Photo by Zhai Yujia/China News Service/VCG via Getty Images
ഉണർന്നിരിക്കുക!
നാശം വിതച്ചുകൊണ്ട്‌ പ്രളയങ്ങൾ—ബൈബിളിനു പറയാനുള്ളത്‌
ലോകമെങ്ങുമായി അനേകം ആളുകൾ കനത്ത വെള്ളപ്പൊക്കത്തിന്റെ കെടുതികൾ അനുഭവിച്ചുകൊണ്ടിരിക്കുകയാണ്‌. ഈ റിപ്പോർട്ടുകൾ കാണുക:
“ചൈനയുടെ തലസ്ഥാനത്ത്‌ കഴിഞ്ഞ ദിവസങ്ങളിൽ ശക്തമായ മഴ ഉണ്ടായി. 140-ഓ അതിലധികമോ വർഷമായിട്ടുണ്ടാകും പ്രദേശത്ത്‌ ഇത്ര ശക്തമായ മഴ രേഖപ്പെടുത്തിയിട്ട്‌. ശനിമുതൽ ബുധൻവരെ നഗരത്തിൽ 744.8 മില്ലിമീറ്റർ (29.3 ഇഞ്ച്‌) മഴയാണ്‌ ലഭിച്ചത്‌.”—എപി ന്യൂസ്‌, 2023 ആഗസ്റ്റ്‌ 2.
“ദക്ഷിണ ജപ്പാനിൽ വ്യാഴാഴ്‌ച ഖാനുൻ ചുഴലിക്കാറ്റിനെത്തുടർന്ന്‌ ശക്തമായ മഴയും കാറ്റും ഉണ്ടായി. ഇത്‌ ഇപ്പോൾ രണ്ടാം ദിവസമാണ്‌. കുറഞ്ഞത്‌ രണ്ടു പേരെങ്കിലും മരിച്ചു. . . . ഈ ചുഴലിക്കാറ്റ്‌ മധ്യ തായ്‌വാനിലെ പർവതപ്രദേശങ്ങളിൽ 0.6 മീറ്റർ (2 അടി) വരെ മഴ കൊണ്ടുവരാൻ സാധ്യതയുണ്ട്‌.”—ഡോയ്‌ചവെല്ലെ, 2023 ആഗസ്റ്റ്‌ 3.
“കാനഡയിലെ അറ്റ്‌ലാന്റിക്‌ തീരങ്ങളിൽ കഴിഞ്ഞ 50 വർഷത്തിന്‌ ഇടയിൽ ഉണ്ടായ ഏറ്റവും ശക്തമായ മഴയെത്തുടർന്ന്‌ (നോവ സ്‌കോഷയിൽ) വാരാന്തത്തിൽ കനത്ത വെള്ളപ്പൊക്കമുണ്ടായി.”—ബിബിസി ന്യൂസ്‌, 2023 ജൂലൈ 24.
ഇത്തരം സംഭവങ്ങളെക്കുറിച്ച്‌ ബൈബിൾ എന്താണു പറയുന്നത്‌?
‘അവസാനകാലത്തിന്റെ’ അടയാളം
നമ്മൾ ജീവിക്കുന്ന ഈ കാലത്തെ ബൈബിൾ വിളിക്കുന്നത്‌ ‘അവസാനകാലം’ എന്നാണ്‌. (2 തിമൊഥെയൊസ്‌ 3:1) ഇക്കാലത്ത്‌ നമ്മൾ ‘പേടിപ്പിക്കുന്ന കാഴ്‌ചകൾ’ അഥവാ ഭയപ്പെടുത്തുന്ന സംഭവങ്ങൾ കാണുമെന്നു യേശു മുൻകൂട്ടിപ്പറഞ്ഞു. (ലൂക്കോസ്‌ 21:11) ഇന്ന്‌ കാലാവസ്ഥാവ്യതിയാനം കാരണം അപ്രതീക്ഷിതവും മുമ്പെത്തെക്കാൾ അതിശക്തവും ആയ പ്രകൃതിവിപത്തുകളാണ്‌ അടിക്കടി ഉണ്ടാകുന്നത്‌.
പ്രതീക്ഷയ്‌ക്കു വകയുണ്ട്‌
ഇന്നു ഭൂമിയിൽ പേടിപ്പിക്കുന്ന പല സംഭവങ്ങളും നടക്കുന്നതു കാണുമ്പോൾ അതു പ്രതീക്ഷയ്‌ക്കു വക നൽകുന്നെന്നു ബൈബിൾ പറയുന്നു. അത്‌ എങ്ങനെ? യേശു പറഞ്ഞു: “ഇതെല്ലാം സംഭവിക്കുന്നതു കാണുമ്പോൾ ദൈവരാജ്യം അടുത്ത്‌ എത്തിയെന്നു മനസ്സിലാക്കിക്കൊള്ളുക.”—ലൂക്കോസ്‌ 21:31; മത്തായി 24:3.
ഇപ്പോൾ നടക്കുന്ന ഈ സംഭവങ്ങൾ ദൈവരാജ്യം ഉടനെ വരും എന്നതിന്റെ സൂചനയാണ്‌. ജലപരിവൃത്തിപോലുള്ള പ്രകൃതിയിലെ പ്രവർത്തനങ്ങളെല്ലാം ഈ രാജ്യത്തിലൂടെ നിയന്ത്രണത്തിൽ വരും.—ഇയ്യോബ്‌ 36:27, 28; സങ്കീർത്തനം 107:29.
ദൈവരാജ്യം എങ്ങനെയാണ്‌ പ്രകൃതിയിലെ പ്രശ്‌നങ്ങൾ പരിഹരിക്കുന്നതെന്ന്‌ അറിയാൻ “നമ്മുടെ ഭൂമിയെ രക്ഷിക്കാൻ ആർക്കാകും?” എന്ന ലേഖനം കാണുക.