Сайн уншиж чаддаггүй хүнд туслах нь
1. Сайн уншиж чаддаггүй хүнд Библи заах нь яагаад хэцүү байж болох вэ?
1 Бурхны тухай мэдэх хүсэлтэй ч сайн уншиж чаддаггүйгээсээ болоод Библи болон бусад ном хараад сүрддэг хүн байдаг. Ийм хүнтэй анх уулзаад «Библийн сургаал» ном өгөх хэрэггүй байж болох юм. Еховагийн тухай сайн мэддэг болоход тэдэнд хэрхэн туслах вэ? 20 гаруй улс оронд үйлчилдэг туршлагатай дэлгэрүүлэгчид энэ талаар юу гэж боддогийг нь сонирхъё.
2. Сайн уншиж чаддаггүй хүнд Библи заахад ямар гарын авлага сайн бэ?
2 Сайн уншиж чаддаггүй, бичиг үсэг мэддэггүй хүнтэй «Бурханд дуулгавартай байгтун» эсвэл «Бурханд дуулгавартай байж мөнх амьдрагтун» товхимлоор хичээл хийж болох юм. АНУ-д амьдардаг нэг эхлэгч энэ хоёр товхимлыг айлын хүнээр сонгуулдаг ажээ. Африкчууд асуултад хариулж биш, түүх яриулж юм заалгадаг болохоор уг хоёр товхимол хүмүүст их тохирдог гэж Кени дэх салбар мэдээлсэн байна. Ном уншаад асуултад хариулах нь ихэнх хүнд амар байхад боловсрол багатай хүнд амаргүй байдаг. Арай сайн уншиж чаддаг хүнтэй «Бурхнаас ирсэн сайн мэдээ», «Та Бурхны анд нөхөр болж болно!» товхимлоор, эсвэл «Библийн тухай өгүүлдэг миний ном»-оор хичээл хийдэг дэлгэрүүлэгч олон бий.
3. Уншиж чаддаггүй хүнд Библи заахдаа тэр хүний талаар юуг ойлгох нь тустай вэ?
3 Магтаарай: Уншиж чаддаггүйгээсээ болоод хүн санаа зовдог, өөрийгөө голдог байж болох юм. Тийм хүнд үнэнийг заахын тулд юуны өмнө ойлгож харьцах хэрэгтэй. Хүн уншиж чаддаггүй байлаа гээд юм сурч чадахгүй гэсэн үг биш учраас хүндэтгэж харьцаарай (1 Петр 3:15). Хичээл зүтгэл нь үр шимээ өгч, Еховатай дотносож байгаагаа суралцагч ойлгохлоороо улам ихийг сурах хүсэлтэй болдог. Тиймээс дандаа магтаарай.
Уншиж чаддаггүйгээсээ болоод хүн санаа зовдог, өөрийгөө голдог байж болох юм. Тийм хүнд үнэнийг заахын тулд юуны өмнө ойлгож харьцах хэрэгтэй
4. Сайн уншиж чаддаггүй хүнд хичээлдээ бэлдэхийг яаж зөвлөх вэ?
4 Хичээлдээ бэлдэж байхыг сайн уншиж чаддаггүй суралцагчдаа ч зөвлөж байх хэрэгтэй. Өмнөд Африкийн зарим дэлгэрүүлэгч, гэрийнхнээрээ уншуулж хичээлдээ бэлдээрэй гэж суралцагчдадаа хэлдэг ажээ. Хариултын доогуур зурвал дараа хариулахад хэчнээн амар байдгийг Британийн нэг дэлгэрүүлэгч суралцагчдаа ойлгуулахын тулд хичээлийн үеэр номоо түр өгдөг гэнэ. Энэтхэгт амьдардаг нэг Гэрч суралцагчдадаа дараагийн долоо хоногт үзэх хичээлийн зургийг үзэхийг уриалж эргэцүүлэн бодуулдаг ажээ.
5. Хичээл заахдаа хэрхэн хүлээцтэй байх вэ?
5 Хүлээцтэй байгаарай. Суралцагч үзэж байгаа хичээлийнхээ гол санааг сайн ойлгодог байх нь туйлын чухал. Тиймээс эхэн үедээ 10-аас 15 минут ярилцахад л хангалттай. Нэг дор их юм үзэлгүй, цөөхөн хэдэн догол мөр үзэх нь зүйтэй. Суралцагч удаан уншдаг бол хүлээцтэй байгаарай. Еховад талархдаг болохын хэрээр илүү сайн уншдаг болох гэж чармайх биз ээ. Чадвараа сайжруулахад нь туслахын тулд аль болох эртнээс цуглаанд урих хэрэгтэй.
6. Уншиж сурч байгаа хүнд яаж туслах вэ?
6 Уншаад сурчихвал илүү хурдан ахиж дэвшинэ (Дуу. 1:1–3). Суралцагч тань сурч чадахгүй нь гээд урам хугарвал хийж чаддаг болсон зүйлийг нь сануулж, зоригжуулаарай. Шантрахгүй байвал Ехова заавал ивээнэ гэдгийг хэлээрэй. Тусламж гуйн залбирахын чухлыг ойлгуулаарай (Сур. 16:3; 1 Иох. 5:14, 15). Хүрч болохоор, шат дараалсан зорилго тавьж байхыг Британид амьдардаг зарим дэлгэрүүлэгч суралцагчдадаа уриалдаг аж. Эхлээд цагаан толгойгоо сайн сурч, Библийн зүйл олдог болох, цаашлаад уншихад хялбар ном хэвлэл уншдаг болох зорилго тавьж болох юм. Уншиж сурч байгаа хүнд тусалъя гэвэл яаж уншихыг заагаад зогсохгүй, сурах хүслийг нь бадраах хэрэгтэй.
7. Сайн уншиж чаддаггүй хүнд Библийн хичээл заахаас төвөгшөөх ёсгүйн учир юу вэ?
7 Ехова боловсрол багатай хүнийг дорд үздэггүй (Иов 34:19). Харин хүний зүрхийг шалгадаг (Ш.дээд 28:9). Тиймээс бид сайн уншиж чаддаггүй хүнд Библийн хичээл заахаас төвөгшөөх ёсгүй. Библийн хичээл эхлэхэд тустай гарын авлага олон бий. Яваандаа «Библийн сургаал» номыг үзээд Библийг сайн ойлгодог болох биз ээ.