പ്രത്യാശ അതിന്‌ യഥാർഥ​ത്തിൽ എന്തെങ്കി​ലും ശക്തിയു​ണ്ടോ?

ഡാനി​യേ​ലിന്‌ പത്തുവ​യസ്സേ ഉണ്ടായി​രു​ന്നു​ള്ളൂ. പക്ഷേ ഒരു വർഷമാ​യി അവൻ കാൻസ​റി​നോട്‌ മല്ലിടു​ക​യാ​യി​രു​ന്നു. ഡോക്ടർമാർക്കും പ്രിയ​പ്പെ​ട്ട​വർക്കും അവനെ കുറി​ച്ചുള്ള സകല പ്രതീ​ക്ഷ​യും അസ്‌ത​മി​ച്ചി​രു​ന്നു. എന്നാൽ ഡാനി​യേൽ പ്രതീക്ഷ കൈ​വെ​ടി​ഞ്ഞില്ല. താൻ വളർന്നു വലുതാ​യി ഒരു ഗവേഷ​ക​നാ​യിട്ട്‌ കാൻസ​റിന്‌ ഒരു പ്രതി​വി​ധി കണ്ടുപി​ടി​ക്കു​മെന്ന്‌ അവൻ വിശ്വ​സി​ച്ചു. തന്റെ പ്രത്യേ​ക​തരം കാൻസർ ചികി​ത്സി​ക്കു​ന്ന​തിൽ വിദഗ്‌ധ​നായ ഒരു ഡോക്ടർ തന്നെക്കാ​ണാൻ വരുന്നുണ്ട്‌ എന്നറിഞ്ഞ്‌ അവൻ ഏറെ പ്രതീ​ക്ഷ​യോ​ടെ കാത്തി​രു​ന്നു. ഡോക്ട​റു​ടെ സന്ദർശന ദിവസം വന്നു. പക്ഷേ, കാലാവസ്ഥ മോശ​മാ​യ​തി​നാൽ അദ്ദേഹ​ത്തി​നു തന്റെ യാത്ര റദ്ദാ​ക്കേ​ണ്ടി​വന്നു. അന്ന്‌ ആദ്യമാ​യി ഡാനി​യേൽ നിരാ​ശ​നാ​യി. അവനിൽ അതുവരെ ഉണ്ടായി​രുന്ന ഉത്സാഹ​മെ​ല്ലാം പോയ്‌മ​റഞ്ഞു. ഏതാനും ദിവസ​ങ്ങൾക്കകം അവൻ മരിച്ചു.

ഒരു വ്യക്തി​യു​ടെ ആരോ​ഗ്യ​ത്തിൽ പ്രത്യാ​ശ​യ്‌ക്കും നിരാ​ശ​യ്‌ക്കും ഉള്ള പങ്കിനെ കുറിച്ച്‌ പഠനം നടത്തിയ ഒരു ആരോഗ്യ പ്രവർത്തകൻ വിവരി​ച്ച​താണ്‌ ഡാനി​യേ​ലി​ന്റെ കഥ. നിങ്ങളും ഇതു​പോ​ലുള്ള കഥകൾ കേട്ടി​രി​ക്കാൻ സാധ്യ​ത​യുണ്ട്‌. ഉദാഹ​ര​ണ​ത്തിന്‌, മരണം വാതിൽക്ക​ലെ​ത്തിയ, പ്രായ​മേറെ ചെന്ന ഒരു വ്യക്തി വളരെ നാളു​ക​ളാ​യി ഒരു സുപ്ര​ധാന സംഭവ​ത്തി​നു​വേണ്ടി, ഒരുപക്ഷേ പ്രിയ​പ്പെട്ട ആരു​ടെ​യെ​ങ്കി​ലും സന്ദർശ​ന​ത്തി​നോ, ഏതെങ്കി​ലും ഒരു മധുര​സ്‌മ​ര​ണ​യു​ടെ വാർഷി​ക​ത്തി​നോ വേണ്ടി, ആകാം​ക്ഷ​യോ​ടെ നോക്കി​പ്പാർത്തി​രി​ക്കു​ന്നു. കാത്തു​കാ​ത്തി​രുന്ന ആ മധുര​നി​മി​ഷങ്ങൾ വന്നു​പോ​കു​ന്നു, അതോടെ വ്യക്തി​യും മരിക്കു​ന്നു. ഇത്തരം സംഭവ​ങ്ങ​ളിൽ എന്താണ്‌ ഉൾപ്പെ​ട്ടി​രി​ക്കു​ന്നത്‌? ചിലർ വിശ്വ​സി​ക്കു​ന്ന​തു​പോ​ലെ പ്രത്യാ​ശ​യ്‌ക്ക്‌ അത്രമേൽ ശക്തി​ചെ​ലു​ത്താ​നാ​കു​മോ?

ശുഭാ​പ്‌തി​വി​ശ്വാ​സം, പ്രത്യാശ, മറ്റു ക്രിയാ​ത്മക വികാ​രങ്ങൾ എന്നിവ​യ്‌ക്ക്‌ ഒരു വ്യക്തി​യു​ടെ ജീവി​ത​ത്തി​ലും ആരോ​ഗ്യ​ത്തി​ലും ശക്തമായ പ്രഭാവം ചെലു​ത്താ​നാ​കു​മെന്ന്‌ അഭി​പ്രാ​യ​പ്പെ​ടുന്ന വൈദ്യ​ശാ​സ്‌ത്ര ഗവേഷ​ക​രു​ടെ എണ്ണം ഏറിവ​രി​ക​യാണ്‌. എന്നാൽ അത്തരം വീക്ഷണ​ങ്ങളെ എല്ലാവ​രു​മൊ​ന്നും ഇരു​കൈ​യും നീട്ടി സ്വീക​രി​ച്ചി​ട്ടില്ല. ശാസ്‌ത്രീയ പിന്തു​ണ​യൊ​ന്നു​മി​ല്ലാത്ത വെറും കെട്ടു​ക​ഥ​ക​ളാണ്‌ ഇതെന്ന്‌ ആരോ​പി​ച്ചു​കൊണ്ട്‌ ചില ഗവേഷകർ ഈ അവകാ​ശ​വാ​ദത്തെ അപ്പാടെ തള്ളിക്ക​ള​യു​ന്നു. ശാരീ​രിക അനാ​രോ​ഗ്യ​ത്തി​ലേക്കു നയിക്കുന്ന ഘടകങ്ങൾ ശാരീ​രി​ക​മാ​യ​വ​ത​ന്നെ​യാണ്‌ എന്നു വിശ്വ​സി​ക്കാ​നാണ്‌ അവർക്കി​ഷ്ടം.

വാസ്‌ത​വ​ത്തിൽ, പ്രത്യാ​ശ​യു​ടെ പ്രാധാ​ന്യ​ത്തെ കുറി​ച്ചുള്ള സന്ദേഹം ഒരു പുതിയ കാര്യമല്ല. ആയിര​ക്ക​ണ​ക്കി​നു വർഷങ്ങൾക്കു മുമ്പ്‌ ഗ്രീക്ക്‌ തത്ത്വജ്ഞാ​നി​യാ​യി​രുന്ന അരി​സ്റ്റോ​ട്ടി​ലി​നോട്‌ പ്രത്യാ​ശയെ നിർവ​ചി​ക്കാൻ ആവശ്യ​പ്പെ​ട്ട​പ്പോൾ, “അത്‌ ഒരു ദിവാ​സ്വ​പ്‌ന​മാണ്‌” എന്ന്‌ അദ്ദേഹം പറയു​ക​യു​ണ്ടാ​യി. കുറെ​ക്കൂ​ടെ അടുത്ത​കാ​ലത്ത്‌, അമേരി​ക്കൻ രാജ്യ​ത​ന്ത്ര​ജ്ഞ​നായ ബെഞ്ചമിൻ ഫ്രാങ്ക്‌ളിൻ ഇങ്ങനെ തുറന്ന​ടി​ച്ചു: “പ്രത്യാ​ശയെ നമ്പുന്നവൻ വിശന്നു മരിക്കും.”

അങ്ങനെ​യെ​ങ്കിൽ പ്രത്യാശ സംബന്ധിച്ച വാസ്‌തവം എന്താണ്‌? അവ എല്ലായ്‌പോ​ഴും വെറും കിനാ​വു​ക​ളാ​ണോ, സാന്ത്വ​ന​ത്തി​നാ​യി ആളുക​ളു​ടെ മുന്നിൽ തുറക്കുന്ന മിഥ്യാ​വി​ചാ​രങ്ങൾ? അതോ, അതി​ലെ​ല്ലാം ഉപരി​യായ എന്തോ ഒന്ന്‌—നമ്മു​ടെ​യെ​ല്ലാം ആരോ​ഗ്യ​ത്തി​നും സന്തോ​ഷ​ത്തി​നും അനിവാ​ര്യ​മായ, യഥാർഥ അടിസ്ഥാ​ന​വും യഥാർഥ പ്രയോ​ജ​ന​ങ്ങ​ളും ഉള്ള ഒന്ന്‌—ആണു പ്രത്യാശ എന്നു ചിന്തി​ക്കാൻ നമുക്ക്‌ ഈടുറ്റ കാരണ​മു​ണ്ടോ? (g04 4/22)

നമുക്ക്‌ പ്രത്യാശ ആവശ്യ​മാ​യി​രി​ക്കു​ന്നത്‌ എന്തു​കൊണ്ട്‌?

മുൻ ലേഖന​ത്തി​ന്റെ തുടക്ക​ത്തിൽ പരാമർശിച്ച, കാൻസ​റിന്‌ ഇരയായ കൊച്ചു​ഡാ​നി​യേൽ തന്റെ പ്രതീ​ക്ഷകൾ കൈവി​ടാ​തി​രു​ന്നെ​ങ്കി​ലോ? അവൻ കാൻസ​റി​നെ ചെറുത്തു തോൽപ്പി​ക്കു​മാ​യി​രു​ന്നോ? അവൻ ഇന്നും ജീവ​നോ​ടെ ഇരിക്കു​മാ​യി​രു​ന്നോ? പ്രത്യാ​ശ​യു​ടെ ഏറ്റവും തീക്ഷ്‌ണ​രായ പ്രയോ​ക്താ​ക്കൾ പോലും ഇത്തരം അവകാ​ശ​വാ​ദങ്ങൾ ഉന്നയി​ക്കു​മെന്നു തോന്നു​ന്നില്ല. അതേ, പ്രത്യാ​ശ​യു​ടെ പ്രയോ​ജ​ന​ങ്ങളെ പെരു​പ്പി​ച്ചു​കാ​ണു​ന്നത്‌ ഒഴിവാ​ക്കേ​ണ്ടതു പ്രധാ​ന​മാണ്‌. അത്‌ ഒരു സർവ​രോ​ഗ​സം​ഹാ​രി​യോ ഒറ്റമൂ​ലി​യോ അല്ല.

ഗുരു​ത​ര​മാ​യ രോഗാ​വ​സ്ഥ​യിൽ ആയിരി​ക്കുന്ന വ്യക്തി​ക​ളോട്‌ ഇടപെ​ടു​മ്പോൾ പ്രത്യാ​ശ​യു​ടെ ശക്തി പെരു​പ്പി​ച്ചു കാണി​ക്കു​ന്ന​തി​ന്റെ അപകടത്തെ കുറിച്ച്‌ ഡോ. നേഥൻ ചെർനി, സിബി​എസ്‌ ന്യൂസു​മാ​യുള്ള ഒരു അഭിമു​ഖ​ത്തിൽ മുന്നറി​യി​പ്പു നൽകി. അദ്ദേഹം ഇപ്രകാ​രം പറഞ്ഞു: “ആവശ്യ​ത്തിന്‌ ധ്യാനി​ക്കു​ന്നില്ല, ക്രിയാ​ത്മ​ക​മായ വിധത്തിൽ ചിന്തി​ക്കു​ന്നില്ല എന്നൊക്കെ പറഞ്ഞ്‌ തങ്ങളുടെ ഭാര്യ​മാ​രെ കുറ്റ​പ്പെ​ടു​ത്തുന്ന ഭർത്താ​ക്ക​ന്മാ​രെ ഞങ്ങൾ കണ്ടിട്ടുണ്ട്‌.” അദ്ദേഹം തുടർന്ന്‌ ഇങ്ങനെ പറഞ്ഞു: “ഈ ചിന്താ​രീ​തി കാൻസർ നിയ​ന്ത്രണം സംബന്ധിച്ച്‌ തെറ്റായ ഒരു ധാരണ ഉളവാ​ക്കി​യി​രി​ക്കു​ന്നു. രോഗി​യു​ടെ അവസ്ഥ വഷളാ​കു​ന്നത്‌ അയാളു​ടെ കുറ്റം കൊണ്ടാണ്‌, അതായത്‌ അയാൾ തന്റെ അർബുദ വളർച്ചയെ വേണ്ടവി​ധം നിയ​ന്ത്രി​ക്കാ​ത്ത​തു​കൊ​ണ്ടാണ്‌ എന്നാണു ചിലരു​ടെ വിചാരം, അത്‌ ശരിയല്ല.”

വാസ്‌ത​വ​ത്തിൽ, ഒരു മാരക രോഗ​ത്തോ​ടു മല്ലിട്ടു​കൊ​ണ്ടി​രി​ക്കു​ന്നവർ തങ്ങളുടെ ശക്തി മുഴു​വ​നും ചോർത്തി​ക്ക​ള​യുന്ന പ്രയാ​സ​ക​ര​മായ ഒരു പോരാ​ട്ട​ത്തിൽ ഏർപ്പെ​ട്ടി​രി​ക്കു​ക​യാണ്‌. കനത്ത ഭാരവു​മാ​യി കഴിയുന്ന അങ്ങനെ​യു​ള്ള​വ​രു​ടെ​മേൽ കുറ്റ​ബോ​ധ​വും​കൂ​ടെ അടി​ച്ചേൽപ്പിച്ച്‌ കഷ്ടപ്പെ​ടു​ത്താൻ പ്രിയ​പ്പെ​ട്ടവർ തീർച്ച​യാ​യും ആഗ്രഹി​ക്കു​ക​യില്ല. ഇതിന്റെ അർഥം പ്രത്യാ​ശ​യ്‌ക്ക്‌ യാതൊ​രു മൂല്യ​വു​മി​ല്ലെ​ന്നാ​ണോ?

ഒരിക്ക​ലു​മല്ല. ഉദാഹ​ര​ണ​ത്തിന്‌, മേൽ പരാമർശിച്ച ഡോക്ടർതന്നെ വേദന ലഘൂക​രി​ക്കു​ന്ന​തി​നുള്ള ചികി​ത്സ​യിൽ പ്രത്യേക വൈദ​ഗ്‌ധ്യം നേടി​യി​ട്ടുള്ള വ്യക്തി​യാണ്‌. രോഗത്തെ കീഴ്‌പെ​ടു​ത്തു​ന്ന​തി​ലോ ആയുസ്സു നീട്ടി​ക്കൊ​ടു​ക്കു​ന്ന​തി​ലോ അല്ല, മറിച്ച്‌ ജീവി​ച്ചി​രി​ക്കു​ന്നി​ട​ത്തോ​ളം കാലം രോഗി​യു​ടെ ജീവിതം കൂടുതൽ സുഖ​പ്ര​ദ​വും സന്തോ​ഷ​ക​ര​വും ആക്കുന്ന​തിൽ ശ്രദ്ധ കേന്ദ്രീ​ക​രി​ച്ചി​ട്ടുള്ള ഒരു ചികിത്സാ രീതി​യാണ്‌ ഇത്‌. ഗുരു​ത​രാ​വ​സ്ഥ​യി​ലുള്ള രോഗി​യിൽ പോലും ഒരു പ്രസന്ന​ഭാ​വം സൃഷ്ടി​ക്കാൻ കഴിയുന്ന ചികി​ത്സ​ക​ളു​ടെ മൂല്യ​ത്തിൽ ഇത്തരം ചികി​ത്സകർ ഉറച്ചു വിശ്വ​സി​ക്കു​ന്നു. രോഗി​യെ സന്തുഷ്ട​ചി​ത്ത​നാ​ക്കാൻ, ഒരുപക്ഷേ അതിലും കൂടുതൽ ചെയ്യാൻ പ്രത്യാ​ശ​യ്‌ക്കു കഴിയും എന്നതിനു മതിയായ തെളി​വു​ക​ളുണ്ട്‌.

പ്രത്യാ​ശ​യു​ടെ മൂല്യം

“പ്രത്യാശ അതിശ​ക്ത​മാ​യൊ​രു ചികി​ത്സാ​വി​ധി​യാണ്‌” എന്ന്‌ മെഡിക്കൽ ജേർണ​ലി​സ്റ്റായ ഡോ. ഡബ്ലിയു. ഗിഫർഡ്‌-ജോൺസ്‌ പ്രസ്‌താ​വി​ക്കു​ന്നു. മാരക​രോ​ഗങ്ങൾ ഗ്രസിച്ച രോഗി​കൾക്കു വൈകാ​രിക പിന്തുണ നൽകു​ന്ന​തി​ന്റെ മൂല്യം നിർണ​യി​ക്കാൻ ചെയ്‌ത നിരവധി പഠനങ്ങ​ളു​ടെ ഫലങ്ങൾ അദ്ദേഹം പരി​ശോ​ധി​ക്കു​ക​യു​ണ്ടാ​യി. ഇത്തരത്തി​ലുള്ള പിന്തുണ നൽകു​ന്നത്‌ കൂടുതൽ ശുഭാ​പ്‌തി​വി​ശ്വാ​സ​വും പ്രത്യാ​ശ​യും ഉള്ളവരാ​യി​രി​ക്കാൻ ആളുകളെ സഹായി​ക്കു​മെന്ന്‌ അനുമാ​നി​ക്ക​പ്പെ​ടു​ന്നു. അത്തരം വൈകാ​രിക പിന്തുണ ലഭിക്കുന്ന രോഗി​കൾ കൂടുതൽ കാലം ജീവി​ക്കു​ന്നു എന്നാണ്‌ 1989-ലെ ഒരു പഠനം കാണി​ക്കു​ന്നത്‌. എന്നാൽ അടുത്ത​കാ​ലത്തെ ഗവേഷ​ണങ്ങൾ ഇക്കാര്യം സംബന്ധിച്ച്‌ അത്ര ആധികാ​രി​ക​മായ നിഗമ​നങ്ങൾ നടത്തു​ന്നില്ല. എന്നിരു​ന്നാ​ലും, വൈകാ​രിക പിന്തുണ ലഭിക്കുന്ന രോഗി​കൾ അതു ലഭിക്കാ​ത്ത​വരെ അപേക്ഷിച്ച്‌ വേദന​യും വിഷാ​ദ​വും കുറച്ചേ അനുഭ​വി​ക്കു​ന്നു​ള്ളു എന്ന്‌ പഠനങ്ങൾ സ്ഥിരീ​ക​രി​ച്ചി​ട്ടുണ്ട്‌.

ഹൃദയ​ധ​മ​നീ രോഗം (coronary heart disease) ഉണ്ടാകു​ന്ന​തിൽ ശുഭാ​പ്‌തി​വി​ശ്വാ​സ​ത്തി​നും അശുഭാ​പ്‌തി​വി​ശ്വാ​സ​ത്തി​നും ഉള്ള പങ്കിനെ സംബന്ധിച്ച്‌ നടത്തിയ മറ്റൊരു പഠനത്തെ കുറിച്ചു പരിചി​ന്തി​ക്കുക. 1,300-ലധികം പുരു​ഷ​ന്മാർ ഉൾപ്പെട്ട ഒരു കൂട്ട​ത്തെ​യാണ്‌ അവധാ​ന​പൂർവ​മുള്ള പഠനത്തി​നു വിധേ​യ​രാ​ക്കി​യത്‌. അവർക്കു ജീവി​തത്തെ കുറിച്ച്‌ ശുഭാ​പ്‌തി​വി​ശ്വാ​സ​മാ​ണോ അശുഭാ​പ്‌തി​വി​ശ്വാ​സ​മാ​ണോ ഉള്ളത്‌ എന്നതു സംബന്ധിച്ച്‌ പഠനം നടത്തി. പത്തുവർഷം കഴിഞ്ഞ്‌ ആ പുരു​ഷ​ന്മാ​രിൽ 12 ശതമാ​ന​ത്തി​ല​ധി​കം പേർക്ക്‌ ഏതെങ്കി​ലും തരത്തി​ലുള്ള ഹൃദയ​ധ​മനീ രോഗം പിടി​പെ​ട്ട​താ​യി കണ്ടെത്തി. 1,300-ലധികം പേരട​ങ്ങിയ ഈ കൂട്ടത്തിൽ അശുഭാ​പ്‌തി​വി​ശ്വാ​സം ഉള്ളവർ ശുഭാ​പ്‌തി​വി​ശ്വാ​സം ഉള്ളവ​രെ​ക്കാൾ കൂടു​ത​ലാ​യി​രു​ന്നു, ഏതാണ്ട്‌ 2:1 എന്ന അനുപാ​ത​ത്തിൽ. പൊതു​ജ​നാ​രോ​ഗ്യ​ത്തി​നാ​യുള്ള ഹാർവാഡ്‌ സ്‌കൂ​ളി​ലെ, ആരോഗ്യ-സാമൂ​ഹിക പെരു​മാറ്റ വിഭാ​ഗ​ത്തി​ന്റെ അസിസ്റ്റന്റ്‌ പ്രൊ​ഫ​സ​റായ ലോറാ കുബ്‌സാൻസ്‌കി ഇപ്രകാ​രം അഭി​പ്രാ​യ​പ്പെട്ടു: “‘ക്രിയാ​ത്മക ചിന്ത’ നിങ്ങളു​ടെ ആരോ​ഗ്യ​ത്തി​നു നല്ലതാണ്‌ എന്ന അഭി​പ്രാ​യം ഇതുവരെ, കേട്ടറിഞ്ഞ വിവര​ങ്ങളെ അടിസ്ഥാ​ന​പ്പെ​ടു​ത്തി​യു​ള്ളത്‌ മാത്ര​മാ​യി​രു​ന്നു. എന്നാൽ ഈ പഠനം ഹൃ​ദ്രോഗ രംഗത്ത്‌ പ്രസ്‌തുത ആശയത്തിന്‌ ചില ഈടുറ്റ വൈദ്യ​ശാ​സ്‌ത്ര തെളി​വു​കൾ നിരത്തുന്ന ആദ്യ പഠനങ്ങ​ളിൽ ഒന്നാണ്‌.”

ഇനി, തങ്ങളുടെ ആരോ​ഗ്യം ഒട്ടും മെച്ചമല്ല എന്നു കരുതു​ന്നവർ, തങ്ങൾക്കു മെച്ചപ്പെട്ട ആരോ​ഗ്യം ഉണ്ടെന്നു ചിന്തി​ക്കു​ന്ന​വരെ അപേക്ഷിച്ച്‌ ശസ്‌ത്ര​ക്രി​യ​യ്‌ക്കു ശേഷം സാവധാ​നമേ സുഖം പ്രാപി​ക്കാ​റു​ള്ളു എന്നു ചില പഠനങ്ങൾ വെളി​പ്പെ​ടു​ത്തി​യി​ട്ടുണ്ട്‌. എന്തിന്‌, ദീർഘാ​യു​സ്സി​നെ​പ്പോ​ലും ശുഭാ​പ്‌തി​വി​ശ്വാ​സ​ത്തോ​ടു ബന്ധപ്പെ​ടു​ത്തി​യി​രി​ക്കു​ന്നു. വാർധ​ക്യം സംബന്ധിച്ച ക്രിയാ​ത്മ​ക​വും നിഷേ​ധാ​ത്മ​ക​വു​മായ വീക്ഷണങ്ങൾ പ്രായ​മാ​യ​വരെ എങ്ങനെ ബാധി​ക്കു​ന്നു​വെന്ന്‌ ഒരു പഠനം നിരീ​ക്ഷി​ക്കു​ക​യു​ണ്ടാ​യി. വാർധ​ക്യം ചെല്ലു​ന്ന​തി​നെ ജ്ഞാന​ത്തോ​ടും അനുഭ​വ​പ​രി​ച​യ​ത്തോ​ടും ബന്ധപ്പെ​ടു​ത്തി​ക്കൊ​ണ്ടുള്ള സന്ദേശങ്ങൾ കമ്പ്യൂട്ടർ സ്‌ക്രീ​നിൽ മിന്നി​മ​റ​യു​ന്നത്‌ പ്രായ​മാ​യവർ കാണാ​നി​ട​യാ​യ​പ്പോൾ അവരുടെ നടപ്പിന്‌ കൂടുതൽ ഊർജ​സ്വ​ല​ത​യും ഉത്സാഹ​വും കൈവ​ന്ന​താ​യി നിരീ​ക്ഷി​ക്കാൻ കഴിഞ്ഞു. 12 ആഴ്‌ച വ്യായാ​മം ചെയ്യു​ന്ന​തി​നു തുല്യ​മായ നേട്ടം വാസ്‌ത​വ​ത്തിൽ ഇതു​കൊണ്ട്‌ ഉണ്ടായി!

പ്രത്യാശ, ശുഭാ​പ്‌തി​വി​ശ്വാ​സം, ക്രിയാ​ത്മക വീക്ഷണം എന്നീ വികാ​രങ്ങൾ ആരോ​ഗ്യ​ത്തി​നു പ്രയോ​ജനം ചെയ്യു​ന്ന​താ​യി കാണു​ന്നത്‌ എന്തു​കൊ​ണ്ടാണ്‌? ഇതിനു വ്യക്തമായ ഉത്തരം നൽകാൻ തക്കവണ്ണം ഒരുപക്ഷേ ശാസ്‌ത്ര​ജ്ഞ​ന്മാ​രും ഡോക്ടർമാ​രും ഇതുവരെ മനുഷ്യ മനസ്സി​നെ​യും ശരീര​ത്തെ​യും വേണ്ടവി​ധം മനസ്സി​ലാ​ക്കി​യി​ട്ടി​ല്ലാ​യി​രി​ക്കാം. എന്നിരു​ന്നാ​ലും, പ്രസ്‌തുത വിഷയത്തെ കുറിച്ചു പഠിക്കുന്ന വിദഗ്‌ധർക്ക്‌ ചില വസ്‌തു​ത​ക​ളും വിവര​ങ്ങ​ളും അപഗ്ര​ഥിച്ച്‌ അനുമാ​ന​ങ്ങ​ളി​ലെ​ത്താൻ കഴിയും. ഉദാഹ​ര​ണ​ത്തിന്‌, ഒരു നാഡീ​ശാ​സ്‌ത്ര പ്രൊ​ഫസർ ഇപ്രകാ​രം പറയുന്നു: “സന്തുഷ്ട​രും പ്രത്യാ​ശ​യു​ള്ള​വ​രും ആയിരി​ക്കു​ന്നത്‌ സുഖമുള്ള ഒരു അനുഭ​വ​മാണ്‌. സമ്മർദം വളരെ​ക്കു​റഞ്ഞ ആനന്ദക​ര​മായ അവസ്ഥയാ​ണത്‌. ആ അവസ്ഥക​ളിൽ ശരീരം പുഷ്ടി​പ്പെ​ടു​ന്നു. ആരോ​ഗ്യ​ത്തോ​ടെ​യി​രി​ക്കാൻ ആളുകൾക്കു സ്വയം ചെയ്യാ​വുന്ന കാര്യ​ങ്ങ​ളു​ടെ പട്ടിക​യിൽ വരുന്ന ഒരു സംഗതി കൂടെ ആണിത്‌.”

ഈ ആശയം ചില ഡോക്ടർമാർ, മനശ്ശാ​സ്‌ത്രജ്ഞർ, ശാസ്‌ത്രജ്ഞർ എന്നിവർക്ക്‌ തികച്ചും പുതു​മ​യാ​യി തോന്നി​യേ​ക്കാം. എന്നാൽ ബൈബി​ളി​ന്റെ പഠിതാ​ക്കൾക്ക്‌ ഇതു പുതു​മയല്ല. ഏകദേശം 3,000 വർഷങ്ങൾക്കു മുമ്പ്‌, ജ്ഞാനി​യായ ശലോ​മോൻ രാജാവ്‌ പിൻവ​രുന്ന ദിവ്യ​നി​ശ്വസ്‌ത വചനങ്ങൾ രേഖ​പ്പെ​ടു​ത്തി: “സന്തുഷ്ട​ഹൃ​ദയം നല്ലോരു ഔഷധ​മാ​കു​ന്നു; തകർന്ന മനസ്സോ അസ്ഥികളെ ഉണക്കുന്നു.” (സദൃശ​വാ​ക്യ​ങ്ങൾ 17:22) ബൈബി​ളി​ന്റെ സമനി​ല​യോ​ടു​കൂ​ടിയ വീക്ഷണം ശ്രദ്ധി​ക്കുക. സന്തുഷ്ട ഹൃദയം ഏതു രോഗ​ത്തി​നു​മുള്ള പ്രതി​വി​ധി​യാ​ണെന്ന്‌ ഈ വാക്യം പറയു​ന്നില്ല. മറിച്ച്‌ അത്‌ “നല്ലോരു ഔഷധ​മാ​കു​ന്നു” എന്നാണു പറഞ്ഞി​രി​ക്കു​ന്നത്‌.

അപ്പോൾ ന്യായ​മായ ഒരു ചോദ്യം ഇതാണ്‌: പ്രത്യാശ ഒരു ഔഷധ​മാ​ണെ​ങ്കിൽ ഏതു ഡോക്ടർമാ​രാണ്‌ അതു നിർദേ​ശി​ക്കാ​തി​രി​ക്കുക? അതിലു​മു​പരി, പ്രത്യാ​ശ​യു​ടെ പ്രയോ​ജ​നങ്ങൾ ആരോ​ഗ്യ​ത്തി​ന്റെ മണ്ഡലത്തിൽ മാത്രം ഒതുങ്ങി​നിൽക്കു​ന്നില്ല.

ശുഭാ​പ്‌തി​വി​ശ്വാ​സ​വും അശുഭാ​പ്‌തി​വി​ശ്വാ​സ​വും നിങ്ങളു​ടെ ജീവി​ത​വും

ശുഭാ​പ്‌തി​വി​ശ്വാ​സ​മു​ള്ളവർ തങ്ങളുടെ ക്രിയാ​ത്മക വീക്ഷണ​ഗതി മുഖാ​ന്തരം നിരവധി വിധങ്ങ​ളിൽ പ്രയോ​ജനം അനുഭ​വി​ക്കു​ന്നു​വെന്ന്‌ ഗവേഷകർ കണ്ടെത്തി​യി​ട്ടുണ്ട്‌. സ്‌കൂ​ളി​ലും, തൊഴി​ലി​ലും, കായി​ക​രം​ഗ​ത്തും അവർ വിളങ്ങാ​നുള്ള സാധ്യ​ത​യുണ്ട്‌. ഉദാഹ​ര​ണ​ത്തിന്‌, ഒരു വനിതാ അത്‌ല​റ്റിക്‌ ടീമിനെ കുറിച്ച്‌ നടത്തിയ ഒരു പഠനത്തെ സംബന്ധി​ച്ചു പരിചി​ന്തി​ക്കുക. പരിശീ​ലകർ വനിത​ക​ളു​ടെ കായിക പ്രാപ്‌തി​കളെ കുറിച്ചു മാത്രം സമഗ്ര​മായ ഒരു വിലയി​രു​ത്തൽ നടത്തി റിപ്പോർട്ടു നൽകി. അതേസ​മയം താരങ്ങളെ സർവേ ചെയ്‌ത്‌ അവർക്ക്‌ എത്രമാ​ത്രം പ്രത്യാ​ശ​യുണ്ട്‌ എന്നത്‌ സൂക്ഷ്‌മ​മാ​യി വിലയി​രു​ത്തു​ക​യും ചെയ്‌തു. പരിശീ​ല​ക​രു​ടെ വിലയി​രു​ത്ത​ലി​നെ​ക്കാൾ വനിത​കൾക്ക്‌ ഉണ്ടായി​രുന്ന പ്രത്യാ​ശ​യു​ടെ അളവാണ്‌ അവരുടെ പ്രകടനം സംബന്ധി​ച്ചു കൂടുതൽ കൃത്യ​മാ​യി പ്രവചി​ക്കാൻ സഹായി​ച്ചത്‌ എന്നു പഠനം വെളി​പ്പെ​ടു​ത്തി. പ്രത്യാ​ശ​യ്‌ക്ക്‌ ഇത്ര ശക്തമായ സ്വാധീ​നം ചെലു​ത്താൻ കഴിയു​ന്നത്‌ എന്തു​കൊ​ണ്ടാണ്‌?

ശുഭാ​പ്‌തി​വി​ശ്വാ​സ​ത്തി​ന്റെ വിപരീ​ത​മായ അശുഭാ​പ്‌തി​വി​ശ്വാ​സത്തെ കുറിച്ചു പഠിക്കു​ക​വഴി വളരെ​യ​ധി​കം സംഗതി​കൾ മനസ്സി​ലാ​ക്കാൻ കഴിഞ്ഞി​ട്ടുണ്ട്‌. 1960-കളിലെ ഗവേഷ​ണ​ങ്ങ​ളിൽ ജന്തുക്ക​ളു​ടെ പെരു​മാ​റ്റ​രീ​തി സംബന്ധിച്ച്‌ ഒരു അപ്രതീ​ക്ഷിത കണ്ടുപി​ടി​ത്ത​മു​ണ്ടാ​യി. അതു ശാസ്‌ത്രജ്ഞർ, “ആർജിത നിസ്സഹാ​യത” എന്ന ഒരു പദപ്ര​യോ​ഗ​ത്തി​നു​തന്നെ രൂപം നൽകു​ന്ന​തി​ലേക്കു നയിച്ചു. ഈ സിൻ​ഡ്രോ​മി​ന്റെ ഒരു രൂപം മനുഷ്യർക്കും ഉണ്ടാകാ​മെന്ന്‌ അവർ കണ്ടെത്തി. ഉദാഹ​ര​ണ​ത്തിന്‌, പഠനത്തി​നാ​യി തിര​ഞ്ഞെ​ടുത്ത ഒരു കൂട്ടം ആളുകളെ അരോ​ച​ക​മായ ഒരു ശബ്ദം കേൾപ്പി​ച്ചു, എന്നിട്ട്‌ ഏതാനും ബട്ടണുകൾ അമർത്തി അതു നിറു​ത്തു​ന്നത്‌ എങ്ങനെ​യെന്ന്‌ അവർക്കു​തന്നെ പഠി​ച്ചെ​ടു​ക്കാ​മെ​ന്നും പറഞ്ഞു. അവർ ശബ്ദം നിറു​ത്തു​ന്ന​തിൽ വിജയി​ച്ചു.

അടുത്ത​താ​യി, രണ്ടാമ​തൊ​രു കൂട്ട​ത്തോ​ടും ഇതേ സംഗതി​കൾ തന്നെ ആവർത്തി​ച്ചു. പക്ഷേ അവർ ബട്ടണുകൾ അമർത്തി​യെ​ങ്കി​ലും യാതൊ​രു ഫലവും ഉണ്ടായില്ല. നിങ്ങൾക്ക്‌ ഊഹി​ക്കാ​വു​ന്ന​തു​പോ​ലെ, രണ്ടാമത്തെ കൂട്ടത്തി​ലെ അനേക​രു​ടെ​യും മനസ്സിൽ ഒരുതരം നിസ്സഹാ​യതാ ബോധം ഉടലെ​ടു​ത്തു. തുടർന്നു നടത്തിയ മറ്റു പരീക്ഷ​ണ​ങ്ങ​ളിൽ എന്തെങ്കി​ലും ശ്രമം ചെലു​ത്താൻ പോലും അവർ മടിച്ചു. തങ്ങൾ എന്തു ചെയ്‌താ​ലും അത്‌ യാതൊ​രു വ്യത്യാ​സ​വും വരുത്താൻ പോകു​ന്നില്ല എന്ന ചിന്തയാ​യി​രു​ന്നു അവർക്ക്‌. എന്നിരു​ന്നാ​ലും, രണ്ടാമത്തെ കൂട്ടത്തിൽ പോലും, ശുഭാ​പ്‌തി​വി​ശ്വാ​സം ഉണ്ടായി​രുന്ന ചിലർ നിസ്സഹാ​യ​ത​യ്‌ക്കു കീഴ്‌പെ​ടാൻ വിസമ്മ​തി​ച്ചു.

ആദ്യകാ​ല​ങ്ങ​ളി​ലെ ഇത്തരം പരീക്ഷ​ണ​ങ്ങൾക്കു രൂപം നൽകാൻ സഹായിച്ച ഡോ. മാർട്ടിൻ സെലി​ഗ്‌മൻ ശുഭാ​പ്‌തി​വി​ശ്വാ​സ​ത്തെ​യും അശുഭാ​പ്‌തി​വി​ശ്വാ​സ​ത്തെ​യും കുറിച്ചു പഠിക്കു​ന്നതു തന്റെ ജീവിത വൃത്തി​യാ​ക്കാൻ പ്രചോ​ദി​ത​നാ​യി. നിസ്സഹാ​യ​രാ​യി സ്വയം വീക്ഷി​ക്കാൻ ചായ്‌വു​ള്ളവർ ഏതുതരം ചിന്താ​ഗതി പ്രതി​ഫ​ലി​പ്പി​ക്കും എന്നതിനെ പറ്റി അദ്ദേഹം അവധാ​ന​പൂർവം പഠിച്ചു. അദ്ദേഹ​ത്തി​ന്റെ നിഗമ​ന​ത്തിൽ, അശുഭാ​പ്‌തി​വി​ശ്വാ​സം നിഴലി​ക്കുന്ന ചിന്തകൾ ആളുക​ളു​ടെ പല ജീവി​തോ​ദ്യ​മ​ങ്ങൾക്കും പ്രതി​ബന്ധം സൃഷ്ടി​ക്കു​ക​യും ജീവി​ത​ത്തി​ലെ സാധാരണ പ്രവർത്ത​ന​ങ്ങൾക്കു​വരെ തടസ്സമാ​കു​ക​യും ചെയ്യുന്നു. അശുഭാ​പ്‌തി​വി​ശ്വാ​സ​ത്തെ​യും അതിന്റെ ഫലങ്ങ​ളെ​യും അദ്ദേഹം ഇപ്രകാ​രം സംഗ്ര​ഹി​ക്കു​ന്നു: “ഒരു അശുഭാ​പ്‌തി​വി​ശ്വാ​സി​യെ​പ്പോ​ലെ, അനർഥങ്ങൾ സംഭവി​ക്കു​ന്നത്‌ നമ്മുടെ കുറ്റമാ​ണെ​ന്നും അതു നമ്മു​ടെ​മേൽ പിടി​മു​റു​ക്കി​യി​രി​ക്കു​ന്നു​വെ​ന്നും നാം ചെയ്യുന്ന എന്തിനും അതു തുരങ്കം വെക്കു​മെ​ന്നും വിശ്വ​സി​ക്കു​ന്നത്‌ നാം ഒരു ശീലമാ​ക്കു​ന്നെ​ങ്കിൽ ഇങ്ങനെ വിശ്വ​സി​ക്കാ​ത്ത​വ​രെ​ക്കാൾ കൂടുതൽ അനർഥങ്ങൾ നമുക്കു വന്നുഭ​വി​ക്കു​ക​തന്നെ ചെയ്യും എന്ന്‌ 25 വർഷത്തെ പഠനം​കൊണ്ട്‌ എനിക്കു ബോധ്യ​മാ​യി​രി​ക്കു​ന്നു.”

ഇതും ഇന്നു ചിലർക്ക്‌ ഒരു നവീന ആശയമാ​യി തോന്നി​യേ​ക്കാം. എന്നാൽ ബൈബിൾ പഠിതാ​ക്കൾക്ക്‌ ഇതു സുപരി​ചി​ത​മാണ്‌. പിൻവ​രുന്ന സദൃശ​വാ​ക്യം ശ്രദ്ധി​ക്കുക: “കഷ്ടകാ​ലത്തു നീ കുഴഞ്ഞു​പോ​യാൽ [“നിരു​ത്സാ​ഹി​ത​നാ​യാൽ,” NW] നിന്റെ ബലം നഷ്ടം തന്നേ.” (സദൃശ​വാ​ക്യ​ങ്ങൾ 24:10) അതേ, നിരു​ത്സാ​ഹ​വും അതിന്റെ ഫലമായി ഉണ്ടാകുന്ന നിഷേ​ധാ​ത്മക ചിന്തക​ളും, പ്രവർത്തി​ക്കാ​നുള്ള നിങ്ങളു​ടെ ബലം കെടു​ത്തി​ക്ക​ള​യും എന്നു ബൈബിൾ വ്യക്തമാ​ക്കു​ന്നു. അങ്ങനെ​യെ​ങ്കിൽ, അശുഭാ​പ്‌തി​വി​ശ്വാ​സത്തെ തരണം ചെയ്യാ​നും കൂടുതൽ ശുഭാ​പ്‌തി​വി​ശ്വാ​സ​വും പ്രത്യാ​ശ​യും ജീവി​ത​ത്തി​ലേക്ക്‌ ആനയി​ക്കാ​നും നിങ്ങൾക്ക്‌ എന്തു​ചെ​യ്യാൻ കഴിയും? (g04  4/22)

[4, 5 പേജു​ക​ളി​ലെ ചിത്രം]

പ്രത്യാ​ശ​യ്‌ക്ക്‌ വളരെ​യ​ധി​കം പ്രയോ​ജനം ചെയ്യാൻ കഴിയും

നിങ്ങൾക്ക്‌ അശുഭാ​പ്‌തി​വി​ശ്വാ​സത്തെ തരണം ചെയ്യാ​നാ​കും

ജീവി​ത​ത്തിൽ നേരി​ടേ​ണ്ടി​വ​രുന്ന തിരിച്ചടികളെ നിങ്ങൾ എങ്ങനെ​യാ​ണു വീക്ഷി​ക്കു​ന്നത്‌? ഈ ചോദ്യ​ത്തി​നുള്ള ഉത്തരം, നിങ്ങൾക്ക്‌ ശുഭാ​പ്‌തി​വി​ശ്വാ​സ​മാ​ണോ അശുഭാ​പ്‌തി​വി​ശ്വാ​സ​മാ​ണോ ഉള്ളത്‌ എന്നു നിർണ​യി​ക്കാൻ വളരെ സഹായി​ക്കു​മെന്ന്‌ അനേകം വിദഗ്‌ധ​രും ഇപ്പോൾ വിശ്വ​സി​ക്കു​ന്നു. നമു​ക്കെ​ല്ലാം ജീവി​ത​ത്തിൽ വിവി​ധ​തരം ക്ലേശങ്ങൾ സഹി​ക്കേ​ണ്ടി​വ​രു​ന്നു, ചിലരു​ടെ കാര്യ​ത്തിൽ ഇതു മറ്റുള്ള​വ​രു​ടേ​തി​നെ​ക്കാൾ കൂടു​ത​ലാ​യി​രി​ക്കും. എന്നാൽ ചിലയാ​ളു​കൾ കഠിന​മായ പ്രാതി​കൂ​ല്യ​ങ്ങ​ളെ​പ്പോ​ലും തോൽപ്പി​ച്ചു ജീവി​ത​ത്തി​ലേക്കു മടങ്ങി​വ​രു​മ്പോൾ മറ്റു ചിലർ താരത​മ്യേന നിസ്സാര വിഷമ​ത​ക​ളു​ടെ മുന്നിൽ നിസ്സഹാ​യ​രാ​യി പകച്ചു​നിൽക്കു​ന്നു. ഇത്‌ എന്തു​കൊ​ണ്ടാണ്‌?

ഉദാഹ​ര​ണ​ത്തിന്‌, നിങ്ങൾ ഒരു ജോലി അന്വേ​ഷി​ക്കു​ക​യാണ്‌ എന്നിരി​ക്കട്ടെ. നിങ്ങൾ ഒരു ഇന്റർവ്യൂ​വി​നു പോകു​ന്നു, പക്ഷേ ജോലിക്ക്‌ തിര​ഞ്ഞെ​ടു​ക്ക​പ്പെ​ടു​ന്നില്ല. ഇതേക്കു​റിച്ച്‌ പിന്നീടു നിങ്ങളു​ടെ മനസ്സി​ലൂ​ടെ കടന്നു​പോ​കുന്ന ചിന്തകൾ എന്തൊ​ക്കെ​യാ​യി​രി​ക്കും? ഒരുപക്ഷേ ഈ സംഭവത്തെ തികച്ചും വ്യക്തി​പ​ര​മാ​യെ​ടു​ക്കു​ക​യും അതിനെ സ്ഥായി​യായ ഒരു പ്രശ്‌ന​മാ​യി കണക്കാ​ക്കു​ക​യും ചെയ്‌തു​കൊണ്ട്‌ നിങ്ങൾ ഇപ്രകാ​രം ആത്മഗതം ചെയ്‌തേ​ക്കാം: ‘എന്നെ​പ്പോ​ലെ ഒരാളെ ആരു ജോലി​ക്കെ​ടു​ക്കാ​നാണ്‌? എനിക്ക്‌ ഒരിക്ക​ലും ഒരു ജോലി കിട്ടാൻ പോകു​ന്നില്ല.’ അല്ലെങ്കിൽ, കൂടുതൽ മോശ​മാ​യി, ‘എന്നെ ഒന്നിനും കൊള്ളില്ല. ആർക്കും ഉപകാ​ര​മി​ല്ലാത്ത ഒരു പാഴ്‌ജന്മം’ എന്നു സ്വയം പഴിച്ചു​കൊണ്ട്‌ ഈ ഒരൊറ്റ സംഭവ​ത്തി​ന്റെ അടിസ്ഥാ​ന​ത്തിൽ നിങ്ങൾ ജീവി​ത​ത്തി​ന്റെ സമസ്‌ത​ത​ല​ങ്ങ​ളെ​യും വിലയി​രു​ത്താൻ തുടങ്ങി​യേ​ക്കാം. ഇതു​പോ​ലുള്ള ഓരോ ചിന്തയും തികഞ്ഞ അശുഭാ​പ്‌തി​വി​ശ്വാ​സ​ത്തിൽനി​ന്നു മുള​പൊ​ട്ടു​ന്ന​താണ്‌.

അശുഭാ​പ്‌തി​വി​ശ്വാ​സ​ത്തോ​ടു പോരാ​ടൽ

നിങ്ങൾക്ക്‌ എങ്ങനെ​യാണ്‌ ഇതി​നോ​ടു പോരാ​ടാൻ കഴിയു​ന്നത്‌? ഇത്തരം നിഷേ​ധാ​ത്മക ചിന്തകളെ തിരി​ച്ച​റി​യാൻ പഠിക്കു​ന്ന​താണ്‌ സുപ്ര​ധാ​ന​മായ ആദ്യപടി. അടുത്ത​പടി അവയോ​ടു പോരാ​ടുക എന്നതും. ഒരു സംഭവ​ത്തിന്‌ ന്യായ​മായ മറ്റെ​ന്തെ​ല്ലാം കാരണങ്ങൾ ഉണ്ടായി​രി​ക്കാം എന്നതിനെ കുറിച്ചു ചിന്തി​ക്കുക. ഉദാഹ​ര​ണ​ത്തിന്‌ നിങ്ങൾക്കു ജോലി ലഭിക്കാ​തെ പോയത്‌ വാസ്‌ത​വ​ത്തിൽ ആർക്കും നിങ്ങളെ ജോലി​ക്കെ​ടു​ക്കാൻ ഇഷ്ടമി​ല്ലാ​ത്ത​തു​കൊ​ണ്ടാ​ണോ? ഒരുപക്ഷേ ആ തൊഴി​ലു​ടമ മറ്റു യോഗ്യ​ത​ക​ളുള്ള ആരെ​യെ​ങ്കി​ലും തേടു​ക​യാ​യി​രു​ന്നി​രി​ക്കി​ല്ലേ?

വസ്‌തു​ത​കൾക്കു ശ്രദ്ധ​കൊ​ടു​ത്തു​കൊണ്ട്‌ അമിത വൈകാ​രിക പ്രതി​ക​ര​ണ​ങ്ങ​ളാ​കുന്ന അശുഭ​ചി​ന്ത​കളെ പുറത്തു​കൊ​ണ്ടു​വ​രിക. ഒരിക്കൽ തിരസ്‌ക​രി​ക്ക​പ്പെട്ടു എന്ന സംഗതി, നിങ്ങൾ ഒരു സമ്പൂർണ പരാജ​യ​മാ​ണെന്ന്‌ അർഥമാ​ക്കു​ന്നു​ണ്ടോ? നിങ്ങൾ ഒരള​വോ​ളം വിജയം നേടി​യി​രി​ക്കുന്ന, ജീവി​ത​ത്തി​ന്റെ മറ്റു വശങ്ങളെ കുറിച്ച്‌—അതായത്‌ ആത്മീയ ഉദ്യമങ്ങൾ, കുടും​ബ​ബ​ന്ധങ്ങൾ, സുഹൃ​ദ്‌ബ​ന്ധങ്ങൾ തുടങ്ങി​യ​വയെ കുറിച്ച്‌—നിങ്ങൾക്കു ചിന്തി​ക്കാൻ കഴിയു​മോ? എന്തുതന്നെ ചെയ്‌താ​ലും വരുന്ന​തെ​ല്ലാം “അനർഥ​ങ്ങ​ളാ​യി​രി​ക്കും” എന്ന ചിന്താ​ഗ​തി​യെ മനസ്സിൽനി​ന്നു തൂത്തെ​റി​യാൻ പഠിക്കുക. വാസ്‌ത​വ​ത്തിൽ, ഒരിക്ക​ലും ഒരു ജോലി കണ്ടെത്താൻ കഴിയി​ല്ലെന്ന്‌ ഉറപ്പാ​യി​ട്ടും നിങ്ങൾക്ക്‌ പറയാൻ കഴിയു​മോ? നിഷേ​ധാ​ത്മക ചിന്തകളെ പിഴു​തെ​റി​യാൻ നിങ്ങൾക്കു ചെയ്യാൻ കഴിയുന്ന കൂടുതൽ കാര്യ​ങ്ങ​ളുണ്ട്‌.

ക്രിയാ​ത്മ​ക​വും ലക്ഷ്യോ​ന്മു​ഖ​വു​മായ ചിന്തകൾ

അടുത്ത കാലത്ത്‌, ഗവേഷകർ പ്രത്യാ​ശ​യ്‌ക്ക്‌ ഏറെക്കു​റെ സങ്കുചി​ത​മെ​ങ്കി​ലും താത്‌പ​ര്യ​ജ​ന​ക​മായ ഒരു നിർവ​ചനം രൂപ​പ്പെ​ടു​ത്തി​യെ​ടു​ത്തി​രി​ക്കു​ന്നു. നിങ്ങൾക്ക്‌ ലക്ഷ്യ​പ്രാ​പ്‌തി​യിൽ എത്തി​ച്ചേ​രാ​നാ​കും എന്ന വിശ്വാ​സ​മാണ്‌ പ്രത്യാ​ശ​യിൽ ഉൾപ്പെ​ടു​ന്ന​തെന്ന്‌ അവർ പറയുന്നു. അടുത്ത ലേഖനം വിശദീ​ക​രി​ക്കു​ന്ന​തു​പോ​ലെ പ്രത്യാ​ശ​യിൽ ഇതി​നെ​ക്കാൾ അധികം ഉൾപ്പെ​ടു​ന്നു​ണ്ടെ​ങ്കി​ലും മേൽപ്പറഞ്ഞ നിർവ​ചനം ഒട്ടനവധി വിധങ്ങ​ളിൽ പ്രയോ​ജ​ന​ക​ര​മെന്നു കാണുന്നു. വ്യക്തിഗത പ്രത്യാ​ശ​യു​ടെ ഈ വശത്ത്‌ ശ്രദ്ധ കേന്ദ്രീ​ക​രി​ക്കു​ന്നത്‌ നമ്മിൽ കൂടുതൽ ക്രിയാ​ത്മ​ക​വും ലക്ഷ്യോ​ന്മു​ഖ​വു​മായ ചിന്തകൾ ഉരുത്തി​രി​യാൻ സഹായി​ക്കും.

ലക്ഷ്യങ്ങൾ വെക്കു​ക​യും അതിൽ എത്തി​ച്ചേ​രു​ക​യും ചെയ്‌ത​തി​ന്റെ ചരിത്രം നമുക്ക്‌ ഉണ്ടെങ്കിൽ മാത്രമേ ഭാവി ലക്ഷ്യങ്ങ​ളും നിറ​വേ​റ്റാൻ കഴിയു​മെന്ന ഒരു വിശ്വാ​സം നമ്മിൽ ഉണ്ടാകു​ക​യു​ള്ളൂ. അത്തര​മൊ​രു ചരിത്രം നിങ്ങൾക്കി​ല്ലെന്നു തോന്നു​ന്നെ​ങ്കിൽ, സ്വന്തം ലക്ഷ്യങ്ങളെ കുറിച്ചു നിങ്ങൾ ഗൗരവ​പൂർവം ചിന്തി​ക്കു​ന്നത്‌ മൂല്യ​വ​ത്താ​യി​രു​ന്നേ​ക്കാം. അതിരി​ക്കട്ടെ, നിങ്ങൾക്ക്‌ എന്തെങ്കി​ലും ലക്ഷ്യമു​ണ്ടോ? വാസ്‌ത​വ​ത്തിൽ നാം ജീവി​ത​ത്തിൽനിന്ന്‌ എന്ത്‌ ആഗ്രഹി​ക്കു​ന്നു​വെ​ന്നോ നമുക്ക്‌ ഏറ്റവും പ്രധാ​ന​പ്പെ​ട്ടത്‌ എന്താ​ണെ​ന്നോ ചിന്തി​ക്കാൻപോ​ലും സമയമി​ല്ലാത്ത യാന്ത്രി​ക​മായ ഒരു ജീവി​ത​ച​ര്യ​യി​ലേക്കു വഴുതി​വീ​ഴാൻ വളരെ എളുപ്പ​മാണ്‌. ഈ കാര്യ​ത്തി​ലും ബൈബിൾ പ്രാ​യോ​ഗി​ക​മായ ഒരു തത്ത്വം നൽകി​യി​രി​ക്കു​ന്ന​താ​യി കാണാം. വ്യക്തമായ മുൻഗ​ണ​നകൾ ഉണ്ടായി​രി​ക്കു​ന്നതു സംബന്ധിച്ച്‌ ദീർഘ​നാൾ മുമ്പു ബൈബി​ളിൽ ഇപ്രകാ​രം രേഖ​പ്പെ​ടു​ത്തി​യി​രു​ന്നു: ‘കൂടുതൽ പ്രാധാ​ന്യ​മുള്ള സംഗതി​കൾ തിട്ട​പ്പെ​ടു​ത്തുക.’—ഫിലി​പ്പി​യർ 1:10, NW.

ഒരിക്കൽ നാം നമ്മുടെ മുൻഗ​ണ​നകൾ തിട്ട​പ്പെ​ടു​ത്തി കഴിഞ്ഞാൽ, നമ്മുടെ ആത്മീയ​വും കുടും​ബ​പ​ര​വും ലൗകി​ക​വു​മായ ജീവി​ത​ത്തി​ന്റെ വിവിധ മേഖല​ക​ളിൽ ചില പ്രധാ​ന​പ്പെട്ട ലക്ഷ്യങ്ങൾ വെക്കാൻ നമുക്ക്‌ എളുപ്പ​മാ​യി​ത്തീ​രു​ന്നു. എന്നിരു​ന്നാ​ലും, തുടക്ക​ത്തിൽത്തന്നെ നിരവധി ലക്ഷ്യങ്ങൾ വെക്കാ​തി​രി​ക്കാൻ നാം ശ്രദ്ധി​ക്കേ​ണ്ട​തുണ്ട്‌. അതു​പോ​ലെ, അനായാ​സേന നേടി​യെ​ടു​ക്കാൻ കഴിയുന്ന തരത്തി​ലു​ള്ള​താ​യി​രി​ക്കണം നമ്മുടെ ഓരോ ലക്ഷ്യവും. നാം വെച്ചി​രി​ക്കുന്ന ലക്ഷ്യം, കൈവ​രി​ക്കാൻ ഏറെ ബുദ്ധി​മു​ട്ടു​ള്ള​താ​ണെ​ങ്കിൽ അത്‌ ഉത്‌ക​ണ്‌ഠ​യ്‌ക്കു വഴി​തെ​ളി​ക്കു​ക​യും നാം അതിൽ എത്തി​ച്ചേ​രാ​നുള്ള ശ്രമം ഉപേക്ഷി​ക്കു​ക​യും ചെയ്‌തേ​ക്കാം. അതു​കൊണ്ട്‌, വലിയ, ദീർഘ​കാല ലക്ഷ്യങ്ങളെ ചുരു​ങ്ങിയ കാലം കൊണ്ടു നേടി​യെ​ടു​ക്കാൻ പറ്റുന്ന ചെറി​യ​വ​യാ​ക്കി വിഭജി​ക്കു​ന്ന​താണ്‌ പലപ്പോ​ഴും നല്ലത്‌.

“വേണ​മെ​ങ്കിൽ ചക്ക വേരി​ലും കായ്‌ക്കും” എന്ന ചൊല്ല്‌ കേട്ടി​ട്ടി​ല്ലേ? മനസ്സു​ണ്ടെ​ങ്കിൽ മാർഗ​വു​മുണ്ട്‌ എന്ന്‌ അർഥം. അതിൽ അൽപ്പം കഴമ്പു​ള്ള​താ​യി തോന്നു​ന്നു. പ്രധാന ലക്ഷ്യങ്ങൾ വെച്ചു​ക​ഴി​ഞ്ഞാൽ അതു കൈവ​രി​ക്കാ​നുള്ള ഇച്‌ഛാ​ശക്തി—തീവ്ര​മായ ആഗ്രഹ​വും നിശ്ചയ​ദാർഢ്യ​വും—നമുക്ക്‌ ഉണ്ടായി​രി​ക്കണം. നമ്മൾ വെച്ച ലക്ഷ്യങ്ങ​ളു​ടെ മൂല്യ​ത്തെ​യും അവ നമുക്കു നൽകുന്ന പ്രതി​ഫ​ല​ങ്ങ​ളെ​യും കുറിച്ചു പരിചി​ന്തി​ച്ചു​കൊണ്ട്‌ നമുക്ക്‌ ആ നിശ്ചയ​ദാർഢ്യം ബലിഷ്‌ഠ​മാ​ക്കാ​നാ​കും. പ്രതി​ബ​ന്ധങ്ങൾ തീർച്ച​യാ​യും ഉണ്ടാകും, എന്നാൽ അവയുടെ മുന്നിൽ വഴിമു​ട്ടി​യ​തു​പോ​ലെ പകച്ചു​നിൽക്കാ​തെ അവയെ വെല്ലു​വി​ളി​ക​ളാ​യി വീക്ഷി​ക്കാൻ പഠി​ക്കേ​ണ്ട​തുണ്ട്‌.

എന്നിരു​ന്നാ​ലും, നമ്മുടെ ലക്ഷ്യങ്ങൾ നേടു​ന്ന​തി​നുള്ള പ്രാ​യോ​ഗിക മാർഗ​ങ്ങളെ കുറി​ച്ചും നാം ചിന്തി​ക്കേ​ണ്ട​തുണ്ട്‌. പ്രത്യാ​ശ​യു​ടെ മൂല്യത്തെ കുറിച്ച്‌ വിപു​ല​മായ പഠനങ്ങൾ നടത്തിയ എഴുത്തു​കാ​ര​നായ സി. ആർ. സ്‌​നൈ​ഡ​റു​ടെ നിർദേശം, ഒരു ലക്ഷ്യത്തിൽ എത്തി​ച്ചേ​രു​ന്ന​തി​നുള്ള വ്യത്യ​സ്‌ത​ങ്ങ​ളായ നിരവധി മാർഗ​ങ്ങളെ കുറിച്ചു ചിന്തി​ക്കേ​ണ്ട​തുണ്ട്‌ എന്നാണ്‌. അങ്ങനെ​യാ​കു​മ്പോൾ ഒരു മാർഗം വിഫല​മാ​യാൽത്ത​ന്നെ​യും മറ്റൊന്ന്‌ പരീക്ഷി​ക്കാ​നാ​കും.

ഒരു ലക്ഷ്യം ഉപേക്ഷിച്ച്‌ മറ്റൊന്നു വെക്കേ​ണ്ടത്‌ എപ്പോ​ഴാ​ണെന്നു മനസ്സി​ലാ​ക്കി​യി​രി​ക്കാ​നും സ്‌​നൈഡർ നിർദേ​ശി​ക്കു​ന്നുണ്ട്‌. ലക്ഷ്യ​പ്രാ​പ്‌തി തീർത്തും അസാധ്യ​മാ​യി​ത്തീ​രുന്ന അവസര​ങ്ങ​ളിൽ അതേപ്പറ്റി ചിന്തി​ച്ചു​വ​ശാ​കു​ന്നത്‌ നമ്മെ നിരു​ത്സാ​ഹി​ത​രാ​ക്കു​കയേ ഉള്ളൂ. മറിച്ച്‌, കൂടുതൽ യാഥാർഥ്യ​ബോ​ധ​ത്തോ​ടെ​യുള്ള മറ്റൊരു ലക്ഷ്യം നാം പകരം വെക്കു​ന്നെ​ങ്കിൽ തുടർന്നും നമുക്കു പ്രത്യാ​ശ​യ്‌ക്കു വക ഉണ്ടായി​രി​ക്കും.

ഈ വസ്‌തുത കൂടുതൽ വ്യക്തമാ​ക്കുന്ന ഒരു ദൃഷ്ടാന്തം ബൈബി​ളി​ലുണ്ട്‌. തന്റെ ദൈവ​മായ യഹോ​വ​യ്‌ക്ക്‌ ഒരു ആലയം പണിയു​ക​യെ​ന്നത്‌ ദാവീദ്‌ രാജാ​വി​ന്റെ വലി​യൊ​രു ആഗ്രഹ​മാ​യി​രു​ന്നു. അവൻ അതിനു ലക്ഷ്യവും വെച്ചു. എന്നാൽ ആ പദവി ദാവീ​ദി​നാ​യി​രി​ക്കില്ല മറിച്ച്‌, അവന്റെ പുത്ര​നായ ശലോ​മോ​നാ​യി​രി​ക്കും ലഭിക്കുക എന്നു ദൈവം ദാവീ​ദി​നോ​ടു പറഞ്ഞു. അത്‌ ഇച്ഛാഭം​ഗ​ത്തി​നി​ട​യാ​ക്കി​യെ​ങ്കി​ലും അതിൽ നീരസ​പ്പെ​ടു​ക​യോ യഹോ​വ​യു​ടെ തീരു​മാ​നത്തെ എതിർക്കാൻ തുനി​ഞ്ഞി​റ​ങ്ങു​ക​യോ ചെയ്യു​ന്ന​തി​നു പകരം ദാവീദ്‌ തന്റെ ലക്ഷ്യങ്ങൾ മാറ്റു​ക​യാ​ണു ചെയ്‌തത്‌. തന്റെ പുത്രന്‌ ആലയം പണി പൂർത്തി​യാ​ക്കാൻ ആവശ്യ​മായ നിർമാ​ണ​വ​സ്‌തു​ക്ക​ളും മൂലധ​ന​വും സ്വരു​ക്കൂ​ട്ടു​ന്ന​തി​ലേക്ക്‌ അവൻ തന്റെ മുഴു ശ്രദ്ധയും തിരി​ച്ചു​വി​ട്ടു.—1 രാജാ​ക്ക​ന്മാർ 8:17-19; 1 ദിനവൃ​ത്താ​ന്തം 29:3-7.

അശുഭാ​പ്‌തി​വി​ശ്വാ​സ​ത്തോ​ടു പൊരു​തു​ക​യും ക്രിയാ​ത്മ​ക​വും ലക്ഷ്യോ​ന്മു​ഖ​വു​മായ ചിന്താ​ഗതി വികസി​പ്പി​ച്ചെ​ടു​ക്കു​ക​യും ചെയ്‌തു​കൊണ്ട്‌ വ്യക്തിഗത പ്രത്യാ​ശ​യു​ടെ നിലവാ​രം വർധി​പ്പി​ക്കു​ന്ന​തിൽ വിജയി​ക്കു​ന്നെ​ങ്കിൽപ്പോ​ലും വലിയ അളവി​ലുള്ള നിരാശ അപ്പോ​ഴും ബാക്കി​നി​ന്നേ​ക്കാം. അത്‌ എന്തു​കൊ​ണ്ടാണ്‌? ഈ ലോക​ത്തിൽ നിരാ​ശ​യ്‌ക്ക്‌ ഇടയാ​ക്കുന്ന പല കാര്യ​ങ്ങ​ളും നമ്മുടെ വരുതി​ക്കു​ള്ളിൽ നിൽക്കു​ന്ന​വയല്ല. ദാരി​ദ്ര്യം, യുദ്ധങ്ങൾ, അനീതി, രോഗ​ത്തി​ന്റെ​യും മരണത്തി​ന്റെ​യും നിരന്തര ഭീഷണി എന്നിങ്ങനെ മനുഷ്യ​രാ​ശി​യെ വരിഞ്ഞു​മു​റു​ക്കുന്ന ദുരി​ത​ങ്ങ​ളെ​പ്പറ്റി ചിന്തി​ക്കു​മ്പോൾ നമു​ക്കെ​ങ്ങനെ പ്രത്യാശ നിലനി​റു​ത്താ​നാ​കും? (g04 4/22)

[7-ാം പേജിലെ ചിത്രം]

ഒരു ജോലി​ക്കു ശ്രമി​ച്ചിട്ട്‌ അതു കിട്ടാ​തെ​പോ​യാൽ ‘എനിക്ക്‌ ഒരിക്ക​ലും ഒരു ജോലി കിട്ടു​ക​യില്ല’ എന്നു നിങ്ങൾ നിഗമനം ചെയ്യു​മോ?

[8-ാം പേജിലെ ചിത്രം]

ലക്ഷ്യങ്ങൾ വെക്കുന്ന കാര്യ​ത്തിൽ ദാവീദ്‌ രാജാവ്‌ വഴക്കം പ്രകട​മാ​ക്കി

യഥാർഥ പ്രത്യാശ നിങ്ങൾക്ക്‌ എവിടെ കണ്ടെത്താ​നാ​കും?

നിങ്ങളു​ടെ വാച്ച്‌ നിന്നു​പോ​യി, അത്‌ പൊട്ടി​യി​ട്ടു​മുണ്ട്‌. വാച്ച്‌ നന്നാക്കി​ക്കൊ​ടു​ക്കുന്ന ധാരാളം സ്ഥലങ്ങൾ നിങ്ങളു​ടെ ചുറ്റു​വ​ട്ട​ത്തു​തന്നെ ഉണ്ട്‌. വാച്ച്‌ നന്നാക്കി​ത്ത​രാ​മെന്ന്‌ അവരെ​ല്ലാം നിങ്ങൾക്ക്‌ ഉറപ്പു നൽകു​ന്നെ​ങ്കി​ലും അവർ പറയുന്ന പല കാര്യ​ങ്ങ​ളും തമ്മിൽ ഒരു പൊരു​ത്ത​മില്ല. അപ്പോ​ഴാണ്‌ നിങ്ങൾ ഒരു കാര്യം അറിയു​ന്നത്‌, വർഷങ്ങൾക്കു മുമ്പ്‌ നിങ്ങളു​ടെ വാച്ച്‌ നിർമിച്ച വിദഗ്‌ധ വാച്ച്‌ നിർമാ​താവ്‌ നിങ്ങളു​ടെ അയൽപ​ക്ക​ത്തു​ത​ന്നെ​യുണ്ട്‌. അയാൾ സൗജന്യ​മാ​യി അതു നന്നാക്കി​ത്ത​രാ​നും തയ്യാറാണ്‌. ഇത്തര​മൊ​രു സാഹച​ര്യ​ത്തിൽ എന്തു ചെയ്യണം എന്നതിനെ കുറിച്ച്‌ നിങ്ങൾക്ക്‌ രണ്ടാമ​തൊ​ന്നു ചിന്തി​ക്കേണ്ടി വരുമോ?

ഇനി, ആ വാച്ചിനെ പ്രത്യാശ വെച്ചു​പു​ലർത്താ​നുള്ള നിങ്ങളു​ടെ പ്രാപ്‌തി​യോ​ടു താരത​മ്യ​പ്പെ​ടു​ത്തുക. ഈ ദുർഘ​ട​നാ​ളു​ക​ളി​ലെ അനേക​രെ​യും പോലെ, പ്രത്യാശ കൈവി​ട്ടു​പോ​കു​ക​യാ​ണെന്നു നിങ്ങൾ മനസ്സി​ലാ​ക്കു​ന്നു എന്നിരി​ക്കട്ടെ. സഹായ​ത്തി​നാ​യി നിങ്ങൾ എങ്ങോട്ടു തിരി​യും? ഈ പ്രശ്‌നം പരിഹ​രി​ക്കാ​മെ​ന്നുള്ള അവകാ​ശ​വാ​ദ​വു​മാ​യി പലരും മുന്നോ​ട്ടു വരുന്നുണ്ട്‌. പക്ഷേ അവരുടെ എണ്ണമറ്റ നിർദേ​ശങ്ങൾ കുഴപ്പി​ക്കു​ന്ന​തും പരസ്‌പ​ര​വി​രു​ദ്ധ​വും ആയിരു​ന്നേ​ക്കാം. അതു​കൊണ്ട്‌ പ്രത്യാശ വെച്ചു​പു​ലർത്താ​നുള്ള കഴി​വോ​ടെ മനുഷ്യ​വർഗത്തെ രൂപകൽപ്പന ചെയ്‌ത സ്രഷ്ടാ​വി​നെ സമീപി​ക്കു​ന്ന​താ​യി​രി​ക്കി​ല്ലേ ഏറ്റവും മെച്ചം? “അവൻ നമ്മിൽ ആർക്കും അകന്നി​രി​ക്കു​ന്ന​വനല്ല” എന്നു ബൈബിൾ പറയുന്നു. മാത്ര​വു​മല്ല, അവൻ നമ്മെ സഹായി​ക്കാൻ തികച്ചും മനസ്സൊ​രു​ക്കം ഉള്ളവനു​മാണ്‌.—പ്രവൃ​ത്തി​കൾ 17:27; 1 പത്രൊസ്‌ 5:7.

പ്രത്യാ​ശ​യു​ടെ കൂടുതൽ ഗഹനമായ നിർവ​ച​നം

പ്രത്യാ​ശയെ കുറി​ച്ചുള്ള ബൈബി​ളി​ന്റെ വീക്ഷണം ഇന്നത്തെ ഡോക്ടർമാർ, ശാസ്‌ത്രജ്ഞർ, മനശ്ശാ​സ്‌ത്രജ്ഞർ എന്നിവ​രു​ടേ​തി​നെ​ക്കാൾ ആഴവും പരപ്പു​മു​ള്ള​താണ്‌. “പ്രത്യാശ” എന്നു പരിഭാഷ ചെയ്‌തി​രി​ക്കുന്ന, ബൈബി​ളി​ലെ മൂലഭാ​ഷാ പദങ്ങളു​ടെ അർഥം അതിവാ​ഞ്‌ഛ​യോ​ടെ കാത്തി​രി​ക്കു​ക​യും നല്ലതു പ്രതീ​ക്ഷി​ക്കു​ക​യും ചെയ്യുക എന്നാണ്‌. അടിസ്ഥാ​ന​പ​ര​മാ​യി പ്രത്യാശ രണ്ടു ഘടകങ്ങൾ ചേർന്ന​താണ്‌. നല്ല എന്തോ ഒന്നിനാ​യുള്ള അഭിവാ​ഞ്‌ഛ​യും അതു സംഭവി​ക്കും എന്നു വിശ്വ​സി​ക്കാ​നുള്ള അടിസ്ഥാ​ന​വും അതിൽ ഉൾപ്പെ​ട്ടി​രി​ക്കു​ന്നു. ബൈബിൾ വാഗ്‌ദാ​നം ചെയ്യുന്ന പ്രത്യാശ വെറും അടിസ്ഥാ​ന​ര​ഹി​ത​മായ ആഗ്രഹ​ങ്ങളല്ല. അത്‌ വസ്‌തു​ത​യി​ലും തെളി​വി​ലും അധിഷ്‌ഠി​ത​മാണ്‌.

ഈ കാര്യ​ത്തിൽ, പ്രത്യാശ വിശ്വാ​സ​ത്തോ​ടു സമാനത പുലർത്തു​ന്നു. വിശ്വാ​സം തെളി​വിൽ അടിസ്ഥാ​ന​പ്പെ​ട്ട​താ​യി​രി​ക്കണം, അല്ലാതെ അന്ധമായ ഒന്നായി​രി​ക്ക​രുത്‌. (എബ്രായർ 11:1, NW) എങ്കിലും, ബൈബിൾ വിശ്വാ​സ​വും പ്രത്യാ​ശ​യും തമ്മിൽ വ്യത്യാ​സം കൽപ്പി​ക്കു​ന്നുണ്ട്‌.—1 കൊരി​ന്ത്യർ 13:13.

ഉദാഹ​ര​ണ​ത്തിന്‌, നിങ്ങൾ ഒരു പ്രിയ സുഹൃ​ത്തി​നോട്‌ ഒരു സഹായം ചോദി​ക്കു​ന്നു എന്നിരി​ക്കട്ടെ. സുഹൃത്തു നിങ്ങളെ സഹായി​ക്കു​മെന്ന്‌ നിങ്ങൾ പ്രത്യാ​ശി​ക്കു​ന്നു. ആ പ്രത്യാശ അടിസ്ഥാ​ന​ര​ഹി​തമല്ല, കാരണം നിങ്ങൾക്ക്‌ ആ വ്യക്തി​യിൽ വിശ്വാ​സ​മുണ്ട്‌. നിങ്ങൾക്ക്‌ അയാളെ നന്നായി അറിയാം, ഔദാ​ര്യ​ത്തോ​ടും ദയയോ​ടും കൂടിയ അയാളു​ടെ പ്രവർത്ത​നങ്ങൾ നിങ്ങൾ മുമ്പ്‌ കണ്ടിട്ടു​മുണ്ട്‌. നിങ്ങളു​ടെ വിശ്വാ​സ​വും പ്രത്യാ​ശ​യും അടുത്തു ബന്ധപ്പെ​ട്ടി​രി​ക്കു​ന്നു, അവ പരസ്‌പ​രാ​ശ്രി​തങ്ങൾ പോലു​മാണ്‌, എന്നാൽ അതേസ​മയം അവ ഒന്നല്ല. നിങ്ങൾക്കു ദൈവ​ത്തിൽ അത്തരം പ്രത്യാശ ഉണ്ടായി​രി​ക്കാൻ കഴിയു​ന്നത്‌ എങ്ങനെ​യാണ്‌?

പ്രത്യാ​ശ​യ്‌ക്കുള്ള അടിസ്ഥാ​നം

യഥാർഥ പ്രത്യാ​ശ​യു​ടെ അടിസ്ഥാ​നം ദൈവ​മാണ്‌. ബൈബിൾ കാലങ്ങ​ളിൽ യഹോ​വയെ “യിസ്രാ​യേ​ലി​ന്റെ പ്രത്യാശ” എന്നു വിളി​ച്ചി​രു​ന്നു. (യിരെ​മ്യാ​വു 14:8) അവന്റെ ജനത്തിന്‌ ഉണ്ടായി​രുന്ന ആശ്രയ​യോ​ഗ്യ​മായ ഏതു പ്രത്യാ​ശ​യും അവനിൽനി​ന്നാ​യി​രു​ന്നു വന്നത്‌. അതിനാൽ അവൻ ആയിരു​ന്നു അവരുടെ പ്രത്യാശ. അത്തരം പ്രത്യാശ കേവലം എന്തെങ്കി​ലും ആശിക്കു​ന്ന​തി​നെയല്ല അർഥമാ​ക്കി​യത്‌. പ്രത്യാ​ശ​യ്‌ക്കുള്ള ഉറച്ച ഒരു അടിസ്ഥാ​നം ദൈവം അവർക്കു നൽകി. നൂറ്റാ​ണ്ടു​ക​ളിൽ ഉടനീ​ള​മുള്ള അവരു​മാ​യുള്ള ഇടപെ​ട​ലു​ക​ളി​ലൂ​ടെ വാഗ്‌ദാ​നങ്ങൾ നൽകു​ക​യും അതു നിവർത്തി​ക്കു​ക​യും ചെയ്യു​ന്നവൻ എന്ന കീർത്തി അവൻ സമ്പാദി​ച്ചു. ഇസ്രാ​യേ​ലി​ന്റെ നായക​നാ​യി​രുന്ന യോശുവ ആ ജനത​യോ​ടു പറഞ്ഞതു ശ്രദ്ധി​ക്കുക: “നിങ്ങളു​ടെ ദൈവ​മായ യഹോവ നിങ്ങ​ളെ​ക്കു​റി​ച്ചു അരുളി​ച്ചെ​യ്‌തി​ട്ടുള്ള സകലന​ന്മ​ക​ളി​ലും​വെച്ചു ഒന്നിന്നും വീഴ്‌ച​വ​ന്നി​ട്ടി​ല്ലെന്നു നിങ്ങൾക്കു . . . ബോധ​മാ​യി​രി​ക്കു​ന്നു.”—യോശുവ 23:14.

ആയിര​ക്ക​ണ​ക്കി​നു വർഷങ്ങൾക്കു ശേഷം ഇന്നും ഈ കാര്യ​ത്തിൽ യാതൊ​രു മാറ്റവും വന്നിട്ടില്ല. ദൈവ​ത്തി​ന്റെ വിശി​ഷ്ട​മായ വാഗ്‌ദാ​ന​ങ്ങ​ളും അവ നിവൃ​ത്തി​യാ​യ​തി​ന്റെ കൃത്യ​മായ ചരിത്ര രേഖക​ളും​കൊ​ണ്ടു സമ്പുഷ്ട​മാണ്‌ ബൈബിൾ. എഴുത​പ്പെട്ട കാലത്തു​തന്നെ സംഭവി​ച്ചു കഴിഞ്ഞു എന്നതു​പോ​ലെ​യാണ്‌ ചില പ്രാവ​ച​നിക വാഗ്‌ദാ​നങ്ങൾ രേഖ​പ്പെ​ടു​ത്തി​യി​രി​ക്കു​ന്ന​തു​തന്നെ. അത്രയ്‌ക്ക്‌ ആശ്രയ​യോ​ഗ്യ​മാ​ണവ.

അതു​കൊ​ണ്ടാണ്‌ ബൈബി​ളി​നെ പ്രത്യാ​ശ​യു​ടെ പുസ്‌തകം എന്നു വിളി​ക്കാൻ കഴിയു​ന്നത്‌. മനുഷ്യ​രു​മാ​യുള്ള ദൈവ​ത്തി​ന്റെ ഇടപെ​ട​ലു​കളെ കുറി​ച്ചുള്ള ബൈബിൾ രേഖകൾ പഠിക്കു​ന്തോ​റും അവനിൽ പ്രത്യാശ അർപ്പി​ക്കു​ന്ന​തി​നുള്ള കാരണങ്ങൾ കൂടുതൽ ശക്തമാ​യി​ത്തീ​രും. അപ്പൊ​സ്‌ത​ല​നായ പൗലൊസ്‌ ഇപ്രകാ​രം എഴുതി: “എന്നാൽ മുന്നെ​ഴു​തി​യി​രി​ക്കു​ന്നതു ഒക്കെയും നമ്മുടെ ഉപദേ​ശ​ത്തി​ന്നാ​യി​ട്ടു, നമുക്കു തിരു​വെ​ഴു​ത്തു​ക​ളാൽ ഉളവാ​കുന്ന സ്ഥിരത​യാ​ലും ആശ്വാ​സ​ത്താ​ലും പ്രത്യാശ ഉണ്ടാ​കേ​ണ്ട​തി​ന്നു തന്നേ എഴുതി​യി​രി​ക്കു​ന്നു.”—റോമർ 15:4.

ദൈവം നമുക്കു നൽകുന്ന പ്രത്യാശ എന്താണ്‌?

പ്രത്യാശ ഏറ്റവും ആവശ്യ​മാ​യി നമുക്കു തോന്നുന്ന സന്ദർഭം ഏതാണ്‌? നാം മരണത്തെ അഭിമു​ഖീ​ക​രി​ക്കു​മ്പോ​ഴല്ലേ? എന്നാൽ അനേക​രെ​യും സംബന്ധി​ച്ചി​ട​ത്തോ​ളം അത്തര​മൊ​രു സന്ദർഭ​ത്തി​ലാണ്‌—ഉദാഹ​ര​ണ​ത്തിന്‌, മരണം പ്രിയ​പ്പെട്ട ഒരാളെ തട്ടി​യെ​ടു​ക്കു​മ്പോ​ഴാണ്‌—തങ്ങളുടെ പ്രത്യാശ ഏറ്റവും ചോർന്നു പോകു​ന്ന​താ​യി തോന്നു​ന്നത്‌. അതേ, മരണ​ത്തെ​ക്കാൾ നിരാശ ജനിപ്പി​ക്കു​ന്ന​താ​യി മറ്റെന്താ​ണു​ള്ളത്‌? അതു നമ്മെ ഓരോ​രു​ത്ത​രെ​യും വിടാതെ പിന്തു​ട​രു​ന്നു. അതിൽനിന്ന്‌ എന്നേക്കു​മാ​യി ഒഴിഞ്ഞു​മാ​റാൻ നമുക്കു കഴിയില്ല, അതു സംഭവി​ച്ചു കഴിഞ്ഞാൽ ഒരു വ്യക്തിയെ ജീവനി​ലേക്കു മടക്കി​വ​രു​ത്താൻ നാം അപ്രാ​പ്‌ത​രാണ്‌. ഉചിത​മാ​യി, മരണത്തെ ബൈബിൾ “ഒടുക്കത്തെ ശത്രു” എന്നു വിളി​ക്കു​ന്നു.—1 കൊരി​ന്ത്യർ 15:26.

അങ്ങനെ​യെ​ങ്കിൽ, മരണത്തി​ന്റെ മുന്നി​ലും നമുക്ക്‌ പ്രത്യാ​ശ​യു​ള്ള​വ​രാ​യി​രി​ക്കാൻ എങ്ങനെ കഴിയും? മരണത്തെ ഒടുവി​ലത്തെ ശത്രു എന്നു വിളി​ക്കുന്ന അതേ ബൈബിൾ വാക്യ​ത്തിൽ ഈ ശത്രു “നീങ്ങി​പ്പോ​കും” എന്നും പറഞ്ഞി​രി​ക്കു​ന്നു. യഹോ​വ​യാം ദൈവം മരണ​ത്തെ​ക്കാൾ ശക്തനാണ്‌. അനവധി സന്ദർഭ​ങ്ങ​ളിൽ അവൻ അതു തെളി​യി​ച്ചി​ട്ടുണ്ട്‌. ഏതു വിധത്തിൽ? മരിച്ചു​പോ​യ​വരെ ഉയിർപ്പി​ച്ചു​കൊണ്ട്‌. മരിച്ചു​പോ​യ​വരെ തിരികെ ജീവനി​ലേക്കു കൊണ്ടു​വ​രാൻ അവൻ തന്റെ ശക്തി ഉപയോ​ഗിച്ച ഒമ്പതു സന്ദർഭ​ങ്ങളെ കുറിച്ചു ബൈബിൾ വിവരി​ക്കു​ന്നുണ്ട്‌.

അത്തരം ഒരു സവിശേഷ സംഭവ​ത്തിൽ, തന്റെ പുത്ര​നായ യേശു​ക്രി​സ്‌തു​വിന്‌, മരിച്ചിട്ട്‌ നാലു ദിവസ​മാ​യി​രുന്ന അവന്റെ പ്രിയ സുഹൃ​ത്തായ ലാസറി​നെ ഉയിർപ്പി​ക്കാൻ യഹോവ ശക്തി നൽകു​ക​യു​ണ്ടാ​യി. യേശു ഇതു രഹസ്യ​മാ​യി​ട്ടല്ല, കാഴ്‌ച​ക്കാ​രു​ടെ ഒരു വലിയ കൂട്ടത്തി​നു മുമ്പാകെ പരസ്യ​മാ​യി​ട്ടാ​ണു ചെയ്‌തത്‌.—യോഹ​ന്നാൻ 11:38-48, 53; 12:9, 10.

അങ്ങനെ​യെ​ങ്കിൽ നിങ്ങൾ ഇപ്രകാ​രം ചോദി​ച്ചേ​ക്കാം, ‘എന്തിനാണ്‌ അവരെ ഉയിർപ്പി​ച്ചത്‌? അവർ എന്തായാ​ലും വാർധ​ക്യം പ്രാപി​ക്കു​ക​യും വീണ്ടും മരിക്കു​ക​യും ചെയ്‌തി​ല്ലേ?’ അതേ, അവർ എല്ലാവ​രും വീണ്ടും മരിച്ചു. എന്നാൽ, പുനരു​ത്ഥാ​നത്തെ കുറി​ച്ചുള്ള ഇത്തരം ആശ്രയ​യോ​ഗ്യ​മായ വിവര​ണങ്ങൾ, മരിച്ചു​പോയ നമ്മുടെ പ്രിയ​പ്പെ​ട്ടവർ വീണ്ടും ജീവനി​ലേക്കു വന്നിരു​ന്നെ​ങ്കിൽ എന്നു വെറുതെ ആശിക്കു​ന്ന​തി​നെ​ക്കാൾ അവർ തീർച്ച​യാ​യും ജീവനി​ലേക്കു വരും എന്നു വിശ്വ​സി​ക്കാ​നുള്ള അടിസ്ഥാ​നം പ്രദാനം ചെയ്യുന്നു. മറ്റുവാ​ക്കു​ക​ളിൽ പറഞ്ഞാൽ, ഇവ നമുക്ക്‌ യഥാർഥ പ്രത്യാശ പകർന്നു​ത​രു​ന്നു.

യേശു ഇപ്രകാ​രം പറഞ്ഞു: “ഞാൻ തന്നേ പുനരു​ത്ഥാ​ന​വും ജീവനും ആകുന്നു.” (യോഹ​ന്നാൻ 11:25) ഗോള​മെ​മ്പാ​ടു​മുള്ള ആളുകളെ ജീവനി​ലേക്കു തിരികെ കൊണ്ടു​വ​രാൻ യഹോവ നിയോ​ഗി​ക്കു​ന്നത്‌ യേശു​ക്രി​സ്‌തു​വി​നെ​യാണ്‌. യേശു ഇങ്ങനെ പറഞ്ഞു: “കല്ലറക​ളിൽ [“സ്‌മാരക കല്ലറക​ളിൽ,” NW] ഉള്ളവർ എല്ലാവ​രും അവന്റെ [ക്രിസ്‌തു​വി​ന്റെ] ശബ്ദം കേട്ടു, . . . പുനരു​ത്ഥാ​നം ചെയ്‌വാ​നുള്ള നാഴിക വരുന്നു.” (യോഹ​ന്നാൻ 5:28, 29) തീർച്ച​യാ​യും, ശവക്കു​ഴി​ക​ളിൽ നിദ്ര​യി​ലാ​യി​രി​ക്കുന്ന എല്ലാവർക്കും ഒരു പറുദീസ ഭൂമി​യി​ലേക്ക്‌ പുനരു​ത്ഥാ​നം ചെയ്യാ​നുള്ള പ്രത്യാ​ശ​യുണ്ട്‌.

പുനരു​ത്ഥാ​നത്തെ കുറി​ച്ചുള്ള ഹൃദയ​സ്‌പർശി​യായ ഒരു ചിത്രം യെശയ്യാ പ്രവാ​ചകൻ വരച്ചു​കാ​ട്ടു​ക​യു​ണ്ടാ​യി: “നിന്റെ മൃതന്മാർ ജീവി​ക്കും; എന്റെ ശവങ്ങൾ എഴു​ന്നേ​ല്‌ക്കും; പൊടി​യിൽ കിടക്കു​ന്ന​വരേ, ഉണർന്നു ഘോഷി​പ്പിൻ; നിന്റെ മഞ്ഞു പ്രഭാ​ത​ത്തി​ലെ മഞ്ഞു​പോ​ലെ ഇരിക്കു​ന്നു; ഭൂമി പ്രേത​ന്മാ​രെ [“മൃതന്മാ​രെ”, NW] പ്രസവി​ക്കു​മ​ല്ലോ.”—യെശയ്യാ​വു 26:19.

ഇത്‌ സാന്ത്വനം പകരു​ന്നി​ല്ലേ? മരിച്ചു​പോ​യവർ സങ്കൽപ്പി​ക്കാ​വു​ന്ന​തിൽ വെച്ച്‌ ഏറ്റവും സുരക്ഷി​ത​മായ സ്ഥലത്താണ്‌, അമ്മയുടെ ഉദരത്തിൽ സുരക്ഷി​ത​നാ​യി​രി​ക്കുന്ന കുഞ്ഞി​നെ​പ്പോ​ലെ. അതേ, ശവകു​ടീ​ര​ങ്ങ​ളിൽ നിദ്ര​കൊ​ള്ളു​ന്നവർ സർവശ​ക്ത​നായ ദൈവ​ത്തി​ന്റെ അപരി​മേ​യ​മായ ഓർമ​യിൽ സുരക്ഷി​ത​രാണ്‌ എന്നതിൽ സംശയ​മില്ല. (ലൂക്കൊസ്‌ 20:37, 38) വളരെ​പ്പെ​ട്ടെന്ന്‌ അവൻ അവരെ ജീവനി​ലേക്ക്‌ കൊണ്ടു​വ​രും. സ്‌നേ​ഹം​കൊ​ണ്ടു മൂടാൻ കാത്തി​രി​ക്കുന്ന ഒരു കുടും​ബാ​ന്ത​രീ​ക്ഷ​ത്തി​ലേക്ക്‌ ഒരു ശിശു പിറക്കു​ന്ന​തു​പോ​ലെ സന്തോ​ഷ​ഭ​രി​ത​വും അവരെ എതി​രേൽക്കാൻ കാത്തി​രി​ക്കു​ക​യും ചെയ്യുന്ന ഒരു ലോക​ത്തി​ലേക്ക്‌ അവർ ജീവ​നോ​ടെ തിരി​ച്ചു​വ​രും! അതു​കൊണ്ട്‌, മരണത്തി​ന്റെ മുന്നി​ലും നമുക്കു പ്രത്യാ​ശ​യുണ്ട്‌.

പ്രത്യാ​ശ​യ്‌ക്ക്‌ നിങ്ങൾക്കു​വേണ്ടി ചെയ്യാൻ കഴിയു​ന്നത്‌

പ്രത്യാ​ശ​യു​ടെ മൂല്യത്തെ കുറിച്ച്‌ പൗലൊസ്‌ നമ്മെ ഏറെ കാര്യങ്ങൾ പഠിപ്പി​ക്കു​ന്നുണ്ട്‌. ആത്മീയ പടച്ചട്ട​യി​ലെ ഒരു സുപ്ര​ധാന ഭാഗമായ ശിരസ്‌ത്ര​മെന്ന നിലയിൽ പ്രത്യാ​ശയെ കുറിച്ച്‌ അവൻ സംസാ​രി​ക്കു​ക​യു​ണ്ടാ​യി. (1 തെസ്സ​ലൊ​നീ​ക്യർ 5:8) അവൻ എന്താണ്‌ അർഥമാ​ക്കി​യത്‌? ബൈബിൾ കാലങ്ങ​ളിൽ യുദ്ധത്തിൽ ഏർപ്പെ​ടുന്ന പടയാളി, രോമ​മോ തോലോ ഉപയോ​ഗിച്ച്‌ ഉണ്ടാക്കിയ തൊപ്പി​ക്കു മീതെ ലോഹം​കൊ​ണ്ടുള്ള ശിരസ്‌ത്രം ധരിക്കു​മാ​യി​രു​ന്നു. പടയാ​ളി​യു​ടെ തലയ്‌ക്കു നേരെ വരുന്ന ആക്രമ​ണങ്ങൾ, മാരക​മായ ക്ഷതം ഏൽപ്പി​ക്കാ​തെ പാളി​പ്പോ​കാൻ ശിരസ്‌ത്രം ഇടയാ​ക്കു​മാ​യി​രു​ന്നു. പൗലൊസ്‌ പറയാൻ ഉദ്ദേശിച്ച ആശയം എന്തായി​രു​ന്നു? ശിരസ്‌ത്രം തലയെ സംരക്ഷി​ക്കുന്ന അതേവി​ധ​ത്തിൽ പ്രത്യാശ മനസ്സിനെ, ചിന്താ​പ്രാ​പ്‌തി​കളെ, സംരക്ഷി​ക്കു​ന്നു. നിങ്ങൾക്ക്‌ ദൈ​വോ​ദ്ദേ​ശ്യ​ങ്ങൾക്കു ചേർച്ച​യി​ലുള്ള ഉറച്ച പ്രത്യാശ ഉണ്ടെങ്കിൽ കഷ്ടതക​ളു​ടെ മുന്നിൽ പരി​ഭ്രാ​ന്ത​രോ ഹതാശ​രോ ആയിത്തീർന്ന്‌ നിങ്ങളു​ടെ മനസ്സമാ​ധാ​നം തകരു​ക​യില്ല. നമ്മിലാർക്കാണ്‌ അത്തര​മൊ​രു ശിരസ്‌ത്രം ആവശ്യ​മി​ല്ലാ​ത്തത്‌?

ദൈ​വേ​ഷ്ട​ത്തി​നു ചേർച്ച​യി​ലുള്ള പ്രത്യാ​ശയെ വിവരി​ക്കാൻ പൗലൊസ്‌ മനസ്സിൽ പതിയുന്ന മറ്റൊരു ദൃഷ്ടാന്തം ഉപയോ​ഗി​ക്കു​ക​യു​ണ്ടാ​യി. അവൻ ഇപ്രകാ​രം എഴുതി: ‘ആ പ്രത്യാശ നമുക്കു ആത്മാവി​ന്റെ ഒരു നങ്കൂരം തന്നേ; അതു നിശ്ചയ​വും സ്ഥിരവും ആകുന്നു.’ (എബ്രായർ 6:19) ഒന്നി​ലേറെ തവണ കപ്പൽച്ചേ​ത​ത്തിൽനിന്ന്‌ തലനാ​രി​ഴ​യ്‌ക്ക്‌ രക്ഷപ്പെട്ട പൗലൊ​സിന്‌ ഒരു നങ്കൂര​ത്തി​ന്റെ മൂല്യം വളരെ നന്നായി അറിയാ​മാ​യി​രു​ന്നു. കൊടു​ങ്കാറ്റ്‌ ഉണ്ടാകു​മ്പോൾ നാവികർ കപ്പലിന്റെ നങ്കൂരം വെള്ളത്തി​ലേ​ക്കി​ടും. നങ്കൂരം കടൽത്ത​ട്ടിൽ ചെന്ന്‌ ഉറച്ചാൽ കപ്പലിനെ കൊടു​ങ്കാറ്റ്‌ തീര​ത്തേക്ക്‌ ഒഴുക്കി​ക്കൊ​ണ്ടു​പോ​യി അതു പാറ​ക്കെ​ട്ടിൽ ഇടിച്ചു തകരു​ന്നത്‌ ഒഴിവാ​ക്കാൻ കഴിയു​മാ​യി​രു​ന്നു.

അതു​പോ​ലെ​ത​ന്നെ, ദൈവ​ത്തി​ന്റെ വാഗ്‌ദാ​നങ്ങൾ നമുക്ക്‌ “നിശ്ചയ​വും സ്ഥിരവും” ആയ പ്രത്യാശ ആണെങ്കിൽ, പ്രക്ഷു​ബ്ധ​മായ ഈ നാളു​കളെ വിജയ​പൂർവം നേരി​ടാൻ ആ പ്രത്യാശ നമ്മെ സഹായി​ക്കും. മാനവ​രാ​ശി​യെ ഗ്രസി​ച്ചി​രി​ക്കുന്ന യുദ്ധം, കുറ്റകൃ​ത്യം, ദുഃഖം, എന്തിന്‌ മരണം​പോ​ലും ഇല്ലാത്ത ഒരു കാലം സമീപി​ച്ചി​രി​ക്കു​ക​യാ​ണെന്ന്‌ യഹോവ ഉറപ്പു നൽകുന്നു. (10-ാം പേജിലെ ചതുരം കാണുക.) ഈ പ്രത്യാശ മുറു​കെ​പ്പി​ടി​ക്കു​ന്നത്‌ അപകട​ങ്ങ​ളു​ടെ പാതയിൽനിന്ന്‌ അകന്നു​മാ​റാൻ നമ്മെ സഹായി​ക്കും. അതു​പോ​ലെ ഈ പ്രത്യാശ, ഇന്നത്തെ ലോക​ത്തിൽ പ്രബല​മായ കുത്തഴിഞ്ഞ അധാർമിക ചിന്താ​ഗ​തിക്ക്‌ വശംവ​ദ​രാ​കാ​തെ ദൈവിക നിലവാ​ര​ങ്ങൾക്കു ചേർച്ച​യിൽ ജീവി​ക്കാൻ ആവശ്യ​മായ പ്രചോ​ദനം നമുക്കു നൽകു​ക​യും ചെയ്യുന്നു.

വ്യക്തി​പ​ര​മാ​യും നിങ്ങൾ യഹോവ നൽകുന്ന പ്രത്യാ​ശ​യിൽ ഉൾപ്പെ​ട്ടി​രി​ക്കു​ന്നു. അവൻ ഉദ്ദേശി​ച്ച​തു​പോ​ലുള്ള ഒരു ജീവിതം നിങ്ങൾ ആസ്വദി​ക്കാൻ അവൻ ആഗ്രഹി​ക്കു​ന്നു. ‘സകലമ​നു​ഷ്യ​രും രക്ഷപ്രാ​പി​പ്പാൻ’ അവൻ അതിയാ​യി വാഞ്‌ഛി​ക്കു​ന്നു. രക്ഷപ്രാ​പി​ക്കാൻ എങ്ങനെ കഴിയും? ആദ്യം​തന്നെ, ഓരോ വ്യക്തി​യും “സത്യത്തി​ന്റെ പരിജ്ഞാ​ന​ത്തിൽ എത്തേണ്ട​തുണ്ട്‌.’ (1 തിമൊ​ഥെ​യൊസ്‌ 2:4) ദൈവ​വ​ച​ന​ത്തി​ലെ സത്യത്തെ കുറി​ച്ചുള്ള ജീവദാ​യ​ക​മായ പരിജ്ഞാ​നം കൈ​ക്കൊ​ള്ളാൻ ഈ ലേഖന​ത്തി​ന്റെ പ്രസാ​ധകർ നിങ്ങ​ളോട്‌ അഭ്യർഥി​ക്കു​ക​യാണ്‌. അതിലൂ​ടെ ദൈവം നിങ്ങൾക്കു നൽകുന്ന പ്രത്യാശ, ഈ ലോക​ത്തിൽ നിങ്ങൾക്കു കണ്ടെത്താൻ കഴിയുന്ന ഏതുതരം പ്രത്യാ​ശ​യെ​ക്കാ​ളും വളരെ​യേറെ ഉദാത്ത​മാ​യി​രി​ക്കും.

അത്തരം പ്രത്യാ​ശ​യു​ണ്ടെ​ങ്കിൽ നിങ്ങൾക്ക്‌ ഒരിക്ക​ലും നിസ്സഹാ​യത അനുഭ​വ​പ്പെ​ടില്ല. കാരണം ദൈ​വേ​ഷ്ട​ത്തോ​ടുള്ള ചേർച്ച​യിൽ നിങ്ങൾക്ക്‌ ഉണ്ടായി​രു​ന്നേ​ക്കാ​വുന്ന ഏതു ലക്ഷ്യങ്ങ​ളും നിവർത്തി​ക്കാ​നുള്ള ശക്തി നൽകാൻ ദൈവ​ത്തി​നു കഴിയും. (2 കൊരി​ന്ത്യർ 4:7; ഫിലി​പ്പി​യർ 4:13) വാസ്‌ത​വ​ത്തിൽ ഇത്തരത്തി​ലുള്ള പ്രത്യാ​ശ​യല്ലേ നിങ്ങൾക്കു വേണ്ടത്‌? അതു​കൊണ്ട്‌, നിങ്ങൾക്ക്‌ പ്രത്യാ​ശ​യു​ടെ ആവശ്യ​മു​ണ്ടെ​ങ്കിൽ, നിങ്ങൾ അതിനാ​യി തിരഞ്ഞു​കൊ​ണ്ടി​രി​ക്കു​ക​യാ​ണെ​ങ്കിൽ ധൈര്യ​പ്പെ​ടുക. അത്‌ കൈ​യെ​ത്തും ദൂരത്താണ്‌. നിങ്ങൾക്ക്‌ അതു കണ്ടെത്താൻ കഴിയും! (g04 4/22)

[10-ാം പേജിലെ ചതുരം/ചിത്രം]

പ്രത്യാശയ്‌ക്കുള്ള കാരണങ്ങൾ

നിങ്ങളു​ടെ പ്രത്യാശ ദൃഢമാ​ക്കാൻ ഈ തിരു​വെ​ഴു​ത്തു വിവരങ്ങൾ നിങ്ങളെ സഹായി​ക്കും:

◼ ദൈവം ഒരു സന്തുഷ്ട​ഭാ​വി വാഗ്‌ദാ​നം ചെയ്യുന്നു.

ഭൂമി ഒരു ആഗോള പറുദീസ ആയിത്തീ​രു​മെ​ന്നും സന്തുഷ്ട​രും ഏകീകൃ​ത​രു​മായ ഒരു മാനവ കുടും​ബം അവിടെ അധിവ​സി​ക്കു​മെ​ന്നും അവന്റെ വചനം പറയുന്നു.—സങ്കീർത്തനം 37:11, 29; യെശയ്യാ​വു 25:8; വെളി​പ്പാ​ടു 21:3-5.

◼ ദൈവ​ത്തിന്‌ ഭോഷ്‌കു പറയാൻ കഴിയില്ല.

ഏതുതരത്തിലുമുള്ള നുണയെ അവൻ വെറു​ക്കു​ന്നു. യഹോവ അത്യന്തം വിശു​ദ്ധ​നും സകലവിധ മലിന​ത​ക​ളിൽനി​ന്നും വിമു​ക്ത​നു​മാണ്‌. അതിനാൽ ഭോഷ്‌കു പറയാൻ അവനു കഴിയില്ല.—സദൃശ​വാ​ക്യ​ങ്ങൾ 6:16-19; യെശയ്യാ​വു 6:2, 3; തീത്തൊസ്‌ 1:2; എബ്രായർ 6:18.

◼ ദൈവ​ത്തിന്‌ അപരി​മേ​യ​മായ ശക്തിയുണ്ട്‌.

യഹോവ മാത്ര​മാണ്‌ സർവശക്തൻ. വാഗ്‌ദാ​നങ്ങൾ നിവർത്തി​ക്കു​ന്ന​തിൽനിന്ന്‌ അവനെ തടയാൻ പ്രപഞ്ച​ത്തി​ലുള്ള യാതൊ​ന്നി​നും കഴിയില്ല.—പുറപ്പാ​ടു 15:11; യെശയ്യാ​വു 40:25, 26.

◼ നിങ്ങൾ എന്നേക്കും ജീവി​ക്കാൻ ദൈവം ആഗ്രഹി​ക്കു​ന്നു.

—യോഹ​ന്നാൻ 3:16; 1 തിമൊ​ഥെ​യൊസ്‌ 2:3, 4.

◼ ദൈവം നമ്മെ പ്രത്യാ​ശ​യോ​ടെ നോക്കു​ന്നു.

അവൻ നമ്മുടെ കുറ്റങ്ങ​ളി​ലും കുറവു​ക​ളി​ലും അല്ല നമ്മുടെ സൽഗു​ണ​ങ്ങ​ളി​ലും ശ്രമങ്ങ​ളി​ലു​മാണ്‌ ശ്രദ്ധ കേന്ദ്രീ​ക​രി​ക്കു​ന്നത്‌. (സങ്കീർത്തനം 103:12-14; 130:3; എബ്രായർ 6:10) നാം ശരി ചെയ്യു​മെന്ന്‌ അവൻ പ്രത്യാ​ശി​ക്കു​ക​യും നാം അതു ചെയ്യു​മ്പോൾ അതിൽ പ്രസാ​ദി​ക്കു​ക​യും ചെയ്യുന്നു.—സദൃശ​വാ​ക്യ​ങ്ങൾ 27:11.

◼ ദൈവിക ലക്ഷ്യങ്ങൾ കൈവ​രി​ക്കു​ന്ന​തിൽ സഹായി​ക്കാ​മെന്ന്‌ ദൈവം വാഗ്‌ദാ​നം ചെയ്യുന്നു.

അവന്റെ ദാസന്മാർക്ക്‌ ഒരിക്ക​ലും നിസ്സഹാ​യത തോ​ന്നേ​ണ്ട​തില്ല. നമ്മെ സഹായി​ക്കാൻ, ഏറ്റവും വലിയ ശക്തിയായ തന്റെ പരിശു​ദ്ധാ​ത്മാ​വി​നെ ദൈവം ഉദാര​മാ​യി നൽകുന്നു.—ഫിലി​പ്പി​യർ 4:13.

◼ ദൈവ​ത്തിൽ അർപ്പി​ക്കുന്ന പ്രത്യാശ ഒരിക്ക​ലും അസ്ഥാന​ത്താ​കു​ക​യില്ല.

അവൻ പൂർണ​മാ​യും ആശ്രയ​യോ​ഗ്യ​നും വിശ്വ​സ്‌ത​നും ആയതി​നാൽ നിങ്ങളെ ഒരിക്ക​ലും നിരാ​ശ​പ്പെ​ടു​ത്തു​ക​യില്ല. —സങ്കീർത്തനം 25:3.

[12-ാം പേജിലെ ചിത്രം]

ശിരസ്‌ത്രം തലയെ സംരക്ഷി​ക്കു​ന്ന​തു​പോ​ലെ പ്രത്യാശ മനസ്സിനെ സംരക്ഷി​ക്കു​ന്നു

[12-ാം പേജിലെ ചിത്രം]

ഒരു നങ്കൂരം​പോ​ലെ, ഉറച്ച അടിസ്ഥാ​ന​മുള്ള പ്രത്യാ​ശ​യ്‌ക്ക്‌ സ്ഥിരത പ്രദാനം ചെയ്യാൻ കഴിയും

[കടപ്പാട്‌]

Courtesy René Seindal/Su concessione del Museo Archeologico Regionale A. Salinas di Palermo