ക്കുക: “ജാതികൾ കോപി​ച്ചു: നിന്റെ കോപ​വും വന്നു: മരിച്ച​വരെ ന്യായം​വി​ധി​പ്പാ​നും നിന്റെ ദാസന്മാ​രായ പ്രവാ​ച​ക​ന്മാർക്കും വിശു​ദ്ധ​ന്മാർക്കും ചെറി​യ​വ​രും വലിയ​വ​രു​മാ​യി നിന്റെ ഭക്തന്മാർക്കും പ്രതി​ഫലം കൊടു​പ്പാ​നും ഭൂമിയെ നശിപ്പി​ക്കു​ന്ന​വരെ നശിപ്പി​പ്പാ​നും ഉള്ള കാലവും വന്നു.”—വെളി​പ്പാ​ടു 11:18.

ഭൂമിയെ—ഒരു ബഹിരാ​കാശ യാത്രി​കൻ വർണി​ച്ച​തു​പോ​ലെ ശൂന്യാ​കാ​ശ​ത്തി​ലെ ഈ രത്‌നത്തെ—സൃഷ്ടി​ച്ച​തി​ന്റെ യഥാർഥ ഉദ്ദേശ്യം എന്തായി​രു​ന്നെന്ന്‌ യഹോവ നമുക്കു വെളി​പ്പെ​ടു​ത്തു​ന്നു. അത്‌ ഒരു ആഗോള പറുദീസ ആയിത്തീ​ര​ണ​മെ​ന്നും അതിൽ മനുഷ്യർ—സ്‌ത്രീ പുരു​ഷ​ന്മാർ—ഉചിത​മായ അളവിൽ നിറഞ്ഞ്‌ എല്ലാവ​രും സമാധാ​ന​ത്തി​ലും യോജി​പ്പി​ലും ജീവി​ക്ക​ണ​മെ​ന്നും ദൈവം ഉദ്ദേശി​ച്ചു. സന്താ​നോ​ത്‌പാ​ദനം നടത്താൻ ആദ്യ മാനുഷ ജോടി​യെ അനുവ​ദി​ച്ചു​കൊണ്ട്‌ ഭൗമ ഗ്രഹം ക്രമേണ ജനങ്ങളാൽ നിറയു​ന്ന​തിന്‌ അവൻ ക്രമീ​ക​രണം ചെയ്‌തു. ആദ്യ മാനുഷ ജോടി​യു​ടെ ഉല്ലാസ​ത്തി​നും സന്തോ​ഷ​ത്തി​നും വേണ്ടി യഹോവ ഭൂമി​യു​ടെ ചെറി​യൊ​രു ഭാഗം പറുദീസ അവസ്ഥയി​ലാ​ക്കി. മാനുഷ കുടും​ബ​ങ്ങ​ളു​ടെ പുനരു​ത്‌പാ​ദനം വർഷങ്ങ​ളും നൂറ്റാ​ണ്ടു​ക​ളും പിന്നി​ടു​മ്പോൾ, ഉല്‌പത്തി 1:28 നിവൃ​ത്തി​യാ​കു​ന്നതു വരെ ഏദെൻ തോട്ടം ക്രമേണ വികസി​പ്പി​ക്ക​പ്പെ​ടു​മാ​യി​രു​ന്നു: “ദൈവം . . . നിങ്ങൾ സന്താന​പു​ഷ്ടി​യു​ള്ള​വ​രാ​യി പെരുകി ഭൂമി​യിൽ നിറഞ്ഞു അതിനെ അടക്കി . . . വാഴു​വിൻ എന്നു അവരോ​ടു കല്‌പി​ച്ചു.”

ഭൂമി​യു​ടെ​യും അതിലെ നിവാ​സി​ക​ളു​ടെ​യും ഇന്നത്തെ ദുഃഖ​പൂർണ​മായ അവസ്ഥ, ഭൂമിയെ സംബന്ധിച്ച ദൈവ​ത്തി​ന്റെ ആദിമ ഉദ്ദേശ്യം പരാജ​യ​പ്പെ​ട്ടി​രി​ക്കു​ന്നു എന്ന്‌ അർഥമാ​ക്കു​ന്നു​വോ? അതോ, അവൻ തന്റെ ഉദ്ദേശ്യ​ത്തി​നു മാറ്റം വരുത്തു​ക​യും മനുഷ്യ​വർഗ​ത്തി​ന്റെ വഴിപി​ഴച്ച ഗതി നിമിത്തം ഭൗമ ഗ്രഹം ഒട്ടാകെ നശിപ്പി​ക്ക​പ്പെ​ടാൻ അനുവ​ദി​ച്ചിട്ട്‌ വീണ്ടും ഒരു തുടക്കം കുറി​ക്കാൻ തീരു​മാ​നി​ക്കു​ക​യും ചെയ്‌തി​രി​ക്കു​ന്നു​വോ? ഇല്ല. ഇതു രണ്ടും സംഭവി​ക്കി​ല്ലെന്നു നമുക്ക്‌ ഉറപ്പു​ണ്ടാ​യി​രി​ക്കാൻ കഴിയും. യഹോവ ഉദ്ദേശി​ക്കുന്ന എന്തും ഒടുവിൽ സംഭവി​ക്കേ​ണ്ട​താ​കു​ന്നു എന്നു ബൈബിൾ നമ്മോടു പറയുന്നു. ഏതെങ്കി​ലും ഒരു വ്യക്തി​ക്കോ ഒരു അവിചാ​രിത സംഭവ​വി​കാ​സ​ത്തി​നു പോലു​മോ അവന്റെ തീരു​മാ​നത്തെ തകിടം​മ​റി​ക്കാൻ കഴിയില്ല. അവൻ നമുക്ക്‌ ഇങ്ങനെ ഉറപ്പു തരുന്നു: “എന്റെ വായിൽനി​ന്നു പുറ​പ്പെ​ടുന്ന എന്റെ വചനം ആയിരി​ക്കും; അതു വെറുതെ എന്റെ അടുക്ക​ലേക്കു മടങ്ങി​വ​രാ​തെ എനിക്കു ഇഷ്ടമു​ള്ളതു നിവർത്തി​ക്ക​യും ഞാൻ അയച്ച കാര്യം സാധി​പ്പി​ക്ക​യും ചെയ്യും.”—യെശയ്യാ​വു 55:11.

ദൈ​വോ​ദ്ദേ​ശ്യ​ത്തി​നു തടസ്സം നേരിട്ടു, മാറ്റം വന്നിട്ടില്ല

ആദാമും ഹവ്വായും മനപ്പൂർവം അവിശ്വ​സ്‌തത കാട്ടു​ക​യും അവർ ഏദെൻ തോട്ട​ത്തിൽനി​ന്നു പുറന്ത​ള്ള​പ്പെ​ടു​ക​യും ചെയ്‌ത​തോ​ടെ, ഒരു പറുദീ​സാ ഭൂമി എന്ന ദൈ​വോ​ദ്ദേ​ശ്യം അവരെ കൂടാതെ നിവൃ​ത്തി​യാ​കു​മെന്നു വ്യക്തമാ​യി. എന്നിരു​ന്നാ​ലും, അവരുടെ സന്തതി​ക​ളിൽ ചിലർ തന്റെ ആദിമ കൽപ്പന നടപ്പാ​ക്കു​മെന്ന്‌ യഹോവ അപ്പോൾത്തന്നെ സൂചി​പ്പി​ക്കു​ക​യു​ണ്ടാ​യി. അതിന്‌ കുറെ സമയം, അനവധി നൂറ്റാ​ണ്ടു​കൾ പോലും ആവശ്യ​മാ​യി​രു​ന്നു എന്നതു സത്യം​തന്നെ. എന്നാൽ, ആദാമും ഹവ്വായും പൂർണ​ത​യിൽ തുടർന്നി​രു​ന്നെ​ങ്കിൽ പോലും ആദിമ കൽപ്പന നടപ്പാ​ക്കാൻ എത്രമാ​ത്രം സമയ​മെ​ടു​ക്കു​മാ​യി​രു​ന്നു എന്നതിനു യാതൊ​രു സൂചന​യും ഇല്ല. ക്രിസ്‌തു​യേ​ശു​വി​ന്റെ സഹസ്രാബ്ദ വാഴ്‌ച​യു​ടെ ഒടുവിൽ—ഇന്നേക്ക്‌ ആയിര​ത്തിൽപ്പരം വർഷങ്ങൾ കഴിയു​മ്പോൾ—ഏദെനി​ലെ പറുദീസ അവസ്ഥ ഭൂമി​യി​ലെ​ങ്ങും വ്യാപി​ക്കു​ക​യും ആദിമ മാനുഷ ജോടി​യു​ടെ സമാധാന സ്‌നേ​ഹി​ക​ളും സന്തുഷ്ട​രു​മായ പിൻഗാ​മി​ക​ളാൽ ഭൗമ ഗ്രഹം നിവസി​ക്ക​പ്പെ​ടു​ക​യും ചെയ്യും എന്നതാണ്‌ വസ്‌തുത. പരാജ​യ​പ്പെ​ടാ​നാ​കാത്ത ഉദ്ദേശ്യ​ങ്ങ​ളുള്ള ഒരുവൻ എന്നനി​ല​യി​ലുള്ള യഹോ​വ​യു​ടെ പ്രാപ്‌തി തീർച്ച​യാ​യും എന്നെ​ന്നേ​ക്കു​മാ​യി സംസ്ഥാ​പി​ക്ക​പ്പെ​ടും.

വളരെ​ക്കാ​ലം മുമ്പു ദൈവം നിശ്വ​സ്‌ത​മാ​ക്കിയ പുളകം കൊള്ളി​ക്കുന്ന പ്രവച​നങ്ങൾ അന്നു നിവൃ​ത്തി​യേ​റും. യെശയ്യാ​വു 11:6-9 പോ​ലെ​യുള്ള തിരു​വെ​ഴു​ത്തു​കൾ മഹോ​ന്ന​ത​മാം വിധം നിവൃ​ത്തി​യേ​റും: “ചെന്നായി കുഞ്ഞാ​ടി​നോ​ടു​കൂ​ടെ പാർക്കും; പുള്ളി​പ്പു​ലി കോലാ​ട്ടു​കു​ട്ടി​യോ​ടു​കൂ​ടെ കിടക്കും; പശുക്കി​ടാ​വും ബാലസിം​ഹ​വും തടിപ്പിച്ച മൃഗവും ഒരുമി​ച്ചു പാർക്കും; ഒരു ചെറി​യ​കു​ട്ടി അവയെ നടത്തും. പശു കരടി​യോ​ടു​കൂ​ടെ മേയും; അവയുടെ കുട്ടികൾ ഒരുമി​ച്ചു കിടക്കും; സിംഹം കാള എന്നപോ​ലെ വൈ​ക്കോൽ തിന്നും. മുലകു​ടി​ക്കുന്ന ശിശു സർപ്പത്തി​ന്റെ പോതി​ങ്കൽ കളിക്കും; മുലകു​ടി​മാ​റിയ പൈതൽ അണലി​യു​ടെ പൊത്തിൽ കൈ ഇടും. സമുദ്രം വെള്ളം​കൊ​ണ്ടു നിറഞ്ഞി​രി​ക്കു​ന്ന​തു​പോ​ലെ ഭൂമി യഹോ​വ​യു​ടെ പരിജ്ഞാ​നം​കൊ​ണ്ടു പൂർണ്ണ​മാ​യി​രി​ക്ക​യാൽ എന്റെ വിശു​ദ്ധ​പർവ്വ​ത​ത്തിൽ എങ്ങും ഒരു ദോഷ​മോ നാശമോ ആരും ചെയ്‌ക​യില്ല.”

അനാ​രോ​ഗ്യ​വും മാരക​മായ രോഗ​ങ്ങ​ളും കഴിഞ്ഞ​കാല സംഗതി​ക​ളാ​യി​രി​ക്കും, മരണം പോലും. ബൈബി​ളി​ലെ അവസാന പുസ്‌ത​ക​ത്തിൽ കാണുന്ന പിൻവ​രുന്ന ലളിത​മായ വാക്കു​ക​ളെ​ക്കാൾ വ്യക്തമാ​യി അവയെ എങ്ങനെ​യാണ്‌ വിവരി​ക്കാൻ കഴിയുക? “ഇതാ, മനുഷ്യ​രോ​ടു​കൂ​ടെ ദൈവ​ത്തി​ന്റെ കൂടാരം; അവൻ അവരോ​ടു​കൂ​ടെ വസിക്കും; അവർ അവന്റെ ജനമാ​യി​രി​ക്കും; ദൈവം താൻ അവരുടെ ദൈവ​മാ​യി അവരോ​ടു​കൂ​ടെ ഇരിക്കും. അവൻ അവരുടെ കണ്ണിൽനി​ന്നു കണ്ണുനീർ എല്ലാം തുടെ​ച്ചു​ക​ള​യും. ഇനി മരണം ഉണ്ടാക​യില്ല; ദുഃഖ​വും മുറവി​ളി​യും കഷ്ടതയും ഇനി ഉണ്ടാക​യില്ല; ഒന്നാമ​ത്തേതു [“പഴയ കാര്യങ്ങൾ,” NW] കഴിഞ്ഞു​പോ​യി.”—വെളി​പ്പാ​ടു 21:3-5.

അതേ, നമുക്ക്‌ ആത്മവി​ശ്വാ​സ​മു​ള്ളവർ ആയിരി​ക്കാം. നമ്മുടെ മനോ​ഹ​ര​മായ ഭൗമ ഗ്രഹം നിലനിൽക്കാ​നു​ള്ള​താണ്‌. ഈ ദുഷ്ട വ്യവസ്ഥി​തി, ഭൂമിയെ നശിപ്പി​ക്കുന്ന അതിന്റെ സമസ്‌ത നടപടി​ക​ളോ​ടും ഒപ്പം അവസാ​നി​ക്കു​മ്പോൾ അതിജീ​വി​ക്കാ​നുള്ള പദവി നിങ്ങൾക്ക്‌ ഉണ്ടായി​രി​ക്കട്ടെ. ദൈവം നിർമി​ക്കുന്ന ശുദ്ധമായ പുതിയ ലോകം സമീപ​സ്ഥ​മാണ്‌. പുനരു​ത്ഥാന അത്ഭുത​ത്താൽ പ്രിയ​പ്പെട്ട അനേകർ മരണത്തിൽനിന്ന്‌ ഉണർത്ത​പ്പെ​ടും. (യോഹ​ന്നാൻ 5:28, 29) തീർച്ച​യാ​യും നമ്മുടെ ഭൂമി നിലനിൽക്കാ​നു​ള്ള​താണ്‌. നമുക്ക്‌ അതിൽ വസിക്കാ​നും അത്‌ ആസ്വദി​ക്കാ​നും കഴിയും.