കഥ 85
യേശു ഒരു തൊഴുത്തിൽ ജനിക്കുന്നു
ഈ ശിശു ആരാണെന്ന്‌ അറിയാമോ? അതേ, അത്‌ യേശുവാണ്‌. അവൻ ഈ തൊഴുത്തിൽ ജനിച്ചതേയുള്ളൂ. പശുക്കളെയും മറ്റും കെട്ടുന്ന സ്ഥലമാണ്‌ തൊഴുത്ത്‌. മറിയ യേശുവിനെ പുൽത്തൊട്ടിയിൽ കിടത്തുകയാണ്‌. തൊഴുത്തിൽ മൃഗങ്ങൾക്കു തീറ്റ ഇട്ടുകൊടുക്കുന്ന സ്ഥലമാണത്‌. എന്നാൽ മറിയയും യോസേഫും ഇവിടെ ഈ മൃഗങ്ങളുടെകൂടെ ആയിരിക്കുന്നത്‌ എന്തുകൊണ്ടാണ്‌? ഇത്‌ ഒരു കുഞ്ഞിനെ പ്രസവിക്കാനുള്ള സ്ഥലമല്ല, ആണോ?
അല്ല, ഇത്‌ അതിനുള്ള സ്ഥലമല്ല. എന്നാൽ അവർ ഇവിടെ വരാനുള്ള കാരണം ഇതാണ്‌: റോമിലെ ഭരണാധികാരിയായ ഔഗുസ്‌തൊസ്‌ കൈസർ ഒരു നിയമം കൊണ്ടുവന്നു. ആ നിയമം അനുസരിച്ച്‌, എല്ലാവരും അവർ ജനിച്ച പട്ടണത്തിൽ മടങ്ങിച്ചെന്ന്‌ ഒരു പുസ്‌തകത്തിൽ പേര്‌ എഴുതിക്കണമായിരുന്നു. യോസേഫ്‌ ജനിച്ചത്‌ ഇവിടെ ബേത്ത്‌ലേഹെമിലാണ്‌. യോസേഫും മറിയയും ഇവിടെ എത്തിയപ്പോൾ അവർക്കു താമസിക്കാൻ എങ്ങും മുറി കിട്ടിയില്ല. അതുകൊണ്ട്‌ അവർക്ക്‌ ഇവിടെ മൃഗങ്ങളോടൊപ്പം കഴിയേണ്ടിവന്നു. അന്നുതന്നെ മറിയ യേശുവിനെ പ്രസവിക്കുകയും ചെയ്‌തു! എന്നാൽ നോക്കൂ, അവൻ സുഖമായിരിക്കുന്നു.
യേശുവിനെ കാണാൻ വരുന്ന ആ ആട്ടിടയന്മാരെ കണ്ടോ? അവർ രാത്രിയിൽ ആടുകളെ കാത്തുകൊണ്ട്‌ വെളിമ്പ്രദേശത്തായിരുന്നു. പെട്ടെന്ന്‌ ഒരു വലിയ വെളിച്ചം അവർക്കു ചുറ്റും മിന്നി. അത്‌ ഒരു ദൂതനായിരുന്നു! ഇടയന്മാർ വല്ലാതെ പേടിച്ചുപോയി. എന്നാൽ ദൂതൻ അവരോടു പറഞ്ഞു: ‘പേടിക്കേണ്ട! ഞാൻ നിങ്ങളോട്‌ ഒരു നല്ല വാർത്ത അറിയിക്കാൻ വന്നതാണ്‌. ഇന്ന്‌ ബേത്ത്‌ലേഹെമിൽ കർത്താവായ ക്രിസ്‌തു പിറന്നിരിക്കുന്നു. അവൻ ജനങ്ങളെ രക്ഷിക്കും! തുണികൾകൊണ്ട്‌ പൊതിഞ്ഞ്‌ അവനെ ഒരു പുൽത്തൊട്ടിയിൽ കിടത്തിയിരിക്കുന്നത്‌ നിങ്ങൾ കാണും.’ പെട്ടെന്ന്‌ അനേകം ദൂതന്മാർ വന്ന്‌ ദൈവത്തെ സ്‌തുതിക്കാൻ തുടങ്ങി. അതുകൊണ്ട്‌ ഉടൻതന്നെ ഈ ഇടയന്മാർ യേശുവിനെ തേടി അതിവേഗം യാത്രയായി. ഇപ്പോഴിതാ അവർ അവനെ കണ്ടെത്തിയിരിക്കുന്നു.
യേശു ഇത്ര വിശേഷതയുള്ളവൻ ആയിരിക്കുന്നത്‌ എന്തുകൊണ്ടാണ്‌? അവൻ വാസ്‌തവത്തിൽ ആരാണെന്ന്‌ അറിയാമോ? ഈ പുസ്‌തകത്തിലെ ഒന്നാമത്തെ കഥയിൽ ദൈവത്തിന്റെ ആദ്യത്തെ പുത്രനെക്കുറിച്ചു പറഞ്ഞത്‌ ഓർക്കുന്നുണ്ടോ? ഈ പുത്രൻ ആകാശവും ഭൂമിയും മറ്റെല്ലാ സംഗതികളും ഉണ്ടാക്കുന്നതിൽ യഹോവയോടൊത്തു പ്രവർത്തിച്ചിരുന്നു. അവനാണ്‌ ഈ യേശു!
അതേ, യഹോവ തന്റെ പുത്രന്റെ ജീവനെ സ്വർഗത്തിൽനിന്ന്‌ എടുത്ത്‌ മറിയയുടെ ഉള്ളിലാക്കി. പെട്ടെന്നുതന്നെ ഒരു കുഞ്ഞ്‌ അവളുടെ ഉള്ളിൽ വളരാൻ തുടങ്ങി. മറ്റു കുഞ്ഞുങ്ങൾ അവരുടെ അമ്മമാരുടെ ഉള്ളിൽ വളരുന്നതുപോലെതന്നെയായിരുന്നു ഇത്‌. എന്നാൽ ഈ കുഞ്ഞ്‌ ദൈവത്തിന്റെ പുത്രൻ ആയിരുന്നു. ഒടുവിൽ യേശു ഇവിടെ ബേത്ത്‌ലേഹെമിൽ ഒരു തൊഴുത്തിൽ ജനിച്ചു. ആളുകളോട്‌ യേശു ജനിച്ചതിനെക്കുറിച്ചു പറഞ്ഞപ്പോൾ ദൂതന്മാർ വളരെയേറെ സന്തോഷമുള്ളവരായിരുന്നതിന്റെ കാരണം ഇപ്പോൾ മനസ്സിലായില്ലേ?