8 Mweddelo

ENATAPULELA DDI?

Ababi enaavaha aniwa mweddelo wapama enowera dhithu enawogiwa. Kujhehe wihina mwanawo anerege owoga ebaribari, wula muthu adha vaade vawo omwaddelaga wi awoge egi: “Were gihivenyavo.”

“Ehikala madhu enawogiwa ayi: ‘Weregena dhithu ginawogimi, kuweregena dhithu ginerimina.’ Madhu ala kinaatxova anamwani. Aliwa eli ninga esponja enanula dhithu dhatedhene nnawogihu ni nnerihuna. Naahudhiha makalelo owerana ethu vano enonoona neragana makalelo mamodhaya aliwa enere onisumulula.” — David.

BIBLIYA ANAWOGA EGI: ‘We onalaleya wegi: ‘Kuwiye, onowiya?’ — Romanos 2:21.

EKALELE DDI YOFUNEYA?

Anamwani enathabwa othukula mweddelo wa makolwiwa ohiya wa akwiwa oskola obe avamuruddani. Bumwahaya ababi, anafwanelela wahudhiha ahima weragana dhithu dhapama di nyu. Mbwenye, sapama weragana dhithu munahudhihinyu.

“Malabo mamodha iyo podi owogaga ethu emodhave dila dhowinjhivadhene nihinonaga akala anihu enovuruwana obe naari. Mbwenye odha ohiyave werana ele onahudhihiwe, aliwa enere wusumulula. Anamwani enowoona dhithu dhatedhene nnerihuna, ni ndhedha nnerihuna wiipini.” — Nicole.

BIBLIYA ANAWOGA EGI: ‘Thotho dhinadhela odhulu . . . sohikanna ogwalagwambi.’ — Tiago 3:17.

KI ONERE DDI?

Wubuwele mweddelo oneeddiha egumawo. Onadhiveliwa woona vidiyu ni porogarama baani? Onaweddiha aavi amudhawo? Athu baani onandaniwena? Onowapwatha athu amodha? Ni madhu okweya, wikohe ayi: Gili muthu ginafunimi wihina mwanaga akale?

“Miyo ni mamunaga kannawaddihedha anihu oharaga mweddelo nahinandihu ohara.” — Christine.

Waviriganiha olobe nikurumuwelo. Anawo ehinona wi kulogomane. “Waloba nikurumuwelo” amudhawo, onere wahudhiha okala ororomeleya ni owiyeviha.

“Anihu enohowela onivuruwana nrumedhaga wihina nihiviriganiha teto negi ogilevelele. Naherana ndo, yaviriganiha kinawogege.” — Robin.