ഇന്റർനെറ്റ്‌ ഇല്ലാത്ത സ്ഥലങ്ങളി​ലേക്ക്‌ JW ഉപഗ്ര​ഹ​ചാ​നൽ

ഓരോ മാസവും JW പ്രക്ഷേ​പ​ണ​ത്തി​ലൂ​ടെ വരുന്ന വീഡി​യോ​ക​ളും മറ്റു പരിപാ​ടി​ക​ളും കാണാൻ നമ്മൾ ആകാം​ക്ഷ​യോ​ടെ കാത്തി​രി​ക്കാ​റുണ്ട്‌. എന്നാൽ ആഫ്രി​ക്ക​യി​ലെ മിക്ക സഹോ​ദ​ര​ങ്ങൾക്കും നമ്മളെ​പ്പോ​ലെ അത്ര എളുപ്പ​ത്തിൽ അവ കാണാ​നാ​കു​ന്നില്ല. എന്തു​കൊണ്ട്‌?

ആഫ്രി​ക്ക​യി​ലെ മിക്ക സ്ഥലങ്ങളി​ലും ഇന്റർനെറ്റ്‌ സൗകര്യം കുറവാണ്‌. ഉണ്ടെങ്കിൽത്തന്നെ കുറഞ്ഞ സ്‌പീ​ഡി​ലാ​യി​രി​ക്കും ഇന്റർനെറ്റ്‌ കിട്ടു​ന്നത്‌, അതിനാ​ണെ​ങ്കിൽ വളരെ ചെലവും. മഡഗാ​സ്‌ക​റി​ലെ ഒരു സംഭവം നോക്കാം. ഒരിക്കൽ ഒരു സർക്കിട്ട്‌ മേൽവി​ചാ​രകൻ ഒരു മാസത്തെ JW പ്രക്ഷേ​പണം ഒരു ഇന്റർനെറ്റ്‌ കഫേയിൽവെച്ച്‌ ഡൗൺലോഡ്‌ ചെയ്‌തു. അതിനു​വന്ന ബില്ലോ? 16 ഡോളർ! ഏകദേശം 1,200 രൂപ. അവിടത്തെ ചില ആളുക​ളു​ടെ ഒരാഴ്‌ചത്തെ വരുമാ​ന​ത്തെ​ക്കാൾ അധിക​മാ​യി​രു​ന്നു അത്‌!a

ഇത്തരത്തി​ലു​ള്ള ബുദ്ധി​മു​ട്ടു​ക​ളൊ​ക്കെ​യു​ണ്ടെ​ങ്കി​ലും ആഫ്രി​ക്ക​യി​ലെ ലക്ഷക്കണ​ക്കിന്‌ ആളുകൾ ഇന്ന്‌ JW പ്രക്ഷേ​പണം ഇന്റർനെറ്റ്‌ ഒന്നുമി​ല്ലാ​തെ കാണുന്നു. അത്‌ എങ്ങനെ​യാണ്‌?

2017 മുതൽ ആഫ്രി​ക്ക​യി​ലെ സഹാറ​യു​ടെ തെക്കു​ഭാ​ഗ​ത്തു​ള്ള​വർക്കു​വേണ്ടി JW പ്രക്ഷേ​പണം സാറ്റ​ലൈറ്റ്‌ ചാനൽ വഴി ലഭ്യമാ​കാൻ തുടങ്ങി. ആഴ്‌ച​യി​ലെ എല്ലാ ദിവസ​വും 24 മണിക്കൂ​റും ഈ ചാനൽ സം​പ്രേ​ഷണം ചെയ്യുന്നു. 16 ഭാഷക​ളിൽ ലഭ്യമായ ഈ ചാനൽ സൗജന്യ​വു​മാണ്‌.

ഇതി​നെ​ല്ലാം​വേണ്ടി യഹോ​വ​യു​ടെ സാക്ഷികൾ ഒരു ടെലി​വി​ഷൻ സം​പ്രേഷണ സർവീ​സു​മാ​യി കരാറു​ണ്ടാ​ക്കി. അങ്ങനെ ഒരു ഉപഗ്ര​ഹ​ചാ​നൽ വഴി ഈ പരിപാ​ടി​ക​ളെ​ല്ലാം സം​പ്രേ​ഷണം ചെയ്യാൻ തുടങ്ങി. സഹാറ​യു​ടെ തെക്കു​ഭാ​ഗ​ത്തുള്ള ഏതാണ്ട്‌ 35 രാജ്യ​ങ്ങ​ളി​ലു​ള്ള​വർക്ക്‌ ഇതിൽനിന്ന്‌ പ്രയോ​ജനം കിട്ടി. ഈ കരാറി​നു​വേണ്ടി ഏകദേശം 8,70,000 രൂപയാണ്‌ മാസം​തോ​റും ചെലവാ​കു​ന്നത്‌. ചില അവസര​ങ്ങ​ളിൽ കൺ​വെൻ​ഷ​നു​ക​ളോ ബ്രാഞ്ച്‌ സന്ദർശ​ന​മോ പോലുള്ള തത്സമയ​പ​രി​പാ​ടി​കൾ സം​പ്രേ​ഷണം ചെയ്യു​ന്ന​തി​നാ​യി നമ്മൾ മറ്റൊരു ചാനൽകൂ​ടി ഉപയോ​ഗി​ക്കാ​റുണ്ട്‌. അതിനു കൂടു​ത​ലാ​യി പണം നൽകേ​ണ്ടി​വ​രും.

അനേകം ആളുകൾ, യഹോ​വ​യു​ടെ സാക്ഷികൾ അല്ലാത്ത​വർപോ​ലും വീട്ടി​ലി​രുന്ന്‌ ടിവി​യി​ലൂ​ടെ ഈ JW ഉപഗ്ര​ഹ​ചാ​നൽ കാണാ​റുണ്ട്‌. എന്നാൽ പല സഹോ​ദ​ര​ങ്ങൾക്കും ഇതിനു​വേണ്ട ഉപകര​ണങ്ങൾ സ്വന്തമാ​യി വാങ്ങു​ന്ന​തിന്‌ ആവശ്യ​മായ പണം കൈയി​ലില്ല. അതു​കൊണ്ട്‌ 3,670-ലധികം രാജ്യ​ഹാ​ളു​ക​ളിൽ ഈ ഉപകര​ണങ്ങൾ സ്ഥാപി​ക്കാ​നുള്ള ക്രമീ​ക​ര​ണങ്ങൾ ചെയ്‌തു. അങ്ങനെ​യാ​കു​മ്പോൾ സഹോ​ദ​ര​ങ്ങൾക്ക്‌ രാജ്യ​ഹാ​ളി​ലി​രുന്ന്‌ JW പ്രക്ഷേ​പണം ആസ്വദി​ക്കാ​നാ​കും. രാജ്യ​ഹാ​ളിൽ ടിവി​യോ പ്രൊ​ജ​ക്ട​റോ ഇല്ലെങ്കിൽ ഈ ഉപകര​ണ​ങ്ങൾക്ക്‌ ഡെലി​വറി ചാർജ്‌ ഉൾപ്പെടെ 38,000 രൂപ​യോ​ളം വരും. ഉണ്ടെങ്കിൽ ഏകദേശം 5,000 രൂപ മതി.

ഇങ്ങനെ​യൊ​രു ചാനൽ ക്രമീ​ക​രി​ച്ച​തിന്‌ സംഘട​ന​യോട്‌ നമ്മുടെ സഹോ​ദ​ര​ങ്ങൾക്ക്‌ പറഞ്ഞാൽ തീരാത്ത നന്ദിയുണ്ട്‌. കാമറൂ​ണി​ലുള്ള ഒരു മേൽവി​ചാ​രകൻ പറയുന്നു: “ഞങ്ങളുടെ കുടും​ബ​ത്തിന്‌ മരുഭൂ​മി​യു​ടെ നടുവി​ലാ​യി​രു​ന്ന​പ്പോൾ കിട്ടിയ മന്ന പോ​ലെ​യാ​ണിത്‌.” നൈജീ​രി​യ​യി​ലെ ഒരു സഹോ​ദ​ര​നായ ഓഡെ​ബോ​ഡി​യു​ടെ അഭി​പ്രാ​യം ഇങ്ങനെ​യാണ്‌: “ആഴ്‌ച​യിൽ മൂന്നു പ്രാവ​ശ്യം ഞങ്ങളുടെ കുടും​ബം ഈ ചാനൽ കാണാ​റുണ്ട്‌. ആ ദിവസം വരാൻ ഞങ്ങളുടെ കുട്ടികൾ നോക്കി​യി​രി​ക്കും. മറ്റു ദിവസ​ങ്ങ​ളി​ലും കുട്ടികൾ ചോദി​ക്കും, ‘JW ചാനൽ വെക്കാ​മോ’ എന്ന്‌.” നൈജീ​രി​യ​യിൽനി​ന്നുള്ള റോസ്‌ പറയുന്നു: “എപ്പോ​ഴും ന്യൂസ്‌ ചാനൽ കണ്ടു​കൊ​ണ്ടി​രി​ക്കുന്ന ഒരു രീതി​യാ​യി​രു​ന്നു എനിക്ക്‌. എന്നാൽ JW ഉപഗ്ര​ഹ​ചാ​നൽ വന്നതോ​ടെ ആ ശീല​മൊന്ന്‌ മാറ്റാൻ പറ്റി. ന്യൂസിൽ ഓരോ​ന്നും കാണു​മ്പോൾ എനിക്ക്‌ വല്ലാത്ത ഒരു ബുദ്ധി​മുട്ട്‌ തോന്നാ​റുണ്ട്‌, ബിപി​യും കൂടും. എന്നാൽ JW പ്രക്ഷേ​പണം ശരിക്കും സന്തോഷം തരും, മനസ്സൊന്ന്‌ ശാന്തമാ​കും. ഇപ്പോൾ ഈ ചാനലാണ്‌ എനിക്ക്‌ ഏറ്റവും ഇഷ്ടം. ശരിക്കും യഹോ​വ​യു​ടെ വലി​യൊ​രു അനു​ഗ്ര​ഹം​തന്നെ!”

ഈ ഉപഗ്ര​ഹ​ചാ​ന​ലി​നു​വേണ്ട എല്ലാ ഉപകര​ണ​ങ്ങ​ളും തന്റെ സർക്കി​ട്ടി​ലുള്ള രാജ്യ​ഹാ​ളു​ക​ളിൽ സ്ഥാപി​ച്ചി​ട്ടു​ണ്ടെന്ന്‌ മൊസാ​മ്പി​ക്കി​ലെ ഒരു സർക്കിട്ട്‌ മേൽവി​ചാ​രകൻ പറയുന്നു. ഈ ഉപഗ്ര​ഹ​ചാ​നൽ വഴി JW പ്രക്ഷേ​പണം കാണാൻ അവി​ടെ​യുള്ള സഹോ​ദ​രങ്ങൾ മീറ്റി​ങ്ങിന്‌ കുറഞ്ഞത്‌ ഒരു മണിക്കൂർ മുമ്പെ​ങ്കി​ലും രാജ്യ​ഹാ​ളിൽ എത്തും.

2019-ൽ സൗത്ത്‌ ആഫ്രി​ക്ക​യി​ലെ ജോഹ​ന്നാ​സ്‌ബർഗിൽവെച്ച്‌ ഒരു അന്താരാ​ഷ്ട്ര കൺ​വെൻ​ഷൻ നടന്നു. അവിടെ നടന്ന ഒരു ഭരണസം​ഘാം​ഗ​ത്തി​ന്റെ പ്രസം​ഗ​വും മറ്റു മുഖ്യ​പ്ര​സം​ഗ​ങ്ങ​ളും ഒൻപതു സ്ഥലങ്ങളി​ലേക്കു പ്രക്ഷേ​പണം ചെയ്യു​ന്ന​തി​നു​വേണ്ടി ഈ ചാനലാണ്‌ ഉപയോ​ഗി​ച്ചത്‌. സൗത്ത്‌ ആഫ്രിക്ക ബ്രാഞ്ചി​ലെ പ്രാ​ദേ​ശിക പ്രക്ഷേപണ ഡിപ്പാർട്ടു​മെ​ന്റിൽ സേവി​ക്കുന്ന സ്‌പു​നി​ലേലെ സഹോ​ദരൻ പറയുന്നു: “മുമ്പൊ​ക്കെ പ്രസം​ഗങ്ങൾ പ്രക്ഷേ​പണം ചെയ്യാൻ ഇന്റർനെറ്റ്‌ വേണമാ​യി​രു​ന്നു. അതിനു പണച്ചെ​ല​വുണ്ട്‌. പോരാ​ത്ത​തിന്‌ ഇന്റർനെ​റ്റിന്‌ നല്ല സ്‌പീ​ഡും വേണം. എന്നാൽ JW ഉപഗ്ര​ഹ​ചാ​നൽ ചെലവ്‌ കുറഞ്ഞ​താണ്‌. ധൈര്യ​മാ​യിട്ട്‌ ഉപയോ​ഗി​ക്കാൻ പറ്റും.”

ലോക​വ്യാ​പ​ക​വേ​ല​യ്‌ക്കു​വേണ്ടി നിങ്ങൾ ഓരോ​രു​ത്ത​രും തരുന്ന സംഭാ​വ​ന​കൾക്ക്‌ വളരെ​വ​ളരെ നന്ദി. അതു​കൊണ്ട്‌ ആഫ്രി​ക്ക​യി​ലുള്ള നമ്മുടെ സഹോ​ദ​ര​ങ്ങൾക്ക്‌ ഈ ഉപഗ്ര​ഹ​ചാ​നൽ ഉപയോ​ഗിച്ച്‌ JW പ്രക്ഷേ​പണം കാണാനാകുന്നു. donate.jw.org-ൽ കാണുന്ന വ്യത്യ​സ്‌ത​രീ​തി​ക​ളി​ലൂ​ടെ നിങ്ങൾ നൽകിയ സംഭാ​വ​ന​കളെ ഞങ്ങൾ വളരെ​യ​ധി​കം വിലമ​തി​ക്കു​ന്നു.