Таны мэдлэгт

Давидын цэрэгт яагаад харь үндэстний хүмүүс алба хашиж байсан бэ?

ДАВИДЫН цэрэгт аммон хүн Зелек, хит хүн Уриа, моаб хүн Итма зэрэг хүн алба хашиж байв (Ш.дээд 11:39, 41, 46).a Мөн херетчүүд, пелетчүүд, гитчүүд ч байсан (2 Сам. 15:18). Херетчүүд болон пелетчүүд филистчүүдтэй гарал нэг бололтой (Езе. 25:16). Гитчүүд нь Филистийн Гат хотын оршин суугчид байв (Иош. 13:2, 3; 1 Сам. 6:17, 18).

Давид харь үндэстний хүмүүсийг цэрэгт нь алба хашихыг яагаад зөвшөөрсөн бэ? Тэд өөрт нь, хамгийн гол нь Еховад үнэнч гэдэгт итгэсэн. Жишээлбэл Библийн нэг толь бичигт херетчүүд болон пелетчүүдийн тухай «Тэд Давидын засаглалын хамгийн хүнд хэцүү үед түүнд үнэнч байсан» гэж бичжээ («The New Interpreter’s Dictionary of the Bible»). Үнэнчээ хэрхэн харуулсан бэ? «Израилийн бүх хүн» Давид хааныг орхиод «Шеба гэгч ... үймээн дэгдээгчийг» дагахад херетчүүд, пелетчүүд Давидын талд бат зогсож, Шебагийн бослогыг дарахад тусалсан (2 Сам. 20:1, 2, 7). Мөн Давидын хүү Адониа хаан ширээг нь булаахыг оролдоход тэд Давидад үнэнч байж, Еховагийн сонгосон Соломоныг хаан ширээнд суулгахад нь тусалсан (Х.дээд 1:24–27, 38, 39).

Давидад тууштай үнэнч байсан бас нэг хүн бол гит хүн Иттаи юм. Давидын хүү Абсалом эцгийнхээ эсрэг босож, ард түмний зүрх сэтгэлийг өөртөө татаж байх үед Иттаи 600 эрчүүдийнхээ хамт Давид хааныг дэмжиж байв. Давид түүнийг харь хүн учир өөрийнх нь төлөө байлдах хэрэггүй гэдэг. Харин Иттаи: «ЭЗЭНий амьд буйгаар болон эзэн хааны амьд буйгаар тангараглая. Миний эзэн хаан амьд ч байсан, үхсэн ч байсан, хаа байсан газар нь боол би тантай хамт байна» гэж хэлдэг (2 Сам. 15:6, 18–21).

Херетчүүд, пелетчүүд, гитчүүд харь хүмүүс хэдий ч Ехова бол жинхэнэ Бурхан, Давид бол түүний томилсон нэгэн гэдгийг хүлээн зөвшөөрч байсан. Ийм үнэнч хүмүүс өөрийнх нь талд байсанд Давид хэчнээн их талархсан бол оо!