ആദാമും ഹവ്വായും പാപം ചെയ്യു​മെന്ന്‌ ദൈവ​ത്തിന്‌ അറിയാ​മാ​യി​രു​ന്നോ?

പലരും അറിയാൻ ആഗ്രഹി​ക്കുന്ന ഒരു കാര്യ​മാ​ണത്‌. ദൈവം ദുഷ്ടത അനുവ​ദി​ച്ചി​രി​ക്കു​ന്നത്‌ എന്തു​കൊ​ണ്ടാ​ണെന്നു വിശദീ​ക​രി​ക്കു​മ്പോൾ മിക്കവാ​റും മേൽപ്പറഞ്ഞ ചോദ്യം ഉയർന്നു​വ​രും. ‘സർവവും അറിയു​ന്ന​വ​നാ​ണ​ല്ലോ ദൈവം.’ ആ സ്ഥിതിക്ക്‌, ആദാമും ഹവ്വായും പാപം ചെയ്യു​മെന്ന്‌ ദൈവ​ത്തിന്‌ അറിയാ​മാ​യി​രു​ന്നി​രി​ക്കണം എന്നാണ്‌ ചിലർ ചിന്തി​ക്കു​ന്നത്‌.

പൂർണ​രാ​യ ഈ ദമ്പതികൾ പാപം ചെയ്യു​മെന്ന്‌ ദൈവ​ത്തി​നു മുന്നമേ അറിയാ​മാ​യി​രു​ന്നെ​ങ്കിൽ, ദൈവ​ത്തെ​ക്കു​റിച്ച്‌ അത്‌ എന്തു ചിത്ര​മാണ്‌ നമുക്ക്‌ നൽകു​ന്നത്‌? നീതി​ബോ​ധ​മി​ല്ലാത്ത, സ്‌നേ​ഹ​ശൂ​ന്യ​നും കാപട്യ​ക്കാ​ര​നു​മായ ഒരു ദൈവം എന്നായി​രി​ക്കി​ല്ലേ? ദുരന്ത​പ​ര്യ​വ​സാ​യി​യാ​ണെന്ന്‌ അറിയാ​മാ​യി​രുന്ന ഒരു സാഹച​ര്യ​ത്തി​ലേക്ക്‌ ആദ്യമ​നു​ഷ്യ​ജോ​ഡി​യെ തള്ളിവി​ട്ടത്‌ ദൈവ​ത്തി​ന്റെ ഭാഗത്ത്‌ വലിയ ക്രൂര​ത​യാ​യി​പ്പോ​യി എന്ന്‌ അപലപി​ക്കു​ന്നു ചിലർ. അവരുടെ കണ്ണിലൂ​ടെ നോക്കി​യാൽ, പിന്നീ​ട​ങ്ങോട്ട്‌ ലോകത്ത്‌ നടമാ​ടിയ സകല തിന്മകൾക്കും ദുരി​ത​ങ്ങൾക്കും ദൈവ​മാണ്‌ കാരണ​ക്കാ​രൻ എന്നുവ​രും—കുറഞ്ഞ​പക്ഷം ഭാഗി​ക​മാ​യെ​ങ്കി​ലും. ഇനി, സ്രഷ്ടാ​വി​നെ ബുദ്ധി​ശൂ​ന്യ​നാ​യി ചിത്രീ​ക​രി​ക്കു​ന്ന​വ​രും കുറവല്ല.

ദൈവ​ത്തെ​ക്കു​റിച്ച്‌ തിരു​വെ​ഴു​ത്തു​കൾ വെളി​പ്പെ​ടു​ത്തുന്ന വസ്‌തു​ത​ക​ളു​മാ​യി ഈ ആരോ​പ​ണങ്ങൾ യോജി​ക്കു​ന്നു​ണ്ടോ? അതറി​യാൻ യഹോ​വ​യാം ദൈവ​ത്തി​ന്റെ സൃഷ്ടി​ക്രി​യ​ക​ളെ​യും അവന്റെ വ്യക്തി​ത്വ​ഗു​ണ​ങ്ങ​ളെ​യും കുറിച്ച്‌ ബൈബിൾ എന്താണു പറയു​ന്ന​തെന്ന്‌ നമുക്കു നോക്കാം.

“അതു എത്രയും നല്ലത്‌”

ആദ്യമ​നു​ഷ്യ​ജോ​ഡി ഉൾപ്പെ​ടെ​യുള്ള ഭൂമി​യി​ലെ സൃഷ്ടി​ക്രി​യ​ക​ളെ​ക്കു​റിച്ച്‌ ഉൽപ്പത്തി വിവരണം പറയു​ന്നത്‌ ഇങ്ങനെ​യാണ്‌: “താൻ ഉണ്ടാക്കി​യ​തി​നെ ഒക്കെയും ദൈവം നോക്കി, അതു എത്രയും നല്ലതു എന്നു കണ്ടു.” (ഉല്‌പത്തി 1:31) അതെ, പൂർണ​രാ​യാണ്‌ ദൈവം ആദാമി​നെ​യും ഹവ്വാ​യെ​യും സൃഷ്ടി​ച്ചത്‌. അവരുടെ ഭൗമിക വസതിക്ക്‌ തികച്ചും യോജിച്ച വിധത്തിൽ! യാതൊ​രു​വിധ അപാക​ത​ക​ളും കൂടാ​തെ​യാണ്‌ ദൈവം അവരെ സൃഷ്ടി​ച്ച​തെന്ന്‌ ഓർക്കണം. “എത്രയും നല്ലത്‌” എന്ന്‌ ദൈവം​തന്നെ സാക്ഷ്യ​പ്പെ​ടു​ത്തിയ ആ ഉത്തമസൃ​ഷ്ടി​കൾക്ക്‌ അവന്റെ പ്രതീ​ക്ഷ​യ്‌ക്കൊത്ത്‌ പ്രവർത്തി​ക്കാ​നുള്ള പ്രാപ്‌തി​യു​ണ്ടാ​യി​രു​ന്നു. മാത്രമല്ല, ‘ദൈവ​ത്തി​ന്റെ സ്വരൂ​പ​ത്തി​ലാണ്‌’ അവർ സൃഷ്ടി​ക്ക​പ്പെ​ട്ടത്‌. (ഉല്‌പത്തി 1:27) അതു​കൊ​ണ്ടു​തന്നെ, ജ്ഞാനം, വിശ്വ​സ്‌തത, നീതി, നന്മ തുടങ്ങിയ ദൈവി​ക​ഗു​ണങ്ങൾ പ്രതി​ഫ​ലി​പ്പി​ക്കാ​നുള്ള കഴിവ്‌ അവർക്കു​ണ്ടാ​യി​രു​ന്നു. ആ ദൈവിക ഗുണങ്ങ​ളാ​കട്ടെ, തങ്ങൾക്കു​തന്നെ പ്രയോ​ജനം ചെയ്യു​ന്ന​തും സ്വർഗീയ പിതാ​വി​നെ സന്തോ​ഷി​പ്പി​ക്കു​ന്ന​തു​മായ തീരു​മാ​ന​ങ്ങ​ളെ​ടു​ക്കാൻ അവരെ സഹായി​ക്കു​മാ​യി​രു​ന്നു.

ബുദ്ധി​ശ​ക്തി​യു​ള്ള, പൂർണ​രായ ഈ സൃഷ്ടി​കൾക്ക്‌ ദൈവം മറ്റൊരു പ്രാപ്‌തി​യും നൽകി​യി​രു​ന്നു, ഇച്ഛാസ്വാ​ത​ന്ത്ര്യം! അതായത്‌, തിര​ഞ്ഞെ​ടു​ക്കാ​നുള്ള സ്വാത​ന്ത്ര്യം. അതു​കൊ​ണ്ടു​തന്നെ റോ​ബോ​ട്ടു​ക​ളെ​പ്പോ​ലെ ആയിരു​ന്നില്ല അവർ. ദൈവത്തെ പ്രീതി​പ്പെ​ടു​ത്താൻ പ്രോ​ഗ്രാം ചെയ്യപ്പെട്ട വെറും പാവക​ള​ല്ലാ​യി​രു​ന്നു അവരെന്നു സാരം. ഒന്ന്‌ ആലോ​ചി​ച്ചു​നോ​ക്കൂ, എന്തായി​രി​ക്കും നിങ്ങളെ സന്തോ​ഷി​പ്പി​ക്കുക? യാതൊ​രു വികാ​ര​ങ്ങ​ളു​മി​ല്ലാ​തെ യാന്ത്രി​ക​മാ​യി വെച്ചു​നീ​ട്ടുന്ന ഒരു സമ്മാന​മാ​ണോ, അതോ സ്‌നേ​ഹ​ത്തി​ന്റെ തെളി​വാ​യി ഹൃദയ​പൂർവം നൽകുന്ന ഒരു സമ്മാന​മാ​ണോ? ആദാമി​ന്റെ​യും ഹവ്വായു​ടെ​യും കാര്യ​ത്തി​ലും അതു സത്യമാ​യി​രു​ന്നു. അവർ മനസ്സോ​ടെ ദൈവത്തെ അനുസ​രി​ച്ചി​രു​ന്നെ​ങ്കിൽ അത്‌ അവനെ വളരെ​യേറെ സന്തോ​ഷി​പ്പി​ക്കു​മാ​യി​രു​ന്നു! ഇച്ഛാസ്വാ​ത​ന്ത്ര്യം ഉള്ളവരെന്ന നിലയ്‌ക്ക്‌, പൂർണ​മ​ന​സ്സോ​ടെ തങ്ങളുടെ സ്രഷ്ടാ​വി​നെ അനുസ​രി​ക്കാൻ അവർക്കു വേണ​മെ​ങ്കിൽ തീരു​മാ​നി​ക്കാ​മാ​യി​രു​ന്നു. യാന്ത്രി​ക​മാ​യി​ട്ടല്ല, അവനോ​ടുള്ള സ്‌നേ​ഹം​നി​മി​ത്തം.—ആവർത്ത​ന​പു​സ്‌തകം 30:19, 20.

നീതി​നി​ഷ്‌ഠ​നും നന്മനി​റ​ഞ്ഞ​വ​നും

യഹോ​വ​യു​ടെ മഹനീയ ഗുണങ്ങ​ളെ​പ്പറ്റി ബൈബിൾ പറയു​ന്നുണ്ട്‌. ദൈവത്തെ ഒരു​പ്ര​കാ​ര​ത്തി​ലും തിന്മയു​മാ​യി ബന്ധപ്പെ​ടു​ത്താ​നാ​വി​ല്ലെന്ന്‌ ആ ഗുണങ്ങൾ നമ്മെ ബോധ്യ​പ്പെ​ടു​ത്തും. യഹോവ “നീതി​യും ന്യായ​വും ഇഷ്ടപ്പെ​ടു​ന്നു” എന്ന്‌ സങ്കീർത്തനം 33:5 പറയുന്നു. “ദോഷ​ങ്ങ​ളാൽ ദൈവത്തെ ആർക്കും പരീക്ഷി​ക്കുക സാധ്യമല്ല; ദൈവ​വും ആരെയും പരീക്ഷി​ക്കു​ന്നില്ല” എന്ന്‌ യാക്കോബ്‌ 1:13-ഉം സാക്ഷ്യ​പ്പെ​ടു​ത്തു​ന്നു. ദൈവം ആദാമി​നു മുന്നറി​യി​പ്പു നൽകി എന്നതും, ദൈവം നീതി​മാ​നും പരിഗ​ണ​ന​യു​ള്ള​വ​നും ആയിരു​ന്നു എന്ന വസ്‌തു​ത​യി​ലേക്കു വിരൽചൂ​ണ്ടു​ന്നു. ദൈവം ആദാമി​നോ​ടു പറഞ്ഞു: “തോട്ട​ത്തി​ലെ സകലവൃ​ക്ഷ​ങ്ങ​ളു​ടെ​യും ഫലം നിനക്കു ഇഷ്ടം​പോ​ലെ തിന്നാം. എന്നാൽ നന്മതി​ന്മ​ക​ളെ​ക്കു​റി​ച്ചുള്ള അറിവി​ന്റെ വൃക്ഷത്തിൻ ഫലം തിന്നരു​തു; തിന്നുന്ന നാളിൽ നീ മരിക്കും.” (ഉല്‌പത്തി 2:16, 17) ആ ആദ്യദ​മ്പ​തി​ക​ളു​ടെ മുമ്പാകെ രണ്ടു വഴിക​ളു​ണ്ടാ​യി​രു​ന്നു: ഒന്ന്‌ നിത്യ​ജീ​വൻ; മറ്റേത്‌ മരണം. അവർ പാപം ചെയ്യു​മെ​ന്നും അതിന്റെ ദുരന്ത​ഫ​ലങ്ങൾ ഏറ്റുവാ​ങ്ങു​മെ​ന്നും ദൈവ​ത്തി​നു നേരത്തേ അറിയാ​മാ​യി​രു​ന്നെ​ങ്കിൽ ഇങ്ങനെ​യൊ​രു തിര​ഞ്ഞെ​ടുപ്പ്‌ അവർക്കു മുമ്പാകെ വെക്കു​ന്ന​തിൽ എന്തു യുക്തി​യാ​ണു​ള്ളത്‌? അത്‌ കാപട്യ​മാ​യി​രി​ക്കി​ല്ലേ? ശരി ചെയ്യാ​നുള്ള അവസരം അവർക്കു മുമ്പിൽ ഇല്ലായി​രു​ന്നെ​ങ്കിൽ, “ജീവനും മരണവും” അവരുടെ മുമ്പാകെ വെച്ചി​രി​ക്കു​ന്നു എന്ന്‌ ദൈവ​ത്തിന്‌ എങ്ങനെ പറയാ​നാ​കും? അതും ‘നീതി​യും ന്യായ​വും ഇഷ്ടപ്പെ​ടുന്ന’ ഒരു ദൈവ​ത്തിന്‌?

യഹോവ നന്മ നിറഞ്ഞ​വ​നാ​ണെ​ന്നും തിരു​വെ​ഴു​ത്തു​കൾ പറയു​ന്നുണ്ട്‌. (സങ്കീർത്തനം 31:19) ദൈവ​ത്തി​ന്റെ നന്മ എടുത്തു​കാ​ട്ടി​ക്കൊണ്ട്‌ യേശു ഇങ്ങനെ പറയു​ക​യു​ണ്ടാ​യി: “മകൻ അപ്പം ചോദി​ച്ചാൽ നിങ്ങളിൽ ആരെങ്കി​ലും അവനു കല്ല്‌ കൊടു​ക്കു​മോ? മീൻ ചോദി​ച്ചാൽ അവനു പാമ്പിനെ കൊടു​ക്കു​മോ? മക്കൾക്കു നല്ല ദാനങ്ങൾ നൽകാൻ ദോഷി​ക​ളായ നിങ്ങൾക്ക്‌ അറിയാ​മെ​ങ്കിൽ, സ്വർഗ​സ്ഥ​നായ നിങ്ങളു​ടെ പിതാവ്‌ തന്നോടു ചോദി​ക്കു​ന്ന​വർക്ക്‌ നന്മകൾ എത്രയ​ധി​കം നൽകും!” (മത്തായി 7:9-11) അതെ, തന്റെ സൃഷ്ടി​കൾക്ക്‌ “നന്മകൾ” ധാരാ​ള​മാ​യി നൽകു​ന്ന​വ​നാണ്‌ ദൈവം. മനുഷ്യൻ സൃഷ്ടി​ക്ക​പ്പെ​ട്ടി​രി​ക്കുന്ന വിധവും ദൈവം അവർക്കാ​യി ഒരുക്കിയ പറുദീ​സാ​ഭ​വ​ന​വും ദൈവ​ത്തി​ന്റെ നന്മയുടെ സാക്ഷ്യ​പ​ത്ര​ങ്ങ​ളാണ്‌. അങ്ങനെ​യാ​ണെ​ന്നി​രി​ക്കെ, തിരി​ച്ചെ​ടു​ക്കു​ക​യെന്ന ഉദ്ദേശ്യ​ത്തിൽ, മനോ​ഹ​ര​മായ ഒരു പറുദീസ വെച്ചു​നീ​ട്ടി ആ മനുഷ്യ​രെ മോഹി​പ്പി​ക്കാൻ ദൈവം ശ്രമി​ക്കു​മോ? നന്മയുടെ പര്യാ​യ​മായ ഒരു ദൈവ​ത്തിന്‌ അങ്ങനെ ചെയ്യാ​നാ​കു​മോ? അചിന്ത​നീ​യം! അല്ലേ? മനുഷ്യ​ന്റെ അനുസ​ര​ണ​ക്കേ​ടിന്‌ നീതി​യു​ടെ​യും നന്മയു​ടെ​യും മൂർത്തി​മ​ദ്‌ഭാ​വ​മായ അവന്റെ സ്രഷ്ടാ​വി​നെ ഒരിക്ക​ലും പഴിചാ​രാ​നാ​വില്ല എന്നല്ലേ ഇതും കാണി​ക്കു​ന്നത്‌?

“ഏകജ്ഞാനി”

യഹോ​വ​യു​ടെ ജ്ഞാന​ത്തെ​ക്കു​റി​ച്ചും തിരു​വെ​ഴു​ത്തു​കൾ പറയു​ന്നുണ്ട്‌. ‘ഏകജ്ഞാ​നി​യായ ദൈവം’ എന്നാണ്‌ ബൈബിൾ അവനെ വിശേ​ഷി​പ്പി​ക്കു​ന്നത്‌. (റോമർ 16:27) അതിരു​ക​ളി​ല്ലാത്ത ദിവ്യ​ജ്ഞാ​ന​ത്തി​ന്റെ ഒട്ടേറെ തെളി​വു​കൾ നേരിട്ടു കണ്ടവരാണ്‌ സ്വർഗ​ത്തി​ലെ ദൂതന്മാർ. ദൈവ​ത്തി​ന്റെ ഭൗമി​ക​സൃ​ഷ്ടി​കൾ കണ്ട്‌ ദൈവ​പു​ത്ര​ന്മാർ ‘സന്തോ​ഷി​ച്ചാർത്തു’ എന്ന്‌ രേഖ പറയുന്നു. (ഇയ്യോബ്‌ 38:4-7) ഏദെനിൽ ദൈവം ചെയ്‌ത ഓരോ കാര്യ​വും ഈ ദൂതന്മാർ അതീവ​താ​ത്‌പ​ര്യ​ത്തോ​ടെ നിരീ​ക്ഷി​ച്ചു​കാ​ണും. ഭയാദ​ര​വു​ണർത്തുന്ന ഈ അത്ഭുത​പ്ര​പ​ഞ്ച​വും അതിലെ വിസ്‌മ​യ​ഭ​രി​ത​ങ്ങ​ളായ സൃഷ്ടി​ക​ളും ഉളവാ​ക്കിയ മഹാജ്ഞാ​നി​യായ ഒരു ദൈവം, തന്റെ ദൂതപു​ത്ര​ന്മാർ കണ്ടുനിൽക്കെ പരാജ​യ​പ്പെ​ടാൻവേ​ണ്ടി​മാ​ത്രം രണ്ടു മനുഷ്യ​സൃ​ഷ്ടി​കളെ അസ്‌തി​ത്വ​ത്തിൽ കൊണ്ടു​വ​രു​മാ​യി​രു​ന്നോ? ജ്ഞാനി​യായ ദൈവം ഇത്തര​മൊ​രു ദുരന്ത​നാ​ടകം മുൻകൂ​ട്ടി നിശ്ചയി​ച്ചു എന്നു ചിന്തി​ക്കു​ന്ന​തു​തന്നെ ബുദ്ധി​ശൂ​ന്യ​മല്ലേ?

‘എന്തൊ​ക്കെ​യാ​യാ​ലും, മഹാജ്ഞാ​നി​യായ പ്രപഞ്ച​കർത്താവ്‌ ഇക്കാര്യം അറിയാ​തെ പോകു​മോ?’ എന്ന്‌ ചിലർ ആശ്ചര്യ​പ്പെ​ട്ടേ​ക്കാം. “ആരംഭ​ത്തി​ങ്കൽ തന്നേ അവസാ​ന​വും” അറിയാൻ ജ്ഞാനി​യായ നമ്മുടെ ദൈവ​ത്തി​നു സാധി​ക്കും എന്നതു നിഷേ​ധി​ക്കു​ന്നില്ല. (യെശയ്യാ​വു 46:9, 10) എന്നാൽ, മുൻകൂ​ട്ടി അറിയാ​നുള്ള പ്രാപ്‌തി​യുണ്ട്‌ എന്നതു​കൊ​ണ്ടു​മാ​ത്രം ദൈവം എല്ലായ്‌പോ​ഴും അത്‌ ഉപയോ​ഗി​ക്ക​ണ​മെ​ന്നില്ല. ഉദാഹ​ര​ണ​ത്തിന്‌, സർവശ​ക്ത​നാ​ണെ​ന്നു​ക​രു​തി ദൈവം എല്ലായ്‌പോ​ഴും തന്റെ ശക്തി പൂർണ​മാ​യി ഉപയോ​ഗി​ക്കാ​റി​ല്ല​ല്ലോ. മുൻകൂ​ട്ടി അറിയാ​നുള്ള പ്രാപ്‌തി​യു​ടെ കാര്യ​വും അങ്ങനെ​തന്നെ; വിവേ​ച​ന​യോ​ടെ മാത്രമേ യഹോവ അത്‌ ഉപയോ​ഗി​ക്കാ​റു​ള്ളൂ. ഉചിത​മായ സാഹച​ര്യ​ങ്ങ​ളിൽ, ആവശ്യ​മാ​യി​രി​ക്കു​മ്പോൾമാ​ത്രം!

മുൻനിർണ​യി​ക്കാ​നുള്ള പ്രാപ്‌തി ദൈവം വിവേ​ച​ന​യോ​ടെ ഉപയോ​ഗി​ക്കു​ന്നത്‌ എങ്ങനെ​യെന്ന്‌ അറിയാൻ ഒരു ദൃഷ്ടാന്തം ശ്രദ്ധി​ക്കാം. റെക്കോർഡു ചെയ്‌ത ഒരു സ്‌പോർട്‌സ്‌ പരിപാ​ടി​യു​ടെ വീഡി​യോ കാണുന്ന ഒരാ​ളെ​ക്കു​റി​ച്ചു ചിന്തി​ക്കുക. വേണ​മെ​ങ്കിൽ അയാൾക്ക്‌ കളിയു​ടെ അവസാ​ന​ഭാ​ഗം ആദ്യം കാണാം. പക്ഷേ അയാൾ അങ്ങനെ ചെയ്യണ​മെന്നു നിർബ​ന്ധ​മില്ല. കളി ആദ്യം​മു​തൽ കാണാൻ അയാൾ തീരു​മാ​നി​ച്ചാൽ ആർക്ക്‌ അയാളെ തെറ്റു പറയാ​നാ​കും? ആദാമി​ന്റെ​യും ഹവ്വായു​ടെ​യും കാര്യ​ത്തിൽ, നമ്മുടെ സ്രഷ്ടാ​വും അതായി​രി​ക്കണം ചെയ്‌തി​രി​ക്കുക. തന്റെ ഭൗമിക മക്കൾ എങ്ങനെ പ്രവർത്തി​ക്കു​മെന്ന്‌ കാത്തി​രു​ന്നു കാണാൻ ദൈവം തീരു​മാ​നി​ച്ചു.

യഹോ​വ​യാം ദൈവം റോ​ബോ​ട്ടു​ക​ളെ​പ്പോ​ലെയല്ല മനുഷ്യ​രെ സൃഷ്ടി​ച്ച​തെന്ന്‌ അൽപ്പം മുമ്പു നാം കണ്ടല്ലോ. ഇച്ഛാസ്വാ​ത​ന്ത്ര്യ​മെന്ന അത്ഭുത​പ്രാ​പ്‌തി സഹിത​മാണ്‌ അവരെ സൃഷ്ടി​ച്ചത്‌. ദൈവ​ത്തിന്‌ അവരോ​ടുള്ള സ്‌നേ​ഹ​ത്തി​ന്റെ തെളി​വാ​യി​രു​ന്നു അത്‌! ശരിയായ വിധത്തിൽ പ്രവർത്തി​ച്ചു​കൊണ്ട്‌ ദൈവ​ത്തോട്‌ സ്‌നേ​ഹ​വും കൃതജ്ഞ​ത​യും അനുസ​ര​ണ​വും കാണി​ക്കാൻ അവർക്കു സാധി​ക്കു​മാ​യി​രു​ന്നു. അങ്ങനെ​യൊ​രു ഗതി അവർക്കു​ത​ന്നെ​യും സ്വർഗീയ പിതാ​വായ യഹോ​വ​യ്‌ക്കും സന്തോഷം കൈവ​രു​ത്തു​മാ​യി​രു​ന്നു.—സദൃശ​വാ​ക്യ​ങ്ങൾ 27:11; യെശയ്യാ​വു 48:18.

മുൻകൂ​ട്ടി അറിയാ​നുള്ള പ്രാപ്‌തി ദൈവം ഉപയോ​ഗി​ക്കാ​തി​രുന്ന പല സന്ദർഭ​ങ്ങ​ളെ​ക്കു​റിച്ച്‌ തിരു​വെ​ഴു​ത്തു​കൾ പറയു​ന്നുണ്ട്‌. ഉദാഹ​ര​ണ​ത്തിന്‌, യഹോ​വ​യു​ടെ വിശ്വസ്‌ത ദാസനായ അബ്രാ​ഹാം ഉൾപ്പെട്ട ഒരു സംഭവം പരിചി​ന്തി​ക്കാം. ഏകപു​ത്രനെ യാഗം കഴിക്കാൻ യഹോവ ആവശ്യ​പ്പെ​ട്ടി​രി​ക്കു​ന്ന​താണ്‌ സന്ദർഭം. മകനെ കൊല്ലാൻ തയ്യാറാ​യി അബ്രാ​ഹാം കത്തി ഉയർത്തിയ സമയത്ത്‌ യഹോവ എന്താണു പറഞ്ഞ​തെന്നു ശ്രദ്ധി​ക്കുക: “നിന്റെ ഏകജാ​ത​നായ മകനെ തരുവാൻ നീ മടിക്കായ്‌ക കൊണ്ടു നീ ദൈവത്തെ ഭയപ്പെ​ടു​ന്നു എന്നു ഞാൻ ഇപ്പോൾ അറിയു​ന്നു.” (ഉല്‌പത്തി 22:12) അതെ, ഇക്കാര്യ​ത്തിൽ അബ്രാ​ഹാ​മി​ന്റെ നിലപാട്‌ മുൻകൂ​ട്ടി അറിയാൻ യഹോവ ശ്രമി​ച്ചില്ല എന്ന്‌ വ്യക്തം. ഇനി, ചിലരു​ടെ ദുഷ്‌പെ​രു​മാ​റ്റം യഹോ​വ​യു​ടെ ഹൃദയത്തെ വേദനി​പ്പി​ച്ച​താ​യി തിരു​വെ​ഴു​ത്തു​കൾ രേഖ​പ്പെ​ടു​ത്തു​ന്നുണ്ട്‌. അതൊക്കെ മുൻകൂ​ട്ടി അറിഞ്ഞി​രു​ന്നെ​ങ്കിൽ ദൈവ​ത്തിന്‌ അത്ര വേദന തോന്നു​മാ​യി​രു​ന്നോ?—സങ്കീർത്തനം 78:40, 41; 1 രാജാ​ക്ക​ന്മാർ 11:9, 10.

ഇതുവരെ ചിന്തിച്ച വസ്‌തു​തകൾ എന്തു നിഗമ​ന​ത്തി​ലാണ്‌ നമ്മെ കൊ​ണ്ടെ​ത്തി​ക്കു​ന്നത്‌? ആദാമും ഹവ്വായും പാപം ചെയ്യു​മെന്ന്‌ ദൈവം മുൻകൂ​ട്ടി അറിഞ്ഞി​രു​ന്നില്ല എന്ന നിഗമ​ന​ത്തിൽ. അതെ, നമ്മുടെ ആദ്യമാ​താ​പി​താ​ക്കളെ കഥാപാ​ത്ര​ങ്ങ​ളാ​ക്കി, ഒരു ദുരന്ത​നാ​ടകം സംവി​ധാ​നം ചെയ്‌ത്‌ പുനര​വ​ത​രി​പ്പി​ക്കാൻവേ​ണ്ടും ബുദ്ധി​ശൂ​ന്യ​നല്ല നമ്മുടെ സ്രഷ്ടാവ്‌!

“ദൈവം സ്‌നേ​ഹ​മാ​കു​ന്നു”

മാനവ​രാ​ശി​യെ പാപത്തി​ലേ​ക്കും മരണത്തി​ലേ​ക്കും തള്ളിവിട്ട ഏദെനി​ലെ മത്സരം തുടങ്ങി​വെ​ച്ചത്‌ ദൈവ​ത്തി​ന്റെ എതിരാ​ളി​യായ സാത്താ​നാണ്‌. അങ്ങനെ സാത്താൻ ഒരു “കൊല​പാ​തകി”യായി​ത്തീർന്നു! “ഭോഷ്‌കാ​ളി​യും ഭോഷ്‌കി​ന്റെ അപ്പനും” ആയിത്തീർന്നു! (യോഹ​ന്നാൻ 8:44) ഗൂഢോ​ദ്ദേ​ശ്യ​ങ്ങ​ളാൽ വഴി​തെ​റ്റി​ക്ക​പ്പെട്ട അവൻ സ്‌നേ​ഹ​വാ​നായ നമ്മുടെ സ്രഷ്ടാ​വി​ന്റെ ആന്തരത്തെ ചോദ്യം​ചെ​യ്‌തു; അവനെ​തി​രെ വ്യാജാ​രോ​പ​ണങ്ങൾ ഉന്നയിച്ചു. അങ്ങനെ, മനുഷ്യ​ന്റെ പാപത്തി​ന്റെ ഉത്തരവാ​ദി​ത്വം യഹോ​വ​യു​ടെ​മേൽ കെട്ടി​വെ​ക്കാ​നാണ്‌ അവൻ ശ്രമി​ക്കു​ന്നത്‌.

ആദാമും ഹവ്വായും പാപം ചെയ്യു​മെന്ന കാര്യം മുൻകൂ​ട്ടി കാണാ​തി​രി​ക്കാൻ യഹോ​വയെ പ്രേരി​പ്പിച്ച മറ്റൊരു ഘടകമാണ്‌—വാസ്‌ത​വ​ത്തിൽ ഏറ്റവും ശക്തമായ ഘടകമാണ്‌—സ്‌നേഹം. ദൈവ​ത്തി​ന്റെ വ്യക്തി​ത്വ​ത്തി​ന്റെ മുഖ്യ​സ​വി​ശേ​ഷ​ത​യാണ്‌ അത്‌. “ദൈവം സ്‌നേ​ഹ​മാ​കു​ന്നു” എന്ന്‌ 1 യോഹ​ന്നാൻ 4:8 പറയുന്നു. മറ്റുള്ള​വ​രു​ടെ ദോഷ​ങ്ങളല്ല, നന്മ കാണാ​നാണ്‌ സ്‌നേഹം ശ്രമി​ക്കു​ന്നത്‌. അതെ, ആദ്യമ​നു​ഷ്യ​ജോ​ഡി​യോ​ടു സ്‌നേ​ഹ​മു​ണ്ടാ​യി​രുന്ന യഹോവ അവർക്കു നല്ലതു വരാനാണ്‌ ആഗ്രഹി​ച്ചത്‌.

ബുദ്ധി​ശൂ​ന്യ​മാ​യ ഒരു തിര​ഞ്ഞെ​ടു​പ്പു നടത്താൻ ആദാമി​നും ഹവ്വായ്‌ക്കും കഴിയു​മാ​യി​രു​ന്നെ​ങ്കി​ലും, തന്റെ മക്കൾ അങ്ങനെ​യൊ​രു വഴി തിര​ഞ്ഞെ​ടു​ക്കു​മെന്നു ചിന്തി​ക്കാൻ, അവരെ സംശയി​ക്കാൻ ദൈവ​ത്തി​ന്റെ സ്‌നേഹം അവനെ അനുവ​ദി​ച്ചില്ല. അവർക്ക്‌ ആവശ്യ​മാ​യ​തെ​ല്ലാം യഹോവ നൽകി​യി​രു​ന്നു. അവർ അറി​യേ​ണ്ട​തെ​ല്ലാം അവരെ അറിയി​ക്കു​ക​യും ചെയ്‌തി​രു​ന്നു. ആ സ്ഥിതിക്ക്‌, ആദാമും ഹവ്വായും മനസ്സോ​ടെ തന്നെ അനുസ​രി​ക്കു​മെന്ന്‌ ദൈവം ചിന്തി​ച്ചെ​ങ്കിൽ അതു ന്യായ​മല്ലേ? അബ്രാ​ഹാ​മി​നെ​യും ഇയ്യോ​ബി​നെ​യും ദാനീ​യേ​ലി​നെ​യും പോലുള്ള അപൂർണ മനുഷ്യർക്കു​പോ​ലും ദൈവ​ത്തോ​ടു വിശ്വ​സ്‌തത കാണി​ക്കാൻ കഴി​ഞ്ഞെ​ങ്കിൽ, പൂർണ​രാ​യി​രുന്ന ആദാമി​നും ഹവ്വായ്‌ക്കും അത്‌ സാധി​ക്കു​മാ​യി​രു​ന്നു; ദൈവ​ത്തിന്‌ അത്‌ അറിയാ​മാ​യി​രു​ന്നു.

“ദൈവ​ത്തി​നു സകലവും സാധ്യം” എന്ന്‌ യേശു ഒരിക്കൽ പറയു​ക​യു​ണ്ടാ​യി. (മത്തായി 19:26) എത്ര ആശ്വാ​സ​ക​ര​മായ വാക്കുകൾ! യഹോ​വ​യു​ടെ സ്‌നേ​ഹ​വും നീതി, ജ്ഞാനം, ശക്തി തുടങ്ങിയ മറ്റു പ്രമുഖ ഗുണങ്ങ​ളും കണക്കി​ലെ​ടു​ക്കു​മ്പോൾ നമുക്ക്‌ ഒരു കാര്യം ബോധ്യ​മാ​കും: പാപത്തി​ന്റെ​യും മരണത്തി​ന്റെ​യും സകല ദൂഷ്യ​ഫ​ല​ങ്ങ​ളും ഇല്ലായ്‌മ​ചെ​യ്യാൻ ദൈവ​ത്തി​നു സാധി​ക്കും, അവൻ അതു ചെയ്യും!—വെളി​പാട്‌ 21:3-5.

ആദാമും ഹവ്വായും പാപം ചെയ്യു​മെന്ന്‌ ദൈവ​ത്തിന്‌ അറിയാ​മാ​യി​രു​ന്നോ എന്ന ചോദ്യ​ത്തിന്‌ ഇപ്പോൾ ഉത്തരം കിട്ടി​ക്കാ​ണു​മ​ല്ലോ. മനുഷ്യ​ന്റെ അനുസ​ര​ണ​ക്കേ​ടും അതിന്റെ ഭവിഷ്യ​ത്തു​ക​ളും തന്നെ വേദനി​പ്പി​ച്ച​പ്പോ​ഴും ദൈവ​ത്തിന്‌ ഒരു കാര്യം അറിയാ​മാ​യി​രു​ന്നു: താത്‌കാ​ലി​ക​മായ ഈ സംഭവ​വി​കാ​സം ഭൂമി​യെ​യും മനുഷ്യ​നെ​യും സംബന്ധിച്ച തന്റെ നിത്യോ​ദ്ദേ​ശ്യ​ത്തി​ന്റെ നിവൃ​ത്തി​യെ യാതൊ​രു പ്രകാ​ര​ത്തി​ലും ബാധി​ക്കു​ക​യില്ല എന്ന്‌. ആ മഹനീയ ഉദ്ദേശ്യ​ത്തെ​ക്കു​റി​ച്ചും അതിന്റെ സാക്ഷാ​ത്‌കാ​ര​ത്തിൽനിന്ന്‌ വ്യക്തി​പ​ര​മാ​യി പ്രയോ​ജനം നേടാൻ എന്തു​ചെ​യ്യണം എന്നതി​നെ​ക്കു​റി​ച്ചും അറിയാൻ ഞങ്ങൾ നിങ്ങളെ ക്ഷണിക്കു​ക​യാണ്‌!a

[അടിക്കു​റിപ്പ്‌]

[12-ാം പേജിലെ ആകർഷ​ക​വാ​ക്യം]

യഹോവയാം ദൈവം റോ​ബോ​ട്ടു​ക​ളെ​പ്പോ​ലെയല്ല മനുഷ്യ​രെ സൃഷ്ടി​ച്ചത്‌

[13-ാം പേജിലെ ആകർഷ​ക​വാ​ക്യം]

ആദാമിനും ഹവ്വായ്‌ക്കും വിശ്വ​സ്‌ത​രാ​യി​രി​ക്കാൻ കഴിയു​മാ​യി​രു​ന്നെന്ന്‌ ദൈവ​ത്തിന്‌ അറിയാ​മാ​യി​രു​ന്നു