ബുദ്ധി​മാ​ന്ദ്യ​മുള്ള കുട്ടി​കളെ വളർത്തു​മ്പോൾ

ഫിൻലൻഡിലെ ഉണരുക! ലേഖകൻ

20 വയസ്സു​കാ​രൻ മാർക്കു​സിന്‌ (ഇടത്ത്‌) പരസഹാ​യ​മി​ല്ലാ​തെ ആഹാരം കഴിക്കാ​നോ കുളി​ക്കാ​നോ കഴിയില്ല. ഉറക്കം തീരെ കുറവാ​യ​തി​നാൽ രാത്രി​യിൽ ഉടനീളം അവനു ശ്രദ്ധ ആവശ്യ​മാണ്‌. കൂടെ​ക്കൂ​ടെ അപകടം സംഭവി​ക്കു​ന്ന​തി​നാൽ അപ്പോ​ഴെ​ല്ലാം പ്രഥമ​ശു​ശ്രൂഷ നൽകേ​ണ്ട​തുണ്ട്‌. പക്ഷേ മാർക്കു​സി​ന്റെ മാതാ​പി​താ​ക്കൾ അവനെ ജീവനു തുല്യം സ്‌നേ​ഹി​ക്കു​ന്നു. അവന്റെ സൗമ്യ​വും ദയാർദ്ര​വു​മായ രീതികൾ അവർക്കു ഹൃദയാ​നന്ദം പകരുന്നു. അവനു വൈക​ല്യ​ങ്ങൾ ഉണ്ടെങ്കിൽപ്പോ​ലും അവനെ​ക്കു​റിച്ച്‌ അവർ അഭിമാ​നം​കൊ​ള്ളു​ന്നു.

ലോക​ത്തിൽ 3 ശതമാ​ന​ത്തോ​ളം ആളുകൾക്ക്‌ ഏതെങ്കി​ലും തരത്തി​ലുള്ള ബുദ്ധി​മാ​ന്ദ്യ​മു​ണ്ടെന്ന്‌ ലോകാ​രോ​ഗ്യ​സം​ഘടന കണക്കാ​ക്കു​ന്നു. ജനിതക വൈക​ല്യ​ങ്ങൾ, ജനന സമയത്തു​ണ്ടാ​കുന്ന ക്ഷതങ്ങൾ, ശൈശ​വ​ത്തിൽ തലച്ചോ​റി​ലു​ണ്ടാ​കുന്ന അണുബാധ, പോഷ​ണ​ക്കു​റവ്‌, മരുന്നു​കൾ, മദ്യം, രാസവ​സ്‌തു​ക്ക​ളു​മാ​യുള്ള സമ്പർക്കം എന്നിവ​യെ​ല്ലാം മാനസിക പ്രാപ്‌തി​ക​ളു​ടെ തകരാ​റി​നു കാരണ​മാ​കാ​റുണ്ട്‌. ഭൂരി​ഭാ​ഗം കേസു​ക​ളി​ലും, കാരണം അജ്ഞാത​മാണ്‌. ഇങ്ങനെ​യുള്ള കുട്ടി​ക​ളു​ടെ മാതാ​പി​താ​ക്കൾ ഏതെല്ലാം അനുഭ​വ​ങ്ങ​ളി​ലൂ​ടെ​യാ​ണു കടന്നു​പോ​കു​ന്നത്‌? അത്തരം മാതാ​പി​താ​ക്കളെ എങ്ങനെ പ്രോ​ത്സാ​ഹി​പ്പി​ക്കാ​നാ​കും?

ഹൃദയ​ഭേ​ദ​ക​മായ വാർത്ത അറിയു​മ്പോൾ

കുഞ്ഞിന്‌ മാനസിക വൈക​ല്യ​മു​ണ്ടെന്നു മാതാ​പി​താ​ക്കൾ മനസ്സി​ലാ​ക്കുന്ന ആ നിമി​ഷം​തന്നെ വെല്ലു​വി​ളി ആരംഭി​ക്കു​ക​യാ​യി. “ഞങ്ങളുടെ മകൾക്ക്‌ ഡോൻസ്‌ സിൻഡ്രം ആണെന്നു ഞാനും ഭർത്താ​വും മനസ്സി​ലാ​ക്കി​യ​പ്പോൾ, വീട്‌ ഞങ്ങളു​ടെ​മേൽ ഇടിഞ്ഞു വീണ്‌ അതിന​ടി​യിൽപ്പെ​ട്ടു​പോയ പ്രതീ​തി​യാണ്‌ ഉണ്ടായത്‌” എന്ന്‌ സിർക്ക പറയുന്നു. ഇനി, മാർക്കു​സി​ന്റെ അമ്മ ആനി പറയു​ന്നതു കേൾക്കുക: “അവനു മാനസിക വൈക​ല്യ​മു​ണ്ടാ​യി​രി​ക്കും എന്നു കേട്ട​പ്പോൾ, മറ്റുള്ളവർ അവനെ എങ്ങനെ വീക്ഷി​ക്കു​മെന്നു ഞാൻ ചിന്തിച്ചു. പക്ഷേ താമസി​യാ​തെ​തന്നെ, ആ ചിന്തയ്‌ക്കു കടിഞ്ഞാ​ണി​ടാൻ എനിക്കു സാധിച്ചു. ഞാൻ അവന്റെ ആവശ്യ​ങ്ങ​ളി​ലും അവനു​വേണ്ടി ചെയ്യാൻ കഴിയുന്ന കാര്യ​ങ്ങ​ളി​ലും ശ്രദ്ധ കേന്ദ്രീ​ക​രി​ക്കാൻ തുടങ്ങി.” ഇംഗാ​ഡി​ന്റെ പ്രതി​ക​ര​ണ​വും സമാന​മാ​യി​രു​ന്നു. അവർ പറയുന്നു: “എന്റെ മകൾ യൂനി​ക്കി​ന്റെ വൈക​ല്യ​ത്തെ​ക്കു​റി​ച്ചു ഡോക്ടർ ഞങ്ങളെ അറിയി​ച്ച​പ്പോൾ, അവളെ സഹായി​ക്കാ​നാ​കുന്ന വിധങ്ങ​ളെ​ക്കു​റി​ച്ചു മാത്രമേ ഞാൻ ചിന്തി​ച്ചു​ള്ളൂ.” അത്തര​മൊ​രു രോഗ​നിർണ​യ​ത്തി​നു ശേഷം സിർക്ക, ആനി, ഇംഗാഡ്‌ എന്നിവ​രെ​പ്പോ​ലുള്ള മാതാ​പി​താ​ക്ക​ളു​ടെ മുന്നിൽ ഏതെല്ലാം തിര​ഞ്ഞെ​ടു​പ്പു​ക​ളാ​ണു​ള്ളത്‌?

വൈക​ല്യ​മു​ള്ള കുട്ടി​കളെ സംബന്ധി​ക്കുന്ന വിവരങ്ങൾ നൽകുന്ന യു.എസ്‌. നാഷണൽ ഡിസ്‌എ​മി​നേഷൻ കേന്ദ്രം പിൻവ​രുന്ന ഉപദേശം നൽകുന്നു: “നിങ്ങൾക്ക്‌ ആദ്യം ചെയ്യാൻ കഴിയുന്ന കാര്യ​ങ്ങ​ളിൽ ഒന്ന്‌ . . . നിങ്ങളു​ടെ കുട്ടി​യു​ടെ വൈക​ല്യ​ത്തെ​യും ലഭ്യമായ സഹായ​ങ്ങ​ളെ​യും സാധ്യ​മാ​യി​രി​ക്കു​ന്നി​ട​ത്തോ​ളം വികാസം പ്രാപി​ക്കാൻ കുട്ടിയെ സഹായി​ക്കു​ന്ന​തി​നു നിങ്ങൾക്കു ചെയ്യാൻ കഴിയുന്ന നിർദിഷ്ട കാര്യ​ങ്ങ​ളെ​യും കുറി​ച്ചുള്ള വിവരങ്ങൾ ശേഖരി​ക്കുക എന്നതാണ്‌.” ഈ വിവരങ്ങൾ ഉപയോ​ഗി​ക്കു​ന്നത്‌ നിങ്ങളു​ടെ പരിച​ര​ണ​ത്തിന്‌ ഉദ്ദേശ്യ​വും ദിശാ​ബോ​ധ​വും നൽകും. സഞ്ചരിച്ച ദൂരവും കടന്നു​പോയ ഭൂപ്ര​ദേ​ശ​ങ്ങ​ളും ഒരു ഭൂപട​ത്തിൽ അടയാ​ള​പ്പെ​ടു​ത്തി​ക്കൊണ്ട്‌ യാത്ര​യു​ടെ പുരോ​ഗതി രേഖ​പ്പെ​ടു​ത്തു​ന്ന​തി​നോ​ടു സമാന​മാ​യി​രി​ക്കും അത്‌.

പ്രത്യാ​ശ​യു​ടെ കിരണം

ഈ പ്രശ്‌നം അഭിമു​ഖീ​ക​രി​ക്കുന്ന മാതാ​പി​താ​ക്ക​ളു​ടെ സാഹച​ര്യം വെല്ലു​വി​ളി​കൾ നിറഞ്ഞ​താ​ണെ​ങ്കി​ലും ആശയറ്റതല്ല. അത്‌ എന്തു​കൊ​ണ്ടാണ്‌?

ഒന്നാമ​താ​യി, മാനസിക വൈക​ല്യ​മുള്ള മിക്ക കുട്ടി​ക​ളും ദുരിതം അനുഭ​വി​ക്കു​ന്നി​ല്ലെ​ന്ന​തു​തന്നെ മാതാ​പി​താ​ക്കൾക്ക്‌ ആശ്വാ​സ​ത്തി​നുള്ള വകയാണ്‌. ബുദ്ധി​മാ​ന്ദ്യ​മുള്ള കുട്ടി (ഇംഗ്ലീഷ്‌) എന്ന പുസ്‌ത​ക​ത്തിൽ ഡോ. റോബർട്ട്‌ ഐസക്‌സൺ ഇപ്രകാ​രം എഴുതി: “സന്തുഷ്ട​രാ​യി​രി​ക്കാ​നും മറ്റുള്ള​വ​രു​ടെ സഹവാസം, സംഗീതം, ചിലതരം കളികൾ, രുചി​ക​ര​മായ ഭക്ഷണം, കൂട്ടു​കാ​രു​ടെ സാമീ​പ്യം എന്നിവ​യൊ​ക്കെ ആസ്വദി​ക്കാ​നും മിക്ക കുട്ടി​കൾക്കും കഴിയു​ന്നു.” അവർ കൈവ​രി​ക്കുന്ന നേട്ടങ്ങൾ കുറവാ​യി​രി​ക്കാ​മെ​ങ്കി​ലും, അവരുടെ ലോകം സാധാരണ കുട്ടി​ക​ളു​ടേ​തി​നെ​ക്കാൾ ചെറു​താ​യി​രി​ക്കാ​മെ​ങ്കി​ലും, മിക്ക​പ്പോ​ഴും ഇത്തരം കുട്ടികൾ “കൊട്ടാ​ര​ങ്ങളി”ലുള്ള സാധാരണ കുട്ടി​ക​ളെ​ക്കാൾ തങ്ങളുടെ “കുടി​ലിൽ” സന്തുഷ്ട​രാണ്‌.

രണ്ടാമ​താ​യി, തങ്ങളുടെ കുട്ടി കഷ്ടപ്പെട്ട്‌ കൈവ​രി​ക്കുന്ന നേട്ടങ്ങ​ളെ​പ്രതി മാതാ​പി​താ​ക്കൾക്ക്‌ അഭിമാ​നം​കൊ​ള്ളാ​നാ​കും. പുതി​യ​താ​യി ഓരോ ജോലി പഠി​ച്ചെ​ടു​ക്കു​മ്പോ​ഴും, ഉയരമുള്ള ഒരു കുന്നു കയറി​യ​തു​പോ​ലെ​യാ​ണത്‌. മുകളിൽനി​ന്നു താഴോ​ട്ടു നോക്കു​മ്പോൾ മാതാ​പി​താ​ക്ക​ളും അതു​പോ​ലെ​തന്നെ കുട്ടി​യും ചാരി​താർഥ്യ​മ​ട​യു​ന്നു. ഉദാഹ​ര​ണ​ത്തിന്‌ ബ്രയൻ എന്ന കുട്ടിക്ക്‌ ട്യൂബ​റസ്‌ സ്‌ക്ലീ​റോ​സിസ്‌, ദിവാ​സ്വ​പ്‌ന​പ്ര​കൃ​തി, അപസ്‌മാ​രം എന്നീ രോഗ​ങ്ങ​ളുണ്ട്‌. ബുദ്ധി​മാ​നാ​ണെ​ങ്കി​ലും അവനു സംസാ​രി​ക്കാ​നോ കൈകളെ നിയ​ന്ത്രി​ക്കാ​നോ ഉള്ള ശേഷി​യില്ല. എന്നിട്ടും, കപ്പിൽ അരക്കപ്പ്‌ പാനീയം എടുത്ത്‌ അതു തൂകി​പ്പോ​കാ​തെ കുടി​ക്കാൻ അവൻ പഠിച്ചി​രി​ക്കു​ന്നു. ശരീര​വും മനസ്സും തമ്മിലുള്ള ഏകോ​പനം ഇത്ര​ത്തോ​ളം നേടി​യെ​ടു​ത്തത്‌ ഇഷ്ടപാ​നീ​യ​മായ പാൽ തനിയെ കുടി​ക്കാൻ അവനെ പ്രാപ്‌ത​നാ​ക്കു​ന്നു.

വൈക​ല്യ​ങ്ങ​ളു​ടെ മേലുള്ള മറ്റൊരു ചെറിയ വിജയ​മാ​യാണ്‌ ബ്രയന്റെ മാതാ​പി​താ​ക്കൾ ഈ നേട്ടത്തെ കാണു​ന്നത്‌. അവന്റെ അമ്മ ലാറി പറയുന്നു: “ഞങ്ങൾ അവനെ കാട്ടിലെ ആരടു​പ്പ​മുള്ള തടിവൃ​ക്ഷ​മാ​യാണ്‌ കാണു​ന്നത്‌. ഈ വൃക്ഷങ്ങൾ മറ്റുള്ള​വ​യു​ടെ അത്രയും വേഗത്തിൽ വളരു​ക​യി​ല്ലെ​ങ്കി​ലും, അത്‌ അങ്ങേയറ്റം മൂല്യ​മുള്ള തടി ഉത്‌പാ​ദി​പ്പി​ക്കു​ന്നു. സമാന​മാ​യി വൈക​ല്യ​മുള്ള കുട്ടികൾ സാവധാ​നമേ വളർച്ച പ്രാപി​ക്കു​ക​യു​ള്ളൂ. പക്ഷേ അവരുടെ മാതാ​പി​താ​ക്കളെ സംബന്ധി​ച്ചി​ട​ത്തോ​ളം അവർ നിലനിൽക്കുന്ന മൂല്യ​മുള്ള കൊച്ചു കരു​വേ​ല​ക​ങ്ങ​ളും തേക്കു മരങ്ങളു​മാ​യി തീരുന്നു.”

മൂന്നാ​മ​താ​യി, തങ്ങളുടെ കുഞ്ഞിന്റെ സ്‌നേഹം തുളു​മ്പുന്ന പ്രകൃതം പല മാതാ​പി​താ​ക്ക​ളു​ടെ​യും മനസ്സു കുളിർപ്പി​ക്കു​ന്നു. ഇംഗാഡ്‌ പറയുന്നു: “യൂനി​ക്കിന്‌ നേരത്തേ ഉറങ്ങാൻ പോകു​ന്ന​താണ്‌ ഇഷ്ടം. എന്നും ഉറങ്ങു​ന്ന​തി​നു മുമ്പ്‌ കുടും​ബാം​ഗ​ങ്ങൾക്ക്‌ ഓരോ​രു​ത്തർക്കും അവൾ മുത്തം കൊടു​ക്കും. ഞങ്ങൾ വീട്ടിൽ എത്തുന്ന​തി​നു​മുമ്പ്‌ അവൾ ഉറങ്ങി​പ്പോ​കു​ക​യാ​ണെ​ങ്കിൽ, ഉണർന്നി​രി​ക്കാൻ കഴിയാ​ത്ത​തിൽ ഖേദം പ്രകടി​പ്പി​ച്ചു​കൊ​ണ്ടുള്ള ഒരു ചെറിയ കുറിപ്പ്‌ അവൾ എഴുതി​വെ​ച്ചി​രി​ക്കും. ഞങ്ങളെ സ്‌നേ​ഹി​ക്കു​ന്നു​ണ്ടെ​ന്നും രാവിലെ ഞങ്ങളെ കാണാൻ അതിയാ​യി ആശിക്കു​ന്നെ​ന്നും​കൂ​ടെ അവൾ അതിൽ എഴുതി​യി​രി​ക്കും.”

മാർക്കു​സിന്‌ സംസാ​ര​ശേ​ഷി​യില്ല. എന്നിരു​ന്നാ​ലും മാതാ​പി​താ​ക്ക​ളോട്‌ താൻ അവരെ സ്‌നേ​ഹി​ക്കു​ന്നു​വെന്നു പറയാൻ തക്കവണ്ണം ആംഗ്യ​ഭാ​ഷ​യി​ലെ ഏതാനും വാക്കുകൾ അവൻ പ്രയാ​സ​പ്പെട്ടു പഠി​ച്ചെ​ടു​ത്തു. മാനസിക മാന്ദ്യ​മുള്ള റ്റീയയു​ടെ മാതാ​പി​താ​ക്കൾ തങ്ങളുടെ വികാരം ഇപ്രകാ​രം പ്രകടി​പ്പി​ച്ചു: “സ്‌നേഹം, ഊഷ്‌മളത, ആർദ്രത, കെട്ടി​പ്പി​ടു​ത്തങ്ങൾ, ഉമ്മകൾ എല്ലാം​കൊണ്ട്‌ അവൾ ഞങ്ങളുടെ ജീവിതം സമ്പുഷ്ട​മാ​ക്കി​യി​രി​ക്കു​ന്നു.” മാതാ​പി​താ​ക്കൾ ഇത്തരം കുട്ടി​കൾക്ക്‌ വാക്കു​ക​ളി​ലൂ​ടെ​യും മറ്റു രീതി​യി​ലും വളരെ​യ​ധി​കം സ്‌നേ​ഹ​വും വാത്സല്യ​വും ചൊരി​യണം എന്നുള്ളതു പറയാ​തെ​തന്നെ വ്യക്തമാണ്‌.

നാലാ​മ​താ​യി, കുട്ടി ദൈവ​ത്തി​ലുള്ള വിശ്വാ​സം പ്രകട​മാ​ക്കു​മ്പോൾ ക്രിസ്‌തീയ മാതാ​പി​താ​ക്കൾക്ക്‌ ആഴമായ സംതൃ​പ്‌തി അനുഭ​വ​പ്പെ​ടു​ന്നു. അതിന്‌ നല്ലൊരു ഉദാഹ​ര​ണ​മാണ്‌ യൂഹാ. തന്റെ പിതാ​വി​ന്റെ ശവസം​സ്‌കാര സമയത്ത്‌, ‘ഒന്നു പ്രാർഥി​ച്ചോ​ട്ടേ’ എന്നു ചോദി​ച്ചു​കൊണ്ട്‌ അവൻ എല്ലാവ​രെ​യും അമ്പരപ്പി​ച്ചു. ഹ്രസ്വ​മായ പ്രാർഥ​ന​യിൽ, തന്റെ പിതാവ്‌ ദൈവ​ത്തി​ന്റെ ഓർമ​യി​ലു​ണ്ടെ​ന്നും തക്കസമ​യത്ത്‌ ദൈവം അദ്ദേഹത്തെ ഉയിർപ്പി​ക്കു​മെ​ന്നു​മുള്ള തന്റെ വിശ്വാ​സ​ത്തെ​ക്കു​റിച്ച്‌ അവൻ പരാമർശി​ച്ചു. എന്നിട്ട്‌ അവൻ കുടും​ബാം​ഗ​ങ്ങ​ളു​ടെ ഓരോ​രു​ത്ത​രു​ടെ​യും പേരു പരാമർശി​ച്ചു​കൊണ്ട്‌ അവരെ​യെ​ല്ലാം സഹായി​ക്ക​ണ​മേ​യെന്ന്‌ ദൈവ​ത്തോ​ടു യാചിച്ചു.

സമാന​മാ​യി ദൈവ​ത്തി​ലുള്ള യൂനി​ക്കി​ന്റെ ആശ്രയ​വും അവളുടെ മാതാ​പി​താ​ക്കളെ സന്തുഷ്ട​രാ​ക്കു​ന്നു. പഠിക്കുന്ന കാര്യങ്ങൾ എല്ലാ​മൊ​ന്നും യൂനി​ക്കി​നു മനസ്സി​ലാ​കാ​റില്ല. ഉദാഹ​ര​ണ​ത്തിന്‌, പല ബൈബിൾ കഥാപാ​ത്ര​ങ്ങ​ളെ​യും അവൾക്ക്‌ അറിയാം, പക്ഷേ ആ കഥാപാ​ത്ര​ങ്ങളെ മറ്റു വസ്‌തു​ത​ക​ളു​മാ​യോ അവൾക്ക്‌ അറിയാ​വുന്ന മറ്റു വിവര​ങ്ങ​ളു​മാ​യോ ബന്ധപ്പെ​ടു​ത്തി മനസ്സിൽ ഒരു പൂർണ ചിത്രം രൂപ​പ്പെ​ടു​ത്തി​യെ​ടു​ക്കാൻ അവൾക്കു കഴിയില്ല. എന്നിരു​ന്നാ​ലും ഒരുനാൾ സർവശ​ക്ത​നായ ദൈവം ഭൂമി​യി​ലെ പ്രശ്‌ന​ങ്ങ​ളെ​ല്ലാം നീക്കം ചെയ്യു​മെ​ന്നുള്ള ആശയം അവൾ ഗ്രഹി​ച്ചി​രി​ക്കു​ന്നു. ദൈവം വാഗ്‌ദാ​നം ചെയ്‌തി​രി​ക്കുന്ന പുതിയ ഭൂമി​യിൽ താൻ പൂർണ മാനസിക പ്രാപ്‌തി​ക​ളോ​ടെ ജീവി​ക്കുന്ന കാലത്തി​നാ​യി യൂനിക്ക്‌ നോക്കി​പ്പാർത്തി​രി​ക്കു​ന്നു.

സ്വാ​ശ്ര​യ​ത്വം പ്രോ​ത്സാ​ഹി​പ്പി​ക്കുക

മാനസിക വൈക​ല്യ​മുള്ള കുട്ടികൾ എന്നും കുട്ടി​ക​ളാ​യി​രി​ക്കില്ല. അവർ മാനസിക വൈക​ല്യ​മുള്ള മുതിർന്ന​വ​രാ​യി വളരും. അതു​കൊണ്ട്‌ ആവശ്യ​മാ​യ​തി​ലും അധികം പരാ​ശ്ര​യ​ത്വം വളർത്തി​യെ​ടു​ക്കാ​തി​രി​ക്കാൻ ഇങ്ങനെ​യുള്ള കുട്ടി​കളെ മാതാ​പി​താ​ക്കൾ സഹായി​ക്കു​ന്നത്‌ ഉചിത​മാണ്‌. മാർക്കു​സി​ന്റെ അമ്മ ആനി പറയുന്നു: “മാർക്കു​സിന്‌ ആവശ്യ​മാ​യ​തെ​ല്ലാം ഞങ്ങൾതന്നെ ചെയ്‌തു​കൊ​ടു​ക്കു​ന്ന​താ​ണു കൂടുതൽ എളുപ്പം. പക്ഷേ കഴിയു​ന്നി​ട​ത്തോ​ളം കാര്യങ്ങൾ സ്വന്തമാ​യി ചെയ്യാൻ അവനെ പ്രാപ്‌ത​നാ​ക്കാ​നാ​ണു ഞങ്ങൾ പരമാ​വധി ശ്രമി​ച്ചത്‌.” യൂനി​ക്കി​ന്റെ അമ്മ കൂട്ടി​ച്ചേർക്കു​ന്നു: “യൂനി​ക്കിന്‌ ആകർഷ​ക​മായ പല ഗുണങ്ങ​ളു​മുണ്ട്‌, പക്ഷേ ചില സമയത്ത്‌ അവൾ വാശി​പി​ടി​ക്കും. അവൾക്ക്‌ ഇഷ്ടമി​ല്ലാത്ത എന്തെങ്കി​ലും അവളെ​ക്കൊ​ണ്ടു ചെയ്യി​ക്ക​ണ​മെ​ങ്കിൽ, ഞങ്ങളെ സന്തോ​ഷി​പ്പി​ക്കാ​നുള്ള അവളുടെ ആഗ്രഹ​ത്തെ​ക്കു​റിച്ച്‌ അവളെ ഓർമി​പ്പി​ക്കേണ്ടി വരും. ഒരു കാര്യം ചെയ്യാ​മെന്ന്‌ അവൾ സമ്മതി​ച്ചാൽപ്പോ​ലും അതു പൂർത്തി​യാ​ക്കു​ന്ന​തു​വരെ പുറ​കേ​ന​ടന്ന്‌ അവളെ പ്രോ​ത്സാ​ഹി​പ്പി​ച്ചു​കൊ​ണ്ടി​രി​ക്കണം.”

ബ്രയന്റെ അമ്മ ലാറി അവന്റെ ജീവിതം കൂടുതൽ സംതൃ​പ്‌തി​ക​ര​മാ​ക്കാ​നുള്ള വഴികൾ നിരന്തരം തേടുന്നു. മൂന്നു വർഷം​കൊണ്ട്‌, ലാറി​യും അവളുടെ ഭർത്താ​വും കമ്പ്യൂ​ട്ട​റിൽ ടൈപ്പു ചെയ്യാൻ പഠിക്കു​ന്ന​തിന്‌ ബ്രയനെ സഹായി​ച്ചി​രി​ക്കു​ന്നു. നിറഞ്ഞ സംതൃ​പ്‌തി​യോ​ടെ ബ്രയൻ ഇപ്പോൾ കൂട്ടു​കാർക്കും കുടും​ബാം​ഗ​ങ്ങൾക്കും ഇ-മെയി​ലു​കൾ അയയ്‌ക്കു​ന്നു. പക്ഷേ ടൈപ്പു ചെയ്യു​മ്പോൾ ആരെങ്കി​ലും അവന്റെ കണ​ങ്കൈക്കു താങ്ങു കൊടു​ക്കണം. എന്നാൽ കൈമു​ട്ടി​നു മാത്രം താങ്ങു കൊടു​ത്താൽ മതി എന്ന അവസ്ഥയി​ലേക്കു പുരോ​ഗ​മി​ക്കാൻ അവന്റെ മാതാ​പി​താ​ക്കൾ അവനെ സഹായി​ക്കു​ന്നു. ആ സഹായം മാത്രം ചെയ്‌തു​കൊ​ടു​ക്കു​ന്ന​തി​നാൽ, വർധിച്ച അളവി​ലുള്ള സ്വാ​ശ്ര​യ​ശീ​ലം വളർത്തി​യെ​ടു​ക്കാൻ അവനു കഴിയു​മെന്ന്‌ അവർക്ക്‌ അറിയാം.

എന്നിരു​ന്നാ​ലും മാതാ​പി​താ​ക്കൾ കുട്ടി​ക​ളിൽ അമിത​മായ പ്രതീക്ഷ വെച്ചു​പു​ലർത്തു​ക​യോ പുരോ​ഗ​മി​ക്കാൻ തക്കവണ്ണം അവരു​ടെ​മേൽ കൂടുതൽ സമ്മർദം ചെലു​ത്തു​ക​യോ ചെയ്യരുത്‌. ഓരോ കുട്ടി​യു​ടെ​യും പ്രാപ്‌തി വ്യത്യ​സ്‌ത​മാണ്‌. ദ സ്‌പെ​ഷ്യൽ ചൈൽഡ്‌ എന്ന പുസ്‌തകം അഭി​പ്രാ​യ​പ്പെ​ടു​ന്നു: “നിരാശ ഒഴിവാ​ക്കു​ന്ന​തി​നാ​യി, സ്വാ​ശ്ര​യ​ത്വം പ്രോ​ത്സാ​ഹി​പ്പി​ക്കു​ന്ന​തും ആവശ്യ​മായ സഹായം പ്രദാനം ചെയ്യു​ന്ന​തും തമ്മിൽ ഒരു സമനില കാത്തു​സൂ​ക്ഷി​ക്കാൻ ശ്രമി​ക്കുക എന്നതാണ്‌ പിൻപ​റ്റാ​വുന്ന ഒരു നല്ല പൊതു​ത​ത്ത്വം.”

സഹായ​ത്തി​ന്റെ ഏറ്റവും വലിയ ഉറവിടം

വൈക​ല്യ​മുള്ള കുട്ടി​ക​ളു​ടെ മാതാ​പി​താ​ക്കൾക്ക്‌ അങ്ങേയറ്റം ക്ഷമയും സഹിഷ്‌ണു​ത​യും ആവശ്യ​മാണ്‌. പ്രശ്‌നങ്ങൾ ഒന്നിനു പുറകേ ഒന്നായി വരു​മ്പോൾ, പല മാതാ​പി​താ​ക്ക​ളും ഭഗ്നാശ​രാ​കു​ന്നു. തളർന്നു​പോ​കു​ന്നത്‌ അവസ്ഥ കൂടുതൽ വഷളാ​ക്കു​കയേ ഉള്ളൂ. മാതാ​പി​താ​ക്കൾ കണ്ണീർ പൊഴി​ക്കു​ക​യും തങ്ങളോ​ടു​തന്നെ സഹതപി​ക്കു​ക​യും ചെയ്യുന്നു. ഈ അവസ്ഥയിൽ എന്തു ചെയ്യാൻ സാധി​ക്കും?

മാതാ​പി​താ​ക്കൾക്ക്‌ “പ്രാർത്ഥന കേൾക്കു​ന്ന​വ​നായ” ദൈവത്തെ വിളി​ച്ച​പേ​ക്ഷി​ക്കാൻ സാധി​ക്കും. (സങ്കീർത്തനം 65:2) സഹിച്ചു​നിൽക്കാ​നുള്ള ധൈര്യ​വും പ്രത്യാ​ശ​യും ശക്തിയും അവൻ നൽകും. (1 ദിനവൃ​ത്താ​ന്തം 29:12; സങ്കീർത്തനം 27:14) അവൻ നമ്മുടെ വേദനി​ക്കുന്ന ഹൃദയ​ങ്ങൾക്കു സാന്ത്വ​ന​മേ​കും. നാം ബൈബിൾ പ്രദാനം ചെയ്യുന്ന “ആശയിൽ സന്തോഷി”ക്കാൻ അവൻ ആഗ്രഹി​ക്കു​ന്നു. (റോമർ 12:12; റോമർ 15:4, 5; 2 കൊരി​ന്ത്യർ 1:3, 4) “കുരു​ട​ന്മാ​രു​ടെ കണ്ണു തുറന്നു​വ​രും; ചെകി​ട​ന്മാ​രു​ടെ ചെവി അടഞ്ഞി​രി​ക്ക​യു​മില്ല. അന്നു മുടന്തൻ മാനി​നെ​പ്പോ​ലെ ചാടും; ഊമന്റെ നാവും ഉല്ലസിച്ചു ഘോഷി​ക്കും” എന്നുള്ള ബൈബിൾ പ്രവചനം ഭാവി​യിൽ നിവൃ​ത്തി​യേ​റു​മ്പോൾ തങ്ങളുടെ കുഞ്ഞും മാനസി​ക​വും ശാരീ​രി​ക​വു​മായ പൂർണാ​രോ​ഗ്യം ആസ്വദി​ക്കു​മെന്ന്‌ ദൈവ​ത്തിൽ ആശ്രയി​ക്കുന്ന മാതാ​പി​താ​ക്കൾക്ക്‌ ഉറപ്പു​ണ്ടാ​യി​രി​ക്കാ​നാ​കും.—യെശയ്യാ​വു 35:5, 6; സങ്കീർത്തനം 103:2, 3.

മാതാപിതാക്കൾക്കു ചെയ്യാൻ കഴിയു​ന്നത്‌

◼ കുഞ്ഞിന്റെ വൈക​ല്യ​ത്തെ​ക്കു​റി​ച്ചുള്ള വിവരങ്ങൾ അറിഞ്ഞി​രി​ക്കുക.

◼ ക്രിയാ​ത്മ​ക​മായ വീക്ഷണം വെച്ചു​പു​ലർത്തുക.

◼ കഴിയു​ന്നി​ട​ത്തോ​ളം സ്വന്തമാ​യി കാര്യങ്ങൾ ചെയ്യാൻ കുട്ടിയെ സഹായി​ക്കുക.

◼ ധൈര്യ​ത്തി​നും പ്രത്യാ​ശ​യ്‌ക്കും ശക്തിക്കു​മാ​യി ദൈവ​ത്തോട്‌ അപേക്ഷി​ക്കുക.

മറ്റുള്ളവർക്കു ചെയ്യാൻ കഴിയു​ന്നത്‌

◼ കുട്ടി​യു​ടെ പ്രായ​ത്തി​ന​നു​സൃ​ത​മാ​യും ആത്മാർഥ​ത​യോ​ടെ​യും അവനോ​ടു സംസാ​രി​ക്കുക.

◼ മാതാ​പി​താ​ക്ക​ളോ​ടു കുട്ടി​യെ​പ്പറ്റി സംസാ​രി​ക്കു​ക​യും അവരെ അഭിന​ന്ദി​ക്കു​ക​യും ചെയ്യുക.

◼ മാതാ​പി​താ​ക്ക​ളു​ടെ വികാ​രങ്ങൾ മനസ്സി​ലാ​ക്കു​ക​യും പരിഗണന കാണി​ക്കു​ക​യും ചെയ്യുക.

◼ ബുദ്ധി​മാ​ന്ദ്യ​മുള്ള കുട്ടി​ക​ളു​ടെ മാതാ​പി​താ​ക്ക​ളു​ടെ​യും കുടും​ബാം​ഗ​ങ്ങ​ളു​ടെ​യും പ്രവർത്ത​ന​ങ്ങ​ളിൽ പങ്കു​ചേ​രുക.

[26-ാം പേജിലെ ചതുരം/ചിത്രം]

മറ്റുള്ളവർക്കു സഹായി​ക്കാ​നാ​കുന്ന വിധം

മാര​ത്തോൺ ഓട്ടക്കാ​രു​ടെ സഹിഷ്‌ണുത കാണി​കളെ അതിശ​യി​പ്പി​ക്കു​ന്ന​തു​പോ​ലെ, ദിവസ​ത്തി​ലെ 24 മണിക്കൂ​റും ആഴ്‌ച​യി​ലെ ഏഴു ദിവസ​വും വൈക​ല്യ​മുള്ള കുട്ടിയെ പരിപാ​ലി​ക്കുന്ന മാതാ​പി​താ​ക്ക​ളു​ടെ സഹിഷ്‌ണുത നിങ്ങളെ വിസ്‌മ​യം​കൊ​ള്ളി​ക്കും. മാര​ത്തോൺ നടക്കുന്ന വഴിയി​ലു​ട​നീ​ളം കാണികൾ, ദാഹിച്ചു തളർന്നു​പോ​കാ​തി​രി​ക്കാൻ തക്കവണ്ണം ഓട്ടക്കാർക്കു വെള്ളം കൊടു​ക്കുന്ന രീതി​യുണ്ട്‌. വൈക​ല്യ​മുള്ള കുട്ടിയെ ജീവി​ത​കാ​ലം മുഴുവൻ പരിച​രി​ക്കുന്ന മാതാ​പി​താ​ക്കൾക്ക്‌ ആശ്വാ​സ​പ്ര​ദ​മായ പിന്തുണ നൽകാൻ നിങ്ങൾക്കു സാധി​ക്കു​മോ?

അവരുടെ മകനോ​ടോ മകളോ​ടോ വെറുതെ സംസാ​രി​ക്കു​ന്ന​താണ്‌ അവരെ സഹായി​ക്കാൻ കഴിയുന്ന ഒരു വിധം. കുട്ടി അധിക​മൊ​ന്നും അല്ലെങ്കിൽ ഒട്ടും​തന്നെ പ്രതി​ക​രി​ക്കാ​തെ വരു​മ്പോൾ ആദ്യ​മൊ​ക്കെ നിങ്ങൾക്ക്‌ അൽപ്പം അസ്വസ്ഥത അനുഭ​വ​പ്പെ​ടാം. എന്നിരു​ന്നാ​ലും, അത്തരത്തി​ലുള്ള പല കുട്ടി​ക​ളും ശ്രദ്ധി​ക്കാൻ ഇഷ്ടപ്പെ​ടു​ന്നു​വെ​ന്നും സാധ്യ​ത​യ​നു​സ​രിച്ച്‌ നിങ്ങൾ പറയു​ന്ന​തി​നെ​ക്കു​റിച്ച്‌ ഗഹനമാ​യി ചിന്തി​ക്കു​മെ​ന്നും മനസ്സിൽപ്പി​ടി​ക്കുക. സമു​ദ്ര​ത്തി​ന്റെ മുകൾപ്പ​ര​പ്പി​നു വളരെ താഴെ​യാ​യി ഒഴുകി​ന​ട​ക്കുന്ന ഹിമക്കു​ന്നു​കൾപോ​ലെ​യാണ്‌ ചിലരു​ടെ മനസ്സ്‌, ഉള്ളി​ന്റെ​യു​ള്ളി​ലെ വികാ​രങ്ങൾ അവരുടെ മുഖത്തു പ്രതി​ഫ​ലി​ച്ചെന്നു വരില്ല.a

സംഭാ​ഷണം കൂടുതൽ എളുപ്പ​മാ​ക്കാൻ ശിശു-നാഡീ​രോഗ വിദഗ്‌ധ​യായ ഡോ. ആന്നിക്കി കൊയി​സ്റ്റി​നെൻ ചില നിർദേ​ശങ്ങൾ നൽകുന്നു: “ആദ്യം അവരുടെ കുടും​ബ​ത്തെ​യും ഹോബി​ക​ളെ​യും കുറിച്ചു നിങ്ങൾക്കു സംസാ​രി​ക്കാ​വു​ന്ന​താണ്‌. തീരെ ചെറിയ കുട്ടി​ക​ളോ​ടു സംസാ​രി​ക്കു​ന്ന​തു​പോ​ലെയല്ല മറിച്ച്‌ അവരുടെ യഥാർഥ പ്രായ​ത്തി​ന​നു​സൃ​ത​മാ​യി അവരോ​ടു സംസാ​രി​ക്കുക. ചെറിയ വാചകങ്ങൾ ഉപയോ​ഗിച്ച്‌ ഒരു സമയത്ത്‌ ഒരു വിഷയ​ത്തെ​ക്കു​റി​ച്ചു മാത്രം സംസാ​രി​ക്കുക. നിങ്ങൾ സംസാ​രി​ക്കു​ന്നതു ഗ്രഹി​ക്കാൻ അവർക്കു സമയം നൽകുക.”

നിങ്ങൾ മാതാ​പി​താ​ക്ക​ളോ​ടും സംസാ​രി​ക്കേ​ണ്ടത്‌ ആവശ്യ​മാണ്‌. അവർ നേരി​ടുന്ന വൈകാ​രിക വെല്ലു​വി​ളി​ക​ളെ​ക്കു​റി​ച്ചു കൂടുതൽ മനസ്സി​ലാ​ക്കു​മ്പോൾ അവരോ​ടുള്ള നിങ്ങളു​ടെ സഹാനു​ഭൂ​തി​യും വർധി​ക്കും. ഉദാഹ​ര​ണ​ത്തിന്‌ മാർക്കു​സി​ന്റെ അമ്മ ആനി, തന്റെ പ്രിയ മകനെ അടുത്ത​റി​യാൻ വാഞ്‌ഛി​ക്കു​ന്നു. സംസാ​രി​ക്കാ​നോ മനസ്സി​ലു​ള്ളത്‌ എന്താ​ണെന്നു വിശദീ​ക​രി​ക്കാ​നോ അവനു കഴിയാ​ത്ത​തിൽ അവർക്കു വിഷമ​മുണ്ട്‌. താൻ മരിച്ചാൽ അവന്‌ അമ്മയി​ല്ലാ​താ​കു​മ​ല്ലോ എന്നോർത്ത്‌ അവർ വേവലാ​തി​പ്പെ​ടു​ന്നു.

മാനസിക വൈക​ല്യ​മുള്ള കുട്ടിയെ പരിപാ​ലി​ക്കു​ന്ന​തി​നാ​യി മാതാ​പി​താ​ക്കൾ എന്തെല്ലാം ചെയ്‌താ​ലും ശരി, ഇനിയും കൂടുതൽ ചെയ്യേ​ണ്ട​തു​ണ്ടെന്ന്‌ അവർക്കു ചില​പ്പോ​ഴൊ​ക്കെ തോന്നു​ന്നു. ബ്രയന്റെ അമ്മ ലാറി, അവനെ പരിപാ​ലി​ക്കു​ന്ന​തിൽ താൻ വരുത്തുന്ന ഓരോ ചെറിയ പിഴവി​നും സ്വയം കുറ്റ​പ്പെ​ടു​ത്തു​ന്നു. മറ്റു കുട്ടി​കൾക്കു കൂടുതൽ ശ്രദ്ധ നൽകാൻ കഴിയാ​ത്ത​തി​ലും അവൾക്കു കുറ്റ​ബോ​ധ​മുണ്ട്‌. അത്തരം മാതാ​പി​താ​ക്ക​ളോ​ടും അവരുടെ വികാ​ര​ങ്ങ​ളോ​ടും നിങ്ങൾ പ്രകട​മാ​ക്കുന്ന താത്‌പ​ര്യ​വും ആദരവും അവർക്കും കുട്ടി​കൾക്കും ആത്മാഭി​മാ​നം തോന്നാൻ ഇടയാ​ക്കു​ന്നു. ഇതി​നോ​ടുള്ള ബന്ധത്തിൽ ഇംഗാഡ്‌ പറയുന്നു: “എന്റെ മകളെ​ക്കു​റി​ച്ചു സംസാ​രി​ക്കാൻ എനിക്കി​ഷ്ട​മാണ്‌. യൂനി​ക്കു​മൊ​ത്തുള്ള എന്റെ ജീവി​ത​ത്തി​ലെ സന്തോ​ഷ​ത്തി​ലും സന്താപ​ത്തി​ലും പങ്കു​ചേ​രാൻ സന്നദ്ധത കാണി​ക്കു​ന്ന​വ​രോട്‌ എനിക്ക്‌ എന്തെന്നി​ല്ലാത്ത സ്‌നേഹം തോന്നു​ന്നു.”

നിങ്ങൾക്കു സഹായി​ക്കാൻ കഴിയുന്ന ചെറു​തും വലുതു​മായ മറ്റനേകം വിധങ്ങ​ളുണ്ട്‌. ഒരുപക്ഷേ മാതാ​പി​താ​ക്ക​ളെ​യും കുട്ടി​യെ​യും വീട്ടി​ലേക്കു ക്ഷണിക്കു​ക​യോ അല്ലെങ്കിൽ നിങ്ങളു​ടെ കുടും​ബ​ത്തി​ന്റെ പ്രവർത്ത​ന​ങ്ങ​ളിൽ പങ്കു​ചേ​രാൻ അവരോ​ടു പറയു​ക​യോ ചെയ്യാ​വു​ന്ന​താണ്‌. മാതാ​പി​താ​ക്കൾ വിശ്ര​മി​ക്കുന്ന സമയത്ത്‌ ഏതാനും മണിക്കൂർ കുട്ടി​യോ​ടൊ​ത്തു ചെലവ​ഴി​ക്കാ​നും നിങ്ങൾക്കു സാധി​ച്ചേ​ക്കും.

[അടിക്കു​റിപ്പ്‌]

[26-ാം പേജിലെ ചിത്രം]

ആത്മാർഥമായ താത്‌പ​ര്യം കാണി​ക്കു​ന്നത്‌ മാതാ​പി​താ​ക്ക​ളു​ടെ​യും കുട്ടി​യു​ടെ​യും ആത്മാഭി​മാ​നം വർധി​പ്പി​ക്കു​ന്നു

[27-ാം പേജിലെ ചിത്രം]

യൂനിക്കിനെപ്പോലെ, ബുദ്ധി​മാ​ന്ദ്യ​മുള്ള കുട്ടി​കൾക്ക്‌ വളർന്നു​വ​രവേ സ്‌നേഹം ലഭി​ക്കേ​ണ്ട​തുണ്ട്‌

[28-ാം പേജിലെ ചിത്രം]

സ്വാശ്രയശീലം വളർത്തി​യെ​ടു​ക്കു​ന്ന​തിന്‌, ലാറി തന്റെ മകൻ ബ്രയനെ ടൈപ്പു ചെയ്യാൻ പഠിപ്പി​ച്ചി​രി​ക്കു​ന്നു