Mutugumano dhehu dhineedda addi?

Makiristawu oobajha yatugumanaga aliwa yoowiiba, yoolobela, yoowileri ni yohudhera dholebela, mbwenye kiyahara dhilemelelo dhaathu. (1 Coríntios 14:26) Mmutugumanoni mwehu onafwanyamo ethu emodhave.

Museludha dhinakumela mBibliyani dhinonikavihera labo ni labo. Kadda mulogo onotugumana omagomelo wa sumana wi evuruwane Mwaha wa Vathaddo onna mutala 30, onawoga makalelo dholebela dhinanikaviheriwa labo ni labo ni makalelo enawogiiwa mudhidhi nnakalihu. Athu aatene enokongomedhiwa ohariha dholebela dhinileriwa mBibliyani. Wamala mwaha wa vathaddo onaharela Ohudhera wa “A Sentinela”, epaddi ela enna woora modha, athu aatene podi ovenyiha mono wi evahe dhowakuladhiwa. Enalabihedhiwa yohudhera modha ya A Sentinela enanikavihera ohara dholaga dha Bibliya. Yohudhera emodhave onozusiwa mulogo dhowakwana 110 000 elabo yatene.

Nnowakela dhokavihera wi niwomihedhe makalelo ehu ohudhiha. Nnokanna mutugumano vaari va sumana oniithaniwa Egumi ni Mabasa ehu Eekiristawu. Muselu dhinahudheriwa dhinakumela Mwana Livuru Na Mutugumano, nnakelihu kadda mweri. Mutugumanoya onagawiwa epaddi tharu. Yobajha enithaniwa Dhorela dha madhu a mulugu, enonikavihera ononelamo pama yolebela ya Bibliya addibila yiileriwa vaade. Epaddi yoharela enithaniwa Wilibihere mmabasani oolaleya. Epaddi ela enokanna anamahudhera enerana epaddi dhewa dhinanikavihera othapanya naathu wodhela Bibliya. Yamala ddibila athomiwe anowogamo makalelo okala anamileri ni anamahudhiha apama. (1 Timóteo 4:13) Epaddi yogomihedha enithaniwa Mweddelo wehu wekiristawu, enonikavihera makalelo ohara dholaga dha Bibliya labo ni labo. Epaddi ela ehikanna makoho ni dhowakula dhinenjhedhedha enonelo yehu ya Bibliya.

Wadhowa omutugumano wehu mohanganyedha, onere otikina dhohudhiha dha thima dha mBibliyani. — Isaías 54:13.

• Wadhowa omutugumanoni dha Anamona a Yehova onajheha ohudherewo ddi?

• Mutugumano dhehu onafuniwe odhowa woona sivi?