Хамт дэлгэрүүлж буй хүндээ тусалъя
1. Дэлгэрүүлэх ажилд хэн нэгэнтэй хамт оролцож байхдаа Паулын сэтгэлгээг хэрхэн дууриаж болох вэ?
1 Элч Паул итгэл нэгтнүүдтэйгээ цагаа өнгөрөөхийг «хамтдаа зоригжих» боломж гэж үздэг байжээ (Ром 1:12). Та дэлгэрүүлэх ажилд хамт оролцохдоо итгэл нэгтнээ зоригжуулж тусалдаг уу? Дуугүй явахын оронд сайн дэлгэрүүлэгч байхад юу тусалдаг тухай мэдэж байгаа зүйлээ хуваалцвал ямар вэ?
2. Дэлгэрүүлэх ажилд хамт яваа хүндээ өөртөө итгэлтэй болоход нь туслахын тулд юу хийж болох вэ? Ингэх нь чухал гэхийн учир юу вэ?
2 Өөртөө итгэх итгэлийг төрүүлээрэй: Зарим дэлгэрүүлэгчийн өөртөө итгэлгүй байгаа нь нүүрний хувирал, дууны өнгөнөөс нь мэдэгдэж болох юм. Тэднийг бид чин сэтгэлээсээ магтаж өөртөө итгэх итгэлийг төрүүлж болно. Өөртөө итгэлтэй болоход нь өөр яаж тусалж болох вэ? Нэгэн явуулын харгалзагч хамт яваа хүндээ өөрийнхөө сандардгийг, үүнийгээ ялан дийлэхийн тулд хэр олон удаа залбирдгаа ний нуугүй хэлж ярьдаг аж. Өөр Гэрч эрэгтэй өөртөө итгэлтэй байхад юу тус болсон тухай «Эхлээд инээмсэглэх хэрэгтэй. Заримдаа бүр инээмсэглэхэд минь туслаач гэж гуйн залбирах хэрэгтэй болдог» гэж хэлжээ. Өөртөө итгэлтэй дэлгэрүүлэхэд ямар нэг арга танд тус болсон уу? Үүнийгээ дэлгэрүүлэх ажилд хамт яваа хүнтэйгээ хуваалцаарай.
3. Дэлгэрүүлэх ажилд хамт яваа хүнээ илүү чадварлаг дэлгэрүүлэгч болоход нь туслахын тулд юу хуваалцаж болох вэ?
3 Дэлгэрүүлэх аргаа хуваалцаарай: Та хүний сонирхлыг татсан яриа өрнүүлэхийн тулд ямар оршил үг юм уу асуулт (орон нутагт болсон үйл явдлын тухай байж болох юм) үр дүнтэй байгааг олж мэдсэн үү? Оршил үгийн жишээг яаж өөрийн үгээр болгосон нь сайн үр дүнд хүрсэн бэ? Үүнийгээ хамт яваа хүндээ хэлээрэй (Сур. 27:17). Давтан уулзалт хийхээр явж байхдаа ямар зорилго, төлөвлөгөөтэй байгаагаа хэлээрэй. Библийн хичээлийн дараа, суралцагчийнхаа хэрэгцээнд нийцүүлж зарим нэг санааг болон Библийн зүйлийг онцолсныхоо, ямар нэг заах арга хэрэглэснийхээ учрыг тайлбарлаарай.
4. Итгэл нэгтэндээ туслахыг бодох ёстойн учир юу вэ?
4 І зууны сайн мэдээ дэлгэрүүлэгчид зөвхөн итгэгч бус хүнд туслах тухай бодож байгаагүй. Тэд бас бие биенээ урамшуулж зоригжуулахын чухлыг ойлгодог байсан (Үйлс 11:23; 15:32). Элч Паул залуу Тимотыг сургаж, сурч мэдсэн зүйлээ бусадтай хуваалцахыг уриалж байсан (2 Тим. 2:2). Дэлгэрүүлэхдээ итгэл нэгтэндээ сайныг үйлдэхээ мартахгүй байвал тэд маань илүү баяр хөөртэй, үр бүтээлтэй үйлчлэхээс гадна тэнгэрийн Эцэг маань баярлана (Евр. 13:15, 16).