സ്വകാ​ര്യ​ത​യു​ടെ സ്വകാര്യ ദുഃഖം

“ഒരു പരമ ദരിദ്രൻ തന്റെ കുടി​ലി​ന്റെ ഉള്ളിൽ രാജാ​വി​ന്റെ സർവ അധികാ​ര​ത്തെ​യും ധിക്കരി​ച്ചേ​ക്കാം.”—1759-1806 കാലയ​ള​വിൽ ജീവി​ച്ചി​രുന്ന ബ്രിട്ടീഷ്‌ രാഷ്‌ട്രീ​യ​ക്കാ​ര​നായ വില്യം പിറ്റ്‌.

മറ്റാളു​ക​ളു​ടെ അനാവശ്യ നിരീ​ക്ഷ​ണ​ങ്ങ​ളിൽനി​ന്നും ഒഴിഞ്ഞ്‌, സ്വകാ​ര്യത ആസ്വദി​ക്കു​ന്ന​തി​നുള്ള ആഗ്രഹം ഏതൊ​രാൾക്കും ഉണ്ട്‌. അതിനാ​യി ജീവി​ത​ത്തി​ലെ ചില കാര്യ​ങ്ങൾക്കു ചുറ്റും മറകെ​ട്ടാ​നുള്ള അവകാശം അയാൾക്കുണ്ട്‌ എന്നാണ്‌ പിറ്റിന്റെ വാക്കുകൾ അർഥമാ​ക്കു​ന്നത്‌.

വ്യത്യ​സ്‌ത സംസ്‌കാ​ര​ങ്ങ​ളിൽ നിന്ന്‌ ഉള്ളവർ വ്യത്യസ്‌ത അർഥങ്ങ​ളാ​യി​രി​ക്കും സ്വകാ​ര്യ​ത​യ്‌ക്കു നൽകു​ന്നത്‌. ഉദാഹ​ര​ണ​ത്തിന്‌, പസിഫിക്‌ ദ്വീപ​സ​മൂ​ഹ​മായ സമോ​വ​യിൽ ഒട്ടുമിക്ക വീടു​കൾക്കും ചുവരു​ക​ളില്ല. വീട്ടിൽ നടക്കുന്ന സകല സംഗതി​ക​ളും വെളി​യിൽ നിൽക്കു​ന്ന​വർക്കു കാണാ​മെന്നു ചുരുക്കം. എന്നാൽപ്പോ​ലും ക്ഷണിക്ക​പ്പെ​ടാ​തെ വീട്ടി​നു​ള്ളി​ലേക്കു കയറു​ന്നത്‌ മര്യാ​ദ​കേ​ടാ​യി​ട്ടാണ്‌ അവി​ടെ​യു​ള്ള​വ​രും കരുതു​ന്നത്‌.

അൽപ്പ​മെ​ങ്കി​ലും സ്വകാ​ര്യത ആസ്വദി​ക്കാ​നുള്ള ഓരോ വ്യക്തി​യു​ടെ​യും അവകാശം പണ്ടുമു​തലേ മനുഷ്യൻ തിരി​ച്ച​റി​ഞ്ഞി​ട്ടുണ്ട്‌. വില്യം പിറ്റിന്റെ മേലു​ദ്ധ​രിച്ച വിഖ്യാ​ത​മായ പ്രസ്‌താ​വ​ന​യ്‌ക്ക്‌ ആയിര​ക്ക​ണ​ക്കി​നു വർഷം മുമ്പു​തന്നെ, മറ്റുള്ള​വ​രു​ടെ സ്വകാ​ര്യ​തയെ മാനി​ക്കേ​ണ്ട​തി​ന്റെ ആവശ്യം ബൈബിൾ ചൂണ്ടി​ക്കാ​ണി​ച്ചി​രു​ന്നു. ശലോ​മോൻ രാജാവ്‌ ഇങ്ങനെ എഴുതി: “കൂട്ടു​കാ​രൻ നിന്നെ​ക്കൊ​ണ്ടു മടുത്തു നിന്നെ വെറു​ക്കാ​തെ​യി​രി​ക്കേ​ണ്ട​തി​ന്നു അവന്റെ വീട്ടിൽ കൂടക്കൂ​ടെ ചെല്ലരു​തു.” (സദൃശ​വാ​ക്യ​ങ്ങൾ 25:17) ‘സ്വന്തകാ​ര്യം നോക്കി​ന​ട​ക്കാൻ’ അപ്പൊ​സ്‌ത​ല​നായ പൗലൊസ്‌ പ്രബോ​ധി​പ്പി​ച്ചു.—1 തെസ്സ​ലൊ​നീ​ക്യർ 4:12.

സ്വകാ​ര്യ​ത​യു​ടെ പ്രാധാ​ന്യം തിരി​ച്ച​റി​ഞ്ഞു​കൊണ്ട്‌ ദ യുനെ​സ്‌കോ കുരിയർ എന്ന മാസിക അതിനെ “പൗരാ​വ​കാ​ശ​ങ്ങ​ളു​ടെ അടിത്തറ” എന്നു വിളി​ക്കു​ന്നു. അതു​പോ​ലെ​തന്നെ, ഒരു പ്രമുഖ ലാറ്റിൻ അമേരി​ക്കൻ രാഷ്‌ട്രീയ പ്രവർത്തകൻ പറഞ്ഞത്‌ ഇങ്ങനെ​യാണ്‌: “ഒരർഥ​ത്തിൽ പറഞ്ഞാൽ എല്ലാ മനുഷ്യാ​വ​കാ​ശ​ങ്ങ​ളും സ്വകാ​ര്യ​ത​യ്‌ക്കുള്ള അവകാ​ശ​വു​മാ​യി ബന്ധപ്പെ​ട്ടി​രി​ക്കു​ന്നു.”

എന്നിരു​ന്നാ​ലും, ഇന്ന്‌ കുറ്റകൃ​ത്യ​ങ്ങ​ളും ആഗോള തീവ്ര​വാ​ദ​വും പെരു​കി​വ​രുന്ന പശ്ചാത്ത​ല​ത്തിൽ പൗരന്മാ​രു​ടെ സുരക്ഷ ഉറപ്പു വരുത്തു​ന്ന​തിന്‌ സ്വകാ​ര്യ​ത​യു​ടെ അതിർവ​ര​മ്പു​കൾ ഭേദി​ക്കാ​തെ നിവൃ​ത്തി​യില്ല എന്ന്‌ ഗവണ്മെ​ന്റു​ക​ളും നിയമ​പാ​ല​ക​രും ചിന്തിച്ചു തുടങ്ങി​യി​രി​ക്കു​ന്നു. എന്തു​കൊ​ണ്ടാ​ണത്‌? കാരണം സ്വകാ​ര്യ​ത​യ്‌ക്കുള്ള അവകാ​ശത്തെ സമൂഹ​ത്തി​ലെ കുറ്റവാ​ളി വൃന്ദങ്ങൾ ദുഷ്ടത​യ്‌ക്കു മറയാ​ക്കി​യി​രി​ക്കു​ന്നു. അതു​കൊണ്ട്‌ തങ്ങളുടെ പൗരന്മാ​രു​ടെ സ്വകാ​ര്യത ഭഞ്‌ജി​ക്കാ​തെ അവരുടെ സുരക്ഷി​ത​ത്വം ഉറപ്പു​വ​രു​ത്തുക എന്നുള്ളത്‌ ഗവണ്മെ​ന്റു​കളെ സംബന്ധി​ച്ചി​ട​ത്തോ​ളം വെല്ലു​വി​ളി​യാണ്‌.

സ്വകാ​ര്യ​ത​യും സുരക്ഷി​ത​ത്വ​വും —വടംവലി മുറു​കു​ന്നു

ലോകത്തെ ഞെട്ടി​ച്ചു​കൊണ്ട്‌ 2001 സെപ്‌റ്റം​ബർ 11-ന്‌ അരങ്ങേ​റിയ ഭീകരാ​ക്ര​മണം വ്യക്തി-സ്വകാ​ര്യ​ത​യു​ടെ ചില വശങ്ങളിൽ കൈക​ട​ത്താൻ ഗവണ്മെ​ന്റു​കൾക്ക്‌ അവകാ​ശ​മി​ല്ലേ എന്നു ചിന്തി​ക്കാൻ അനേക​മാ​ളു​കളെ പ്രേരി​പ്പി​ച്ചി​രി​ക്കു​ന്നു. “സെപ്‌റ്റം​ബർ 11 കാര്യ​ങ്ങളെ കീഴ്‌മേൽ മറിച്ചി​രി​ക്കു​ന്നു” എന്ന്‌ ഒരു മുൻ യു.എസ്‌. ഫെഡറൽ ട്രേഡ്‌ കമ്മീഷണർ ബിസി​ന​സ്‌വീക്ക്‌ മാസി​ക​യോ​ടു പറയു​ക​യു​ണ്ടാ​യി. “സ്വകാ​ര്യത സംരക്ഷി​ക്ക​പ്പെ​ട്ടി​രി​ക്കുന്ന ഒരു സമൂഹ​ത്തിൽ തീവ്ര​വാ​ദി​കൾ സ്വൈ​ര​വി​ഹാ​രം നടത്തുന്നു. സ്വകാ​ര്യ​ത​യു​ടെ​മേൽ അൽപ്പം കൈക​ടത്തൽ വേണ്ടി​വ​രു​മെ​ങ്കിൽപ്പോ​ലും ഇത്തരക്കാ​രെ മറനീക്കി പുറത്തു​കൊ​ണ്ടു​വ​രു​ന്ന​തിൽ ഭൂരി​ഭാ​ഗം ജനങ്ങളും പിന്തുണ നൽകു​മെന്നു തന്നെയാണ്‌ എന്റെ വിശ്വാ​സം,” അദ്ദേഹം കൂട്ടി​ച്ചേർത്തു. മാസിക ഇങ്ങനെ തുടർന്നു: “സെപ്‌റ്റം​ബർ 11-നു ശേഷം നടത്തിയ അഭി​പ്രായ വോ​ട്ടെ​ടു​പ്പു​കൾ സൂചി​പ്പി​ക്കുന്ന പ്രകാരം, മുഖച്ഛായ തിരി​ച്ച​റി​യുന്ന സംവി​ധാ​നങ്ങൾ വ്യാപ​ക​മാ​യി ഉപയോ​ഗി​ക്കു​ന്ന​തി​നെ 86 ശതമാനം അമേരി​ക്ക​ക്കാ​രും അനുകൂ​ലി​ക്കു​ന്നു; 81 ശതമാനം പേർ ബാങ്ക്‌, ക്രെഡിറ്റ്‌ കാർഡ്‌ ഇടപാ​ടു​ക​ളിൽ സൂക്ഷ്‌മ നിരീ​ക്ഷണം ശുപാർശ ചെയ്യുന്നു; 68 ശതമാനം ഒരു ദേശീയ തിരി​ച്ച​റി​യൽ കാർഡി​ന്റെ ആവശ്യ​ക​തയെ പിന്തു​ണ​യ്‌ക്കു​ന്നു.”

ഉടമസ്ഥന്റെ വിരല​ട​യാ​ള​വും നേത്ര​പ​ട​ല​ത്തി​ന്റെ സ്‌കാൻ ചെയ്‌ത ചിത്ര​വും സൂക്ഷി​ക്കുന്ന തിരി​ച്ച​റി​യൽ കാർഡു​ക​ളാണ്‌ പാശ്ചാത്യ നാടു​ക​ളി​ലെ ചില ഭരണകൂ​ടങ്ങൾ നൽകാൻ ഉദ്ദേശി​ക്കു​ന്നത്‌. കൂടാതെ അയാൾ കുറ്റകൃ​ത്യ​ങ്ങൾ ചെയ്‌തി​ട്ടു​ണ്ടെ​ങ്കിൽ അതു സംബന്ധിച്ച മുഴു​രേ​ഖ​യും അതു​പോ​ലെ സാമ്പത്തിക കാര്യ​ങ്ങ​ളു​ടെ പൂർണ​വി​വ​ര​വും ഈ കാർഡ്‌ ഉപയോ​ഗി​ച്ചു കണ്ടെത്താൻ കഴിയും. തിരി​ച്ച​റി​യൽ കാർഡി​ലുള്ള കാര്യങ്ങൾ വ്യക്തി​യു​ടെ ക്രെഡിറ്റ്‌ കാർഡ്‌ വിവര​ങ്ങ​ളു​മാ​യി ബന്ധപ്പെ​ടു​ത്തു​ന്ന​തി​നും മുഖച്ഛായ തിരി​ച്ച​റി​യുന്ന നിരീക്ഷണ ക്യാമ​റ​ക​ളി​ലെ പ്രതി​രൂ​പ​വു​മാ​യി ഒത്തു​നോ​ക്കു​ന്ന​തി​നും സാങ്കേ​തി​ക​വി​ദ്യ മുഖാ​ന്തരം സാധ്യ​മാണ്‌. അങ്ങനെ കുറ്റകൃ​ത്യ​ങ്ങൾക്ക്‌ ഉപയോ​ഗി​ക്കുന്ന സാമ​ഗ്രി​കൾ വാങ്ങാ​നെ​ത്തുന്ന കുറ്റവാ​ളി​കളെ കയ്യോടെ പിടി​കൂ​ടാൻ കഴിയും.

ബോം​ബു​കൾ, തോക്കു​കൾ, കത്തികൾ തുടങ്ങിയ മാരകാ​യു​ധങ്ങൾ വസ്‌ത്ര​ത്തി​ന​ടി​യി​ലോ വീട്ടിലെ ചുമരി​നു പിന്നി​ലോ ഒളിപ്പി​ക്കാൻ ശ്രമി​ച്ചാ​ലും ഇന്ന്‌ അവ നിഷ്‌പ്ര​യാ​സം കണ്ടെത്താൻ കഴിയും. നിങ്ങളു​ടെ വസ്‌ത്ര​ത്തി​നു​ള്ളി​ലുള്ള എന്തി​ന്റെ​യും ചിത്രങ്ങൾ നൽകാൻ കഴിയുന്ന തരം ഉപകര​ണ​ങ്ങ​ളാണ്‌ ചില സുരക്ഷാ ഏജൻസി​ക​ളു​ടെ കൈയി​ലു​ള്ളത്‌. അടുത്ത മുറി​യിൽ കൂടി നടക്കുന്ന അല്ലെങ്കിൽ അവിടെ ശ്വാസ​മു​തിർക്കുന്ന ഓരോ​രു​ത്ത​രും ആരെന്നു​പോ​ലും കൃത്യ​മാ​യി തിരി​ച്ച​റി​യാൻ അത്യാ​ധു​നിക റഡാർ സംവി​ധാ​നങ്ങൾ പോലീ​സി​നെ സഹായി​ക്കു​ന്നു. ഇത്ര​യൊ​ക്കെ​യാ​ണെ​ങ്കി​ലും നിരീക്ഷണ സംവി​ധാ​ന​ങ്ങ​ളു​ടെ എണ്ണത്തിലെ ഈ കുതി​ച്ചു​ക​യറ്റം വാസ്‌ത​വ​ത്തിൽ കുറ്റകൃ​ത്യ​ങ്ങ​ളു​ടെ നിരക്കു കുറച്ചി​ട്ടു​ണ്ടോ?

ക്യാമ​റകൾ കള്ളന്മാരെ പിന്തി​രി​പ്പി​ക്കു​ന്നു​ണ്ടോ?

ഓസ്‌​ട്രേ​ലി​യ​യി​ലെ ഒരു ഒറ്റപ്പെട്ട പട്ടണമായ ബെർക്കിൽ കുറ്റകൃ​ത്യ​ങ്ങ​ളു​ടെ എണ്ണം കുതി​ച്ചു​യർന്ന​പ്പോൾ നാല്‌ ക്ലോസ്‌ഡ്‌ സർക്കിട്ട്‌ ടെലി​വി​ഷൻ ക്യാമ​റകൾ സ്ഥാപി​ക്കു​ക​യു​ണ്ടാ​യി. തത്‌ഫ​ല​മാ​യി കുറ്റകൃ​ത്യ​ങ്ങ​ളു​ടെ എണ്ണം കുത്തനെ താണു. എന്നാൽ ലോക​വ്യാ​പ​ക​മാ​യുള്ള സ്ഥിതി അതല്ല. കുറ്റകൃ​ത്യ​ങ്ങ​ളു​ടെ എണ്ണം കുറയ്‌ക്കാ​നുള്ള ശ്രമത്തി​ന്റെ ഭാഗമാ​യി സ്‌കോ​ട്ട്‌ലൻഡി​ലെ ഗ്ലാസ്‌ഗോ​യിൽ 1994-ൽ 32 ക്ലോസ്‌ഡ്‌ സർക്കിട്ട്‌ ടെലി​വി​ഷൻ ക്യാമ​റകൾ സ്ഥാപിച്ചു. തുടർന്നു വന്ന വർഷം ചില പ്രത്യേ​ക​തരം കുറ്റകൃ​ത്യ​ങ്ങ​ളു​ടെ എണ്ണം കുറഞ്ഞ​താ​യി സ്‌കോ​ട്ടിഷ്‌ ഓഫീസ്‌ സെൻട്രൽ റിസർച്ച്‌ യൂണി​റ്റി​ന്റെ ഒരു പഠനം കണ്ടെത്തി. എന്നിരു​ന്നാ​ലും റിപ്പോർട്ട്‌ ഇങ്ങനെ തുടർന്നു: “വേശ്യാ​വൃ​ത്തി​യും അസാന്മാർഗിക പ്രവർത്ത​ന​ങ്ങ​ളും ഉൾപ്പെട്ട ഒറ്റപ്പെട്ട കുറ്റകൃ​ത്യ​ങ്ങൾ 120 എണ്ണവും തട്ടിപ്പും വഞ്ചനയും ഉൾപ്പെട്ടവ 2,185-ഉം മയക്കു​മ​രു​ന്നി​നോ​ടു ബന്ധപ്പെട്ടവ ഉൾപ്പെ​ടെ​യുള്ള മറ്റു കുറ്റകൃ​ത്യ​ങ്ങൾ 464 എണ്ണവും വർധിച്ചു.”

നിരീക്ഷണ സംവി​ധാ​ന​ങ്ങ​ളു​ടെ ഉപയോ​ഗം ഒരു പ്രദേ​ശത്തെ കുറ്റകൃ​ത്യ​ങ്ങൾ കുറ​ച്ചേ​ക്കാ​മെ​ങ്കി​ലും മൊത്ത​ത്തിൽ കുറ്റകൃ​ത്യ​ങ്ങ​ളു​ടെ നിരക്കിൽ അതു വലിയ മാറ്റ​മൊ​ന്നും വരുത്തു​മെന്നു തോന്നു​ന്നില്ല. “അടവു​മാ​റ്റം” എന്നു പോലീ​സും കുറ്റാ​ന്വേ​ഷ​ക​രും വിളി​ക്കുന്ന ഒരു പ്രതി​ഭാ​സ​ത്തെ​പ്പറ്റി ദ സിഡ്‌നി മോർണിങ്‌ ഹെറാൾഡ്‌ റിപ്പോർട്ടു ചെയ്യു​ക​യു​ണ്ടാ​യി. പത്രം ഇങ്ങനെ പ്രസ്‌താ​വി​ച്ചു: “ക്യാമ​റ​യും പോലീസ്‌ പട്രോ​ളി​ങ്ങും നിമിത്തം നിൽക്ക​ക്ക​ള്ളി​യി​ല്ലാ​താ​കു​മ്പോൾ, അവർ പുതിയ മേച്ചിൽപ്പു​റം തേടി മറ്റൊരു സ്ഥലത്തേക്കു നീങ്ങു​ക​യാ​യി.” ബൈബിൾ ദീർഘ​നാ​ളു​കൾ മുമ്പേ പ്രസ്‌താ​വിച്ച ഒരു സംഗതി ഇപ്പോൾ നിങ്ങളു​ടെ ഓർമ​യി​ലേക്കു വന്നേക്കാം: “തിന്മ പ്രവർത്തി​ക്കു​ന്നവൻ എല്ലാം വെളി​ച്ചത്തെ പകെക്കു​ന്നു; തന്റെ പ്രവൃ​ത്തി​ക്കു ആക്ഷേപം വരാതി​രി​പ്പാൻ വെളി​ച്ച​ത്തി​ലേക്കു വരുന്ന​തു​മില്ല.”—യോഹ​ന്നാൻ 3:20.

റഡാർ, എക്‌സ്‌-റേ നിരീക്ഷണ സംവി​ധാ​നങ്ങൾ എന്നിവ എത്രതന്നെ അത്യാ​ധു​നി​ക​മാ​യി​രു​ന്നാ​ലും അവയ്‌ക്കൊ​ന്നും വ്യക്തി​ക​ളു​ടെ മനസ്സി​ലും ഹൃദയ​ത്തി​ലും ഉള്ള കാര്യങ്ങൾ ഒപ്പി​യെ​ടു​ക്കാൻ സാധ്യമല്ല എന്നുള്ള​താണ്‌ നിയമ​പാ​ലകർ നേരി​ടുന്ന വെല്ലു​വി​ളി. വാസ്‌ത​വ​ത്തിൽ കുറ്റകൃ​ത്യ​ങ്ങ​ളും വിദ്വേ​ഷ​വും അക്രമ​ങ്ങ​ളും കുറയ്‌ക്കാ​നുള്ള യഥാർഥ പോരാ​ട്ടം നടക്കേ​ണ്ടത്‌ മനുഷ്യ​ന്റെ ഹൃദയ​ത്തി​ലാണ്‌.

എന്നിരു​ന്നാ​ലും, ഇന്നുവരെ മനുഷ്യൻ കണ്ടുപി​ടി​ച്ചി​ട്ടുള്ള ഏതൊരു സാങ്കേ​തി​ക​വി​ദ്യ​യെ​ക്കാ​ളും അതിവി​ശാ​ല​മായ നിരീക്ഷണ പരിധി​യുള്ള ഒരു സവി​ശേ​ഷ​തരം നിരീ​ക്ഷണം ഇപ്പോൾത്തന്നെ നിലവി​ലുണ്ട്‌. അത്‌ എന്താ​ണെ​ന്നും അതിനു മനുഷ്യ​ന്റെ സ്വഭാ​വ​ത്തി​ന്മേൽ എന്തു പ്രഭാവം ചെലു​ത്താ​നാ​കും എന്നും അടുത്ത ലേഖനം ചർച്ച ചെയ്യു​ന്ന​താ​യി​രി​ക്കും. (g03 1/22)

[6-ാം പേജിലെ ആകർഷക വാക്യം]

“സ്വകാ​ര്യത സംരക്ഷി​ക്ക​പ്പെ​ട്ടി​രി​ക്കുന്ന ഒരു സമൂഹ​ത്തിൽ തീവ്ര​വാ​ദി​കൾ സ്വൈ​ര​വി​ഹാ​രം നടത്തുന്നു”

[7-ാം പേജിലെ ചതുരം/ചിത്രം]

നിങ്ങളുടെ വൈദ്യ​പ​രി​ശോ​ധനാ രേഖക​ളു​ടെ സ്വകാ​ര്യത കാത്തു​സൂ​ക്ഷി​ക്ക​പ്പെ​ടു​ന്നു​ണ്ടോ?

തങ്ങളുടെ വൈദ്യ​പ​രി​ശോ​ധനാ രേഖക​ളു​ടെ—ഡോക്ടർമാർക്കും ആശുപ​ത്രി​കൾക്കും വെളി​പ്പെ​ടു​ത്തി​യി​ട്ടുള്ള കാര്യ​ങ്ങ​ളു​ടെ—സ്വകാര്യ സ്വഭാവം കർശന​മാ​യും കാത്തു​സൂ​ക്ഷി​ക്ക​പ്പെ​ടും എന്നാണു പലരു​ടെ​യും ധാരണ. എന്നാൽ, “വിവരങ്ങൾ സുരക്ഷി​ത​മാ​യി​രി​ക്കു​മെന്നു നിങ്ങൾ കരുതു​ന്നെ​ങ്കിൽ അതു വെറു​തെ​യാണ്‌” എന്ന്‌ സ്വകാ​ര്യ​ത​യു​ടെ സംരക്ഷ​ണത്തെ മുൻനി​റു​ത്തി രൂപം​നൽക​പ്പെട്ട പ്രൈ​വസി റൈറ്റ്‌സ്‌ ക്ലിയറി​ങ്‌ഹൗസ്‌ എന്ന സംഘടന മുന്നറി​യി​പ്പു തരുന്നു. ഡേറ്റാ​ബേസ്‌ നേഷൻ—21-ാം നൂറ്റാ​ണ്ടിൽ സ്വകാ​ര്യ​ത​യു​ടെ അന്ത്യം (ഇംഗ്ലീഷ്‌) എന്ന തന്റെ പുസ്‌ത​ക​ത്തിൽ സിംസൺ ഗാർഫി​ങ്കൽ ഇപ്രകാ​രം പ്രസ്‌താ​വി​ക്കു​ന്നു: “വൈദ്യ​പ​രി​ശോ​ധനാ രേഖകൾ ഇന്ന്‌ മുമ്പെ​ന്ന​ത്തെ​ക്കാ​ളു​മ​ധി​കം ഉപയോ​ഗി​ക്ക​പ്പെ​ടു​ന്നു. ആർക്കു തൊഴിൽ നൽകണ​മെ​ന്നും ഇൻഷ്വ​റൻസ്‌ അനുവ​ദി​ക്ക​ണ​മെ​ന്നും നിശ്ചയി​ക്കു​ന്ന​തിന്‌ തൊഴി​ല​ധി​കൃ​ത​രും ഇൻഷ്വ​റൻസ്‌ കമ്പനി​ക​ളും അവ പരി​ശോ​ധി​ക്കു​ന്നു. പണപ്പി​രി​വു നടത്താൻ ആശുപ​ത്രി​ക​ളും മതസം​ഘ​ട​ന​ക​ളും അതൊരു തുറു​പ്പു​ചീ​ട്ടാ​യി ഉപയോ​ഗി​ക്കു​ന്നു. തങ്ങളുടെ ഉത്‌പ​ന്ന​ങ്ങൾക്കു സാധ്യ​ത​യുള്ള ഉപഭോ​ക്താ​ക്കളെ കണ്ടെത്തു​ന്ന​തിന്‌ വ്യാപാ​രി​ക​ളും രോഗി​ക​ളു​ടെ വൈദ്യ​പ​രി​ശോ​ധനാ രേഖകളെ ആശ്രയി​ക്കു​ന്നു.”

ഗാർഫി​ങ്കൽ ഇങ്ങനെ തുടരു​ന്നു: “ഒരു രോഗി ആശുപ​ത്രി​യിൽ ഒരു സാധാരണ സന്ദർശനം നടത്തു​മ്പോൾത്തന്നെ, 50 മുതൽ 75 വരെ ആളുകൾക്ക്‌ അയാളു​ടെ രേഖകൾ കൈകാ​ര്യം ചെയ്യേ​ണ്ട​താ​യി വരുന്നു എന്ന സംഗതി രേഖക​ളു​ടെ രഹസ്യ സ്വഭാവം നിലനി​റു​ത്തു​ന്ന​തി​നു വിലങ്ങു​ത​ടി​യാണ്‌.” ചില സ്ഥലങ്ങളിൽ, രോഗി​കൾ ആശുപ​ത്രി​യിൽ പ്രവേ​ശി​പ്പി​ക്ക​പ്പെ​ടു​മ്പോൾ തങ്ങളുടെ അവകാ​ശങ്ങൾ അടിയ​റ​വെ​ക്കുന്ന തരത്തി​ലുള്ള ചില രേഖക​ളോ പൊതു​വായ സമ്മതപ​ത്ര​ങ്ങ​ളോ അത്ര ശ്രദ്ധി​ക്കാ​തെ ഒപ്പിട്ടു നൽകി​യേ​ക്കാം. ഇത്തരം ഫാറങ്ങ​ളിൽ ഒപ്പിട്ടു​കൊ​ടു​ക്കു​മ്പോൾ “നിങ്ങളു​ടെ വൈദ്യ പരി​ശോ​ധന സംബന്ധിച്ച വിവരങ്ങൾ ഇൻഷ്വ​റൻസ്‌ കമ്പനി​കൾക്കും സർക്കാർ ഏജൻസി​കൾക്കും മറ്റുള്ള​വർക്കും കൈമാ​റാൻ ആരോഗ്യ പ്രവർത്ത​കരെ അല്ലെങ്കിൽ ആശുപ​ത്രി​കളെ നിങ്ങൾ അനുവ​ദി​ക്കു​ക​യാണ്‌” എന്ന്‌ പ്രൈ​വസി റൈറ്റ്‌സ്‌ ക്ലിയറി​ങ്‌ഹൗസ്‌ പ്രസ്‌താ​വി​ക്കു​ന്നു.

[8-ാം പേജിലെ ചതുരം/ചിത്രങ്ങൾ]

സ്വകാര്യതയും കച്ചവട താത്‌പ​ര്യ​ങ്ങ​ളും ഏറ്റുമു​ട്ടു​മ്പോൾ

ഇന്റർനെറ്റ്‌ ഉപയോ​ഗി​ക്കു​ന്നവർ വിശേ​ഷാൽ നിരീ​ക്ഷ​ണ​ങ്ങൾക്കു വിധേ​യ​രാണ്‌, അവർ ആഗ്രഹി​ക്കു​ന്നി​ല്ലെ​ങ്കിൽ പോലും. പ്രൈ​വസി റൈറ്റ്‌സ്‌ ക്ലിയറി​ങ്‌ഹൗസ്‌ ഇപ്രകാ​രം പ്രസ്‌താ​വി​ക്കു​ന്നു: “സ്വകാ​ര്യത പൂർണ​മാ​യി ഉറപ്പു​നൽകുന്ന യാതൊ​രു​വിധ ഓൺലൈൻ പ്രവർത്ത​ന​ങ്ങ​ളും സേവന​ങ്ങ​ളും ഇല്ല എന്നതാണു വാസ്‌തവം. . . . ഇന്റർനെറ്റ്‌ ഉപയോ​ഗി​ക്കു​ന്നവർ ‘സൈറ്റു’കളിൽ നിന്ന്‌ വിവര​ങ്ങ​ളോ രേഖക​ളോ സ്വീക​രി​ച്ചേ​ക്കാം, അതല്ലെ​ങ്കിൽ വെറുതെ ബ്രൗസ്‌ ചെയ്‌ത്‌ വായി​ച്ചെന്നു വരാം. പലരും കരുതു​ന്നത്‌ ഇത്തരം പ്രവർത്ത​നങ്ങൾ മറ്റാരും അറിയു​കയേ ഇല്ല എന്നാണ്‌. എന്നാൽ ആ ധാരണ തെറ്റാണ്‌. ഇന്റർനെറ്റ്‌ ഉപയോ​ഗി​ക്കുന്ന ഒരാൾ ഏതെല്ലാം ന്യൂസ്‌ ഗ്രൂപ്പു​കൾ അല്ലെങ്കിൽ ഫയലുകൾ തുറന്നു പരി​ശോ​ധി​ച്ചു എന്നും ഏതെല്ലാം സൈറ്റു​കൾ സന്ദർശി​ച്ചു എന്നും ഉള്ള വിവരങ്ങൾ ഉൾപ്പെടെ ഒട്ടുമിക്ക ഓൺ ലൈൻ പ്രവർത്ത​ന​ങ്ങ​ളു​ടെ​യും രേഖകൾ സൂക്ഷി​ക്കുക സാധ്യ​മാണ്‌. . . . ഒരാൾ ഏതുതരം സൈറ്റു​ക​ളാ​ണു സന്ദർശി​ക്കു​ന്നത്‌ . . .  എന്നുള്ള​തി​ന്റെ രേഖ പണം പിടു​ങ്ങു​ന്ന​തി​നുള്ള സുവർണാ​വ​സ​രങ്ങൾ കച്ചവട​ക്കാർക്കു പ്രദാനം ചെയ്‌തേ​ക്കാം. . . . ഒരേ അഭിരു​ചി​ക​ളും സ്വഭാ​വ​ങ്ങ​ളും ഉള്ള ആളുക​ളു​ടെ പട്ടിക തയ്യാറാ​ക്കി ഇടനി​ല​ക്കാ​രു​ടെ സഹായം കൂടാതെ അവരെ തങ്ങളുടെ കച്ചവട ലക്ഷ്യങ്ങ​ളാ​ക്കാൻ അതു കച്ചവട​ക്കാ​രെ സഹായി​ക്കു​ന്നു.”

ഇടനി​ല​ക്കാ​രി​ല്ലാ​തെ തപാൽ മുഖേ​ന​യും മറ്റും നേരിട്ടു കച്ചവടം നടത്തുന്ന ‘ഡയറക്ട്‌ മാർക്ക​റ്റിങ്‌’ പ്രസ്ഥാ​ന​ങ്ങ​ളു​ടെ കൈയിൽ നിങ്ങളു​ടെ വിലാസം ചെന്നെ​ത്താൻ വേറെ എന്തെങ്കി​ലും സാധ്യ​ത​യു​ണ്ടോ? പിൻവ​രുന്ന കാര്യ​ങ്ങ​ളിൽ ഏതെങ്കി​ലും ചെയ്യു​മ്പോൾ നിങ്ങളു​ടെ പേരും കയറി​ക്കൂ​ടി​യേ​ക്കാം:

◼ ഉത്‌പ​ന്ന​ങ്ങ​ളു​ടെ വാറന്റി കാർഡോ രജിസ്‌​ട്രേഷൻ കാർഡോ പൂരി​പ്പി​ച്ചു നൽകു​മ്പോൾ.

◼ ക്ലബ്ബുകൾ, സംഘട​നകൾ, ധർമസ്ഥാ​പ​നങ്ങൾ എന്നിവ​യിൽ അംഗമാ​വു​ക​യോ അവയ്‌ക്കു സംഭാവന നൽകു​ക​യോ ചെയ്യു​മ്പോൾ.

◼ മാസി​കകൾ, പുസ്‌തക ക്ലബ്ബുകൾ, മ്യൂസിക്‌ ക്ലബ്ബുകൾ എന്നിവ​യു​ടെ വരിക്കാ​രാ​കു​മ്പോൾ.

◼ ഫോൺ ബുക്കിൽ നിങ്ങളു​ടെ പേരും വിലാ​സ​വും പട്ടിക​പ്പെ​ടു​ത്തു​മ്പോൾ.

◼ നറു​ക്കെ​ടു​പ്പു മത്സരങ്ങ​ളി​ലും മറ്റും പങ്കെടു​ക്കു​മ്പോൾ.

കൂടാതെ, പലചരക്കു കടയിൽ നിന്നു സാധനങ്ങൾ വാങ്ങി​യിട്ട്‌ പണം നൽകാൻ നിങ്ങൾ ഒരു ഡെബിറ്റ്‌ കാർഡോ ക്രെഡിറ്റ്‌ കാർഡോ അതുമ​ല്ലെ​ങ്കിൽ ഒരു ചെക്ക്‌-കാഷിങ്‌ കാർഡോ ഉപയോ​ഗി​ക്കു​ന്നു എന്നു കരുതുക. നിങ്ങളു​ടെ പേരും വിലാ​സ​വും പ്രൈസ്‌ സ്‌കാ​ന​റി​ലൂ​ടെ കടന്നു​പോ​കു​മ്പോൾ വാങ്ങിച്ച സാധന​ങ്ങ​ളു​ടെ പട്ടിക​യോ​ടൊ​പ്പം കമ്പനി അതും കൂടി രേഖ​പ്പെ​ടു​ത്തി​യേ​ക്കാം. അങ്ങനെ അവർ നിങ്ങൾ വാങ്ങാൻ പ്രിയ​പ്പെ​ടുന്ന സാധന​ങ്ങളെ സംബന്ധി​ച്ചുള്ള വിവര​ങ്ങ​ളു​ടെ ഒരു വിശദ​മായ ‘ഡേറ്റാ​ബേസ്‌’ തന്നെ രൂപ​പ്പെ​ടു​ത്തു​ക​യും കച്ചവട ലക്ഷ്യങ്ങൾക്കാ​യി ഉപയോ​ഗി​ക്കു​ക​യും ചെയ്‌തേ​ക്കാം.a

[അടിക്കു​റിപ്പ്‌]

[6, 7 പേജു​ക​ളി​ലെ ചിത്രങ്ങൾ]

നിരീക്ഷണ സംവി​ധാ​ന​ങ്ങ​ളു​ടെ ഉപയോ​ഗം കുറ്റകൃ​ത്യ നിരക്കു കുറച്ചി​ട്ടു​ണ്ടോ?