യേശു​വി​ന്റെ ജനനം—യഥാർഥ ചരിത്രം

നിങ്ങളു​ടെ രാജ്യത്തെ സംബന്ധിച്ച ചരി​ത്ര​ത്തി​ലെ പരക്കെ അറിയ​പ്പെ​ടുന്ന ഒരു സംഭവത്തെ കുറിച്ചു ചിന്തി​ക്കുക. അതി​നെ​ക്കു​റിച്ച്‌ ഒന്നില​ധി​കം ചരി​ത്ര​കാ​ര​ന്മാർ തെളി​വു​കൾ സഹിതം രേഖ​പ്പെ​ടു​ത്തി​യി​ട്ടുണ്ട്‌. എന്നാൽ ആ സംഭവം നടന്നി​ട്ടേ​യില്ല, അത്‌ ഒരു കെട്ടു​ക​ഥ​യാണ്‌ എന്ന്‌ ആരെങ്കി​ലും നിങ്ങ​ളോ​ടു പറയു​ന്നെ​ങ്കി​ലോ? അല്ലെങ്കിൽ കൂടുതൽ വ്യക്തി​പ​ര​മായ ഒരു സ്ഥിതി​വി​ശേ​ഷ​മെ​ടു​ക്കാം. നിങ്ങളു​ടെ വല്യപ്പന്റെ ജനന​ത്തെ​യും അദ്ദേഹ​ത്തി​ന്റെ ചെറു​പ്പ​കാ​ല​ത്തെ​യും കുറിച്ച്‌ നിങ്ങളു​ടെ വീട്ടു​കാർ നിങ്ങ​ളോ​ടു പറഞ്ഞി​രി​ക്കുന്ന മിക്കതും വ്യാജ​മാ​ണെന്ന്‌ ആരെങ്കി​ലും പറയു​ന്നെ​ങ്കി​ലോ? രണ്ടു സംഗതി​ക​ളി​ലും, അത്തര​മൊ​രു സൂചന​പോ​ലും നിങ്ങളിൽ കോപം ജ്വലി​പ്പി​ക്കും. നിശ്ചയ​മാ​യും, നിങ്ങൾ അത്തരം അവകാ​ശ​വാ​ദങ്ങൾ മുഖവി​ല​യ്‌ക്ക്‌ എടുക്കു​ക​യില്ല.

എന്നിട്ടും, യേശു​വി​ന്റെ ജനനത്തെ കുറി​ച്ചുള്ള മത്തായി​യു​ടെ​യും ലൂക്കൊ​സി​ന്റെ​യും സുവി​ശേഷ വിവരണം വിമർശകർ സാധാ​ര​ണ​ഗ​തി​യിൽ തള്ളിക്ക​ള​യു​ന്നു. ഈ വിവര​ണങ്ങൾ അങ്ങേയറ്റം പരസ്‌പ​ര​വി​രു​ദ്ധ​വും പൊരു​ത്ത​പ്പെ​ടു​ത്താ​നാ​കാ​ത്ത​തും ആണെന്നും രണ്ടിലും കെട്ടി​ച്ചമച്ച സംഗതി​ക​ളും ചരി​ത്ര​പ​ര​മായ അബദ്ധങ്ങ​ളും ഉണ്ടെന്നും അവർ പറയുന്നു. അതു സത്യമാ​യി​രി​ക്കു​മോ? അത്തരം ആരോ​പ​ണങ്ങൾ വിശ്വ​സി​ക്കു​ന്ന​തി​നു​പ​കരം, ആ സുവി​ശേഷ വിവര​ണങ്ങൾ നമു​ക്കൊ​ന്നു പരി​ശോ​ധി​ച്ചു​നോ​ക്കാം. അങ്ങനെ, അവയ്‌ക്കു നമ്മെ ഇന്ന്‌ എന്തു പഠിപ്പി​ക്കാ​നുണ്ട്‌ എന്നു കാണാം.

എഴുതി​യ​തി​ന്റെ ഉദ്ദേശ്യം

ആദ്യം​തന്നെ ഈ ബൈബിൾ വിവര​ണ​ങ്ങ​ളു​ടെ ഉദ്ദേശ്യം എന്തെന്ന്‌ ഓർക്കു​ന്നതു സഹായ​ക​മാണ്‌. അവ ജീവച​രി​ത്രങ്ങൾ അല്ല; സുവി​ശേ​ഷ​ങ്ങ​ളാണ്‌. രണ്ടും തമ്മിലുള്ള വ്യത്യാ​സം വേർതി​രിച്ച്‌ അറിയു​ന്നതു പ്രധാ​ന​മാണ്‌. ഒരു ജീവച​രി​ത്ര​ത്തിൽ, അതിന്റെ എഴുത്തു​കാ​രൻ താൻ ആരെക്കു​റിച്ച്‌ എഴുതു​ന്നു​വോ അയാൾ എങ്ങനെ പ്രശസ്‌തൻ ആയിത്തീർന്നു എന്നു പ്രകട​മാ​ക്കു​ന്ന​തിന്‌ നൂറു​ക​ണ​ക്കി​നു പേജുകൾ എഴുതി​യേ​ക്കാം. അതു​കൊണ്ട്‌ ചില ജീവച​രി​ത്ര​ങ്ങ​ളിൽ വ്യക്തി​യു​ടെ മാതാ​പി​താ​ക്ക​ളെ​യും ജനന​ത്തെ​യും കുട്ടി​ക്കാ​ല​ത്തെ​യും കുറിച്ചു വിശദീ​ക​രി​ക്കു​ന്ന​തി​നു വളരെ​യേറെ പേജുകൾ ഉപയോ​ഗി​ച്ചി​രി​ക്കു​ന്നതു കാണാം. എന്നാൽ സുവി​ശേ​ഷ​ങ്ങ​ളു​ടെ കാര്യ​ത്തിൽ സംഗതി വ്യത്യ​സ്‌ത​മാണ്‌. നാലു സുവി​ശേഷ വിവര​ണ​ങ്ങ​ളിൽ, മത്തായി​യു​ടേ​തും ലൂക്കൊ​സി​ന്റേ​തും മാത്രമേ യേശു​വി​ന്റെ ജനന​ത്തെ​യും ബാല്യ​കാ​ല​ത്തെ​യും കുറിച്ചു പറയു​ന്നു​ള്ളൂ. എന്നാൽ അവയുടെ ഉദ്ദേശ്യം യേശു എങ്ങനെ പ്രശസ്‌തൻ ആയിത്തീർന്നു എന്നു വിവരി​ക്കുക അല്ല. ഭൂമി​യി​ലേക്കു വരുന്ന​തി​നു​മുമ്പ്‌ യേശു ഒരു ആത്മവ്യ​ക്തി​യാ​യി അസ്‌തി​ത്വ​ത്തിൽ ഉണ്ടായി​രു​ന്നു എന്ന്‌ യേശു​വി​ന്റെ അനുഗാ​മി​കൾ അംഗീ​ക​രി​ച്ചി​രു​ന്നു എന്ന്‌ ഓർക്കുക. (യോഹ​ന്നാൻ 8:23, 58) അതു​കൊണ്ട്‌, യേശു ഏതുതരം മനുഷ്യൻ ആയിത്തീർന്നു എന്നു കാണി​ക്കാൻ മത്തായി​യും ലൂക്കൊ​സും അവന്റെ ബാല്യ​കാ​ലത്തെ കുറിച്ച്‌ സവിസ്‌തരം പ്രതി​പാ​ദി​ക്കു​ന്നില്ല. മറിച്ച്‌, തങ്ങളുടെ സുവി​ശേ​ഷ​ത്തി​ന്റെ ഉദ്ദേശ്യ​ത്തി​നു ചേർന്ന സംഭവ​ങ്ങ​ളാണ്‌ അവർ വിവരി​ച്ചത്‌.

അവ എഴുതി​യ​തി​ലെ അവരുടെ ഉദ്ദേശ്യം എന്തായി​രു​ന്നു? അവർ രണ്ടു​പേർക്കും ഒരേ സന്ദേശം—സുവാർത്ത—ആണ്‌ ഉണ്ടായി​രു​ന്നത്‌. യേശു വാഗ്‌ദത്ത മിശിഹ, അഥവാ ക്രിസ്‌തു ആണ്‌; അവൻ മനുഷ്യ​വർഗ​ത്തി​ന്റെ പാപങ്ങൾക്കു വേണ്ടി മരിച്ചു; അവൻ സ്വർഗ​ത്തി​ലേക്കു പുനരു​ത്ഥാ​നം ചെയ്‌തു എന്ന സുവി​ശേഷം തന്നെ. എന്നാൽ രണ്ട്‌ എഴുത്തു​കാ​രും തികച്ചും വ്യത്യ​സ്‌ത​മായ പശ്ചാത്ത​ല​ത്തിൽനിന്ന്‌ ഉള്ളവരാ​യി​രു​ന്നു. എഴുതി​യ​തോ രണ്ടു വ്യത്യസ്‌ത കൂട്ടങ്ങൾക്കു​വേ​ണ്ടി​യും. നികുതി പിരി​വു​കാ​ര​നായ മത്തായി തന്റെ വിവരണം മുഖ്യ​മാ​യും യഹൂദർക്കു വേണ്ടി​യാണ്‌ എഴുതി​യത്‌. വൈദ്യൻ ആയിരുന്ന ലൂക്കൊസ്‌ ആകട്ടെ, ഏതോ ഉന്നത സ്ഥാനം വഹിച്ചി​രി​ക്കാൻ സാധ്യ​ത​യുള്ള ‘ശ്രീമാ​നായ തെയോ​ഫി​ലോ​സി​നും,’ ഒരുപക്ഷേ യഹൂദ​ന്മാ​രും വിജാ​തീ​യ​രും ഉൾപ്പെട്ട ഒരു വലിയ കൂട്ടത്തി​നു വേണ്ടി​യും. (ലൂക്കൊസ്‌ 1:1-3) താൻ ആർക്കു​വേണ്ടി എഴുതു​ന്നു​വോ ആ പ്രത്യേക കൂട്ടത്തെ ബോധ്യ​പ്പെ​ടു​ത്താൻ ഏറ്റവും സാധ്യ​ത​യു​ള്ള​തും ഏറ്റവും പ്രസക്ത​മാ​യ​തു​മായ സംഭവ​ങ്ങ​ളാണ്‌ ഓരോ എഴുത്തു​കാ​ര​നും തിര​ഞ്ഞെ​ടു​ത്തത്‌. അങ്ങനെ, മത്തായി​യു​ടെ വിവരണം യേശു​വി​നോ​ടുള്ള ബന്ധത്തിൽ നിറ​വേ​റിയ എബ്രായ തിരു​വെ​ഴു​ത്തു പ്രവച​ന​ങ്ങൾക്ക്‌ ഊന്നൽ കൊടു​ക്കു​ന്നു. അതേസ​മയം, ലൂക്കൊസ്‌ കൂടുതൽ ചരി​ത്രാ​ധി​ഷ്‌ഠി​ത​മായ, യഹൂദ​ര​ല്ലാത്ത വായന​ക്കാർക്ക്‌ അനു​യോ​ജ്യ​മായ സമീപനം കൈ​ക്കൊ​ള്ളു​ന്നു.

അപ്പോൾ അവരുടെ വിവര​ണങ്ങൾ വ്യത്യാ​സ​പ്പെ​ട്ടി​രി​ക്കു​ന്ന​തിൽ അത്ഭുത​പ്പെ​ടാ​നില്ല. എന്നാൽ വിമർശകർ അവകാ​ശ​പ്പെ​ടു​ന്ന​തു​പോ​ലെ, രണ്ടും പരസ്‌പ​ര​വി​രു​ദ്ധമല്ല. അവ പരസ്‌പ​ര​പൂ​ര​ക​ങ്ങ​ളാണ്‌, രണ്ടും ഭംഗി​യാ​യി കൂടി​ച്ചേർന്ന്‌ കൂടുതൽ സമ്പൂർണ​മായ ഒരു ചിത്രം പ്രദാനം ചെയ്യുന്നു.

യേശു ബേത്‌ല​ഹേ​മിൽ ജനിക്കു​ന്നു

യേശു​വി​ന്റെ ജനനം സംബന്ധിച്ച ഒരു ശ്രദ്ധേ​യ​മായ അത്ഭുതം അവൻ കന്യക​യിൽനി​ന്നു ജനിച്ചു എന്നതാണ്‌; ഇതിനെ കുറിച്ച്‌ മത്തായി​യും ലൂക്കൊ​സും രേഖ​പ്പെ​ടു​ത്തു​ന്നുണ്ട്‌. ഈ അത്ഭുതം നൂറ്റാ​ണ്ടു​കൾക്കു മുമ്പ്‌ യെശയ്യാവ്‌ ഉച്ചരിച്ച ഒരു പ്രവചനം നിവർത്തി​ക്കു​ന്നു എന്നു മത്തായി പ്രകട​മാ​ക്കു​ന്നു. (യെശയ്യാ​വു 7:14; മത്തായി 1:22, 23) യേശു ബേത്‌ല​ഹേ​മിൽ ജനിക്കാൻ കാരണം കൈസ​രു​ടെ ഒരു പേർചാർത്തൽ പ്രഖ്യാ​പ​ന​ത്തെ​ത്തു​ടർന്ന്‌ യോ​സേ​ഫി​നും മറിയ​യ്‌ക്കും അങ്ങോട്ടു യാത്ര ചെയ്യേ​ണ്ടി​വ​ന്ന​താ​യി​രു​ന്നു എന്നു ലൂക്കൊസ്‌ വിശദ​മാ​ക്കു​ന്നു. (7-ാം പേജിലെ ചതുരം കാണുക.) യേശു ബേത്‌ല​ഹേ​മിൽ ജനിച്ചു എന്നതിനു പ്രാധാ​ന്യ​മുണ്ട്‌. യെരൂ​ശ​ലേ​മിന്‌ അടുത്തുള്ള, പ്രത്യ​ക്ഷ​ത്തിൽ അപ്രധാ​ന​മായ ഈ കൊച്ചു പട്ടണത്തിൽനിന്ന്‌ ആയിരി​ക്കും മിശിഹ വരുന്ന​തെന്ന്‌ നൂറ്റാ​ണ്ടു​കൾക്കു​മുമ്പ്‌ മീഖാ പ്രവാ​ചകൻ മുൻകൂ​ട്ടി പറഞ്ഞി​രു​ന്നു.—മീഖാ 5:2.

യേശു​വി​ന്റെ ജനന പശ്ചാത്തലം ചിത്രീ​ക​രി​ക്കു​ന്ന​തി​നുള്ള അടിസ്ഥാ​നം എന്നനി​ല​യിൽ അവൻ ജനിച്ച രാത്രി പ്രശസ്‌ത​മാ​യി​ത്തീർന്നി​രി​ക്കു​ന്നു. എന്നിരു​ന്നാ​ലും, സാധാ​ര​ണ​മാ​യി ചിത്രീ​ക​രി​ക്ക​പ്പെ​ടു​ന്ന​തിൽനി​ന്നും വളരെ വ്യത്യ​സ്‌ത​മാണ്‌ വസ്‌തുത. ചരി​ത്ര​കാ​ര​നായ ലൂക്കൊസ്‌, യോ​സേ​ഫും മറിയ​യും ബേത്‌ല​ഹേ​മി​ലേക്കു വരാൻ ഇടയാ​ക്കിയ ജനസം​ഖ്യാ കണക്കെ​ടു​പ്പി​നെ കുറി​ച്ചും അവൻ ജനിച്ച ആ പ്രധാന രാത്രി​യിൽ ആടുക​ളോ​ടൊ​പ്പം വെളി​യിൽ കഴിഞ്ഞി​രുന്ന ഇടയന്മാ​രെ കുറി​ച്ചും നമ്മോടു പറയുന്നു. ഈ രണ്ടു വസ്‌തു​ത​ക​ളും കണക്കി​ലെ​ടു​ക്കു​മ്പോൾ യേശു​വി​ന്റെ ജനനം ഡിസം​ബ​റിൽ നടന്നി​രി​ക്കാൻ സാധ്യ​ത​യി​ല്ലെന്ന്‌ അനേകം ബൈബിൾ ഗവേഷകർ നിഗമനം ചെയ്‌തി​രി​ക്കു​ന്നു. തണുപ്പും മഴയു​മുള്ള കാലത്ത്‌ താന്താന്റെ നഗരങ്ങ​ളി​ലേക്ക്‌ യാത്ര ചെയ്യാൻ കൽപ്പി​ക്കു​ന്നത്‌ അപ്പോൾത്തന്നെ കലാപ പ്രവണത പ്രകട​മാ​ക്കി​യി​രുന്ന, മത്സരി​ക​ളായ യഹൂദ ജനതയെ കൂടുതൽ കോപാ​കു​ല​രാ​ക്കു​മാ​യി​രു​ന്നു. അതു​കൊണ്ട്‌, കൈസർ അതു ചെയ്‌തി​രി​ക്കാൻ സാധ്യ​ത​യി​ല്ലെന്ന്‌ അവർ ചൂണ്ടി​ക്കാ​ണി​ക്കു​ന്നു. അതു​പോ​ലെ, അത്തരം കഠിന കാലാ​വ​സ്ഥ​യിൽ ആടുക​ളു​മാ​യി ആട്ടിട​യ​ന്മാർ വെളി​യിൽ ആയിരി​ക്കു​ന്ന​തി​നും സാധ്യ​ത​യി​ല്ലെന്നു പണ്ഡിത​ന്മാർ അഭി​പ്രാ​യ​പ്പെ​ടു​ന്നു.—ലൂക്കൊസ്‌ 2:8-14.

തന്റെ പുത്രന്റെ ജനന​ത്തെ​ക്കു​റിച്ച്‌ അറിയി​ക്കാൻ നടത്താൻ യഹോവ തിര​ഞ്ഞെ​ടു​ത്തത്‌ ആരെ ആണെന്ന​തും ശ്രദ്ധി​ക്കുക. വിദ്യാ​സ​മ്പ​ന്ന​രും പ്രബല​രും ആയിരുന്ന ആ നാളിലെ മതനേ​താ​ക്ക​ന്മാ​രെ അല്ല, മറിച്ച്‌ വീടിനു വെളി​യിൽ കഴിഞ്ഞി​രുന്ന ഏറ്റവും സാധാ​ര​ണ​ക്കാ​രായ തൊഴി​ലാ​ളി​കളെ ആയിരു​ന്നു. ശാസ്‌ത്രി​മാർക്കും പരീശ​ന്മാർക്കും ഇടയന്മാ​രു​മാ​യി കാര്യ​മായ സമ്പർക്ക​മൊ​ന്നും ഇല്ലായി​രു​ന്നു. ഇടയന്മാ​രു​ടെ ക്രമമി​ല്ലാത്ത ജോലി സമയം നിമിത്തം അലിഖിത നിയമ​ങ്ങ​ളിൽ ചിലതു നിറ​വേ​റ്റാൻ അവർക്ക്‌ ആകുമാ​യി​രു​ന്നില്ല. എന്നാൽ ദൈവം വലിയ പദവി നൽകി ആദരി​ച്ചത്‌ താഴ്‌മ​യുള്ള ഈ വിശ്വസ്‌ത പുരു​ഷ​ന്മാ​രെ ആയിരു​ന്നു. ആയിര​ക്ക​ണ​ക്കി​നു വർഷങ്ങ​ളാ​യി ദൈവ​ജനത കാത്തി​രുന്ന മിശിഹ ബേത്‌ല​ഹേ​മിൽ ജനിച്ചി​രി​ക്കു​ന്നു എന്ന്‌ ഒരു കൂട്ടം ദൂതന്മാർ അവരെ അറിയി​ച്ചു. ഈ പുരു​ഷ​ന്മാ​രാണ്‌ മറിയ​യെ​യും യോ​സേ​ഫി​നെ​യും സന്ദർശി​ക്കു​ക​യും പുൽത്തൊ​ട്ടി​യിൽ കിടക്കുന്ന നിഷ്‌കളങ്ക പൈത​ലി​നെ കാണു​ക​യും ചെയ്‌തത്‌, അല്ലാതെ പുൽക്കൂ​ടു​ക​ളിൽ സാധാ​ര​ണ​മാ​യി ചിത്രീ​ക​രി​ക്കാ​റു​ള്ള​തു​പോ​ലെ “മൂന്നു രാജാ​ക്ക​ന്മാർ” അല്ല.—ലൂക്കൊസ്‌ 2:15-20.

താഴ്‌മ​യുള്ള സത്യാ​ന്വേ​ഷ​കർക്കു യഹോ​വ​യു​ടെ പ്രീതി

തന്നെ സ്‌നേ​ഹി​ക്കു​ക​യും തന്റെ ഉദ്ദേശ്യ​ങ്ങ​ളു​ടെ നിവൃത്തി കാണു​ന്ന​തിൽ അതിയായ താത്‌പ​ര്യം കാണി​ക്കു​ക​യും ചെയ്യുന്ന താഴ്‌മ​യുള്ള ആളുക​ളോ​ടു ദൈവം പ്രീതി കാട്ടുന്നു. യേശു​വി​ന്റെ ജനനവു​മാ​യി ബന്ധപ്പെട്ട സംഭവ​ങ്ങ​ളി​ലും ഇതു കൂടെ​ക്കൂ​ടെ കാണാം. കുട്ടി​യു​ടെ ജനനത്തി​നു​ശേഷം ഏകദേശം ഒരു മാസം കഴിഞ്ഞ​പ്പോൾ, യോ​സേ​ഫും മറിയ​യും മോ​ശൈക ന്യായ​പ്ര​മാ​ണം അനുസ​രി​ച്ചു​കൊണ്ട്‌ “ഒരു ഇണ കുറു​പ്രാ​വി​നെ​യോ രണ്ടു പ്രാക്കു​ഞ്ഞി​നെ​യോ” യാഗം കഴിക്കു​ന്നു. (ലൂക്കൊസ്‌ 2:22-24) ന്യായ​പ്ര​മാ​ണ​പ്ര​കാ​രം വാസ്‌ത​വ​ത്തിൽ ഒരു ആട്ടു​കൊ​റ്റ​നാണ്‌ വേണ്ടി​യി​രു​ന്നത്‌, എന്നാൽ ദരി​ദ്രർക്ക്‌ ചെലവു കുറഞ്ഞ യാഗം ന്യായ​പ്ര​മാ​ണ​ത്തിൽ അനുവ​ദി​ച്ചി​രു​ന്നു. (ലേവ്യ​പു​സ്‌തകം 12:1-8) അതി​നെ​ക്കു​റി​ച്ചു ചിന്തി​ക്കുക. അഖിലാ​ണ്ഡ​ത്തി​ന്റെ പരമാ​ധി​കാ​രി​യായ യഹോ​വ​യാം ദൈവം തന്റെ പ്രിയ​പ്പെ​ട്ട​വ​നും ഏകജാ​ത​നും ആയ പുത്രൻ വളർത്ത​പ്പെ​ടേ​ണ്ട​തിന്‌ തിര​ഞ്ഞെ​ടു​ത്തത്‌ ഒരു സമ്പന്ന കുടും​ബത്തെ അല്ല, മറിച്ച്‌ ഒരു സാധു കുടും​ബത്തെ ആയിരു​ന്നു. നിങ്ങൾ ഒരു മാതാ​വോ പിതാ​വോ ആണെങ്കിൽ, നിങ്ങളു​ടെ മനസ്സിൽ സജീവ​മാ​യി പതിയേണ്ട ഒരു ആശയമാണ്‌ ഇത്‌, അതായത്‌ നിങ്ങൾക്ക്‌ നിങ്ങളു​ടെ കുട്ടി​കൾക്കു നൽകാൻ കഴിയുന്ന ഏറ്റവും നല്ല ദാനം—സമ്പത്തി​നെ​ക്കാ​ളും അസൂയാ​വ​ഹ​മായ വിദ്യാ​ഭ്യാ​സ​ത്തെ​ക്കാ​ളും വളരെ​യേറെ മെച്ചപ്പെട്ടത്‌—ആത്മീയ മൂല്യ​ങ്ങൾക്കു മുൻതൂ​ക്കം നൽകുന്ന ഒരു ഭവനാ​ന്ത​രീ​ക്ഷം ആണ്‌.

ആലയത്തിൽവച്ച്‌, വിശ്വ​സ്‌ത​രും താഴ്‌മ​യു​ള്ള​വ​രു​മായ മറ്റു രണ്ട്‌ ആരാധ​കർക്കും യഹോ​വ​യു​ടെ പ്രീതി ലഭിക്കു​ന്നുണ്ട്‌. ഒന്ന്‌ 84 വയസ്സു​കാ​രി​യും “ദൈവാ​ലയം വിട്ടു​പി​രി​യാ”ത്തവളു​മായ ഹന്ന ആണ്‌. (ലൂക്കൊസ്‌ 2:36, 37) മറ്റൊ​രാൾ വിശ്വ​സ്‌ത​നും പ്രായം ചെന്നവ​നു​മായ ശിമ്യോൻ. മരിക്കു​ന്ന​തി​നു മുമ്പ്‌, വാഗ്‌ദത്ത മിശിഹ ആയിത്തീ​രാ​നി​രി​ക്കു​ന്ന​വനെ കാണുക എന്ന ദൈവദത്ത പദവി​യിൽ രണ്ടു​പേ​രും പുളകി​ത​രാണ്‌. ശിമ്യോൻ കുട്ടി​യെ​ക്കു​റിച്ച്‌ ഒരു പ്രവചനം നടത്തുന്നു. അത്‌ പ്രത്യാ​ശാ​നിർഭ​ര​മായ ഒന്നാ​ണെ​ങ്കി​ലും അതിൽ ദുഃഖ​വും കലർന്നി​രു​ന്നു. ഈ യുവമാ​താ​വായ മറിയം തന്റെ പ്രിയ​പു​ത്രനെ പ്രതി ദുഃഖ​ത്താൽ കുത്തി​ത്തു​ള​യ്‌ക്ക​പ്പെ​ടും എന്ന്‌ അവൻ മുൻകൂ​ട്ടി പറയുന്നു.—ലൂക്കൊസ്‌ 2:25-35.

കുട്ടി അപകട​ത്തിൽ

ഈ നിഷ്‌ക​ള​ങ്ക​നായ കുട്ടി ദ്വേഷി​ക്ക​പ്പെ​ടു​മെ​ന്നുള്ള ശോകാർദ്ര​മായ ഒരു ഓർമി​പ്പി​ക്ക​ലാണ്‌ ശിമ്യോ​ന്റെ പ്രവചനം. അവൻ ശിശു​വാ​യി​രി​ക്കെ​ത്തന്നെ, ഈ വിദ്വേ​ഷം പ്രകട​മാ​യി. മത്തായി​യു​ടെ വിവരണം അതു വിശദ​മാ​ക്കു​ന്നുണ്ട്‌. പല മാസങ്ങൾ കഴിഞ്ഞു​പോ​യി, യോ​സേ​ഫും മറിയ​യും യേശു​വും ഇപ്പോൾ ബേത്‌ല​ഹേ​മി​ലെ ഒരു വീട്ടിൽ പാർക്കു​ക​യാണ്‌. അപ്രതീ​ക്ഷി​ത​മാ​യി ഏതാനും വിദേ​ശി​കൾ അവരെ സന്ദർശി​ക്കു​ന്നു. എണ്ണമറ്റ പുൽക്കൂ​ടു ദൃശ്യ​ങ്ങ​ളിൽനി​ന്നു വ്യത്യ​സ്‌ത​മാ​യി, ഇവർ എത്ര പേർ ഉണ്ടായി​രു​ന്നു എന്നു മത്തായി വ്യക്തമാ​ക്കു​ന്നില്ല. അവൻ അവരെ “ജ്ഞാനികൾ” എന്നോ “മൂന്നു രാജാ​ക്ക​ന്മാർ” എന്നോ വിശേ​ഷി​പ്പി​ക്കു​ന്നു​മില്ല. അവൻ മാഗി എന്ന ഗ്രീക്കു പദമാണ്‌ ഉപയോ​ഗി​ക്കു​ന്നത്‌; അതിനർഥം “ജ്യോ​തി​ഷ​ക്കാർ” എന്നാണ്‌. ഇതു മാത്രം മതിയാ​കും ഇവിടെ ദുഷ്ടമായ എന്തോ സംഭവി​ക്കാൻ പോകു​ക​യാ​ണെന്ന സൂചന വായന​ക്കാ​രനു ലഭിക്കാൻ. എന്തെന്നാൽ ദൈവ​വ​ചനം കുറ്റം​വി​ധി​ക്കു​ന്ന​തും വിശ്വസ്‌ത യഹൂദ​ന്മാർ കർശന​മാ​യി ഒഴിവാ​ക്കി​യി​രു​ന്ന​തു​മായ ഒരു സംഗതി​യാ​യി​രു​ന്നു ജ്യോ​തി​ഷം.—ആവർത്ത​ന​പു​സ്‌തകം 18:10-12; യെശയ്യാ​വു 47:13, 14.

ഈ ജ്യോ​തി​ഷ​ക്കാർ “യെഹൂ​ദൻമാ​രു​ടെ രാജാ​വാ​യി പിറന്നവ”നുള്ള സമ്മാന​ങ്ങ​ളു​മാ​യി കിഴക്കു​നിന്ന്‌ ഒരു നക്ഷത്രത്തെ പിന്തു​ടർന്നു വരിക​യാ​യി​രു​ന്നു. (മത്തായി 2:2) എന്നാൽ ആ നക്ഷത്രം അവരെ ബേത്‌ല​ഹേ​മി​ലേക്കു നയിക്കു​ന്നില്ല. മറിച്ച്‌ യെരൂ​ശ​ലേ​മി​ലേ​ക്കും മഹാനായ ഹെരോ​ദാ​വി​ന്റെ അടുക്ക​ലേ​ക്കു​മാ​ണു നയിക്കു​ന്നത്‌. ശിശു​വായ യേശു​വി​നെ ഏതു മാർഗം ഉപയോ​ഗി​ച്ചും കൊല്ലാൻ ഇദ്ദേഹ​ത്തെ​പ്പോ​ലെ പ്രാപ്‌ത​നും തത്‌പ​ര​നു​മാ​യി മറ്റാരും അന്നു ലോകത്ത്‌ ഇല്ലായി​രു​ന്നു. അധികാ​ര​മോ​ഹ​വും ഹിംസ​ബു​ദ്ധി​യും കാട്ടി​യി​രുന്ന ഈ മനുഷ്യൻ, സ്വന്തം കുടും​ബാം​ഗ​ങ്ങ​ളിൽത്തന്നെ തനിക്കു ഭീഷണി​യെന്നു കണ്ട പലരെ​യും വധിച്ചി​രു​ന്നു.a “യെഹൂ​ദൻമാ​രു​ടെ” ഭാവി “രാജാവി”ന്റെ ജനനത്തെ കുറിച്ച്‌ കേട്ട്‌ അസ്വസ്ഥ​നായ ഹെരോ​ദാവ്‌ ബേത്‌ല​ഹേ​മിൽ അവനെ അന്വേ​ഷി​ച്ചു കണ്ടെത്താൻ ജ്യോ​തി​ഷ​ക്കാ​രെ അയയ്‌ക്കു​ന്നു. അവർ യാത്ര​യാ​കു​ന്ന​തോ​ടെ, അസാധാ​ര​ണ​മായ ഒന്ന്‌ സംഭവി​ക്കു​ന്നു. അവരെ യെരൂ​ശ​ലേ​മി​ലേക്കു നയിച്ച ആ “നക്ഷത്രം” നീങ്ങി​ക്കൊ​ണ്ടി​രി​ക്കു​ന്ന​താ​യി കാണ​പ്പെ​ടു​ന്നു!—മത്തായി 2:1-9.

ഇത്‌ ആകാശ​ത്തി​ലെ ഒരു യഥാർഥ വെളി​ച്ച​മാ​യി​രു​ന്നോ അതോ കേവലം ഒരു ദർശന​മാ​യി​രു​ന്നോ എന്നു നമുക്ക്‌ അറിയില്ല. എന്നാൽ ഈ “നക്ഷത്രം” ദൈവ​ത്തിൽനിന്ന്‌ അല്ലായി​രു​ന്നു എന്നു നമുക്ക​റി​യാം. അത്‌ കുടി​ല​മായ ഉദ്ദേശ്യ​ത്തോ​ടെ, കൃത്യ​മാ​യി​ത്തന്നെ, ഈ പുറജാ​തി ആരാധ​കരെ ദരി​ദ്ര​നായ ഒരു ആശാരി​യു​ടെ​യും ഭാര്യ​യു​ടെ​യും സംരക്ഷ​ണ​യിൽ കഴിയുന്ന നിസ്സഹാ​യ​നായ യേശു​വി​ന്റെ അടുക്ക​ലേക്കു നയിക്കു​ന്നു. അറിയാ​തെ​തന്നെ ഹെരോ​ദാ​വി​ന്റെ ഉപകര​ണ​ങ്ങ​ളാ​യി​ത്തീർന്ന ഈ ജ്യോ​തി​ഷ​ക്കാർ പ്രതി​കാ​ര​ദാ​ഹി​യായ ആ ഏകാധി​പ​തി​യു​ടെ അടുക്കൽ മടങ്ങി​യെത്തി വിവരം ധരിപ്പി​ക്കാ​നും അങ്ങനെ അത്‌ കുട്ടി​യു​ടെ നാശത്തിൽ കലാശി​ക്കാ​നു​മുള്ള സാധ്യ​ത​യു​ണ്ടാ​യി​രു​ന്നു. എന്നാൽ ഒരു സ്വപ്‌ന​ത്തി​ലൂ​ടെ ദൈവം ഇടപെട്ട്‌ അവരെ മറ്റൊരു വഴിയി​ലൂ​ടെ തിരി​ച്ചു​വി​ടു​ന്നു. അതു​കൊണ്ട്‌ മിശി​ഹയെ ദ്രോ​ഹി​ക്കു​ന്ന​തിന്‌ എന്തും ചെയ്യാൻ മടിക്കാത്ത ദൈവ​ശ​ത്രു​വായ സാത്താന്റെ ഒരു തന്ത്രമാ​യി​രു​ന്നി​രി​ക്കണം ആ “നക്ഷത്രം.” ഈ “നക്ഷത്ര”ത്തെയും ജ്യോ​തി​ഷ​ക്കാ​രെ​യും ദൈവം അയച്ചതാ​ണെന്ന മട്ടിൽ പുൽക്കൂ​ടു​ക​ളിൽ ചിത്രീ​ക​രി​ക്കു​ന്നത്‌ എന്തൊരു വിരോ​ധാ​ഭാ​സ​മാണ്‌!—മത്തായി 2:9-12.

എന്നിട്ടും സാത്താൻ വിട്ടു​കൊ​ടു​ക്കാൻ കൂട്ടാ​ക്കു​ന്നില്ല. അവന്റെ ചട്ടുക​മാ​യി​ത്തീർന്ന ഹെരോ​ദാവ്‌ രാജാവ്‌ ബേത്‌ല​ഹേ​മി​ലെ രണ്ടു വയസ്സിനു താഴെ​യുള്ള എല്ലാ ആൺകു​ഞ്ഞു​ങ്ങ​ളെ​യും വധിക്കാൻ ഉത്തരവി​ടു​ന്നു. എന്നാൽ യഹോ​വ​യ്‌ക്ക്‌ എതിരായ യുദ്ധത്തിൽ സാത്താനു വിജയി​ക്കാ​നാ​വില്ല. നിഷ്‌ക​ള​ങ്ക​രായ കുട്ടി​കളെ ഇങ്ങനെ നിഷ്‌ക​രു​ണം കൊ​ന്നൊ​ടു​ക്കും എന്നത്‌ ദൈവം ദീർഘ​നാൾമു​മ്പേ മുൻകൂ​ട്ടി കണ്ടിരു​ന്നു എന്ന്‌ മത്തായി എഴുതു​ന്നു. യഹോവ വീണ്ടും സാത്താനെ പരാജ​യ​പ്പെ​ടു​ത്തി. അവൻ ഒരു ദൂതൻ മുഖാ​ന്തരം യോ​സേ​ഫി​നോട്‌ സംരക്ഷ​ണാർഥം ഈജി​പ്‌തി​ലേക്കു പലായനം ചെയ്യാൻ ആവശ്യ​പ്പെട്ടു. കുറച്ചു കാലത്തി​നു​ശേഷം, അവസാനം യോ​സേ​ഫും കുടും​ബ​വും നസറെ​ത്തിൽ താമസ​മാ​ക്കി​യെ​ന്നും തന്റെ ഇളയ സഹോ​ദ​രീ​സ​ഹോ​ദ​ര​ന്മാ​രു​മൊത്ത്‌ യേശു അവിടെ വളർന്നു​വെ​ന്നും മത്തായി റിപ്പോർട്ടു ചെയ്യുന്നു.—മത്തായി 2:13-23; 13:55, 56.

ക്രിസ്‌തു​വി​ന്റെ ജനനം—അതു നിങ്ങൾക്ക്‌ അർഥമാ​ക്കു​ന്നത്‌

യേശു​വി​ന്റെ ജനന​ത്തെ​യും ശൈശ​വ​കാ​ല​ത്തെ​യും കുറി​ച്ചുള്ള സംഭവ​ങ്ങ​ളു​ടെ സംക്ഷിപ്‌ത വിവരണം നിങ്ങളെ അത്ഭുത​പ്പെ​ടു​ത്തു​ന്നു​ണ്ടോ? അതു പലരെ​യും അത്ഭുത​പ്പെ​ടു​ത്തു​ന്നു. ചിലരു​ടെ അവകാ​ശ​വാ​ദ​ങ്ങൾക്കു വിപരീ​ത​മാ​യി, വാസ്‌ത​വ​ത്തിൽ പ്രസ്‌തുത വിവര​ണ​ങ്ങ​ളു​ടെ പരസ്‌പര യോജി​പ്പി​ലും കൃത്യ​ത​യി​ലും അവർ വിസ്‌മ​യി​ക്കു​ന്നു. ചില സംഭവങ്ങൾ നൂറു​ക​ണ​ക്കി​നു വർഷം​മു​മ്പേ മുൻകൂ​ട്ടി പറയ​പ്പെ​ട്ടി​രു​ന്നു എന്നതി​ലും അവർ അത്ഭുത​പ്പെ​ടു​ന്നു. യേശു​വി​ന്റെ ജനനവു​മാ​യി ബന്ധപ്പെട്ട പരമ്പരാ​ഗത കഥകളി​ലും പുൽക്കൂ​ടു​ക​ളി​ലും ചിത്രീ​ക​രി​ക്ക​പ്പെ​ടു​ന്ന​തി​നും സുവി​ശേ​ഷ​ങ്ങ​ളി​ലെ മുഖ്യാ​ശ​യ​ങ്ങ​ളും തമ്മിൽ കാര്യ​മായ വ്യത്യാ​സ​മു​ണ്ടെന്ന്‌ അറിയു​ന്ന​തും അവരെ അതിശ​യി​പ്പി​ക്കു​ന്നു.

ഒരുപക്ഷേ ഏറ്റവും വിസ്‌മ​യ​ജ​നകം പരമ്പരാ​ഗത ക്രിസ്‌തീയ ആഘോ​ഷ​ങ്ങ​ളിൽ ഏറെയും സുവി​ശേഷ വിവര​ണ​ങ്ങ​ളി​ലെ മുഖ്യാ​ശ​യങ്ങൾ വിട്ടു​ക​ള​യു​ന്നു എന്നതാണ്‌. ഉദാഹ​ര​ണ​ത്തിന്‌, യേശു​വി​ന്റെ പിതാ​വി​നെ കുറിച്ച്‌—യോ​സേ​ഫി​നെ അല്ല, യഹോ​വ​യാം ദൈവത്തെ കുറിച്ച്‌—ആരും കാര്യ​മാ​യി ചിന്തി​ക്കു​ന്നില്ല. തന്റെ പ്രിയ​പു​ത്രനെ വളർത്തി​ക്കൊ​ണ്ടു​വ​രാ​നും പരിപാ​ലി​ക്കാ​നു​മുള്ള ഉത്തരവാ​ദി​ത്വം അവൻ യോ​സേ​ഫി​നെ​യും മറിയ​യെ​യും ഏൽപ്പി​ച്ച​പ്പോ​ഴത്തെ അവന്റെ വികാ​ര​ങ്ങളെ കുറിച്ചു ചിന്തി​ക്കുക. തന്റെ പുത്രൻ ശിശു ആയിരി​ക്കു​മ്പോൾപ്പോ​ലും വിദ്വേ​ഷി​യായ ഒരു രാജാവ്‌ അവനെ വധിക്കാൻ ഗൂഢാ​ലോ​ചന നടത്തു​മാ​യി​രുന്ന ഒരു ലോക​ത്തിൽ വളരാൻ അവനെ അനുവ​ദി​ക്കേ​ണ്ടി​വ​രുന്ന ആ സ്വർഗീയ പിതാ​വി​ന്റെ കടുത്ത മനോ​വ്യ​ഥയെ കുറിച്ചു ചിന്തി​ക്കുക! മനുഷ്യ​വർഗ​ത്തോ​ടുള്ള ആഴമായ സ്‌നേഹം ആണ്‌ ഈ ത്യാഗം നടത്താൻ യഹോ​വയെ പ്രേരി​പ്പി​ച്ചത്‌.—യോഹ​ന്നാൻ 3:16.

ക്രിസ്‌തു​മസ്സ്‌ ആഘോ​ഷ​ങ്ങ​ളിൽ യഥാർഥ യേശു പലപ്പോ​ഴും അന്യനാ​കു​ക​യാണ്‌. എന്തിന്‌, തന്റെ ജനനത്തീ​യ​തി​യെ കുറിച്ച്‌ അവൻ എപ്പോ​ഴെ​ങ്കി​ലും ശിഷ്യ​ന്മാ​രോ​ടു പറഞ്ഞതാ​യി​പോ​ലും രേഖയില്ല; അനുഗാ​മി​കൾ അവന്റെ ജന്മദിനം ആഘോ​ഷി​ച്ചി​രു​ന്നു എന്നതി​നും യാതൊ​രു സൂചന​യു​മില്ല.

യേശു​വി​ന്റെ ജനനം അല്ല, മറിച്ച്‌ മരണം ആഘോ​ഷി​ക്കാ​നാണ്‌ അവൻ തന്റെ അനുഗാ​മി​ക​ളോട്‌ ആവശ്യ​പ്പെ​ട്ടത്‌; അതാണ്‌ ലോക​ത്തി​ന്റെ ചരി​ത്രത്തെ ബാധിച്ച പ്രധാന സംഭവം. (ലൂക്കൊസ്‌ 22:19, 20) പുൽത്തൊ​ട്ടി​യി​ലെ ഒരു നിസ്സഹായ ശിശു​വാ​യി അനുസ്‌മ​രി​ക്ക​പ്പെ​ടാ​നല്ല യേശു ആഗ്രഹി​ച്ചത്‌, കാരണം അവൻ മേലാൽ ഒരു നിസ്സഹാ​യ​നായ കുട്ടിയല്ല. വധിക്ക​പ്പെട്ട്‌ 60-ലധികം വർഷം കഴിഞ്ഞ്‌ യോഹ​ന്നാൻ അപ്പൊ​സ്‌ത​ലനു നൽകപ്പെട്ട ദർശനം ശ്രദ്ധി​ക്കുക. അതിൽ യേശു തന്നെത്തന്നെ യുദ്ധത്തി​നാ​യി പുറ​പ്പെ​ടുന്ന ശക്തനായ ഒരു രാജാവ്‌ എന്ന നിലയിൽ അവനു വെളി​പ്പെ​ടു​ത്തി. (വെളി​പ്പാ​ടു 19:11-16) ദൈവ​ത്തി​ന്റെ സ്വർഗീയ രാജ്യ​ത്തി​ന്റെ ഭരണാ​ധി​പൻ എന്ന നിലയിൽ ആ റോളി​ലാണ്‌ നാം ഇന്ന്‌ യേശു​വി​നെ അറി​യേ​ണ്ടത്‌; എന്തെന്നാൽ ലോക​ത്തി​നു മാറ്റം വരുത്താൻ പോകുന്ന രാജാവ്‌ ആണ്‌ അവൻ.

[അടിക്കു​റി​പ്പു​കൾ]

[8-ാം പേജിലെ ചിത്രം]

ക്രിസ്‌തുവിന്റെ ജനനത്തെ കുറി​ച്ചുള്ള സുവാർത്ത അറിയി​ച്ചു​കൊണ്ട്‌ യഹോ​വ​യു​ടെ ദൂതൻ താഴ്‌മ​യുള്ള ഇടയന്മാ​രോ​ടു പ്രീതി കാട്ടി

ലൂക്കൊ​സി​നു തെറ്റു​പ​റ്റി​യോ?

നസറെ​ത്തിൽ വളർന്ന്‌ നസറായൻ എന്ന്‌ പൊതു​വേ അറിയ​പ്പെട്ട യേശു​വിന്‌ അവി​ടെ​നിന്ന്‌ ഏകദേശം 150 കിലോ​മീ​റ്റർ അകലെ​യുള്ള ബേത്‌ല​ഹേ​മിൽ ജനിക്കാൻ കഴിഞ്ഞത്‌ എങ്ങനെ? ലൂക്കൊസ്‌ വിശദ​മാ​ക്കു​ന്നു: “ആ കാലത്തു [യേശു​വി​ന്റെ ജനനത്തി​നു മുമ്പ്‌] ലോകം ഒക്കെയും പേർവഴി ചാർത്തേണം എന്നു ഔഗു​സ്‌തൊ​സ്‌​കൈ​സ​രു​ടെ ഒരു ആജ്ഞ പുറ​പ്പെട്ടു. കുറേ​ന്യൊസ്‌ സുറി​യ​നാ​ടു വാഴു​മ്പോൾ ഈ ഒന്നാമത്തെ ചാർത്തൽ ഉണ്ടായി. എല്ലാവ​രും ചാർത്ത​പ്പെ​ടേ​ണ്ട​തി​ന്നു താന്താന്റെ പട്ടണത്തി​ലേക്കു യാത്ര​യാ​യി.”—ലൂക്കൊസ്‌ 1:1; 2:1-3.

ഈ ഭാഗം അബദ്ധം ആണെന്ന്‌, അല്ലെങ്കിൽ കെട്ടി​ച്ച​മ​ച്ച​താ​ണെന്ന്‌ വിമർശകർ അഭി​പ്രാ​യ​പ്പെ​ടു​ന്നു. പേർവഴി ചാർത്ത​ലും കുറേ​ന്യൊ​സി​ന്റെ വാഴ്‌ച​യും നടന്നത്‌ പൊ.യു. 6-ലോ 7-ലോ ആണെന്ന്‌ അവർ പറയുന്നു. അവരുടെ വാദം ശരിയാ​ണെ​ങ്കിൽ, ലൂക്കൊ​സി​ന്റെ വിവരണം സംബന്ധി​ച്ചു ഗുരു​ത​ര​മായ സംശയം ഉണ്ടാകും, എന്തെന്നാൽ പൊ.യു.മു. 2-ൽ യേശു ജനിച്ചു എന്നാണ്‌ തെളിവു സൂചി​പ്പി​ക്കു​ന്നത്‌. എന്നാൽ ഈ വിമർശകർ രണ്ടു പ്രധാന വസ്‌തു​തകൾ അവഗണി​ക്കു​ക​യാണ്‌. ഒന്ന്‌, ലൂക്കൊസ്‌ ഒന്നില​ധി​കം സെൻസസ്‌ ഉണ്ടായി​രു​ന്നു എന്ന്‌ അംഗീ​ക​രി​ക്കു​ന്നു—അവൻ “ഒന്നാമത്തെ ചാർത്തൽ” എന്നു പരാമർശി​ക്കു​ന്നതു ശ്രദ്ധി​ക്കുക. (ചെരി​ച്ചെ​ഴു​ത്തു ഞങ്ങളു​ടേത്‌.) പിന്നീടു നടന്ന മറ്റൊരു പേർവഴി ചാർത്ത​ലി​നെ​ക്കു​റിച്ച്‌ അവൻ ബോധ​വാ​നാ​യി​രു​ന്നു. (പ്രവൃ​ത്തി​കൾ 5:37) പിന്നീടു നടന്ന ഈ സെൻസസ്‌ തന്നെയാണ്‌ ചരി​ത്ര​കാ​ര​നായ ജോസീ​ഫ​സും വർണി​ക്കു​ന്നത്‌, അതു നടന്നത്‌ പൊ.യു. 6-ൽ ആണ്‌. രണ്ട്‌, കുറേ​ന്യൊ​സി​ന്റെ വാഴ്‌ച, യേശു​വി​ന്റെ ജനനത്തീ​യ​തി​യെ ആ തീയതി​ക്കു ചേർച്ച​യി​ലാ​ക്കാൻ നമ്മെ നിർബ​ന്ധി​ക്കു​ന്നില്ല. എന്തു​കൊണ്ട്‌? വ്യക്തമാ​യും കുറേ​ന്യൊസ്‌ ആ പദവി​യിൽ രണ്ടു പ്രാവ​ശ്യം സേവിച്ചു. അവന്റെ ആദ്യ ഭരണകാ​ലം പൊ.യു.മു. 2 ഉൾപ്പെ​ട്ട​താ​ണെന്ന്‌ അനേകം പണ്ഡിത​ന്മാ​രും സമ്മതി​ക്കു​ന്നു.

യേശു​വി​ന്റെ ജനനം ബേത്‌ല​ഹേ​മിൽ ആക്കുക എന്ന ലക്ഷ്യം സാധി​ക്കു​ന്ന​തി​നും അങ്ങനെ മീഖാ 5:2-ലെ പ്രവചനം നിവൃ​ത്തി​ക്കു​ന്ന​തി​നും വേണ്ടി ലൂക്കൊസ്‌ കെട്ടി​ച്ച​മ​ച്ച​താണ്‌ സെൻസസ്‌ എന്ന്‌ ചില വിമർശകർ പറയുന്നു. ഈ സിദ്ധാന്തം പ്രകാരം, ലൂക്കൊസ്‌ മനഃപൂർവം നുണ പറഞ്ഞു​വെന്നു വരും. സുവി​ശേ​ഷ​വും പ്രവൃ​ത്തി​ക​ളു​ടെ പുസ്‌ത​ക​വും എഴുതിയ അങ്ങേയറ്റം സത്യസ​ന്ധ​നായ ചരി​ത്ര​കാ​രന്റെ സ്വഭാ​വ​വും അത്തരം ഒരു ആരോ​പ​ണ​വും പൊരു​ത്ത​പ്പെ​ടു​ത്താൻ ഒരു വിമർശ​ക​നും സാധി​ക്കു​ക​യില്ല.

ഇനി, വിമർശ​കർക്ക്‌ വിശദീ​ക​രി​ക്കാൻ കഴിയാത്ത മറ്റൊരു സംഗതി​യും ഉണ്ട്‌: സെൻസ​സ്‌തന്നെ ഒരു പ്രവച​ന​നി​വൃ​ത്തി ആയിരു​ന്നു! “മനോഹര രാജ്യ​ത്തി​ലൂ​ടെ നിഷ്‌കർഷി​ക്കു​ന്നവൻ കടന്നു​പോ​കാൻ ഇടയാക്കു”ന്ന ഒരു ഭരണാ​ധി​പനെ കുറിച്ച്‌ പൊ.യു.മു. 6-ാം നൂറ്റാ​ണ്ടിൽ ദാനീ​യേൽ പ്രവചി​ച്ചി​രു​ന്നു. ഇത്‌ ഔഗു​സ്‌തൊ​സി​നും ഇസ്രാ​യേ​ലിൽ സെൻസസ്‌ നടത്തണ​മെന്ന അവന്റെ കൽപ്പന​യ്‌ക്കും ബാധക​മാ​യോ? ആകട്ടെ, ഈ ഭരണാ​ധി​പന്റെ പിൻഗാ​മി​യു​ടെ ഭരണകാ​ലത്ത്‌ മിശിഹ അഥവാ “ഉടമ്പടി നായകൻ” “തകർക്ക”പ്പെടു​മെന്ന്‌ ആ പ്രവചനം തുടർന്നു പറയുന്നു. ഔഗു​സ്‌തൊ​സി​ന്റെ പിൻഗാ​മി​യായ തീബെ​ര്യൊ​സി​ന്റെ ഭരണകാ​ലത്ത്‌ യേശു നിശ്ചയ​മാ​യും “തകർക്ക”പ്പെട്ടു, വധിക്ക​പ്പെട്ടു.—ദാനീ​യേൽ 11:20-22, NW.