Залуус аа, дэлхийн сүнсийг эсэргүүцэцгээе
«Бид дэлхийн сүнсийг бус, харин Бурхнаас Сүнсийг хүлээн авсан» (1 КОРИНТ 2:12).
1, 2. а) Еховагийн Гэрчүүдийн хурлын охид хөвгүүд дэлхийн залуусаас аль хэр ялгаатай вэ? б) Ихэнх залуу Гэрчүүд магтаалын ямар халуун дулаан үг сонсдог вэ?
«МАНАЙ залуучууд гутрангуй, тоомжиргүй, самуун болжээ. Шүүх хурлын протоколоор бол бусдыг хэл амаар доромжилж, заналхийлсэн хэргээр ял сонссон насанд хүрээгүй хүүхдүүдийн тоо [өмнөх оныхтой харьцуулахад] 22 хувиар өсчээ... 60-аад оны дунд үеэс хойш хүүхдүүдийн дунд амиа хорлох явдал гурав дахин өссөн байна... Үеүдийн хооронд гарсан хагарал нь том хэмжээний ангал болжээ. Харин залуучууд хар тамхи, архи дарсны хорт нөлөөнд автан тэрхүү хар ангалд унах нь улам бүр нэмэгджээ» гэж австралийн «Сан-жеральд» сонин мэдэгдсэн байна. Гэвч ийм явдал ганцхан оронд тохиолдоод байгаа юм биш ээ. Дэлхий даяар эцэг эх, багш, сэтгэл судлалын салбарын мэргэжилтнүүд залуу үеийнхэнд сэтгэл зовниж байна.
2 Өнөөгийн залуусын ихэнх хэсэг Еховагийн Гэрчүүдийн хурлын ёс суртахууны хувьд цэвэр ариун охид хөвгүүдээс юутай их ялгарна вэ! Бид тэднийг төгс гэж хэлмээргүй байна. Тэд ч мөн л ялгаагүй «идэр насныхаа хүслүүд»-тэй тэмцэх хэрэгтэй болдог (2 Тимот 2:22). Гэвч, эдгээр залуус бүхэлдээ зөвийн төлөө баатарлагаар зогсдог бөгөөд дэлхийн дарамт шахалтад бууж өгөхийг хүсдэггүй юм. Сатаны «заль мэхийн» эсрэг дайнд ялагч христосын шашинтан залуус та бүхнийг чин сэтгэлээсээ магтъя! (Эфэс 6:11). Бид ч бас элч Иоханы адил «Залуус аа [охид оо]. Та нар хүчтэй бөгөөд Бурхны үг та нарын дотор байгаа ба бузарлагчийг дийлсэн тул би та нарт бичсэн» гэж хэлмээр байна (1 Иохан 2:14).
3. «Сүнс» гэдэг үг нь ямар утгатай байж болох вэ?
3 Гэхдээ та нар бузарлагчтай тулалдаад, ялж гарахын тулд Библид «дэлхийн сүнс» гэж нэрлэдэг зүйлийг хамаг чадлаараа эсэргүүцэх хэрэгтэй (1 Коринт 2:12). Толь бичигт бичсэнээр, «сүнс» гэдэг үг нь «зан араншин, бодол санааны хэв маяг гэх зэргийг тодорхойлдог зүйл» гэсэн утгатай байж болдог аж. Жишээлбэл, өөдгүй зантай хүнийг муу «сүнс» гаргаж байна гэж хэлж болох юм. «Сүнс», өөрөөр хэлбэл, хүний оюун ухааны байдал буюу бодол санааны хэв маягийг тодорхойлдог зүйл нь хүний гаргах шийдвэрүүдэд нөлөөлж, үйл үйлдүүлэн, үг хэлүүлдэг. Зарим хүнд байдаг тэр «сүнс» өөр бүхэл бүтэн бүлэг хүмүүст байж байдаг нь сонирхолтой. Элч Паул хэсэг христосын шашинтнуудад «Эзэн Есүс Христийн ивээл та нарын сүнстэй хамт байх болтугай» хэмээн бичжээ (Филемон 25). Харин энэ дэлхийнхэн ямар сүнстэй вэ? «Бүх дэлхий нь [Сатан Диабол болох] бузарлагчийн дотор байдаг» учраас дэлхийн сүнс эрүүл бус гэдэг нь ойлгомжтой (1 Иохан 5:19).
Дэлхийн сүнс гэж юу болох тухай
4, 5. а) Эфэсийн хурлын гишүүдийг христосын шашинтан болохоос нь өмнө ямар сүнс нөлөөлж байсан бэ? б) Хэн «агаарын эрх мэдлийн захирагч» ба «агаар» гэж юу вэ?
4 Паул: «Та нар өөрсдийн гэм нүгэл хийгээд нүглүүд дотор үхсэн байв. Та нар урьд нь энэ дэлхийн заншлын дагуу гэм нүгэл, нүглүүд дотроо явж, агаарын эрх мэдэлтнүүдийн [«мэдлийн», ШЕ] захирагч эдүгээ дуулгаваргүй байдлын хүүхдүүд дотор ажиллагч сүнсийг дагаж явсан. Тэдний дунд бид ч урьд нь бултаараа махан биеийнхээ хүсэл тачаалууд дотор амьдарч байв. Ингэхдээ санаа сэтгэлийн, махан биеийн хүслүүдээ өөгшүүлж, мөн бусдын адил төрөлхийн уур хилэнгийн хүүхдүүд байсан» гэж бичжээ (Эфэс 2:1–3).
5 Эфэс дахь христосын шашинтнууд анх, христосын шашны замыг мэдэхээсээ өмнө «агаарын эрх мэдлийн захирагч» Сатан Диаболыг өөрийн мэдэлгүй дагаж явсан. «Агаар» бол Сатан болон түүний албидын оршин байдаг тэр орчин биш юм. Паулын эдгээр үгийг бичиж байх үед Сатан Диабол болон түүний албид тэнгэрт очих боломжтой хэвээрээ байсан. (Иоб 1:6; Илчлэлт 12:7–12 харьцуул.) «Агаар» гэдэг үг нь Сатаны дэлхийд зонхилж байдаг оюун ухааны байдал буюу сүнс гэсэн утгатай. (Илчлэлт 16:17–21 харьцуул.) Энэхүү сүнс нь биднийг агаар лугаа адил хаа сайгүй хүрээлж байдаг.
6. «Агаарын эрх мэдэл» гэж юу вэ? Залуучуудын үлэмжхэн хэсэг нь түүнд хэрхэн захирагддаг вэ?
6 Гэтэл «агаарын эрх мэдэл» гэж юу вэ? Үүнийг, хүмүүст «агаарын» үзүүлдэг хүчтэй нөлөөлөл гэж үздэг бололтой. Энэ сүнс «эдүгээ дуулгаваргүй байдлын хүүхдүүд дотор ажиллагч» гэж Паул хэлсэн буй. Тэгэхлээр дэлхийн сүнс нь дуулгаваргүй байдлын болоод үймээний сүнсийг төрүүлдэг ба харин дээр өгүүлсэн эрх мэдэл нь юуны өмнө үе тэнгийнхний дарамт шахалтаар илэрдэг. «Сургууль дээр болдог бүх л юм чамайг жижиг ч атугай үймээнд оролцуулах гээд байдаг байх. Харин чи түүнд автахгүй, биеэ зөв аваад явбал хүүхдүүд чамайг хүндэлдэг болно» гэж нэгэн Гэрч охин ярьсан байна.
Дэлхийн сүнс хэрхэн илэрдэг тухай
7–9. а) Өнөөгийн залуусын дунд дэлхийн сүнс хэрхэн илэрдэг тухай ярина уу. б) Таны суудаг газар иймэрхүү зүйл тохиолдож байв уу?
7 Өнөөгийн залуусын дунд дэлхийн сүнс хэрхэн илэрдэг вэ? Шударга бус явдал болон үймээн самууны хэлбэрээр илэрдэг. Коллежийн ахлах ба бага ангид суралцагчдын 70 хувь нь дунд сургуульд байхдаа заль мэх хэрэглэдэг байсан тухайгаа ярьсныг нэгэн сэтгүүлд нийтэлжээ. Түүнээс гадна бусдыг үл хүндэтгэх, егөөдөн дайрах болон бүдүүлэг үг яриа хэрэглэх нь ихэсжээ. Тийм ээ, зарим нэг тохиолдолд Иоб элч Паул нар зүй ёсоор зэвүүцэж буйгаа илэрхийлэн зарим хүмүүст егөөдөл мэт санагдахаар үг хэлдэг байсан (Иоб 12:2; 2 Коринт 12:13). Харин, ихэнх залуусын амнаас доромжилж байгаа юм шиг үл энэрсэн, егөөдсөн өнгө аястай үгс байнга сонсогддог болжээ.
8 Дэлхийн сүнс чөлөөт цагаа хэтрүүлэх байдлаар бас илэрдэг. Залуу үеийнхэн шөнийн клуб, рэйв-дисконд (шөнөжингөө бүжиглэдэг бүжиг) ч юм уу өөр хаа нэгтээ хэт дарвин цэнгэх дуртай. Мөн түүнчлэн хувцас хунар, гадаад байдлаараа бусдаас онцгойрох явдал түгээмэл болжээ. Орчин үеийн олон хөвгүүд охид «хип-хоп»-ын хэлхгэр загварыг эрхэмлэх ч юм уу, эсвэл бусдаас ялгарах гэж шивээс тавиулах зэргээр энэ дэлхийн самуун сүнс өөрсдөд нь ойрхон байгааг гэрчилдэг. (Ром 6:16 харьцуул.) Мөн дэлхийн сүнс баяжих хүсэлд хэтэрхий автах байдлаар илэрнэ. Шинжлэх ухааны нэгэн хялбарчилсан сэтгүүлд бичсэнээр бол «худалдаачид хүүхдүүдийг реклам болон маш их хэмжээний янз бүрийн бүтээгдэхүүнээрээ тал бүрээс нь бөмбөгдөж байна». Залуу америк хүн сургуулиа төгсөх үедээ телевизийн сувгаар 360 000 реклам үзсэн байдаг байна. Үе тэнгийнхэн ч гэсэн бие биенээ эд юмтай болоход шавдуулдаг ажээ. «Бүгд л чиний цамц, хүрэм, жинс аль фирмийнх вэ гэж эцэс төгсгөлгүй асуудаг» хэмээн 14 настай нэгэн охин ярьсан юм.
9 Хүмүүсийг буруу явдалд турхирахын тулд Сатан бүр библийн цаг үеэс зохисгүй дуу хөгжим ашиглаж байсан. (Египетээс гарсан нь 32:17–19; Дуулал 69:12; Исаиа 23:16 харьцуул.) Тиймд сексийг далд утгаар илэрхийлсэн эсвэл илэрхий секс үг хэллэгтэй, мөн түүнчлэн ичгүүр сонжуургүйгээр өдөж сөдсөн хэмнэлтэй дуу хөгжим олон хүнд таалагддаг нь гайхмаар зүйл биш. Энэ дэлхийн сүнс бэлгийн садар самуун үйлээр илэрдэг (1 Коринт 6:9–11). «Нью-Йорк таймс» сонинд: «Өсвөр насны хүүхдүүдийн хувьд секс бараг ёс юм шиг, түүнгүйгээр үеийнхэндээ тоогдохгүй юм шиг болчихжээ... Ахлах ангийнхны гуравны хоёроос илүү нь бэлгийн харьцаанд аль эрт орчихсон ажээ» гэж мэдэгджээ. «Уолл стрит жорнэл»-ийн нэгэн нийтлэлд 8-аас 12 хүртэлх насны хүүхдүүд «сексийн хувьд илүү идэвхтэй болжээ» гэсэн баримт гаргасан байна. Сурган хүмүүжүүлэгч асан нэгэн: «Бид 6-р ангийн жирэмсэн хүүхдүүдтэй хэдийнээ тааралдах болсон» гэж ярьжээ.
Дэлхийн сүнсийг эсэргүүцэх нь
10. Христосын шашинтан гэр бүлийн зарим залуучууд дэлхийн сэтгэлгээний нөлөөнд хэрхэн автсан бэ?
10 Хэдийгээр энэ нь тун тоогүй хэрэг боловч христосын шашинтан зарим залуус дэлхийн сүнсний нөлөөнд автдаг. «Эцэг эх болон бусад христосын шашинтнуудын дэргэд би өөрийгөө үлгэр жишээ авч явдаг байлаа. Гэвч, бодит байдал дээрээ амьдрал минь өөр байсан юм» гэж нэгэн япон охин үнэнээ хэлжээ. Харин кенигийн нэг охин хэлэхдээ «нэгэн үе би амьдралын хоёр хэв маягаар амьдардаг байсан. Ингэхдээ үдэшлэг хэсэн тэнүүчилж, рок хөгжим сонсож, найз нөхөд байхын аргагүй хүмүүстэй үерхэж нөхөрлөдөг байлаа. Энэ нь сайн юм биш гэдгийг би мэдэж байсан хэрнээ энэ талаар аль болох бодохгүй байхыг хичээж, яваандаа би ингэхээ больчихно гэж санаж байсан ч бүх юм улам дордож байлаа» гэж өгүүлжээ. Нэгэн герман бүсгүй «би муу хүүхдүүдтэй үерхсэнээс бүх юм эхэлсэн. Тамхи татдаг болсон. Би эцэг эхийгээ хохироох гэж хичээж байсан ч харин зөвхөн өөрийгөө л хохироож байсан юм байна» гэж ярьжээ.
11. Арван тагнуул таагүй мэдээ авчирсан тэр үед ч бусдыг дагахгүй байхад Калебт юу тус болсон бэ?
11 Гэсэн ч энэ дэлхийн сүнсийг сөрөн зогсох, түүнээс татгалзах бүрэн боломжтой юм. Тэртээ өнгөрөн одсон өмнөх үеэс Калебыг жишээ болгон татъя. Өөдгүй хулчгар арван тагнуул Амлагдсан газар нутгийн талаар таагүй мэдээ авчрахад нь Калеб болон Иошуа нар зүрх алдан эмээсэнгүй мөн бусад олонхыг ч дагасангүй. Тэд «Бидний тагнан тандахаар очсон газар нутаг үнэхээрийн сайхан ажээ. Хэрэв Ехова биднийг сэтгэлдээ таалан үзвэл сүү бал урсдаг тэр газар нутагт биднийг заавал хүргэнэ» гэж зоригтойгоор зарлан тунхаглаж байлаа (Тооллого 14:7, 8, ШЕ). Тийм тууштай байхад нь Калебт юу тус болов оо? Түүний тухай: «Түүнд өөр сүнс байсан юм» гэж Ехова хэлсэн (Тооллого 14:24, ШЕ).
«Өөр сүнстэй» байх
12. Ямар учраас бид яриагаараа «өөр сүнстэй» байх нь чухал вэ?
12 Өнөөдөр энэ дэлхийнхнээс ялгарам «өөр сүнс» буюу өөр сэтгэлгээтэй байхад эр зориг, хүч чадал хэрэгтэй болдог. «Өөр сүнстэй» байх нэг арга зам бол элдэв егөөдөл ба үл хүндэтгэсэн үг ярианаас зайлсхийх явдал юм. «Егөөдөх» гэдэг үг нь «махыг нохой шиг тасдан зулгаах» гэсэн утгатай грек үйл үгнээс гаралтай нь тун ч сонирхолтой (Галат 5:15 харьцуул). Нохой шүдээрээ махыг яснаас тасдан зулгаадаг шиг егөөдөн «хошигнох» нь бусдыг хүн чанаргүй болгож болно. Колоссай 3:8-д «бүгдийг нь зайлуулж хаягтун. Энэ нь уур, хилэн, хорон санаа, гүтгэлэг, гүжирдэх болон амнаасаа хараал зүхэл, жигшүүрт үгийг гарган хаях болой» хэмээн биднийг уриалдаг. Мөн Сургаалт үгс 10:19-т: «Үг олшроход нүгэл зайлшгүй. Гэхдээ амаа захирдаг хүн нь мэргэн байна» гэж бичсэн байдаг билээ. Жишээ нь, хэрэв хэн нэгэн хүн таныг доромжилвол та биеэ барьж, тэр хүнтэйгээ ганцаарчлан тайван бөгөөд зөөлөн аядуу ярилцаж, «түүнд зүүн хацраа тавьж өг» (Матай 5:39; Сургаалт үгс 15:1).
13. Залуучууд эд материалд хэрхэн дүн нуруутай хандах хэрэгтэй вэ?
13 «Өөр сүнстэй» байх бас нэг арга бол эд материалд дүн нуруутай хандах явдал юм. Чанартай сайн эд зүйлтэй байхыг хүсэх нь зүйн хэрэг. Есүс Христ ч гэсэн үгүй ядахдаа сайн чанарын ганц хувцастай байсан бололтой (Иохан 19:23, 24). Харин аливааг эзэмших гэсэн бодол толгойноос чинь салахаа больж, эцэг эхийнхээ хүч хүрэхгүй зүйлийг байнга нэхэн шаардах юм уу, эсвэл зүгээр л үе тэнгийнхнийгээ дуурайхыг хүсээд байвал энэ нь дэлхийн сүнс чамайг чиний боддогоос ч илүү ноёрхдог гэсэн үг байж болох юм. «Дэлхийд байгаа бүхэн тухайлбал, махан биеийн хүсэл тачаал, нүдний хүсэл тачаал, амьдралын бардам бахдал нь Эцгээс ирсэн бус, харин энэ дэлхийгээс ирсэн юм» гэж Библид байдаг. Дэлхийн ашиг хонжоо хайгч сүнсний нөлөөнд бүү автаарай! Эдэлж эзэмшдэг зүйлдээ сэтгэл хангалуун байж сураарай (1 Иохан 2:16; 1 Тимот 6:8–10).
14. а) Исаиагийн үед Бурхны ард түмэн амралт чөлөөт цагт хэрхэн дүн нуруугүй хандаж байсан бэ? б) Зарим христосын шашинтан залууст шөнийн клубт болдог эмх замбараагүй зугаа цэнгэлийн үеэр ямар аюул тулгарсан бэ?
14 Тэрчлэн, амралт чөлөөт цаг хэмжээ хязгаартай байх нь чухал. «Хатуу дарсны хойноос хөөцөлдөхийн тул өглөө эртлэн босон, дарсанд цохиулах хүртэл орой болтол байгчид гаслантай яа! Тэдний найранд лир, босоо ятга, хэнгэрэг, лимбэ дарс байна. Гэвч тэд Эзний үйлсийг үл анхаарч, Түүний гарын бүтээлийг тунгааж үл бодно» хэмээн зөнч Исаиа тунхаглажээ (Исаиа 5:11, 12). Христосын шашинтан зарим залуус иймэрхүү эмх замбараагүй зугаа цэнгэлд оролцдог нь харамсалтай хэдий ч үнэн юм. Хэдэн Гэрчээс залуучуудын шөнийн клубт чухам юу болдог талаар асуухад нэгэн залуухан гэрч эмэгтэй: «Зодоон нүдээн байнга болдог. Би ч гэсэн орооцолдчихсон явж байлаа» гэж өгүүлжээ. Бас нэгэн залуу Гэрч: «Тэнд архи дарс ууж, тамхи татах гэх мэтийн л юм болдог» гэж нэмж хэлсэн юм. Өөр нэгэн христосын шашинтан залуу: «Тэнд бөөн архидалт болдог. Тэд хагас ухаантай хүмүүс шиг л байдаг! Хар тамхи хэрэглэх гээд ер нь тэнд олон л муу муухай юм болдог. Тэнд очиход надад нөлөөлөхгүй гэж бодох нь өөрийгөө хуурч байгаа хэрэг» гэж хүлээн зөвшөөрчээ. Тийм болохоор Библи эмх замбараагүй зугаа цэнгэл буюу «утга учиргүй найр наадмыг» «махан биеийн үйлсэд» зүгээр ч нэг хамруулдаггүй юм (Галат 5:19–21; Ром 13:13).
15. Амралт чөлөөт цагт дүн нуруутай хандах ямар хандлага Библид байдаг вэ?
15 Хор уршиг бүхий зугаа цэнгэлээс зайлсхийнэ гэдэг нь ямар ч баяр хөөргүй амьдралыг өөртөө хүчээр тулгана гэсэн үг биш ээ. Бид «аз жаргалын Бурхныг» шүтдэг билээ. Тиймээс ч Бурхан чамайг залуу насны баяр цэнгэлийг амсаасай гэж хүсдэг (1 Тимот 1:11, ШЕ; Номлогчийн үгс 11:9). «Зугаа цэнгэлд дурлагч нь ядуурна» гэж Библид урьдчилан сануулсан байдаг (Сургаалт үгс 21:17). Тийм ээ, хэрэв чи амралт чөлөөт цагийг тэргүүн байранд авч үзвэл сүнслэгээр сульдан ядуурна. Учир иймд амрахдаа ч Библийн зарчмуудыг баримтлаарай. Цагийг өөртөө хор уршигтайгаар бус харин үр ашигтай, таатай өнгөрөөх олон арга зам байдаг.
16. Христосын шашинтан охид хөвгүүд бусдаас өөр болохоо яаж харуулж болох вэ?
16 Хувцас болон гадаад дүр төрхөөрөө даруу байж, дэлхийн загвар маягийг дуурайхгүй байх нь чамайг бусдаас өөр гэдгийг илтгэн харуулна (Ром 12:2; 1 Тимот 2:9). Түүнчлэн дуу хөгжмийг шилж сонгохдоо ч хянуур байх нь үүнд хамаарна (Филиппой 4:8, 9). «Надад хаявал зохих хөгжмийн бичлэг байдаг. Гэхдээ тэднийг сонсоход дааня сайхан шүү» гэж нэгэн христосын шашинтан залуу үнэнээ хэлжээ. Өөр нэг залуу: «Би дуу хөгжимд хэт их дуртай болохоор энэ нь миний хувьд занга юм. Иймэрхүү хөгжим сонсох нь тийм зөв хэрэг биш ээ гэдгийг ойлгож эхлэхэд, эсвэл эцэг эх минь энэ талаар анхааруулахад оюун ухаанаа зүрх сэтгэлээсээ дээгүүр тавих хэрэгтэй болдог. Яагаад гэвэл би зүрх сэтгэлээсээ энэ хөгжимд дуртай юм» гэсэн санааг хэлжээ. Залуус аа, Сатаны «далдуур хөнөөх санааг мэдэхгүй байж» болохгүй шүү! (2 Коринт 2:11, ШЕ). Тэрээр хөгжмийн тусламжтайгаар залуу христосын шашинтнуудыг Еховагаас холдуулан хөндийрүүлэхийг хичээдэг! Харуулын Цамхаг Нийгэмлэгийн хэвлэлд рэп, хэви металл, альтернатив рок зэрэг хөгжмийн урсгалын талаар нийтлэлүүд гарч байсан. Гэвч, манай хэвлэлд шинээр үүсэн гарч буй хөгжмийн бүх урсгал чиглэлийн талаар шүүн хэлэлцэх боломжгүй билээ. Тийм учраас дуу хөгжим шилж сонгохдоо «хэрсүү» чанар хийгээд «ухааныг» удирдлагаа болгоорой (Сургаалт үгс 2:11).
17. а) Порнея гэж юу ба үүнд ямар үйлдлүүд хамаардаг вэ? б) Ёс суртахууны талаар Бурхны хүсэл таалал ямар вэ?
17 Эцэст нь та нар ёс суртахууны цэвэр байдлаа хадгалах ёстой. «Завхай явдлаас зайлагтун» гэж Библи биднээс уриалдаг (1 Коринт 6:18, ШГ). «Завхайрал» гэсэн утга бүхий грек хэлний порнея гэдэг үг нь бэлэг эрхтэнг оролдох үйл ажиллагааг оролцуулаад гэр бүлээс гадуурх бэлгийн хориотой аливаа харьцааг илэрхийлдэг. Үүнд хэл амаараа болон гар хуруугаараа бэлэг эрхтнийг оролдон дур хүслээ хангах зэрэг үйл ажиллагаа хамаардаг. Зарим христосын шашинтан залуус ийм зүйлийг завхайрал гэж үзэлгүйгээр өөрсдөө үйлддэг байжээ. Гэвч, Бурхны Үг: «Учир нь энэ бол Бурхны хүсэл мөн. Энэ нь юу гэвэл та нарын ариусал, ёс бусаар эр эм болохыг [завхайрлыг] тэвчих, хүн бүр ариусал хийгээд шударга байдал дотор өөрийн савыг яаж эзэмдэхийг мэдэхийн тулд» гэж тов тодорхой хэлдэг (1 Тэсалоник 4:3, 4).
18. а) Охид хөвгүүд дэлхийн сүнсээр бузарлагдахаас хэрхэн зайлсхийж болох вэ? б) Дараагийн нийтлэлд юун тухай хэлэлцэх вэ?
18 Тийм ээ, Еховагийн тусламжтайгаар чи дэлхийн сүнсээр бузарлагдахгүйгээр үлдэж чадна! (1 Пэтр 5:10). Гэвч, Сатан ихэнхдээ үхлийн зангаа өнгөлөн далдалдаг учраас аюулыг илрүүлэхийн тулд заримдаа ялгах чадвартай байхыг шаарддаг. Дараагийн нийтлэл маань залуучуудыг нарийн гярхай чанараа хөгжүүлэхэд нь туслах зорилготой.
Давтах асуултууд
◻ «Дэлхийн сүнс» гэж юу ба хүмүүсийг чухам яаж «ноёлдог» вэ?
◻ Өнөөгийн залуучуудын дунд дэлхийн сүнс хэрхэн илэрдэг вэ?
◻ Үг яриа болон амралт чөлөөт цагийн талаар христосын шашинтан залуус хэрхэн «өөр сүнстэй» байж болох вэ?
◻ Ёс суртахуун болон дуу хөгжмийн хувьд христосын шашинтан залуус хэрхэн яаж «өөр сүнстэй» байж болох вэ?